Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга Притчей Соломоновых
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31
1 Притчи соломона сына давидова, иже царствова во израили,
2 познати премудрость и наказание и уразумети словеса мудрости,
3 прияти же извития словес и разрешения гаданий, уразумети же правду истинную и суд исправляти:
4 да даст незлобивым коварство, отрочати же юну чувство же и смысл.
5 Сих бо послушав, мудрый премудрее будет, а разумный строителство стяжет:
6 уразумеет же притчу и темное слово, речения же премудрых и гадания.
7 Начало премудрости страх господень, разум же благ всем творящим его: благочестие же в бога начало чувства, премудрость же и наказание нечестивии уничижат.
8 Слыши, сыне, наказание отца твоего и не отрини заветов матере твоея:
9 венец бо благодатей приимеши на твоем версе и гривну злату о твоей выи.
10 Сыне, да не прельстят тебе мужие нечестивии, ниже да восхощеши,
11 аще помолят тя, глаголюще: иди с нами, приобщися крове, скрыем же в землю мужа праведна неправедно:
12 пожрем же его якоже ад жива, и возмемъ память его от земли,
13 стяжание его многоценное приимем, исполнимъ же домы наша корыстей:
14 жребий же твой положи с нами: обще же влагалище стяжем вси, и мешец един да будет всем нам.
15 Не иди в путь с ними: уклони же ногу твою от стезь их:
16 нозе бо их на зло текут, и скори суть излияти кровь.
17 Не без правды бо простираются мрежи пернатым:
18 тии бо убийству приобщающеся, сокровищствуютъ себе злая: разрушение же мужей законопреступныхъ зло.
19 Сии путие суть всех творящих беззаконная: нечестием бо свою душу отемлют.
20 Премудрость во исходех поется, в стогнахъ же дерзновение водит,
21 на краех же стен проповедуется, у вратъ же сильных приседит, во вратех же града дерзающи глаголет:
22 елико убо время незлобивии держатся правды, не постыдятся: безумнии же досады суще желателие, нечестивии бывше, возненавидеша чувство
23 и повинни быша обличением. Се, предложу вам моего дыхания речение, научу же вас моему словеси.
24 Понеже звах, и не послушасте, и простирахъ словеса, и не внимасте,
25 но отметасте моя советы и моим обличениемъ не внимасте:
26 убо и аз вашей погибели посмеюся, порадуюся же, егда приидет вам пагуба,
27 и егда приидет на вы внезапу мятеж, низвращение же подобно бури приидет, или егда приидет вам печаль и градоразорение, или егда найдет на вы пагуба.
28 Будет бо егда призовете мя, аз же не послушаю вас: взыщут мене злии и не обрящут.
29 Возненавидеша бо премудрость, словесе же господня не прияша:
30 ниже хотеша внимати моим советом, ругахуся же моим обличением.
31 Темже снедят своих путий плоды и своего нечестия насытятся:
32 ибо, зане обидеша младенцев, убиени будут, и истязание нечестивыя погубит.
33 Мене же слушаяй вселится на уповании и почиет без страха от всякаго зла.
1 Сыне, аще приим глагол моея заповеди, скрыеши в себе,
2 послушает премудрости твое ухо, и приложиши сердце твое к разуму: приложиши же е в наказание сыну твоему.
3 Аще бо премудрость призовеши и разуму даси глас твой, чувство же взыщеши великим гласом,
4 и аще взыщеши ея яко сребра, и якоже сокровища испытаеши ю:
5 тогда уразумееши страх господень и познание божие обрящеши:
6 яко господь дает премудрость, и от лица его познание и разум:
7 и сокровищствует исправляющим спасние, защищаетъ же шествие их,
8 еже сохранити пути оправданий, и путь благоговеинствующих его сохранит.
9 Тогда уразумееши правду и суд и исправиши вся стези благия.
10 Аще бо приидет премудрость в твою мысль, чувство же твоей души добро быти возмнится,
11 совет добр сохранит тя, помышление же преподобное соблюдет тя,
12 да избавит тя от пути злаго и от мужа, глаголюща ничтоже верно.
13 о, оставившии пути правыя, еже ходити в путех тмы!
14 о, веселящиися о злых и радующиися о развращении злемъ!
15 ихже стези стропотны, и крива течения их, еже далече тя сотворити от пути права,
16 и чужда от праведнаго разума. Сыне, да тя не постигнет совет злый,
17 оставляяй учение юности, и завета божественнаго забывый:
18 постави бо при смерти дом свой и при аде с земными деяния своя.
19 Вси ходящии по нему не возвратятся, ниже постигнутъ стезь правых: ни бо достигнут лет жизни.
20 Аще бо быша ходили в стези благия, обрели убо быша стези правы гладки: блази будутъ жителие на земли, незлобивии же останут на ней:
21 яко правии вселятся на земли, и преподобнии останут на ней.
22 Путие нечестивых от земли погибнут, пребеззаконнии же изринутся от нея.
1 Сыне, моих законов не забывай, глаголы же моя да соблюдает твое сердце:
2 долготу бо жития и лета жизни и мир приложатъ тебе.
3 Милостыни и вера да не оскудевают тебе: обложи же я на твоей выи и напиши я на скрижали сердца твоего: и обрящеши благодать.
4 И промышляй добрая пред господем (богомъ) и человеки.
5 Буди уповая всем сердцем на бога, о твоей же премудрости не возносися:
6 во всех путех твоих познавай ю, да исправляетъ пути твоя.
7 Не буди мудр о себе: бойся же бога и уклоняйся от всякаго зла:
8 тогда исцеление будет телу твоему и уврачевание костем твоим.
9 Чти господа от праведных твоих трудов и начатки давай ему от твоих плодов правды:
10 да исполнятся житницы твоя множеством пшеницы, вино же точила твоя да источают.
11 Сыне, не пренебрегай наказания господня, ниже ослабевай от него обличаемь:
12 егоже бо любит господь, наказует, биетъ же всякаго сына, егоже приемлет.
13 блажен человек, иже обрете премудрость, и смертен, иже уведе разум.
14 Лучше бо сию куповати, нежели злата и сребра сокровища:
15 честнейша же есть камений многоценных: не сопротивляется ей ничтоже лукаво, благознатна есть всем приближающимся ей: всяко же честное недостойно ея есть.
16 Долгота бо жития и лета жизни в деснице ея, в шуйце же ея богатство и слава: от уст ея исходит правда, закон же и милость на языце носит.
17 Путие ея путие добри, и вся стези ея мирны.
18 Древо живота есть всем держащимся ея, и воскланяющимся на ню, яко на господа, тверда.
19 бог премудростию основа землю, уготова же небеса разумом:
20 в чувстве его бездны разверзошася, облацы же источиша росу.
21 Сыне, да не преминеши, соблюди же мой советъ и мысль:
22 да жива будет душа твоя, и благодать будетъ на твоей выи: (*будет же исцеление плотемъ твоим и уврачевание костем твоим:)
23 да ходиши надеяся в мире во всех путехъ твоих, нога же твоя не поткнется.
24 Аще бо сядеши, безбоязнен будеши, аще же поспиши, сладостно поспиши.
25 И не убоишися страха нашедшаго, ниже устремления нечестивых находящаго:
26 господь бо будет на всех путех твоих и утвердит ногу твою, да не поползнешися.
27 Не отрецыся благотворити требующему, егда имать рука твоя помогати.
28 Не рцы: отшед возвратися, и заутра дам, сильну ти сущу благотворити: не веси бо, что породит день находяй.
29 Не соплетай на друга твоего зла, пришелца суща и уповающа на тя.
30 Не враждуй на человека туне, да не что на тя содеет злое.
31 Не стяжи злых мужей поношения, ни возревнуй путем их.
32 Нечист бо пред господем всяк законопреступникъ и с праведными не сочетавается.
33 Клятва господня в домех нечестивых, дворы же праведных благословляются.
34 господь гордым противится, смиренным же даетъ благодать.
35 Славу премудрии наследят, нечестивии же вознесоша безчестие.
1 Послушайте, дети, наказания отча и внемлите разумети помышление,
2 дар бо благий дарую вам: моего закона не оставляйте.
3 Сын бо бых и аз отцу послушливый, и любимый пред лицем матере,
4 иже глаголаша и учиша мя: да утверждается наше слово в твоем сердцы: храни заповеди, не забывай:
5 стяжи премудрость, стяжи разум: не забуди, ниже презри речения моих уст, ниже уклонися от глагол уст моих.
6 Не остави ея, и имется тебе: возжелей ея, и соблюдет тя.
7 Начало премудрости: стяжати премудрость, и во всем стяжании твоем стяжи разум.
8 огради ю, и вознесет тя: почти ю, да тя обымет,
9 да даст главе твоей венец благодатей, венцемъ же сладости защитит тя.
10 Слыши, сыне, и приими моя словеса, и умножатся лета живота твоего, да ти будут мнози путие жития.
11 Путем бо премудрости учу тя, наставляю же тебе на течения правая:
12 аще бо ходиши, не запнутся стопы твоя: аще ли течеши, не утрудишися.
13 Имися моего наказания, не остави, но сохрани е себе в жизнь твою.
14 На пути нечестивых не иди, ниже возревнуй путем законопреступных.
15 На немже аще месте воя соберут, не иди тамо: уклонися же от них и измени:
16 не уснут бо, аще зла не сотворят: отимется сон от них, и не спят:
17 тии бо питаются пищею нечестия, вином же законопреступным упиваются.
18 Путие же праведных подобне свету светятся: предходят и просвещают, дондеже исправится день.
19 Путие же нечестивых темни: не ведят, како претыкаются.
20 Сыне, моим глаголом внимай, к моим же словесем прилагай ухо твое:
21 да не оскудеют ти источницы твои, храни я в сердцы твоем:
22 живот бо суть всем обретающим я и всей плоти их исцеление.
23 Всяцем хранением блюди твое сердце: от сих бо исходища живота.
24 отими от себе строптива уста, и обидливы устне далече от тебе отрини.
25 очи твои право да зрят, и вежди твои да помавают праведная.
26 Права течения твори твоима ногама и пути твоя исправляй.
27 Не уклонися ни на десно, ни на шуе: отврати же ногу твою от пути зла:
28 пути бо десныя весть господь, развращени же суть, иже ошуюю.
29 Той же права сотворит течения твоя, и хождения твоя в мире поспешит.
