Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга пророка Аггея
(шрифт на основе старой кириллицы)
На церковно-славянском языке гражданским шрифтом
1 Во второе лето, при дарии цари, в шестый месяц, в первый (день) месяца, бысть слово господне рукою аггеа пророка глаголя: рцы к зоровавелю салафиилеву от колена иудова и ко иисусу сыну иоседекову, иерею великому, глаголя:
2 сице глаголет господь вседержитель глаголя: людие сии глаголют: не прииде время создати храм господень.
3 И бысть слово господне рукою аггеа пророка глаголя:
4 аще время убо вам есть жити в домех вашихъ истесаных, храм же мой сей запусте?
5 И ныне сице глаголет господь вседержитель: устройте сердца ваша в пути ваша.
6 Сеясте много, и взясте мало: ядосте, и не в сытость: писте, и не в пиянство: облекостеся, и не согрестеся в них: и собираяй мзды собра во влагалище дираво.
7 Сице глаголет господь вседержитель: положите сердца ваша въ пути ваша,
8 взыдите на гору и усецыте древа, и принесите и созиждите храм, и благоволю в нем и прославлюся, рече господь.
9 Призресте на многа, и быша мала, и внесосте я въ храм, и отдунух я: сего ради сице глаголет господь вседержитель: зане храм мой есть пуст, вы же течете кийждо въ дом свой,
10 сего ради удержится небо от росы, и земля оскудитъ изношения своя,
11 и наведу мечь на землю и на горы, и на пшеницу и на вино и на елей, и на вся, елика износит земля, и на человеки и на скоты и на вся труды рук их.
12 И слыша зоровавель салафиилев от колена иудова, и иисус иоседеков, иерей великий, и вси прочии людие глас господа бога своего и словеса аггеа пророка, якоже посла его господь бог их к ним, и убояшася людие от лица господня.
13 И рече аггей вестник господень в вестницех господнихъ людем, глаголя: аз есмь с вами, глаголет господь.
14 И воздвиже господь дух зоровавеля салафиилева от колена иудова и дух иисуса иоседекова, иереа великаго, и дух прочиих всех людий: и внидоша и творяху дела во храме господа вседержителя бога своего.
1 В двадесять четвертый день месяца шестаго, во второе лето, при дарии цари,
2 в седмый месяц, в двадесять первый месяца, глагола господь рукою аггеа пророка глаголя:
3 рцы ныне к зоровавелю салафиилеву от колена иудова и ко иисусу сыну иоседекову, иерею великому, и ко всемъ прочиим людем, глаголя:
4 кто от вас, иже виде храм сей в славе его прежней? и како вы видите его ныне якоже не суща пред вами?
5 И ныне укрепляйся, зоровавелю, глаголет господь, и укрепляйся, иисусе, сыне иоседеков, иерею великий, и да укрепляются вси людие земли, глаголет господь (вседержитель), и творите: зане аз с вами есмь, глаголет господь вседержитель:
6 слово, еже завещах с вами, егда исходисте изъ земли египетския, и дух мой настоит посреде вас: дерзайте, зане сице глаголет господь вседержитель:
7 еще единою аз потрясу небом и землею, и морем и сушею,
8 и сотрясу вся языки, и приидут избранная всехъ языков: и исполню храм сей славы, глаголет господь вседержитель.
9 Мое сребро и мое злато, глаголет господь вседержитель:
10 зане велия будет слава храма сего последняя паче первыя, глаголет господь вседержитель: и на месте сем дамъ мир, глаголет господь вседержитель, и мир души в снабдение всякому зиждущему, еже возставити церковь сию.
11 В двадесять четвертый девятаго месяца, во второе лето при дарии цари, бысть слово господне ко аггею пророку глаголя:
12 сице глаголет господь вседержитель: вопроси иереев закона глаголя:
13 аще приимет человек мясо свято вскрай ризы своея, и коснется край ризы его хлеба, или варива, или вина, или масла, или всякаго брашна, еда освятится? И отвещаша священницы и реша: ни.
14 И рече аггей: аще прикоснется оскверненый или нечистый душею всякому сих, еда осквернится? И отвещаша иерее и реша: осквернится.
15 И отвеща аггей и рече: сице людие сии, и сице язык сей предо мною, глаголет господь, и сице вся дела рук их: и иже аще приближится тамо, осквернится за приятия их утренняя, поболят от лица лукавствъ своих, и ненавидесте во вратех обличающаго.
16 И ныне положите на сердцах ваших от дне сего и выше, прежде неже положити камень на камени в храме господни.
17 Кто бысте, егда влагасте в мех ячмене двадесять сат, и быша ячмене десять сатъ? и входисте в подточилие черпати пятьдесят мер, и быша двадесять.
18 Поразих вы неплодием и ветротлением и градомъ вся дела рук ваших, и не обратистеся ко мне, глаголетъ господь.
19 устройте же сердца ваша от сего дне и далее, от двадесять четвертаго дне девятаго месяца и от дне, в оньже основася церковь господня: положите в сердцахъ ваших,
20 аще еще познается на гумне, и аще еще виноград, и смокви, и яблонь, и древа масличная не творящая плода? от дне сего благословлю.
21 И бысть слово господне вторицею ко аггею пророку въ двадесять четвертый месяца глаголя:
22 рцы к зоровавелю сыну салафиилеву от колена иудова глаголя: аз потрясу небом и землею, и морем и сушею,
23 и превращу престолы царей, и потреблю силу царей языческих, и превращу колесницы и всадники, и снидут кони и всадницы их, кийждо во оружии на брата своего.
24 В той день, глаголет господь вседержитель, прииму тя, зоровавелю салафиилев, рабе мой, глаголет господь, и положу тя яко печать, понеже тя избрах, глаголет господь вседержитель.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>