Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга Судей Израилевых
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21
1 И бысть по скончании иисусове, и вопрошаху сынове израилевы господа, глаголюще: кто взыдетъ нам к хананею воевода, ратовати на нихъ?
2 И рече господь: иуда взыдет: се, дах землю в руку его.
3 И рече иуда к симеону брату своему: взыди со мною в жребий мой, и ополчимся на хананеа: и пойду и аз с тобою в жребий твой. И пойде с ним симеон.
4 И взыде иуда, и предаде господь хананеа и ферезеа в руце их: и избиша их в везеце до десяти тысящ мужей.
5 И обретоша адонивезека в везеце, и секошася с ним: и избиша хананеа и ферезеа.
6 И побеже адонивезек: и гнаша вследъ его, и яша его, и отсекоша краи рукъ его и краи ног его.
7 И рече адонивезек: седмидесяти царем обсекохъ краи рук их и краи ног их, и быша собирающе (от крупицъ) под трапезою моею: якоже убо сотворих, тако воздаде ми бог. И приведоша его во иерусалим, и умре тамо.
8 И воеваша сынове иудины на иерусалим, и взяша его, и поразиша его острием меча, и град сожгоша огнем.
9 И по сих снидоша сынове иудины воевати на хананеа живущаго в горней к югу и в равней.
10 И пойде иуда на хананеа живущаго в хевроне. И изыде хеврон со страны: имя же бе хеврону прежде кариафарвокъ-сефер: и убиша сесина и ахимана и фолмиа, роды енаковы.
11 И взыдоша оттуду к живущим в давире: имя же давиру бе прежде кариафсефер, [градъ писменъ].
12 И рече халев: иже аще поразит [градъ писменъ] и возмет его, дам ему асхань дщерь мою в жену.
13 И взя его гофониил сын кенеза брата халевова юнейший, и даде ему халев асхань дщерь свою в жену.
14 И бысть внегда отходити ей, и подвиже ю гофониил просити у отца своего села, и ропташе (седящи) на осляти, и вопияше со осляти: на землю южную отдал мя еси. И рече ей халев: что ти есть?
15 И рече ему асхань: даждь ми благословение: яко на землю южную отдал еси мя, да даси мне и исходища водная. И даде ей халевъ по сердцу ея исходища вышних и исходища нижних.
16 И сынове иофора кинеева, ужика моисеова, взыдоша от града финическа к сыном иудинымъ в пустыню сущую на юг иуды ко исходу аредову, и поидоша, и вселишася с людьми.
17 И пойде иуда с симеоном братом своим, и изби хананеа живущаго в сефефе, и потребиша его: и прозваша имя граду [потребление].
18 И взя иуда газу и предел ея, и аскалона и предел его, и аккарон и предел его, и азот и окрестная его.
19 И бяше господь со иудою. И взя гору, яко не возмогоша потребити живущих во юдоли, зане рихав противоста им, и колесницы железныя бяху тым.
20 И даша халеву хеврон, якоже глагола моисей: и наследствова тамо три грады сынов енаковых, и изгна оттуду три сыны енаковы.
21 И иевусеа живущаго во иерусалиме не изгнаша сынове вениаминовы, и живяше иевусей с сынми вениамини во иерусалиме даже до сего дне.
22 И взыдоша сынове иосифли и сии в вефиль: и господь бяше с ними.
23 И ополчишася, и соглядаша (сынове иосифовы) вефиль: имя же бе прежде граду луза.
24 И видеша стрегущии мужа исходящаго изъ града, и яша его и рекоша ему: покажи нам вход во град, и сотворим с тобою милость.
25 И показа им вход градный: и поразиша град острием меча, мужа же и сродство его отпустиша.
26 И отиде муж в землю хеттиим, и созда тамо град, и прозва имя ему луза: сие имя ему даже до дне сего.
27 И не разори манассий вефсана, иже есть скифский град, ниже дщерей его, ниже окрестныхъ (пределъ) его, ниже фанаха, ниже дщерей его, ниже живущих в доре, ниже дщерей его, ниже живущих во иевламе, ниже окрестных его, ниже дщерей его, и живущих в магеддоне, ниже окрестных его и дщерей его. И нача хананей жити на земли сей.
28 И бысть егда укрепися израиль, и сотвори хананеа данника: изгнанием же не изгна его.
29 И ефрем не изгна хананеа живущаго въ газере: и живяше хананей среде его в газере, и бысть ему в данника.
30 И завулон не изгна живущих в хевроне и живущих во аммане: и вселися хананей посреде их и бысть ему данник.
31 И асир не изгна живущих во акхоре, (и бысть ему данник,) ни живущих в доре, ни живущих в сидоне, ни живущих в далафе и во ахазиве, и во елве и во афеке и въ роове.
32 И вселися асир посреде хананеа живущаго на земли (той), зане не возможе изгнати его.
33 И неффалим не изгна живущих в вефсамисе, ниже живущих в вефанахе: и вселися неффалимъ среде хананеа живущаго на земли (сей): живущии же в вефсамисе и в вефанахе быша ему данницы.
34 И утесни аморрей сыны дановы в горе, яко не попусти им низходити во юдоль.
35 И нача аморрей жити в горе чрепней, идеже медведи и лисицы, в мирсиноне и в салавине: и отяготе рука дому иосифля на аморреа, и бысть ему данник.
36 И предел аморрейский идумей от восхода акравиня, от [камене] и выше.
1 И взыде ангел господень от галгал к [месту плача] и к вефилю и к дому израилеву, и рече к ним: сия глаголет господь: изведох вас изъ египта, и введох вас в землю, еюже кляхся отцем вашим дати вам: и рекох: не разорю завета моего, иже с вами, во веки:
2 и вы не завещайте завета с седящими на земли сей, ниже богом их да поклонитеся, но изваянная их сокрушите, и олтари их раскопайте: и не послушасте гласа моего, яко сия сотвористе:
3 и аз рех: не приложу преселити людий, ихже рех изгнати, ниже отиму их от лица вашего, и будут вам в терние, и бози ихъ будут вам в соблазн.
4 И бысть егда глагола ангел господень словеса сия ко всем сыном израилевым, и воздвигоша людие глас свой, и восплакашася.
5 И сего ради прозвася имя месту тому плачь: и пожроша тамо господеви.
6 И отпусти иисус люди, и отидоша сынове израилевы кийждо в домы своя и кийждо в наследие свое наследити землю.
7 И работаша людие господеви во вся дни иисусовы и во вся дни старейшин, елицы пожиша многи дни со иисусом, елицы разумеша все дело господне великое, еже сотвори израилю.
8 И скончася иисус сын навин раб господень, сын ста и десяти лет.
9 И погребоша его в пределех наследия его в фамнафаресе, в горе ефремли, от севера горы гаас:
10 и весь род он приложишася ко отцемъ своим. И воста род другий по сих, иже не познаша господа и дела, еже сотвори во израили.
11 И сотвориша сынове израилевы злое пред господемъ и послужиша ваалу,
12 и оставиша господа бога отец своих, изведшаго их из земли египетски, и поидоша вследъ богов иных, от богов языческих, иже окрестъ их, и поклонишася им: и разгневаша господа,
13 и оставиша его, и послужиша ваалу и астартом.
14 И разгневася яростию господь на израиля и предаде его в руки пленяющих, и плениша их: и отдаде их в руки врагов их, иже окрестъ их, и не возмогоша ктому противостати предъ лицем врагов своих, во всех в нихже прохождаху.
15 И рука господня бяше на них во злая, якоже глагола господь и якоже клятся господь им, и озлоби их зело.
16 И возстави (имъ) господь судии, и избави их господь от руки пленяющих я.
17 Но и судий не послушаша, яко соблудиша вследъ богов иных и поклонишася им, и разгневаша господа: и уклонишася с пути скоро, по немуже ходиша отцы их послушати заповедий господних: не сотвориша тако.
18 И яко возстави им господь судий, и бяше господь с судиею, и спасе я от руки враговъ их во вся дни судии: яко умилися господь от воздыхания их, от лица воюющих на ня и озлобляющих я.
19 И бысть егда умираше судия, и отвращахуся, и паки растлевахуся паче отец своих, идуще вслед богов иных служити им и покланятися им: не отвергоша начинаний своихъ и не отступиша от путий своих жестоких.
20 И разгневася яростию господь на израиля и рече: понеже остави род сей завет мой, егоже заповедах отцем их, и не послушаша гласа моего,
21 и аз не приложу изгнати мужа от лица их от сих языков, ихже остави иисусъ сын навин на земли и умре,
22 еже искушати в них израиля, аще сохранятъ путь господень ходити в нем, якоже сохраниша отцы их, или ни.
23 И остави господь языки сия не истребити их вскоре, и не предаде их в руку иисусову.
1 И сия языки, яже остави господь, да искуситъ ими израиля, вся неведущия браней ханаанских,
2 токмо ради родов сынов израилевых, еже научити я брани, обаче иже прежде ихъ не уведаша их:
3 пять воеводств иноплеменнических, и всего хананеа и сидония, и евеа живущаго в ливане от горы ваалъ-ермон до лавоемафа.
4 И бысть да искусит ими израиля, да увесть, аще послушают заповедий господних, яже заповеда отцем их рукою моисеовою.
5 И сынове израилевы обиташа посреде хананеа и хеттеа, и аморреа и ферезеа, и евеа и гергесеа и иевусеа,
6 и пояша дщери их себе в жены, и дщери своя даша сыном их, и послужиша богом их.
7 И сотвориша сынове израилевы злое пред господемъ и забыша господа бога своего, и послужиша ваалу и дубравам.
8 И разгневася яростию господь на израиля и предаде их в руки хусарсафема царя месопотамии сирския: и работаша сынове израилевы хусарсафему летъ осмь.
9 И возопиша сынове израилевы ко господу. И возстави господь спасителя израилю, и спасе их, гофониила, сына кенеза брата халевова юнейшаго его.
10 И бысть на нем дух господень, и суди израиля. И изыде на рать к хусарсафему: и предаде господь в руце его хусарсафема царя сирска, и укрепися рука его над хусарсафемом.
11 И бысть в покои земля четыредесять лет. И умре гофониил сын кенезов.
12 И приложиша сынове израилевы сотворити злое пред господем: и укрепи господь еглома царя моавля на израиля, занеже сотвориша злое предъ господем.
13 И собра к себе вся сыны аммони и амаликовы: и иде, и порази израиля, и взя град финическ.
14 И работаша сынове израилевы еглому царю моавлю лет осмьнадесять.
15 И возопиша сынове израилевы ко господу: и возстави им господь спасителя, аода сына гираня, сына иемениина, мужа ободесноручна: и послаша сынове израилевы дары рукою его еглому царю моавлю.
16 И сотвори себе аод нож обоюдуостр, на пядь едину долгота его, и припояса его под ризу по бедре десней своей.
17 И иде, и принесе дары еглому царю моавлю: еглом же муж добротелесен бе зело.
18 И бысть егда сконча аод принося дары, и отсла носящих дары:
19 и еглом обратися от идол иже в галгалех. И рече аод: слово мне есть к тебе тайно, царю. И рече еглом к нему: молчи. И отсла от себе всех предстоящих пред ним.
20 И аод вниде к нему. Сей же седяше въ горнице летней своей един. И рече аод: слово божие мне к тебе, царю. И воста егломъ со престола близ его.
21 И бысть егда воста, и простре аод руку левую свою, и извлече нож, иже над стегномъ его десным, и вонзе во чрево егломово:
22 и втисне и рукоять за острием, и заключи тук за острием, яко не извлече ножа изъ чрева его, (и изыде лайно).
