Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: 2-я книга Паралипоменон
(шрифт на основе старой кириллицы)
На церковно-славянском языке гражданским шрифтом
Глава: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36
1 И укрепися соломон сын давидов на царстве своем, и господь бог его (бе) с ним и возвеличи его в высоту.
2 И рече соломон ко всему израилю, тысящником и сотником, и судиям и всем началником пред израилем.
3 И иде соломон и все множество в вышний гаваон, идеже бе скиния свидения божия, юже сотвори моисей раб божий в пустыни.
4 Кивот же господень принесе давид от града кариафиарима на место, еже уготова ему давид, яко водрузи ему скинию во иерусалиме.
5 И олтарь медян, егоже содела веселеил сынъ урии сына орова, ту бе пред скиниею господнею и взыска его соломон и вся церковь.
6 Вознесе же ту соломон на олтари медянем предъ господем, иже в скинии свидения, и принесе на немъ тысящу всесожжений.
7 В ту нощь явися господь соломону и рече ему: проси (что хощеши) да дам тебе.
8 Рече же соломон к богу: ты сотворил еси с давидомъ отцем моим милосердие велико и поставил мя еси царя вместо его:
9 и ныне, господи боже, да исполнится слово твое к давиду отцу моему, ты бо мене сотворил царя над людьми многими, якоже прах земный:
10 ныне даждь мне премудрость и разум, да вниду и изыду пред людьми твоими сими, кто бо может судити сих людий твоих многихъ?
11 И рече бог к соломону: понеже бысть сие в сердцы твоем, и не попросил еси богатства имений, ниже славы, ниже душ противящихся тебе, и дний многихъ не просил еси, но просил еси себе премудрости и разума, да судити можеши люди моя, над нимиже поставихъ тя царя,
12 премудрость и разум даю тебе, богатство же и имения и славу дам тебе, яко не бысть в царех преждебывшихъ тебе подобен тебе, и по тебе такожде не будет.
13 Прииде же соломон от вышняго гаваона во иерусалимъ пред скинию свидения и царствова над израилем.
14 И собра соломон колесницы и конники, и быша ему тысяща и четыреста колесниц и дванадесять тысящ конник: и остави их во градех колесничных, людие же с царемъ во иерусалиме.
15 И положи царь сребро и злато во иерусалиме яко камение, кедры же во иудеи яко черничие, еже на поли во множестве.
16 Исхождение же коней соломоновых из египта ценою купцов царских, иже хождаху и куповаху.
17 И восхождаху и привождаху из египта колесницу едину за шесть сот сребреник, и коня за сто и пятьдесят сребреник: такожде и от всех царств хеттейскихъ и от царей сирийских рукама их приводима бываху.
1 И повеле соломон созидати дом имени господню и дом царству своему.
2 И собра царь соломон седмьдесят тысящ мужей носящихъ времена и осмьдесят тысящах каменосечцев в горах, приставленных же над ними три тысящи и шесть сот.
3 И посла соломон к хираму царю тирску, глаголя: якоже сотворил еси с давидом отцем моим и послалъ еси ему кедры, да созиждет себе дом, в немже ему обитати,
4 и се, аз сын его созидаю дом имени господа бога моего, да освяшу его ему, еже кадити предъ ним фимиам ароматов и предложение всегда, и возносити всесожжения выну, утро и к вечеру, и в субботы, и в новомесячиих, и в праздницех господа бога нашего: во век сие бо израили:
5 и дом, егоже аз созидаю, велик, велик бо есть господь бог наш паче всех богов,
6 и кто возможет создати ему домъ? аще бо небо и небо небесе не могут вместити славы его: и кто аз, созидаяй ему домъ? но токмо еже кадити фимиамъ пред ним:
7 ныне убо посли мне мужа мудра, иже весть дела творити в злате и сребре, и меди и железе, и порфире и в червлени и в синете, и иже знает ваяти ваяние, с мудрыми, иже у мене во иудеи и во иерусалиме, яже уготова давид отец мой:
8 и посли ми древа кедрова и аркевфова и певгова от ливана, вем бо аз, яко раби твои умеют сещи древа от ливана:
9 и се, раби твои с рабы моими пойдут, да уготоваютъ мне древа многа, дом бо, егоже аз созидаю, великъ и преславен:
10 и се, делателем, иже секут древа, дах въ пищу рабом твоим пшеницы мер двадесять тысящ и ячменя мер двадесять тысящ, и вина мер двадесять тысящъ и елеа мер двадесять тысящ.
11 Рече же хирам царь тирский чрез писание и посла к соломону, глаголя: понеже возлюби господь люди своя, постави тя над ними царя.
12 И рече хирам: благословен господь бог израилев, иже сотвори небо и землю, иже даде давиду царю сына премудра и учена, и умна и разумна, иже созиждет домъ господу и дом царству своему:
13 и ныне послах тебе мужа мудра и сведуща разум, хирама раба моего:
14 матерь его от дщерей дановых, отец же его муж тирянин, иже весть делати в злате и сребре, и в меди и в железе, и в камениих и в древах, и ткати в порфире и в синете и в виссоне и въ червленице, и ваяти всякую резь, и разумети всяко разумение, елика аще даси ему, с мудрыми твоими и с мудрыми господина моего давида, отца твоего:
15 и ныне пшеницу и ячмень, и елей и вино, яже обещал еси, господине мой, посли рабом твоим,
16 мы же будем сещи древа от ливана на всяку потребу твою и послем я плотами по морю иоппийскому, ты же приведеши я во иерусалим.
17 И собра соломон всех мужей пришелцев, иже бяху в земли израилеве, по сочтению, имже сочте их давидъ отец его, и обретени суть сто пятьдесят три тысящи и шесть сот:
18 сотвори же от них седмьдесят тысящ бременоносцевъ и осмьдесят тысящ каменосечцев, три тысящи и шесть сот приставники над делами людскими.
1 И нача соломон созидати дом господень во иерусалиме, на горе амориа, на месте, еже уготова давидъ на гумне орны иевусеанина:
2 нача же созидати в месяц вторый лета четвертаго царства своего.
3 И сице нача соломон созидати дом божий: в долготу лакот, размер первый, лакот шестьдесят, в широту же лакот двадесять:
4 и притвор пред лицем дому, долгота по лицу широты дому, лакот двадесять, высота же лакот сто двадесять и позлати его внутрь златом чистым.
5 Дом же великий окры дсками кедровыми и позлати златомъ чистым: извая же на нем подобия фиников и яко мрежицы промежь себе сплетающяся,
6 и украси храм камением драгим славно, и позлати златом, еже от фаруима .
7 И позлати дом и стены его, и врата и праги, и окна и двери златом, и извая херувимы на стенах.
8 Сотвори же дом святая святых, долгота его по лицу широты дому, лакот двадесять, широта такожде двадесять лакот, и позлати и златом чистым на херувимех, талантъ шесть сот.
9 И вес гвоздий, вес гвоздя единаго пятьдесятъ сикль злата, и горницу позлати златом.
10 И сотвори в дому святая святых херувима два, дело от древ негниюших и позлати их златом.
11 И криле херувимов, долгота двадесять лакот, и едино крило лакот пяти, прикасающееся стене дому,
12 и другое крило пяти лакот, прикасающееся крилу херувима другаго:
13 криле же херувимов сих распростерте на лакот двадесять, тии же стояху на нозех своих, лица же их (зряще) к дому.
14 Сотвори же завесу от синеты и багряницы, и червленицы и виссона, и сотка на ней херувимы.
15 И сотвори пред храмом столпа два, лакот тридесять пять в высоту, и главы их пять лакот.
16 И сотвори чепи в давире и положи на главах столпов, и шипков сотвори сто, ихже положи на мрежи.
17 И постави столпы пред лицем храма, единаго одесную, а другаго ошуюю: и нарече имя сущему одесную исправление, имя же сущему ошуюю крепость.
1 Сотвори же и олтарь медян, двадесять лакотъ в долготу и двадесять лакот в широту и десять лакотъ в высоту.
2 И сотвори море (медяно) слияно, десять лакот от устия до устия его, кругло окрест, и пяти лакот въ высоту, и округлость его тридесяти лактей:
3 и подобие телцев под ним окрест окружающихъ е: десять лакот обдержаху умывалницу окрест: два рода слияша телцев в слиянии их,
4 имже сотвориша их дванадесять телцев, иже трие сматряху к северу и трие к западу, и трие к полудню и трие к востоку, и море на них (наставлено), задняя же их бяху внутрь (под моремъ):
5 и толстота его дланная, и устие его яко устие потира, изваянна яко отрасли крина, вмещающее три тысящи мер: и соверши.
6 Сотвори же омывалниц десять и постави пять одесную и пять ошуюю, да омывают в них вся приносимая на всесожжения и очищают в них, море же, да омываются священницы в нем.
7 Сотвори же и подсвещник златых десять по мере ихъ и постави я в храм пять одесную и пять ошуюю.
8 И сотвори столов десять и постави в храм пять одесную и пять ошуюю, и фиал златых сотвори сто.
9 И сотвори двор священником и двор великий, и двери двора и вереи их помедяны медию.
10 И море постави от угла дому одесную аки к востоку прямо.
11 Сотвори же хирам удицы мясныя, и кадилницы, и сковраду жертвенную, и вся сосуды его: и соверши хирамъ творити всякое дело, еже сотвори соломону царю въ дому божии:
12 столпа два, и на них окружилия, и венцы на главахъ дву столпу, и мрежице две, еже покрывати главы венцев иже суть над главами столпов:
13 и звонцев златых четыреста в две мрежи, и два ряда шипков во мрежи единей, еже покрывати два окружилия венцев, иже суть верху столпов:
14 и подставов сотвори десять, и умывалницы сотвори на подставах,
15 и море едино и волов дванадесять под ним,
16 и котлы, и удицы мясныя и вся сосуды их, яже сотвори хирам и принесе царю соломону в дом господень от меди чистыя.
17 Во стране иордана слия их царь, в толщи земней, между сокхофом и между саридафом.
18 И сотвори соломон вся сосуды сия многочисленны зело, понеже не оскуде тягость меди.
19 Сотвори же соломон вся сосуды дому божия, и олтарь злат, и трапезы, и на них хлебы предложения,
20 и подсвещники, и светилники света, да светят предъ святая святых по чину, от злата чиста,
21 и щипцы их, и светилники их, и фиалы, и чашицы, и кадилницы от злата чиста,
22 и двери храма внутренния яже во святая святыхъ и двери дому храма златыя. И совершися все дело еже сотвори соломон в дому господни.
1 И внесе соломон святая давида отца своего, сребро и злато и вся сосуды, и даде в сокровище дому господня.
2 Тогда собра соломон вся старейшины израилевы и вся началники колен, вожды отечеств сынов израилевыхъ во иерусалим, да вознесут кивот завета господня от града давидова, иже есть сион.
3 И собрашася ко царю вси мужие израилевы в праздник, сей есть месяц седмый.
4 И приидоша вси старейшины израилевы, и взяша вси левити кивотъ
5 и внесоша его и скинию свидения и вся сосуды святыя, иже в скинии, и внесоша его священницы и левити.
6 Царь же соломон и весь сонм сынов израилевых, и боящиися и собрании пред кивотом, жряху телцы и овцы безчисленны и несочисляемы от множества.
7 И внесоша священницы кивот завета господня на место его, еже есть молитвенник храма, во святая святых, под криле херувимов.
8 И бяху херувими распростерше крила своя над местомъ кивота, и покрываху херувими над кивотом и над носилами его свыше.
9 И длиннее бяху носила, и видяхуся главы носил от святых в лице молитвенника, и не видяхуся вне, и быша тамо даже до настоящаго дне.
10 Ничтоже бе в кивоте, токмо две скрижали, ихже положи моисей в хориве, егда закон даде господь сыном израилевым, исходящим им из земли египетския.
11 И бысть исходящим священником от святых, вси бо священницы, иже ту обретошася, освящени быша и не бяху расположени в дневную чреду,
12 левити же и певцы вси с сынми асафовыми, со еманом, идифумом, и с сынми их и с братиями их, облечени в ризы льняны, в кимвалех и псалтири и гуслехъ (возглашаху) стояще пред олтарем, и с ними жерцевъ сто двадесять трубяще трубами:
13 и бысть един глас в трублении и в псалмопении и в возглашении гласом единым еже хвалити и исповедатися господеви. И егда воздвигоша глас в трубах и кимвалехъ и органех песней, и глаголаху: исповедайтеся господеви, яко благ, яко в век милость его: и дом исполнися облака славы господни,
14 и не могоша священницы стати служити от лица облака, наполни бо слава господня дом божий.
1 Тогда рече соломон: господь рече обитати во мгле,
2 аз же создах дом имени твоему святый тебе, и уготованъ еже обитати тебе во веки.
3 И обрати царь лице свое и благослови все собрание израилево, и все собрание израилево предстояше, и рече:
4 благословен господь бог израилев, якоже глагола усты своими ко давиду отцу моему, и руками своими соверши, глаголя:
5 от дне, в оньже изведох люди моя от земли египетския, не избрах града от всех колен израилевых, да созиждется в нем дом имени моему ту, ниже избрах мужа быти вождем над людьми моими во израили:
6 но избрах иерусалима, да будет имя мое в нем, и избрах давида быти над людьми моими израилем:
7 и бысть на сердцы давида отца моего создати домъ имени господа бога израилева:
8 и рече господь ко давиду отцу моему: понеже бысть на сердцы твоем создати дом имени моему, добре сотворилъ еси, яко бысть на сердцы твоем,
9 обаче ты не созиждеши мне дому, но сын твой, иже изыдет из чресл твоих, той созиждет дом имени моему:
10 и соверши господь слово сие, еже глагола, и бых вместо давида отца моего, и седох на престоле израилеве, якоже глагола господь, и создах дом имени господа бога израилева,
11 и поставих в нем кивот, в немже есть заветъ господень, егоже завеща израилю.
12 И ста пред олтарем господним, пред всем множествомъ израилевым, и простре руце свои:
13 сотвори бо соломон стояло медяно и постави его посреде двора святилища, пять лакот долгота его и пять лакот широта его и три лакти высота его: и ста на нем, и паде на колена своя пред всемъ множеством израилевым, и простре руки своя на небо и рече:
14 господи боже израилев, несть подобен тебе бог на небеси и на земли, сохраняяй завет и милость с рабы твоими, иже ходят пред тобою всем сердцем своим,
15 яже сохранил еси рабу твоему давиду отцу моему, елика рекл еси ему глаголя, и глаголал еси усты твоими и руками твоими совершил еси, якоже день сей:
16 и ныне, господи боже израилев, сохрани рабу твоему давиду отцу моему, яже рекл еси ему глаголя, и глаголалъ еси усты твоими и исполнил еси якоже въ день сей, глаголя: не оскудеет тебе муж от лица моего седяй на престоле израилеве, токмо аще сохранят сынове твои пути моя ходити в законе моем, якоже ходилъ еси предо мною:
17 и ныне, господи боже израилев, да укрепится слово твое, еже глаголал еси рабу твоему давиду:
18 убо истинно ли бог обитати будет с человеки на земли? аще небо и небо небесе не довлеют ти, и кольми паче дом сей, егоже создахъ?
