Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Евангелие от Марка
(шрифт на основе старой кириллицы)
Евангелие на церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16
1 Зачало евангелиа иисуса христа, сына божия,
2 якоже есть писано во пророцех: се, аз посылаю ангела моего пред лицем твоим, иже уготовит путь твой пред тобою.
3 Глас вопиющаго в пустыни: уготовайте путь господень, правы творите стези его.
4 Бысть иоанн крестяй в пустыни и проповедая крещение покаяния во отпущение грехов.
5 И исхождаше к нему вся иудейская страна и иерусалимляне: и крещахуся вси во иордане реце от него, исповедающе грехи своя.
6 Бе же иоанн оболчен власы велблужди, и пояс усмен о чреслех его, и ядый акриды и мед дивий.
7 И проповедаше, глаголя: грядет креплий мене вслед мене, емуже несмь достоин преклонься разрешити ремень сапог его:
8 аз убо крестих вы водою: той же креститъ вы духом святым.
9 (Зачало 2) И бысть во онех днех, прииде иисус от назарета галилейскаго и крестися от иоанна во иордане.
10 И абие восходя от воды, виде разводящася небеса и духа яко голубя, сходяща нань.
11 И глас бысть с небесе: ты еси сын мой возлюбленный, о немже благоволих.
12 И абие дух изведе его в пустыню.
13 И бе ту в пустыни дний четыредесять, искушаемь сатаною, и бе со зверьми: и ангели служаху ему.
14 По предании же иоаннове, прииде иисус въ галилею, проповедая евангелие царствия божия
15 и глаголя, яко исполнися время и приближися царствие божие: покайтеся и веруйте во евангелие.
16 (Зачало 3) Ходя же при мори галилейстем, виде симона и андреа брата (того) симона, вметающа мрежи в море: беста бо рыбаря.
17 И рече има иисус: приидита вслед мене, и сотворю вас быти ловца человеком.
18 И абие оставльша мрежи своя, по немъ идоста.
19 И прешед мало оттуду, узре иакова зеведеова и иоанна брата его, и та в корабли строяща мрежа:
20 и абие воззва я. И оставльша отца своего зеведеа в корабли с наемники, по немъ идоста.
21 И внидоша в капернаум: и абие в субботы вшед в сонмище, учаше.
22 И дивляхуся о учении его: бе бо учя их яко власть имый, и не яко книжницы.
23 (Зачало 4) И бе в сонмищи их человекъ в дусе нечисте, и воззва,
24 глаголя: остави, что нам и тебе, иисусе назарянине? пришел еси погубити нас: вемъ тя, кто еси, святый божий.
25 И запрети ему иисус, глаголя: умолчи и изыди из него.
26 И стрясе его дух нечистый, и возопи гласом великим, и изыде из него.
27 И ужасошася вси, якоже стязатися имъ к себе, глаголющим: что есть сие? (и) что учение новое сие, яко по области и духовомъ нечистым велит, и послушают его?
28 Изыде же слух его абие во всю страну галилейску.
29 (Зачало 5) И абие из сонмища изшедше, приидоша в дом симонов и андреов, со иаковом и иоанном.
30 Теща же симонова лежаше огнем жегома: и абие глаголаша ему о ней.
31 И приступль воздвиже ю, емь за руку ея: и остави ю огнь абие, и служаше им.
32 Позде же бывшу, егда захождаше солнце, приношаху к нему вся недужныя и бесныя.
33 И бе весь град собрался к дверем.
34 И исцели многи зле страждущия различными недуги: и бесы многи изгна, и не оставляше глаголати бесы, яко ведяху его христа суща.
35 (Зачало 6) И утро, нощи сущей зело, воставъ изыде, и иде в пусто место, и ту молитву деяше.
36 И гнаша его симон и иже с ним:
37 и обретше его, глаголаша ему, яко вси тебе ищут.
38 И глагола им: идем в ближния веси и грады, да и тамо проповем: на сие бо изыдох.
39 И бе проповедая на сонмищих их, во всей галилеи, и бесы изгоня.
40 И прииде к нему прокажен, моля его и на колену припадая пред ним, и глаголя ему, яко, аще хощеши, можеши мя очистити.
41 иисус же милосердовав, простер руку, коснуся его, и глагола ему: хощу, очистися.
42 И рекшу ему, абие отиде от него прокажение, и чист бысть.