23 И изыде аод в притвор, и пройде стрегущих, и затвори двери горницы за собою и заключи,
24 и сам изыде. И раби его приидоша и узреша, и се, двери горницы заключены, и реша: еда у потребы седит во отлучении ложа?
25 И преждаша дондеже посрамишася: и се, не бысть отверзаяй двери горницы. И взяша ключь, и отверзоша: и се, господин их лежит на земли мертв.
26 И аод спасеся внегда смущахуся, и не бе помышляющаго о нем: а он прейде идолы, и спасеся в сетирофе.
27 И бысть егда прииде аод в землю израилеву, и воструби рогом в горе ефремли: и снидоша с ним с горы сынове израилевы, и той предъ ними.
28 И рече к ним: идите вслед мене, яко предаде господь бог враги наша моавляны въ руки наша. И идоша вслед его, и предвзяша преходы иордана моавля, и ни единому мужу попустиша преити.
29 И избиша моава в то время яко десять тысящ мужей, вся воины, иже в них, и всякаго мужа сильна: и ни един муж спасеся.
30 И пременися моав в той день под руку израилеву, и бысть в покои земля осмьдесятъ лет: и суди их аод дондеже умре.
31 И по нем воста самегар сын анафов: и изби иноплеменников шесть сот мужей раломъ воловым: и спасе и сей израиля.
1 И приложиша сынове израилевы сотворити злое предъ господем: и аод умре.
2 И отдаде их господь в руку иавина царя ханаанска, иже царствова во асоре. И воевода силы его сисара, и той живяше во арисофе языков.
3 И возопиша сынове израилевы ко господу, яко девять сот колесниц железных бяше ему: и той озлоби израиля зело лет двадесять.
4 И деввора, жена пророчица, жена лафидофова, сия судяше израилю в то время:
5 и сия живяше под фиником деввора между рамою и между вефилем, в горе ефремли: и восхождаху сынове израилевы к ней тамо на суд.
6 И посла деввора, и призва варака сына авинеемля из кедеса неффалимова, и рече к нему: не заповеда ли тебе господь бог израилевъ? и пойдеши в гору фавор, и поймеши с собою десять тысящ мужей от сынов неффалимлих и от сынов завулоних:
7 и приведу к тебе в водотечь кисонь сисару воеводу силы иавини, и колесницы его, и множество (вой) его, и предам его в руки твоя.
8 И рече к ней варак: аще пойдеши со мною, пойду, и аще не пойдеши со мною, не пойду: яко не вем дне, в оньже благоустроит господь ангела со мною.
9 И рече деввора к нему: идущи пойду с тобою: обаче веждь, яко не будет тебе слава на пути, в оньже ты идеши: понеже в руку женску предаст господь сисару. И воста деввора и пойде с вараком до кадиса.
10 И воззва варак завулона и неффалима до кадиса, и поидоша вслед его десять тысящ мужей, и иде с ним деввора.
11 И хавер киней отлучися от кены и от сыновъ иовава, ужика моисеова: и потче кущу свою под дубом почивающих, иже есть при кедесе.
12 И возвестиша сисаре, яко взыде варакъ сын авинеемль на гору фавор.
13 И созва сисара вся колесницы своя, девять сот колесниц железных, и вся люди иже съ ним, от арисофа языков в водотечь кисонь.
14 И рече деввора к вараку: востани, яко сей день, в оньже предаде господь сисару въ руку твою, зане господь изыдет пред тобою. И сниде варак с горы фавор, и десять тысящъ мужей вслед его.
15 И сотре господь сисару и вся колесницы его и весь полк его острием меча пред вараком. И сниде сисара с колесницы своея и побеже ногами своими.
16 И варак гоняй вслед колесниц его и вслед полка, даже до дубравы языков. И паде весь полк сисарин острием меча: не остася ни един.
17 И сисара убеже ногами своими в кущу иаили, жены хавера кинеева: яко мир бяше между иавином царем асорским и между домомъ хавера кинеева.
18 И изыде иаиль во сретение сисаре и рече к нему: уклонися, господине мой, уклонися ко мне, не бойся. И уклонися к ней в кущу: и покры его одеждею своею.
19 И рече сисара к ней: напой мя мало воды, яко возжаждах. И отреши мех млечный, и напои его, и покры его.
20 И рече к ней сисара: стани во дверех кущи, и будет аще кто приидет к тебе, и вопроситъ тя, и речет: есть ли зде мужъ? и речеши: несть.
21 И взя иаиль, жена хаверова, кол кущный, и взя млат в руку свою, и вниде к нему тихо, и водрузи кол во скрании его, и пронзе до земли: и сей утруждся спаше, и издше.
22 И се, варак гоняй сисару. И изыде иаиль во сретение ему и рече ему: прииди, и покажу тебе мужа, егоже ты ищеши. И вниде к ней, и се, сисара лежаше мертв, и колъ во скрании его.
23 И покори господь бог в той день иавина царя ханааня пред сыны израилевыми:
24 и хождаше рука сынов израилевых ходящи, и ожесточися на иавина царя ханаанска, дондеже истребиша его.
1 И воспе деввора и варак сын авинеемов въ той день, и рече:
2 внегда начати вождом во израили, в произволении людий, благословите господа.
3 услышите, царие, и внушите, князи: азъ господеви воспою и пою богу израилеву.
4 господи, во исходе твоем от сиира, внегда воздвизатися тебе от села едомова, земля потрясеся, и небо возмутися, и облацы искапаша воду:
5 горы подвигошася от лица господа елои, тая сина от лица господа бога израилева.
6 Во дни самегара сына анафова, во дни иаили, оскудеша путие, и идоша в пути кривы, и идоша в пути развращенны:
7 оскудеша живущии во израили, оскудеша дондеже воста деввора, дондеже воста мати во израили:
8 избраша боги новы, яко хлеб ячен, тогда воеваша грады князей: щит не явися, ниже копие в четыредесяти тысящах во израили.
9 Сердце мое на учиненная во израили: сильнии людий, благословите господа.
10 ездящии на ослятех белых в полудне, и седящии на судищи, и ходящии на пути сонмов, провещайте.
11 Глас плещущих посреде веселящихся: тамо дадят правду. господи, правды укрепи во израили: тогда разыдошася во грады своя людие господни.
12 Востани, востани, деввора: востани, востани, глаголи с песнию: востани, вараче, и плени плен твой, сыне авинеемль.
13 Тогда возвеличися сила его: господь смири мне крепльшия мене.
14 Людие ефремли утомиша их в долине: брат твой вениамин в людех твоих: от мене махир снидоша взыскующии, и от завулона укрепляющиися в скиптре повествования писменника.
15 И началницы во иссахаре с девворою и вараком: тако варак отпусти пеших своих в долину, в разделения рувимова, велика испытания сердца.
16 Вскую ми седиши посреде мосфафемов, слышати звиздание воставающих проити в разделения рувимля? велия испытания сердца.
17 Галаад, об ону страну иордана вселися: и дан, вскую обитаеши в кораблехъ? асиръ обита при брезех морских, и в разделениихъ своих вселися.
18 Завулон, людие укориша душу свою на смерть: и неффалим на высотах села.
19 И приидоша к нему царие, и ополчишася, тогда воеваша царие ханаанстии во фанаахе, у воды магеддо: множества сребра не взяша.
20 от небесе ополчишася звезды, от чина своего ополчишася с сисарою.
21 Водотечь кисонов изверже их, водотечь кадимин, водотечь кисонов: поперет его душа моя сильная.
22 Тогда отсекошася копыта конская от топтания сильных его.
23 Проклинайте мазора, рече ангел господень, проклятиемъ проклените живущих в нем, яко не приидоша в помощь господню, в помощь (господню) в сильных.
24 Да благословится в женах иаиль, жена хавера кинеева, от жен в кущи да благословится:
25 воды проси у нея, и даде ему млеко в чаши: преимущих принесе масло кравие:
26 руку свою левую к колу простре, и десницу свою ко млату работающих, и уби сисару: разби главу его, и порази, прободе скрания его:
27 между ногама ея повалися: паде утружден, и умре посреде ног ея, и тамо паде бедне.
28 оконцем взираше мати сисарина, окномъ сквозе решетку, что замедли колесница его приити? вскую умедлиша стопы колесниц его?
29 Мудрии началствующии ея отвещаша ей, и сама отвещаваше словеса своя себе:
30 не обрящут ли его разделяюща корысти, удружающа другом на главу мужа сильна? корысти шаров сисаре, корысти шаров различия, шары испещренных, сия выи его корысти.
31 Тако да погибнут вси врази твои, господи: и любящии его, якоже восток солнца в силе своей.
32 И бысть в покои земля четыредесять лет.
1 И сотвориша сынове израилевы злое пред господем, и предаде их господь в руку мадиамлю седмь лет.
2 И укрепися рука мадиамля на израиля: и сотвориша себе сынове израилевы от лица мадиамля ограды в горах и в пещерах и в твердынех.
3 И бысть егда сеяше муж израилев, и восхождаше мадиам и амалик и сынове восточнии, и восхождаху на него,
4 и ополчахуся на них, и разоряху плоды земныя, дондеже внити в газу: и не оставляху бытия жизненнаго во израили, и стад и телца и осла:
5 яко сами и скоти их восхождаху, и кущи их преношаху, и прихождаху яко прузи множеством, и самем и велблюдом их не бяше числа: и прихождаху на землю израилеву разорити ю.
6 И обнища израиль зело от лица мадиамля.
7 И возопиша сынове израилевы ко господу: и бысть егда возопиша сынове израилевы ко господу мадиама ради,
8 и посла господь мужа пророка к сыном израилевым, и рече им: сия глаголет господь бог израилев: азъ есмь изведый вас из египта, и изведохъ вас из дому работы:
9 и избавих вас от руки египетския и от руки всех стужающих вам: и изгнах я от лица вашего, и дах вам землю их,
10 и рекох вам: аз есмь господь бог ваш, не убойтеся богов аморрейских, в нихже вы живете в земли их: и не послушасте гласа моего.
11 И прииде ангел господень, и седе под дубом, иже есть во ефрафе, иже бысть иоаса отца езри. И гедеон сын его млачаше пшеницу на гумне его, бежати от лица мадиамля.
12 И явися ему ангел господень и рече къ нему: господь с тобою, сильный крепостию.
13 И рече к нему гедеон: во мне, господи мой: и аще есть господь с нами, и вскую обретоша ны вся злая сия? и где суть вся чудеса его, елика поведаша нам отцы наши, глаголюще: не из египта ли изведе нас господь? и ныне отверже нас господь и предаде нас в руку мадиамлю.
14 И воззре на него ангел господень и рече ему: иди в крепости твоей сей, и спасеши израиля от руки мадиамли: и се, послах тя.
15 И рече к нему гедеон: во мне, господи, въ чесом спасу израиля? се, тысяща моя хуждша въ манассии, и аз есмь мний в дому отца моего.
16 И рече к нему господь: понеже аз буду съ тобою, и избиеши мадиама яко мужа единаго.
17 И рече к нему гедеон: и аще обретохъ благодать пред очима твоима, и да сотвориши мне днесь знамение, яко ты глаголеши со мною:
18 не отиди отсюду, дондеже приити мне къ тебе, и принесу жертву мою, и пожру предъ тобою. И рече: аз есмь, премедлю, дондеже обратишися ты.