19 и призри на моление раба твоего и на молитву мою, господи боже мой, еже услышати молитвы моя и моление, имже раб твой молится пред тобою днесь,
20 еже быти очесем твоим отверстым на домъ сей день и нощь, на место сие, о немже глаголал еси, да призовется имя твое тамо, еже услышати молитву, еюже раб твой молится на месте сем:
21 и послушати мольбу раба твоего и людий твоих израиля, елика аще помолятся на месте сем и ты услышиши на месте жилища твоего с небесе, и услышиши, и милостив будеши:
22 аще согрешит муж ко искреннему своему и прииметъ на него клятву еже клясти его, и приидет и прокленетъ пред олтарем в дому сем,
23 и ты услыши от небесе и суди рабом твоим, еже воздати беззаконному, и воздати пути его на главу его, и оправдити праведнаго, воздая ему по правде его:
24 и аще одолени будут людие твои израиль от враг, аще согрешат тебе и обратятся, и исповедятся имени твоему, и помолятся пред тобою в храме сем,
25 и ты услыши с небесе и милостив буди грехомъ людий твоих израиля и возврати их в землю, юже далъ еси им и отцем их:
26 егда заключиши небо, и не будет дождя, яко согрешатъ тебе, и помолятся на месте сем, и восхвалят имя твое, и обратятся от грех своих, егда смириши их,
27 и ты услыши с небесе и милостив буди грехомъ рабов и людий твоих израиля, яко явиши им путь благ, по немуже пойдут, и даждь дождь на землю твою, юже дал еси людем твоим в наследие:
28 глад аще будет на земли, губителство аще будет, воздуха растление и иктер, прузи и гусеницы аще будут, и аще оскорбит их враг пред градами их, всякою язвою и всякою болезнию,
29 и всяка молитва, и всяко моление, еже аще будетъ всякому человеку и всем людем твоим израилю, аще познает человек язву свою и грех свой и простретъ руце свои в дому сем,
30 и ты услыши с небесе от готоваго жилища твоего, и очести, и даждь коемуждо по путем его, якоже веси по сердцу его, ты бо един веси сердца сыновъ человеческих,
31 яко да боятся тебе, еже ходити бо всех путехъ твоих вся дни, в няже живут на лицы земли юже далъ еси отцем нашим:
32 и всяк чуждии, иже несть от людий твоих израиля, и приидет от земли дальния ради имене твоего великаго и ради руки твоея сильныя и мышцы твоея высокия, и приидет и помолится на месте сем,
33 и ты услыши с небесе от готоваго жилища твоего, и сотвориши по всему, елико призовет тя чуждий, да уведят вси людие земли имя твое и убоятся тебе, якоже людие твои израиль, и познают, яко имя твое призвано есть на дом сей, егоже создах:
34 аще же изыдут людие твои на брань противу супостатъ своих по пути, имже послеши их, и помолятся тебе по пути града сего, егоже избрал еси себе, и дому, егоже создах имени твоему,
35 да услышиши с небесе молитву их и моление их, и сотвориши оправдание их:
36 зане согрешат тебе, яко несть человек, иже не согрешит, и поразиши их, и предаси их в руки врагов их, и пленят их пленяющии в землю врагов, в землю дальнюю или ближнюю,
37 и обратят сердце свое в земли их, в нюже пленени будут, и тамо обратятся, и помолятся тебе в пленении своем, глаголюще: согрешихом, беззаконновахом, неправдовахом,
38 и обратятся к тебе всем сердцем своим и всею душею своею в земли пленивших я, идеже плениша их, и помолятся путем земли своея, юже дал еси отцем их, и града, егоже избрал еси, и дому, егоже создах имени твоему:
39 да услышиши с небесе от готоваго жилища твоего молитву их и моление их, и сотвориши суд, и милостивъ буди людем твоим согрешившим ти:
40 и ныне, господи, да будут отверсте очи твои, и уши твои внятне к молению места сего:
41 и ныне востани, господи боже, в покой твой, ты и кивотъ крепости твоея: священницы твои, господи боже, да облекутся во спасние, и преподобнии твои возвеселятся во благих:
42 господи боже, да не отвратиши лица христа твоего, помяни щедроты давида раба твоего.
1 И егда соверши соломон моляся, и огнь сниде с небесе и пояде всесожжения и жертвы и слава господня исполни дом:
2 и не можаху священницы внити в храм господень во время оно, яко исполни слава господня дом господень.
3 И вси сынове израилевы видяху сходящь огнь и славу господню на дом, и падоша ниц на землю на помост постланъ камением, и поклонишася, и восхвалиша господа, яко благ, яко во век милость его.
4 Царь же и вси людие пожроша жертвы пред господем.
5 И пожре царь соломон жертву волов двадесять и две тысящи, овец сто и двадесять тысящ, и освяти домъ божий царь и вси людие.
6 Священницы же стояху на стражах своих, и левити во органы пояху песни господни, яже сотвори давид царь к похвалению господа: (яко благ,) яко во век милость его, песни давидовы (поюще) руками своими: и священницы пояху трубами пред ними, и весь израиль стояше.
7 освяти же соломон среднее двора, иже пред церковию господнею, принесе бо ту всесожжения и туки мирных, яко олтарь медян, егоже сотвори соломон, не можаше вместити всесожжений и жертв и туков.
8 И сотвори соломон праздник во время оно седмь дний, и весь израиль с ним, собрание велико зело от входа во емаф даже до потока египетска:
9 сотвори же в день осмый торжество, понеже освящению олтаря сотвори седмь дний праздник.
10 И в день двадесять третий месяца седмаго отпусти людий в жилище их веселящихся и радующихся о благих, яже сотвори господь давиду и соломону и израилю людем своим.
11 И соверши соломон дом господень и дом царев: и вся, елика восхоте в сердцы своем соломон творити въ дому господни и в дому своем, благопоспешися.
12 И явися господь соломону нощию и рече ему: услышахъ моление твое и избрах место сие мне в дом жертвы:
13 аще заключу небо, и дождь не излиется, и аще повелю пругом поясти древо, и аще послю губителство на люди моя,
14 и аще посрамлени будут людие мои, на нихже призвано есть имя мое, и помолятся, и взыщут лица моего, и отвратятся от путий своих злых: и аз услышу с небесе и милостив буду грехом их, и изцелю землю их:
15 и ныне очи мои будут отверсте, и уши мои послушне к молению места сего:
16 и ныне избрах и освятих дом сей, да будет на мое ту даже до века, и будут очи мои и сердце мое ту вся дни:
17 ты же аще ходити будеши предо мною, якоже ходилъ давид отец твой, и сотвориши по всем, яже повелехъ тебе, и повеления моя и судбы моя сохраниши:
18 и воздвигну престол царства твоего, якоже завещахъ давиду отцу твоему глаголя: не отимется от тебе мужъ вождь во израили:
19 аще же отвратитеся вы и оставите повеления моя и заповеди моя, яже предах вам, и пойдете и послужите богом иным и поклонитеся им,
20 исторгну вас от земли, юже дах вам: и дом сей, егоже освятих имени моему, отвергу от лица моего и предам его в притчу и в повесть всем языком:
21 и дом сей высокий (в притчу), всяк мимоходяй его ужаснется и речет: почто сотвори господь тако земли сей и дому сему?
22 и отвещают: яко оставиша господа бога отецъ своих, иже изведе их от земли египетския, и прияша боги чуждыя, и поклонишася им, и поработаша им, и сего ради наведе на них вся сия злая.
1 И бысть по двадесяти летех, в нихже созда соломон дом господень и дом свой,
2 и грады яже даде хирам соломону, созда оны соломонъ и всели ту сыны израилевы.
3 И прииде соломон во емафъ-сува и одержа его.
4 И созда федмор в пустыни и вся грады крепкия, яже созда во емафе.
5 Сострои же вефорон вышний и вефорон нижний, грады укреплены стенами, вратами и вереями:
6 и валааф, и вся грады крепкия, иже быша соломону, и вся грады колесниц и грады конник, и елика восхоте соломон по желанию создати бо иерусалиме и в ливане и во всем царстве своем.
7 Весь народ оставшийся от хеттеа и аморреа, и ферезеа и евеа и иевусеа, иже не бяху от племене израилева,
8 но беша от сынов их оставшихся по них на земли, ихже не избиша сынове израилевы, подведе их соломонъ в дань даже до дне сего.
9 от сынов же израилевых не даде соломон в рабы царству своему: тии бо бяху мужие ратницы и князи, и сильнии и началницы колесниц и конник его.
10 И сии началницы предстоящих царю соломону, двести пятьдесят приставницы над делы людскими.
11 Дщерь же фараоню преведе соломон от града давидова в дом, егоже созда ей, рече бо: да не обитаетъ жена моя в дому давида царя израилева, понеже освященъ есть, аможе вниде кивот господень.
12 Тогда вознесе соломон всесожжения господеви на олтарь, егоже созда господеви пред храмом,
13 по словеси от дне до дне возносити, по повелению моисееву, в субботы и в новомесячия и в праздники, трижды в год, в праздник опресноков и в праздник седмицъ и в праздник кущей.
14 И постави по разсуждению давида отца своего разделения священником и по служением их: и левиты над стражами их, да хвалят и служат пред священники по чину единаго коегождо дний: и дверницы по разделениемъ их, по вратом и вратом: тако бо повеле давид человекъ божий.
15 Не преступиша заповедий царевых о священницех и левитех по всякому словеси, и в сокровищих.
16 И уготовася всяко делание от дне, в оньже основа, до дне, в оньже соверши соломон дом господень.
17 Тогда иде соломон в гасионъгавер и во елаф, иже при мори в земли идумейстей.
18 И посла хирам рукою слуг своих корабли и рабы знающия морския проходы, и хождаху с рабы соломоними в софир, и взяша оттуду четыреста и пятьдесят талантъ злата и принесоша ко царю соломону.
1 Царица же савска услыша имя соломоново и прииде искусити его гаданьми во иерусалиме с силою тяжкою зело: и велблюды носящии ароматы и злата множество и камения драгаго: и прииде к соломону и глагола ему вся, елика беша в сердцы ея.
2 И возвести ей соломон вся словеса ея, и не прейде слово, егоже бы не возвестил ей.
3 И виде царица савска премудрость соломоню, и домъ егоже созда,
4 И яди столов его, и седалища рабов его, и состояние служебников его и ризы их, и виночерпчия его и украшение их, и всесожжения, яже жряше в дому господни, и вне себе бысть.
5 Рече же ко царю: истинно есть слово, еже слышахъ в земли моей о словесех твоих и о премудрости твоей:
6 и не веровах словесем их, дондеже приидох, и видеста очи мои, и се, не возвестиша мне половины множества премудрости твоея: приложил еси ко слышанию яже слышах:
7 блажени мужие твои и блажени раби твои сии, иже предстоятъ пред тобою на всяко время и слышат премудрость твою:
8 да будет господь бог твой благословен, иже благоволи въ тебе, еже дати тя на престол свой царя господу богу твоему: зане возлюби господь бог твой израиля, еже утвердити его во век, и постави тя над ними царя, да сотвориши суд и правду.
9 Даде же царю сто двадесять талант злата и ароматы многи зело и камение драгое, и не быша ароматы таковы яко сия, яже даде царица савска царю соломону.
10 Но и раби хирамовы с рабы соломоними приношаху злато соломону драгое.
11 И сотвори соломон царь от древ певговых степени в дом господень и в дом царев, и гусли и псалтири песней, и никогдаже видена быша в земли иудине прежде такоая.
12 Царь же соломон даде царице савстей вся по желанию ея, ихже просила, кроме всех яже принесе царю соломону, и возвратися в землю свою.
13 Бе же вес злата приносимаго к соломону на всяко лето шесть сот шестьдесят шесть талант злата,
14 кроме мужей подданных и купцов, иже приношаху, и всех царей аравских и властелей земли, иже вси приношаху злато и сребро царю соломону.
15 Сотвори убо царь соломон двести щитов златыхъ тягненых, шесть сот златник чистых бяху во единемъ щите:
16 и триста щитов златых тягненых, по триста златникъ бяше во единем коемждо щите, и положи я царь въ дому древа ливанова.
17 Сотвори же царь престол от слоновых зубов велик, и позлати его златом чистым,
18 и шесть степений у престола позлащени златом, и мышчицы две туду и сюду над престолом седалища, и два льва стояща близ мышчцей,
19 и дванадесять львов стоящих тамо на шести степенехъ от обоих стран: и не бысть таков престол во всяцемъ царстве.
20 Вси же сосуди царя соломона бяху златы, и вси сосуди дому дубравы ливанския златом окружены, сребро бо во днех соломоних ни во что вменяшеся:
21 зане корабль царев хождаше в фарсис с рабы хирамовыми, единицею в лета три прихождаше корабль от фарсиса ко царю, полн злата и сребра и зубов слоновых и обезъян.
22 И возвеличися соломон паче всех царей земных богатствомъ и мудростию.
23 Вси же царие земстии желаху видети лице соломоне и слышати премудрость его, юже даде бог в сердце его:
24 и приношаху ему кийждо дары своя, сосуды сребряны и златы, и одеяния и стакту, и сладости, кони и мски, на всякое лето.
25 И бяху царю соломону четыредесять тысящ кобылиц къ колесницы и дванадесять тысящ конник, и постави ихъ во градех колесничных и со царем во иерусалиме.
26 И быть вождь всех царей от реки (евфрата) даже до земли иноплеменник и даже до предел египетских.
27 И даде царь злато и сребро во иерусалиме яко камение, и кедры яко черничие, еже (раждается) въ полях множество.
28 И приводяху кони соломону от египта и от всея земли.
29 И прочая словеса соломоня первая и последняя, се, сия писана суть в словесех нафана пророка и в словесехъ ахии силониты и в видениих иоиля видящаго, противу иеровоама сына наватова.
30 И царствова соломон во иерусалиме над всем израилемъ четыредесять лет.
31 И успе соломон со отцы своими, и погребоша его во граде давида отца его. И воцарися ровоамъ сын его вместо его.
1 И прииде ровоам в сихем, зане в сихемъ весь израиль снидеся поставити его царем.
2 И бысть егда услыша иеровоам сын наватов, иже бе во египте, яко убеже от лица соломона царя, и обита иеровоам во египте, и возвратися иеровоам от египта.
3 И послаша и призваша его. И прииде иеровоам и все собрание израилево ко царю ровоаму, глаголюще:
4 отец твой ожесточи иго наше, ты же ныне ослаби от работы отца твоего жестокия и от ига его тяжкаго, еже возложи на нас, и послужим тебе.
5 И рече им: поидите даже до триех дний и приидите ко мне. И отидоша людие.
6 И собра царь ровоам старейшины, иже стояху предъ соломон отцем его, егда еще живяше, глаголя: каков вы даете совет отвещати людем симъ?
7 И реша ему: аще днесь будеши во благое людемъ сим, и благоугодиши, и речеши им словеса благая, то послужат тебе во вся дни.
8 И остави совет старейшин, егоже совещаша ему: и советоваше со юношами, иже с ним воспитани бяху и стояху пред ним,
9 и рече к ним: что вы собетуете, да отвещаю людемъ сим, иже реша мне, глаголюще: облегчи иго, еже наложи на ны отец твой?
10 И отвещаша ему отроцы воспитаннии с ним, глаголюще: тако речеши людем, ихже рекоша тебе, глаголюще: отецъ твой отягчи иго наше, ты же облегчи нам: тако отвещай к ним: менший перст мой толстее есть чресл отца моего:
11 отец мой наложи вам тяжкое иго, аз же (тягости) приложу на иго ваше: отец мой бил вас бичми, азъ же буду бити вас скорпионами.
12 И прииде иеровоам и вси людие к ровоаму в день третий, якоже повеле им царь, глаголя: возвратитеся ко мне в день третий.
