Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: 3-я книга Ездры
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16
1 Книга ездры пророка вторая, сына сараиева, сына азариева, сына елкиева, сына саданиева, сына садокова, сына ахитова,
2 сына ахиева, сына финеесова, сына елиева, сына америева, сына асиелева, сына маримофова, сына арнаева, сына озиева, сына ворифова, сына ависеева, сына финеесова, сына елеазарова,
3 сына ааронова от колена левиина, иже бысть юзником в земли мидстей, в царство артаксеркса царя персскаго.
4 И бысть слово Господне ко мне, сице глаголющее:
5 иди и возвести людем моим злая дела их и сыном их лукавствия, яже противу мене сотвориша, да возвестят сыном сыновъ своих,
6 яко греси родителей их возрастоша в них, забывше бо мене, пожроша богом чуждим:
7 еда не аз изведох их из земли египетския из дому работы? тии же прогневаша мя и советы моя уничижиша:
8 ты же остризи власы главы твоея и верзи на них вся злая, понеже не послушаша закона моего, людие суть ненаказанни:
9 доколе терплю им, имже толикая благодеяния сотворих?
10 низложих ради их множество царей и поразихъ фараона с людьми его и со всеми вои его:
11 вся языки от лица их погубих, и на востоце двух стран людий, тирских и сидонских, разсыпах, и побих всех врагов их.
12 Ты же глаголи к ним сице: тако глаголет Господь:
13 аз вы преведох сквозе море и уготовахъ вам путь благ из начала, дах вам моисеа вожда и аарона во иереа,
14 дах вам свет во столпе огнене и сотворих в вас чудеса велия: вы же мене забысте, рече Господь.
15 Тако глаголет Господь вседержитель: крастеле быша вам во знамение, дах вам полки в защищение, вы же и тамо роптасте
16 и не радовастеся о имени моем, о победе врагов ваших, но роптасте даже и доныне:
17 где суть благодеяния, яже сотворих вам? не в пустыни ли, егда возалкасте, возописте ко мне
18 глаголюще: чесо ради нас в пустыню сию привел еси погубити нас? лучше нам бе работати египтяном, нежели умрети в пустыни сей:
19 аз ужалехся стенаний ваших и дахъ вам манну в пищу, хлеб ангелскии ядосте:
20 егда возжаждасте, не разсекох ли камене, и потекоша воды в сытости, зноя ради листвиемъ древес вас покрывах:
21 разделих вам земли обилны, хананеовъ и ферезеов и филистимлян от лица вашего извергох: что сотворю вам ктому, глаголет Господь?
22 Сия глаголет Господь вседержитель: егда в пустыни бесте на реце аморрейсте жаждуще и хуляще имя мое,
23 не огнь вам за хуления дах, но вложивъ древо в воду, сладку сотворих реку:
24 что тебе сотворю, иакове? не восхотелъ еси послушати, иудо: преселюся ко иным языкомъ и дам им имя мое, да соблюдают законы моя:
25 понеже остависте мя, и аз вас оставлю: просящих вас от мене милости не помилую:
26 егда призовете мя, аз не услышу вы, осквернисте бо руце ваши кровию, и нозе ваши скоры суть во еже сотворити человекоубийства:
27 не яко мене остависте, но вас самих, глаголет Господь.
28 Сия глаголет Господь вседержитель: еда азъ вас не молих, яко отец сыны и яко мати дщерей и яко доилица отрочат своих,
29 да будете ми в люди, и аз вам в Бога, и вы мне в сыны, и аз вам во отца:
30 тамо вас собирах, якоже кокош птенцы своя под криле свои: ныне же что сотворю вам? отвергу вы от лица моего:
31 приношение егда мне принесете, отвращу лице мое от вас: дни бо праздничныя ваша и новом(с)чия и обрезания отвергох:
32 аз послах отроки моя пророки к вам, ихже емше убисте, и растнисте телеса их, ихже крове взыщу, глаголет Господь.
33 Сия глаголет Господь вседержитель: дом ваш пустъ есть, помещу вас яко ветр плевы,
34 и сынове порождения не сотворят, понеже заповедь мою презреша, и еже зло есть предо мною, сотвориша:
35 предам домы ваша людем грядущим, иже мя не слышавше уверуют: имже знамений не явих, сотворят, яже повелех,
36 пророков не видеша, а воспомянут беззакония своя:
37 засвидетелствую людий грядущих благодать, ихже отроцы веселятся с радостию, мене не видяще очесы плотскими, но духом верующе, яже рекох:
38 и ныне, брате, смотри, кая слава, и виждь люди приходящия от востока,
39 имже дам началство авраамле, исааково и иаковле, и осиино и амосово, и михеино и иоилево, и авдиино и ионино,
40 и наумово и аввакумово, софониино, аггеево, захариино и малахиино, иже и ангел Господень наречеся.
1 Сия глаголет Господь: аз изведох люди сия из работы, имже повеления дах рабы моими пророки, ихже слушати не восхотеша, но отвергоша моя советы.
2 Мати, яже их роди, глаголет им: идите, сынове, понеже аз вдовица есмь и оставлена,
3 воспитах вы с радостию и лишихся вас со плачем и скорбию, яко согрешисте пред Господемъ Богом вашим, и еже лукавое есть пред ним, сотвористе:
4 ныне же что сотворю вам? аз вдова есмь и оставлена: идите, сынове, и просите от Господа милости.
5 Аз же тебе, оч~е, свидетеля призываю на матерь сынов, иже не восхотеша завета моего хранити:
6 да даси им посрамление и матерь их на расхищение, да рода их не будет,
7 да расточатся во языки имена их, да изгладятся от земли, зане презреша завет мой.
8 Горе тебе, ассур, иже сокрываеши неправедныя у себе. Роде лукавый, воспомяни, что сотворихъ содому и гоморре,
9 ихже земля лежит в жупелней груде и въ холмех пепелных: тако дам тех, иже мя не слушаша, глаголет Господь вседержитель.
10 Сия глаголет Господь ко ездре: возвести людемъ моим, яко дам им царство Иерусалимское, еже дати имех израилю,
11 и возму мне славу их и дам им селения вечная, яже пред(у)готовах им:
12 древо жизни будет им в благовоние масти, и не имут труждатися, ниже утрудятся.
13 Идите и приимите, просите себе дний малых, да закоснят: уже готово есть вам царство, бдите.
14 Засвидетелствуй небом и землею: сотрох бо злое и сотворих благое, яко живу аз, глаголетъ Господь.
15 Мати, обыми сыны твоя, воспитай их со веселием, яко голубица утверди нозе их, зане тебе избрах, глаголет Господь.
16 И воскр~шу мертвыя от мест своих и из гробов изведу их: познах бо имя мое во израили.
17 Не бойся, мати сынов, зане тебе избрах, глаголет Господь.
18 Послю тебе помощь отроки моя, исаию и иеремию, по ихже совету освятих и уготовахъ тебе древес дванадесять отягченых различными плоды,
19 и толикожде источников текущих млекомъ и медом, и гор превысоких седмь имеющихъ шипок и крин, на нихже веселием исполню сыны твоя.
20 Вдову оправдай, сиру суди, нищему дай, сироту защити, нагаго одей,
21 о сокрушеннем и немощнем попецыся, хромому не посмейся, защити безрукаго, а слепаго къ видению света моего припусти:
22 стараго и младаго между стенами твоими сокрый:
23 мертвыя идеже обрящеши, назнаменав отдай гробу, и дам тебе первое седение в воскресние мое.
24 И утишитеся и препокойтеся, людие мои, зане приидет покой ваш.
25 Кормилице благая, корми сыны твоя, утверждай нозе их.
26 Рабов, ихже тебе дах, ни един от них погибнет, их бо аз взыщу от числа твоего.
27 Не изнемогай: егда бо приидет день печали и тесноты, инии восплачутся и печальни будут, ты же радостна и обилна будеши.
28 Поревнуют (тебе) языцы и ничтоже противу тебе возмогут, глаголет Господь.
29 Руце мои покрыют тя, да сынове твои геенны не узрят.
30 Утешайся, мати, с сыны твоими, зане аз тя избавлю, глаголет Господь.
31 Воспомяни чада твоя спящия, понеже аз изведу их из боков земли и милость с ними сотворю: милостив бо есмь, глаголет Господь вседержитель.
32 Обыми чада твоя, дондеже аз прииду и сотворю им милосердие: источницы бо мои изобилуютъ и благодать моя не оскудеет.
33 Аз ездра взях повеление от Господа на горе орив, да иду ко израилю, к нимже егда приидох, отринуша мя и уничижиша заповедь Господню.
34 И сего ради вам глаголю, языцы, иже слышите и разумеете: ждите пастыря вашего, иже даст вам покой вечный: понеже он уже близ есть и имать приити во скончании века.
35 Будите готови к воздаянием царствия, светъ бо вечный возсияет на вы во веки:
36 бежите сени века сего, приимите наслаждение славы вашея, аз яве свидетелствую спасителемъ моим.
37 Вверенный дар приимите и веселитеся, благодаряще призвавшаго вы в царство небесное.
38 Востаните и стойте, и смотряйте число знаменаныхъ на пиру Господнем,
39 иже преселишася от сени века сего, восприяша светлая одеяния от Господа.
40 Восприими число твое, сионе, и заключи одеянныхъ твоих в белая, иже исполниша закон Господень.
41 Исполнено есть число чад твоих, ихже желал еси: моли царства Господня, да будут освящени людие твои, призваннии из начала.
42 Аз ездра видех на горе сионстей народъ мног, ихже исчислити не могох, и вси песньми хваляху Господа:
43 посреде же их бе юноша высочае возрастомъ паче всех оных, иже полагаше венцы на главу коегождо и паче возвышашеся, аз же дивихся зело.
44 Тогда вопросих ангела, глаголя: что суть сии, господи?
45 Он же отвеща: сии суть, иже совлекошася одеяния смертнаго и облекошася в безсмертное и исповедаша имя Божие: ныне венчаются и приемлют финики.
46 И вопросих ангела о юноши: кто есть оный юноша, иже возлагает на них венцы и финики в руце дает?
47 Он же отвеща ми: сей есть сын Божий, егоже исповедаша в веце сем. Аз же начах величати их, иже крепко за имя Господне вооружашася.
48 Тогда рече ми ангел: иди и возвести людемъ моим, каковая и коликая чудеса Господа Бога виделъ еси.
1 Лета тридесятаго от разорения града, бех въ вавилоне и смятохся на одре моем лежащь, и помышления моя восхождаху на сердце мое,
2 понеже видех опустение сиона и изобилие велие живущих в вавилоне.
3 (Того ради) смутися дух мой зело, и начахъ умиленными словесы глаголати к вышнему
4 и рекох: о, владыко Господи! ты (самъ) реклъ еси от начала, егда создал еси землю, и сие един, и повелел еси людем,
5 и дал еси адаму плоть мертвену, но и сия бяше дело рук твоих, и вдохнул еси в него дух жизни, и бысть жив пред тобою:
6 и ввел еси его в рай, егоже насади десница твоя, прежде неже прозябе земля:
7 и завещал еси ему сохранити заповедь твою, и преступи ю, и абие предал еси его смерти и род его, и родишася языцы и племена, и людие и народи, имже несть числа:
8 и хождаше кийждо народ по похотем своим, и дивная делаша пред тобою, и презираша заповеди твоя:
9 паки же во время навел еси на них потопъ и потребил еси живущих на земли,
10 и бысть коемуждо их, якоже адаму умрети, тако сим потоп:
11 оставил же еси единаго от них ноя с домом его, из негоже (родишася) вси праведнии:
12 и бысть, егда начаша множитися живущии на земли, и умножиша сыны и люди и языки многи, и начаша паки нечестие творити множае прежних:
13 и бысть, егда беззаконие творяху пред тобою, избрал еси себе мужа от сих, емуже имя бе авраам,
14 и возлюбил еси его, и показал еси ему единому хотение твое,
15 и положил еси ему завет вечный, и рекл еси ему, яко никогда оставиши семене его, и дал еси ему исаака, исааку же дал еси иакова и исава:
16 и избрал еси себе иакова, исава же отринул еси, и размножися иаков во множество велие:
17 и бысть, егда извел еси из египта семя его, привел еси к горе синайстей,
18 и преклонил еси небеса, и уставилъ еси землю, и поколебал еси вселенную, и трепетати сотворил еси бездны, и возмутилъ еси мир,
19 и пройде слава твоя враты четырьми, огнемъ и земным трясением, и ветром и мразом, да даси закон семени иаковлю и роду израилеву прилежание:
20 и не отял еси от них сердца лукаваго, да закон твой сотворит в них плод:
21 сердце бо лукаво нося первый адам, преступи и побежден бысть, и тако вси, иже от него родишася:
22 и пребываше немощь и закон с сердцем человеческим, с лукавстом корене, и преста благое, и наста злое:
23 и преидоша времена, и скончашася лета, и воздвигл еси себе раба именем давида,
24 и повелел еси ему создати град имени твоему и приносити в нем тебе фимиам и жертвы:
25 и бысть сие чрез многа лета, и согрешиша живущии в том граде,
26 во всех творяще, якоже сотвори адамъ и вси родове его, понеже и сами быша сердцемъ лукави,
27 и того ради град твой предал еси въ руки врагов твоих:
28 еда лучшая творят, иже обитают в вавилоне, и того ради владеют сионом?