19 И гедеон вниде, и сотвори козлище от коз, и четверть ифи муки опресноков, и мяса вложи в кошницу, и юху влия в горнец: и изнесе к нему под дуб, и поклонися.
20 И рече к нему ангел господень: возми мяса и хлебы пресныя, и положи у камене онаго, и юху близ излий. И сотвори тако.
21 И простре ангел господень конец жезла, иже в руце его, и прикоснуся мясом и хлебомъ пресным: и возгореся огнь из камене, и пояде мяса и опресноки: и ангел господень отиде от очей его.
22 И виде гедеон, яко ангел есть господень, и рече гедеон: увы мне, господи, господи, яко видех ангела господня лицем к лицу.
23 И рече ему господь: мир тебе, не бойся, не умреши.
24 И созда тамо гедеон жертвенник господу, и назва его [мир господень], даже до дне сего, еще сущу ему во ефрафе отца езри.
25 И бысть в ту нощь, и рече ему господь: возми телца упитаннаго (от скотовъ) отца твоего, и телца втораго седми лет, и разориши олтарь ваалов, иже есть отца твоего, и дубраву, яже у него, да посечеши:
26 и да соградиши олтарь господеви богу твоему явившемуся тебе на верху (горы) маози во предчинии: и да поймеши телца втораго и вознесеши всесожжения на древех дубравы, юже посечеши.
27 И поя гедеон десять мужей от рабов своих, и сотвори, якоже заповеда ему господь. И бысть яко убояся дому отца своего и мужей града, еже сотворити во дни, и сотвори нощию.
28 И обутреневаша мужие градстии заутра: и се, раскопан олтарь ваалов, и дубрава яже у него посечена, и видеша телца втораго вознесена на всесожжение на олтарь новосогражденный.
29 И рече муж к ближнему своему: кто сотвори вещь сию? И вопрошаху и искаху, и познаша, яко гедеон сын иоасов сотвори вещь сию.
30 И рекоша мужие градстии ко иоасу: изведи сына твоего, и да умрет, яко раскопа олтарь ваалов и яко посече дубраву яже над ним.
31 И рече иоас к мужем воставшим на него: еда вы ныне суд глаголете о ваале? или вы его спасете? иже аще кто сотвори обиду, да умрет до заутрия: аще бог есть, да мстит себе, яко раскопа олтарь его.
32 И прозва его в той день иероваалом, глаголя: да отмстит на нем ваал, яко раскопа олтарь его.
33 И весь мадиам и амалик и сынове востоковъ снидошася вкупе, и преидоша (реку), и ополчишася в долине иезраель.
34 И дух божий укрепи гедеона, и воструби рогом, и возопи авиезер вслед его.
35 И посла послы ко всему манассию, и созвася и сей вслед его. Посем посла послы во асир и в завулон и в неффалим, и взыдоша во сретение им.
36 И рече гедеон к богу: аще ты спасаеши рукою моею израиля, якоже глаголал еси,
37 се, аз положу руно овчее на гумне: и аще будет роса на руне точию, и по всей земли суша, уразумею, яко спасеши рукою моею израиля, якоже глаголал еси.
38 И бысть тако: и урани гедеон наутрие, и исцеди руно, и истече роса из руна, исполнен окрин воды.
39 И рече гедеон к богу: да не разгневается ярость твоя на мя, и возглаголю еще единою, и искушу еще единою руном: да будетъ суша на руне токмо, и по всей земли да будетъ роса.
40 И сотвори бог тако в нощи той: и бысть суша на руне токмо, и по всей земли бысть роса.
1 И обутренева иероваал, сей есть гедеон, и вси людие иже с ним, и ополчишася у источника арад: и полк мадиамль и амаликовъ бяше ему с севера на холме мосе гаваафъ-аморе в долине.
2 И рече господь к гедеону: мнози людие иже с тобою, сего ради не предам мадиама в руку их, да не когда похвалится израиль на мя, глаголя: рука моя спасе мя:
3 и ныне рцы во уши людем, глаголя: кто боязлив и ужастив, да возвратится и да отидетъ от горы галаадовы. И возвратишася от людий двадесять две тысящи, и десять тысящ осташася.
4 И рече господь к гедеону: еще людие мнози суть: сведи я на воду, и искушу тебе ихъ тамо: и будет егоже аще реку тебе, сей да идет с тобою, той да пойдет с тобою: и всяк егоже аще реку тебе, сей да не пойдетъ с тобою, той да не пойдет с тобою.
5 И сведе люди на воду, и рече господь к гедеону: всяк иже полочет языком своим от воды, якоже лочет пес, да поставиши его особь: и всяк иже на колену падет пити, отлучи его особь.
6 И бысть число в горстех локавших языкомъ триста мужей: и вси оставшии людие преклонишася на колена своя пити воду.
7 И рече господь к гедеону: треми сты мужей локавшими воду спасу вас, и предам мадиама в руку твою: и вси людие да пойдут, кийждо на место свое.
8 И взяша себе брашно от людий в руку свою и роги своя: и всякаго мужа израильтеска отпусти коегождо в кущу свою, а триста мужей удержа: полк же мадиамль бяше ниже его в долине.
9 И бысть в ту нощь, и рече к нему господь: востав сниди отсюду скоро в полк, яко предахъ их в руку твою:
10 и аще боишися ты снити, сниди ты и фара раб твой в полк,
11 и услышиши, что возглаголют: и по семъ укрепятся руце твои, и снидеши в полк. И сниде сам и фара раб его в часть пятьдесятников, иже быша в полце.
12 И мадиам и амалик и вси сынове востоковъ стояху в долине яко прузи множеством, и велблюдом их не бяше числа, но бяху яко песок на краи морстем множеством.
13 И вниде гедеон, и се, муж поведаше сонъ подругу своему, и рече: сей сон егоже видех, и се, тесто хлеба ячна валяющееся в полце мадиамли, и привалися к кущи мадиамли, и поби ю, и преврати ю, и паде куща.
14 И отвеща подруг его и рече: несть (сие тесто), но мечь гедеона сына иоасова мужа израилева: предаде бог в руку его мадиама и весь полк.
15 И бысть яко услыша гедеон поведание сна и разсуждение его, и поклонися господеви, и возвратися в полк израилев и рече: востаните, яко предаде господь в руки наша полк мадиамль.
16 И раздели триста мужей на три началства, и вдаде роги в руце всем, и водоносы тщи, и свещи среде водоносов,
17 и рече им: мене смотрите, и такожде творите: и се, аз вниду в часть полка, и будет якоже сотворю, такожде сотворите:
18 и аз вострублю рогом, и вси иже со мною, да вострубите и вы в роги окрест всего полка, и да речете: (мечь) богу и гедеону.
19 И вниде гедеон и сто мужей иже с нимъ в часть полка в начале стражи средния: и убужениемъ возбудиша стрегущих, и вострубиша в роги, и сразиша водоносы иже в руках их.
20 И вострубиша три началства в роги и сокрушиша водоносы, и удержаша в левых руках своихъ свещи, и в десных руках их роги, в няже трубити: и возопиша: мечь господеви и гедеону.
21 И сташа кийждо о себе окрест полка: и смятеся весь полк, и возопиша, и побегоша.
22 И вострубиша в триста рогов: и положи господь мечь мужа на подруга его во всем полце, и пробеже полк до вифасетта, и собрася до страны авелмаула и к тавафу.
23 И возопиша мужие израильтестии от неффалима и от асира и от всего манассии, и погнаша вслед мадиама.
24 И посла послы гедеон во всю гору ефремлю, глаголя: снидите во сретение мадиаму и удержите им воду до вефира и иордана. И воззва всякъ муж ефремль, и предотяша воду до вефира и иордана,
25 и яша два князя мадиамля, орива и зива: и убиша орива в суре, и зива убиша во иакефзиве: и погнаша мадиама, и главу орива и зива принесоша к гедеону от оноя страны иордана.
1 И рекоша к гедеону мужие ефремли: что сие сотворил еси нам, яко не позвал еси нас, егда ходил воевати на мадиама? И пряхуся с ним сильно.
2 И рече к ним (гедеонъ): что сотворих ныне якоже вы? не лучше ли гроздец ефремль, нежели обрание винограда авиезерова?
3 в руку вашу предаде господь князи мадиамли, орива и зива: и что возмогох сотворити якоже вы? Тогда утолися дух их от него, егда глагола им слово сие.
4 И прииде гедеон ко иордану, и прейде самъ и иже с ним триста мужей, алчни и утруждени гоняще.
5 И рече мужем сокхофским: дадите хлебы на пищу мужем сим иже со мною, яко алчни суть: аз же гоню вслед зевеа и салмана, царей мадиамских.
6 И рекоша князи сокхофстии: еда рука зевеа и салмана ныне в руце твоей, яко дадимъ воем твоим хлебы?
7 И рече гедеон: не тако: но егда предастъ господь зевеа и салмана в руку мою, аз сотру плоти ваша тернием пустынным и волчцами.
8 И взыде оттуду во фануил и глагола к нимъ такожде. И отвещаша ему мужие фануили, якоже отвещаша ему мужие сокхофстии.
9 И рече гедеон мужем фануилским, глаголя: егда возвращуся с миром, раскопаю столпъ сей.
10 И зевей и салман быша в каркаре, и полкъ их с ними до пятьнадесяти тысящ (мужей) оставшихся от всего полка сынов восточных: и умершихъ бяше сто и двадесять тысящ мужей держащихъ оружие.
11 И взыде гедеон путем живущих в кущахъ от востоков прямо навы и иегевала: и изби полк, полк же бяше надежен.
12 И побегоста зевей и салман: и гна вследъ их, и поима оба царя мадиамля, зевеа и салмана, и весь полк их смяте.
13 И возвратися гедеон сын иоасов от рати прежде восхода солнца,
14 и ят отрочища от мужей сокхофскихъ и вопроси его: и вписа от него имена князей сокхофских и старейшин их, седмидесяти и седми мужей.
15 И прииде гедеон ко князем сокхофскимъ и рече им: се, зевей и салман, ихже ради укористе мя, глаголюще: еда рука зевеа и салмана ныне в руце твоей, яко дадимъ мужем твоим утруждшимся хлебы?
16 И поя князи и старейшины града, и терние от пустыни и волчцы, и сотре ими мужы сокхофски:
17 и столп фануилев раскопа, и изби мужы градския.
18 И рече к зевею и салману: какови мужие, ихже избисте в фаворе? И реша: якоже ты, тако они, подобен ты еси им, яко подобие сынов царевых.
19 И рече гедеон: братия моя и сынове матере моея суть: жив господь, аще бысте живили их, не убил бых вас.
20 И рече иеферу первенцу своему: востав убий их. И не извлече отрочищь меча своего: зане убояся, яко млад бяше.
21 И рече зевей и салман: востани убо ты, и сопротивися нам: зане яко муж сила его. И воста гедеон, и уби зевеа и салмана: и взя украшения, яже на выяхъ велблюдов их. br>
22 И рекоша мужие израильстии ко гедеону: владей нами и ты, и сынове твои, и сынове сыновъ твоих, яко ты спасл еси нас от руки мадиамли.
23 И рече к ним гедеон: не возобладаю азъ вами, и не возобладает сын мой вами: господь да владеет вами.
24 И рече к ним гедеон: попрошу у васъ прошения, и да даст мне всяк муж усерязь от плена своего: яко усерязи златы (мнози) бяху им, зане исмаилтяне бяху.
25 И рекоша: дающе дадим. И простре ризу, и ввергоша ту мужие по усерязю от плена своего.