13 И отвеща царь жестоко, и остави царь ровоам советъ старейшин, и рече к ним по совету юнош, глаголя:
14 отец мой отяготи иго ваше, аз же приложу къ нему: отец мой бил вас бичми, аз же бити буду вы скорпионами.
15 И не послуша царь людий, яко бе превращение от бога, глаголя: возстави господь слово свое, еже глагола рукою ахии силониты о иеровоаме сыне наватове
16 и о всем израили, зане не послуша царь их. И отвещаша людие ко царю, глаголюще: кая нам часть в давиде и наследие в сыне иессееве? возвратися в жилища твоя, израилю, ныне смотри дому твоего, давиде. И иде весь израиль в жилища своя.
17 Мужие же израилевы, иже обитаху во градех иудиных, воцариша над собою ровоама.
18 И посла царь ровоам к ним адонирама бывша надъ даньми, и камением побиша его сынове израилевы, и умре. И услыша царь ровоам, и потщася взыти на колесницу, и побеже во иерусалим.
19 И отвержеся израиль от дому давидова даже до дне сего.
1 Прииде же ровоам во иерусалим, и созва (весь) дом иудин и вениаминь, сто осмьдесят тысящ избранныхъ юношей творящих брань, и воеваше противу израиля и иеровоама, да обратит к себе царство.
2 И бысть слово господне к самею человеку божию, глаголя:
3 глаголи к ровоаму сыну соломоню, царю иудину, и ко всему израилю, иже есть во иуде и вениамине:
4 сия рече господь: не восходите, ниже ополчайтеся противу братии вашея: возвратитеся кийждо в дом свой, зане от мене бысть глагол сей. И послушаша слова господня, и возвратишася, и не поидоша противу иеровоама.
5 обита же ровоам во иерусалиме и созда грады стенаты во иудеи:
6 сострои же вифлеем и етам, и фекуе
7 и вефсур, и сокхоф и одоллам,
8 и геф и марисан, и зифъ
9 и адурем, и лахис и азику,
10 и салаю и елон и хеврон, иже есть иудинъ и вениаминь, грады крепкия:
11 и укрепи их стенами, и постави в них началники, житохранилища, и елей и вино,
12 во всяцем граде щиты и копия, и укрепи ихъ во множестве зело, и быста под ним иуда и вениамин.
13 Священницы же и левиты, иже бяху во всем израили, собрашася к нему от всех предел:
14 яко оставиша левити селения одержания своего и поидоша ко иуде во иерусалим, понеже изгна их иеровоамъ и сынове его, еже не служити господеви:
15 и постави себе жерцы на высоких, и идолом, и суетным, и телцем, ихже сотвори иеровоам.
16 И изгна их от всех колен израилевых, иже вдаша сердце свое, да взыщут господа бога израилева: и приидоша во иерусалим пожрети господу богу отец своих:
17 и укрепиша царство иудино. И укрепися ровоамъ сын соломонь в три лета, хождаше бо по путем давида и соломона отца своего лета три.
18 И взя себе ровоам жену моолафу, дщерь иеримофа сына давидова, и авигею дщерь елиава сына иессеова.
19 И роди ему сыны: иеуса и самориа и заама.
20 По сих же поя себе мааху дщерь авессаломлю, и роди ему авию и иеффиа, и зизу и салимофа.
21 И возлюби ровоам мааху дщерь авессаломлю паче всехъ жен своих и подложниц своих, яко жен осмьнадесять име и подложниц шестьдесят: и роди двадесять осмь сынов и шестьдесят дщерей.
22 И постави в началника ровоам авию сына маахина и князем над всею братиею его, того бо и царем сотворити помышляше.
23 И возрасте паче всех братий своих во всех пределехъ иудиных и вениаминих и во градех крепких, и даде им пищи множество много, и многих взыска жен.
1 И бысть егда устроися царство ровоамово, и укрепися, остави заповеди господни, и весь израиль с ним.
2 И бысть в лето пятое царства ровоамля взыде сусакимъ царь египетский на иерусалим, зане согрешиша предъ господем,
3 с тысящию и двема сты колесниц и шестьдесят тысящъ конник, и не бе числа народу пришедшему с ним от египта, ливиане, троглодитяне и ефиопляне:
4 и взяша грады крепкия, иже бяху во иуде, и приидоша даже до иерусалима.
5 Самеа же пророк вниде к ровоаму и к началником иудиным, иже собрани бяху во иерусалим от лица сусакимова, и рече к ним: сия рече господь: вы остависте мя, и аз оставлю вас в руку сусакима.
6 И посрамишася началницы израилевы и царь и рекоша: праведн господь.
7 Егда же виде господь, яко смиришася, и бысть слово господне к самею, глаголя: смиришася, не разорю их, и дамъ им вмале спасние, и не уканет ярость моя на иерусалим,
8 обаче будут в рабы, да познают работу мою и работу царства земли.
9 И взыде сусаким царь египетский во иерусалим, и взя сокровища, яже в дому господни, и сокровища, яже в дому цареве, вся взя: и взя щиты златыя, ихже сотвори соломон.
10 И сотвори царь ровоам щиты медяны вместо их. И постави на ним сусаким царь египетский началниковъ предходящих стрегущих врата царева:
11 и бысть внегда входити царю в дом господень, вхождаху стрегущии и предходящии, и обращающеся восхождаху предходящии ко оружехранителнице своей.
12 И егда смирися той, отвратися от него ярость господня, а не в разорение в конец: ибо и во иуде бяху словеса блага.
13 И укрепися царь ровоам во иерусалиме и царствова: четыредесяти же и единаго лета бысть ровоам, егда царствовати нача, и седмьнадесять лет царствова во иерусалиме, во граде, егоже избра господь, да именуется имя его ту от всех колен израилевых. Имя же матери его ноома амманитыня.
14 И сотвори лукавое, яко не исправи сердца своего, да взыщет господа.
15 Словеса же ровоамова первая и последняя не се ли, суть писана в словесех самеа пророка и адда провидящаго, и деяния его? И воеваше ровоам и иеровоам во вся дни.
16 И умре ровоам и погребен бысть со отцы своими во граде давидове. И воцарися авиа сын его вместо его.
1 В лето осмоенадесять царства иеровоамля воцарися авиа над иудою:
2 три лета царствова во иерусалиме. Имя же матери его мааха дщерь уриилева от гаваона. И бе брань между иеровоамом и между авиею.
3 И ополчися авиа в силе воинския силы, в четырехъ стах тысящах мужей сильных: иеровоам же устрои сопротиву его брань во осми стах тысящах мужей военных крепких силою.
4 Ста же авиа на горе сомори, яже есть на горе ефремли, и рече: слышите иеровоам и весь израиль:
5 или не весте, яко господь бог израилев даде царство давиду над израилем во веки и сыновом его в заветъ веченъ?
6 и воста иеровоам сын наватов, раб соломона сына давидова, и отвержеся от господина своего:
7 и собрашася к нему мужие пагубнии, сынове законопреступнии, и воста противу ровоама сына соломонова, ровоам же бе юнейший и сердцем страшлив, и не возможе противостати лицу его:
8 и ныне вы глаголете противостати лицу царства господня в руце сынов давидовых: и вы мнози зело, и с вами телцы златии, ихже сотвори вам иеровоам в боги:
9 не извергосте ли священников господних сынов ааронихъ и левитов, и сотвористе себе жерцы от людий всея земли, приходяй наполнити руку свою телцем от волов и обнами седмию, и сотворися жерцем не сущему богу:
10 мы же господа бога нашего не оставихом, и священницы его служат господу, сынове аарони и левити,
11 и по чредам своим жрут господу всесожжения утро и пред вечером, и фимиам сложения, и предложения хлебов на трапезе чистей, и светилник златый, и свещники возжжения возжизати к вечеру: мы бо хранимъ стражбы господа бога отец наших, вы же его остависте:
12 и се, с нами в начале господь, и священницы его, и трубы знаменования, еже знаменати противу вам: сынове израилевы, не ратуйте противу господа бога отец ваших, понеже не благопоспешится вам.
13 иеровоам же обрати подсаду приити ему созади, и бысть противу иуды (самъ), подсада же созади.
14 И обратися иуда, и се, ему брань сопреди и созади, и возопиша ко господу, и священницы вострубиша трубами:
15 и возопиша мужие иудины. И бысть вопиющим мужемъ иудиным, и господь порази иеровоама и израиля пред авиею и иудою:
16 и бежаша сынове израилевы от лица иуды, и предаде их господь бог в руки их:
17 и порази их авиа и людие его язвою великою, и падоша ранени от израиля пять сот тысящ мужей крепких.
18 И смиришася сынове израилевы в день той, и укрепишася сынове иудины, яко уповаша на господа бога отецъ своих.
19 Погна же авиа вслед иеровоама и взя от него грады: вефиль и села его, и иесину и села ея, и ефрон и села его.
20 И не возможе ктому противитися иеровоам во вся дни авии, и порази его господь: и умре.
21 Авиа же укрепися, и поят себе жен четыренадесять, и роди двадесять два сына и шестьнадесять дщерей.
22 Прочая же словеса авиева и деяния его и словеса его писана в книзе адды пророка.
1 И успе авиа со отцы своими, и погребоша его во граде давидове. И воцарися аса сын его вместо его во дни же асы почи земля иудина летъ десять.
2 И сотвори аса благое и правое пред господем богомъ своим:
3 и отверже олтари чуждых и высокая, и сокруши идолы и посече дубравы:
4 и повеле иуде, да взыщет господа бога отец своихъ и да сотворит закон его и заповеди:
5 и изверже из всех градов иудиных олтари и идолы, и царствова в мире.
6 И созда грады крепки в земли иудине, зане в покои бысть земля, и не бе ему брани в лета сия, миръ во господь даде ему.
7 Рече же иуде: созиждем грады сия, и сотворим стены и столпы, и врата и вереи, дондеже землею господствуем: зане якоже взыскахом господа бога нашего, взыска и нас, и воздаде нам мир окрест, и благопоспешствова нам.
8 И бысть сила асе оруженосцев носящих щиты и копия в земли иудине триста тысящ, в земли же вениамини щитников и стрелцев двести осмьдесят тысящ: вси сии воини сильнии.
9 Изыде же противу их зарай ефиоплянин с силою в тысящи тысящей, и колесниц триста, и прииде даже до мариса.
10 И изыде аса противу ему и устрои брань въ дебри на север мариса.
11 И возопи аса ко господу богу своему и рече: господи, не изнеможет у тебе спасати во многих и в малых, укрепи нас, господи боже наш, яко на тя уповахомъ и о имени твоем изыдохом на множество многое сие: господи боже наш, ты еси бог, да не превозможет противу тебе человек.
12 И порази господь ефиопы пред асою и иудою и бежаша ефиопи:
13 и погна их аса и людие его даже до гедора: и падоша ефиопи, даже не быти в них останку, яко сотрени быша пред господем и пред силою его, и плениша корысти многи:
14 и изсекоша веси их окрест гедора, велик бо страх господень объят их, и плениша вся грады их, зане многи корысти быша в них:
15 и кущи скотския и амазонов изсекоша, и взяша скота множество и велблюды, и возвратишася во иерусалим.
1 Азариа же сын ададов, бысть на нем дух божий:
2 и изыде во сретение асе и всему иуде и вениамину и рече ему: услышите мя, аса и весь иуда и вениамин: господь с вами, яко бысте с ним: и аще взыщете его, обрящется вам, аще же оставите его, оставит вас:
3 мнози дние (будутъ) во израили без бога истиннаго и без священника учащаго и без закона:
4 егда же обратятся в печали ко господу богу израилеву и взыщут его, и обрящется им:
5 и во время оно не будет мир исходящему и входящему, яко ужас господень на всех обитающих на земли
6 и ополчится язык на язык и град противу града, яко господь смутит их во всяцей печали:
7 и вы укрепитеся, и да не ослабеют руки ваша, есть бо мзда делу вашему.
8 И егда услыша аса словеса сия и пророчество азарии пророка, укрепися и отя вся идолы от всея земли иудины и вениамини и от градов, ихже содержаше иеровоам в горе ефремли, и освяти олтарь господень, иже бе пред храмом господним:
9 собра же (всего) иуду и вениамина и пришелцев обитающихъ с ним от ефрема и от манассии и от симеона, мнози бо к нему прибегоша от израиля, егда увидеша, яко господь бог его с ним.
10 И собрашася во иерусалим в месяц третий, в лето пятоенадесять царства асы,
11 и пожроша господу в день той от корыстей, ихже приведоша, волов седмь сот и овец седмь тысящ,
12 и поидоша в завете, еже искати господа бога отецъ своих всем сердцем и всею душею своею:
13 и (рече): всяк, иже аще не взыщет господа бога израилева, да умрет от юнаго даже до старейшаго, от мужа даже до жены.
14 И кляшася господу гласом великим в восклицании и въ трубах и в рожаных.
15 И возрадовася весь иуда о клятве, яко от всея души кляшася, и всею волею взыскаша его, и обретеся им, и даде им господь покой окрест.
16 И мааху матерь свою отлучи, да не служит астарту, и сокруши идола и сожже в потоце кедрстем.
17 Токмо высоких не отстави, еще бо бяху во израили, но сердце асы бе совершенно во всех днех его:
18 и внесе святая давида отца своего и святая своя в дом божий, сребро и злато и сосуды.
19 И брань не бысть ему даже до тридесять пятаго лета царства асина.
1 И в лето тридесять осмое царства асина, взыде вааса царь израилев на иуду и стенами укрепи раму, да не даст входа и исхода асе царю иудину.
2 И взя аса сребро и злато от сокровищ дому господня и дому царева, и посла ко (венададу) сыну адера царя сирска, живущему в дамасце, глаголя:
3 положи завет между мною и тобою и между отцемъ моим и отцем твоим: се послах тебе сребро и злато: прииди и отжени от мене ваасу царя израилева, и да отидет от мене.
4 И послуша сын адеров царя асы и посла началники воев своих на грады израилевы, и порази аинона и дана, и авелмаина и вся окрестная неффалимля.
5 И бысть егда услыша вааса царь израилев, остави ктому созидати раму и остави дело свое.
6 Аса же царь взя всего иуду и взя камение от рамы и лес ея, яже на создание уготова вааса, и созда из них гаваю и масфу.
7 И во время оно прииде ананий пророк ко асе царю иудину и рече ему: понеже имел еси упование на царя сирска, а не уповал еси на господа бога твоего, того ради спасеся сила царя сирскаго от руку твоею:
8 не ефиопи ли и ливиане бяху на тя в силе мнозе, в дерзости колесниц и конник во множество зело? и егда уповал еси на господа, предаде их в руку твою:
9 очи бо господни назирают всю землю, еже укрепити сущих сердцем совершенным к нему: буе сотворил еси сие, (сего ради) отныне будет на тя брань.
10 Разгневася же аса на пророка и всади его в темницу, понеже прогневася о сем: и уби аса от людий во время то (многихъ).
11 И се, словеса асы, первая и последняя, писана суть в книзе царей иудиных и израиля.
12 И разболеся аса в лето тридесять девятое царства своего ногама, болезнию зелнейшею: и ниже в немощи своей взыска господа, но врачев.
13 успе же аса со отцы своими, и умре в лето четыредесять первое царства своего:
14 и погребоша его во гробе, егоже ископа себе во граде давидове, и положиша его на одре, и наполниша ароматами и родами миров благоуханных, и сотвориша ему погребение велико зело.