29 и бысть егда приидох семо и видехъ нечестия, имже несть числа, и многих согрешающихъ виде душа моя в сие тридесятое лето, и ужасеся сердце мое,
30 понеже видех, како терпиши согрешающимъ и пощадил еси нечествующих и погубил еси люди твоя, сохранил же еси враги твоя и не возвестил еси (ни комуже):
31 воистинну не вем, како сия уразумети имам? еда суть дела лучшая вавилонская, нежели сионская?
32 еда познаша тебе инии языцы кроме израиля? или кая племена вероваша свидениемъ твоим, якоже иаков?
33 ихже мзда не явися, ниже труд их творитъ плода, понеже прохождая проидох посреде языкъ и видех я процветающя и не помнящия повелений твоих:
34 ныне убо измери на мерилех неправды наша и живущих на земли, и нигде обрящется имя твое, токмо во израили:
35 и когда не согрешиша пред тобою живущии на земли? или кий язык тако сохранил заповеди твоя?
36 сих убо по именом обрящеши сохранившихъ повеления твоя, языков же не обрящеши.
1 Тогда отвеща ко мне ангел, иже посланъ бе ко мне, емуже имя уриил,
2 и рече ми: во ужасе изступи сердце твое в веце сем, понеже хощеши постигнути пути вышняго. Аз же отвешах:
3 тако есть, господи мой. Он же ко мне рече сице: три пути послан есмь показати тебе и три подобия предложити пред тобою:
4 от нихже егда ми едино изявиши, и аз ти покажу путь, егоже желаеши видети, и научу тя, откуду есть сердце лукаво.
5 И рекох: возвести, господи мой. И рече ко мне: иди и извеси ми огня тягость, или измери дыхание ветра, или возврати вспять день, иже мимоиде.
6 Аз же отвешах и рекох: кто от человекъ может сотворити, о нихже мя вопрошаеши?
7 Он же рече ко мне: аще бых вопросилъ тя, глаголя: коль много жилищ есть в сердцы морстем, или коль много источников в начале бездны, или коль много жил есть над твердию небесною, или кии суть пределы райстии?
8 негли отвещал бы ми еси: в бездну не снидох, ни во ад еще, ниже на небеса когда взыдох:
9 ныне же о сем не вопросих тя, точию о огни и о ветре и о дни, в оньже еси пребывал, и без сих вещей быти не можеши: и ты о сихъ ничтоже ми отвещал еси.
10 И рече ми: ты сих, яже твоя суть и с тобою возрастоша, познати не можеши:
11 и како сосуд твой возможет вместити пути вышняго, и уже миру отвне растленну сущу, уразумети расление явное пред лицемъ моим?
12 И рекох к нему: лучше нам дабы есмы не были, нежели еще живущим жити в нечестиихъ и претерпевати и не ведати, коея ради вещи.
13 Он же отвеща ми и рече: шед идохъ в дубраву древес польных, идеже древа советъ сотвориша
14 глаголюще: приидите и идем и двигнем брань на море, да уступит нам, и да сотворимъ себе иныя дубравы:
15 такожде и волны морския совет сотвориша глаголющя: пойдем и двигнем брань на лесы польныя, да победивша их восприимем себе тамо иное место:
16 и бысть умышление дубравы праздно, понеже прииде огнь и пожже ю,
17 такожде и умышление волн морских, понеже ста песок и удержа их:
18 и егда бы еси был судия их, коего бы еси от сих оправдал, или коего винна сотворил?
19 Отвещах аз и рех: воистинну в советъ суетен вдашася, понеже земля дана есть лесом, и морю место, еже носити волны своя.
20 Он же рече ко мне: право разсудил еси: чесо же ради себе не судиши?
21 понеже якоже земля дубравам дана есть и море волнам своим (дано есть): тако иже обитают на земли, токмо вещи наземныя разумети могут, а сущии на небесех, яже на высоте небес.
22 И овешах и рекох: молютися, господи, да мне дастся ум разумения,
23 не бо хотех вопросити о вышних твоих, но о сих, яже всегда в нас бывают, чесо ради израиль дан в поругание языком? и чесо ради людие твои возлюбленнии даны языком нечестивым? и чесо ради закон отец наших в пагубу низведен бысть, и устроения писанная нигде суть?
24 и преидохом о века аки прузи и живемъ в велицем страсе и ужасе, и недостойни есмы милости твоея наследити:
25 но что сотворит имени своему, еже мы нарицаем? сия суть, егоже аз вопросих.
26 Он же отвеща ко мне и рече: колико более испытати будеши, толико более и удивишися, понеже скоро спешит век преити
27 и не может носити, яже в будущая времена праведным обещанна суть,
28 понеже неправды исполнь век сей и немощей: а о нихже вопрошаеши, возвещу тебе: насеяно бо есть зло, и не у прииде погубление его:
29 аще убо не превратится, еже насеяно есть, и не уступит место, идеже насеяно лукавство, не приидет, идеже насеяно есть благо:
30 понеже злак семене злаго всеян есть в сердце адамово из начала, и коль много зла роди и доныне и раждает, дондеже приидетъ млачение?
31 разсуди же в себе злак злаго семене, коликъ плод нечестия породи?
32 егда пожати будут класи, имже несть числа, коль велию молотьбу начнут творити?
33 И отвещах и рех: како и когда сия (будутъ)? и чесо ради кратка и зла лета наша?
34 И отвеща ко мне и рече ми: не спеши ты выше вышняго, ты бо тщишися всуе быти выше его, ибо изступление твое много:
35 еда не вопрошаша души праведных о сихъ в затворех своих, глаголюще: доколе тако надеющеся будем? и когда приидет плод жатвы мзды нашея?
36 и отвеща на сия иеремиил архангел и рече: егда исполнится число семен в вас, понеже на мериле извесил векъ
37 и мерою измерил времена и числом сочте часы, и не восколеба, ни возбуди, дондеже исполнится предреченная мера.
38 И отвещах и рех: о, владыко Господи! но и мы вси исполнени есмы нечестия:
39 и еда ли нас ради не наполнятся праведныхъ житницы, за грехи обитающих на земли?
40 И отвеща ко мне и рече: иди и вопроси имущую во чреве, еда исполнивши девять месяцей своих, еще возмогут ложесна ея в себе удержати плод?
41 И аз отвещах: воистинну не могут, господи. Он же отвеща: во аде обители душ подобныя суть ложеснам:
42 понеже якоже родящая хощет вскоре родити, да избежит нужды рождения, тако и сия тщатся издати оная, яже вдана им суть:
43 из начала возвещу и изявлю тебе о сих, ихже желаеши видети.
44 И отвещах и рекох: аще обретох благодать пред тобою, и аще возможно есть, и аще достоин есмь,
45 покажи ми, еда ли множайшее есть время прешедшее, нежели имущее приити? или множайшая преидоша, неже будущая суть?
46 вем бо, еже прейде, а того не вем, еже прейти имать.
47 Он же рече: стани одесную мене, и изявлю тебе толкование притчи.
48 И стах и видех, и се, пещь горящая пройде предо мною: и бысть егда прейде пламень, видех, и се, превзыде дым.
49 По сих пройде предо мною облак исполненъ воды, из негоже испустися дождь велий со устремлением: и егда пройде стремление дождя, преумножишася в нем капли.
50 И рече ко мне: внимай себе: якоже растетъ дождь паче неже капли, и огнь, неже дым, тако превзыде прешедшая мера: преумножишася же капли и дым.
51 И молихся и рекох: мниши ли, яко жити имам даже до дний оных? или что будетъ во днех онех?
52 И отвеща ми глаголя: о знамениих, о нихже мя вопрошаеши, от части могу ти глаголати, о животе же твоем несмь послан поведати тебе, но не свем.
1 О знамениих же: се, дние приидут, в нихже живущии на земли обременени будут даньми многими, и скрыется путь правды, и будет вселенная неплодна от веры,
2 и умножится неправда паче сея, юже ты видиши, и паче тоя, о нейже еси слышалъ издревле:
3 и будет земля, в нюже вшед ныне видиши царствуюшую, и узрят ю опустену:
4 аще же тебе даст вышний живу быти, узриши по третией трубе, и возсияет внезапу солнце в нощи, и луна трижды в день,
5 и воскаплет кровь от древа, и камень дастъ глас свой, и поколеблются людие:
6 и той будет царствовати, егоже не надеются живущии на земли, и птицы прейдут от места своего,
7 и море содомское рыбы изринет и даст гласъ нощию, егоже мнози не знаша, и вси услышатъ глас его:
8 и смятение будет на местех мнозех, и огнь часто низпустится, и зверие польстии преселятся, и жены болезнивыя породят щуда,
9 и в сладких водах сланы обрящутся, и друзи вси сами на ся ополчатся: и скрыется тогда ум, и разум отлучится в хранилище свое,
10 и взыщется от многих и не обрящется: неправда же и невоздержание умножится на земли,
11 и вопросит страна ближнюю свою и речет: не прейде ли по тебе правда праведнаго творящая? и сего отречется:
12 и будет в то время, и уповати будутъ человецы и не восприимут: трудитися будут, и не управятся путие их.
13 Сия знамения попущено есть мне глаголати к тебе: и аще помолишися паки, и восплачешися, якоже и ныне, и попостишися седмь дний, еще болшая сих услышиши.
14 И возбнух, и тело мое устрашися зело, и душа моя утрудися, аки бы исчезала.
15 И удержа мя, иже прииде ангел, иже глаголаше ко мне, и укрепи мя и постави мя на ногах.
16 И бысть в нощь вторую, и прииде ко мне салафиил вождь людем и рече мне: где былъ еси, и вскую лице твое скорбно?
17 или не веси, яко тебе вверен есть израиль во стране преселения их?
18 востани убо и вкуси хлеба, и не остави нас, якоже пастырь стадо свое в руках волковъ лукавых.
19 И рекох ему: иди от мене и не приближайся ко мне. И услыша, якоже рекох, и отиде от мене.
20 И аз постихся дний седмь стеня и плачя, якоже мне заповеда уриил ангел.
21 И бысть по днех седмих, и паки помышления сердца моего трудна бяху мне зело:
22 и восприя душа моя дух разума, и паки начах глаголати пред вышним словеса
23 и рех: о, владыко Господи! от всех дубравъ земли и от всех древес ея избрал еси виноград един,
24 и от всего круга земнаго избрал еси себе юдоль едину, и от всех цветовъ вселенныя избрал еси себе крин един,
25 и от всех бездн морских исполнил еси себе источник един, и от всех созданныхъ градов освятил еси себе сион,
26 и от всех сотворений летающих именовалъ еси себе голубицу едину, и от всехъ сотворенных скотов промыслил еси себе овцу едину,
27 и от всех умноженных людий взыскалъ еси себе народ един, и от всех искушенъ закон дал еси сим, ихже возлюбил еси, людем:
28 и ныне, Господи, вскую предал еси единаго многим и уготовал еси на един корень многи иныя и расточил еси един твой во многи?
29 и потопташа его, иже противу глаголаша обетованием твоим и иже твоим заветомъ не вероваху:
30 и аще ненавидящь возненавидел еси люди твоя, твоими руками долженствуют наказатися.