26 И бысть вес усерязь златых, ихже испроси, тысяща и седмь сот сикль злата, кроме плениц и монист (*енфофовыхъ), и риз багряных, яже на царех мадиамлих, и кроме чепей златых, яже на выях велблюдов их.
27 И сотвори от них гедеон ефуд Греч.: епомис, славен.: нарамник., и постави его во граде своем во ефрафе. И соблуди весь израиль по нем тамо: и бысть гедеону и всему его дому в соблазн.
28 И смирися мадиам пред сыны израилевыми, и не приложиша воздвигнути главы своея. И бысть в покои земля четыредесять лет, во дни гедеоновы.
29 И иде иероваал сын иоасов, и седе в дому своем.
30 И гедеону быша седмьдесят сынов, изшедшии от чресл его, яко жены бяху многи ему.
31 И подложница его яже в сикиме и сия роди ему сына, и нарече имя ему авимелех.
32 И умре гедеон сын иоасов в старости блазе, и погребеся во гробе иоаса отца своего, во ефрафе, отца езриева.
33 И бысть егда умре гедеон, и совратишася сынове израилевы и соблудиша вслед ваалима, и сотвориша себе со ваалверифом завет, да им будет бог:
34 и не воспомянуша сынове израилевы господа бога своего, избавльшаго их из руки всех врагъ их окрестных:
35 и не сотвориша милости с домом иеровааловым, сей есть гедеон, по всей благостыни его, юже сотвори со израилем.
1 И пойде авимелех сын иероваалов в сихемъ ко братии матере своея и глагола к ним и ко всему сродству дому отца матере своея, глаголя:
2 глаголите во уши всех мужей сихемских: что лучше вам, еже владети вами седмидесяти мужем всем сыном иеровааловым, или владети вами мужу единому? и помяните, яко кость ваша и плоть ваша есмь аз.
3 И глаголаша братия матере его о нем во уши всех мужей сихемских вся словеса сия. И уклонися сердце их вслед авимелеха, рекоша бо: брат наш есть.
4 И даша ему седмьдесят сребреник от дому ваалверифа: и ная ими авимелех мужей праздных и скитающихся, и поидоша вследъ его.
5 И вниде в дом отца своего во ефрафу, и изби братию свою, сыны иеровааловы, седмьдесятъ мужей, на камени единем, и остася иоафамъ сын иеровааль юнейший, зане скрыся.
6 И собрашася вси мужие сихемстии и весь домъ маалов, и поидоша, и поставиша авимелеха царемъ у дуба стана, иже в сихемех.
7 И поведаша иоафаму, и пойде, и ста на версе горы гаризин: и воздвиже глас свой, и воззва, и рече им: послушайте мене, мужие сихемстии, и да услышит вас бог.
8 Идуще идоша древа помазати себе царя и реша масличине: буди нам царь.
9 И рече им масличина: еда оставивши тучность мою, юже во мне прослави бог и человецы, пойду владети древами?
10 И рекоша древа смоковнице: прииди, царствуй над нами.
11 И рече им смоковница: еда оставивши мою сладость и плод мой благий, пойду владети древами?
12 И рекоша древа к лозе виноградней: прииди, буди нам царь.
13 И рече им лоза виноградная: еда оставивши вино мое, веселящее бога и человеки, пойду владети древами?
14 И рекоша вся древа тернию: прииди, буди нам царь.
15 И рече терние ко древам: аще по истине помазуете себе царя мене над вами, приидите и внидите под сень мою: аще ли же ни, да изыдет огнь из терния и пояст кедры ливанския.
16 И ныне аще по истине и по совершенству сотвористе, и постависте авимелеха царем, и аще благо сотвористе со иероваалом и с домомъ его, и аще по воздаянию руки его сотвористе ему,
17 якоже воева отец мой по вас, и поверже душу свою в страну, и избави вас от руки мадиамли:
18 и вы востасте на дом отца моего днесь и избисте сыны его, седмьдесят мужей, на единем камени, и постависте царем авимелеха сына рабыни его над мужи сикимскими, яко брат ваш есть:
19 и аще по истине и по совершенству сотвористе со иероваалом и домом его днесь, благословени вы будите, и возвеселитеся о авимелесе, и той о вас да возвеселится:
20 аще же ни, да изыдет огнь от авимелеха и пояст мужы сикимски и дом мааллонь: и да изыдет огнь от мужей сикимских и от дому мааллоня и да пояст авимелеха.
21 И избеже иоафам, и побеже, и пойде в виру, и вселися тамо от лица авимелеха брата своего.
22 И облада авимелех во израили три лета.
23 И посла бог дух зол между авимелехомъ и между мужи сикимскими: и возгнушашася мужие сикимстии домом авимелеховым,
24 еже навести неправду седмидесяти сыновъ иероваалих и крови их возложити на авимелеха брата их, иже уби их, и на мужы сикимски, яко укрепиша руце его избити братию свою:
25 и поставиша нань мужие сикимстии подсады на версех гор, и разграбляху всех идущихъ к ним на пути. И возвестися сие авимелеху.
26 И прииде гаал сын аведов и братия его, и преидоша в сикиму, и уповаша на него мужие сикимстии:
27 и изыдоша на село, и обраша винограды своя, и изгнетоша, и сотвориша лики: и ходиша во храм богов своих, и ядоша и пиша, кленуще авимелеха.
28 И рече гаал сын аведов: кто есть авимелех, и кто есть сын сихемль, яко да поработаем ему? не сын ли иеровааль, и зевул страж его раб его с мужи еммора отца сихемля? и почто имамы работати ему?
29 и кто даст люди сия в руку мою? и преставлю авимелеха, и реку ко авимелеху: умножи силу твою, и изыди.
30 И услыша зевул князь града словеса гаала сына аведова, и разгневася яростию:
31 и посла послы ко авимелеху отай, глаголя: се, гаал сын аведов и братия его приидоша в сихему, и се, сии обседят на тя град:
32 и ныне востани нощию ты и людие иже съ тобою, и засяди до заутрия на селе:
33 и будет рано, егда взыдет солнце, обутрееши и протягнешися ко граду: и се, той и людие иже с ним изыдут к тебе, и сотвориши ему, елико возможет рука твоя.
34 И воста авимелех и вси людие, иже съ ним, нощию, и заседоша на сихем на четыри части.
35 И бысть заутра, и изыде гаал сын аведовъ и ста пред дверию врат градских. И воста авимелех и людие, иже с ним, от засады.
36 И виде гаал сын аведов люди и рече к зевулу: се, народ людий исходит с верховъ гор. И рече к нему зевул: стень гор ты видиши яко мужы.
37 И приложи еще гаал глаголати и рече: се, людие исходят при мори от высоты земли, и полк един идет путем дубравы маоненим.
38 И рече к нему зевул: и где суть ныне уста твоя глаголющая: кто есть авимелех, яко поработаем ему? не сии ли суть людие, яже ты уничтожил еси? изыди убо ныне, и ополчися противу их.
39 И изыде гаал пред мужы сихемски, и ополчися противу авимелеху:
40 и погна его авимелех, и побеже от лица его: и падоша язвеннии мнози даже до врат градских.
41 И вниде авимелех во ариму: и зевул изгна гаала и братию его, да не живут в сихеме.
42 И бысть наутрие, и изыдоша людие на поле, и поведаша авимелеху:
43 и взя людий, и раздели их на три части, и засяде на селе: и виде, и се, людие изыдоша из града, и воста на ня, и изби их.
44 И авимелех и началницы, иже с ним, протягошася и сташа у дверий врат градских: и две части пролияшася на вся, яже на селе, и избиша я.
45 Авимелех же добываше града весь день той, и взя град, и люди иже в нем изби, и разори град, и посея в нем соль.
46 И услышаша сие вси мужие столпа сихемля и внидоша в твердь дому (бога) вефилвериф.
47 И возвестися авимелеху, яко собрашася вси мужие столпа сихемска.
48 И взыде авимелех на гору селмон сам и вси людие, иже с ним: и взя авимелех секиру в руку свою, и усече ветвь от древа, и воздвиже ю, и возложи на раму свою: и рече людем иже с ним: еже видесте мя творяща, сотворите скоро якоже и аз.
49 И усекоша вси людие ветвия и взяша, и поидоша вслед авимелеха, и возложиша на твердыню, и запалиша на них твердыню огнем: и изомроша вси людие столпа сихемска до тысящи мужей и жен.
50 И иде авимелех в фивис и обсяде его, и взя его:
51 и столп бе тверд среде града, и вбегоша ту вси мужие и жены и вси старейшины града, и заключишася, и взыдоша на кров столпа:
52 и прииде авимелех до столпа, и супротивишася ему: и приступи авимелех ко вратом столпа, еже запалити его огнем:
53 и сверже жена едина уломок жерновный на главу авимелеха, и сокруши ему темя:
54 и возопи скоро авимелех ко отроку носящему сосуды его и рече ему: извлецы мечь твой и убий мя, да не рекут, яко жена уби его. И прободе его отрок его, и умре.
55 И видеша мужие израильстии, яко умре авимелех: и отидоша кийждо на свое место.
56 И воздаде бог зло авимелеху, еже сотвори отцу своему, убив седмьдесят братий своих:
57 и всяку злобу мужей сихемлих обрати богъ на главы их: и взыде на ня клятва иоафама сына иеровааля.
1 И воста по авимелесе спасти израиля фола сынъ фуи, сын брата отца его, муж от иссахара: и сей живяше в самире в горе ефремове,
2 и суди израиля лет двадесять три, и умре, и погребен бысть в самире.
3 И воста по нем иаир галаадитин, и суди израиля лет двадесять два:
4 и быша ему сынове тридесять два ездящии на тридесяти двух ослех: и грады им тридесять два: и прозываху их грады иаировы, даже до днесь, иже суть в земли галаадове:
5 и умре иаир, и погребен бысть в камоне.
6 И приложиша сынове израилевы творити злое пред господем и послужиша ваалимам и астарофамъ и богом сврским и богом сидонским и богомъ моавлским и богом сынов аммоних и богомъ иноплеменников: и оставиша господа и не работаша ему.
7 И разгневася господь яростию на израиля и предаде их в руку филистимску и в руку сынов аммоних.
8 И озлобиша, и сокрушиша сынов израилевыхъ в то время осмьнадесять лет, всех сыновъ израилевых, иже об ону страну иордана в земли аморреа иже в галааде.
9 И преидоша сынове аммони иордан воевати на иуду и вениамина и на дом ефремов: и оскорблени быша сынове израилевы зело.
10 И возопиша сынове израилевы ко господу, глаголюще: согрешихом тебе, яко оставихом бога нашего и работахом ваалиму.
11 И рече господь к сыном израилевым: не от египта ли и от аморреа и от сынов аммонихъ и от филистима
12 и от сидонян и от амалика и от мадиама, иже стужиша вам, и возописте ко мне, и спасохъ вы от руки ихъ?
13 вы же остависте мене и работасте богомъ иным: сего ради не приложу спасти вас:
14 идите и возопийте к богом, ихже избрасте себе, и тии да спасут вы во время скорби вашея.
15 И реша сынове израилевы ко господу: согрешихом, сотвори ты нам по всему, елико угодно пред очима твоима: точию избави нас въ сей день.
16 И извергоша боги чуждыя от среды себе и послужиша господеви единому: и сжалеся душа его о утруждении израилеве.
17 И взыдоша сынове аммони, и ополчишася въ галааде: и собрашася и сынове израилевы, и ополчишася в массифе.