43 И запрещь ему, абие изгна его:
44 и глагола ему: блюди, никомуже ничесоже рцы: но шед покажися иерееви и принеси за очищение твое, яже повеле моисей, во свидетелство им.
45 он же изшед начат проповедати много и проносити слово, якоже ктому не мощи ему яве во град внити: но вне в пустых местехъ бе. И прихождаху к нему отвсюду.
Зачало 7.
1 И вниде паки в капернаум по днех: и слышано бысть, яко в дому есть.
2 И абие собрашася мнози, якоже ктому не вмещатися ни при дверех: и глаголаше им слово.
3 И приидоша к нему носяще разслабленна (жилами), носима четырьми:
4 и не могущим приближитися к нему народа ради, открыша покров, идеже бе, и прокопавше свесиша одр, на немже разслабленный лежаше.
5 Видев же иисус веру их, глагола разслабленному: чадо, отпущаются тебе греси твои.
6 Бяху же нецыи от книжник ту седяще и помышляюще в сердцах своих:
7 что сей тако глаголет хулы? кто может оставляти грехи, токмо един богъ?
8 И абие разумев иисус духом своим, яко тако тии помышляют в себе, рече им: что сия помышляете в сердцах вашихъ?
9 что есть удобее? рещи разслабленному: отпущаются тебе греси? или рещи: востани, и возми одр твой, и ходи?
10 но да увесте, яко власть имать сынъ человеческий на земли отпущати грехи: глагола разслабленному:
11 тебе глаголю: востани, и возми одр твой, и иди в дом твой.
12 И воста абие, и взем одр, изыде предъ всеми: яко дивитися всем и славити бога, глаголющим, яко николиже тако видехом.
13 (Зачало 8) И изыде паки к морю: и весь народъ идяше к нему, и учаше их.
14 И мимогрядый виде левию алфеова, седяща на мытнице, и глагола ему: по мне гряди. И востав вслед его иде.
15 И бысть возлежащу ему в дому его, и мнози мытари и грешницы возлежаху со иисусомъ и со ученики его: бяху бо мнози, и по немъ идоша.
16 И книжницы и фарисее, видевше его ядуща с мытари и грешники, глаголаху ученикомъ его: что яко с мытари и грешники ястъ и пиетъ?
17 И слышав иисус глагола им: не требуют здравии врача, но болящии: не приидох призвати праведники, но грешники на покаяние.
18 (Зачало 9) И бяху ученицы иоанновы и фарисейстии постящеся. И приидоша и глаголаша ему: почто ученицы иоанновы и фарисейстии постятся, а твои ученицы не постятся?
19 И рече им иисус: еда могут сынове брачнии, дондеже жених с ними есть, поститися? елико время с собою имут жениха, не могутъ поститися:
20 приидут же дние, егда отимется от нихъ жених, и тогда постятся в тыя дни:
21 и никтоже приложения плата небелена пришиваетъ к ризе ветсе: аще ли же ни, возмет конецъ его новое от ветхаго [отторгнет приставление его новое (нечто) от ветхаго], и горша дира будет:
22 и никтоже вливает вина нова в мехи ветхи: аще ли же ни, просадит вино новое мехи, и вино пролиется, и меси погибнут: но вино новое в мехи новы влияти [подобаетъ].
23 (Зачало 10) И бысть мимоходити ему в субботы сквозе сеяния, и начаша ученицы его путь творити, востерзающе класы.
24 И фарисее глаголаху ему: виждь, что творят в субботы, егоже не достоитъ?
25 И той глаголаше им: несте ли николиже чли, что сотвори давид, егда требование име и взалка сам и иже с нимъ?
26 како вниде в дом божий при авиафаре архиереи, и хлебы предложения снеде, ихже не достояше ясти токмо иереем, и даде и сущим съ нимъ?
27 И глаголаше им: суббота человека ради бысть, а не человек субботы ради:
28 темже господь есть сын человеческий и субботе.
1 И вниде паки в сонмище: и бе тамо человек, суху имый руку.
2 И назираху его, аще в субботы исцелитъ его, да нань возглаголют.
3 И глагола человеку суху имущему руку: стани посреде.
4 И глагола им: достоит ли в субботы добро творити, или зло творити? душу спасти, или погубити? они же молчаху.
