Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: 1-е Соборное послание св. ап. Иоанна Богослова
(шрифт на основе старой кириллицы)
На церковно-славянском языке гражданским шрифтом
1 Еже бе исперва, еже слышахом, еже видехом очима нашима, еже узрехом, и руки наша осязаша, о словеси животнем:
2 и живот явися, и видехом, и свидетелствуем, и возвещаем вам живот вечный, иже бе у отца и явися нам:
3 еже видехом и слышахом, поведаем вам, да и вы общение имате с нами: общение же наше со отцем и с сыном его иисусомъ христом.
4 И сия пишем вам, да радость ваша будетъ исполнена.
5 И сие есть обетование, еже слышахомъ от него и поведаем вам, яко бог светъ есть, и тмы в нем несть ни единыя.
6 (Зачало 69) Аще речем, яко общение имамы с ним, и во тме ходим, лжем и не творимъ истины:
7 аще же во свете ходим, якоже сам той есть во свете, общение имамы друг ко другу, и кровь иисуса христа сына его очищаетъ нас от всякаго греха.
8 Аще речем, яко греха не имамы, себе прельщаем, и истины несть в нас.
9 Аще исповедаем грехи наша, верен есть и праведн, да оставит нам грехи наша и очиститъ нас от всякия неправды.
10 Аще речем, яко не согрешихом, лжа творимъ его, и слово его несть в нас.
1 Чадца моя, сия пишу вам, да не согрешаете: и аще кто согрешит, ходатая имамы ко отцу, иисуса христа праведника:
2 и той очищение есть о гресех наших, не о наших же точию, но и о всего мира.
3 И о сем разумеем, яко познахом его, аще заповеди его соблюдаем.
4 Глаголяй, яко познах его, и заповеди его не соблюдает, ложь есть, и в семъ истины несть:
5 а иже аще соблюдает слово его, поистинне в сем любы божия совершенна есть: о семъ разумеем, яко в нем есмы.
6 Глаголяй, в нем пребывати, должен есть, якоже он ходил есть, и сей такожде да ходит.
7 (Зачало 70) Возлюбленнии, не заповедь нову пишу вам, но заповедь ветху, юже иместе исперва. Заповедь ветха есть слово, еже слышасте исперва.
8 Паки заповедь нову пишу вам, еже есть поистинне в нем и в вас: яко тма мимоходитъ и свет истинный сей уже сияет.
9 Глаголяй себе во свете быти, а брата своего ненавидяй, во тме есть доселе.
10 Любяй брата своего во свете пребывает, и соблазна в нем несть.
11 А ненавидяй брата своего во тме есть, и во тме ходит, и не весть, камо идет, яко тма ослепи очи ему.
12 Пишу вам, чадца, яко оставляются вамъ греси имене его ради.
13 Пишу вам, отцы, яко познасте безначалнаго. Пишу вам, юноши, яко победисте лукаваго. Пишу вам, дети, яко познасте отца.
14 Писах вам, отцы, яко познасте исконнаго: писах вам, юноши, яко крепцы есте, и слово божие в вас пребывает, и победисте лукаваго.
15 Не любите мира, ни яже в мире: аще кто любит мир, несть любве отчи в нем:
16 яко все, еже в мире, похоть плотская и похоть очима и гордость житейская, несть от отца, но от мира сего есть.
17 И мир преходит, и похоть его, а творяй волю божию пребывает во веки.
18 (Зачало 71) Дети, последняя година есть. И якоже слышасте, яко антихрист грядет, и ныне антихристи мнози быша, от сего разумеваем, яко последний час есть.
19 от нас изыдоша, но не беша от нас: аще бы от нас были, пребыли убо быша с нами: но да явятся, яко не суть вси от нас.
20 И вы помазание имате от святаго, и весте вся.
21 Не писах вам, яко не весте истины, но яко весте ю и яко всяка лжа от истины несть.
22 Кто есть лживый, точию отметаяйся, яко иисус несть христосъ? Сей есть антихрист, отметаяйся отца и сына.
23 Всяк отметаяйся сына, ни отца имать: а исповедаяй сына, и отца имать.
24 Вы убо еже слышасте исперва, в васъ да пребывает: (и) аще в вас пребудет, еже исперва слышасте, и вы в сыне и отце пребудете.