18 И реша людие князи галаадстии кийждо ко ближнему своему: муж, иже начнет битися съ сынми аммоновыми, той будет князь всем живущимъ в галааде.
1 И бяше иеффай галаадитянин силен крепостию: и той бысть сын жены блудницы, яже роди галааду иеффая.
2 И роди жена галаадова сынов ему: и возмужаша сынове жены и изгнаша иеффая, и рекоша ему: не наследиши в дому отца нашего, яко сынъ жены блудныя еси ты.
3 И отбеже иеффай от лица братии своея и вселися в земли тов: и собирахуся ко иеффаю мужие праздни, и хождаху с ним.
4 И бысть по днех сих, и воеваша сынове аммони на израиля.
5 И егда воеваша сынове аммони на израиля, и поидоша старейшины галаадовы пояти иеффая от земли тов,
6 и рекоша ко иеффаю: прииди и буди нам началник, и ополчимся на сыны аммони.
7 И рече иеффай старейшинам галаадским: не вы ли возненавидесте мя, и изгнасте мя изъ дому отца моего, и отпустисте мя от себе? и почто приидосте ко мне ныне, егда нужду возыместе?
8 И рекоша старейшины галаадстии ко иеффаю: сего ради ныне приидохом к тебе, да пойдеши с нами, и ополчимся на сыны аммони: и будеши нам князь всем живущим в галааде.
9 И рече иеффай ко старейшинам галаадовым: аще возвращаете мя ополчитися на сыны аммони, и предаст их господь предо мною, и аз вамъ буду ли князь?
10 И рекоша старейшины галаадстии ко иеффаю: господь да будет послух между нами, аще по слову твоему тако не сотворим.
11 И пойде иеффай со старейшинами галаадскими, и поставиша его людие над собою главу и князя: и глагола иеффай вся словеса своя предъ господем в массифе.
12 И посла иеффай послы к царю сынов аммоних, глаголя: что мне и тебе, яко пришел еси ко мне воевати на земли моей?
13 И рече царь сынов аммоних к послом иеффаевым: яко взя израиль землю мою, егда изыде изъ египта, от арнона даже до иавока и до иордана: и ныне возврати ю с миром, и отиду.
14 И возвратишася послы ко иеффаю. И приложи еще иеффай, и посла послы к царю сыновъ аммоних, и рекоша ему:
15 тако глаголет иеффай: не взя израиль земли моавли и земли сынов аммоних,
16 понеже егда исхождаше из египта, пойде израиль по пустыни до моря чермнаго, и прииде до кадиса:
17 и посла израиль послы к царю едомску, глаголя: да прейду сквозе землю твою: и не послуша царь едомск: такожде посыла и к царю моавску, и не восхоте: и седе израиль в кадисе:
18 и иде пустынею, и обыде землю едомлю и землю моавлю, и прииде на востоки солнца земли моавли, и ополчися об ону страну арнона, и не вниде в пределы моавли, яко арнонъ бяше предел моавль:
19 и посла израиль послы к сиону царю аморрейску, царю есевонску, и рече к нему израиль: да прейдемъ по земли твоей до места нашего:
20 и не восхоте сион израилю преити по пределомъ своим, и собра сион вся люди своя, и ополчися во иасе, и воева на израиля:
21 и предаде господь бог израилев сиона и вся люди его в руки израиля, и изби их:
22 и наследова израиль всю землю аморреа живущаго на земли той: и взя весь предел аморрейскъ от арнона даже до иавока, и от пустыни до иордана:
23 и ныне господь бог израилев изгна аморреа от лица людий своих израиля, и ты ли хощеши наследити его?
24 ни, но елико даде в наследие тебе хамосъ бог твой, сия да наследиши: а всех, ихже изгна господь бог наш от лица нашего, сия мы наследим:
25 и ныне еда лучший еси ты валака сына сепфорова, царя моавля? не бранию ли боряшеся со израилем, или воюя воева его?
26 егда вселися израиль во есевоне и въ пределех его, и во ароире и в пределехъ его, и во всех градех, иже у иордана, триста лет, и почто не избавил еси ихъ во время оно?
27 аз же не согреших тебе, и ты твориши со мною зло, воюя на мя: да судит господь судяй днесь между сыны израилевыми и между сыны аммони.
28 И не послуша царь сынов аммоних словесъ иеффаевых, яже посылаше к нему.
29 И бысть на иеффаи дух господень, и прейде галаада и манассию, и прейде стражбу галаадову, и от стражбы галаадовы иде на ону страну сынов аммоних.
30 И обеща иеффай обет господеви и рече: аще преданием предаси сыны аммони в руку мою,
31 и будет исходяй, иже аще изыдет изъ врат дому моего во сретение мне, егда возвращуся с миром от сынов аммоних, и будет господеви, и вознесу его во всесожжение.
32 И прииде иеффай к сыном аммоним воевати на ня: и предаде я господь в руце его
33 и изби их от ароира, дондеже приити в мениф, двадесять градов, и даже до авеля виноградов, язвою великою зело. И покорени быша сынове аммони пред лицем сынов израилевых.
34 И прииде иеффай в массифу в дом свой: и се, дщерь его исхождаше во сретение его с тимпаны и лики: и сия бяше единородна ему возлюбленна: и не бе ему сына, ни другия дщере, кроме ея.
35 И бысть егда увиде ю сам, растерза ризы своя и рече: о, дщи моя, смущающи смутила мя еси: и ты ныне в претыкание была еси пред очима моима: аз бо отверзох уста моя на тя ко господу и не возмогу вспять возвратити.
36 И рече к нему: отче, аще отверзл еси уста твоя ко господу, сотвори мне, якоже изыде изо уст твоих, занеже сотвори тебе господь месть врагом твоим от сынов аммоних.
37 И рече ко отцу своему: сотвори, отче мой, сие слово: остави мя два месяца, да пойду и взыду на горы и плачуся девства моего азъ и другини мои.
38 И рече: иди. И отпусти ю на два месяца: и иде сама и другини ея, и плакася девства своего на горах.
39 И бысть в конце двою месяцу, и возвратися ко отцу своему: и сотвори на ней обет свой, имже обещася: и сия не позна мужа. И бысть в повеление во израили:
40 от дний до дний исхождаху дщери израилевы плакати о дщери иеффая галаадитина четыри дни в лете.
1 И собрашася мужие ефремли и приидоша въ сефину, и реша иеффаю: почто ходил еси ополчитися на сыны аммони, и нас не позвалъ еси ити с тобою? дом твой с тобою сожжемъ огнем.
2 И рече к ним иеффай: имех прю азъ и людие мои, и сынове аммони оскорбиша мене зело: и воззвах вас, и не избависте мене от руки их:
3 и видех, яко не бяше спасающаго, и положихъ душу мою в руку мою, и приидох к сыном аммоним, и предаде я господь в руку мою: и вскую приидосте ко мне днесь, ополчити ли ся на мя?
4 И собра иеффай вся мужы галаадски и ополчися на ефрема: и избиша мужие галаадстии ефрема, понеже глаголаху: уцелевшии от ефрема, вы галаад среде ефрема и среде манассии.
5 И засяде галаад проходы у иордана ефремовы. И бысть егда реша уцелевшии от ефрема: прейдем: и рекоша им мужие галаадстии: еда ли от ефрема вы? И реша: несмы.
6 И реша им: рцыте, клас. И не управиша рещи тако: и имаху их, и закалаху у преходовъ иорданих: и падоша в то время от ефрема четыредесять и две тысящи.
7 И суди иеффай израилеви лет шесть: и умре иеффай галаадитин, и погребен бысть во граде своем в галааде.
8 И суди по нем израилеви есевон от вифлеема:
9 и быша ему тридесять сыны и тридесять дщери, яже отдаде вон (мужемъ), и тридесять жен приведе сыном своим отвне: и суди израилеви седмь лет:
10 и умре есевон, и погребен бысть в вифлееме.
11 И суди по нем израилеви елон завулонянинъ десять лет:
12 и умре елон завулонянин, и погребенъ бысть во елиме в земли завулони.
13 И суди по нем израилеви авдон сын еллиховъ фарафонитин:
14 и быша ему четыредесять сынове и тридесять внуцы, ездящии на седмидесяти ослех: и суди израилеви осмь лет:
15 и умре авдон сын еллихов фарафонитин, и погребен бысть в фарафоне, в земли ефремли, в горе амаликове.
1 И приложиша еще сынове израилевы творити зло пред господем: и предаде я господь в руку филистимску четыредесять лет.
2 И бяше муж един от сараи, от племене данова, имя же ему маное: и жена ему бяше неплоды и не раждаше.
3 И явися ангел господень к жене и рече к ней: се, ты неплоды и не раждала еси, и зачнеши и родиши сына:
4 и ныне блюдися, и не пий вина и сикера, и не яждь всякаго нечистаго:
5 яко се, ты во утробе приимеши и родиши сына: и железо на главу его не взыдет, яко назорей богови будет сие отроча от чрева: и сей начнет спасати израиля из руки филистимли.
6 И вниде жена и рече мужу своему, глаголющи: человек божий прииде ко мне, и образ его яко образ ангела божия, страшен зело: и вопрошах его, откуду еси? и имене своего не поведа ми,
7 и рече мне: се, ты во утробе зачнеши и родиши сына: и ныне не пий вина, ни сикера, и не яждь всякаго нечистаго, яко назорей богу будет отрочищь от утробы даже до дне смерти своея.
8 И помолися маное ко господу и рече: во мне, господи, человек божий, егоже послал еси, да приидет еще к нам и наставит ны, что сотворим отрочати раждающемуся.
9 И послуша бог молитвы маноевы: и прииде паки ангел божий к жене, сия же седяше на селе, и маное муж ея не бяше с нею.
10 И потщася жена, и текши скоро поведа мужу своему, и рече к нему: се, явися мне муж, иже приходил в день он ко мне.
11 И востав иде маное вслед жены своея, и прииде к мужу и рече ему: ты ли еси муж глаголавый к жене (моей)? И рече ангел: аз.
12 И рече маное: ныне убо да приидет слово твое, кий будет суд отрочате, и что дела его?
13 И рече ангел господень к маною: от всех, яже глаголах к жене, да сохранится:
14 от всего, еже исходит из винограда, да не яст, и вина и сикера да не пиет, и всякаго нечистаго да не яст: и вся, елика заповедах ей, да хранит.
15 И рече маное ко ангелу господню: да удержимъ тя зде, и сотворим пред тобою козлище от коз.
16 И рече ангел господень к маною: аще мя понудиши, не буду ясти хлеба твоего: но аще сотвориши всесожжение господеви, то вознеси е. Не ведяше бо маное, яко ангел господень той.
17 И рече маное ко ангелу господню: что имя твое? да егда сбудется слово твое, прославимъ тя.
18 И рече ему ангел господень: почто сие вопрошаеши имене моего? и то есть чудно.
19 И взя маное козлища от коз и жертву, и вознесе на камень господеви чудная творящему: маное же и жена его зряста.
20 И бысть егда пламень взыде выше олтаря даже до небесе, и взыде ангел господень в пламени олтаря: маное же и жена его смотряста, и падоста лицем своим на землю.
21 И не приложи ктому ангел господень явитися маною и жене его. Тогда уведе маное, яко ангел господень есть.
22 И рече маное к жене своей: смертию умрем, яко бога видехом.
23 И рече ему жена его: аще бы хотелъ господь умертвити нас, не бы взял от рукъ наших всесожжения и жертвы, и не бы показалъ нам сих всех, и не бы слышана сия сотворилъ нам якоже ныне.