5 И воззрев на них со гневом, скорбя о окаменении сердец их, глагола человеку: простри руку твою. И простре: и утвердися рука его цела яко другая.
6 (Зачало 11) И изшедше фарисее, абие со иродианы совет творяху нань, како его погубят.
7 иисус же отиде со ученики своими к морю: и мног народ от галилеи по нем иде, и от иудеи,
8 и от иерусалима, и от идумеи, и со онаго полу иордана. И от тира и сидона множество многое, слышавше, елика творяше, (и) приидоша к нему.
9 И рече учеником своим, да корабль будетъ у него народа ради, да не стужают ему.
10 Многи бо исцели, якоже нападати на него, да ему прикоснутся, елицы имеяху раны.
11 И дуси нечистии, егда видяху его, припадаху к нему и зваху, глаголюще, яко ты еси сын божий.
12 И много прещаше им, да не явлена его сотворят.
13 (Зачало 12) И взыде на гору и призва, ихже хотяше сам: и приидоша к нему.
14 И сотвори дванадесяте, да будут с ним, и да посылает их проповедати,
15 и имети власть целити недуги и изгонити бесы:
16 и нарече симону имя петр:
17 и иакова зеведеова и иоанна брата иаковля: и нарече има имена воанергес, еже есть сына громова:
18 и андреа, и филиппа, и варфоломеа, и матфеа, и фому, и иакова алфеова, и фаддеа, и симона кананита,
19 и иуду искариотскаго, иже и предаде его.
20 (Зачало 13) И приидоша в дом: и собрася паки народ, яко не мощи им ни хлеба ясти.
21 И слышавше иже бяху у него, изыдоша, да имут его: глаголаху бо, яко неистовъ есть.
22 И книжницы, иже от иерусалима низшедшии, глаголаху, яко веельзевула имать и яко о князи бесовстем изгонит бесы.
23 И призвав их, в притчах глаголаше им: како может сатана сатану изгонити?
24 И аще царство на ся разделится, не можетъ стати царство то:
25 и аще дом на ся разделится, не можетъ стати дом той:
26 и аще сатана воста на ся сам и разделися, не может стати, но конец имать.
27 Никтоже может сосуды крепкаго, вшед въ дом его, расхитити, аще не первее крепкаго свяжет: и тогда дом его расхитит.
28 (Зачало 14) Аминь глаголю вам, яко вся отпустятся согрешения сыном человеческим, и хуления, елика аще восхулят:
29 а иже восхулит на духа святаго, не имать отпущения во веки, но повинен есть вечному суду.
30 Зане глаголаху: духа нечистаго имать.
31 Приидоша убо мати и братия его, и вне стояще послаша к нему, зовуще его.
32 И седяше народ окрест его. Реша же ему: се, мати твоя и братия твоя (и сестры твоя) вне ищут тебе.
33 И отвеща им, глаголя: кто есть мати моя, или братия моя?
34 И соглядав окрест себе седящия, глагола: се, мати моя и братия моя:
35 иже бо аще сотворит волю божию, сей братъ мой и сестра моя и мати (ми) есть.
Зачало 15.
1 И паки начат учити при мори: и собрася к нему народ мног, якоже самому влезшу в корабль, седети в мори: и весь народ при мори на земли бяше.
2 И учаше их притчами много и глаголаше имъ во учении своем:
3 слышите: се, изыде сеяй сеяти:
4 и бысть егда сеяше, ово паде при пути, и приидоша птицы, и позобаша е:
5 другое же паде при камени, идеже не имяше земли многи, и абие прозябе, зане не имяше глубины земныя:
6 солнцу же возсиявшу присвяде, и зане не имяше корене, изсше:
7 и другое паде в тернии, и взыде терние, и подави е: и плода не даде:
8 и другое паде на земли добрей, и даяше плодъ восходящь и растущь, и приплодоваше на тридесять, и на шестьдесят, и на сто.
9 И глаголаше: имеяй уши слышати да слышит.
10 (Зачало 16) егда же бысть един, вопросиша его, иже бяху с ним, со обеманадесяте о притчи.
11 И глаголаше им: вам есть дано ведати тайны царствия божия: онем же внешним в притчахъ вся бывают,
12 да видяще видят, и не узрят: и слышаще слышат, и не разумеют: да не когда обратятся, и оставятся им греси.
13 И глагола им: не весте ли притчи сея? и како вся притчи уразумеете?