1 Сыне, моей премудрости внимай, к моим же словесемъ прилагай ухо твое,
2 да сохраниши мысль благую: чувство же моихъ устен заповедает тебе.
3 Не внимай злей жене: мед бо каплет от устен жены блудницы, яже на время наслаждаетъ твой гортань:
4 последи же горчае желчи обрящеши, и изощренну паче меча обоюду остра:
5 безумия бо нозе низводят употребляющихъ ю со смертию во ад, стопы же ея не утверждаются:
6 на пути бо животныя не находит, заблужденна же течения ея и неблагоразумна.
7 ныне убо, сыне, послушай мене и не отриновенна сотвори моя словеса:
8 далече от нея сотвори путь твой и не приближися ко дверем домов ея,
9 да не предаст иным живота твоего, и твоего жития немилостивым,
10 да не насытятся инии твоея крепости, твои же труды в домы чуждыя внидут,
11 и раскаешися на последок твой, егда иструтся плоти тела твоего, и речеши:
12 како возненавидех наказание, и от обличений уклонися сердце мое?
13 не послушах гласа наказующаго мя, и ко учащему мя не прилагах уха моего:
14 вмале бех во всяцем зле посреде церкве и сонмища.
15 Сыне, пий воды от своих сосудов и от твоих кладенцев источника:
16 да преизливаются тебе воды от твоего источника, во твоя же пути да происходят твоя воды.
17 Да будут тебе единому имения, и да никтоже чуждь причастится тебе.
18 Источник твоея воды да будет тебе твой, и веселися с женою, яже от юности твоея:
19 елень любве и жребя твоих благодатей да беседует тебе, твоя же да предыдет тебе и да будет с тобою во всяко время: в дружбе бо сея спребываяй умножен будеши.
20 Не мног буди к чуждей, ниже объят буди объятии не твоея:
21 пред очима бо суть божиима путие мужа, вся же течения его назирает.
22 Законопреступления мужа уловляют: пленицами же своих грехов кийждо затязается.
23 Сей скончавается с ненаказанными: от множества же своего жития извержется и погибает за безумие.
1 Сыне, аще поручишися за твоего друга, предаси твою руку врагу.
2 Сеть бо крепка мужу свои устне, и пленяется устнами своих уст.
3 Твори, сыне, яже аз заповедую ти, и спасайся: идеши бо в руце злых за твоего друга: буди не ослабевая, поощряй же и твоего друга, егоже испоручил еси.
4 Не даждь сна твоима очима, ниже да воздремлеши твоима веждома,
5 да спасешися аки серна от тенет и яко птица от сети.
6 Иди ко мравию, о, лениве, и поревнуй видевъ пути его, и буди онаго мудрейший:
7 он бо, не сущу ему земледелцу, ниже нудящаго его имеяй, ниже под владыкою сый,
8 готовит в жатву пищу и многое в лето творитъ уготование. Или иди ко пчеле и увеждь, коль делателница есть, делание же коль честное творит: еяже трудов царие и простии во здравие употребляют, любима же есть всеми и славна: аще силою и немощна сущи, (но) премудростию почтена произведеся.
9 Доколе, о, лениве, лежиши? когда же от сна востанеши?
10 Мало убо спиши, мало же седиши, мало же дремлеши, мало же объемлеши перси рукама:
11 потом же найдет тебе аки зол путникъ убожество: скудость же аки благий течец. Аще же не ленив будеши, приидет яко источникъ жатва твоя, скудость же аки злый течец (от тебе) отбежит.
12 Муж безумен и законопреступный ходит въ пути не благи:
13 той же намизает оком и знамение даетъ ногою, учит же помаванием перстов.
14 Развращенно же сердце кует злая: на всякое время таковый мятежы составляет граду.
15 Сего ради внезапу приходит ему погибель, разсечение и сокрушение неисцельное.
16 яко радуется о всех, ихже ненавидитъ бог, сокрушается же за нечистоту души:
17 око досадителя, язык неправедный, руце проливающя кровь праведнаго,
18 и сердце кующее мысли злы, и нозе тщащияся зло творити потребятся.
19 Разжизает лжы свидетель неправеден и насылаетъ суды посреде братий.
20 Сыне, храни законы отца твоего и не отрини наказания матере твоея:
21 навяжи же я на твою душу присно и обяжи их о твоей выи.
22 егда ходиши, води ю, и с тобою да будет: егда же спиши, да хранит тя, да востающу ти глаголет с тобою.
23 Зане светилник заповедь закона и свет, и путь жизни, и обличение, и наказание,
24 еже сохранити тя от жены мужаты и от наваждения языка чуждаго.
25 Сыне, да не победит тя доброты похоть, ниже уловлен буди твоима очима, ниже да совосхитишися веждами ея.
26 Цена бо блудницы, елика единаго хлеба: жена же мужей честныя души уловляет.
27 Ввяжет ли кто огнь в недра, риз же (своихъ) не сожжет ли?
28 Или ходити кто будет на углиех огненных, ног же не сожжет ли?
29 Тако вшедый к жене мужатей не без вины будет, ниже всяк прикасайся ей.
30 Не дивно, аще кто ят будет крадый: крадетъ бо, да насытит душу свою алчущую:
31 аще же ят будет, воздаст седмерицею, и вся имения своя дав, избавит себе.
32 Прелюбодей же за скудость ума погибель души своей содевает,
33 болезни же и безчестие понесет: поношение же его не загладится во век:
34 исполнена бо ревности ярость мужа ея: не пощадит в день суда,
35 не изменит ни единою ценою вражды, ниже разрешится многими дарми.
1 Сыне, храни моя словеса, моя же заповеди скрый у себе. Сыне, чти господа, и укрепишися: кроме же его не бойся иного.
2 Храни моя заповеди, и поживеши, словеса же моя яко зеницы очию:
3 обложи же ими твоя персты, напиши же я на скрижали сердца твоего.
4 Нарцы премудрость сестру тебе быти, разумъ же знаемь сотвори тебе,
5 да тя соблюдет от жены чуждия и лукавыя, аще тя словесы льстивыми облагати начнет:
6 оконцем бо из дому своего на пути приничущи,
7 егоже аще узрит от безумных чадъ юношу скудоумна,
8 проходящаго мимо угла в распутиих дому ея
9 и глаголющаго в темный вечер, егда упокоение будет нощное и мрачное:
10 жена же срящет его, зрак имущи прелюбодейничь, яже творит юных парити сердцам: воскрилена же есть и блудна,
11 в дому же не почивают нозе ея:
12 время бо некое вне глумится, время же на распутиих при всяцем угле приседит:
13 потом емши лобзает его, безстуднымъ же лицем речет к нему:
14 жертва мирна ми есть, днесь воздаю обеты моя:
15 сего ради изыдох в сретение тебе, желающи лица твоего, обретох тя:
16 простиралами покрых одр мой, коврами же сугубыми постлах, иже от египта,
17 шафраном посыпах ложе мое и дом мой корицею:
18 прииди и насладимся любве даже до утра, гряди и поваляемся в похоти:
19 несть бо мужа моего в дому, отиде в путь далече,
20 доволно сребра взя с собою, по многих днехъ возвратится в дом свой.
21 И прельсти его многою беседою, тенетами же устен (в блудъ) привлече его.
22 он же абие последова ей объюродев, и якоже вол на заколение ведется, и яко пес на узы,
23 или яко елень уязвлен стрелою в ятра: и спешит яко птица в сеть, не ведый, яко на душу свою течет.
24 ныне убо, сыне, послушай мене и внимай глаголом уст моих,
25 да не уклонится в пути ея сердце твое,
26 и да не прельстишися в стезях ея: многихъ бо уязвивши низверже, и безчисленни суть, ихже убила есть:
27 путие адовы дом ея, низводящии в сокровища смертная.
1 Темже ты премудрость проповеждь, да разум послушаетъ тебе.
2 На высоких бо краех есть, посреде же стезь стоит:
3 при вратех бо сильных приседит, во входехъ же поется.
4 Вас, о, человецы, молю, и вдаю мой гласъ сыном человеческим.
5 уразумейте, незлобивии, коварство, ненаказаннии же, приложите сердце.
6 Послушайте мене: честная бо реку и изнесу от устен правая.
7 яко истине поучится гортань мой, мерзки же предо мною устны лживыя.
8 С правдою вси глаголы уст моих, ничтоже в них стропотно, ниже развращенно.
9 Вся права разумевающим, и права обретающимъ разум.
10 Приимите наказание, а не сребро, и разумъ паче злата искушена: избирайте же ведение паче злата чиста.
11 Лучши бо премудрость камений многоценных, всякое же честное недостойно ея есть.
12 Аз премудрость вселих совет, и разумъ и смысл аз призвах.
13 Страх господень ненавидит неправды, досаждения же и гордыни, и пути лукавых: возненавидехъ же аз развращенныя пути злых.
14 Мой совет и утверждение, мой разум, моя же крепость.
15 Мною царие царствуют, и сильнии пишут правду:
16 мною вельможи величаются, и властитилие мною держат землю.
17 Аз любящия мя люблю, ищущии же мене обрящутъ благодать.
18 Богатство и слава моя есть, и стяжание многих и правда.
19 Лучше есть плодити мене, паче злата и камения драга: мои же плоды лучше сребра избранна.
20 В путех правды хожду и посреде стезь оправдания живу,
21 да разделю любящим мя имение, и сокровища их исполню благих. Аще возвещу вам бывающая на всяк день, помяну, яже от века, исчести.
22 господь созда мя евр.: стяжа мя. начало путий своих в дела своя,
23 прежде век основа мя, в начале, прежде неже землю сотворити,
24 и прежде неже бездны соделати, прежде неже произыти источником вод,
25 прежде неже горам водрузитися, прежде же всех холмов раждает мя.
26 господь сотвори страны и ненаселенныя, и концы населенныя поднебесныя.
27 егда готовяше небо, с ним бех, и егда отлучаше престол свой на ветрех,
28 и егда крепки творяше вышния облаки, и егда тверды полагаше источники поднебесныя,
29 и егда полагаше морю предел его, да воды не мимо идут уст его, и крепка творяше основания земли, бех при нем устрояющи.
30 Аз бех, о нейже радовашеся, на всякъ же день веселяхся пред лицем его на всяко время,
31 егда веселяшеся вселенную совершив, и веселяшеся о сынех человеческих.
32 ныне убо, сыне, послушай мене: и блажени, иже пути моя сохранят.
33 услышите премудрость, и умудритеся, и не отмещите.