24 И роди жена сына, и нарече имя ему сампсон. И возмужа отроча, и благослови е господь:
25 и нача дух господень ходити с ним в полце данове, посреде сараи и посреде есфаола.
1 И сниде сампсон во фамнафу и виде жену во фамнафе от дщерей филистимских, и угодна бысть пред ним.
2 И взыде и поведа отцу своему и матери своей, и рече: жену видех во фамнафе от дщерей филистимских, и ныне поимите ю мне в жену.
3 И рече ему отец его и мати его: еда несть дщерей от братии твоея и от всехъ людий моих жены, яко ты идеши пояти жену от дщерей иноплеменников необрезанныхъ? И рече сампсон ко отцу своему: сию поими мне, яко та угодна есть пред очима моима.
4 отец же его и мати его не разумеша, яко сие от господа есть, яко отмщения онъ ищет от филистимлян: в то бо время владяху филистимляне сыны израилевыми.
5 И сниде сампсон и отец его и мати его во фамнафу, и приидоша до винограда фамнафа: и се, львичищь рыкающь во сретение ему.
6 И сниде на него дух господень, и растерза его яко козлища от коз, и ничтоже бяше в руку его: и не поведа отцу своему и матери своей, еже сотвори.
7 И поидоша и рекоша жене, и угодна бысть пред очима сампсона.
8 И возвратися по днех пояти ю, и обратися видети труп львов, и се, рой пчел во устехъ львовых и мед:
9 и изъя его от уст его в руце свои, и идяше идый и ядый: и пойде ко отцу своему и матери своей, и даде им, и ядоша: и не поведа им, яко от уст львовыхъ изъя сей мед.
10 И сниде отец его к жене, и сотвори сампсон тамо пир седмь дний, яко тако творят юноши:
11 и бысть внегда боятися им его, приставиша к нему тридесять другов, и быша с ним:
12 и рече им сампсон: предлагаю ныне вамъ гадание, и аще отгадающе поведите мне сие в седмь дний пира и обрящете, дам вам тридесять поняв и тридесять риз одежд:
13 аще же не возможете сие поведати мне, дадите вы мне тридесять поняв и тридесять риз изменных. И рекоша ему: предложи гадание твое, и услышимъ е.
14 И глагола им: от ядущаго ядомое изыде, и от крепкаго изыде сладкое. И не могоша поведати гадания до трех дний.
15 И бысть в день четвертый, и рекоша жене сампсонове: прельсти мужа своего, и да повесть тебе гадание, да не сожжем тя и дом отца твоего огнем: или оубожити призвасте ны?
16 И плакася жена сампсонова пред ним и рече: разве возненавидел еси мене и не возлюбил еси мене, яко гадания, еже еси предложил сыном людий моих, не поведалъ еси его мне. И рече ей сампсон: се, отцу моему и матери моей не поведахъ сего, и тебе ли повемъ?
17 И плакася пред ним седмь дний, в няже бе им пир. И бысть в день седмый, и поведа ей, яко стужи ему: и та поведа сыномъ людий своих.
18 И рекоша ему мужие градстии в день седмый прежде зашествия солнца: что слаждше меда? и что креплее льва? И рече им сампсон: аще не бысте орали юницею моею, не бысте уведали гадания моего.
19 И нападе на него дух господень, и сниде во аскалон, и изби тамо тридесять мужей, и взя ризы их, и даде ризы поведавшим гадание. И разгневася яростию сампсон, и взыде въ дом отца своего.
20 Жена же сампсонова иде за инаго мужа, иже бысть един от другов его.
1 И бысть по днех во дни жатвы пшеницы, и посети сампсон жену свою, несый козлище от коз, и рече: да вниду к жене моей в ложницу. И не даде ему отец ея внити.
2 И рече отец ея, глаголя: рех, яко ненавидя возненавидел еси ю, и отдахъ ю единому от другов твоих: не се ли сестра ея меншая добрейши ея есть? да будетъ тебе ныне вместо ея.
3 И рече ему сампсон: чист есмь ныне от филистимлян, яко сотворю аз с ними зло.
4 И пойде сампсон, и ят триста лисиц, и взя свещи, и связа ошиб ко ошибу, и устрои едину свещу между двема ошибома:
5 и разжже огнь в свещах, и пусти я в нивы филистимски: и запали нивы от гуменъ и даже до класов простых и до винограда и масличия.
6 И рекоша иноплеменницы: кто сотвори сия? И рекоша: сампсон зять фамнафеев, яко взя жену его и даде ю единому от друговъ его. И взыдоша иноплеменницы и сожгоша ю и дом отца ея огнем.
7 И рече им сампсон: аще и сотвористе вы тако ей, аз не благоизволю, но отмщение мое единому комуждо вас сотворю, и посемъ почию.
8 И порази их голени до бедр язвою велиею: и сниде, и вселися у водотечи в пещере камене итама.
9 И изыдоша филистимляне, и ополчишася во иуде, и разсеяшася в лехи.
10 И рече им всяк муж иудин: почто приидосте на ны? И рекоша иноплеменницы: связати сампсона приидохом и сотворити ему, якоже сотвори нам.
11 И снидоша три тысящи мужей от иуды к пещере камене итама и рекоша к сампсону: не веси ли, яко владеют нами филистимляне? и вскую сия сотворил еси намъ? И рече им сампсон: якоже ми сотвориша, тако сотворих им.
12 И рекоша ему: связати тебе приидохомъ и предати тя в руце иноплеменником. И рече им сампсон: кленитеся мне, да не убиете мене вы.
13 И рекоша ему, глаголюще: ни, но токмо соузом свяжем тя и предадим тя в руки их, смертию же не умертвим тебе. И связаша его двема ужы новыми и изведоша его от камене того.
14 И той прииде до челюсти: иноплеменницы же воскликнуша и текоша противу ему. И сниде на него дух господень, и быша ужя на мышцахъ его яко изгребие, егда зажжется огнем: и разрешишася узы его от руку его:
15 и обрете челюсть ослю повержену, и простре руку свою, и взя ю: и изби ею тысящу мужей.
16 И рече сампсон: челюстию ослею потребляя потребих их, яко челюстию ослею избихъ тысящу мужей.
17 И бысть егда преста глаголя, и поверже челюсть от руки своея: и нарече место тое [избиение челюстное].
18 И возжажда зело, и возопи ко господу, и рече: ты благоволил еси в руце раба твоего спасение великое сие, и ныне умираю жаждею, и впаду в руки необрезанных.
19 И разверзе бог язву на челюсти, и изыде из нея вода, и пи: и возвратися дух его, и оживе: сего ради прозвася имя ей [источникъ призывающаго], иже есть в челюсти, даже до дне сего.
20 И суди израилю во дни филистимлян двадесять лет.
1 И иде сампсон в газу, и виде тамо жену блудницу и вниде к ней.
2 И поведаша газяном, глаголюще: прииде сампсонъ семо. И обыдоша и подседоша ему всю нощь у врат градных, и утаишася всю нощь, глаголюще: дондеже осветает утро, и убиемъ его.
3 И спа сампсон до полунощи: и воста в полунощи, и восхити двери у врат града со обеими вереями, и подъя оныя с заворою, и возложи я на рамена своя, и вознесе я на верх горы, яже пред лицем хеврона, и положи их тамо.
4 И бысть по сем, и возлюби жену от водотечи сориховы: имя же ей далида.
5 И взыдоша к ней князи иноплеменничи и рекоша ей: прельсти его, и виждь, в чемъ есть крепость его великая, и чим преможемъ его, и свяжем его, яко смирити его: и мы тебе дадим кийждо тысящу и сто сребреников.
6 И рече далида к сампсону: повеждь ми ныне, в чем крепость твоя (тако) великая, и чимъ свяжешися и смиришися?
7 И рече ей сампсон: аще свяжут мя седмию тятивами сырыми неистлевшими, и изнемогу, и буду яко един от человек.
8 И принесоша ей князи от иноплеменникъ седмь тятив мокрых неистлевших, и связа его ими:
9 и подсада ему седяше в храмине. И рече ему: иноплеменницы на тя, сампсоне. И расторже тятивы, аки бы кто расторгнул соскание изгребий, егда коснется ему огнь: и не уведася крепость его.
10 И рече далида к сампсону: се, прельстилъ еси мя, глаголя ко мне лжу: ныне убо повеждь ми, чим свяжешися?
11 И рече к ней: аще вяжуще свяжут мя ужы новыми, имиже не делано, и изнемогу, и буду яко един от человек.
12 И взя далида ужы новы и связа его ими, и рече ему: иноплеменницы на тя, сампсоне. Подсада же седяше в храмине. И расторже я от руку своею аки нить.
13 И рече далида к сампсону: даже до ныне прельщал мя еси и глаголал ко мне лжу: повеждь ми убо, чим свяжешися? И рече ей: аще сплетеши седмь плениц влас главы моея спрядением и вбиеши колом в стену, и буду немощен яко един от человек.
14 И успи далида его на коленех своих, и бысть внегда уснути ему, взя далида седмь плениц влас главы его и сплете спрядениемъ и вонзе колом в стену, и рече: иноплеменницы на тя, сампсоне. И возбну от сна своего и исторже кол сплетением из стены, и не уведася крепость его.
15 И рече к нему далида: како глаголеши, возлюбихъ тя, и сердце твое несть со мною? се, третие прельстил еси мя, и не поведал еси мне, в чем крепость твоя великая.
16 И бысть егда стужи ему словесы своими по вся дни, и убеди его, и изнеможе даже до умертвия.
17 И поведа ей все сердце свое, и рече к ней: железо не взыде на главу мою, яко назорей есмь аз господу от утробы матере моея: аще убо обриюся, отступит от мене крепость моя, и изнемогу, и буду якоже вси человецы.
18 И виде далида, яко поведа ей все сердце свое, посла и призва князи иноплеменничи, глаголющи: взыдите еще единою, яко поведа ми все сердце свое. И взыдоша к ней вси князи иноплеменничи, и принесоша сребро в рукахъ своих.
19 И успи далида сампсона на коленехъ своих: и призва стригача, и остриже седмь плениц влас главы его: и нача смирятися, и отступи крепость его от него.
20 И рече далида: иноплеменницы на тя, сампсоне. И возбудися от сна своего и рече: изыду якоже и прежде, и отрясуся. И не разуме, яко господь отступи от него.
21 И яша его иноплеменницы, и избодоша ему очи, и введоша его в газу, и оковаша его путы медяны: и бяше меля в храмине темничней.
22 И начаша власы главы его расти по острижении.
23 И князи иноплеменничи собрашася пожрети жертву велику дагону богу своему и возвеселитися, и рекоша: предаде бог наш в руки наша сампсона врага нашего.
24 И видеша его людие, и похвалиша бога своего, яко реша: предаде бог наш в руки наша врага нашего, опустошившаго землю нашу, и иже умножи язвенных наших.
25 И бысть егда возблажа сердце их, и рекоша: призовите сампсона из дому темничнаго, и да играет пред нами. И призваша сампсона из дому темничнаго, и играше пред ними: и заушаху его, и поставиша его между столпы.
26 И рече сампсон ко юноши держащему его за руку: остави мене, да осяжу столпы, на нихже дом сей утвержден есть, и опруся на них. Юноша же сотвори тако.
27 Дом же бяше полн мужей и жен, и тамо вси князи иноплеменничи: на крове же томъ до трех тысящ мужей и жен, зряще ругаемаго сампсона.