14 Сеяй, слово сеет.
15 Сии же суть, иже при пути, идеже сеется слово, и егда услышат, абие приходитъ сатана и отемлет слово сеянное в сердцахъ их.
16 И сии суть такожде иже на каменных сеемии, иже егда услышат слово, абие с радостию приемлют е:
17 и не имут корения в себе, но привременни суть: таже бывшей печали или гонению словесе ради, абие соблажняются.
18 А сии суть, иже в тернии сеемии, слышащии слово:
19 и печали века сего, и лесть богатства, и о прочих похоти входящия подавляют слово, и безплодно бывает.
20 И сии суть, иже на земли добрей сеяннии, иже слышат слово и приемлют, и плодствуютъ на тридесять, и на шестьдесят, и на сто.
21 И глаголаше им: еда светилник приходитъ [вжигаютъ], да под спудом положат его или под одромъ? не да ли на свещнице положенъ будетъ?
22 несть бо тайно, еже не явится, ниже бысть потаено, но да приидет в явление:
23 аще кто имать уши слышати, да слышит.
24 (Зачало 17) И глаголаше им: блюдите что слышите: в нюже меру мерите, возмерится вам, и приложится вам слышащим:
25 иже бо аще имать, дастся ему: а иже не имать, и еже имать, отимется от него.
26 И глаголаше: тако есть (и) царствие божие, якоже человек вметает семя в землю,
27 и спит, и востает нощию и днию: и семя прозябает и растет, якоже не весть он:
28 от себе бо земля плодит прежде траву, потом клас, таже исполняет пшеницу в класе:
29 егда же созреет плод, абие послетъ серп, яко наста жатва.
30 И глаголаше: чесому уподобим царствие божие? или коей притчи приложим е?
31 яко зерно горушично, еже егда всеяно будет в земли, мнее всех семен есть земных:
32 и егда всеяно будет, возрастает, и бывает более всех зелий, и творит ветви велия, яко мощи под сению его птицамъ небесным витати.
33 И таковыми притчами многими глаголаше им слово, якоже можаху слышати.
34 Без притчи же не глаголаше им словесе: особь же учеником своим сказаше вся.
35 (Зачало 18) И глагола им в той день, вечеру бывшу: прейдем на он пол.
36 И отпущше народы, пояша его якоже бе в корабли: и инии же корабли бяху с ним.
37 И бысть буря ветрена велика: волны же вливахуся в корабль, яко уже погружатися ему.
38 И бе сам на корме на возглавнице спя. И возбудиша его и глаголаша ему: учителю, не радиши ли, яко погибаемъ?
39 И востав запрети ветру и рече морю: молчи, престани. И улеже ветр, и бысть тишина велия.
40 И рече им: что тако страшливи есте? како не имате веры?
41 И убояшася страхом велиим и глаголаху друг ко другу: кто убо сей есть, яко и ветр и море послушают его?
Зачало 19.
1 И приидоша на он пол моря, во страну гадаринскую.
2 И излезшу ему из корабля, абие срете его от гробов человек в дусе нечисте,
3 иже жилище имяше во гробех, и ни веригами никтоже можаше его связати:
4 зане ему многажды путы и ужы (железны) связану сущу, и растерзатися от него ужемъ (железнымъ) и путом сокрушатися: и никтоже можаше его умучити [укротити]:
5 и выну нощь и день во гробех и в горахъ бе, вопия и толкийся камением.
6 узрев же иисуса издалеча, тече и поклонися ему,
7 и возопив гласом велиим, рече: что мне и тебе, иисусе, сыне бога вышняго? заклинаю тя богом, не мучи мене.
8 глаголаше бо ему: изыди, душе нечистый, от человека.
9 И вопрошаше его: что ти есть имя? И отвеща глаголя: легеон имя мне, яко мнози есмы.
10 И молиша его много, да не послет ихъ вне страны.
11 Бе же ту при горе стадо свиное велие пасомо.
12 И молиша его вси беси, глаголюще: посли ны во свиния, да в ня внидем.
13 И повеле им абие иисус. И изшедше дуси нечистии, внидоша во свиния: и устремися стадо по брегу в море, бяху же яко две тысящи, и утопаху в мори.
14 Пасущии же свиния бежаша и возвестиша во граде и в селех. И изыдоша видети, что есть бывшее.