34 Блажен муж, иже послушает мене, и человек, иже пути моя сохранит, бдяй при моих дверехъ присно, соблюдаяй праги моих входов:
35 исходи бо мои исходи живота, и уготовляется хотение от господа:
36 согрешающии же в мя нечествуют на своя души, и ненавидящии мя любят смерть.
1 Премудрость созда себе дом и утверди столповъ седмь:
2 закла своя жертвенная, и раствори в чаши своей вино, и уготова свою трапезу:
3 посла своя рабы, созывающи с высоким проповеданиемъ на чашу, глаголющи:
4 иже есть безумен, да уклонится ко мне.
5 И требующим ума рече: приидите, ядите мой хлеб и пийте вино, еже растворих вам:
6 оставите безумие и живи будете, да во веки воцаритеся: и взыщите разума, да поживете и исправите разум в ведении.
7 Наказуяй злыя приимет себе безчестие, обличаяй же нечестиваго порочна сотворит себе (*обличения бо нечестивому раны ему).
8 Не обличай злых, да не возненавидят тебе: обличай премудра, и возлюбит тя.
9 Даждь премудрому вину, и премудрейший будет: сказуй праведному, и приложит приимати.
10 Начало премудрости страх господень, и советъ святых разум: разумети бо закон, помысла есть благаго.
11 Сим бо образом многое поживеши время, и приложатся тебе лета живота твоего.
12 Сыне, аще премудр будеши, себе премудръ будеши и искренним твоим: аще же зол будеши, един почерпнеши злая. Сын наказан премудръ будет, безумный же слугою употребится. Иже утверждается на лжах, сей пасет ветры, той же поженет птицы парящия: остави бо пути своего винограда, в стезях же своего земледелания заблуди, проходит же сквозе пустыню безводную и землю определенную в жаждех, собираетъ же рукама неплодие.
13 Жена безумная и продерзая скудна хлебомъ бывает, яже не весть стыдения,
14 седе при дверех дому своего, на столце яве на стогнах,
15 призывающая мимоходящих и исправляющих пути своя:
16 иже есть от вас безумнейший, да уклонится ко мне: и лишенным разума повелеваю, глаголющи:
17 хлебом сокровенным в сладость прикоснитеся и воду татьбы сладкую пийте.
18 он же не весть, яко земнороднии у нея погибают и во дне ада обретаются. Но отскочи, не замедли на месте ея, ниже настави ока своего к ней: тако бо пройдеши воду чуждую и прейдеши реку чуждую: от воды же чуждия ошайся и от источника чуждаго не пий, да многое время поживеши, и приложатся тебе лета живота.
1 Сын премудр веселит отца, сын же безуменъ печаль матери.
2 Не пользуют сокровища беззаконных, правда же избавит от смерти.
3 Не убиет гладом господь душу праведную, животъ же нечестивых низвратит.
4 Нищета мужа смиряет: руце же мужественныхъ обогащаются.
5 Сын наказан премудр будет, безумный же слугою употребится: спасется от зноя сынъ разумный, ветротленен же бывает на жатве сынъ беззаконный.
6 благословение господне на главе праведнаго: уста же нечестивых покрыет плачь безвременный.
7 Память праведных с похвалами: имя же нечестивыхъ угасает.
8 Премудр сердцем приимет заповеди: непокровенный же устнама остроптевая запнется.
9 Иже ходит просто, ходит надеяся: развращая же пути своя, познан будет.
10 Намизаяй оком с лестию собирает мужемъ печали: обличаяй же со дерзновением миротворит.
11 Источник жизни в руце праведнаго: уста же нечестиваго покрыет пагуба.
12 Ненависть воздвизает распрю: всех же нелюбопрителныхъ покрывает любовь.
13 Иже от устен произносит премудрость, жезлом биет мужа безсердечна.
14 Премудрии скрыют чувство, уста же продерзаго приближаются сокрушению.
15 Стяжание богатых град тверд, сокрушение же нечестивых нищета.
16 Дела праведных живот творят, плодове же нечестивых грехи.
17 Пути жизни хранит наказание: наказаниемъ же не обличеный заблуждает.
18 Покрывают вражду устне правыя: износящии же укоризну безумнейшии суть.
19 от многословия не избежиши греха: щадя же устне, разумен будеши.
20 Сребро разжженое язык праведнаго: сердце же нечестиваго исчезнет.
21 устне праведных ведят высокая: безумнии же в скудости скончаваются.
22 благословение господне на главе праведнаго, сие обогащает, и не имать приложитися ему печаль в сердцы.
23 Смехом безумный творит злая: премудрость же мужеви раждает разум.
24 В погибели нечестивый обносится: желание же праведнаго приятно.
25 Преходящей бури, нечестивый исчезает, праведный же уклонився спасается во веки.
26 якоже гроздие зеленое вред зубом и дымъ очима, тако законопреступление творящим е.
27 Страх господень прилагает дни: лета же нечестивыхъ умалятся.
28 Пребывает с праведными веселие, упование же нечестивых погибает.
29 утверждение преподобному страх господень, сокрушение же творящим злая.
30 праведник во веки не поколеблется: нечестивии же не населят земли.
31 уста праведнаго каплют премудрость, языкъ же неправеднаго погибнет:
32 устне мужей праведных каплют благодати, уста же нечестивых развращаются.
1 Мерила льстивая мерзость пред господем, весъ же праведный приятен ему.
2 Идеже аще внидет досаждение, тамо и безчестие: уста же смиренных поучаются премудрости.
3 умираяй праведник остави раскаяние, удобна же бывает и посмеятелна нечестивых погибель.
4 Совершенство правых наставит их, и поползновение отрицающихся пленит их. Не упользуютъ имения в день ярости: правда же избавитъ от смерти.
5 Правда непорочнаго исправляет пути, нечестие же впадает в неправду.
6 Правда мужей правых избавит их, безсоветиемъ же уловляются беззаконнии.
7 Скончавшуся мужу праведну, не погибнет надежда: похвала же нечестивых погибнет.
8 праведный от лова убегнет, в негоже место предается нечестивый.
9 Во устех нечестивых сеть гражданом, чувство же праведных благопоспешно.
10 Во благих праведных исправится град, и въ погибели нечестивых радование.
11 В благословении правых возвысится град, усты же нечестивых раскопается.
12 Ругается гражданом лишенный разума, мужъ же мудр безмолвие водит.
13 Муж двоязычен открывает советы в сонмищи, верный же духом таит вещи.
14 Имже и несть управления, падают аки листвие, спасение же есть во мнозе совете.
15 Лукавый злодействует, егда сочетавается с праведным, ненавидит же гласа утверждения.
16 Жена благодатна возносит мужу славу: престолъ же безчестия жена ненавидящая правды. Богатства ленивии скудни бывают, крепцыи же утверждаются богатством.
17 Души своей благотворит муж милостивый, погубляетъ же тело свое немилостивый.
18 Нечестивый творит дела неправедная: семя же праведных мзда истины.
19 Сын праведный раждается в живот: гонение же нечестиваго в смерть.
20 Мерзость господеви путие развращенни, приятни же ему вси непорочнии в путех своих.
21 В руку руце вложив неправедно, не безъ муки будет злых: сеяй же правду приимет мзду верну.
22 якоже усерязь златый в ноздрех свинии, тако жене злоумней лепота.
23 Желание праведных все благое, надежда же нечестивыхъ погибнет.
24 Суть, иже своя сеюще, множайшая творят: суть же и собирающе чуждая, умаляются.
25 Душа благословенна всякая простая: муж ярый неблагообразен.
26 удержаваяй пшеницу оставит ю языком: продаяй пшеницу скупо, от народа проклят, благословение же господне на главе подавающаго.
27 Творяй благая ищет благодати добры: ищущаго же злая постигнут его.
28 Надеяйся на богатство свое, сей падет: заступаяй же праведных, той возсияет.
29 Не сматряяй своего дому наследит ветры: поработает же безумный разумному.
30 от плода правды древо жизни прозябает: отемлются же безвременно души беззаконных.
31 Аще праведный едва спасается, нечестивый же и грешный где явится?
1 Любяй наказание любит чувство: ненавидяй же обличения безумен.
2 Лучше обретый благодать от господа бога: мужъ же законопреступен премолчан будет.
3 Не исправится человек от беззаконнаго: корения же праведных не отимутся.
4 Жена мужественная венец мужу своему: якоже в древе червь, тако мужа погубляет жена злотворная.
5 Мысли праведных судбы: управляют же нечестивии лести.
6 Словеса нечестивых льстива в кровь, уста же правых избавят их.
7 Аможе обратится нечестивый, исчезает: храмины же праведных пребывают.
8 уста разумнаго хвалима бывают от мужа: слабосерд же поругаемь бывает.
9 Лучше муж в безчестии работаяй себе, нежели честь себе обложив и лишаяйся хлеба.
10 праведник милует души скотов своих: утробы же нечестивых немилостивны.
11 Делаяй свою землю исполнится хлебов: гонящии же суетная лишени разума. Иже есть сладостенъ в виннем пребывании, во своих твердынех оставитъ безчестие.
12 Желания нечестивых зла: корение же благочестивыхъ в твердостех.
13 За грех устен впадает в сети грешник: избегает же от них праведник. Сматряяй кротко помилован будет, а сретаяй во вратех оскорбитъ души.
14 от плодов уст душа мужа наполнится благих, воздаяние же устен его воздастся ему.
15 Путие безумных прави пред ними: послушаетъ советов мудрый.
16 Безумный абие исповесть гнев свой: крыетъ же свое безчестие хитрый.
17 явленную веру возвещает праведный: свидетель же неправедных льстив.
18 Суть, иже глаголюще уязвляют аки мечи: языцы же премудрых исцеляют.
19 устне истинны исправляют свидетелство: свидетель же скор язык имать неправеден.
20 Лесть в сердцы кующаго злая: хотящии же мира возвеселятся.
21 Ничтоже неправедное угодно есть праведному: нечестивии же исполнятся злых.
22 Мерзость господеви устне лживы: творяй же верно приятен ему.
23 Муж разумивый престол чувствия: сердце же безумных срящет клятвы.
24 Рука избранных одержит удобь: льстивии же будут во пленении.
25 Страшное слово сердце мужа праведна смущает, весть же благая веселит его.
26 Разумив праведник себе друг будет: мысли же нечестивых некротки: согрешающих постигнутъ злая, путь же нечестивых прельстит я.