31 И бысть егда глаголах словеса, и посланъ есть ангел ко мне, иже прежде прииде ко мне в прешедшую нощь,
32 и рече ми: послушай мя, и научу тя: и вонми ми, и предложу пред тобою.
33 И рекох: глаголи, господи мой. И рече ко мне: зело ты во ужасе ума сотворился еси ради израиля: или паче возлюбил еси его, неже сотворивый его?
34 И рех к нему: ни, господи, но болящь глаголалъ есмь: мучат бо мя лядвия моя по вся часы ищущаго постигнути стезю вышняго, изследовати часть суда его.
35 И рече ко мне: не можеши. И рекох: чесо ради, господи? почто родихся? или вскую не сотворися утроба матере моея мне гроб, да не виделъ бых труда иаковля и изнеможения рода израилева?
36 И рече ко мне: сочти ми сия, яже еще не приидоша, и собери ми разсеянныя капли, и озелени ми сухия цветы,
37 и отверзи ми запертая хранилища, и изведи ми заключенныя в них ветры: покажи ми гласа образ, и тогда покажу ти труд, егоже жадаеши видети.
38 И рех: о, владыко Господи! кто бо есть, иже может сия ведети, разве той, иже съ человеки обитания не имать?
39 аз же безумен, и како могу глаголати о сих, о нихже мене вопросил еси?
40 И рече ко мне: якоже не можеши сотворити едино от сих, яже глаголана суть, тако не можеши обрести суда моего, или в конецъ любве, юже людем обещах.
41 И рех: но се, Господи, ты близ еси сих, иже при концы суть, и что сотворят, иже прежде мене быша, или мы, или иже последи нас?
42 И глагола ко мне: венцу уподоблю суд мой: якоже не последних умедление, тако ниже первых ускорение.
43 И отвещах и рекох: не могл ли еси сотворити сих, иже сотворени быша, и иже суть, и иже будут вкупе, дабы сеорее судъ твой показал еси?
44 И отвеща ко мне и рече: не может ускорити творение над творца, ниже снести век сих, иже в нем творими суть вкупе.
45 И рех: како рекл еси рабу твоему, понеже оживляя оживил еси от тебе сотвореное творение во едино, и сносило творение: можетъ и ныне носити настоящих во едино.
46 И рече ко мне: вопроси ложесн женскихъ и речеши к ней: и аще родиши, вскую по времени? моли убо ю, да родит десять во едино.
47 И рекох: не может, но по времени.
48 И рече ко мне: и аз дах ложесна земли сим, иже посеяни суть на ней по времени:
49 имже бо образом младенец не родит тех, яже старых суть, тако аз устроих от мене сотвореный век.
50 И вопросих и рекох: понеже уже даеши ми путь, возглаголю пред тобою: ибо мати наша, о нейже глаголал еси мне, еще млада есть, а уже к старости приближается.
51 И отвеща ко мне и рече: вопроси тоя, яже родит, и речет тебе.
52 Речеши бо ей: вскую, коих родила еси, ныне не суть подобни тем, иже прежде тебе, но менши возрастом?
53 И речет тебе и та: инии суть, иже въ юности силы рождени суть, и инии иже под время старости оскудевающим ложеснам родишася.
54 Разумей убо и ты, яко менши возрастомъ есте от тех, иже прежде вас,
55 и иже последи вас, менши неже вы, аки уже стареющаяся творения, и крепость юности преминующая.
56 И рекох: молю, Господи, аще обретох благодать пред очима твоима, покажи рабу твоему, имже посетиши творение твое.
1 И рече ко мне: от начала круга земнаго и прежде основания исходов века, и прежде неже быша дышуще собрания ветровъ
2 и прежде неже возшумеша гласи громнии, и прежде неже возсияша светлости блистаний и прежде неже утвердишася основания райская,
3 и прежде неже видени быша краснии цвети и прежде неже укрепишася силы подвиженыя, и прежде неже собрашася безчисленная воинства ангелская
4 и прежде неже вознесошася высоты воздушныя, и прежде нежели наименовахуся меры твердей и прежде нежели возгорешася пещи в сионе,
5 и прежде неже изследована быша настоящая лета и прежде неже отчуждишася сих, иже ныне согрешают, начинания, и прежде неже назнаменани быша тии, иже веру сокровиществоваша:
6 тогда аз помыслих, и сотворена суть чрез мене единаго, а не чрез иного, и конецъ будет мною, а не иным.
7 И отвещах и рекох: кое будет разделение времен? или когда первому конец, а другому начало?
8 И рече ко мне: от авраама даже до исаака, егда рождени суть от него иаков и исав, рука иаковля держаше от начала пяту исавову:
9 конец бо века сего исав, а другаго начало иаков:
10 человека рука между пятою и рукою, иного не ищи, ездро.
11 И отвещах и рекох: о, владыко Господи, аще обретох благодать пред очима твоима,
12 молю тя, да покажеши рабу твоему конец знамений твоих, ихже часть показал еси мне нощи прешедшия.
13 И отвеща и рече ми: востани на ноги твоя и услыши глас исполнен шума:
14 и будет аки колебание, а не поколеблется место, на немже стоиши:
15 сего ради, егда глаголет, ты не ужасайся, ибо о концы слово и основание земли разумеется:
16 понеже о сих вещех слово, трясется и колеблется: весть бо, яко конец их имать изменитися.
17 И бысть егда слышах, востах на нозе мои и слышах: и се, глас глаголющь, и шумъ его яко шум вод многих.
18 И рече: се, дние грядут, и будет, внегда приближатися начну, да посещу обитающих на земли,
19 и егда искати начну от сих, иже неправедно повредиша неправдою своею, и егда исполнится смирение сионе,
20 и егда назнаменается век, иже начинаетъ преходити, сия знамения сотворю: книги разгнутся пред лицем тверди, и вси узрят вкупе,
21 и единолетнии младенцы возглаголют гласы своими, и чреватыя недозрелых родят младенцев, триех и четырех месяцей, и поживут и воздвижутся:
22 и абие явятся места насеянная ненасеяна, и полная хранилища внезапу обрящутся праздна:
23 и труба вострубит с шумом, юже егда вси услышат, абие ужаснутся:
24 и будет в то вре м, вооружатся приятеле на приятелей аки врази, и ужаснется земля с ними, и жилы источников станут и не стекутъ в часех триех:
25 и будет, всяк, иже оставлен будет от всех сих, имиже предрекох тебе, той спасется и узрит спасние мое и конец века вашего:
26 и узрят, иже прияти суть людие, иже смерти не вкусиша от рождения своего, и пременится сердце обитающих и обратится в чувство иное:
27 загладитбося лукавое, и погасится лесть,
28 процветет же вера, и победится растление, и явится истина, яже без плода бяше дни толики.
29 И бысть, егда ми глагола, и се, тихо смотрехъ нань, пред нимже стоях,
30 и рече ко мне сия: приидох к тебе показати время будущия нощи:
31 аще убо паки помолишися и паки попостишися седмь дний, паки тебе возвещу от сих болшия вещи, в день в оньже слышах:
32 слышан бо есть глас твой пред вышним: виде бо крепкий исправление твое и провиде чистоту, юже от юности твоея имел еси,
33 и сего ради посла мя показати тебе вся вещи сия и рещи тебе: дерзай и не бойся,
34 и не тщися с первыми времены мыслити суетная, да не поспешиши от последних времен.
35 И бысть по сих, и плакахся паки и такожде постяхся седмь дний, да исполню три седмицы, яже речены суть мне.
36 И бысть во осмую нощь, и сердце мое смущашеся паки во мне, и начах глаголати пред вышним:
37 распалашеся бо дух мой зело, и душа моя унываше.
38 И рекох: о, Господи! глаголя глаголал еси от начала сотворения в первый день (глаголющь): да будетъ небо и земля, и твое слово дело совершенно:
39 и бысть тогда дух, и тма окрест ношашеся и молчание: шум гласа человеча еще не бе (сотворенъ) от тебе:
40 тогда глаголал еси, да от сокровищ твоихъ произнесется свет светлый, имже бы явилося дело твое.
41 И в день вторый создал еси дух тверди и повелел еси ей, да разделит и разделение сотворит между водами, да часть некая выше уступит и часть вторая низу пребывает.
42 И в третий день повелел еси водамъ собратися в седмую часть земли, шесть же частей осушил и сохранил еси, еже бы пред тобою служили насеяны от Бога и устроены:
43 слово бо твое изыде, и дело абие творяшеся:
44 изыде бо абие плод множества безмернаго, и желания вкушения различная, и цвети видомъ непременным, и благовоние обоняния неизследованнаго, и в день третий сия сотворена суть.
45 В четвертый же день повелел еси солнечней быти светлости, лунному свету и звезд расположению:
46 и повелел еси им, да служат имущему быти созданному человеку.
47 В пятый же день рекл еси седмей части, идеже бяше вода собрана, да произведет животная и летающая и рыбы, и тако творяшеся:
48 вода нема и бездушна, яже Божиим мановениемъ повелевахуся, животная творяше, да от сего дивная твоя родове возвещают:
49 и тогда сохранил еси две души: имя единей назвал еси енох, и имя вторей назвал еси левиафам,
50 и разлучил еси я едино от другаго: не бо можаше седмая часть, идеже бяше вода собрана, вместити их:
51 и дал еси еноху едину часть, яже осушена есть в третий день, да обитаетъ на ней, идеже суть гор тысяща:
52 левиафаму же дал еси седмую часть мокрую и сохранил еси ю, да будет в снедь, имже хощеши и когда хощеши.
53 В шестый же день повелел еси земли, да сотворит пред тобою скоты и звери и гады,
54 и свыше сих (сотворил еси) адама, егоже поставил еси вожда и князя над всеми сотворенными, яже сотворил еси, и от него родимся мы вси, ихже избрал еси люди.
55 Сия же вся рекох пред тобою, Господи, яко ради нас создал еси век:
56 прочия же языки от адама рождены, реклъ еси оныя ничтоже быти: яко слине уподоблени суть, и яко капление от сосуда уподобилъ еси множество их:
57 и ныне, Господи, се, тии языцы, иже ни во чтоже вменени суть, начаша владети нами и пожирати нас:
58 мы же людие твои, ихже нарекл еси первенцемъ единородным возлюбленным твоим, предани есмы в руки их:
59 и аще ради нас сотворен бысть век, вскую достояния не одержим с веком? доколе сия (будутъ)?
1 И бысть егда скончах глаголати словеса сия, послан есть ко мне ангел, иже посланъ бе ко мне в прежния нощи,
2 и рече ко мне: востани, ездро, и слыши словеса, яже приидох глаголати к тебе.
3 И рекох: глаголи, господи мой. И рече ко мне: море поставлено есть в пространне месте, дабы было глубоко и безмерно,
4 будет же ему вход в тесне месте поставлен, дабы подобно рекам было:
5 кто бо хотяй восхощет внити в море и видети е, или господствовати им, аще не пройдетъ тесноты, в широту како приити может?
6 и паки ино: град создан есть и поставленъ на месте полевом, есть же исполнен всеми благими:
7 вход его тесен и в стремнине поставлен, дабы одесную огнь был, ошуюю же вода глубока:
8 стезя же есть едина токмо между има проложена, сиречь между огнем и водою, едину токмо ступень человечу могущая вместити:
9 егда убо дастся град сей человеку в достояние, аще не пройдет когда предположеннаго бедства, како приимет достояние свое?
10 И рекох: тако, Господи. И рече ко мне: тако есть и израилева часть:
11 их бо ради сотворих век, и егда преступилъ есть адам законоположения моя, суждено бысть еже сотворено есть:
12 и сотворишася входи сего века тесни и болезненни и трудни, мали же и лукави, и бедствъ полни и трудом великим утвержденни,
13 ибо болшаго века входи пространни и безопасни и творящии безсмертный плод:
14 аще убо входящии не внидут, иже живут, в тесная и суетная сия, не возмогут прияти, яже суть уготована:
15 ныне убо вскую ты смущаешися, егда еси тленен, и что мятешися ты, егда еси смертен?
16 и вскую не приял еси в сердцы твоем, еже есть будущее, но еже настоящее?