15 И приидоша ко иисусови, и видеша бесновавшагося седяща и оболчена и смысляща, имевшаго легеон: и убояшася.
16 Поведаша же им видевшии, како бысть бесному, и о свиниях.
17 И начаша молити его отити от пределъ их.
18 И влезшу ему в корабль, моляше его бесновавыйся, дабы был с ним.
19 иисус же не даде ему, но рече ему: иди в дом твой ко твоим и возвести им, елика ти господь сотвори и помилова тя.
20 И иде и нача проповедати в десяти градех, елика сотвори ему иисус. И вси дивляхуся.
21 (Зачало 20) И прешедшу иисусу в корабли паки на он пол, собрася народ мног о нем [къ нему]. И бе при мори.
22 И се, прииде един от архисинагог, именем иаир, и видев его, паде при ногу его
23 и моляше его много, глаголя, яко дщи моя на кончине есть: да пришед возложиши на ню руце, яко да спасется и жива будет.
24 И иде с ним: (Зачало 21) и по нем идяху народи мнози и угнетаху его.
25 И жена некая сущи в точении крове летъ дванадесяте,
26 и много пострадавши от мног врачев, и издавши своя вся, и ни единыя пользы обретши, но паче в горшее пришедши:
27 слышавши о иисусе, пришедши в народе созади, прикоснуся ризе его:
28 глаголаше бо, яко, аще прикоснуся ризамъ его, спасена буду.
29 И абие изсякну источник крове ея: и разуме [ощути] телом, яко исцеле от раны.
30 И абие иисус разуме в себе силу изшедшую от него, (и) обращься в народе, глаголаше: кто прикоснуся ризам моимъ?
31 И глаголаху ему ученицы его: видиши народ угнетающь тя, и глаголеши: кто прикоснуся мне?
32 И обглядаше видети сотворшую сие.
33 Жена же убоявшися и трепещущи, ведящи, еже бысть ей, прииде и припаде к нему и рече ему всю истину.
34 он же рече ей: дщи, вера твоя спасе тя: иди в мире и буди цела от раны твоея.
35 еще ему глаголющу, (и) приидоша от архисинагога, глаголюще, яко дщи твоя умре: что еще движеши учителя?
36 иисус же абие слышав слово глаголемое, глагола архисинагогови: не бойся, токмо веруй.
37 И не остави по себе ни единаго ити, токмо петра и иакова и иоанна брата иаковля.
38 И прииде в дом архисинагогов и виде молву, плачущияся и кричащия много.
39 И вшед глагола им: что молвите и плачетеся? отроковица несть умерла, но спит.
40 И ругахуся ему. он же изгнав вся, поят отца отроковицы и матерь, и иже (беху) с ним, и вниде, идеже бе отроковица лежащи.
41 И емь за руку отроковицу, глагола ей: талифа куми: еже есть сказаемо: девице, тебе глаголю, востани.
42 И абие воста девица и хождаше: бе бо лет двоюнадесяте. И ужасошася ужасомъ велиим.
43 И запрети им много, да никтоже увесть сего, и рече: дадите ей ясти.
Зачало 22.
1 И изыде оттуду и прииде во отечествие свое: и по нем идоша ученицы его.
2 И бывшей субботе, начат на сонмищи учити. И мнози слышащии дивляхуся, глаголюще: откуду сему сия? и что премудрость данная ему, и силы таковы рукама его бываютъ?
3 не сей ли есть тектон, сын мариин, братъ же иакову и иосии и иуде и симону? и не сестры ли его зде (суть) в насъ? И блажняхуся о нем.
4 глаголаше же им иисус, яко несть пророкъ без чести, токмо во отечествии своем, и в сродстве и в дому своем.
5 И не можаше ту ни единыя силы сотворити, токмо мало недужных, возложь руце, исцели.
6 И дивляшеся за неверствие их: и обхождаше веси окрест учя.
7 (Зачало 23) И призва обанадесяте, и начатъ их посылати два два, и даяше им власть над духи нечистыми.
8 И заповеда им, да ничесоже возмут на путь, токмо жезл един: ни пиры, ни хлеба, ни при поясе меди:
9 но обувени в сандалия: и не облачитися въ две ризе.