27 Не улучит льстивый ловитвы: стяжание же честное муж чистый.
28 В путех правды живот, путие же злопомнящихъ в смерть.
1 Сын благоразумный послушлив отцу, сын же непокорливый в погибель.
2 от плодов правды снесть благий: души же беззаконных погибают безвременно.
3 Иже хранит своя уста, соблюдает свою душу: продерзивый же устнама устрашитъ себе.
4 В похотех есть всяк праздный: руки же мужественных в прилежании.
5 Словесе неправедна ненавидит праведник: нечестивый же стыдится и не возымет дерзновения.
6 Правда хранит незлобивыя: нечестивыя же злы творит грех.
7 Суть богатяще себе, ничесоже имуще: и суть смиряющеся во мнозе богатстве.
8 Избавление мужа души свое ему богатство: нищий же не терпит прещения.
9 Свет праведным всегда, свет же нечестивыхъ угасает: души льстивыя заблуждают во гресех, праведнии же щедрят и милуют.
10 злый с досаждением творит злая: себе же знающии премудри (суть).
11 Имение поспешаемо со беззаконием умалено бывает, собираяй же себе со благочестием изобилствовати будет: праведный щедрит и дает.
12 Лучше начинаяй помогати сердцем обещающаго и в надежду ведущаго: древо бо жизни желание доброе.
13 Иже презирает вещь, презрен будет от нея: а бояйся заповеди, сей здравствует.
14 Сыну лукавому ничтоже есть благо: рабу же мудру благопоспешна будут дела, и исправится путь его.
15 Закон мудрому источник жизни: безумный же от сети умрет.
16 Разум благ дает благодать: разумети же закон, мысли есть благия: путие же презирающих въ погибели.
17 Всяк хитрый творит с разумом, безумный же прострет свою злобу.
18 Царь дерзостен впадет во злая, вестникъ же мудр избавит его.
19 Нищету и безчестие отемлет наказание: храняй же обличения прославится.
20 Желания благочестивых наслаждают душу, дела же нечестивых далече от разума.
21 Ходяй с премудрыми премудр будет, ходяй же с безумными познан будет.
22 Согрешающих постигнут злая, праведных же постигнут благая.
23 благ муж наследит сыны сынов: сокровищствуется же праведным богатство нечестивых.
24 праведнии насладятся в богатстве лета многа: неправеднии же погибнут вскоре.
25 Иже щадит жезл (свой), ненавидит сына своего: любяй же наказует прилежно.
26 праведный ядый насыщает душу свою: души же нечестивых скудны.
1 Мудрыя жены создаша домы: безумная же раскопа рукама своима.
2 Ходяй право боится господа: развращаяй же пути своя обезчестится.
3 Из уст безумных жезл досаждения: устне же мудрых хранят я.
4 Идеже несть волов, ясли чисты: а идеже жита многа, явна волу крепость.
5 Свидетель верен не лжет: разжизает же ложная свидетель неправеден.
6 Взыщеши премудрости у злых, и не обрящеши: чувство же у мудрых удобно.
7 Вся противна (суть) мужеви безумну: оружие же чувствия устне премудры.
8 Премудрость коварных уразумеет пути их: буйство же безумных в заблуждении.
9 Домове беззаконных требуют очищения, домове же праведных приятни.
10 Сердце мужа чувственно печаль души его: егда же веселится, не примешается досаждению.
11 Домове нечестивых исчезнут, селения же право творящих пребудут.
12 есть путь, иже мнится человеком правъ быти, последняя же его приходят во дно ада.
13 Ко веселием не примешавается печаль: последняя же радости в плачь приходят.
14 Путий своих насытится дерзосердый, от размышлений же своих муж благ.
15 Незлобивый веру емлет всякому словеси, коварный же приходит в раскаяние.
16 Премудр убоявся уклонится от зла, безумный же на себе надеявся смешавается со беззаконным.
17 острояростный без совета творит, мужъ же мудрый многая терпит.
18 Разделяют безумнии злобу, коварнии же удержатъ чувство.
19 Поползнутся злии пред благими, и нечестивии послужат пред дверьми праведных.
20 Друзие возненавидят другов убогих: друзие же богатых мнози.
21 Безчестяй убогия согрешает, милуяй же нищия блажен.
22 Заблуждающии (неправедницы) делают злая, милость же и истину делают благии. Не ведятъ милости и веры делателие злых: милостыни же и веры у делателей благих.
23 Во всяцем пекущемся есть изобилие: любосластный же и безпечальный в скудости будет.
24 Венец премудрых богатство их, житие же безумных зло.
25 Избавит от злых душу свидетель верен, разжизает же лживая лестный.
26 Во страсе господни упование крепости, чадомъ же своим оставит утверждение (мира).
27 Страх господень источник жизни, творит же укланятися от сети смертныя.
28 Во мнозе языце слава царю: во оскудении же людсте сокрушение сильному.
29 Долготерпелив муж мног в разуме, малодушный же крепко безумен.
30 Кроткий муж сердцу врачь: моль же костемъ сердце чувственно.
31 оклеветаяй убогаго раздражает сотворшаго и, почитаяй же его милует нищаго.
32 Во злобе своей отринется нечестивый: надеяйжеся на господа своим преподобием праведен.
33 В сердцы блазе мужа почиет премудрость, в сердцы же безумных не познавается.
34 Правда возвышает язык: умаляют же племена греси.
35 Приятен цареви слуга разумный, своим же благообращением отемлет безчестие.
1 Гнев губит и разумныя: ответ же смиренъ отвращает ярость, а слово жестоко возвизаетъ гневы.
2 Язык мудрых добрая свесть: уста же безумных возвещают злая.
3 На всяцем месте очи господни сматряютъ злыя же и благия.
4 Исцеление языка древо жизни: храняй же его исполнится духа.
5 Безумный ругается наказанию отчу: храняй же заповеди хитрейший. Во мнозе правде крепость многа: нечестивии же от земли искоренятся.
6 В домех праведных крепость многа: плоды же нечестивых погибают.
7 устне мудрых связуются чувством, сердца же безумных не тверда.
8 Жертвы нечестивых мерзость господеви, обеты же правоходящих приятни ему.
9 Мерзость господеви путие нечестивых: гонящия же правду любит.
10 Наказание незлобиваго познавается от мимоходящих: ненавидящии же обличения скончаваются срамно.
11 Ад и пагуба явна пред господем, како не и сердца человековъ?
12 Не возлюбит ненаказанный обличающих его, с мудрыми же не побеседует.
13 Сердцу веселящуся, лице цветет: в печалехъ же сущу, сетует.
14 Сердце правое ищет чувства: уста же ненаказанных уразумеют злая.
15 На всяко время очи злых приемлют злая: добрии же безмолвствуют присно.
16 Лучше частица малая со страхом господним, нежели сокровища велия без боязни.
17 Лучше учреждение от зелий с любовию и благодатию, нежели представление телцев со враждою.
18 Муж ярый устрояет брани, долготерпеливый же и будущую укрощает. Терпеливый муж угаситъ суды, нечестивый же воздвизает паче.
19 Путие праздных постлани тернием, мужественныхъ же углаждени.
20 Сын премудр веселит отца, сын же безуменъ раздражает матерь свою.
21 Несмысленнаго стези скудны ума: мужъ же разумен исправляя ходит.
22 отлагают помышления не чтущии сонмищ: в сердцах же советных пребывает совет.
23 Не послушает злый его, ниже речет полезно что и добро общему.
24 Путие живота помышления разумнаго, да уклонився от ада спасется.
25 Домы досадителей разоряет господь, утверди же предел вдовицы.
26 Мерзость господеви помысл неправедный, чистыхъ же глаголы честны.
27 Губит себе мздоимец, ненавидяй же даровъ приятия спасется: милостынями и верами очищаются греси, страхом же господним уклоняется всякъ от зла.
28 Сердца праведных поучаются вере, уста же нечестивых отвещают злая: приятни предъ господем путие мужей праведных, имиже и врази друзие бывают.
29 Далече отстоит бог от нечестивых, молитвы же праведных послушает: лучше малое приятие со правдою, нежели многа жита с неправдою: сердце мужа да мыслит праведная, да от бога исправятся стопы его.
30 Видящее око добрая веселит сердце, слава же благая утучняет кости.
31 Слушаяй обличений живота посреде премудрыхъ водворится.
32 Иже отметает наказание, ненавидит себе: соблюдаяй же обличения любит свою душу.
33 Страх господень наказание и премудрость, и начало славы отвещает ей (,*предыдетъ же смиренным слава).
1 Человеку предложение сердца: и от господа ответъ языка.
2 Вся дела смиреннаго явленна пред богом, и укрепляяй духи господь.
3 Приближи ко господу дела твоя, и утвердятся помышления твоя.
4 Вся содела господь себе ради: нечестивии же в день зол погибнут.
5 Нечист пред богом всяк высокосердый: въ руку же руце влагаяй неправедно не обезвинится.
6 Начало пути блага, еже творити праведная, приятна же пред богом паче, нежели жрети жертвы.
7 Ищай господа обрящет разум со правдою:
8 праве же ищущии его обрящут мир.
9 Вся дела господня со правдою: хранится же нечестивый на день зол.
10 пророчество во устнех царевых, в судищи же не погрешат уста его.
11 Превеса мерила правда у господа: дела же его мерила праведная.
12 Мерзость цареви творяй злая: со правдою бо уготовляется престол началства.
13 Приятны царю устне праведны, словеса же правая любит господь.
14 ярость царева вестник смерти: муж же премудр утолит его.
15 Во свете жизни сын царев: приятнии же ему яко облак позден.
16 угнеждения премудрости избраннее злата: вселения же разума дражайши сребра.
17 Путие жизни укланяются от злых: долгота же жития путие праведни. Приемляй наказание во благихъ будет, храняй же обличения умудрится. Иже хранит своя пути, соблюдает свою душу: любяй же живот свой щадит своя уста.
18 Прежде сокрушения предваряет досаждение, прежде же падения злопомышление.
19 Лучше кроткодушен со смирением, нежели иже разделяет корысти с досадительми.
20 Разумный в вещех обретатель благих, надеяйся же на господа блажен.
21 Премудрыя и разумныя злыми наричут, сладции же в словеси множае услышани будут.
22 Источник животен разум стяжавшим, наказание же безумных зло.
23 Сердце премудраго уразумеет яже от своих ему уст, во устнах же носитъ разум.
24 Сотове медовнии словеса добрая, сладость же их исцеление души.