1 И воцарися иосафат сын его вместо его, и укрепися иосафат над израилем:
2 расположи же силу во всех градех иудиных крепкихъ и постави воеводы во градех иудиных и во градехъ ефремовых ихже побра прежде аса отец его.
3 И бысть господь со иосафатом, яко хождаше в путехъ давида отца своего первых и не взыска идолов,
4 но господа бога отца своего взыска и пойде в повелениихъ отца своего, а не по делом израилевым:
5 и укрепи господь царство в руку его, и даша вся иудеа дары иосафату, и бысть ему богатство и слава многа.
6 И вознесеся сердце его в пути господни, и ктому изъя высокая и дубравы от земли иудины.
7 В третие же лето царства своего посла началники своя и сынов сильных авдию и захарию, и нафанаила и михеа, да учат во градех иудиных:
8 и с ними левити самеа и нафаниа, и завдиа и асиил, и семирамоф и ионафан, и адониа и товиа и товадониа левити, и с ними елисама и иорам жерцы:
9 учаху же во иудеи, имеюще книгу закона господня, и прохождаху грады иудины и учаху люди.
10 И бысть страх господень на всех царствах земных окрестъ иуды, и не воеваша противу иосафата.
11 И от иноплеменник иосафату дары приношаху сребро и дани: арави же привождаху ему овнов овчихъ седмь тысящ и седмь сот, и козлов седмь тысящ седмь сот.
12 И бе иосафат предуспевая велик в высоту и созда во иудеи домы и грады крепки.
13 И многа дела быша ему во иудеи: и мужие ратницы крепцы сильнии во иерусалиме.
14 И сие число их по домом отечеств их: и во иуде тысященачалницы еднас вождь и с ним сынове сильнии силы триста тысящ:
15 и по нем иоанан началник и с ним двести осмьдесятъ тысящ:
16 по немже амасиа, сын захариин, усердсвуяй господу и с ним двести тысящ мужей сильных.
17 И от вениаминя сильнии силы елиад, и с ним держащихъ лук и щиты двести тысящ сильных:
18 и по нем иозавад, и с ним сто осмьдесят тысящ, сильнии ко брани.
19 Сии служащии царю, кроме оных, ихже постави царь по градом крепким во всей иудеи.
1 И бысть иосафату богатство и слава многа, и поят жену в дому ахаавли.
2 И сниде при концы лет ко ахааву в самарию: и закла ему ахаав овны и волы многи, и людем сущимъ с ним, и увещаваше его, да снидет с ним въ рамоф галаадский.
3 И рече ахаав царь израилев ко иосафату царю иудину: пойдеши ли со мною в рамоф галаадский? И рече ему: якоже аз, тако и ты: и якоже людие твои, тако и людие мои с тобою на брань.
4 И рече иосафат царю израилеву: вопроси убо днесь господа.
5 И собра царь израилев пророков четыреста мужей и рече к ним: пойду ли в рамоф галаадский на брань, или удержуся? И реша: взыди, и предаст бог в руку цареву.
6 Рече же иосафат: несть ли зде пророка господня еще, да от него вопросимъ?
7 И рече царь израилев ко иосафату: есть еще муж един, имже вопросити господа, но аз ненавижду его, понеже не прорицает мне во благая, зане вси дние его во злая: сей михеа сын иемвлин . Рече же иосафат: не глаголи, царю тако.
8 И призва царь израилев единаго от евнух и рече ему: (призови) скоро михею сына иемвлина.
9 Царь же израилев и иосафат царь иудин кийждо седяше на престоле своем, и облечена красотою царскою, седяста же на пространстве близ врат самарийских, и вси пророцы пророчествоваху пред нима.
10 И сотвори себе седекиа сын ханаань роги железны и рече: сия глаголет господь: сими избодеши сирию, дондеже скончается.
11 И вси пророцы прорицаху тако, глаголюще: взыди в рамофъ галаадский и предуспееши, и предаст господь в руку цареву.
12 Вестник же, шедый призвати михею, рече ему: се, рекоша пророцы единеми усты благая о цари да будут убо и твоя словеса, якоже единаго от них, и да речеши благая.
13 И отвеща михеа: жив господь, яко еже аще речетъ бог ко мне, сие возглаголю.
14 И прииде ко царю, и рече ему царь: михее, имамъ ли ити рамоф галаадский на брань, или удержуся? И отвеща: взыди и предуспееши, и предадутся (врази) в руки ваша.
15 И рече ему царь: колико крат заклинаю тя, да не глаголеши мне, токмо истину во имя господне.
16 И рече михеа: видех всего израиля расточена по горамъ яко овцы, имже несть пастыря: и рече господь: не имут сии вожда, да возвратятся кийждо в дом свой въ мире.
17 И рече царь израилев ко иосафату: не рех ли тебе, яко не прорицает о мне благая, но токмо злая?
18 И рече михеа: не тако: слышите слово господне: видехъ господа седяща на престоле своем, и вся сила небесная предстояше одесную его и ошуюю его:
19 и рече господь: кто прельстит ахаава царя израилева, да взыдет и падет в рамофе галаадстемъ? и глаголаше един тако, и ин рече тако:
20 и изыде дух, и ста пред господем, и рече: азъ прельщу его: емуже господь, в чем, рече, (прельстиши)?
21 и рече: изыду и буду дух лжив во устехъ всех пророков его: рече же (господь): прельстиши и превозможеши, изыди и сотвори тако:
22 и ныне се, господь даде духа лжива во уста всемъ пророком твоим сим, и господь глагола о тебе злая.
23 И приступи седекиа сын ханаань, и удари михею в ланиту и рече ему: коим путем пройде дух господень от мене, еже глаголати к тебе?
24 Рече же михеа: се, узриши в день той, егда внидеши в ложницу из ложницы, да укрыешися.
25 И рече царь израилев: возмите михею, и отведите ко еммиру началнику града и ко иоасу князю сыну цареву,
26 и рцыте: сия глаголет царь: вверзите сего в темницу, и да яст хлеб печали и воду печали, дондеже возвращуся в мире.
27 Рече же михеа: аще возвращаяся возвратишися в мире, не глагола господь мною. И рече: слышите, вси людие.
28 И взыде царь израилев и иосафат царь иудин в рамофъ галаадский.
29 Рече же царь израилев ко иосафату: прикрыюся и вниду во брань, ты же облецыся в ризы моя. И прикрыся царь израилев и вниде во брань.
30 Царь же сирский повеле вождем колесниц своих, глаголя: не устремляйтеся на мала и на велика, но токмо на самаго царя израилева.
31 И бысть егда увидеша началницы колесниц иосафата, глаголаша: царь израилев есть сей. И обыдоша его воююще. иосафат же возопи ко господу, и господь послуша его, и отврати их бог от него.
32 И бысть егда увидеша воеводы колесниц, яко не бяше царь израилев, оставиша его.
33 И муж наляче лук приметно и порази царя израилева между легким и персями. И рече возатаю своему: обрати руку твою и изведи мя от брани яко изнемогох.
34 И скончана бысть брань в день той, и царь израилевъ бе стоя на колеснице своей противу сириом даже до вечера, и умре заходящу солнцу.
1 И возвратися иосафат царь иудин в дом свой мирно во иерусалим.
2 И изыде во сретение ему ииуй сын ананиин пророкъ и рече к нему: царю иосафате, нечестиву ли даеши помощь, или ненавидимому от господа дружиши? И рече ему ииуй: сего ради бысть на тя гнев господень:
3 но токмо дела благая обретошася в тебе, зане отялъ еси кумиры от земли иудины и исправил еси сердце твое взыскати господа.
4 И вселися иосафат во иерусалиме, и паки изыде къ людем от вирсавеи даже до горы ефремли, и возврати их ко господу богу отец своих.
5 И постави судии во всех градех иудиных крепких, во всяцем граде,
6 и рече судиям: видите, что вы творите, не человеческий бо вы суд творите, но господень, и с вами словеса суда:
7 и ныне да будет страх господень на вас, и храните и творите, яко несть у господа бога нашего неправды, ниже дивления лицу, ни приятия мзды.
8 Во иерусалиме же постави иосафат левитов и священниковъ и отценачалников от израиля в суд господень, да судятъ живущих во иерусалиме.
9 Повеле же им, глаголя: тако творите во страсе господни, во истине и сердцем совершенным:
10 всякую распрю, яже приидет к вам, братий вашихъ обитающих во градех своих, между кровию крове, и между повелением и заповедию, и оправданьми и судбами, разсудите им, да не согрешают господеви, и не приидетъ гнев на вас и на братию вашу: тако творите и не согрешите:
11 и се амариа, священник вождь над вами во всяко слово господне: и завдиа сын исмаиль вождь в дому иудине во всякому слову цареву: и книжницы и левити пред вами: укрепитеся и творите, и будет господь со благим.
1 По сих же приидоша сынове моавли и сынове аммони и с ними от амманитов ко иосафату на брань.
2 Приидоша же и сказаша иосафату, глаголюще: идет противу тебе велико множество от об он пол моря от сирии, и се, стоят во асасанъ-фамаре, иже есть енгадди.
3 И убояся, и вдаде иосафат лице свое взыскати господа, и проповеда пост во всей иудеи.
4 И собрася весь иуда взыскати господа: и от всех градовъ иудиных приидоша ко умолению господню.
5 И ста иосафат в собрании иуды во иерусалиме, въ дому господни пред лицем двора новаго,
6 и рече: господи боже отец наших, не ты ли еси бог на небеси горе, и ты владычствуеши всеми царствы язык, и в руку твоею есть крепость силы, и кто противостанетъ тебе?
7 не ты ли еси бог наш искоренивый живущия на земли сей от лица людий твоих израиля, и дал еси ю семени авраамлю возлюбленному твоему во веки?
8 и вселишася на ней, и устроиша в ней святыню имени твоему, глаголюще:
9 аще нападут на ны злая, мечь, суд, губителство, глад, станем пред домом сим и пред тобою, яко призвано имя твое в дому сем, и возопием к тебе от скорбей наших, и услышиши и спасеши:
10 и ныне се, сынове аммони и моавли и гора сиир, сквозе яже не изволил еси израилю проити, егда исхождаху от земли египетския, но уклонишася от них и не избиша их:
11 и се, ныне сии нападают на ны исходяще изгонити нас от наследия нашего, еже предал еси нам.
12 господи боже наш, не судиши ли имъ? в нас бо несть толика крепость, да можем сему множеству сопротивитися, еже нападе на ны, и не вемы что соделати имамы им: но токмо очи наши к тебе.
13 И весь иуда стояше пред господем, и чада их, и жены их.
14 Бе же иозиил сын захариин, сынов ванеа, сыновъ елеила, сынов мафаниа левитина, от сынов асафовых, и бысть на нем дух господень посреде народа,
15 и рече: слышите, весь иуда и обитающии во иерусалиме, и ты, царю иосафате: сия рече господь вам: не бойтеся, ниже ужасайтеся от лица народа сего многаго, несть бо ваше ополчение, но божие:
16 заутра изыдите противу их: се, восходят по восходу ассис, и обрящете их на краи реки противу пустыни иериил:
17 не ваше есть воевати: сия разумейте и узрите сие спасние господне с вами, иудо и иерусалиме: не убойтеся, ни ужасайтеся заутра изыти противу их, и господь съ вами.
18 И преклонься иосафат на лице свое, и весь иуда, и обитающии во иерусалиме, падоша пред господем поклонитися господеви.
19 И восташа левити от сынов каафовых и от сыновъ кореовых, хвалити господа бога израилева гласом великим въ высоту.
20 И заутра восташа рано и изыдоша в пустыню фекое. И внегда исходити им, ста иосафат (посреде ихъ), и возопи и рече: услышите мя, мужие иудины и вси обитающии во иерусалиме: веруйте в господа бога нашего и уверитеся: веруйте пророку его, и благопоспешится вам.
21 И советова с людьми, и постави псалмопевцы, и хвалящих исповедатися, и хвалити святая, внегда изыти пред силою, и глаголаху: исповедайтеся господеви, яко благ, яко в век милость его.
22 Егда же начаша хваления и исповедания, обрати господь воевати сынов аммоних на моава и гору сиир, изшедших на иуду, и поражени быша.
23 И восташа сынове аммони и моавли на обитающих въ горе сиири, да побиют их и сокрушат: и егда скончаша обитающих в сиире, восташа друг на друга, да потребятся.
24 иуда же прииде на созирание от пустыни, и воззре, и виде множество: и се, вси мертви падше на землю, и не бе спасыйся.
25 И изыде иосафат и людие его взяти корысти их, и обретоша скота много, и одежды, и корысти, и сосуды дражайшия и плениша их: и быша собирающе корысти их три дни, яко многи бяху.
26 Дне же четвертаго собрахуся во удоль благословения, ибо тако благословиша господа: сего ради прозваша место то удоль благословения даже до сего дне.
27 И возвратишася вси мужие иудины во иерусалим и иосафатъ вождь их с веселием великим: яко возвесели ихъ господь о вразех их.
28 И внидоша во иерусалим со псалтирми и гусльми и трубами в дом господень.
29 И бысть страх господень на вся царства земная, внегда услышати им, яко порази господь враги израилевы.
30 И умирися царство иосафатово, и даде ему господь покой окрест.
31 И царствова иосафат над иудою, сый лет тридесяти пяти, егда царство прия и двадесять пять лет царствова во иерусалиме. Имя же матери его азува, дщи салиина.
32 И хождаше в путех отца своего асы, и не уклонися от них творити правое пред господем:
33 обаче высокая еще бяху, и еще людие не управиша сердца своего ко господу богу отец своих.
34 Прочая же деяния иосафатова первая и последняя, се, писана суть во словесех ииуа сына ананиина, иже написа книгу царей израилевых.
35 И по сих сообщися иосафат царь иудин со охозиею царем израилевым, и сей беззаконнова,
36 занеже сотвори, и отиде к нему, да сотворят корабли, еже ити во фарсис: и сотвори корабли в гасионъ-гавере.
37 И пророчествова елиезер сын додиа от марисиса на иосафата, глаголя: понеже возымел еси любовь со охозиею, сокруши господь дело твое, и сокрушишася корабли твоя и не возмогоша поити во фарсис.
1 И успе иосафат со отцы своими, и погребенъ бысть с ними во граде давидове. И воцарися иорамъ сын его вместо его.
2 И братия его сынове иосафатовы шесть: азариа и иеил, и захариа и азариа, и михаил и сафатиа: вси сии сынове иосафата царя иудина.
3 И даде им отец их многи дары: сребро и злато, и оружие со грады крепкими во иудеи, царство же даде иораму, понеже сей бе первенец.
4 И воста иорам на царство свое, и укрепися, и изби всю братию свою мечем и некиих от началникъ израилевых.
5 Тридесяти и дву лет бе иорам, егда нача царствовати, и осмь лет царствова во иерусалиме,
6 и хождаше по путем царей израилевых, якоже содела дом ахаавль: дщи бо ахаавля бысть жена его: и сотвори злое пред господем.
7 И не хоте господь искоренити дому давидова ради завета, егоже завеща с давидом, и якоже рече ему, дати ему светилник и сыном его во вся дни.
8 Во днех онех отступи едом от иуды и постави себе царя.
9 И пойде иорам с началники своими, и вся конница с ним: и бысть, и воста нощию, и порази едома, иже обыде окрест его, и началники колесниц: и побегоша людие в селения своя.