10 И глаголаше им: идеже аще внидете в дом, ту пребывайте, дондеже изыдете оттуду:
11 и елицы аще не приимут вы, ниже послушаютъ вас, исходяще оттуду, оттрясите прах, иже под ногами вашими, во свидетелство им: аминь глаголю вам, отраднее будет содомом и гоморромъ в день судный, неже граду тому.
12 И изшедше проповедаху, да покаются:
13 и бесы многи изгоняху: и мазаху масломъ многи недужныя, и исцелеваху.
14 (Зачало 24) И услыша царь ирод: яве бо бысть имя его: и глаголаше, яко иоаннъ креститель от мертвых воста, и сего ради силы деются о нем.
15 Инии глаголаху, яко илиа есть: инии же глаголаху, яко пророк есть, или яко един от пророк.
16 Слышав же ирод рече, яко, егоже азъ усекнух иоанна, той есть: той воста от мертвых.
17 Той бо ирод послав, ят иоанна и связа его в темнице, иродиады ради жены филиппа брата своего, яко оженися ею.
18 Глаголаше бо иоанн иродови: не достоитъ тебе имети жену (филиппа) брата твоего.
19 Иродиа же гневашеся на него и хотяше его убити: и не можаше.
20 Ирод бо бояшеся иоанна, ведый его мужа праведна и свята, и соблюдаше его: и послушавъ его, многа творяше, и в сладость его послушаше.
21 И приключшуся дню потребну [удобну], егда ирод рождеству своему вечерю творяше княземъ своим и тысящником и старейшинам галилейским:
22 и вшедши дщерь тоя иродиады, и плясавши, и угождши иродови и возлежащим с ним, рече царь девице: проси у мене егоже аще хощеши, и дам ти.
23 И клятся ей: яко егоже аще попросиши у мене, дам ти, и до пол царствия моего.
24 она же изшедши рече матери своей: чесо прошу? она же рече: главы иоанна крестителя.
25 И вшедши абие со тщанием к царю, просяше, глаголющи: хощу, да ми даси от него [абие] на блюде главу иоанна крестителя.
26 И прискорбен быв царь, клятвы (же) ради и за возлежащих с ним не восхоте отрещи ей.
27 И абие послав царь спекулатора, повеле принести главу его.
28 он же шед усекну его в темнице, и принесе главу его на блюде, и даде ю девице: и девица даде ю матери своей.
29 И слышавше ученицы его, приидоша и взяша труп его, и положиша его во гробе.
30 (Зачало 25) И собрашася апостоли ко иисусу и возвестиша ему вся, и елика сотвориша, и елика научиша.
31 И рече им: приидите вы сами в пусто место едини [особь] и почийте мало. Бяху бо приходящии и отходящии мнози, и ни ясти им бе когда.
32 И идоша в пусто место кораблем едини.
33 И видеша их идущих народи, и познаша их мнози: и пеши от всех градов стицахуся тамо, и предвариша их, и снидошася к нему.
34 И изшед виде иисус народ мног и милосердова о них, зане бяху яко овцы не имущия пастыря: и начат их учити много.
35 И уже часу многу бывшу, приступльше къ нему ученицы его, глаголаша, яко пусто есть место, и уже час мног:
36 отпусти их, да шедше во окрестных селехъ и весех купят себе хлебы: не имут бо чесо ясти.
37 он же отвещав рече им: дадите имъ вы ясти. И глаголаша ему: да шедше купимъ двема стома пенязь хлебы и дамы им ясти?
38 он же рече им: колико хлебы имате? идите и видите. И уведевше глаголаша: пять (хлебъ), и две рыбе.
39 И повеле им посадити вся на споды на споды [во округъ] на траве зелене.
40 И возлегоша на лехи на лехи [на кучи] по сту и по пятидесят.
41 И приемь пять хлеб и две рыбе, воззревъ на небо, благослови и преломи хлебы, и даяше ученикомъ своим, да предлагают пред ними: и обе рыбе раздели всем.
42 И ядоша вси и насытишася:
43 и взяша укрухи, дванадесяте коша исполнь, и от рыбу.
44 Бяше же ядших хлебы яко пять тысящъ мужей.
45 (Зачало 26) И абие понуди ученики своя внити в корабль и варити [предварити] его на он пол к вифсаиде, дондеже сам отпуститъ народы.
46 И отрекся им [и отпустив я], иде в гору помолитися.
47 И вечеру бывшу, бе корабль посреде моря, и сам един на земли.