25 Суть путие мнящиися прави быти мужу, обаче последняя их зрят во дно адово.
26 Муж в трудех труждается себе и изнуждаетъ погибель свою: строптивый во своих устахъ носит погибель.
27 Муж безумен копает себе злая и во устнахъ своих сокровищствует огнь.
28 Муж строптивый разсылает злая, и светилникъ льсти вжигает злым, и разлучает други.
29 Муж законопреступен прельщает други и отводитъ их в пути не благи.
30 утверждаяй очи свои мыслит развращенная, грызый же устне свои определяет вся злая: сей пещь есть злобы.
31 Венец хвалы старость, на путех же правды обретается.
32 Лучше муж долготерпелив паче крепкаго, (*и муж разум имеяй паче земледелца великаго:) удержаваяй же гнев паче вземлющаго град.
33 В недра входят вся неправедным: от господа же вся праведная.
1 Лучше укрух хлеба со сластию в мире, нежели дом исполнен многих благих и неправедныхъ жертв со бранию.
2 Раб смыслен обладает владыки безумными, в братиих же разделит (имение) на части.
3 якоже искушается в пещи сребро и злато, тако избранная сердца у господа.
4 злый послушает языка законопреступных, праведный же не внимает устнам лживым.
5 Ругайся убогому раздражает сотворшаго его, радуяйся же о погибающем не обезвинится: милуяй же помилован будет.
6 Венец старых чада чад: похвала же чадомъ отцы их. Верному весь мир богатство, неверному же ниже пенязь.
7 Неприличны суть безумному устне верны, ниже праведному устне лживы.
8 Мзда благодатей наказание употребляющим: и аможе аще обратится, успеет.
9 Иже таит обиды, ищет любве: а иже ненавидитъ скрывати, разлучает други и домашния.
10 Сокрушает прещение сердце мудраго: безумный же биемь не чувствует (ранъ).
11 Прекословия воздвижет всяк злый: господь же ангела немилостива послет нань.
12 Впадет попечение мужу смысленну: безумнии же размышляют злая.
13 Иже воздает злая за благая, не подвигнутся злая из дому его.
14 Власть дает словесем начало правды: предводителствуетъ же скудости пря и брань.
15 Иже судит праведнаго неправедным, неправеднаго же праведным, нечист и мерзок у господа.
16 Вскую бяше имение безумному? стяжати бо премудрости безсердый не может. Иже высок творитъ свой дом, ищет сокрушения: остроптеваяй же учитися впадет во злая.
17 На всяко время друг да будет тебе, братия же в нуждах полезни да будут: сего бо ради раждаются.
18 Муж безумен плещет и радуется себе, якоже поручаяйся испоручит друга своего, на своихъ же устнах огнь сокровищствует.
19 Грехолюбец радуется сваром, а жестокосердый не усрящет благих.
20 Муж удобопреложный языком впадет во злая: сердце же безумнаго болезнь стяжавшему е.
21 Не веселится отец о сыне ненаказаннем: сын же мудр веселит матерь свою.
22 Сердце веселящеся благоиметися творит: мужу же печальну засышут кости.
23 Приемлющему дары неправедно в недра не предуспеваютъ путие: нечестивый же укланяет пути правды.
24 Лице разумно мужа премудра, очи же безумнаго на концех земли.
25 Гнев отцу сын безумен, и болезнь рождшей его.
26 Тщеты творити мужу праведну не добро, ниже преподобно наветовати властем праведным.
27 Иже щадит глагол произнести жесток, разумен: долготерпеливый же муж премудр, лучше ищущаго науки.
28 Несмысленному вопросившу о мудрости, мудрость вменится: нема же кто себе творит, возмнится разумен быти.
1 Вины ищет муж хотя отлучитися от другов, на всяко же время поносимь будет.
2 Не требует премудрости муж скудоумен, зане паче водится безумием.
3 егда приидет нечестивый во глубину зол, нерадит: находит же ему безчестие и поношение.
4 Вода глубока слово в сердцы мужа, река же изскачущи и источник жизни.
5 Чудитися лицу нечестиваго не добро, ниже преподобно укланяти праведное на суде.
6 устне безумнаго приводят его на зло, уста же его дерзостная призывают смерть.
7 уста безумнаго сокрушение ему, устне же его сеть души его.
8 Ленивыя низлагает страх: души же мужей женамъ подобных взалчут.
9 Не исцеляяй себе во своих делех братъ есть погубляющему себе самаго.
10 Из величества крепости имя господне, к немуже притекающе праведницы возносятся.
11 Имение богату мужу град тверд, слава же его вельми присеняет.
12 Прежде сокрушения возносится сердце мужу и прежде славы смиряется.
13 Иже отвещает слово прежде слышания, безумие ему есть и поношение.
14 Гнев мужа укрощает раб разумный: малодушна же человека кто стерпитъ?
15 Сердце разумнаго стяжет чувствие, ушеса же мудрых ищут смысла.
16 Даяние человека распространяет его и с сильными посаждает его.
17 праведный себе самаго оглаголник во первословии: егда же приложит супостат, обличается.
18 Прекословия утоляет молчаливый и во властехъ определяет.
19 Брат от брата помогаемь, яко град твердъ и высок, укрепляется же якоже основаное царство.
20 от плодов уст муж насыщает чрево свое, и от плодов устен своих насытится.
21 Смерть и живот в руце языка: удержавающии же его снедят плоды его.
22 Иже обрете жену добру, обрете благодать, приял же есть от господа тишину.
23 Иже изгоняет жену добрую, изгоняет благая: держай же прелюбодейцу безумен и нечестив.
24 С молении глаголет убогий, богатый же отвещает жестоко.
25 Муж любовен к дружбе, и есть другъ прилепивыйся паче брата.
1 Лучше есть убог ходяй в простоте своей, неже богатый строптив устны своими и несмыслен.
2 Идеже несть учения души, несть добро, и иже скор есть ногама, поткнется.
3 Неразумие мужа погубляет пути его, и бога виновна творит в сердцы своем.
4 Богатство прилагает други многи: нищий же и от сущаго друга оставляемь бывает.
5 Свидетель лжив без муки не будет: оклеветаяй же неправедно не убежит ея.
6 Мнози угождают лицам царским: всякъ же зол бывает в поношение мужеви.
7 Всяк, иже убогаго брата ненавидит, и от содружества далече будет. Мысль благая ведящимъ ю приближается, муж же мудр обрящет ю. Много творяй зла совершает злобу, а иже раздражаетъ словесы, не спасется.
8 Стяжавый мудрость любит себе, а иже сохраняетъ разум, обрящет благая.
9 Свидетель лживый не без муки будет, а иже разжизает злобу, погибнет от нея.
10 Не пользует безумному сладость, и аще рабъ начнет с досаждением обладати.
11 Милостив муж долготерпит, похвала же его превосходит законопреступных.
12 Царево прещение подобно рыканию львову, и якоже роса злаку, тако тихость его.
13 Студ есть отцу сын безумен, и нечисты обеты от мзды блудницы.
14 Дом и имение разделяют отцы чадом: от господа же сочетавается жена мужеви.
15 Страх содержит мужа женонравна: душа же празднаго взалчет.
16 Иже хранит заповеди, соблюдает свою душу, а нерадяй о своих путех погибнет.
17 Милуяй нища взаим дает богови, по даянию же его воздастся ему.
18 Наказуй сына твоего, тако бо будет благонадежен: в досаждение же не вземлися душею твоею.
19 злоумен муж много отщетится: аще же губитель есть, и душу свою приложит.
20 Слушай, сыне, отца твоего наказания, да мудр будеши в последняя твоя.
21 Многи мысли в сердцы мужа: совет же господень во век пребывает.
22 Плод мужеви милостыня: лучше же нищь праведный, нежели богат лжив.
23 Страх господень в живот мужеви: а безстрашный водворится на местех, идеже не наблюдается разум.
24 Скрываяй в недрех руце свои неправедно ниже ко устом своим принесет я.
25 Губителю раны приемлющу, безумный коварнее будет: аще же обличаеши мужа разумна, уразумеетъ чувство.
26 Безчествуяй отца и отреваяй матерь свою срамоту приимет и поношение.
27 Сын оставляяй хранити наказание отчее поучится словесем злым.
28 Выручаяй отрока несмыслена досаждает оправданию: уста же нечестивых пожрут суд.
29 уготовляются невоздержным раны, и мучения подобне неразумным.
1 Невинно вино, укоризненно же пиянство, и всякъ пребываяй в нем не будет премудр.
2 Не разнствует прещение царево от ярости львовы: раздражаяй же его и примешаяйся ему согрешает в свою душу.
3 Слава мужу отвращатися от досаждения: всякъ же безумен сими соплетается.
4 Поносимь ленивый не усрамляется, такожде и заемляй пшеницу в жатву.
5 Вода глубока совет в сердцы мужа: мужъ же премудр исчерплет ю.
6 Велика вещь человек, и драгая муж творяй милость: мужа же верна (велико) дело обрести.
7 Иже без порока живет в правде, блажены оставит дети своя.
8 егда царь праведен на престоле сядет, не противится пред очима его ничтоже лукаво.
9 Кто похвалится чисто имети сердце? или кто дерзнет рещи чиста себе быти от греховъ?
10 Вес велик и мал, и мера сугуба, нечиста пред господем обоя:
11 и творяй я в начинаниих своих запнется: юнота с преподобным, и правый путь его.
12 ухо слышит, и око видит: господня дела обоя.
13 Не люби клеветати, да не вознесешися: отверзи очи твои и насыщайся хлеба.
14 зло, зло, речет стяжаваяй, и отшед тогда похвалится.
15 есть злато и множество камений драгих, сосуд честен устне разумны.
16 Возми ризу его, яко испоручник бысть чуждыя, и за чуждую возми залог от него.
17 Сладок есть человеку хлеб лжи, но потомъ исполнятся уста его камения.
18 Помышление в совете уготовится, в правлении же творит брань.
19 открываяй тайну ходит лестию: и прельщающему устнами своими не примешайся.
20 злословящему отца или матерь угаснетъ светилник, зеницы же очес его узрятъ тму.
21 Часть поспешна в начале, в последнихъ не благословится.
22 Не рцы: отмщу врагу: но потерпи господа, да ти поможет.
23 Мерзость господеви сугубый вес, и мерило лживо не добро пред ним.
24 от господа исправляются стопы мужу: смертный же како уразумеет пути своя?