28 И воззва сампсон ко господу и рече: адонаи господи, господи сил, помяни мя ныне, и укрепи мя еще единою, боже, да воздам мщение едино за два ока моя филистимом.
29 И объя сампсон оба столпа средния, на нихже храмина бяше утверждена, и опреся на них, держя един рукою десною, а другий левою.
30 И рече сампсон: да умрет душа моя со иноплеменники. И преклонися крепостию, и паде храмина на князи и на вся люди иже въ ней: и бысть мертвых, ихже умертви сампсонъ при смерти своей, множае неже ихже умертви в животе своем.
31 И снидоша братия его и весь дом отца его, и взяша его: и взыдоша, и погребоша его между сараи и между есфаолом во гробе маноя отца его. И сей суди израилю летъ двадесять. (И воста по сампсоне емегаръ сын енань, и уби от иноплеменниковъ шесть сот мужей кроме скота, и спасе и онъ израиля).
1 И бысть муж от горы ефремли, и имя ему миха:
2 и рече матери своей: тысяща и сто сребрениковъ иже украдены у тебе, и заклинала мя еси и глаголала еси во уши мои: се, сребро у мене, аз взях е. И рече мати его: благословен сын мой господеви.
3 И отдаде тысящу и сто сребреников матери своей. И рече мати его: освящающи освятихъ сребро господеви от руки моея, тебе сынови моему сотворити (кумиръ) изваян и слиян, и ныне отдам е тебе.
4 И отдаде сребро матери своей. И взя мати его двести сребреников и даде их среброделю, и сотвори тое (кумиръ) изваян и слиян: и бысть в дому михи.
5 И дом михин ему дом божий. И сотвори ефуд Греч.: епомис, славен.: нарамник. и ферафин идоли: и наполни руку единому от сынов своих, и бысть ему жрец.
6 В тыя же дни не бяше царя во израили: кийждо муж, еже право видяшеся пред очима его, творяше.
7 И бысть юноша от вифлеема иудина и от рода племене иудина, и сей левитин, и обиташе тамо:
8 и пойде сей муж от града вифлеема иудина обитати, идеже обрящет место: и прииде до горы ефремли и даже до дому михина, еже сотворити путь свой.
9 И рече ему миха: откуду идеши? И рече ему левитин: аз есмь от вифлеема иудина, и иду обитати, идеже обрящу место.
10 И рече ему миха: седи со мною и буди ми отец и жрец, и аз дам тебе сребрениковъ десять в год и двои ризы, и яже на житие тебе.
11 И пойде левит, и нача обитати у мужа. И бысть юноша ему яко един от сыновъ его.
12 И наполни миха руку левитину, и бысть ему юноша жрец, и бяше в дому михи.
13 И рече миха: ныне уведех, яко благосотворитъ мне господь, яко бысть мне левитин жрец.
1 В тыя дни не бяше царя во израили: и в тыя дни племя даново искаше себе наследия вселитися, яко не паде ему наследие до дний оныхъ среде племен сынов израилевых.
2 И послаша сынове дановы от сонмов своихъ пять мужей от части своея, мужы сильны от сараи и есфаола, соглядати землю и изследити ю, и рекоша к ним: идите и изследите землю. И приидоша до горы ефремли, до дому михина, и сташа тамо в дому михи.
3 И тии познаша глас юноши левитина, и уклонишася тамо, и рекоша ему: кто тя приведе семо? и что твориши в месте семъ? и что тебе зде?
4 И рече им: сице и сице сотвори мне миха, и ная мя, и бых ему жрец.
5 И рекоша ему: вопроси убо бога, и увемы, аще благопоспешится путь наш, в оньже мы идем.
6 И рече им жрец: идите с миром: предъ господем путь ваш, в оньже идете.
7 И идоша пять мужие и приидоша в лаис: и видеша людий живущих в нем, седящих со упованием по обычаю сидонян, в тишине и надежде, и не бе устрашаяй, или посрамляяй словесе на земли, наследник истязуяй сокровища: зане далече бяху от сидонян, и не имяху словесе с киим либо человеком.
8 И приидоша пять мужей ко братии своей в сараю и есфаол и рекоша братии своей: что вы седите?
9 И реша: востаните, и взыдем на ня, зане видехом землю, и се, блага зело, и вы молчите: не обленитеся ити и внити еже наследити землю:
10 и егда приидете, внидете в люди живущия со упованием, а земля пространна: яко предаде ю бог в руки ваша, место на немже несть скудости во всем еже на земли.
11 И воздвигошася оттуду от племене данова, от сараи и есфаола, шесть сот мужей препоясани во оружие ополчения,
12 и взыдоша и ополчишася в кариафиариме во иуде: сего ради наречеся место то [полкъ дановъ] и до сего дне: се созади кариафиарима.
13 И преидоша оттуду в гору ефремлю и приидоша до дому михина.
14 И отвещаша пять мужей ходившии соглядати землю лаис и рекоша ко братии своей: разуместе ли, яко есть в дому сем ефуд и ферафин, и изваяно и слияно? и ныне уведите, что сотворите.
15 И уклонишася тамо и внидоша в дом юноши левитина, в дом михин, и вопросиша его в мире.
16 И шесть сот мужей препоясани во оружие ополчения своего, стояще у дверий вратных, иже от сынов дановых.
17 И взыдоша пять мужей ходивших соглядати землю: и вшедше тамо взяша изваяно, и ефудъ и ферафин, и слияное: жрец же стояше у дверий вратных, и шесть сот мужей препоясани во оружие воинско:
18 и сии внидоша в дом михин и взяша ефудъ и ферафин, и слияно и изваяно. И рече къ ним жрец: что вы творите?
19 И реша ему: умолчи, положи руку твою на уста твоя и пойди с нами, и буди намъ отец и жрец: еда уне есть тебе быти жерцу единаго мужа дому, нежели быти жерцу племени и дому и сонма израилева?
20 И возблажа сердце жреческо, и взя ефудъ и ферафин, и изваяное и слияное, и вниде посреде людий.
21 И возвратишася и отидоша, и пустиша предъ собою чада и притяжание свое честное.
22 удалившимся же им от дому михина, и се, миха и мужие иже в жилищах, яже съ домом михиным быша, воззваша и постигоша сыны дановы,
23 и возопиша к сыном дановым: и обратиша сынове дановы лица своя и реша к михе: что есть тебе, яко воззвал еси?
24 И рече миха: яко изваяное мое, еже сотворих, взясте, и жерца, и поидосте: и что мне еще? и что сие глаголете мне: что вопиеши?
25 И рекоша ему сынове дановы: да не услышится ныне глас твой вслед нас, да не востанутъ на вы мужие лютою душею, и положиши душу твою и душу дому твоего.
26 И идоша сынове дановы в путь свой. И виде миха, яко сильнейшии суть паче его, и возвратися в дом свой.
27 И сынове дановы взяша, елика сотвори миха, и жерца, иже бяше у него, и приидоша въ лаис, к людем молчащим и уповающим надеждею, и избиша их острием меча, и град сожгоша огнем:
28 и не бяше избавляяй, яко далече бяху от сидонян, и словесе не бяше им с человеком: и сей (град бысть) во удолии дому роовля: и соградиша град и вселишася в нем,
29 и нарекоша граду имя [данъ], во имя дана отца своего, иже родися израилю: и бяше прежде имя граду [лаисъ].
30 И поставиша себе сынове дановы изваяное: ионафан же сын гирсонь сын манассиин, той и сынове его бяху жерцы племени данову до дне преселения земли:
31 и поставиша себе изваяное, еже сотвори миха, во вся дни, в няже бяше дом божий въ силоме.
1 И бысть в тыя дни не бяше царя во израили: и бысть муж левитин живый во стране горы ефремовы, и поя себе жену подложницу от вифлеема иудина:
2 и разгневася нань подложница его, и отиде от него в дом отца своего в вифлеем иудин, и бе тамо четыри месяцы:
3 и воста муж ея и иде вслед ея глаголати в сердце ея, обратити ю к себе и привести паки к себе: и отрок его с ним, и двое ослят: она же введе его в дом отца своего:
4 и виде его отец отроковицы и изыде с веселием во сретение его, и удержа его тесть его отец отроковицы, и пребысть с ним три дни, и ядоша и пиша, и спаша тамо.
5 И бысть в день четвертый, и обутреша заутра, и воста поити. И рече отец отроковицы к зятю своему: укрепи сердце твое укрухомъ хлеба, и по сем пойдете.
6 И седоша, и ядоша оба вкупе и пиша. И рече отец отроковицы к мужу: иди ныне и преспи, и возблажает сердце твое.
7 И воста муж поити: и понуди его тесть его, и седе, и пребысть тамо.
8 И воста рано в пятый день да идет. И рече отец отроковицы: укрепи убо сердце твое хлебом, и пребуди дондеже преклонится день. И ядоша и пиша оба.
9 И воста муж да идет сам и подложница его и отрок его. И рече ему тесть его отец отроковицы: се, уже преклонися день к вечеру, пребуди зде, и возблажает сердце твое, и обутреете утро в путь ваш, и отидеши в селение свое.
10 И не изволи муж пребыти, и воста и отиде: и прииде даже прямо иевусу, сей есть иерусалим, и с ним двое ослят с бремены, и подложница его с ним.
11 И приидоша до иевуса, и день преклонися к вечеру зело: и рече отрок ко господину своему: гряди убо, да уклонимся во градъ сей иевус и пребудем в нем.
12 И рече к нему господин его: не уклонимся во град чуждь, в немже несть от сынов израилевых, но прейдем до гаваона.
13 И рече ко отроку своему: гряди, да приступимъ ко единому от мест гаваонских и пребудемъ в гаваоне или в раме.
14 И минуша, и идоша, и зайде им солнце близ гаваона, иже есть вениаминь:
15 и уклонишася тамо внити превитати в гаваоне, и внидоша и седоша на стогнах града: и не бе муж вводяй их в дом превитати.
16 И се, муж стар идяше с дела своего из поля в вечер, и сей муж от горы ефремли, и той обиташе в гаваоне: и мужие места сынове вениамини.
17 И возвед очи свои, виде мужа путника на стогнах градных, и рече муж старец: камо идеши и откуду грядеши?
18 И рече к нему: грядем мы от вифлеема иудина даже до стран горы ефремли, отонудуже азъ есмь: и ходих до вифлеема иудина, и иду аз в дом мой: и несть мужа вводящаго мя в дом:
19 а плевы и пища ослятом нашим есть, и мне хлеб и вино есть, и отроковице и отроку: рабом твоим несть скудно ни коея вещи.
20 И рече муж стар: мир тебе: и весь недостатокъ твой на мне, обаче на стогнах не лязи.
21 И введе его в дом свой, и даде место ослятом его: и омыша ноги своя, и ядоша и пиша.
22 егда же возвеселися сердце их, и се, мужие градстии сынове беззаконников обыдоша дом биюще в двери, и реша мужу господину дому старцу, глаголюще: изведи мужа иже вниде в дом твой, да познаем его.
23 И изыде к ним муж господин дому и рече: ни, братия, не сотворите зла мужу сему повнегда внити ему в дом мой, и не сотворите безумия сего:
24 се, дщерь моя дева, и подложница его: изведу их, и смирите их, и сотворите имъ еже благо пред очима вашима: а мужу сему не сотворите словесе безумия сего.
25 И не изволиша мужие послушати его. И взя муж подложницу его и изведе ю к нимъ вон: и познаша ю и ругашася над нею всю нощь даже до утра, и отпустиша ю, егда взыде денница.