48 И виде их страждущих в плавании: бе бо ветр противен им: и о четвертей стражи нощней прииде к ним, по морю ходяй, и хотяше минути их.
49 они же видевше его ходяща по морю, мняху призрак быти и возопиша.
50 Вси бо его видеша и смутишася. И абие глагола с ними и рече им: дерзайте: аз есмь, не бойтеся.
51 И вниде к ним в корабль: и улеже ветр. И зело излиха в себе ужасахуся и дивляхуся.
52 Не разумеша бо о хлебех: бе бо сердце их окаменено.
53 И прешедше приидоша в землю геннисаретску и присташа.
54 (Зачало 27) И изшедшим им из корабля, абие познаша его,
55 обтекше всю страну ту, начаша на одрехъ приносити болящия, идеже слышаху, яко ту есть.
56 И аможе аще вхождаше в веси, или во грады, или села, на распутиих полагаху недужныя и моляху его, да поне воскрилию ризы его прикоснутся: и елицы аще прикасахуся ему, спасахуся.
1 И собрашася к нему фарисее и нецыи от книжник, пришедшии от иерусалима:
2 и видевше некиих от ученик его нечистыми руками, сиречь неумовеными, ядущих хлебы, ругахуся.
3 Фарисее бо и вси иудее, аще не трыюще [до лакотъ] умыют рук, не ядят, держаще предания старец:
4 и от торжища, аще не покуплются, не ядят. И ина многа суть, яже прияша держати: погружения сткляницам и чваном и котлом и одром.
5 (Зачало 28) Потом же вопрошаху его фарисее и книжницы: почто ученицы твои не ходят по преданию старец, но неумовеными руками ядятъ хлебъ?
6 он же отвещав рече им, яко добре пророчествова исаиа о вас лицемерех, якоже есть писано: сии людие устнами мя чтут, сердце же их далече отстоит от мене,
7 всуе же чтут мя, учаще учением, заповедем человеческим:
8 оставльше бо заповедь божию, держите предания человеческая, крещения [омовения] чваномъ и сткляницам, и ина подобна такова многа творите.
9 И глаголаше им: добре отметаете заповедь божию, да предание ваше соблюдете:
10 моисей бо рече: чти отца твоего и матерь твою: и иже злословит отца или матерь, смертию да умрет:
11 вы же глаголете: аще речет человек отцу или матери: корван, еже есть дар, иже аще [имже бы] пользовался еси от мене:
12 и не ктому оставляете его что сотворити отцу своему или матери своей,
13 преступающе слово божие преданием вашим, еже предасте: и подобна такова многа творите.
14 (Зачало 29) И призвав весь народ, глаголаше им: послушайте мене вси и разумейте:
15 ничтоже есть внеуду человека входимо в онь, еже может осквернити его: но исходящая от него, та суть сквернящая человека:
16 аще кто имать уши слышати, да слышит.
17 И егда вниде в дом от народа, вопрошаху его ученицы его о притчи.
18 И глагола им: тако ли и вы неразумливи есте? не разумеете ли, яко все, еже извне входимое в человека, не может осквернити его?
19 яко не входит ему в сердце, но во чрево: и афедроном исходит, истребляя вся брашна.
20 глаголаше же, яко исходящее от человека, то сквернит человека:
21 извнутрь бо от сердца человеческа помышления злая исходят, прелюбодеяния, любодеяния, убийства,
22 татьбы, лихоимства, (обиды,) лукавствия, лесть, студодеяния, око лукаво, хула, гордыня, безумство:
23 вся сия злая извнутрь исходят и сквернятъ человека.
24 (Зачало 30) И оттуду востав, иде в пределы тврски и сидонски: и вшед в дом, ни когоже хотяше, дабы его чул: и не може утаитися.
25 Слышавши бо жена о нем, еяже дщи имяше духа нечиста, пришедши припаде к ногама его:
26 жена же бе еллинска, сирофиникисса родом: и моляше его, да беса изженет из дщере ея.
27 иисус же рече ей: остави, да первее насытятся чада: несть бо добро отяти хлеб чадом и поврещи псом.
28 она же отвещавши глагола ему: ей, господи: ибо и пси под трапезою ядят от крупицъ детей.
29 И рече ей: за сие слово, иди: изыде бес из дщере твоея.
30 И шедши в дом свой, обрете беса изшедша и дщерь лежащу на одре.