10 И отступи от иуды едом даже до сего дне тогожде времене и ловна отступи из под руки его, зане остави господа бога отец своих:
11 ибо той сотвори высокая бо градех иудиных, и блудити сотвори обитающих во иерусалиме и прельсти иуду.
12 И прииде к нему писание от илии пророка, глаголя: сия рече господь бог давида отца твоего: понеже не ходил еси по пути иосафата отца твоего и в путехъ асы царя иудина,
13 и ходил еси в путех царей израилевых, и блудити сотворил еси иуду и обитающих во иерусалиме, якоже соблуди дом ахаавль, и братию твою, сыны отца твоего, лучшх тебе избил еси,
14 се, господь поразит тя язвою великою с людьми твоими и с сынми твоими и с женами твоими и со всем имениемъ твоим:
15 ты же будеши в язве лютей, в болезни чрева, дондеже изыдут внутренняя твоя с язвою от дний во дни.
16 И воздвиже господь на иорама иноплеменники и аравовъ и сопределныя ефиопы:
17 и взыдоша на иуду, и преодолеша, и плениша вся сокровища, яже обретоша в дому цареве, и сыновъ его и дщери его и жены его, и не остася ему сын, токмо охозиа менший сынов его.
18 И по сих всех порази его господь чрева болезнию неизцельною.
19 И бысть от дний во дни, и егда прииде время дний два дни, и изыде чрево его с болезнию, и умре в разслаблении лютем. И не сотвориша ему людие по обычаю погребения, якоже погребение отцем его.
20 Тридесяти двою лет бяше, егда царствовати нача, и осмь лет царствова во иерусалиме: ходи же не хвально, и погребоша его во граде давидове, обаче не во гробех царских.
1 Поставиша же царем обитающии во иерусалиме охозию сына его меншаго вместо его: всех бо старшихъ избиша нашедшии на них разбойницы арави и алимазоняне, и воцарися охозиа сын иорамов царь иудин:
2 двадесяти дву лет сый охозиа царствовати нача, и едино лето царствова во иерусалиме. И имя матери его гофолиа дщи амвриина.
3 И сей ходил есть по пути дому ахаавля, мати бо его бе советница, да грешит:
4 и сотвори лукавое пред господем якоже дом ахаавов, сии бо быша ему советницы по смерти отца его, в погубление ему,
5 и в советех их хождаше: и пойде со иорамом сыномъ ахаава царя израилева на брань противу азаила царя сирска в рамоф галаадский. И поразиша стрелцы иорама.
6 И возвратися иорам изцелитися во иезраель от ран, имиже раниша его сиряне в рамофе, внегда братися ему со азаилем царем сирским. охозиа же сынъ иорамль царь иудин сниде посетити иорама сына ахаавля во иезраель, разболеся бо.
7 И от бога бысть превращение охозии, да приидет ко иораму: и внегда приити ему, изыде с ним иорамъ противу ииуа сына намессиина, егоже помаза господь на дом ахаавль.
8 И бысть егда отмсти ииуй дому ахаавлю, и обрете началники иудины и братию охозиину, служащих охозии, и уби их: и уби ииуй иорама, и убежа охозиа.
9 И рече ииуй, еже взыскати охозию: и яша его врачующася в самарии и приведоша его ко ииуеви, и уби его, и погребоша его: реша бо, яко сын иосафатов есть, иже взыска господа всем сердцемъ своим. И не бысть в дому охозиине восприяти силу о царстве.
10 И гофолиа мати охозиина виде, яко умре сынъ ея, и воста и погуби все семя царское в дому иудине.
11 И взя иосавееф дщи царева иоаса сына охозиина, и украде его от среды сынов царевых, егда убиваху их, и даде его и кормилицу его в храмину постельнюю, и скры его иосавееф дщерь царя иорама, сестра охозиина, жена иодаа архиереа, и скры его от лица гофолиина, и не уби его.
12 И бысть с ними в дому божии сокрыт шесть лет, и царствова гофолиа на земли.
1 В лето же седмое укрепися иодай, и взя сотники, азарию сына иорамля и исмаила сына иоананя, и азарию сына овидова и амасию сына адиева и елисафана сына захариина с собою в дом господень.
2 И обыдоша иудею, и собраша левиты от всех градовъ иудиных и началники отечеств израилевых, и приидоша во иерусалим.
3 И завеща все собрание иудино завет в дому божии со царем: и показа им сына царева и рече им (иодай): се, сын царев да воцарится, якоже глагола господь о доме давидове:
4 и ныне слово сие, еже сотворите: третия часть от вас да изыдет в субботу, священников и левитов, и во врата входов,
5 и третия часть в дому цареве, и третия часть во вратехъ средних, и вси людие (да будутъ) во дворех дому господня:
6 и никтоже да внидет в дом господень, токмо священницы и левити и иже служат от левит: тии внидут, яко освящени суть, вси же людие да держат стражу господню:
7 левити же да ходят окрест царя, кийждо имея оружие свое в руку своею, и входяй в церков да убиется, и да будут со царем, входящу ему и исходящу.
8 И сотвориша левити и весь иуда по всему, елика повеле им иодай жрец: и взяша кийждо мужы своя от начала субботы даже до исхода субботы: занеже не остави иодай жрец службы дневныя.
9 И даде иодай священник сотником по чину поставленнымъ мечи и щиты и броня, яже бяху царя давида в дому божии,
10 и постави вся люди, коегождо во оружии его, от десныя страны церкве даже до левыя страны олтаря и церкве, над царем окрест:
11 и изведе сына царева, и возложиша на него диадиму и свидения, и поставиша его царем, и помаза его иодай жрец и сынове его и рекоша да живет царь.
12 И услыша гофолиа глас людий текущих и исповедающихъ и хвалящих царя, и вниде ко царю в церковь господню,
13 и виде, и се, царь стояше на степени своем, на входе же князи и трубы, и началницы окрест царя: и вси людие земли возрадовашася и вострубиша трубами, и поюще во органы певцы, и хваляще хвалою. И растерза гофолиа ризы своя, и возопи и рече: нападающе нападаете.
14 Изыде же иодай архиерей, и повеле сотником и началникомъ силы и рече им: изрините ю вон из церкве, и изыдите вслед ея, и да убиется мечем. Рече бо священник да не умрет в дому господни.
15 И даша ей ослабу на мало, дондеже пройде врата конник дому царева и убиша ю тамо.
16 И завеща иодай завет между собою и всеми людьми и царем, да быша были людие господни.
17 И внидоша вси людие земли в дом ваалов и разориша его, и олтари его и идолы его сокрушиша, и матфана жерца ваалова убиша пред олтарем его.
18 И вручи иодай жрец дела дому господня в руку священниковъ и левитов, и возстави дневныя чреды жерцев и левитов, яже раздели давиде в дому господни, и вознесе всесожжения господеви, якоже писано есть в законе моисеове, в радости и пениих по расположению давидову:
19 и постави придверники во вратех дому господня, и да не внидет нечист во всяцей вещи:
20 и взя отечеств началники, и сильныя, и началники людий, и вся люди земли, и возведоша царя от дому господня, и вниде вратами внутренними в дом царев, и посадиша царя на престоле царстем.
21 И возвеселишася вси людие земстии и град упокоися, и гофолиа убиена есть мечем.
1 Седми лет бе иоас, егда царствовати нача, и четыредесять лет царствова во иерусалиме. Имя же матери его савиа от вирсавеи.
2 Сотвори же иоас угодное пред господем во вся дни иодаа священника.
3 И поят ему иодай жены две, и родиша сыны и дщери.
4 И бысть по сих, и взыде на сердце иоасу, да возновитъ дом господень.
5 И собра священники и левиты и рече им: идите во грады иудины, и соберите от всего израиля сребро ко обновлению храма господня от лета до лета, и поспешно сотворите. Левити же не потщашася.
6 И призва царь иоас иодаа началника и рече ему: почто не надсматрял еси левитов, еже принести от иуды и от иерусалима, еже уставлено есть от моисеа человека божия, егда собра израиля в скинию свидения?
7 Гофолиа бо бе нечестива, и сынове ея разориша домъ божий, яко святая дому господня сотвориша ваалиму.
8 И повеле царь, да сотворят ковчежец и поставят при вратех господних извне,
9 и да проповедят во иудеи и во иерусалиме, приносити господу, якоже устави моисей раб божий над израилемъ в пустыни.
10 И даша вси началницы и вси людие, и вношаху и влагаху в ковчежец, дондеже наполнися.
11 И бысть егда приношаху ковчежец к настоятелемъ царевым руками левитскими, и егда увидеша, яко умножися сребро, и прихождаше писарь царев и настоятель великаго жерца, и выбираху из ковчежца, и (паки) поставляху на место его: тако творяху от дне до дне, и собраша сребра много.
12 И вдаде е царь и иодай жрец творящим дела на дело дому господня: и наимаху каменосечцы и древодели, да устрояют дом господень, и ковачи железу и меди, да укрепят дом господень.
13 И творяху творящии дела, и взыде долгота дел руками их, и возставиша дом господень в состояние (прежнее) его, и укрепиша.
14 Егда же совершиша, принесоша ко царю и ко иодаю останокъ сребра, из негоже сотвориша сосуды в дом господень, сосуды в служение всесожжений, и кадилницы златыя и сребряныя, и приношаху всесожжения в дому господни непрестанно, во вся дни иодаевы.
15 И состареся иодай исполнен дний, и умре сый ста тридесяти лет внегда скончатися ему:
16 и погребоша его во граде давидове со царми, понеже сотвори благое со израилем и с богом и с домом его.
17 И бысть по скончании иодаеве, внидоша началницы иудины и поклонишася царю: тогда послуша их царь.
18 И оставиша церковь господа бога отец своих и служаху астарте и истуканным: и бысть гнев (господень) на иуду и иерусалим в день той.
19 И посла к ним пророки, да обратятся ко господу, и не послушаша: и засвидетелствова им, и не покоришася.
20 И дух божий облече азарию священника сына иодаева, и ста пред людьми и рече им: сия глаголет господь: почто преступаете повеления господня? не поспешится вам, яко остависте господа, и оставит вас.
21 И нападоша на него и побиша и камением по повелению иоаса царя, во дворе дому господня.
22 И не воспомяну иоас царь милосердия, еже сотвори иодай отец его с ним, но уби сына его: иже, егда умираше, рече: да видит и судитъ господь.
23 И бысть по скончании лета, воста на него сила сирская, и прииде на иуду и на иерусалим, и убиша вся началники в людех в церкви, и весь плен их послаша ко царю в дамаск:
24 зане в малых мужех прииде сила сирская, и богъ предаде в руце их силу многу зело, зане оставиша господа бога отец своих: и на иоаса сотвори суд.
25 И по отшествии их от него, оставлену ему сущу в болезнех великих, и нападоша на него раби его за кровь священника сына иодаева, и убиша его на постели его, и умре: и погребоша его во граде давидове, но не погребоша его во гробех царских.
26 Нападшии же на него, завед сын семаафов амманитянинъ и иозавед сын самарифов моавитянин,
27 и сынове его вси, и приступиша к нему пять. И прочая словес его, се, написана в летописце царстем. И воцарися амасиа сын его вместо его.
1 Двадесяти пяти лет бысть амасиа, егда царствовати нача, и двадесять девять лет царствова во иерусалиме. Имя же матери его иоадаень от иерусалима.
2 И сотвори правое пред господем, обаче не сердцемъ совершенным.
3 И бысть егда утвердися царство в руце его, и умертви рабы своя иже убиша царя отца его.
4 Сынов же их не изби по заповедем закона господня, якоже писано есть в книзе закона моисеова, якоже повеле господь, глаголя: не умрут отцы за сыны, и сынове не умрут за отцы, но кийждо во гресе своем умрет.
5 И собра амасиа дом иудин, и постави их по домомъ отечеств их в тысящники и сотники, во всей иудеи и вениамине: и сочте их от двадесяти лет и вышше, и обрете их триста тысящ сильных исходити на брань, держащих копия и щиты.
6 Еще же ная от израиля сто тысящ храбрых в силе, за сто талант сребра.
7 И прииде человек божий к нему, глаголя: о, царю да не изыдет с тобою сила израилева, несть бо господь со израилем, со всеми сыны ефремли:
8 яко аще мниши укрепитися с ними, в бегство обратит тя господь пред враги, зане от господа есть укрепитися и в бегство обратитися.
9 Рече же амасиа к человеку божию: и что сотворю о сте талантах, яже дах силе израилеве? И рече человекъ божий: имать господь дати тебе множае сих.
10 И отлучи амасиа силу пришедшую к нему от ефрема, отити на место свое. И разгневашася зело на иуду, и возвратишася во страну свою во гневе ярости.
11 И амасиа укрепися, и взя люди своя и иде во удоль сланую, и порази тамо сынов сиир десять тысящ.
12 И десять тысящ живых яша сынове иудины, и приведоша их на верх некоторыя стремнины, и свергоша их стремглавъ с высоты стремнины, и вси разседошася.
13 Сынове же силы, ихже отсла амасиа, да не идут съ ним на брань, нападоша на грады иудины от самарии даже до вефорона: и убиша от них три тысящи, и плениша плен мног.
14 И бысть егда возвратися амасиа поразив идумею, и принесе себе богов сынов сиир, и постави в боги себе, и покланяшеся им и сам кадяше им.
15 И бысть гнев господень на амасию, и посла к нему пророка, и рече ему: почто взыскал еси боговъ людских, иже не избавиша людий своих от руку твоею?
16 И бысть егда той глаголаше к нему, и отвеща ему: еда советника царева поставих тя? внемли, да не биен будеши. И умолча пророк и рече: вем, яко восхоте господь потребити тя, занеже сотворил еси сие зло) и не послушал еси совета моего.
17 И совеща амасиа царь иудин, и посла ко иоасу сыну иоахаза сына ииуева, ко царю израилеву, глаголя: прииди, да увидимся между собою в лице.
18 И посла иоас царь израилев ко амасии царю иудину, глаголя: терн, иже в ливане, посла ко кедру ливанску, глаголя: даждь дщерь твою сыну моему в жену, и се, приидут зверие, иже в дубраве ливанстей: и приидоша зверие и потопташа терн:
19 рекл еси: се, поразих идумею, и воздвизается сердце твое в гордыню: ныне седи в дому твоем, и почто совещаваеши себе лукавое? падеши ты и иуда съ тобою.
20 И не послуша амасиа, зане от господа бысть, да предастся в руки иоасу, яко взыска богов идумейских.
21 И взыде иоас царь израилев, и явистася друг другу, той и амасиа царь иудин, в вефсамисе, иже есть иудин.
22 И паде иуда пред лицем израилевым, и бежа кийждо в жилище свое.
23 И амасию царя иудина сына иоасова, сына охозиина, ят иоас царь израилев в вефсамисе, и введе его во иерусалим, и разори стены иерусалимли от врат ефремлихъ даже до врат угла на четыреста лакот:
24 и все злато и сребро, и вся сосуды обретшияся в дому господни и у авдедома, и сокровища дому царева, и сынов залога, и возврати в самарию.
25 И поживе амасиа сын иоасов, царь иудин, по умертвии иоаса сына иоахазова царя израилева пятьнадесять лет.
26 Прочая же словеса амасиина первая и последняя, не се ли, писана суть в книзе царей иудиных и израилевыхъ?
27 И во время егда амасиа отступи от господа, и нападоша на него нападением, и побеже из иерусалима в лахис. И послаша вслед его в лахис, и убиша его ту.
28 И взяша его на конех и погребоша его со отцы его во граде давидове.