25 Сеть мужеви скоро нечто от своих освящати: по обете бо раскаяние бывает.
26 Веятель нечестивых есть царь мудр и наложит на ня коло.
27 Свет господень дыхание человеком, иже испытаетъ тайная утробы.
28 Милостыня и истина сохранение царю, и обыдутъ престол его в правде.
29 Лепота (есть) юным премудрость: слава же старым седины.
30 Раны и сокрушения сретают злых, язвы же в сокровищих чрева.
1 якоже устремление воды, тако сердце царево в руце божией: аможе аще восхощет обратити, тамо уклонит е.
2 Всяк муж является себе праведен: управляетъ же сердца господь.
3 Творити праведная и истинствовати угодна богу паче, нежели жертв кровь.
4 Велемудрый во укоризне дерзосерд, светило же нечестивых греси.
5 Помышления тщаливаго во изобилии, и всякъ нерадивый в лишении.
6 Делаяй сокровища языком лживым суетная гонит в сети смертныя.
7 Всегубителство на нечестивыя устремляется: не хотят бо творити праведная.
8 К стропотным стропотныя пути посылает бог: чиста бо и права дела его.
9 Лучше жити во угле непокровеннем, нежели в повапленных с неправдою и в храмине общей.
10 Душа нечестиваго не помилуется ни от единаго от человеков.
11 Тщету приемлющу невоздержному, коварнейший будет незлобивый, разумеваяй же мудрый прииметъ разум.
12 Разумевает праведный сердца нечестивых и уничтожает нечестивыя в злых.
13 Иже затыкает ушеса своя, еже не послушати немощнаго, и той призовет, и не будет послушаяй его.
14 Даяние тайно отвращает гневы, щадяй же даров воздвизает ярость крепкую.
15 Веселие праведных творити суд: преподобный же нечист у злодеев.
16 Муж заблуждаяй от пути правды в сонмищи исполинов почиет.
17 Муж скуден любит веселие, любяй же вино и елей не обогатится.
18 отребие же праведнику беззаконник.
19 Лучше жити в земли пусте, неже жити съ женою сварливою и язычною и гневливою.
20 Сокровище вожделенно почиет во устехъ мудраго: безумнии же мужие пожирают е.
21 Путь правды и милостыни обрящет животъ и славу.
22 Во грады крепки вниде премудрый и разруши утверждение, на неже надеяшася нечестивии.
23 Иже хранит своя уста и язык, соблюдаетъ от печали душу свою.
24 Продерзый и величавый и горделивый губитель нарицается: а иже памятозлобствует, беззаконен.
25 Похоти лениваго убивают: не произволяютъ бо руце его творити что.
26 Нечестивый желает весь день похоти злыя, праведный же милует и щедрит нещадно.
27 Жертвы нечестивых мерзость господеви: ибо беззаконно приносят я.
28 Свидетель ложный погибнет, муж же послушливъ сохраняемь возглаголет.
29 Нечестив муж безстудно стоит лицем: правый же сам разумевает пути своя.
30 Несть премудрости, несть мужества, несть совета у нечестиваго.
31 Конь уготовляется на день брани: от господа же помощь.
1 Лучше имя доброе, неже богатство много, паче же сребра и злата благодать благая.
2 Богат и нищь сретоста друг друга, обоихъ же господь сотвори.
3 Худог, видев лукаваго мучима крепко, самъ наказуется: безумнии же мимошедше отщетишася.
4 Род премудрости страх господень, и богатство и слава и живот.
5 Волчцы и сети на путех стропотных, храняй же свою душу избежит их.
6 Богатии убогими имут обладати,
7 и раби своим господем взаим дадут.
8 Сеявый злая пожнет злая, язву же делъ своих совершит.
9 Мужа тиха и даятеля любит господь, суету же дел его скончает.
10 Милуяй нищаго сам препитается: от своихъ бо хлебов даде убогому. Победу и честь устрояет даяй дары, обаче душу погубляетъ стяжавших.
11 Изжени от сонмища губителя, и изыдет съ ним прение: егда бо сядет в сонмищи, всехъ безчестит.
12 Любит господь преподобная сердца, приятни же ему вси непорочнии в путех своих: устнама пасетъ царь (люди своя).
13 очи господни соблюдают чувство: презираетъ словеса законопреступный.
14 Вины ищет и глаголет ленивый: лев на стезях, на путех же разбойницы.
15 яма глубока уста законопреступных: возненавиденый же от господа впадется в ню. Суть путие злии предъ мужем, и не любит возвратитися от них: возвратитися же подобает от пути стропотна и злаго.
16 Безумие висит на сердцы юнаго: жезл же и наказание далече (отгонитъ) от него.
17 обидяй убогаго многая себе зла творит, дает же богатому во оскудение (себе).
18 Ко словесем мудрых прилагай твое ухо, и услыши моя словеса: свое же сердце утверди (к нимъ), да разумееши, яко добра суть.
19 И аще вложиши я в сердце твое, возвеселятъ тебе купно во твоих устнех.
20 Да будет ти на господа надежда, и покажетъ ти путь свой.
21 Ты же напиши я себе трижды, на советъ и смысл и разум, на широте сердца твоего: учу бо тя истинному словеси, и разума благаго слушати на ответы словесем истинным предлагаемымъ тебе.
22 Не насилствуй нищаго, зане убог есть, и не досаждай немощному во вратех:
23 господь бо имать судити его суд, и избавиши твою безбедную душу.
24 Не бывай друг мужу гневливу и со другомъ жестокосердым не соводворяйся:
25 да не когда научишися путем его и приимеши тенета души твоей.
26 Не вдавайся в поручение, стыдяся лица:
27 егда бо не будеши имети чим искупитися, возмут постелю, яже под ребры твоими.
28 Не прелагай предел вечных, яже положиша отцы твои.
29 Прозрителну человеку и острому в делехъ своих пред царьми подобает стояти, и не стояти пред мужми простыми.
1 Аще сядеши вечеряти на трапезе сильнаго, разумно разумевай предлагаемая тебе,
2 и налагай руку твою, ведый, яко сицевая тебе подобает уготовити:
3 аще же несытнейший еси, не желай брашенъ его: сия бо имут живот ложен.
4 Не распростирайся убог сый с богатым, твоею же мыслию удаляйся.
5 Аще устремиши на него око твое, никогдаже явится: соделаны бо суть ему крила яко орлу, и обращается в дом настоятеля своего.
6 Не вечеряй с мужем завистливым, ниже похощеши пищей его:
7 имже бо образом аще кто поглотит власы, сице яст и пиет: ниже к себе да введеши его и снеси хлеб твой с ним:
8 изблюет бо его и осквернит словеса твоя добрая.
9 Во ушию безумнаго ничтоже глаголи, да не когда поругает разумная словеса твоя.
10 Не прелагай предел вечных и в стяжание сирот не вниди:
11 избавляяй бо их господь крепок есть и разсудит суд их с тобою.
12 Даждь в наказание сердце твое, ушеса же твоя уготовай словесем чувственным.
13 Не преставай младенца наказовати: аще бо жезломъ биеши его, не умрет (от него):
14 ты бо побиеши его жезлом, душу же его избавиши от смерти.
15 Сыне, аще премудро будет сердце твое, возвеселиши и мое сердце,
16 и пребудут в словесех твои устне к моим устнам, аще права будут.
17 Да не ревнует сердце твое грешником, но в страсе господни буди весь день:
18 аще бо соблюдеши я, будут ти внуцы, и упование твое не отступит.
19 Слушай, сыне, и премудр бывай и исправляй мысли твоего сердца:
20 не буди винопийца, ниже прилагайся к сложениемъ и купованием мяс:
21 всяк бо пияница и блудник обнищает, и облечется в раздранная и в рубища всяк сонливый.
22 Слушай, сыне, отца родившаго тя, и не презирай, егда состареется мати твоя.
23 Истину стяжи и не отрини мудрости и учения и разума.
24 Добре воспитовает отец праведен, о сыне же премудрем веселится душа его.
25 Да веселится отец и мати о тебе, и да радуется рождшая тя.
26 Даждь ми, сыне, твое сердце, очи же твои моя пути да соблюдают.
27 Сосуд бо сокрушен чуждий дом, и студенецъ тесен чуждий:
28 сей бо вскоре погибнет, и всякий законопреступникъ потребится.
29 Кому горе? кому молва? кому судове? кому горести и свары? кому сокрушения вотще? кому сини очи?
30 Не пребывающим ли в вине? и не назирающимъ ли, где пирове бываютъ?
31 Не упивайтеся вином, но беседуйте ко человекомъ праведным, и беседуйте во проходех: аще бо на чаши и сткляницы вдаси очи твои, последи имаши ходити нажайший белилнаго древа:
32 последи же яко от змиа уязвен прострется, и якоже от кераста разливается ему яд.
33 очи твои егда узрят (жену) чуждую, уста твоя тогда возглаголют стропотная:
34 и возляжеши яко в сердцы моря и якоже кормчий во мнозе волнении.
35 Речеши же: биша мя, и не поболех, и поругашася ми, аз же не разумех: когда утро будет, да шед взыщу, с нимиже снидуся?
1 Сыне, не ревнуй мужем злым, ниже возжелей быти с ними:
2 лжам бо поучается сердце их, и болезни устне их глаголют.
3 С премудростию зиждется дом и с разумомъ исправляется.
4 С чувствием исполняются сокровища от всякаго богатства честнаго и добраго.
5 Лучше мудрый крепкаго, и муж разум имеяй земледелца велика.
6 Со управлением бывает брань, помощь же с сердцем советным.
7 Премудрость и мысль блага во вратех премудрых: смысленнии не укланяются от закона господня,
8 но советуют в сонмищих. Ненаказанных сретаетъ смерть,
9 умирает же безумный во гресех. Нечистота мужу губителю:
10 осквернится в день зол и в день печали, дондеже оскудеет.
11 Избави ведомыя на смерть и искупи убиваемых, не щади.
12 Аще же речеши: не вем сего: разумей, яко господь всех сердца весть, и создавый дыхание всем, сей весть всяческая, иже воздастъ комуждо по делом его.
13 яждь мед, сыне, благ бо есть сот, да насладится гортань твой:
14 сице уразумееши премудрость душею твоею: аще бо обрящеши, будет добра кончина твоя, и упование не оставит тебе.
15 Не приводи нечестиваго на пажить праведных, ниже прельщайся насыщением чрева:
16 седмерицею бо падет праведный и востанет, нечестивии же изнемогут в злых.