17 Отвещах и рех: владыко Господи! се, устроилъ еси законом твоим, яко праведнии наследятъ сия, нечестивии же погибнут:
18 праведнии же понесут тесноту надеющеся пространных: иже бо нечестиво сотвориша, и тесноту пострадавше пространных не узрят.
19 И рече ко мне: несть судия паче Бога, ни разумеваяй паче вышняго:
20 погибают бо мнози настоящии, понеже не радятъ о предположеннем Божии законе:
21 повелевая бо повеле Бог приходящим, егда приидоша, что творяще живи будут, и что храняще казними не будут:
22 тии бо не суть увещани, и противишася ему, и положиша себе помышление суетное,
23 и представиша себе обхождение грехов, и глаголаша вышнему не быти, и путий его не познаша,
24 и закон его уничижиша, и обетования его отвергоша, и в законех его веры не имеша, и дел его не совершиша:
25 того ради, ездро, тшетная тщетнымъ и полная полным:
26 се, время приидет, и будет, егда приидутъ знамения, яже предрекох тебе, и явится невеста, и являющися покажется, яже ныне крыется от земли,
27 и всяк, иже избавлен есть от предреченныхъ злых, той узрит дивная моя:
28 открыетбося сын мой Иисус с теми, иже с ним суть, и насладятся, иже оставлени суть, в летех четырех стех:
29 и будет по летех сих, и умрет сынъ мой христос, и вси иже дыхание имут человецы,
30 и обратится век в древнее молчание дний седмь, якоже в прежних судех, тако яко да никто останется:
31 и будет по днех седми, и возбудится, иже не у бдит, век и умрет растленный,
32 и земля издаст тех, иже в ней спят, и прах, иже в нем молчанием обитают, и хранилища издадут вданныя им души:
33 и открыется вышний на престоле суда, и пройдут беды, и долготерпение соберется:
34 суд же един пребудет, истина станет, и вера возможет,
35 и дело последовати будет, и мзда покажется, и правды воспрянут, и неправды не возобладают.
36 И рекох: первый авраам о содомлянехъ молился, и моисей за отцы согрешшия в пустыни,
37 и иже по нем за израиля во дни ахаза и самуила,
38 давид о сокрушении, и соломон за сих, иже приидоша во освящение,
39 и илиа за тех, иже дождь прияша, и за мертва, да оживет,
40 и езекиа за люди во дни сеннахирима, и мнози за многих:
41 аще убо ныне, егда тленное возрасте, и неправда умножена есть, и молишася праведнии за нечестивых, вскую и ныне тако не будет?
42 И отвеща ко мне и рече: настоящий векъ не есть конец, слава в нем частая пребывает: того ради молишася за немощных:
43 день бо судный будет конец времене сего и начало времене будущаго безсмертия, в немже мимоиде тление,
44 разрушися невоздержность, отсечено есть неверие, возрасте же правда, возсия истина:
45 тогда бо никтоже может спасти того, иже погибе, ни потопити того, иже победи.
46 И отвещах и рекох: сие есть слово мое первое и последнее, яко лучше бе не дати земли адаму, или
47 егда уже дана бысть, удержати его, да не согрешит:
что бо пользует человеком в настоящемъ веце жити в скорби, и мертвым чаяти казни?
48 о, что сотворил еси, адаме? аще бо ты согрешил еси, не единаго тебе сотворися падение, но и наше, иже от тебе произыдохом:
49 что бо пользует нам, аще обещано есть нам безсмертное время, мы же смертная дела соделахом?
50 и яко предреченно есть нам вечное упование, мы же строптивии суетни сотворихомся?
51 и яко отложена суть нам жилища здравия и покоя, мы же лукаво жили есмы?
52 и яко пред(у)готована есть слава вышняго защитити тех, иже позде пожиша, мы же по стропотным путем ходихом?
53 и яко показан будет рай, егоже плодъ нерастлен пребывает, в немже есть покой и врачба,
54 мы же не внидем, в неблагодарных бо местехъ пожихом?
55 и яко паче звезд возблистают лица тех, иже воздержание имеяху, наша же лица паче тмы черна?
56 ибо не помышляхом живуще, егда беззаконие творихом, яко имамы по смерти терпети.
57 И отвеща и рече: сие есть помышление подвига, имже подвизатися будет на земли рожденный человек,
58 да аще побежден будет, претерпит еже рекл еси, аще же победит, восприимет еже глаголю:
59 понеже сей есть живот, о немже моисей рече, егда живяше, к людем, глаголя: избери себе живот, да живеши:
60 не вероваша же ему, но ни после его пророком, ниже мне, иже глаголал есмь им,
61 яко не была бы скорбь в погубление их, якоже будет радость тем, имже усоветовано есть спасние.
62 И отвешах и рекох: вем, Господи, яко назван есть вышний милосерд, понеже помилуетъ тех, иже не у в век приидоша,
63 и яко милует тех, иже житие творятъ по закону его,
64 и долготерпелив есть, яко долготерпитъ сим, иже согрешиша, яко своему творению,
65 и щедр есть датель, яко даяти хощетъ по требованием,
66 и многомилосерд, понеже умножает милосердие тем, иже и настоящии суть, и иже минуша, и иже будут:
67 аще бо не умножит милосердия своего, не оживет век с теми, иже наследят в нем, и дарствует:
68 понеже аще бы не дарствовал от благости своея, да облегчатся сии, иже беззаконие сотвориша от своих беззаконий, то не возмогла бы десятотысящная часть жива быти человеков:
69 и судия, аще бы не простил оным, иже изцелени суть словом его, и потребил бы множество распрей,
70 не бы осталися быша в безчисленнем множестве, разве мали зело.
1 И отвеща ко мне и рече: сей век сотворилъ вышний многих ради, будущий же ради малых:
2 реку же тебе уподобление, ездро: како же вопросиши земли, и речет ти, яко дастъ земли много болши, от неяже будет скудельное, мало же праха, отонудуже злато бывает: тако и деяние настоящаго века:
3 мнози убо сотворени суть, не мнози же спасутся.
4 И отвещах и рекох: душе моя! пожри убо разумение и поглоти мудрость,
5 понеже обещала еси слушати, и пророчествовати хотящи, не бо дано есть тебе время, разве токмо жити:
6 о, Господи! аще не попустиши рабу твоему, да помолимся пред тобою, и даси нам семя въ сердце и чувству очищение, отонудуже плодъ был бы, где жити возможет всяк растленный, иже носити будет место человека?
7 един бо еси, и едино сотворение мы есмы руку твоею, якоже глаголал еси:
8 и како ныне в ложеснах создано есть тело, и подаеши составы? содержится во огни и въ воде твое творение, и девять месяц терпит твое создание твою тварь, яже в нем создана есть:
9 самое же еже хранит, и еже хранится, обоя сохранятся: сохраненая же некогда паки издают ложесна, яже в них растоша:
10 повелел бо еси от самых членов, сиречь от сосцев издаяти млеко плоду сосцев,
11 да питается то, еже создано есть, даже до времене некоего, и потом управиши его твоему милосердию:
12 воспитал еси его твоею правдою и научилъ еси его закону твоему и наказал еси его твоим разумом,
13 и умертвиши его якоже твое сотворение, и паки оживиши его, якоже дело твое:
14 аще убо погубиши его, иже толикими труды создан есть, твоим повелением удобно есть устроити, да и то, еже творяшеся, сохранится:
15 и ныне, Господи, возглаголю: о всяцем человеце ты паче веси, и о людех твоих, о нихже болезную,
16 и о наследии твоем, егоже ради азъ рыдаю, и ради израиля, о немже скорбен есмь, и иакова ради, о немже аз болезную:
17 сего ради начну молитися пред тобою за мя и за них, яко вижду падение наше, иже обитаемъ на земли:
18 но слышах скорость судии, иже приидет,
19 сего ради услыши глас мой и разумей слово мое, и возглаголю пред тобою. Начало словес ездриных, прежде неже взят бысть.
20 И рех: Господи, иже обитаеши во век, егоже очи вознесенны на вышняя и на воздусе,
21 и егоже престол безценный есть и слава непостижима, емуже предстоят вои ангелстии с трепетом, ихже сохранение в ветре и огни обращается, егоже слово истинно и глаголы вечнии,
22 егоже повеление крепко и разсмотрение страшно, егоже зрак изсушает бездны и гнев растаявати творит горы и истина свидетелствует:
23 услыши молитву раба твоего и во ушеса приими моление творения твоего:
24 егда бо живу, глаголати буду, и егда разумею, отвещати буду: не смотри на людий твоих грехи, но иже тебе во истине служат,
25 ни внемли нечестивым языков начинанием, но иже твоя свидения со болезнию сохраниша,
26 ни помысли иже пред тобою лживо пожиша, но помяни сих, иже по воли твоей страх познаша,
27 ниже хощи погубити, иже скотския обычаи имеша, но воззри на тех, иже закону твоему ясно учиша,
28 ни прогневайся на них, иже зверей горши осуждени суть,
29 но возлюби сих, иже всегда на правду твою надеются и славу:
30 яко мы и отцы наши таковыми болезньми исчезаем,
31 ты же ради нас грешных милосерд наречешися:
32 аще бо пожелаеши, да нас помилуеши, тогда милосерд наречешися, не имеющим нам дел правды:
33 праведнии бо, ихже суть дела многа представленна, от своих дел приимут мзду:
34 что бо есть человек, да на него прогневаешися? или род растлен, да тако огорчен будеши на него?
35 воистинну бо никтоже от рожденных есть, иже бы нечестиво не сотворил, и от исповедающихся, иже бы не согрешил:
36 в том бо возвестится правда твоя и благость твоя, Господи, егда милосерд будеши им, иже не имеют существа благих дел.
37 И отвеща ко мне и рече: право глаголалъ еси некая, и по словесем твоим тако и будет:
38 понеже не истинно помышлю на здание сих, иже согрешиша прежде смерти, прежде суда, прежде погубления,
39 но услаждуся над праведных творениемъ и помяну пришелствие и спасение и мзды восприятие:
40 якоже убо глаголал есмь, тако и есть:
41 якоже бо земледелец сеет на земли семена многа и саждения множество садит, но не во время вся, яже сеяна суть, спасутся, но ни вся, яже сажена суть, вкоренятся: тако и иже в веце насеяни суть, не вси спасутся.
42 И отвещах и рекох: аще обретох благодать, возглаголю:
43 якоже семя земледелца аще не взыдет, или не приимет дождя твоего во время, или аще растлено будет умножением дождя:
44 тако погибает подобне и человек, иже рукама твоима создан бысть, и ты ему образъ именовался еси: понеже подобен еси ему, егоже ради вся создал еси и уподобилъ еси семени земледелцеву:
45 не прогневайся на нас, но прости людем твоимъ и помилуй наследие твое, ты же творение твое милуеши.
46 И отвеща ко мне и рече: яже суть настоящая, настоящим, и яже будущая, будущим:
47 много бо тебе останет, да можеши возлюбити мое сотворение паче мене, тебе же часто и самому приближахся, к неправедным же никогда:
48 но и в сем дивен еси пред вышним,
49 яко смирился еси якоже подобает тебе, и не судил еси тебе, да между праведными много славишися:
50 того ради беды многи и нищеты сотворятся тем, иже обитают век на последок, понеже во мнозей гордыни ходиша:
51 ты же о тебе разумей и о подобных тебе взыскуй славу:
52 вам бо отверст есть рай, насаждено есть древо жизни, пред(у)готовано есть будушее время, готово есть изобилие, создан есть град, искушен есть покой, совершенна есть благостыня и совершенна премудрость:
53 корень зла знаменан есть от вас, немощь и молие от вас скрыто есть, и во ад бежитъ растление в забвении:
54 преидоша болезни, и явлено есть на конецъ сокровище безсмертия:
55 не прилагай убо испытовати о множестве погибающих,
56 ибо и тии, приемлюще свободу, уничижиша вышняго, и закон его презреша, и пути его оставиша,
57 еще же и праведных его попраша,
58 и рекоша в сердцы своем: несть Бога, аще и ведяху, яко умирают:
59 якоже бо вас приимут яже предреченна суть, тако тех жажда и мучения, яже уготована суть: ибо не хотяше человека погубити,
60 но и тии, иже сотворени суть, оскверниша имя того, иже сотвори их, и неблагодарни быша тому, иже уготовал им живот:
61 сего ради суд мой ныне приближается,
62 яже не всем показах, токмо тебе и тебе подобным не многим. И отвещах и рекох:
63 се, ныне, Господи, показал еси мне множество знамений, яже начнеши творити в последний час, но не показал еси мне, в кое время.