1 И взяша вси людие иудины (сына его) озию, он же бе лет шестинадесяти, и поставнша его царем вместо амасии отца его.
2 Той созда елаф, той возврати его иуде по успении царя со отцы его.
3 Шестинадесяти лет бысть озиа, егда царствовати нача, и пятьдесят два лета царствова во иерусалиме. Имя же матери его иехелиа от иерусалима.
4 И сотвори правое пред господем по всем, елика сотвори амасиа отец его,
5 и бе взыская господа во дни захарии разумеющаго во страсе господни, и во дни его взыска господа, и благопоспеши ему господь.
6 И изыде, и ополчися противу иноплеменников, и разори стены гефски и стены иавнира и стены азота и созда грады азотски и во иноплеменницех.
7 И укрепи его господь противу иноплеменников и противу аравов, иже обитаху в камениих, и противу минеов.
8 И даша минее дары озии, и прослы имя его даже до входа египетскаго, понеже укрепися до высоты.
9 Созда же озиа столпы во иерусалиме и над враты угла и над враты юдольными и над углами, и укрепи их:
10 и устрои столпы в пустыни, и ископа кладязи многи, понеже имяше многи скоты на поли и в пустыни, и делатели виноградов на горах и на кармиле, бе бо муж любоземледелен.
11 Бысть же озии сила творящая брань, и исходящая к ополчению на брань, и входящая на ополчение в число: и бе число их под рукою иеиля писаря и маасии судии и под рукою анании наместника царска.
12 Все число отечеств началников сильных на брань две тысящи шесть сот,
13 и с ними силы военныя триста седмь тысящ и пять сот: сии творяху брань в силе крепце, помогающе царю противу супостат.
14 уготова же им озиа всей силе щиты и копия, и шлемы и броня, луки же и пращи на метание камения.
15 И сотвори во иерусалиме хитрости ухищреныя вымыслом, еже быти им на столпех и на углех, да мещутъ стрелы и камения велия: и слышано бысть устроение его до далеча, понеже удивлен бысть ищя помощи (от господа), дондеже укрепися.
16 И егда укрепися, вознесеся сердце его на пагубу (свою): и обиде господа бога своего, и вниде въ церковь господню покадити над олтарем фимиамов.
17 И вниде по нем азариа священник и с ним священницы господни осмьдесят, сынове сильнии.
18 И сташа противно озии царю и рекоша ему: несть твое, озие, да кадиши фимиамом господеви, но токмо священником сыном аароним освященным кадити: изыди из святилища, яко отступил еси от господа: и не вменится тебе сие во славу от господа бога.
19 И прогневася озиа, и в руку его кадилница еже кадити во храме: и внегда разъярися он на жерцы господни, и проказа взыде на чело егоже пред священники в дому господни, на олтари фимиамнем.
20 И обратися к нему азариа архиерей и священницы, и се, той прокажен на челе своем, и изгнаша его оттуду, ибо и сам тщашеся изыти, яко обличи его господь.
21 Бысть же озиа царь прокажен даже до дне смерти своея и седяше в дому отлучене прокажен, понеже отторженъ бысть от дому господню: иоафам же сын его бе надъ царством его судя людем земли.
22 Прочая же словеса озии первая и последняя написана у исаии сына амосова пророка.
23 И успе озиа со отцы своими, и погребоша его со отцы его в поли царских гробов, зане реша, яко прокажен бысть. И воцарися иоафам сын его вместо его.
1 Сын двадесяти и пяти лет бяше иоафам, егда царствовати нача, и шестьнадесять лет царствова во иерусалиме. Имя же матере его иеруса, дщи садокова.
2 И сотвори правое пред господем по всем, яже сотвори озиа отец его, обаче не вниде в церковь господню, и еще людие согрешаху.
3 Той созда врата дому господня высокая, и на стене офли созда многа:
4 и грады созда на горах иудиных, и в дубравех дворы и столпы.
5 И той ополчися противу царя сынов аммоних и одоле его: и даяху ему сынове аммони на всякое лето по сту талант сребра и десять тысящ кор (меръ) пшеницы и десять тысящ ячменя: сия ему приношаше царь сыновъ аммоних на лето, в первое лето и второе и третие.
6 И укрепися иоафам, яко уготова пути своя пред господем богом своим.
7 Прочая же словеса иоафамля, и брань, и деяния его, се, писана в книзе царей иудиных и израилевых.
8 Сын двадесяти и пяти лет бяше, егда царствовати нача, и шестьнадесять лет царствова во иерусалиме.
9 успе же иоафам со отцы своими и погребен бысть во граде давидове. И воцарися ахаз сын его вместо его.
1 Сын двадесяти и пяти лет бе ахаз, егда царствовати нача, и шестьнадесять лет царствова во иерусалиме: и не сотвори правое пред господем, якоже давид отецъ его.
2 И пойде по путем царей израилевых: ибо и изваянная сотвори,
3 и идолом их пожре в земли веенномли и проведе сынов своих сквозе огнь по мерзостем языков, ихже потреби господь от лица сынов израилевых:
4 и кадяше на высоких и на холмех и под всяким древомъ дубравным.
5 И предаде его господь бог его в руце царя сирска и порази его, и плени от них плен мног, и приведе в дамаск, и в руки царя израилева предаде его, и порази его язвою великою.
6 И уби факей сын ромелиев царь израилев от иуды во един день сто двадесять тысящ мужей крепкихъ силою, егда оставиша господа бога отец своих.
7 И уби зехрий муж силен от ефрема маасию сына царева и езрикама началника дому его и елкана наместника царева.
8 Плениша же сынове израилевы от братии своих триста тысящ жен, сынов и дщерей: и плен мног плениша от них, и принесоша корысти в самарию.
9 И бе тамо пророк господень, именем одид, иже изыде во сретение воем грядущим в самарию и рече им: се, гнев господа бога отец ваших противу иуды, и предаде их в руки ваша, и убисте их во гневе, и даже до небесе достиже (ваше немилосердие):
10 и ныне сынов иудиных и иерусалимлих вы глаголете покорити в рабы и рабыни: не се ли, аз есмь с вами, свидетелствовати господу богу вашему?
11 и ныне послушайте мене и возвратите плен, егоже пленисте от братий ваших, яко гнев ярости господни на вас.
12 И восташа началницы от сынов ефремлих, азариа сын иоанан и варахиа сын васаллимофов, и езекиа сын селлумов и амасиа сын елдаев на грядущихъ от брани,
13 и рекоша им: не введите плена семо к нам, зане согрешим господу, вы хощете приложити ко грехом нашимъ и к безумию нашему, велик бо грех наш, и гневъ ярости господни на израили.
14 И оставиша воини плен и корысти пред началники и пред всем множеством.
15 И восташа мужие реченнии по имени и взяша плененых, и всех нагих облекоша от корыстей, и одеяша ихъ и обуша их, и даша ясти и пити им и помазатися, и всадиша на подъяремника всякаго немощнаго, и отвезоша их во иерихон град финический ко братии их, и возвратишася в самарию.
16 Во время оно посла царь ахаз ко царю ассурску, прося помощи себе и в том,
17 понеже идумеане нападоша и поразиша иуду и плениша плен:
18 и иноплеменницы нападоша на грады напольныя и от полуденныя иудеи и взяша вефсамис, и яже в дому господни, и яже в дому царстем, и князей, и даша царю аилон и гадироф, и сохоф и веси его, и гамзонъ и веси его, и фамну и веси ея, и вселишася тамо.
19 яко смири господь иудею ради ахаза царя иудина, понеже отступи отступлением от господа.
20 И прииде на него фелгафелласар царь ассурский, и озлоби его, и пресели, иже бяху в дамасце, в мидию, из сирии же пресели в дамаск пребывати.
21 И взя ахаз сущая в дому господни и яже в дому царстем и у началников, и даде царю ассурску: и не бысть на помощь ему, но токмо к печали его.
22 И приложи отступити от господа и рече царь ахаз:
23 взышу богов дамасковых биющих мя. И рече: бози царя сирска, тии укрепляют их, сим убо пожру, и будут ми в помощь. Тии же быша к падению его и всего израиля.
24 И остави ахаз сосуды дому господня и сокруши их, и заключи врата дому божия, и сотвори себе требища во всех углех иерусалима,
25 и во всех градех иудиных сотвори высокая, еже кадити богом чуждим, и разгнева господа бога отецъ своих.
26 Прочая же словеса его и деяния его первая и последняя, се, писана суть в книзе царей иудиныхъ и израилевых.
27 И успе ахаз со отцы своими, и погребоша его во граде давидове, ибо не внесоша его во гробы царей израилевых. И воцарися езекиа сын его вместо его.
1 И езекиа нача царствовати сый двадесяти и пяти лет, и двадесять девять лет царствова во иерусалиме. Имя же матери его авиа, дщерь захариина.
2 Сотвори же правое пред господем по всем, яже сотвори давид отец его.
3 И бысть егда ста на царстве своем в месяц первый, отверзе двери дому господня и обнови их,
4 и введе священники и левиты, и постави их на стране яже к востоку,
5 и рече им: послушайте мя, левити, ныне очиститеся и очистите дом господа бога отец наших, и изрините нечистоту из святилища:
6 яко отступиша отцы наши и сотвориша лукавое предъ господем богом нашим, и оставиша его, и отвратиша лице свое от скинии господни, и даша хребет,
7 и заключиша врата храма, и погасиша светилники, и фимиамом не кадиша, и всесожжений не принесоша во святилищи богу израилеву:
8 и разгневася яростию господь на иуду и на иерусалим, и предаде их во ужас и погубление и на звиздание, якоже вы видите очима вашима:
9 и се, поражени быша отцы наши мечем, и сынове наши и дщери наша и жены наша в пленении в земли не своей, якоже и ныне суть:
10 ныне убо положите на сердца ваша, еже завещати завет с господем богом израилевым, и отвратит гневъ ярости своея от нас:
11 и ныне не пренебрегайте, яко вас избра господь стояти пред ним, служити ему, и да будете ему служаще и кадяще.
12 И восташа левити, маал сын амасиев и иоиль сынъ захариев от сынов каафовых, и от сынов мерариныхъ кис сын авдиев и азариа сын илаелилов, и от сынов гедсоних иоадад сын земмань и иоадам, сии сынове иоахаини:
13 от сынов елисафаних самарий и иеиил, и от сыновъ асафовых захариа и матфаниа,
14 и от сынов еманих иеиил и семей, от сыновъ же идифумлих самафиа и озиил:
15 собраша же братию свою и освятишася по заповеди цареве повелением господним, да очистят дом божий:
16 и внидоша священницы внутрь церкве господни, да очистятъ ю, и извергоша всю нечистоту обретенную в дому господни и во дворе дому господня: и вземше левити, изнесоша къ потоку кедрску вон.
17 И начаша в первый день новомесячия перваго месяца очищати, и в день осмый того месяца внидоша во храм господень, и очистиша церковь господню во осми днех, и в день шестыйнадесять месяца перваго совершиша.
18 И внидоша внутрь ко езекии царю и рекоша: очистихомъ вся, яже в дому господни, олтарь всесожжения и сосуды его, и трапезу предложения со всеми сосуды ея,
19 и вся сосуды, яже оскверни царь ахаз в царство свое во отступлении своем, уготовахом и очистихом, и се, суть пред олтарем господним.
20 И воста рано езекиа царь, и собра началники града, и взыде в дом господень,
21 и вознесе телцев седмь и овнов седмь, агнцевъ седмь и козлов от коз седмь за грех, за царство и за святилище и за израиля, и рече сыном аароним священником, да взыдут на олтарь господень жрети телцев.
22 И заклаша телцев, и взяша кровь священницы и излияша на олтарь: и заклаша овнов и кровь на олтарь возлияша: и заклаша агнцев и облияша кровию олтарь:
23 и приведоша козлов, иже за грех, пред царя и церковь, и возложиша руки своя на них,
24 и пожроша их священницы, и покропиша кровию ихъ пред олтарем, и помолишася о всем израили: зане рече царь, о всем израили всесожжение и яже о гресе.
25 Постави же левиты в дому господни с кимвалы и псалтирми и гусльми, по заповеди давида царя и гада провидца царю и нафана пророка, яко по заповеди господней повеление (бысть) рукою пророков его.
26 Сташа же левити со органы давидовы и священницы съ трубами.
27 И повеле езекиа, да вознесут всесожжение на олтарь: и егда начаша возносити всесожжение, начаша хвалы пети господеви и трубити при органех давида царя израилева.
28 И вся церковь покланяшеся, и певцы пояху, и трубы трубяху, дондеже совершися всесожжение.
29 Егда же скончаша приношение, преклонися царь и вси иже бяху с ним и поклонишася господеви.
30 Побеле же езекиа царь и князи левитом, да восхвалятъ господа словесы давидовыми и асафа пророка: иже восхвалиша в веселии, и падоша, и поклонишася господеви.
31 И отвеща езекиа и рече: ныне исполнисте руки ваша господу, приведите и принесите жертвы хваления въ дом господень. И принесе (все) собрание жертвы и хвалы в дом господень, и всяк усердный сердцем всесожжения.
32 И бысть число всесожжения, еже принесе собрание, телцев седмьдесят, овнов сто, агнцев двести, вся сия во всесожжение господеви:
33 освященных же телцев шестьсот, овец три тысящи.
34 Но священницы не мнози бяху и не можаху одирати кожъ всесожжения, и помогоша им братия их левити, дондеже исполнися дело и дондеже освятишася жерцы, левити бо усерднее освятишася, нежели священницы:
35 всесожжения же много в туках совершения спасения, и возлияний всесожжения: и исправися дело в дому господни.
36 Возвеселися же езекиа и вси людие, яко уготова бог людем, понеже внезапу бысть слово.
1 Посла же езекиа ко всему израилю и иуде, и написа послания ко ефрему и манассии, да приидут къ дому господню во иерусалим сотворити пасху господу богу израилеву.
2 И усоветова царь и князи и все множество во иерусалиме сотворити пасху во вторый месяц:
3 не возмогоша бо сотворити во время свое, яко священницы не очистишася доволни, и людие не у собрашася во иерусалим.
4 И угодно бысть слово цареви и всему множеству.
5 И поставиша слово, да пройдет проповедь во весь израиль от вирсавеи даже до дана, да приидут сотворити пасху господу богу израилеву во иерусалиме, мнози бо не сотвориша по писанию.
6 И поидоша гонцы с посланьми от царя и от началниковъ во весь израиль и иудею по повелению цареву, глаголюще: сынове израилевы, обратитеся ко господу богу авраамлю и исаакову и иаковлю, и обратите спасшихся, иже избыша от руки царя ассурска,
7 и не будите якоже отцы ваши и братия ваша, иже отступиша от господа бога отец своих, и предаде их в погубление, якоже вы видите:
8 и ныне не ожесточите сердец ваших, якоже отцы ваши: дадите славу господу богу и внидите во святилище его, еже освяти во век, и служите господу богу вашему, и отвратит от вас гнев ярости своея:
9 понеже егда обратитеся вы ко господу, братия ваша и чада ваша будут в щедротах пред всеми пленившими их, и возвратит в землю сию, зане милостив и щедръ господь бог наш, и не отвратит лица своего от нас, аще обратимся к нему.
10 И бяху гонцы проходяще от града во град, на горе ефремли и манассиине, даже и до завулона: и быша яко посмеяваеми и поругаеми.
11 Но мужие от асира и от манассии и от завулона устыдишася и приидоша в иерусалим и во иудею.