17 Аще падет враг твой, не обрадуйся ему, в преткновении же его не возносися:
18 яко узрит господь, и не угодно ему будет, и отвратит ярость свою от него.
19 Не радуйся о злодеющих и не ревнуй грешным,
20 не пребудут бо внуцы лукавых, светило же нечестивых угаснет.
21 Бойся бога, сыне, и царя, и ни единому же их противися:
22 внезапу бо истяжут нечестивых, мучения же обоих кто увесть? Слово сохраняяй сын кроме погибели будет: приемляй же приятъ оное. Ничтоже ложно от языка цареви да глаголется, и ни едина лжа от языка его да изыдет: мечь (есть) язык царев, а не плотян: и иже аще предан будет, сокрушится: аще бо раздражится ярость его, со жилами человеки губит, и кости человеческия поядает и сожигаетъ яко пламень, яко не ядомым быти птенцами орлими. Моих словес, сыне, бойся, и приимъ я покайся.
23 Сия же вам смысленным глаголю разумети: срамлятися лица на суде не добро.
24 Глаголяй нечестиваго, яко праведен есть, проклят от людий будет и возненавиден во языцех:
25 обличающии же лучшии явятся, на няже приидетъ благословение благо:
26 и устне облобызают отвещающия словеса блага.
27 уготовляй на исход дела твоя, и уготовися на село, и ходи вслед мене, и созиждеши дом твой.
28 Не буди свидетель лжив на твоего гражданина, ниже пространяйся твоима устнама.
29 Не рцы: имже образом сотвори ми, сотворю ему и отмщу ему, имиже мя преобиде.
30 якоже нива муж безумный, и яко виноградъ человек скудоумный:
31 аще оставиши его, опустеет и травою порастет весь, и будет оставлен, ограды же каменныя его раскопаются.
32 Последи аз покаяхся, воззрех избрати наказание:
33 мало дремлю, мало же сплю и мало объемлю рукама перси:
34 аще же сие твориши, приидет предыдущи нищета твоя и скудость твоя, яко благ течец.
1 Сия притчи соломони бывшия нерасположенны, яже списаша друзие езекии царя иудейска.
2 Слава божия крыет слово, слава же царева почитаетъ повеления его.
3 Небо высоко, земля же глубока: сердце же царево необличително.
4 Куй неискушенное сребро, и очистится чисто все.
5 убивай нечестивыя от лица царева, и исправится в правде престол его.
6 Не гордися пред лицем царевым и на месте сильных не стани:
7 лучше бо ти есть, егда речет: взыди ко мне: нежели смиритися тебе пред лицемъ сильнаго.
8 яже видеста очи твои, глаголи. Не впадай в тяжбу скоро, да не раскаешися послежди, егда тебе досадит друг твой.
9 Вступай вспять, не неради, да не поносит убо тебе друг:
10 свара же твоя и вражда твоя не отступит, но будет ти равна со смертию. Благодать и любы свобождает, в нихже утверди себе, да не въ поношении будеши, но сохрани пути твоя добре устроены.
11 (якоже) яблоко злато во усерязи сардийскаго камене, сице рещи слово при приличных ему.
12 И (якоже) во усерязь златый сардийский камень многоценный вяжется, (сице) слово премудро во ухо благопослушно.
13 якоже исходище снега в жатву зноя пользует, тако вестник верен пославших его: души бо употребляющих его пользует.
14 якоже ветри и облацы и дождеве являющиися, тако и хвалящийся о даянии ложнем.
15 В долготерпении благополучие царем: языкъ же мякок сокрушает кости.
16 Мед обрет яждь умеренно, да не како пресыщен изблюеши.
17 Не учащай вносити ногу твою ко другу твоему, да не когда насыщься тебе, возненавидит тя.
18 Дреколь и мечь и стрела остра, тако и муж свидетелствуяй на друга своего свидетелство ложное.
19 Путь злаго и нога законопреступнаго погибнутъ в день зол.
20 якоже оцет неполезен вреду и дымъ очима, тако припадшая страсть в телеси сердце оскорбляет.
21 якоже молие в ризе и червие в древе, тако печаль мужу вредит сердце.
22 Аще алчет враг твой, ухлеби его: аще ли жаждет, напой его:
23 сие бо творя, углие огненное собираеши на главу его, господь же воздаст тебе благая.
24 Ветр северный воздвизает облаки, лице же безстудно язык раздражает.
25 Лучше жити во угле непокрытем, неже во храмине общей со женою клеветливою.
26 якоже вода студеная души жаждущей благоприятна, тако весть благая от земли издалеча.
27 якоже аще кто источник заграждает и исходище воды губит, тако не лепо праведнику пасти пред нечестивым.
28 ясти мед много не добро: почитати же подобаетъ словеса славна.
29 якоже град стенами разорен и не огражден, тако муж творяй что без совета.
1 якоже роса в жатву и якоже дождь в лете евр.: якоже снег в лете и дождь въ жатву., тако несть безумному чести.
2 якоже птицы отлетают и врабиеве, тако клятва суетная не найдет ни на когоже.
3 якоже бичь коню и остен ослу, тако жезл языку законопреступну.
4 Не отвещай безумному по безумию его, да не подобен ему будеши:
5 но отвещай безумному по безумию его, да не явится мудр у себе.
6 от путий своих поношение творит, иже посла вестником безумным слово.
7 отими шествие от глезн и законопреступление от уст безумных.
8 Иже привязует камень в пращи, подобен есть дающему безумному славу.
9 Терния прозябают в руце пияницы, и порабощение в руце безумных.
10 Многими волнуется всяка плоть безумных, сокрушается бо изступление их.
11 якоже пес, егда возвратится на своя блевотины, и мерзок бывает, тако безумный своею злобою возвращься на свой грех. есть стыдъ наводяй грех, и есть стыд слава и благодать.
12 Видех мужа непщевавша себе мудра быти, упование же имать безумный паче его.
13 Глаголет ленивый послан на путь: лев на путех, на стогнах же разбойницы.
14 якоже дверь обращается на пяте, тако ленивый на ложи своем.
15 Скрыв ленивый руку в недро свое не возможетъ принести ко устом.
16 Мудрейший себе ленивый является, паче во изобилии износящаго весть.
17 якоже держай за ошиб пса, тако председателствуяй чуждему суду.
18 якоже врачуемии мещут словеса на человеки, сретаяй же словом первый запнется:
19 тако вси коварствующии над своими други: егда же увидени будут, глаголют, яко играя содеях.
20 Во мнозех древех растет огнь: а идеже несть разгневляюща, умолкает свар.
21 огнище углию, и дрова огневи: мужъ же клеветлив в мятеж свара.
22 Словеса ласкателей мягка: сия же ударяютъ в сокровища утроб.
23 Сребро даемо с лестию, якоже скудель вменяемо: устне гладки сердце покрывают прискорбно.
24 устнама вся обещавает плачай враг, в сердцы же содевает лесть.
25 Аще тя молит враг велиим гласом, не веруй ему, седмь бо есть лукавствий въ души его.
26 Таяй вражду составляет лесть: открываетъ же своя грехи благоразумный на сонмищих.
27 Изрываяй яму искреннему впадется в ню: валяяй же камень на себе валит.
28 Язык лжив ненавидит истины, уста же непокровенна творят нестроение.
1 Не хвалися о утрии, не веси бо, что родитъ (день) находяй.
2 Да хвалит тя искренний, а не твоя уста, чуждий, а не твои устне.
3 Тяжко камень и неудобоносно песок, гневъ же безумнаго тяжший обоего.
4 Безмилостивна ярость и остр гнев, но ничтоже постоит ревности.
5 Лучше обличения откровенна тайныя любве.
6 Достовернее суть язвы друга, нежели вольная лобзания врага.
7 Душа в сытости сущи сотам ругается: души же нищетней и горькая сладка являются.
8 якоже егда птица отлетит от гнезда своего, тако человек порабощается, егда устранится от своих мест.
9 Миры и вином и фимиамы красуется сердце, растерзаваетжеся от бед душа.
10 Друга твоего или друга отча не оставляй: в дом же брата своего не вниди неблагополучно: лучше друг близ, неже брат далече живый.
11 Мудр буди, сыне, да веселится сердце твое, и отврати от себе понослива словеса.
12 Хитрый злым находящим укрывается: безумнии же нашедше тщету постраждут.
13 отими ризу его, прейде бо досадитель, иже чуждая погубляет.
14 Иже аще благословит друга утро велиимъ гласом, от кленущаго ни чимже разнствовати возмнится.
15 Капли изгоняют человека в день зименъ из дому его, тако и жена клеветливая изъ своего дому.
16 Север жесток ветр, именем же приятенъ нарицается.
17 Железо железа острит: муж же поощряетъ лице дружне.
18 Иже насаждает смоковницу, снесть плоды ея: а иже хранит господа своего, честенъ будет.
19 якоже суть неподобна лица лицам, сице ниже сердца человеков.
20 Ад и погибель не насыщаются: такожде и очи человечестии несыти. Мерзость господеви утверждаяй очи, и ненаказаннии невоздержни языком.
21 Искушение сребру и злату раздежение: мужъ же искушается усты хвалящих его. Сердце беззаконника взыскует злая, сердце же право взыскуетъ разума.
22 Аще биеши безумнаго посреде сонмища срамляя его, не отимеши безумия его.
23 Разумне разумевай души стада твоего, и да приставиши сердце твое ко твоим стадам.
24 яко не во век мужеви держава и крепость, ниже предает от рода в род.
25 Прилежи о злацех сущих на поли и пожнеши траву, и собирай сено нагорное,
26 да имаши овцы на одеяние: почитай поле, да будут ти агнцы.
27 Сыне, от мене имаши речения крепка в жизнь твою и в жизнь твоих служителей.
1 Бегает нечестивый ни единому же гонящу, праведный же яко лев уповая.
2 За грехи нечестивых судове востают: мужъ же хитрый угасит я.
3 Продерзый в нечестиих оклеветает нищия, якоже дождь сильный не полезен:
4 тако оставившии закон хвалят нечестие, любящии же закон ограждают себе стену.
5 Мужие злии не уразумеют суда, ищущии же господа уразумеют о всем.
6 Лучше нищь ходяй во истине, нежели богатъ ложь.
7 Хранит закон сын разумный: а иже пасетъ несытость, безчестит отца своего.