1 И отвеща ко мне и рече: мерящь мери время в себе самем: и будет, повнегда увидиши, егда прейдет часть некоторая знамений, яже предречена суть,
2 тогда уразумееши, яко то самое есть время, в неже начнет вышний посещати век, иже от него сотворен бысть:
3 и егда узрится в веце зыбание местъ и людий смущение,
4 тогда уразумееши, яко о сих глаголаше вышний от дний, иже быша пред тобою от начала:
5 якоже бо все, еже сотворено есть въ веце, начало имать, тако и скончание, и скончание есть явлено:
6 тако и вышняго времена начала имеют явленна в чудесех и силах, и скончания в деянии и знамениих:
7 и будет, всяк иже спасется и иже возможетъ избежати делами своими и верою, еюже веровасте,
8 останется от предреченных бед и узритъ спасние мое на земли моей и в пределех моих, яко освятих мене от века:
9 и тогда умилятся, иже ныне отступиша от путий моих, и в мучениих пребудут тии, иже отвергоша я в презорстве:
10 иже бо не познаша мя, живуще благодеяния получивше,
11 и иже возненавидеша закон мой, егда еще бяху имеюще свободу и егда еще бяше им отверсто покаяния место, не уразумеша, но уничижиша,
12 сим подобает по смерти в мучении познати:
13 ты убо ктому не буди любопытлив, како нечестивии мучитися будут, но испытуй, како праведнии спасутся, и ихже век, и ради которыхъ век, и когда.
14 И отвещах и рекох:
15 древле глаголах и ныне глаголю и после возглаголю, яко множае суть, иже погибнут, нежели иже спасутся, якоже умножаются волны над каплю.
16 И отвеща ко мне и рече:
17 какова нива, такова и семена, и каковы цвети, таковы и пестроты, и каков делатель, таково и дело, каков земледелец, таково и земледелство, понеже время бяше века:
18 и ныне егда бых уготовляющь тем, иже ныне суть, прежде неже бысть век, въ немже бы обитали: и никтоже противу рече мне:
19 тогда бо всяк, и ныне творец в мире семъ уготованнем, и в жатве неоскудевающей, и в законе неизследимем растлени суть нравы своими:
20 и разсмотрих век, и се, бяше беда ради помышлений, яже в нем приидоша:
21 и видех, и простих ему зело, и сохранихъ мне ягоду от грозда и саждение от колена многа:
22 да погибнет убо множество, еже без вины рождено есть, и да сохранится ягодица моя и насаждение мое, еже великим трудомъ соверших:
23 ты же, аще и еще спустиши седмь дний инех, но да не постишися в них,
24 пойдеши на поле цветное, идеже дом несть создан, и снеси токмо от цветов полевых, и мяса да не вкусиши, и вина не пиеши, но токмо цветы:
25 молися вышнему непрестанно, и прииду и возглаголю с тобою.
26 И идох, якоже рече мне, на поле, еже зовется ардаф, и седох тамо в цветех, и от трав селных ядох, и бысть ми пища их в сытость.
27 И бысть по седмих днех, и аз лежахъ на сене, и сердце мое паки смущашеся, якоже прежде.
28 И отверзошася уста моя, и начах глаголати пред вышним и рекох:
29 о, Господи! тя нам показуяй показался еси отцем нашим в пустыни непроходней и неплодней, егда бяху исходяще от египта,
30 и глаголющь рекл еси: ты, израилю, послушай мя, и семя иаковле, вонми словесем моим:
31 се бо, аз сею закон мой, и сотворитъ в вас плод, и прославитеся в нем во век:
32 ибо отцы ваши приемлюще закон не сохраниша и законная моя не соблюдоша, и бысть плод закона неродящь: ниже бо можаше, понеже твой бе:
33 зане, иже прияша, погибоша не сохраняюще, еже в них сеяно бысть:
34 и се, обычай есть, да егда прииметъ земля семя, или корабль море, или сосудъ некий пищу или питие: егда будет повреждено то, в немже сеяно есть, или то, в немже поставлено есть,
35 купно и то, еже насеяно или поставлено есть, или яже прията суть, истребляются, и восприятая уже не пребывают пред нами: нам же не тако сотворено бысть:
36 мы бо, иже закон прияли есмы, согрешающе погибохом, и сердце наше, еже восприя его:
37 яко закон не погибе, но пребывает во своемъ труде.
38 И егда глаголах сия в сердцы моем, воззрех очима моима и видех жену в десней стране, и се, сия рыдаше и плакаше со гласомъ великим и душею боляше зело, и одеяние ея раздрано, и пепел на главе ея.
39 И оставих помышления, в которых быхъ мысля, и обратихся к ней
40 и рекох ей: о чем плачеши, и что болиши душею?
41 И рече ко мне: остави мя, господи мой, да восплачу себе и приложу болезни, яко зело огорчихся душею и смирена есмь зело.
42 И рекох ей: что страждеши? рцы ми. И рече ко мне:
43 неплодна бых аз раба твоя и не родих, имеющи мужа лет тридесять:
44 аз бо на всяк час и на всяк день, и лет сих тридесять молюся вышнему день и нощь:
45 и бысть, по тридесятих летех услыша мя Бог рабу твою, и виде смирение мое, и внят скорбению моему, и даде мне сына: и ублажихся о нем зело аз и муж мой и вси граждане мои, и почтихом зело всесильнаго:
46 и вскормих его с трудом великим:
47 и бысть, егда возрасте и прииде пояти жену, сотворих день пирный.
1 И бысть, егда вниде сын мой в чертог свой, паде и умре:
2 и превратихом вся светлая, и восташа вси граждане мои во утешение мое, и почих даже до другаго дне до нощи:
3 и бысть, егда вси почиваху, да мя утешат, да покоюся: и востах нощию, и бежах, и приидох, якоже видиши, на сие поле,
4 и помышляю уже не возвратитися во град, но зде пребывати, и не ясти, ниже пити, но безпрестани рыдати и поститися дондеже умру.
5 И оставих словеса, в нихже бех, и отвещахъ с яростию к ней и рекох:
6 буя паче всех жен, не видиши ли плача нашего и яже нам случишася?
7 яко сион мати наша всякою скорбию скорбитъ и смирением смирена есть и плачет вельми:
8 и ныне понеже вси рыдаем и скорбни есмы, яко вси прискорбни есмы, ты же скорбиши о единем сыне:
9 вопроси бо земли, и речет тебе, яко сия есть, ейже подобает рыдати падения толикихъ на ней раждающихся:
10 и от нея от начала вси рождени, инии же приидут, и се, едва не вси в погибель отходят, и истребление бывает множеству их:
11 и кто убо имать рыдати паче сея, яже толь велие множество погубила, нежели ты, яже о единем болезнуеши?
12 аще же речеши мне: яко несть плачь мой подобен земли, понеже плод чрева моего погубих, егоже в печалех породих и с болезнию родих,
13 земля же по пути земли, отиде же в ней множество настоящее, якоже случися:
14 и аз тебе реку: якоже ты с трудомъ родила еси, тако и земля дает плод свой человеку от начала ему, иже сотворил ю:
15 ныне убо воздержи сама у себе болезнь твою и крепко носи яже тебе случишася падения:
16 аще бо оправдиши предел Божий и советъ его, приимеши во время и в таковых похвалишися:
17 вниди убо во град к мужу твоему.
18 И рече ко мне: не сотворю, ни вниду во град, но зде умру.
19 И приложих еще глаголати к ней и рекох:
20 не твори сего словесе, но соизволи совету моему: колико бо падение сиону? утешися ради болезни Иерусалима:
21 видиши бо, яко освящение наше опусте, и олтарь наш сотрен есть, и церковь наша разорена есть,
22 и псалтир наш смирен есть, и песнь умолче, и радость наша разрушена есть, и свет светилника нашего угашен есть, и кивот завета нашего расхищен есть, и святая наша осквернена суть, и имя, еже воззвано есть над нами, едва не осквернено есть, и чада наша укорение претерпеша, и священницы наши сожжени суть, и левити наши в пленение отидоша, и девицы наша осквернены суть, и жены наша насилие пострадаша, и праведнии наши восхищени суть, и отроцы наши изгибнуша, и юноши наши служиша, и крепцыи наши изнемогоша:
23 а сие всех паче знамение сиону, яко испаде от славы своея, ибо и предан есть в руки ненавидящих ны:
24 ты убо оттряси твою печаль многую и отложи от себе множество болезней, да тя помилует крепкий, и покой сотворит тебе вышний, упокоение трудов.
25 И бысть егда глаголах к ней, лице ея возсия внезапу и зрак, блисташе видение ея, яко бых ужасен зело от нея и помышлях, что есть сие.
26 И се, внезапу испусти шум гласа великий, страха полный, яко поколебатися земли от шума жены.
27 И видех, и се, ктому жена не являшеся мне, но град созидашеся, и место показовашеся от оснований великих: и устрашихся и возопихъ гласом великимъ
28 и рекох: где есть уриил ангел, иже от начала прииде ко мне? понеже той мя сотвори приити во множестве ужаса ума сего, и бысть конец мой в растление, и молитва моя в поношение.
29 И егда бых глаголющь аз сия, се, прииде ко мне и виде мя:
30 и се, бых лежащь яко мертв, и разумъ мой отчужден бысть: и удержа десницу мою, и укрепи мя, и постави мя на нозе мои, и рече ми:
31 что тебе есть? и вскую смущен есть разум твой и чувства сердца твоего? и вскую смущаешися? И рекох: яко оставил мя еси,
32 и аз убо сотворих по словесем твоим, и изыдох на поле, и се, видех и вижду, яко не могу провещати.
33 И рече ко мне: стани яко муж, и возвещу ти. И рекох:
34 глаголи, господи мой, ты ко мне и не остави мя, яко да не всуе умру,
35 яко видех, яже не ведях, и слышу, яже не вем: или чувство мое лжет, и душа моя мечтание видит?
36 ныне убо молю тя, да скажеши рабу твоему о ужасе сем.
37 И отвеща ко мне и рече:
38 слыши мя, и научу тя, и реку тебе о коихъ боишися, яко вышний откры тебе тайны многи,
39 виде прав путь твой, яко безпрестани скорбиши о людех твоих и зело рыдаеши сиона ради.
40 Сей убо разум видения, еже тебе явися мало прежде:
41 юже видел еси рыдающую, начал еси утешати ю,
42 ныне же уже лица женска не видиши, но явися тебе град созидаемый,
43 и яко возвещаше тебе о падении сына своего, сие есть решение:
44 сия жена, юже видел еси, сия есть сион: и понеже рече тебе, юже и ныне узриши яко град создан,
45 и яко рече тебе, яко безплодна бяше лет тридесять: сиречь, за еже бяху летъ тридесять, егда не бысть в нем еще жертва приношена:
46 и бысть по летех тридесятих, созда соломонъ град и принесе приношения тогда, егда роди неплоды сына.
47 А еже рече тебе, яко воспита его с трудом, сие бяше обитание во Иерусалиме.
48 А еже рече тебе, яко сын мой грядый в свой чертог мертв бысть, и случися ему падение, то бяше, еже сотворено есть падение Иерусалиму.
49 И се, видел еси подобие ея, и яко сына рыдаше, начал еси утешати ю. И о сих, яже случишася, сия подобаше тебе открыти.
50 И ныне видит вышний, яко душею прискорбенъ еси и яко всем сердцем терпиши о нем, яви тебе светлость славы его и красоту лепоты его.
51 Сего бо ради рекох тебе, да живеши в поли, идеже несть дом создан.
52 Ведях бо аз, яко вышний начинаше тебе показовати сия:
53 сего ради рекох тебе, да приидеши на ниву, идеже несть основания зданию:
54 ниже бо можаше дело здания человеческаго содержатися на месте, идеже начинаше вышняго град показоватися.