12 И бысть рука господня дати им сердце едино приити, еже сотворити по повелению цареву и князей слово господне.
13 И собрашася во иерусалим людие мнози, да сотворятъ праздник опресноков в месяц вторый, сонм мног зело.
14 И восташа, и разориша олтари, иже во иерусалиме, и вся, в нихже кадяху идолом, испровергоша и ввергоша их в поток кедрский,
15 и пожроша пасху в четвертыйнадесять день месяца втораго: священницы же и левити умилишася и освятишася, и принесоша всесожжения в дом господень:
16 и сташа в чине своем по обычаю своему, по заповеди моисеа человека божия, и священницы приемляху кровь от руку левитску.
17 Понеже мног народ освящен не бысть, левити же бяху жруще пасху всякому, иже не можаше освятитися господу:
18 понеже болшая часть людий от ефрема и манассии, и иссахара и завулона освященна не бысть, но ядоша пасху не по писанию.
19 И помолися езекиа о них глаголя господь бог благий да умилостивится о всяцем сердцы направившемся еже взыскати господа бога отец своих, а не по очищению святынь.
20 И услыша господь езекию и изцели люди.
21 И сотвориша сынове израилевы обретшиися во иерусалиме праздник опресноков седмь дний в веселии велице хваляще господа на всяк день, левити же и священницы во органы господу.
22 И глагола езекиа ко всякому сердцу левитов, иже имех разум благ ко господу: и скончаша праздник опресноковъ седмь дний жруще жертву спасения и исповедающеся господу богу отец своих.
23 И усоветова весь собор купно сотворити ины седмь дний (праздника): и сотвориша седмь дний иных в веселии.
24 Понеже езекиа царь иудин даде начатки всему народу тысящу телцев и седмь тысящ овец: началницы же даша людем телцев тысящу и овец десять тысящ, и освятишася священников множество.
25 И возрадовася вся церковь, священницы и левити, и все множество иудино и обретшиися из иерусалима, и пришелцы пришедшии от земли израилевы и обитающии во иудеи.
26 И бысть веселие велие во иерусалиме: яко от дний соломона, сына давидова царя израилева, не бысть таковый праздник во иерусалиме.
27 И восташа священницы и левити и благословиша людий, и услышан бысть глас их, и прииде моление ихъ в жилище святое его на небо.
1 Егда же сия вся совершишася, изыде весь израиль обретшийся во градех иудиных, и сокрушиша идолы и посекоша дубравы, и разориша высокая и требища от всея иудеи и вениамина, и от ефрема и от манассии в конец: и возвратися весь израиль, кийждо во одержание свое и во грады своя.
2 И устави езекиа чреды священников и левитов, и чреды коегождо по служению его, священников и левитом, во всесожжение и в жертву спасения, и дабы хвалили и исповедалися и служили во вратех во дворехъ дому господня.
3 Часть же царева бысть от имения его во всесожжение утреннее и вечернее, и всесожжения в субботы и в новомесячия и в праздники писанныя в законе господни.
4 И заповеда людем живущим во иерусалиме дати часть священником и левитом, да укрепятся во служении дому господня.
5 И егда устави слово, даша много сынове израилевы начаток пшеницы и вина и елеа и меда, и вся яже родит земля, и десятины вся принесоша зело много сынове израилевы и иудины.
6 И иже обитаху во градех иудиных, и тии принесоша десятины от телцев и овец, и десятины от коз, и посвятиша господу богу своему, и внесоша и положиша купы многи.
7 месяца третияго начаша купам полагати основания, и месяца седмаго и совершиша их.
8 И вниде езекиа и началницы, и видеша купы, и благословиша господа и люди его израиля.
9 Вопроси же езекиа священников и левитов о купах.
10 И отвеща к нему азариа священник началный в дому садоков и рече отнележе начаша приносити начатки в дом господень, ядохом и пихом, и оставихом даже до множества, яко благослови господь люди своя, и оставихомъ еще множество сие.
11 И повеле езекиа еще уготовити житницы въ дому господни: и уготоваша.
12 И внесоша тамо начатки и десятины верно: над ними же бе настоятель хонениа левит, и семей брат его вторый,
13 и иеиил и озиа, и наеф и асаил, и иеримофъ и иозавад, и елиил и самахиа, и мааф и ванаиа, и сынове его приставлени рукою хонении и семеа брата его, якоже повеле езекиа царь и азариа началникъ дому господня.
14 И корей сын иемнаин левит, дверник к востоку над даяньми, еже даяти начатки господни и святая святых,
15 рукою одома и вениамина, и иисуса и семеа, и амариа и сехониа, рукою священников верно, даяти братии своей по чредам, малу и велику,
16 кроме рожденных мужеска полу от лет триех и вышше, всем, иже вхождаху в церковь господню по числу дний на день, в службу чред расположения их.
17 Сие разделение священников по домом отечеств: и левити в чредах своих, от двадесяти лет и вышше, по чином, в разделениих.
18 Всякому рожденному жен их и сынов их и дщерей их во все множество, понеже верно освятиша святое.
19 И сыновом аароним священствующим в селех, и иже от градов их во всяцем граде и граде, мужие иже именовани суть по имени, даяти часть всякому мужеску полу во священницех и всякому сочисляемому в левитех.
20 И сотвори тако езекиа во всей иудеи, и сотвори благое и правое и истинное пред господем богом своим,
21 и во всяцем деле, еже нача делати в дому господни, и в законе и в повелениих взыска бога своего всемъ сердцем своим и сотвори, и благопоспешися ему.
1 И по словесех сих и по истине сей, прииде сеннахирим царь ассирийский, и прииде на иудею, и ополчися на грады крепкия хотя взяти их.
2 И виде езекиа, яко прииде сеннахирим, и лице его воевати на иерусалим:
3 и советова со старейшины своими и с сильными, да заключатъ воды источников, иже беша вне града: и соизволиша ему.
4 И собра много людий, и заключи воды источников и поток текущь посреде града, глаголя: да не приидет царь ассирийский, и обрящет вод много, и укрепится.
5 И укрепися езекиа, и созда вся стены, яже быша разсыпаны, и столпы, и отвне предстение ино, и укрепи разрушенная града давидова, и уготова оружия многа:
6 и постави началники бранем над людьми, и собрашася к нему на площадь врат дебри, и глагола в сердца ихъ глаголя:
7 укрепитеся и мужайтеся и не устрашайтеся, ниже ужасайтеся от лица царя ассирийска и от лица всего множества, еже с ним: яко множайшии с нами суть неже с ним:
8 с ним мышца плотская, с нами же господь бог наш, еже спасати и поборати на брани нашей. И укрепишася людие словесы езекии царя иудина.
9 И по сих посла сеннахирим царь ассирийский рабы своя во иерусалим, сам же со всеми вои своими обстояше лахис, и посла ко езекии царю иудину и ко всему иуде, иже во иерусалиме, глаголя:
10 сия глаголет сеннахирим царь ассирийский: на что вы уповаете и седите во обстоянии во иерусалиме?
11 ни ли езекиа прельщает вас, да предаст вы в смерть и в глад и жажду, глаголя: господь бог наш спасет насъ от руки царя ассирийска?
12 не сей ли есть езекиа, иже разори олтари его и вышняя его, и повеле иуде и живущим во иерусалиме, глаголя: олтарем пред олтарем сим покланяйтеся и в нем кадите фимиамъ?
13 или не весте сего, что аз сотворих и отцы мои всем людем земли? еда могуще возмогоша бози языков всея земли избавити люди своя от руки моея?
14 кто во всех бозех языков сих, ихже искорениша отцы мои? еда возмогоша избавити люди своя от руки моея, и како может бог ваш избавити вас от руки моея?
15 ныне убо да не прельщает вас езекиа и да не творит вас уповати по сему, и не веруйте ему: аще бо ни един бог всякаго языка и царства возможе избавити люди своя от руки моея и от руку отецъ моих, то ниже бог ваш возможет избавити вас от руки моея.
16 И ина (многа) глаголаша раби его противу господа бога и противу езекии раба его.
17 И послания написа поношая господа бога израилева, и рече нань, глаголя: якоже бози язык земли не могоша избавити людий своих от руки моея, тако ниже бог езекиинъ избавит люди своя от руки моея.
18 И возопи воплем великим языком иудейским к людем, иже седяху на стенах иерусалимлих, да устрашитъ их и ужасит, и возмет град:
19 и глагола на бога иерусалимля, якоже и на богов людий земли, дела рук человеческих.
20 И помолися езекиа царь и исаиа сын амосов пророкъ о сих, и возопиша на небо.
21 И посла господь ангела, и порази всех мужей храбрыхъ и бранников, и началников и воевод в полцех царя ассирийска: и возврати лице его со стыдом на землю его, и прииде в дом бога своего, и сынове его изшедшии из чрева его погубиша его мечем.
22 И спасе господь езекию и обитающих во иерусалиме от руки сеннахирима царя ассирийска и от руку всех, и подаде им покой окрест.
23 И мнози приношаху дары господу во иерусалим и даяния езекии царю иудину, и возвышен бысть пред очесы всех языков по сих.
24 Во днех оных разболеся езекиа даже до смерти и помолися ко господу: и услыша его и даде ему знамение.
25 И не по воздаянию, еже даде ему, воздаде езекиа, но вознесеся сердце его, и бысть на него гнев и на иуду и на иерусалим.
26 И смирися езекиа от высоты сердца своего сам и живущии во иерусалиме, и не прииде на них гнев господень во дни езекиины.
27 И бысть езекиеви богатство и слава многа зело: и сокровища себе собра сребра и злата и камения честнаго, и ароматы, и оружия хранилницы, и сосуды драгоценны,
28 и житницы жит, пшеницы и вина и елеа, и села, и ясли всякому скоту, и ограды стадом,
29 и грады, яже созда себе, и строения овцамъ и волом множество: зане даде ему господь собрания многа зело.
30 Той езекиа загради исход воды геона вышняго и проведе ю в низ к полудню града давидова. И преуспе езекиа во всех делех своих.
31 И тако послом князей от вавилона, иже послани бяху к нему, да вопросят его о чудеси, еже случися на земли, остави его господь, да искусит его уведати, яже в сердцы его.
32 Прочая же словес езекииных, и щедроты его, се, писана суть в пророчестве исаии пророка сына амосова и в книзе царей иудиных и израилевых.
33 И успе езекиа со отцы своими, и погребоша его на восходех гробов сынов давидовых: и славу и честь даша ему в смерти его весь иуда и живущии во иерусалиме. И воцарися манассиа сын его вместо его.
1 Дванадесяти лет бе манассиа, егда царствовати нача, и пятьдесят пять лет царствова во иерусалиме:
2 сотвори же лукавое пред господем по всем мерзостемъ языческим, ихже истреби господь от лица сынов израилевых:
3 и возврати и созда высокая, яже раскопа езекиа отец его, и сострои кумиры ваалиму, и сотвори дубравы, и поклонися всему воинству небесному, и послужи им,
4 и созда олтари в дому господни, о немже глагола господь: во иерусалиме будет имя мое во веки:
5 созда же жертвенники всему воинству небесному во двою дворех дому господня.
6 Той же проведе чада своя чрез огнь во удоли веенномли и вражаше (со жребии), и последоваше гаданием, и волхвованием служаше, и имеяше чревоволшебники и обаянники, и многа лукавая сотвори пред господем, да прогневаетъ его:
7 истуканы же и слиянны образы сотвори и постави въ дому божии, о немже глагола бог к давиду и к соломону сыну его: в дому сем и во иерусалиме, егоже избрахъ от всех колен израилевых, положу имя мое во век,
8 и не приложу подвигнути ногу израилеву от земли, юже предах отцем их, токмо аще сохранят сотворити вся, яже повелех им, по всему закону и повелениемъ и судбам, рукою моисеовою.
9 И прельсти манассиа иуду и живущих во иерусалиме, да сотворят лукавое паче всех язык, ихже испроверже господь от лица сынов израилевых.
10 И глагола господь к манассии и к людем его, и не послушаша.
11 И наведе господь на них началники воев царя ассирийска, и яша манассию во узах, и связаша его оковы ножными, и отведоша в вавилон.
12 И егда озлоблен бысть, взыска лице господа бога своего, и смирися зело пред лицем бога отец своих,
13 и помолися к нему и послуша его, и услыша вопль его, и возврати его во иерусалим на царство его: и позна манассиа, яко господь той есть бог.
14 И по сих созда стену вне града давидова от ливы к югу в потоце и ко входу врат рыбных, исходящимъ вратами сущими окрест в высоту, и возвыси зело: и постави началники воем во всех градех иудиныхъ стенатых,
15 и отят боги чуждыя и идолы от дому господня, и вся олтари, яже созда в горе дому господня и во иерусалиме, и изверже вся вон из града.
16 И паки воздвиже олтарь господень, и пожре на томъ жертву спасния и хваления, и заповеда иуде, да служатъ господу богу израилеву.
17 Но еще людие жряху на высоких, обаче господу богу своему.
18 Прочая же словес манассииных, и молитва его, яже к богу, и словеса провидящих, иже глаголаху к нему во имя господа бога израилева,
19 се, во словесех молитвы его, и яко услыша его, и вси греси его и отступления его, и места, на нихже созида высокая, и сотвори тамо дубравы и изваянная, прежде неже обратитися ему, се, писана суть во словесех провидящих.
20 успе же манассиа со отцы своими, и погребоша его в саду дому его. И воцарися вместо его сын его амон.
21 Двадесяти дву лет бе амон, егда царствовати нача, и два лета царствова во иерусалиме,
22 и сотвори лукавое пред господем, якоже творяше манассиа отец его, и всем идолом, ихже сотвори манассиа отец его, пожре амон и послужи им:
23 и не смирися пред господем, якоже смирися манассиа отец его, зане сын его амон умножи грехи.
24 И нападоша нань раби его и убиша его въ дому его.
25 И убиша людие земли нападших на царя амона, и поставиша людие земли царя иосию сына его вместо его.
1 осми лет бысть иосиа, егда царствовати нача, и тридесять едино лето царствова во иерусалиме,
2 и сотвори правое пред господем, и ходи в путех давида отца своего, и не уклонися ни на десно, ни на лево.
3 И во осмое лето царства своего, и той еще сый отрок, нача взыскати господа бога отца своего давида: и во второенадесять лето царства своего нача очищати иудею и иерусалим от высоких и лесов, и от капищ и от истуканных.
4 И разориша пред лицем его олтари ваалимли, и высокая, яже на них: и посече дубравы и истуканныя, и слиянная сокруши и истни, и растопи и поверже предъ лицем гробов жрущих им:
5 и кости жерцев сожже на олтарех их, и очисти иуду и иерусалим,
6 и во градех манассииных и ефремлих и симеонихъ даже до неффалима, и в местех их окрест:
7 и олтари размета и лесы, и идолы разсече въ частицы, и вся высокая изсече от всея земли израилевы, и возвратися во иерусалим.
8 И во осмоенадесять лето царства своего, егда очищена бысть земля и церковь господня, посла сафана сына еселиева и амесию началника града и иоаса сына иоахазова памятописца своего, да утвердят дом господа бога своего.
9 И приидоша ко хелкии священнику великому, и даша сребро принесенное в дом господень, еже собраша левити хранящии дверь от руки манассиины и ефремли, и от началниковъ и от всех прочих во израили, и от сынов иудиныхъ и вениаминих и обитающих во иерусалиме,
10 и даша оное в руце творящих дела, приставницы в дому господни, и даша е творящим дела, иже творяху в дому господни да, обновят и укрепят храм:
11 и даша тектоном и домоздателем, да купят камение четвероуголное и древа на бервна на покрытие домов, ихже разориша царие иудины.