25 И сие есть обетование, еже сам обеща нам, живот вечный.
26 Сия писах вам о льстящих вас.
27 И вы еже помазание приясте от него, въ вас пребывает, и не требуете, да кто учитъ вы: но яко то само помазание учит вы о всем, и истинно есть, и несть ложно: и якоже научи вас, пребывайте в нем.
28 И ныне, чадца, пребывайте в нем, да егда явится, имамы дерзновение и не посрамимся от него в пришествии его.
29 Аще весте, яко праведник есть, разумейте, яко всяк творяй правду от него родися.
1 Видите, какову любовь дал есть отец нам, да чада божия наречемся, и будем. Сего ради мир не знает нас, зане не позна его.
2 Возлюбленнии, ныне чада божия есмы, и не у явися, что будем: вемы же, яко, егда явится, подобни ему будем, ибо узримъ его, якоже есть.
3 И всяк имеяй надежду сию нань, очищаетъ себе, якоже он чист есть.
4 Всяк творяй грех, и беззаконие творит: и грех есть беззаконие.
5 И весте, яко он явися, да грехи наша возмет, и греха в нем несть.
6 Всяк, иже в нем пребывает, не согрешает: всяк согрешаяй не виде его, ни позна его.
7 Чадца, никтоже да льстит вас. Творяй правду праведник есть, якоже он праведн есть.
8 Творяй грех от диавола есть, яко исперва диавол согрешает. Сего ради явися сын божий да разрушит дела диаволя.
9 Всяк рожденный от бога греха не творит, яко семя его в нем пребывает: и не можетъ согрешати, яко от бога рожден есть.
10 Сего ради явлена суть чада божия и чада диаволя: (Зачало 72) всяк не творяй правды несть от бога, и не любяй брата своего.
11 яко се есть завещание, еже слышасте исперва, да любим друг друга,
12 не якоже каин от лукаваго бе и закла брата своего. И за кую вину закла его? яко дела его лукава беша, а брата его праведна.
13 Не чудитеся, братие моя, аще ненавидит васъ мир.
14 Мы вемы, яко преидохом от смерти в живот, яко любим братию: не любяй бо брата пребываетъ в смерти.
15 Всяк ненавидяй брата своего человекоубийца есть: и весте, яко всяк человекоубийца не имать живота вечнаго в себе пребывающа.
16 о сем познахом любовь, яко он по нас душу свою положи: и мы должни есмы по братии души полагати.
17 Иже убо имать богатство мира сего, и видит брата своего требующа, и затворитъ утробу свою от него, како любы божия пребываетъ в немъ?
18 Чадца моя, не любим словом ниже языком, но делом и истиною.
19 И о сем разумеем, яко от истины есмы, и пред ним смиряем сердца наша:
20 зане аще зазирает нам сердце наше, яко болий есть бог сердца нашего и весть вся.
21 (Зачало 73) Возлюбленнии, аще сердце наше не зазрит нам, дерзновение имамы к богу,
22 и егоже аще просим, приемлем от него, яко заповеди его соблюдаем и угодная пред ним творим.
23 И сия есть заповедь его, да веруемъ во имя сына его иисуса христа и любим другъ друга, якоже дал есть заповедь нам.
24 И соблюдаяй заповеди его в нем пребывает, и той в нем. И о сем разумеем, яко пребываетъ в нас, от духа, егоже дал есть нам.
1 Возлюбленнии, не всякому духу веруйте, но искушайте духи, аще от бога суть: яко мнози лжепророцы изыдоша в мир.
2 о сем познавайте духа божия и духа лестча: всяк дух, иже исповедует иисуса христа во плоти пришедша, от бога есть:
3 и всяк дух, иже не исповедует иисуса христа во плоти пришедша, от бога несть: и сей есть антихристов, егоже слышасте, яко грядет, и ныне в мире есть уже.
4 Вы от бога есте, чадца, и победисте тех: яко болий есть иже в вас, нежели иже в мире.
5 они от мира суть: сего ради от мира глаголют, и мир тех послушает.
6 Мы от бога есмы: иже знает бога, послушаетъ нас, и иже несть от бога, не послушает нас. о сем познаваем духа истины и духа лестча.