55 Ты убо не бойся, ниже да устрашится сердце твое, но вниди и виждь светлость и величество созидания, колико возможно есть тебе видениемъ очес (видети).
56 И по сих услышиши, колико приемлет слышание ушес твоих слышати.
57 Ты бо блажен еси паче многих и званъ еси пред вышняго яко не мнози.
58 В нощи же, яже заутра будет, пребуди зде,
59 и покажет тебе вышний оная видения вышших, яже сотворит вышний обитающим на земли въ последния дни.
60 И спах ту нощь и другую, якоже рече мне.
1 И видех сон, и се, восхождаше от моря орел, емуже бяху дванадесять крил пернатых и главы три.
2 И видех, и се, простираше криле свои по всей земли, и вси ветри небеснии надыхаху въ него и собирахуся.
3 И видех, и от перия его раждахуся сопротивная перия, и тая творяхуся в перийцах дробныхъ и малых:
4 ибо главы его бяху покойны, и средняя глава бе болши инех глав, но та покояшеся с ними.
5 И видех, и се, орел летяще крилами своими и воцарися на земли и над живущими на ней.
6 И видех, яко повиновена бяху ему вся поднебесная, и никтоже ему противляшеся ни един от твари, яже есть на земли.
7 И видех, и се, воста орел на ногти своя и испусти глас перием своим, глаголя:
8 не бдите вси вкупе, спите един кийждо в месте своем и по времени бдите,
9 главы же на последок да сохранятся.
10 И видех, и се, глас не исхождаше от глав его, но от среды тела его.
11 И исчислих противная перия его, и се, сих бяше осмь.
12 И видех, и се, о десную страну воста едино перо и воцарися над всею землею.
13 И бысть, егда царствоваше, прииде ему конец, и не явися место его, и ино воста и царствоваше: тое много держа время.
14 И бысть, егда царствоваше, и грядяше конецъ его, да не явится якоже прежднее,
15 и се, глас испущен бысть тому, глаголя:
16 слыши ты, еже толико время держало еси землю, сия возвещаю тебе, прежде неже начнеши не являтися:
17 никтоже последи тебе одержит время твое, но ни пол его.
18 И воздвижеся третие и одержа началство, якоже и преждняя, и не явися и тое.
19 И тако случашеся всем иным, коемуждо особно началство содержати и паки никогда явитися.
20 И видех, и се, во время последствующее перие воздвизахуся о десную страну, да одержатъ и тии началство, и от тех быша, иже содержаху, но обаче абие не являхуся:
21 ибо и нецыи от них воздвизахуся, но не содержаху началства.
22 И видех по сих, и се, не явишася дванадесять перий и два перийца.
23 И ничтоже бяше остало в теле орли, токмо две главы покоящияся и шесть перийц.
24 И видех, и се, шестим перийцам разделена суть два и пребыста под главою, яже есть на десней стране, ибо четыри пребыша в месте своем.
25 И видех, и се, подкрилия мышляху себе воздвигнути и одержати началство.
26 И видех, и се, едино воздвижено есть, но абие не явися,
27 и вторая скорее, неже прежняя, не явишася.
28 И видех, и се, два, яже остастася въ себе сами, помышляста и тая царствовати.
29 И в том егда помышляста, и се, едина от покоящихся глав, яже бяше средняя, возбуждашеся: сия бо бяше от дву главу болшая.
30 И видех, яко соединены суть две главы с собою,
31 и се, обращена есть глава с теми, яже с нею бяху, и снеде два подкрылята, яже помышляста царствовати.
32 Сия же глава устраши всю землю и обладаше на ней теми, иже обитают на земли, с трудностию многою, и власть обдержа над кругом земнымъ паче всех крил, яже быша.
33 И видех по сих, и се, средняя глава внезапу не явися, и сия якоже криле.
34 Остастеся же две главы, яже и те такожде царствовасте на земли и над обитающими на ней.
35 И видех. и се, пожре глава, сущая о десную страну, оную, яже о шуюю.
36 И слышах глас глаголющь ми: зри противу тебе и разсмотряй еже видиши.
37 И видех, и се, якоже лев разгневанъ от леса рыкающь, и видех, яко испускаше глас человеческии ко орлу, и рече глаголя:
38 слыши ты, и возглаголю тебе, и речет вышний тебе:
39 не ты ли еси, иже остался от четырехъ животных, яже сотворих царствовати в веце моем, и да чрез них приидет конец века их?
40 и четвертый грядый победи вся животная, яже преидоша, и властию одержа век со трепетомъ многим и всю вселенную с трудностию лютою, и обиташе толико времен на крузе земнем съ лестию:
41 и судил еси землю не со истиною,
42 сокрушил бо еси кротких и повредил еси миролюбивых, и возлюбил ложных, и разорилъ еси жилища их, иже плод творяху, и смирилъ еси стены их, иже тебе не повредиша:
43 и взыде укорение твое к вышнему и гордыня твоя ко крепкому,
44 и узре вышний гордая времена, и се, скончана суть, и беззакония его исполнишася:
45 сего ради не являйся ты, орле, и криле твои грозныя и перийца твоя строптивая, и главы твоя лукавыя, и ногти твои злейшии, и все тело твое суетное,
46 яко да прохладится вся земля и обратится свободна от твоея силы, и уповает на судъ и милосердие того, иже сотвори ю.
1 И бысть, егда глаголаше лев словеса сия ко орлу, и видех:
2 и се, яже оста глава, и не явишася четыри крила оная, яже к нему преидоша и воздвигошася да царствуют, и бяше царство их скудно и молвы полно.
3 И видех, и се, та не являхуся, и все тело орлее возжигашеся, и устрашися земля зело, и аз от молвы и ужаса ума и от велика страха воспрянух и рех духу моему:
4 се, ты подал еси мне то в том, яко испытуеши пути вышняго:
5 се, еще утружден есмь душею и духомъ моим изнемогох зело, и ниже малая есть во мне сила от множества боязни, еюже устрашихся нощи сея:
6 ныне убо помолюся вышнему, да мя укрепитъ даже до конца.
7 И рекох: владыко Господи, аще обретох благодать пред очима твоима, и аще оправдан есмь пред тобою паче многих, и аще истинно взыде моление мое пред лицем твоим,
8 укрепи мя и яви мне рабу твоему толкование и разделение видения грознаго сего, да совершеннее утешиши душу мою:
9 достойна бо мене имел еси показати мне времена последняя. И рече ко мне:
10 сие есть толкование видения сего:
11 орла егоже видел еси восходяща от моря, то есть царство, еже видено бысть в видении даниила брата твоего,
12 но несть ему протолковано, яже азъ ныне тебе протолкую.
13 Се, дние грядут, и востанет царство на земли, и будет боязнь вящшая всем царством, яже быша прежде его:
14 царствовати же будут на ней царие дванадесять, един по единому,
15 ибо вторый начнет царствовати, и той одержитъ вящшее время паче дванадесяти:
16 сие есть толкование дванадесяти крил, яже видел еси.
17 И егоже слышал еси глас, иже глаголаше, не от глав его исходящь, но от средины тела его,
18 сие есть толкование: яко после времене царства того родятся рвения не мала, и бедствовати имать, яко да падет, и не падет тогда, но паки возставится в свое начало:
19 а яже видел еси подкрилец осмь прилепляющихся крилам его,
20 сие есть толкование: востанут в томъ осмь царей, ихже будут времена легка и лета скорая, и два убо от них погибнут:
21 приближающуся же времени среднему, четыри сохранятся во время, егда начнет приближатися время его да скончается, двое же на конец сохранятся.
22 А яко видел еси три главы покоящияся,
23 сие есть толкование: в последняя его воздвигнет вышний три царства и призовет въ ня многих, и пообладают землею:
24 и иже обитают на ней, с трудом многимъ на всех, иже быша прежде сих, сего ради тии названи суть главы орли:
25 сии бо будут, иже возоглавят нечестия его и иже совершат последняя его.
26 А яко видел еси главу болшую неявляющуюся, сие есть толкование ея: яко единъ от них на одре своем умрет, но обаче с мучением,
27 ибо два, иже пребудут, мечь их пояст:
28 единаго бо мечь пояст сущих с ним, но обаче и сей мечем на последок падет.
29 А яже видел еси два подкрилия восходящая на главу, яже есть о десную страну,
30 сие есть толкование: сии суть, ихже соблюде вышний в конец свой, то есть царство скудное и скорбей полно.
31 Якоже видел еси и льва, егоже виделъ еси от леса возбудившася, рыкающа и глаголюща ко орлу, и обличающа его и неправды его всеми словесы его, якоже слышал еси:
32 сей есть ветр, егоже сохранил вышний на конец на них и на нечестия их, и обличитъ тех и обявит пред теми прелести их,
33 поставит бо их на суде живых: и будет, егда обличит их, тогда накажет их:
34 ибо останок людий моих избавит с бедностию, иже сохранени суть на концах моих, и ублажитъ их, дондеже приидет конец день суда, о немже глаголах тебе от начала.
35 Сей сон, егоже видел еси, и сия суть толкования.
36 Ты убо един достоин был еси знати тайну сию вышняго:
37 напиши убо вся сия в книгу, яже виделъ еси, и положи я в месте сохранне,
38 и научиши сим мудрыя от людий твоих, ихже сердца веси, яко могут прияти и хранити тайны сия:
39 ты же еще потерпи зде иных дний седмь, да тебе показано будет все, еже изволится вышнему показати тебе. И отиде от мене.
40 И бысть, егда услыша весь народ, яко проидоша седмь дний, и аз не возвратихся во град, и собрашася вси от меншаго даже до болшаго, и приидоша ко мне и рекоша ми, глаголюще:
41 что согрешили есмы тебе и что неправо содеяхом на тя, яко оставляяй нас селъ еси на месте том?
42 ты бо нам остался еси един от всехъ людий, якоже грозд от винограда и яко светилникъ в месте мрачне и яко пристанище и корабль спасеный от бури:
43 или недоволна нам суть злая, яже приключаются?
44 аще убо ты нас оставиши, коль лучше бы нам было, аще быхом сожжени были и мы с сожжением сиона?
45 ниже бо мы есмы лучши тех, иже тамо умроша. И плакаша гласом великим. И овещахъ к ним и рекох:
46 уповай, израилю, и не скорби ты, доме иаковль:
47 есть бо память о вас пред вышним, и крепкий не забы вас в напасти:
48 аз бо не оставих вас, ни отидох от вас, но приидох на сие место, да помолюся о разорении сиона, да взыщу милосердие за смирение святыни вашея:
49 и ныне идите един кийждо в дом свой, и аз прииду к вам по днех сих.
50 И отиде народ, якоже рекох ему, во град:
51 аз же седох на поли седмь дний, якоже ми повеле, и ядох токмо от цветов селных, и от трав сотворена бысть мне пища во днехъ тех.
1 И бысть по днех седми, и видех сон нощию:
2 и се, от моря ветр воставаше, да возмутитъ вся волны его.
3 И видех, и се, возмогаше той человекъ с тысящьми небесными, и аможе лице свое обращаше, да воззрит, трепетаху вся, яже под ним видяхуся,
4 и аможе исхождаше глас от уст его, возжизахуся вси, иже слышаху глас его, якоже покоится земля, егда услышит огнь.
5 И видех по сем, и се, собирашеся множество людий, ихже не бе числа, от четырех ветръ небесных, да победят человека, иже изыде от моря.
6 И видех, и се, сам себе извая гору велику и возлете на ню:
7 аз же исках видети страну или место, откуду изваяна бысть гора, и не могох.
8 И по сем видех, и се, вси, иже собрани суть на него, да поборют его, бояхуся зело, обаче дерзаху ратовати.
9 И се, егда увиде стремление множества грядущаго, не воздвиже руки своея, ни оружия держаше и ни котораго орудия браннаго, токмо якоже видех:
10 понеже испусти из уст своих аки дохновение огня, и от устен его яко дух пламене, и от языка своего испускаше искры и бури, и соединена суть вся вкупе сия, дохновение огня и дух пламене и множество бури:
11 и нападе на множество во устремлении, еже уготовано бысть ополчатися, и пожже всехъ (и искорени), яко абие ничтоже видено бяше от безчисленна множества, разве токмо прахъ и дыма воня. И видех и устрашихся.