12 И мужие верно творяху в делех, и над ними надзирателе иеф и авдиа левити от сынов мерариных, и захариа и мосоллам от сынов каафовых надзирати, и всяк левитин, и всяк знаяй во органы пети:
13 и над носящими бремена и над всеми творящими дела, всяким деланием: и от левит беша писареве и судии и дверницы.
14 И внегда износити им сребро принесенное в церковь господню, обрете хелкиа священник книгу закона господня, (яже дана бысть) рукою моисеовою.
15 И отвеща хелкиа и рече к сафану писарю: книгу закона обретох в дому господни. И даде хелкиа книгу сафану.
16 И принесе сафан книгу ко царю, и возвести еще ко царю слово, глаголя: все сребро дано в руки рабовъ твоих творящих дела:
17 и слияша сребро обретенное в дому господни, и даша в руки надзирателей и в руки творящих дело.
18 И возвести сафан писарь слово царю, глаголя: книгу даде ми хелкиа священник. И прочте ю сафан предъ царем.
19 И бысть егда услыша царь словеса закона, и растерза ризы своя.
20 И повеле царь хелкиеви и ахикаму сыну сафанову и авдону сыну михееву, и сафану писарю и асаию рабу цареву, глаголя:
21 идите и молитеся господу за мя и за всякаго оставшагося во израили и иуде, о словесех книги, яже обретена есть, велик бо гнев господень разгореся на нас, понеже не послушаша отцы наши словес господних, еже творити по всем написанным в книзе сей.
22 И иде хелкиа, и имже повеле царь, ко олдане пророчице, жене селлима сына фекуева, сына есерии ризохранителя, хранящей заповеди, яже обиташе во иерусалиме в масане, и глаголаша ей по сим.
23 И та отвеща им: сия рече господь бог израилев: глаголите мужу, иже посла вас ко мне: сия рече господь:
24 се, аз наведу злая на место сие и на обитающихъ в нем вся словеса, яже писана суть в книзе прочтенней пред царем иудиным,
25 зане оставиша мя и кадяху богом чуждим, да прогневаютъ мя во всех делех рук своих: и разгореся ярость моя на место сие и не угасится:
26 и ко царю иудину, иже посла вас ко господу помолитися, тако глаголите ему: сия рече господь бог израилев: словеса, яже слышал еси,
27 и сокрушися сердце твое, и смирился еси предъ лицем моим, егда услышал еси словеса моя на место сие и на обитающих в нем, и смирился еси предо мною, и растерзал еси ризы твоя, и плакалъ еси предо мною, и аз услышах, рече господь:
28 се, приложу тя ко отцем твоим, и приложишися ко гробом твоим в мире, и не узрят очи твои всякаго зла, яже аз наведу на место сие и на обитающихъ в нем. И возвестиша царю слово.
29 И посла царь, и собра старейшины иудины и иерусалимли.
30 И взыде царь в дом господень и вси мужие иудины и живущии во иерусалиме, и священницы и левити, и вси людие от мала даже до велика: и читаше во ушеса ихъ вся словеса книги завета обретенныя в дому господни.
31 И ста царь на столпе, и завеща завет пред господемъ ходити пред господем, хранити заповеди его и свидения его и повеления его всем сердцем и всею душею, еже творити словеса завета написанная в книзе сей.
32 И постави всех, иже обретени бяху во иерусалиме и вениамине, и сотвориша обитающии во иерусалиме заветъ в дому господа бога отец своих.
33 И отя иосиа вся мерзости от всея земли, яже бе сынов израилевых, и сотвори всех обретшихся во иерусалиме и во израили служити господу богу своему во вся дни своя, и не уклонися от господа бога отец своих.
1 И сотвори иосиа во иерусалиме пасху господу богу своему, и пожре пасху в четвертыйнадесять день месяца перваго:
2 и постави священники на стражах их, и укрепи их на дела дому господня,
3 и рече левитом сильным во всем израили, да освятятся господу и поставят кивот святый в дому господни. И поставиши кивот святый во храме, егоже созда соломон сын давида царя израилева. И рече царь: несть вам на раменахъ носити ничтоже: ныне убо служите господу богу вашему и людем его израилю,
4 и уготовайтеся по домом отечеств ваших и по чредам вашим, по писанию давида царя израилева и рукою соломона сына его,
5 и стойте во храме по разделением домов отечествъ ваших во братии вашей сынех людских, и по части дому отечества в левитех:
6 и пожрите пасху и святая уготовайте братии вашей, еже сотворити по словеси господню, (еже глагола) рукою моисеовою.
7 И даде начатки иосиа сыном людским овцы и агнцы и козлы от коз, вся на пасху, и всех обретеныхъ в число тридесять тысящ, и волов три тысящи, сия от царева имения.
8 И началницы его даша начатки людем и священникомъ и левитом: даде же и хелкиа и захариа и иеиил началницы священником дому господня, и даша на пасху овец и агнцевъ и козлищ две тысящи шесть сот и волов триста.
9 Хонениа же и ванеа, и самеа и нафанаил брат его, и асавиа и иеиил и иозавад, началницы левитов, даша левитом на пасху пять тысящ овец и воловъ пять сот.
10 И уготовано бысть служение, и сташа священницы в чине своем и левити по разделением своим по повелению цареву,
11 и пожроша пасху, и пролияша священницы рукама своима кровь, и левити одираху кожы:
12 и уготоваша всесожжения предати им по разделению, по домом отечеств сыном людским, принести господеви всесожжения, якоже писано есть в книзе закона моисеова: тако и заутра:
13 и испекоша пасху на огни по чину, и святая свариша в медницах и в котлех, и предуспе им, и разделиша всем сыном людским:
14 себе же и священником потом уготоваша, яко в возношении всесожегаемых и туков даже до нощи священницы (быша не праздни), и левити уготоваша им и братии их сыном аароним.
15 И певцы сынове асафовы (стояху) в чине своем по повелению давида, и асафа и емана и идифума пророковъ царевых: и началницы и дверницы всех врат, имже не бе возможно отлучитися от службы святых, понеже братия их левити уготоваша им (брашна).
16 И управися и уготовася вся служба господня въ день той, да сотворят пасху и принесут всесожжения на олтарь господень по повелению царя иосии.
17 И сотвориша сынове израилевы, иже обретени бяху, пасху во время то и праздник опресноков седмь дний.
18 И не бысть пасхи подобныя той во израили от дний самуила пророка, и вси царие израилева не сотвориша пасхи, юже сотвори иосиа и священницы и левити, и весь иуда и израиль, иже обретен бысть, и обитающии во иерусалиме, господу.
19 Во осмоенадесять лето царства иосиина сия пасха празднована бысть.
20 По сих всех, ихже сотвори иосиа в дому, и басночревныхъ и волхвующих, и кумирницы и идолы и дубравы, яже бяху во иерусалиме и во иудеи, пожже огнем царь иосиа, да утвердит глаголы закона писанныя в книзе, юже обрете хелкиа жрец в дому господни: подобен ему не бысть пред ним, иже бы обратился ко господу всемъ сердцем своим и всею душею своею и всею крепостию своею по всему закону моисеову, и по нем не воста подобенъ ему. обаче не отвратися господь от гнева ярости своея великия, еюже разгневася яростию господь на иудею, всех ради разгневаний ея, имиже прогнева манассиа. И рече господь: и иуду убо отрину от лица моего, якоже отринух дом израилев, и отвергох град, егоже избрах, иерусалим, и храм, о немже рех: будетъ имя мое тамо. И изыде фараон нехао царь египетский на царя ассирийскаго на реку евфрат, еже ратовати его в хархамисе. И изыде во сретение ему иосиа царь.
21 И посла к нему послы, глаголя: что мне и тебе, царю иудинъ? не противу тебе днесь иду воевати, но на место брани моея: и бог рече потщатися мне: внемли ты о бозе иже со мною, да не убиет тя.
22 И не возврати иосиа лица своего от него, но ратовати его укрепися, ниже послуша словес нехаовых, яже от уст божиих, но иде, да воюет на поли магеддо.
23 И устрелиша стрелцы в царя иосию. И рече царь отроком своим: изведите мене (от брани), яко изнемогох зело.
24 И сведоша его отроцы его с колесницы, и въ другую колесницу посадиша его, яже бяше ему, и привезоша его во иерусалим, и умре и погребенъ бысть со отцы своими: и весь иуда и иерусалим плакаша о иосии.
25 И иеремиа возрыда по иосии, и глаголаша вси князи и княгини плачь по иосии даже до днесь: и даша его в повеление израилю, и се, писано есть в рыданиих.
26 Прочая же словеса иосиина и упование его бяху писана в законе господни:
27 дела же его, первая и последняя, се, писана суть в книзе царей израилевых и иудиных.
1 И взяша людие земли иоахаза сына иосиина, и помазаша его, и поставиша его царем вместо отца его во иерусалиме.
2 Двадесяти триех лет бысть иоахаз, егда царствовати нача, и три месяцы царствова во иерусалиме. Имя же матере его амитал, дщерь иеремиина от ловны. И сотвори лукавое пред господем по всем, яже сотвориша отцы его. (И плени иоахаза,) и окова его фараонъ нехао в девлафе в земли ефамли, еже не царствовати ему во иерусалиме,
3 и преведе его царь во египет, и возложи дань на землю (израилеву) сто талант сребра и талант злата.
4 И постави фараон нехао елиакима сына иосиина царемъ над иудою и иерусалимом вместо иосии отца его, и премени имя его иоаким. иоахаза же брата его взя фараон нехао и введе его во египет, и умре тамо: сребро же и злато даде фараону. Тогда нача земля поддана быти, еже даяти сребро по словеси фараонову: и кийждо по силе истязаше сребро и злато от людий земли, еже даяти фараону нехао.
5 Двадесяти пяти лет бе иоаким, егда царствовати нача, и единонадесять лет царствова во иерусалиме. Имя же матере его зехора, дщерь нириева от рамы. Сотвори же лукавое пред господем по всем, елика сотвориша отцы его. Во дни его прииде навуходоносор царь вавилонский на землю, и бе ему служа три лета и отступи от него. И посла господь на них халдеи и разбойники сврския и разбойники моавитския, и сынов аммоновыхъ и самарийских, и по словеси сем отступиша по словеси господню, (еже глагола) усты рабов своих пророков. обаче ярость господня бе на иуде, еже отринути его от лица своего, грех ради манассииных во всех, яже сотвори, и в крови неповинней, юже излия иоаким, и наполни иерусалим крове неповинныя. Но не восхоте господь искоренити их.
6 И взыде на него навуходоносор царь вавилонский, и окова его оковами медяными, и приведе его въ вавилон:
7 и часть сосудов дому господня пренесе в вавилон и постави я во храме своем в вавилоне.
8 Прочая же словес иоакимовых, и вся, яже содела, не се ли, сия писана в книзе словес дний царей иудиныхъ? И успе иоаким со отцы своими и погребен бысть в ганозане со отцы своими. И воцарися иехониа сынъ его вместо его.
9 осминадесяти лет бе иехониа, егда царствовати нача, и три месяцы и десять дний царствова во иерусалиме, и сотвори лукавое пред господем.
10 Егда же лету круг вращашеся, посла навуходоносоръ царь, иже и введе его в вавилон с предрагими сосуды дому господня, а царем постави седекию брата отцу его над иудою и иерусалимом.
11 Двадесять едино лето бысть седекии, егда царствовати нача, единнадесять лет царствова во иерусалиме:
12 и сотвори лукавое пред господем богом своим, и не усрамися лица иеремии пророка от уст господних,
13 егда от царя навуходоносора отвержеся, иже закля его пред богом: и ожесточи выю свою и сердце свое укрепи, да не обратится ко господу богу израилеву.
14 И вси славнии иудины и священницы и людие земли умножиша еже преступити преступления мерзостей языческих, и оскверниша дом господень, иже во иерусалиме.
15 И посылаше господь бог отец их к ним рукою пророков своих утренюя и посылая вестники своя, понеже щадяше людий своих и святилища своего: и тии поношаху послом божиим,
16 и уничижаху словеса его, и ругахуся пророкомъ его, дондеже сниде гнев господень на люди его, дондеже не бысть изцеления.
17 И наведе на них царя халдейска, и поби младенцы их мечем в дому святыни его: и не пощаде седекии и дев их не помилова, и старцы их изведе, и всех предаде в руки их,
18 и вся сосуды дому божия великия и малыя, и сокровища церкве господни, и вся сокровища царева и вельмож, вся внесе в вавилон:
19 и зажже дом господень и разори стену иерусалимлю, и столпы его сожже огнем и всяк сосуд драгий истни:
20 и пресели оставшихся в вавилон, и быша ему и сыном его в рабы даже до царства мидскаго,
21 да исполнится слово господне устами иеремии, донележе прия земля субботы своя субботствовати во вся дни запустения своего: субботствова до совершения седмидесяти лет.
22 В лето первое кира царя персскаго, повнегда исполнитися словесем господним усты иеремии, воздвиже господь духъ кира царя персскаго, и повеле проповедати во всем царствии своем писанием, глаголя:
23 сия глаголет кир царь персский: вся царства земли даде ми господь бог небесный, и той заповеда мне создати себе дом во иерусалиме, иже есть во иудеи: кто в вас от всех людий его? да будет бог его с ним, и да взыдет.
0 Молитва манассии царя иудейска, егда пленен держашеся во вавилоне. господи вседержителю, (1) боже отец наших, авраамов и исааков и иаковль и семене их праведнаго, сотворивый небо и землю со всею лепотою их и связавый море словом повеления твоего, заключивый бездну и запечатствовавый ю страшным и славным именем твоим, егоже вся боятся, и трепещут от лица силы твоея, (2) яко никтоже постоит пред великолепием славы твоея, и нестерпимь гнев, (3) еже на грешники, прещения твоего. (4) Безмерна же и неизследованна милость обещания твоего: ты бо еси господь, вышний, благоутробен, долготерпелив и многомилостивъ и каяйся о злобах человеческих. Ты, господи, по множеству благости твоея (5) обещал еси покаяние и оставление согрешившим тебе, и множеством щедрот твоих определилъ еси покаяние грешником во спасние. Ты убо, господи боже сил, (6) не положил еси покаяние праведным аврааму и исааку и иакову, не согрешившим тебе, но положилъ еси покаяние мне грешному, (7) зане согреших паче числа песка морскаго: умножишася беззакония моя, господи, умножишася беззакония моя, и несмь достоин воззрети и видети высоту небесную от множества неправд моих. (8) Слячен есмь многими узами железными, во еже не возвести главы моея, и несть ми ослабления: зане прогневах ярость твою (9) и лукавое пред тобою сотворих: не сотворивый воли твоея и не сохранивый повелений твоих, поставих мерзости и умножих претыкания. (10) И ныне приклоняю колена сердца, требуя от тебе благости. Согреших, господи, согреших, и беззакония моя аз вем, но прошу моляся: ослаби ми, господи, ослаби ми, и не погуби мене со беззаконии моими, ниже в век враждовав соблюдеши зол моих, ниже осудиши мя в преисподних земли: зане ты еси, боже, бог кающихся, и на мне явиши всю благость твою: яко недостойна суща спасеши мя по мнозей милости твоей, (11) и восхвалю тя выну во днехъ живота моего: яко тя поет вся сила небесная, и твоя есть слава во веки веков. Аминь.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>