7 Возлюбленнии, возлюбим друг друга, яко любы от бога есть, и всяк любяй от бога рожден есть, и знает бога:
8 а не любяй не позна бога, яко бог любы есть.
9 о сем явися любы божия в нас, яко сына своего единороднаго посла бог в мир, да живи будем им.
10 о сем есть любы, не яко мы возлюбихомъ бога, но яко той возлюби нас, и посла сына своего очищение о гресех наших.
11 Возлюбленнии, аще сице возлюбил есть нас бог, и мы должни есмы друг друга любити.
12 бога никтоже нигдеже виде. Аще другъ друга любим, бог в нас пребывает, и любы его совершенна есть в нас.
13 о сем разумеем, яко в нем пребываем, и той в нас, яко от духа своего дал есть нам.
14 И мы видехом и свидетелствуем, яко отец посла сына спасителя миру.
15 Иже аще исповесть, яко иисус есть сын божий, бог в нем пребывает, и той в бозе.
16 И мы познахом и веровахом любовь, юже имать бог к нам. бог любы есть, и пребываяй в любви в бозе пребывает, и бог в нем пребывает.
17 о сем совершается любы с нами, да дерзновение имамы в день судный, зане, якоже он есть, и мы есмы в мире сем.
18 Страха несть в любви, но совершенна любы вон изгоняет страх, яко страх муку имать: бояйся же не совершися в любви.
19 Мы любим его, яко той первее возлюбилъ есть нас.
20 (Зачало 74) Аще кто речет, яко люблю бога, а брата своего ненавидит, ложь есть: ибо не любяй брата своего, егоже виде, бога, егоже не виде, како может любити?
21 И сию заповедь имамы от него, да любяй бога любит и брата своего.
1 Всяк веруяй, яко иисус есть христос, от бога рожден есть: и всяк любяй рождшаго любит и рожденнаго от него.
2 о сем вемы, яко любим чада божия, егда бога любим и заповеди его соблюдаем.
3 Сия бо есть любы божия, да заповеди его соблюдаем: и заповеди его тяжки не суть.
4 яко всяк рожденный от бога побеждает мир: и сия есть победа, победившая мир, вера наша.
5 Кто есть побеждаяй мир, токмо веруяй, яко иисус есть сын божий?
6 Сей есть пришедый водою и кровию и духом, иисус христос, не водою точию, но водою и кровию: и дух есть свидетелствуяй, яко дух есть истина.
7 яко трие суть свидетелствующии на небеси, отец, слово и святый дух: и сии три едино суть.
8 И трие суть свидетелствующии на земли, духъ и вода и кровь: и трие во едино суть.
9 Аще свидетелство человеческое приемлем, свидетелство божие более есть: яко сие есть свидетелство божие, еже свидетелствова о сыне своем.
10 Веруяй в сына божия имать свидетелство въ себе: не веруяй богови лжа сотворил есть его, яко не верова во свидетелство, еже свидетелствова бог о сыне своем.
11 И сие есть свидетелство, яко животъ вечный дал есть нам бог, и сей животъ в сыне его есть.
12 Имеяй сына божия имать живот: а не имеяй сына божия живота не имать.
13 Сия писах вам верующим во имя сына божия, да весте, яко живот вечный имате, и да веруете во имя сына божия.
14 И сие есть дерзновение, еже имамы к нему, яко аще чесо просим по воли его, послушает нас:
15 и аще вемы, яко послушает нас, еже аще просим, вемы, яко имамы прошения, ихже просихом от него.
16 Аще кто узрит брата своего согрешающа грех не к смерти, да просит, и даст ему живот, согрешающим не к смерти. есть грехъ к смерти: не о том, глаголю, да молится.
17 Всяка неправда грех есть, и есть грех не к смерти.
18 Вемы, яко всяк рожденный от бога не согрешает: но рожденный от бога блюдет себе, и лукавый не прикасается ему.
19 Вемы, яко от бога есмы, и мир весь во зле лежит.
20 Вемы же, яко сын божий прииде и дал есть нам (свет и) разум, да познаем бога истиннаго и да будем во истиннем сыне его иисусе христе: сей есть истинный бог и животъ вечный.
21 Чадца, храните себе от треб идолских. Аминь.
Конец соборному посланию иоаннову первому: имать в себе глав 5, зачал же церковных 7.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>