12 И по сих видех того человека сходящаго с горы и зовуща к себе множество иное мирное:
13 и приступаху к нему лица человеков многих, некиих радующихся и некиих скорбящих, нецыи же привязани, нецыи приводяще от тех, иже приношахуся. И изнемогох от множества страха, и возбудихся и рекох:
14 ты от начала показал еси рабу твоему чудеса сия, и достойна мя имел еси, да приимеши молитву мою:
15 и ныне покажи мне еще толкование сна сего,
16 якоже бо мню в чувстве моем, горе иже оставлени будут во дни тыя, и наипаче горе сим, иже не суть оставлени,
17 иже бо не суть оставлени, скорбни бяху:
18 разумею ныне, яже суть отложена на последния дни, и усрящут их, но и тех, иже оставлени суть:
19 сего бо ради приидоша в беды великия и в нужды многия, якоже показуют сония сия:
20 обаче легчае есть бедствующему приити на сие, неже прейти яко облаку от века и ныне видети, яже случатся в последняя времена. И отвеша ко мне и рече:
21 и видения толкование реку тебе, и о нихже глаголал еси, отверзу ти.
22 Понеже о сих рекл еси, иже оставлени суть, сие есть толкование:
23 иже отимет беду в то время, той сохранися: иже в беду впадоша, сии суть, иже имеютъ дела и веру к крепчайшему:
24 веждь убо, яко болши ублажени суть иже оставлени, паче тех, иже мертви суть.
25 Сия толкования видению: яко видел еси мужа восходяща от сердца морскаго,
26 той есть, егоже хранит вышний многа времена, иже самим собою избавит сотворение свое и той разсмотрит, иже оставлени суть.
27 А яко видел еси от уст его исходити аки дух и огнь и бурю,
28 и яко не держаше меча и ни орудия браннаго, порази бо стремление его множество, еже прииде ратовати его, сие есть толкование:
29 се, дние грядут, егда начнет вышний избавляти сих, иже на земли суть,
30 и приидет ужас ума на тех, иже обитают на земли,
31 и инии иных помыслят воевати, град на град и место на место, и язык на языкъ и царство на царство:
32 и будет, егда будут сия, и случатся знамения, яже прежде показах ти, и тогда открыется сын мой, егоже видел еси яко мужа восходяща:
33 и будет, егда услышат вси языцы глас его, и оставит един кийждо во стране своей брань свою, юже имут другъ на друга,
34 и соберется во едино собрание множество безчисленно, яко хотяще приити и ополчитися на него:
35 той же станет на верху горы сиона:
36 сион же приидет и явится всем уготованъ и создан, якоже видел еси гору изваяну без рук:
37 той же сын мой обличит, яже изобретоша языцы, нечестия их та, яже к бури приближишася ради лукавых помышлений их и мучений, имиже начнут мучитися,
38 яже подобна суть пламени: и погубит ихъ без трудности, по закону, иже огню подобенъ есть.
39 А яко видел еси его собирающаго к себе иное множество мирное:
40 сии суть десять колен, иже пленени быша от земли своея во дни осии царя, егоже плени салманасар царь ассирийский и преведе ихъ за реку, и преведени суть в землю иную,
41 тии же себе даша совет той, да оставятъ множество языков, и дабы прошли в дальную страну, идеже никогда обиташе род человеческий,
42 или тамо хранити законная своя, ихже не храняху во стране своей:
43 входами же тесными реки евфрата внидоша:
44 сотворил бо им тогда вышний знамения и уставил жилы речныя, дондеже пройдут:
45 оною бо страною бяше путь мног, путьствовати лето едино и пол, ибо страна та зовется арсареф:
46 тогда обиташа тамо даже до последняго времене: и ныне паки егда начнут приходити,
47 паки вышний уставит жилы речныя, да возмогут пройти: сих ради видел еси множество с миром:
48 но и иже оставлени суть от людий твоих, сии суть, иже обрящутся внутрь предел моих:
49 будет убо, егда начнет погубляти множество тех, иже собрани суть языцы, защититъ их, иже премогоша людий,
50 и тогда покажет им велие множество чудес.
51 И рекох аз: владыко Господи, сие ми покажи, чесо ради видех мужа восходяща от сердца морскаго? И рече мне:
52 якоже не можеши сия испытати, или знати, яже суть во глубине морстей, тако не можетъ кийждо видети на земли сына моего, или тех, иже с ним суть, токмо во время дне.
53 Сие есть толкование сония, еже виделъ еси и егоже ради просвещен еси зде един:
54 оставил бо еси твой и окрест моего упражднялся еси закона и искал еси:
55 житие бо твое устроил еси в премудрости и чувство твое назвал еси материю:
56 и того ради показах тебе мзды у вышняго: будет бо по инех триех днех, иная к тебе возглаголю и изявлю тебе тяжкая и дивная.
57 И идох и приидох на поле, много славя и хваля вышняго о дивных, яже по времени творяше,
58 и яко управляет сие, и яже суть во временех сотворена: и седох ту три дни.
1 И бысть в третий день, и аз седях под дубом, и се, глас изыде противу мене от купины и рече: ездро, ездро! И рекох:
2 се, аз, Господи. И востах на нозе мои. И рече ко мне:
3 открываяся откровен есмь на купине и глаголах ко моисею, егда служаху людие мои во египте,
4 и послах его и изведох люди моя от египта, и возведох его на гору синайску и держах его пред собою дни многи,
5 И возвестих ему чудеса многа и показахъ ему времен тайная и конец, и заповедахъ ему глаголя:
6 сия во явление сотвориши словеса и сия скрыеши:
7 и ныне тебе глаголю:
8 знамения, яже показах, и сония, яже видел еси, и толкования, яже ты веделъ еси, в сердцы твоем положи я,
9 ты бо восприят будеши от всех, обратишися остатний с советом моим и с подобными твоими, дондеже скончаются времена:
10 яко век погуби юность свою, и времена приближаются старетися:
11 на дванадесять бо частей разделен есть век, и проидоша его десятая и полдесятыя части,
12 осташася же его после полдесятыя части:
13 ныне убо устрой дом твой и накажи люди твоя, и утеши смиренных их и отрецыся уже тления,
14 и отпусти от себе смертное помышление и отверзи от себе тягости людския, и извлецы уже от себе немощное естество и отстави во едину страну смущающая тя помышления, и тщися преселитися от времен сих:
15 яже бо видел еси ныне случившаяся злая, паки тех горшая сотворят:
16 колико бо изнеможет век от старости, толико умножатся на обитающих злая:
17 удалибося далече истина, и приближися лжа: уже бо тщится приити еже виделъ еси видение.
18 И овещах и рекох: пред тобою, Господи:
19 се бо, аз пойду, якоже повелел еси мне, и накажу настоящия люди: а иже родятся, кто научит я?
20 поставлен бо есть век во тме: иже обитают в нем, без света:
21 понеже закон твой сожжен есть, того ради никтоже знает, яже от тебе сотворена суть, или яже начнутся дела:
22 аще бо обретох благодать пред тобою, посли в мя дух свят, да напишу все, еже сотворено бысть в веце от начала, яже быша в законе твоем писана, да возмогут человецы обрести стезю, и иже восхотят жити в последних временех, да живут.
23 И отвеща ко мне и рече: шед собери люди и речеши к ним, да не ищут тебе дний четыредесять,
24 ты же уготови себе дщиц много и возми с собою сариа, давриа, салемиа, ехана и асиеля, пять их, иже уготовани суть к писанию скоро:
25 и приидеши семо, и аз возжгу в сердцы твоем светилник разума, и не угаснет, дондеже скончаются, яже начнеши писати:
26 и когда совершиши, некая явственно да сотвориши, некоторая мудрым сокровенно предаси, в заутрии бо в сей час начнеши писати.
27 И идох, якоже ми повеле, и собрахъ вся люди и рекох:
28 слыши, израилю, словеса сия:
29 странствоваша отцы наши от начала во египте и избавлени суть оттоле,
30 и прияша закон жизни, егоже не сохраниша, егоже и вы по них преступисте:
31 и дана вам есть земля в жребий, и земля сион, и отцы ваши и вы беззаконие сотвористе и не содержасте путий, ихже повеле вам вышний:
32 а понеже праведный судия есть, отял от вас во время, еже дарова:
33 и ныне вы зде есте, и братия ваша въ вас суть:
34 аще убо повелите чувству вашему и поучите сердце ваше, живи содержани будете и по смерти милость наследите:
35 суд бо по смерти приидет, егда паки оживем, и тогда праведных имена явятся и нечестивыхъ дела покажутся:
36 ко мне убо никтоже да приступит ныне, ни взыщет мене даже до четыредесяти дний.
37 И приях пять мужей, якоже заповеда мне, и идохом в поле и пребыхом ту.
38 И бысть в заутрии, и се, глас воззва мя глаголя: ездро! отверзи уста твоя и пий, имже тя напою.
39 И отверзох уста моя, и се, чаша полна подаяшеся мне: и сие, имже бе исполнена, бяше якоже вода, цвет же ея огню подобен.
40 И приях и пих: и тогда, егда пиях, сердце мое мятяшеся разумом, и в персех моихъ возрасташе премудрость, ибо дух мой содержашеся памятию:
41 и отверста быша уста моя и не быша затворена ктому.
42 Вышний даде разум пятим мужем, и писаша, яже глаголахуся ужасы нощныя, ихже не ведяху.
43 Нощию же ядяху хлеб, аз же во дни глаголахъ и нощию не молчах.
44 И написаны суть за четыредесять дний книги двести четыри.
45 И бысть егда совершишася четыредесять дний,
46 глагола вышний, рекий: первая, яже ппсалъ еси, в яве постави, и да чтут достойнии и недостойнии:
47 последняя же седмьдесят сохрани, да предаси их мудрым от людий твоих:
48 в тех бо есть корень разума, и премудрости источник, и ведения река. И сотворих тако.
1 Се, глаголи во уши людем моим словеса пророчества, яже дам во уста твоя, глаголет Господь:
2 и сотвори, да на хартии напишутся, яко верна и истинна суть:
3 не бойся от помышлений на тя, ниже да смутятъ тя неверности глаголющих,
4 понеже всяк неверный в неверии своем умрет.
5 Се, аз наведу (рече Господь) на круг земный злая, мечь и глад, и смерть и погубление,
6 понеже оскверни беззаконие всю землю, и наполнена суть дела их вредная.
7 Сего ради рече Господь:
8 уже не умолчу о нечестиих их, яже беззаконно соделовают, ни потерплю им, яже зле творят: се, кровь неповинная и праведная вопиет ко мне, и души праведных вопиют безпрестанно:
9 отмщая отмщу им, рече Господь, и восприиму всяку кровь неповинную от тех ко мне.
10 Се, людие мои яко стада к заколению ведутся, уже не потерплю того, еже обитати имъ в земли египетстей,
11 но изведу я рукою сильною и мышцею высокою, и поражу (египетъ) казнию якоже прежде, и растлю всю землю его:
12 восплачется египет, и основания его казнию избиена будут и наказанием, яже наведет ему Бог:
13 восплачут делателе делающии землю, яко оскудеют семена их от ржи и града и от звезды страшныя.
14 Горе веку, и иже обитают в нем:
15 понеже приближися мечь и сокрушение их, и востанет язык на язык к брани, и мечь в руках их.
16 Будет бо непостояние человеком, и инии иных одолевающии вознерадят о цари своем, и началницы путий о делех своих в могутстве своем.
17 Восхощет бо человек во град ити и не возможет:
18 гордыни бо их ради гради смятутся, домы сокрушатся, человецы убоятся.
19 Не умилосердится человек ко искреннему своему, на разорение домов их во оружие, на расхищение имений их, глада ради хлебнаго и оскобления многа.
20 Се, аз созываю, рече Господь, вся цари земския, еже мене боятися, иже суть от востока и юга, от севера и ливана, ко обращению къ себе, и воздати, яже воздаша тем:
21 якоже творят даже до днесь избраннымъ моим, тако сотворю и воздам в недра их. Сия глаголет Господь Бог:
22 не пощадит десница моя грешников, и не престанет мечь на проливающих кровь неповинную на земли:
23 изыде огнь от гнева его, и пожре основания земли, и грешники яко хврастие зажжено.