8 умножаяй богатство свое с лихвами и прибытки милующему нищия собирает е.
9 укланяяй ухо свое не послушати закона и сам молитву свою омерзил.
10 Иже льстит правыя на пути злем, во истление сам впадет: беззаконнии же минуют благая и не внидут в ня.
11 Премудр у себе муж богатый, убогий же разумив презрит его.
12 Помощию праведных многа бывает слава, на местехъ же нечестивых погибают человецы.
13 Покрываяй нечестие свое не успеет во благая, поведая же обличения возлюблен будет.
14 Блажен муж, иже боится всех за благоговение, а жестосердый впадает во злая.
15 Лев алчен и волк жажден, иже тиранствуетъ мучительски обладаетъ, нищь сый, над языкомъ убогим.
16 Царь скуден уроком велик клеветникъ (бываетъ), а ненавидяй неправды долго лет поживет.
17 Мужа, иже в вине смертне, выручаяй беглецъ будет, а не утвержден. Наказуй сына, и возлюбит тя и даст лепоту твоей души, не послушает языка законопреступна.
18 Ходяй праведно помощь приимет, ходяй же въ стропотны пути увязнет.
19 Делаяй свою землю насытится хлебов, гоняй же праздность насытится нищеты.
20 Муж веры достойный много благословится, злый же не без мучения будет.
21 Иже не срамляется лица праведных, не благ: таковый за укрух хлеба продаст мужа.
22 Тщится обогатитися муж завидлив, и не весть, яко милостивый возобладает им.
23 обличаяй человечи пути благодать имать паче языком ласкающаго.
24 Иже отвергает отца или матерь и мнится не согрешати, сей сопричастник есть мужу нечестиву.
25 Неверный муж судит туне, а иже надеется на господа, в прилежании будет.
26 Иже надеется на дерзо сердце, таковый безумен: а иже ходит в премудрости, спасется.
27 Иже дает убогим, не оскудеет: а иже отвращает око свое, в скудости будетъ мнозе.
28 На местех нечестивых стенят праведнии, въ погибели же их умножатся праведнии.
1 Лучше муж обличаяй, нежели муж жестоковыйный: внезапу бо палиму ему, несть исцеления.
2 Похваляемым праведным, возвеселятся людие: началствующим же нечестивым, стенят мужие.
3 Мужу любящу премудрость, веселится отецъ его: а иже пасет любодейцы, погубит богатство.
4 Царь праведен возвышает землю, муж же законопреступникъ раскоповает.
5 Иже уготовляет на лице своему другу мрежу, облагает ю на своя ноги.
6 Согрешающему мужу велия сеть: праведный же в радости и в веселии будет.
7 умеет праведный суд творити убогим, а нечестивый не разумеет разума, и убогому несть ума разумевающаго.
8 Мужие беззаконнии сожгоша град, мудрии же отвратиша гнев.
9 Муж мудр судит языки, муж же злый гневаяйся посмеваемь бывает, а не устрашает.
10 Мужие кровей причастни возненавидят преподобнаго, правии же взыщут душу его.
11 Весь гнев свой произносит безумный: премудрый же скрывает по части.
12 Царю послушающу словесе неправедна, вси, иже под ним, законопреступницы.
13 Заимодавцу и должнику, друг со другом сошедшимся, посещение творит обема господь.
14 Царю во истине судящему нищим, престолъ его во свидетелство устроится.
15 язвы и обличения дают мудрость: отрокъ же заблуждаяй срамляет родители своя.
16 Многим сущим нечестивым мнози греси бывают, праведнии же, оным падающим, устрашаеми бывают.
17 Наказуй сына твоего, и упокоит тя и даст лепоту души твоей.
18 Не будет сказатель языку законопреступну, храняй же закон блажен.
19 Не накажется словесы раб жесток: аще бо и уразумеет, но не послушает.
20 Аще увидиши мужа скора в словесех, разумей, яко упование имать паче его безумный.
21 Иже ласкосерд будет от детства, поработится, на последок же болезновати будет о сем.
22 Муж гневливый воздвизает свар, муж же ярый открывает грехи.
23 Досаждение мужа смиряет, а смиренныя утверждаетъ господь в славе.
24 Иже сообщается татю, ненавидит своея души: аще же клятву предложенную слышавшии не возвестят,
25 убоявшеся и постыдевшеся человеков, преткнутся: надеявыйся же на господа возвеселится. Нечестие мужу дает соблажнение: уповаяй же на владыку спасется.
26 Мнози угождают лицам началников: от господа же сбывается правда мужу.
27 Мерзость праведнику муж неправеден: мерзость же законопреступному путь правоведяй.
1 Сия глаголет муж верующим богови, и почиваю:
2 безумнее бо есмь от всех человек, и разума человеческаго несть во мне:
3 бог же научи мя премудрости, и разум святыхъ уразумех.
4 Кто взыде на небо и сниде? кто собра ветры в недра? кто возврати воду в ризу? кто обдержа вся концы земли? кое имя его? или кое имя сыну его, да разумееши?
5 Вся бо словеса божия раздежена: защищаетъ же сам благоговеющих ему.
6 Не приложи ко словесем его, да не обличитъ тя, и ложь будеши.
7 Двое прошу у тебе: не отими от мене благодати прежде умертвия моего:
8 суетно слово и ложно далече от мене сотвори, богатства же и нищеты не даждь ми: устрой же ми потребная и самодоволная,
9 да не насыщься ложь буду и реку: кто мя видитъ? или обнищав украду и кленуся именемъ божиим.
10 Не предаждь раба в руце господина, да не когда прокленет тя, и исчезнеши.
11 Чадо зло кленет отца и матерь не благословит.
12 Чадо зло праведна себе судит, исхода же своего не измы.
13 Чадо зло высоки очи имать, веждома же своима возносится.
14 Чадо зло мечь зубы (своя) имать, и членовныя яко сечиво, еже губити и поядати смиренныя от земли и убогия их от человек.
15 Пиявица име три дщери, любовию возлюблены, и три сия не насытишася ея, и четвертая не удовлися рещи: доволно (ми есть).
16 Ад и похоть жены, и земля ненапоеная водою и вода и огнь не рекут: довлеет.
17 око ругающееся отцу и досаждающее старости матерни, да исторгнут е вранове от дебрия и да снедят е птенцы орли.
18 Трие ми суть невозможная уразумети, и четвертаго не вем:
19 следа орла паряща (по воздуху) и пути змиа (ползуща) по камени, и стези корабля пловуща по морю и путий мужа в юности (его).
20 Таков путь жены блудницы: яже егда сотворит, и измывшися, ничтоже, рече, содеяхъ нелепо.
21 Треми трясется земля, четвертаго же не можетъ понести:
22 аще раб воцарится, и безумный исполнится пищею, и раба аще изженет свою госпожу,
23 и мерзкая жена аще ключится добру мужу.
24 Четыри же суть малейшая на земли, сия же суть мудрейша мудрых:
25 мравие, имже несть крепости и уготовляютъ в жатву пищу:
26 и хирогрилли, язык не крепок, иже сотвориша в камениих домы своя:
27 безцарни суть прузие, и воюют от единаго повеления благочинно:
28 ящерица (евр.: паук), руками опирающися и удобь уловляема сущи, живет во твердехъ царевых.
29 Трие суть, яже благопоспешно ходят, четвертое же, еже добре проходит:
30 скимен львов крепчае зверей, иже не отвращается, ни устрашается скота,
31 и петель ходя в кокошех благодушен, и козел предводитель стаду, и царь глаголяй къ народу во языце.
32 Аще вдаси себе в веселие и простреши руку твою со сваром, поруган будеши.
33 Мельзи млеко, и будет масло. Аще ли ноздри чешеши, изыдет кровь: аще же извлечеши словеса, изыдут судове и тяжбы.
1 Моя словеса рекошася от бога, царево пророчество, егоже наказа мати его:
2 что, чадо, (*соблюдеши,) что речение божие? первородне, тебе глаголю, сыне: что, чадо моего чрева? что, чадо моих молитвъ?
3 Не даждь женам твоего богатства и твоего ума и жития в последний совет.
4 С советом все твори, с советом пий вино: сильнии гневливи суть, вина да не пиют,
5 да напившеся не забудут мудрости и право судити немощным не возмогут.
6 Дадите сикера сущим в печалех и вино пити сущим в болезнех,
7 да забудут убожества и болезней не воспомянутъ ктому.
8 Сыне, отверзай уста твоя слову божию и суди вся здраво:
9 отверзай уста твоя и суди праведно, разсуждай же убога и немощна.
10 Жену доблю кто обрящет, дражайши есть камения многоценнаго таковая:
11 дерзает на ню сердце мужа ея: таковая добрых корыстей не лишится:
12 делает бо мужу своему благая во все житие:
13 обретши волну и лен, сотвори благопотребное рукама своима.
14 Бысть яко корабль куплю дея, издалеча собирает себе богатство:
15 и востает из нощи, и даде брашна дому и дела рабыням.
16 узревши село купи, от плодов же рукъ своих насади стяжание.
17 Препоясавши крепко чресла своя, утвердитъ мышцы своя на дело,
18 и вкуси, яко добро есть делати, и не угасает светилник ея всю нощь.
19 Лакти своя простирает на полезная, руце же свои утверждает на вретено,
20 и руце свои отверзает убогому, длань же простре нищу.
21 Не печется о сущих в дому муж ея, егда где замедлит: вси бо у нея одеяни суть.
22 Сугуба одеяния сотвори мужу своему, от виссона же и порфиры себе одеяния.
23 Славен бывает во вратех муж ея, внегда аще сядет в сонмищи со старейшины жительми земли.
24 Плащаницы сотвори и продаде финикианом, опоясания же хананеом.
25 уста своя отверзе внимателно и законно и чин заповеда языку своему.
26 Крепостию и лепотою облечеся, и возвеселися во дни последния.
27 Тесны стези дому ея, брашна же леностнаго не яде.
28 уста своя отверзе мудро и законно.
29 Милостыня же ея возстави чада ея, и обогатишася: и муж ея похвали ю:
30 многи дщери стяжаша богатство, многи сотвориша силу: ты же предуспела и превознеслася еси над всеми:
31 ложнаго угождения и суетныя доброты женския несть в тебе: жена бо разумная благословена есть: страх же господень сия да хвалит.
32 Дадите ей от плодов устен ея, и да хвалимь будет во вратех муж ея.
Конец книзе притчей соломоних: имать в себе глав 31.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>