26 И прииде жена к заутрию, и паде у дверий дому, идеже бяше муж ея, до разсветания.
27 И воста муж ея заутра, и отверзе двери дому и изыде поити в путь свой: и се, жена его подложница лежаше при дверех дому, и руце ея на преддверии.
28 И рече к ней: востани, да идем. И не отвеща ему, бяше бо мертва. И возложи ю на осля, и воста муж и пойде на место свое.
29 И прииде в дом свой, и взя нож, и взя подложницу свою, и раздроби ю по удесемъ ея на дванадесять частей, и посла я во вся племена израилева.
30 И бысть всяк видящий глаголаше: не бысть, ни видено бе сице от дне изшествия сыновъ израилевых от земли египетския даже до дне сего. И заповеда мужем, ихже посла, глаголя: сице глаголите ко всему израилю: аще бысть по словеси сему? уставите сами себе о ней совет и глаголите.
1 И изыдоша вси сынове израилевы, и собрашася весь сонм яко един муж, от дана и до вирсавии, и земля галаадска к господеви в массифу,
2 и сташа пред лицем господним вся племена израилева в сонме людий божиих, четыреста тысящъ мужей пеших воздвизающих оружия.
3 И услышаша сынове вениамини, яко взыдоша сынове израилевы в массифу, и рекоша сынове израилевы: глаголите, где бысть злоба сия?
4 И отвеща муж левитин, муж жены умореныя, глаголя: в гаваон вениаминь приидох аз и подложница моя витати:
5 и восташа на мя мужие гаваонстии и обыдоша мя во дворе нощию, и хотеша мя убити, и подложницу мою обидеша и обругаша, и умре:
6 и взях подложницу мою и раздробих ю, и послах ю во вся пределы наследия израилева, яко сотвориша безумие во израили:
7 се, вси вы сынове израилевы, дадите себе слово и совет зде.
8 И восташа вси людие яко един муж, глаголюще: не отидет муж в селение свое, и не возвратится муж в дом свой:
9 и ныне слово сие, еже сотворим гаваону: взыдем на него по жребию,
10 токмо возмем по десяти мужей от ста во всехъ племенех израилевых, и сто от тысящи, и тысяща от тмы, взяти брашно людем исходящим в гаваю вениаминю, сотворити ему по всему согрешению, еже сотвори во израили.
11 И собрашася вси мужие израилевы ко граду, яко един муж из градов исходяще,
12 и послаша племена израилева мужей во все племя вениамине, глаголюще: кая злоба сия бывшая в васъ?
13 и ныне дадите мужей беззаконных, иже въ гаваи, сынов велиаловых, и умертвим их, и очистим зло от израиля. И не изволиша сынове вениамини послушати гласа братии своея сыновъ израилевых.
14 И собрашася сынове вениамини от градов своихъ в гаваю, изыти на брань к сыном израилевым.
15 И сочтошася сынове вениамини от градов въ той день двадесять и пять тысящ мужей воздвизающихъ оружия, кроме живущих в гаваи:
16 ихже сочтеся седмь сот мужей избранныхъ от всех людий ободесноручных: сии вси пращницы мещуще камение ко власу и не погрешающе.
17 И всех мужей израилевых сочтеся, кроме сынов вениаминовых, четыреста тысящ мужей воздвизающихъ оружие: вси сии мужие воини.
18 И восташа, и взыдоша в вефиль, и вопросиша бога, и рекоша сынове израилевы: кто от насъ взыдет в начале воевати на сыны вениамини? И рече господь: иуда в начале да взыдет вождь.
19 И восташа сынове израилевы заутра и ополчишася на гаваю.
20 И изыде всяк муж израилев на брань с вениамином, и сразишася с ними мужие израилевы на брани у гаваи.
21 И изыдоша сынове вениаминовы из гаваи, и избиша во израили в той день двадесять две тысящи мужей на земли.
22 И укрепися всяк муж израилев, и приложиша снитися на брань на место, идеже снидошася в день первый.
23 И взыдоша сынове израилевы и плакашася предъ господем до вечера, и вопросиша господа, глаголюще: аще приложим еще приступити на брань к сыномъ вениаминим братиям нашимъ? И рече господь: взыдите к ним.
24 И приидоша сынове израилевы к сыном вениаминимъ в день вторый.
25 И изыдоша сынове вениамини противу имъ от гаваи в день вторый, и избиша еще от сынов израилевых осмьнадесять тысящ мужей на земли: сии вси воздвизающии оружие.
26 И взыдоша вси сынове израилевы и вси людие, и приидоша в вефиль, и плакашася, и седоша тамо пред господем, и постишася в той день даже до вечера:
27 и вознесоша всесожжение спасения пред господем, яко тамо кивот завета господа бога во дни оны,
28 и финеес сын елеазара сына аароня предстоя пред ним в тыя дни. И вопросиша сынове израилевы господа, глаголюще: аще приложим взыти еще на брань к сыном вениаминим братиям нашим, или оставимъ? И рече господь: взыдите, заутра предам их в руки ваша.
29 И поставиша сынове израилевы подсаду окрестъ гаваи.
30 И взыдоша сынове израилевы к сыном вениаминимъ в день третий: и ополчишася на гаваю яко единою и единою.
31 И изыдоша сынове вениамини противу людемъ и протягошася из града, и начаша убивати людий уязвленых, якоже первое и второе на путех, от нихже есть един сходяй въ вефиль, а другий в гаваю на селе, яко тридесять мужей во израили.
32 И рекоша сынове вениамини: падают предъ нами якоже и прежде. И сынове израилевы рекоша: побежим и отторгнем их от града на пути. И сотвориша тако.
33 И вси мужие израилевы восташа от места своего и снидошася в ваалъ-фамаре: подсада же израилева нахождаше от места своего от запада гаваи.
34 И приидоша противу гаваи десять тысящ мужей избранных от всего израиля, и брань бяше тяжка: и тии не разумеша, яко постизает их зло.
35 И порази господь вениамина пред сыны израилевыми: и избиша сынове израилевы от вениамина в той день двадесять пять тысящ и сто мужей: сии вси воздвизаху оружие.
36 И видеша сынове вениамини, яко поражени суть. И даша место сынове израилевы вениамину, понеже уповаша на подсаду, юже подсадиша у гаваи:
37 и подвижеся подсада, и устремися на гаваю, и избиша весь град острием меча.
38 И израильтяне имяху знамение с подсадою брани, явити знамение дыма из града.
39 И возвратися израиль на брань, и вениаминъ нача убивати язвеных во израили до тридесяти мужей, яко рекоша: паки падением падают предъ нами, якоже и первая брань.
40 И знамение взыде наипаче над градом, аки столп дыма: и озреся вениамин вспять, и се, взыде скончание града до небеси.
41 И муж израилев возвратися: и потщашася мужие вениамини, видеша бо, яко постиже их зло,
42 и побегоша пред сыны израилевыми на путь пустыни, брань же постиже их, и иже изъ градов избиваша их среде себе:
43 и побиваху вениамина, и гнаша его от нуа вслед его до гаваи без опочивания, и поразиша его даже противу гаваи на востокъ солнца.
44 И падоша от вениамина осмьнадесять тысящъ мужей, сии вси мужие сильнии.
45 И озрешася оставшии, и побегоша в пустыню к каменю реммоню: и пожаша от них сынове израилевы по стезям яко стеблие пять тысящ мужей, и гнаша вслед их до гадаама и избиша от них две тысящи мужей.
46 И бысть всех падших от вениамина в той день двадесять пять тысящ мужей воздвизающихъ оружие, вси сии мужие сильнии.
47 И озрешася оставшии, и вбегоша в пустыню к каменю реммоню шесть сот мужей, и седеша в камени реммони четыри месяцы.
48 Сынове же израилевы возвратишася к сыномъ вениаминим, и избиша я оружием от града вне, даже и до скота, и все еже обретеся во всех градех, и грады вся обретшияся пожгоша огнем.
1 И сынове израилевы кляшася в массифе, глаголюще: муж от нас да не даст вениамину дщере своея в жену.
2 И приидоша людие в вефиль и седеша тамо до вечера пред богом: и воздвигоша глас свой, и плакашася плачем велиим, и рекоша:
3 вскую, господи боже израилев, бысть сице днесь во израили, еже оскудети от израиля племени единому?
4 И бысть на утрия, и обутреша людие, и соградиша тамо олтарь, и вознесоша всесожжение спасения, и рекоша сынове израилевы:
5 кто не взыде в сонм от всех племен израилевыхъ ко господу? яко велика клятва бяше не вшедшимъ ко господу в массифу, глаголюще: смертию да умрет.
6 И умилишася сынове израилевы о вениамине брате своем, и рекоша: изсечено днесь едино племя от израиля:
7 что сотворим оставшимся о женахъ? и мы кляхомся господем не дати им от дщерей нашихъ в жены.
8 И рекоша: кто един от племен израилевых, иже не взыде ко господу в массифу? И се, ни единъ прииде в полк от иависа галаадова в сонм.
9 И соглядаша людий, и се, не бяше тамо мужа от живущих во иависе галаадове.
10 И послаша тамо сонм дванадесять тысящ мужей от сынов силы и заповедаша им, глаголюще: идите и избийте живущия во иависе галаадове оружием жены и народы:
11 и сие сотворите: всяк мужеский пол и всяку жену, познавшую ложе мужеско, побиете: девицы же снабдите. И сотвориша тако.
12 И обретоша от живущих во иависе галаадове четыре ста отроковиц дев, яже не познаша ложа мужеска: и приведоша я в полк в силом, иже есть в земли ханаани.
13 И послаша весь сонм и глаголаша к сыномъ вениаминовым, иже в камени реммони, и призваша их с миром.
14 И возвратися вениамин к сыном израилевымъ в то время, и даша им сынове израилевы жены, яже живо сохраниша от дщерей иависа галаадова: и угодно бысть им тако.
15 И людие умилишася о вениамине, яко сотвори господь истребление в племенех израилевых.
16 И рекоша старейшины сонма: что сотворимъ оставшим о женахъ? яко погибе от вениамина жена:
17 и како будет наследие уцелевших от вениамина, да не погибнет племя от израиля?
18 и мы не возможем дати им жен от дщерей наших, яко кляшася сынове израилевы, глаголюще: проклят даяй жену вениамину.
19 И рекоша: се, праздник господень в силоме от дний во дни, иже есть от севера вефиля, на восток солнца на пути восходящем от вефиля в сихем, и от юга левоны.
20 И заповедаша сыном вениаминим, глаголюще: идите и засядите в виноградех,
21 и узрите, и се, егда изыдут дщери живущих в силоме плясати в лики, да изыдете из виноградов и восхитите муж жену себе от дщерей силомлих, и идите на землю вениаминю:
22 и будет егда приидут отцы их или братия их судитися к нам, и речем им: помилуйте нас ими, яко не взя муж жены своея в полце: понеже вы не дали есте имъ яко жребий, согрешисте.
23 И сотвориша тако сынове вениамини, и пояша жены по числу своему от пляшущих, яже восхитиша: и отидоша и возвратишася в наследие свое, и создаша грады и вселишася в них.
24 И отидоша оттуду сынове израилевы в то время, муж во племя свое и в род свой: и изыде оттуду муж в наследие свое. И в тыя дни не бяше царя во израили: муж еже угодно пред очима его, творяше.
Конец книзе судий исраилевых: имать в себе глав 22.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>