24 Горе сим, иже согрешают и не содержатъ заповедий моих, рече Господь,
25 не прошу им: отидите, сынове, от власти, не оскверняйте святыни моея.
26 Яко весть Господь всех, иже согрешаютъ ему, сего ради предаде их в смерть и въ заколение.
27 Уже бо приидоша на круг земный злая, и пребудете в них, не избавит бо вас Бог, понеже согрешисте пред ним.
28 Се, видение грозное, и лице его от востока:
29 и изыдут рождения змиев аравскихъ на колесницах многих: якоже дыхание (ветровъ) число их понесется по земли, яко уже убоятся и вострепещут вси, иже их услышат:
30 кармоняне неистовствующии во гневе изыдутъ яко вепри от дубравы и приидут в силе велицей, и станут на брань с ними и опустошатъ часть земли ассирийския:
31 и по сих превозмогут змиеве помнящии рождение свое и обратятся согласующе в силе велицей на постизание их:
32 сии смутятся, и умолчат в силе их, и обратят нозе свои на бежание:
33 и от области ассирийския обстоятель обстанетъ их и скончает единаго от них, и будетъ боязнь и страх в полце их, и рвение на цари их.
34 Се, облацы от востока и севера даже до полудне, и лице их грозно зело, исполнено гнева и бури:
35 и сразятся между собою и сразят звезду многу на земли и звезду их: и будет кровь от меча даже до утробы,
36 и гной человеческий даже до седла велблюждя, и будет боязнь и страх мног на земли,
37 и устрашатся, иже узрят гнев сей, и трепет приимет их:
38 и по сем воздвигнутся бури многи от полудне и севера, и часть ина от запада,
39 и премогут ветри от востока, и отворятъ его, и облак, егоже воздвиже во гневе, и звезда на сотворение страха от восточна ветра и западна повредится:
40 и воздвигнутся облацы велии и зелнии, полни гнева, и звезда, да устрашат всю землю и обитающих на ней, и возлиют на всяко место высоко и вознесеное звезду страшную,
41 огнь и град, и мечи летающия и воды многи, яко да наполнятся вся поля и вси источницы исполнением вод многих:
42 и сокрушат грады и стены, и горы и холмы, (и удолия) и древа дубравная, и сена лужная и жита их,
43 и пройдут непоколеблеми до вавилона и сокрушатъ его:
44 соберутся к нему, и обыдут его, и излиютъ звезду и всю ярость нань: и взыдет прахъ и дым даже до небесе, и вси, иже окрест, возрыдают о нем,
45 и иже под ним останут, послужат тем, иже устрашиша их.
46 И ты, асие, согласна во упование вавилона, и слава лица его:
47 горе тебе бедней! понеже уподобилася еси ему и украсила еси дщери твоя в любодеянии, ко угождению и прославлению в любовных твоих, иже с тобою похотеша всегда блудити:
48 ненавиденному подражала еси во всех делехъ его и в начинаниих его.
49 Сего ради, рече Господь, послю на тя злая, вдовство, убожество и глад, и мечь и губителство на разорение домов твоих от насилия и смерти,
50 и слава силы твоея якоже цвет изсхнет, егда востанет зной, иже послан есть на тя:
51 изнеможеши якоже убожайшая язвена и наказана от жен, яко не возмогут тебе прияти сильнии и любовницы.
52 Еда аз тако возревную тебе, рече Господь,
53 аще бы не заклала еси избранных моихъ во всяко время, возвышающи на поражение руце и глаголющи на смерть их, егда упивалася еси?
54 украси лепоту лица твоего:
55 мзда блужения твоего в недрех твоих, сего ради воздаяние приимеши.
56 Якоже сотвориши избранным моим, рече Господь, тако сотворит тебе Бог и предаст тя во злая:
57 и чада твоя гладом погибнут, ты же мечемъ падеши, и гради твои сокрушатся, и вси твои в поли оружием падут:
58 и иже суть в горах, гладом погибнутъ и ясти будут мяса своя от глада хлеба и кровь пити от жажды воды:
59 неблагополучна чрез моря приидеши и паки приимеши злая,
60 и в прехождении поразят град избиенный, и искоренят некую часть земли твоея, и часть славы твоея истребят, паки возвращающеся къ вавилону превращенному:
61 и разорена будеши им яко хврастие, и тии будут тебе аки огнь,
62 и пожрут тя и грады твоя, землю твою и горы твоя, и вся дубравы твоя и древеса плодоносная огнем пожгут,
63 сыны твоя в пленение поведут, и дани твоя в корысть возмут, и славу лица твоего истребят.
1 Горе тебе, вавилоне и асиа! горе тебе, египте и сириа!
2 Препояшитеся вретищем и власяницами и плачите сынов ваших и болезнуйте, яко приближися сокрушение ваше:
3 послан есть на вас мечь, и кто есть, иже отвратит его?
4 послан есть на вас огнь, и кто есть, иже угасит его?
5 послана суть на вас злая, и кто есть, иже отметнет я?
6 еда отженет кто льва алчуща в лес? или угасит огнь во хврастии скоро, егда начнет возгарати?
7 еда отразит кто стрелу от стрелца крепкаго испущенную?
8 Господь крепкий посылает злая, и кто есть, иже отженет я?
9 изыде огнь от гнева его, и кто есть, иже угасит его?
10 блеснет молниею, и кто не убоится? возгремит, и кто не ужаснется?
11 Господь воспретит, и кто до основания не сокрушится от лица его?
12 Земля сотрясеся и основания ея, море волнуется из глубины, и волны его возмутятся и рыбы его от лица Господня и от славы силы его.
13 Понеже крепка десница его, яже лукъ напряже: стрелы его остры, яже от него посылаются, не оскудеют, егда начнут посылатися в концы земли.
14 Се, посылаются злая и не возвратятся, дондеже приидут на землю.
15 Огнь возгарается и не угаснет, дондеже скончает основания земли.
16 Имже образом не возвращается стрела послана от сильнаго стрелца, тако не возвратятся злая, яже послана будут на землю.
17 Горе мне, горе мне! кто мя избавит во дни тыя?
18 Начало болезней, и многа стенания: начало глада, и многи погибели: начало браней, и убоятся власти: начало зол, и вострепещутъ вси.
19 Во время же то что сотворю, егда приидутъ злая?
20 Се, глад и казнь, и скорбь и теснота, послани суть бичи во исправление:
21 и во всех сих не обратятся от беззаконий своих, ни биения памятствовати будут всегда.
22 Се, будет обилие ни во чтоже на земли, тако яко возмнят себе быти управленъ мир, и тогда возрастут злая на земли, мечь, глад и велико смятение.
23 От глада бо мнози, иже обитают на земли, погибнут, и мечь изгубит прочих, иже останутъ от глада.
24 И мертвии яко мотыла извержени будут, и не будет, иже утешит их: опустеетъ бо земля, и гради ея разорени будут.
25 Не останется, иже возделает землю и иже посеет на ней.
26 Древеса дадут плоды, и кто обымет я?
27 гроздие созреет, и кто потопчет е? будет бо мест великое опустение.
28 Восхощет бо человек человека видети, или глас его слышати,
29 зане останут от града десять, и два от нивы, иже сокрыются в густых дубравах и въ разселинах каменных.
30 Имже образом оставляются в масличиихъ и на всяцем древе три или четыри маслины,
31 или якоже в винограде обранем гроздие оставляются от тех, иже прилежно виноградъ обирают:
32 тако оставятся во днех онех три или четыри от изследующих домы их мечем.
33 И оставлена будет земля пуста, и нивы ея состареются, и путие ея и вся стези ея тернием зарастут, зане не пройдут человецы по ним.
34 Восплачут девы не имущия обручников, восплачутъ жены не имеющия мужей, восплачут дщери их не имеющия помощи:
35 обручницы их в брани скончаются, и мужие их во гладе истребятся.
36 Слышите сия и познайте я, раби Господни.
37 Се, слово Господне, приимите е: не веруйте богом, о нихже рече Господь:
38 се, приближаются злая и не умедлят.
39 Имже образом бременатая егда родитъ в девятый месяц сына своего, приближающуся часу рождения ея, прежде часов двух или триехъ болезни обдержат чрево ея, и исходящу младенцу от чрева, не закоснят ни на едину черту:
40 тако не укоснят злая произыти на землю, и век возстенет, и болезни обымут и.
41 Слышите слово, людие мои, уготовайтеся на брань, и во злых тако будите, якоже пришелцы земли:
42 продаяй аки бегаяй, а купуяй аки погубляяй,
43 торгуяй аки плода не приемляй, и созидаяй аки той, иже обитати не имать:
44 сеяй, яко иже не пожнет: тако иже виноградъ режет, яко не имый обирати его:
45 иже посягают, тако аки чад не сотворят: и иже не посягают, тако яко вдовицы.
46 Того ради, иже трудятся, вотще трудятся:
47 плоды бо их иноплеменницы пожнут и имения их расхитят, и домы превратят и сынов ихъ пленят, ибо во пленении и гладе родят чада своя.
48 И иже куплю деют хищением, коль долго украшают грады и домы своя, и одержания и лица своя,
49 толико паче возненавижду их за грехи их, рече Господь.
50 Якоже ненавидит блудница жену мудру и добру зело,
51 тако возненавидит правда неправду, егда украшается, и клевещет на ню в лице, егда приидет иже защищает изыскующаго всяк грехъ на земли:
52 сего ради не уподобляйтеся ей, ни деломъ ея.
53 Яко еще мало, и возмется беззаконие от земли, а правда воцарится над вами.
54 Да не глаголет грешник, яко не согреши, понеже углие огненное возгорится на главе его, иже глаголет: не согреших пред Господемъ Богом и славою его.
55 Се, Господь весть вся дела человеческая и начинания их, и помышления их и сердца их.
56 Рече бо: да будет земля, и бысть: да будетъ небо, и бысть.
57 И словом его звезды сотворены суть, и знает число звезд:
58 иже испытует бездны и сокровища их, иже измерил есть море и зачатие его,
59 иже заключи море посреде вод и повеси землю на водах словом своим,
60 иже простре небо яко камару, на водахъ основа е,
61 иже положи в пустыни источники водныя и на верху гор езера, во испущение рек из высокаго камене, да напаяют землю,
62 иже сотвори человека и положи сердце его посреде тела, и вложи ему дух и животъ и разумъ
63 и дыхание Бога вседержителя, иже сотвори вся и испытует вся сокровенная в сокровенныхъ земли:
64 той знает начинание ваше, и яже мыслите в сердцах ваших согрешающе и хотяще утаити грехи ваша.
65 Сего ради Господь испытуяй испыта вся дела ваша и обличит вас всех,
66 и вы посрамлени будете, егда произыдутъ греси ваши пред человеки, и беззакония предстанут, яже обвиняти будут в день той.
67 Что сотворите, или како сокрыете грехи ваша пред Богом и ангелы его?
68 Се, судия Бог, бойтеся его, останитеся от грех ваших и забудите беззакония ваша уже творити их во век, и Бог изведетъ вас и избавит от всякия скорби.
69 Се бо, возгарается огнь на вас, языцы мнози, и восхитят некиих от вас и заколютъ на жертву идолом:
70 и иже соизволят им, будут им в посмехъ и в поношение и в попрание.
71 Будет бо местом место, и от соседнихъ градов востанут мнози на боящихся Господа.
72 Будут аки неистови, ни когоже щадяще на расхищение и запустение еще боящимся Господа:
73 ибо опустошат и расхитят стяжания ихъ и из домов их изженут я.
74 Тогда явится искушение избранных моих, якоже злато, еже искушается от огня.
75 Слышите, возлюбленнии мои, рече Господь: се, пред вами суть дние скорби, и от сих избавлю вас.
76 Не бойтеся, ни сумневайтеся, яко Бог предводитель ваш есть.
77 И иже хранит заповеди и повеления моя, рече Господь Бог, да не преотягчат вас греси ваши, ниже превзыдут беззакония ваша.
78 Горе иже стисняются от грех своих и покрываются беззаконии своими:
79 имже образом нива стисняется от дубравы, и тернием покрывается стезя ея, еюже не проходит человек, и исторгается, и посылается на сожжение огню.
Конец книзе третией ездры: имать в себе глав 16.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>