31 (Зачало 31) И паки изшед иисус от пределъ тирских и сидонских, прииде на море галилейско, между пределы декапольски.
32 И приведоша к нему глуха и гугнива, и моляху его, да возложит нань руку.
33 И поемь его от народа единаго [особь], вложи персты своя во уши его и плюнувъ коснуся языка его:
34 и воззрев на небо, воздохну и глагола ему: еффафа, еже есть разверзися.
35 И абие разверзостася слуха его, и разрешися уза языка его, и глаголаше право.
36 И запрети им, да ни комуже поведят: елико же им той запрещаше, паче излиха проповедаху.
37 И преизлиха дивляхуся, глаголюще: добре все творит: и глухия творит слышати, и немыя глаголати.
Зачало 32.
1 В тыя дни, зело многу народу сущу, и не имущимъ чесо ясти, призвав иисус ученики своя, глагола им:
2 милосердую о народе, яко уже три дни приседят мне и не имут чесо ясти:
3 и аще отпущу их не ядших в домы своя, ослабеют на пути: мнози бо от них издалеча пришли суть.
4 И отвещаша ему ученицы его: откуду сих возможет кто зде насытити хлебы в пустыни?
5 И вопроси их: колико имате хлебовъ? они же реша: седмь.
6 И повеле народу возлещи на земли: и приемь седмь хлебов, хвалу воздав, преломи и даяше учеником своим, да предлагают: и предложиша пред народом.
7 И имяху рыбиц мало: и (сия) благословив, рече предложити и тыя.
8 ядоша же и насытишася: и взяша избытки укрух, седмь кошниц.
9 Бяху же ядших яко четыре тысящи. И отпусти их.
10 И абие влез в корабль со ученики своими, прииде во страны далмануфански.
11 (Зачало 33) И изыдоша фарисее и начаша стязатися с ним, ищуще от него знамения с небесе, искушающе его.
12 И воздохнув духом своим, глагола: что родъ сей знамения ищетъ? аминь глаголю вам, аще дастся роду сему знамение.
13 И оставль их, влез паки в корабль, (и) иде на он пол.
14 И забыша ученицы его взяти хлебы и разве единаго хлеба не имяху с собою въ корабли.
15 И прещаше им, глаголя: зрите, блюдитеся от кваса фарисейска и от кваса иродова.
16 И помышляху, друг ко другу глаголюще, яко хлебы не имамы.
17 И разумев иисус, глагола им: что помышляете, яко хлебы не имате? не у ли чувствуете, ниже разумеете? еще ли окаменено сердце ваше имате?
18 очи имуще не видите? и уши имуще не слышите? и не помните ли,
19 егда пять хлебы преломих в пять тысящ, колико кош исполнь укрух приясте? Глаголаша ему: дванадесять.
20 егда же седмь в четыре тысящи, колико кошниц исполнения укрух взясте? они же реша: седмь.
21 И глагола им: како не разумеете?
22 (Зачало 34) И прииде в вифсаиду: и приведоша к нему слепа, и моляху его, да его коснется.
23 И емь за руку слепаго, изведе его вон из веси: и плюнув на очи его, (и) возложь руце нань, вопрошаше его, аще что видитъ?
24 И воззрев глаголаше: вижу человеки яко древие ходящя.
25 Потом (же) паки возложи руце на очи его и сотвори его прозрети: и утворися [и исцеле] и узре светло все.
26 И посла его в дом его, глаголя: ни въ весь вниди, ни повеждь кому в веси.
27 (Зачало 35) И изыде иисус и ученицы его в веси кесарии филипповы: и на пути вопрошаше ученики своя, глаголя им: кого мя глаголютъ человецы быти?
28 они же отвещаша: иоанна крестителя: и инии илию: друзии же единаго от пророк.
29 И той глагола им: вы же кого мя глаголете быти? отвещав же петр глагола ему: ты еси христос.
30 (Зачало 36) И запрети им, да ни комуже глаголютъ о нем.
31 И начат учити их, яко подобаетъ сыну человеческому много пострадати, и искушену быти от старец и архиерей и книжник, и убиену быти, и в третий день воскреснути.
32 И не обинуяся слово глаголаше. И приемь его петр, начат претити ему.
33 он же обращься и воззрев на ученики своя, запрети петрови, глаголя: иди за мною, сатано: яко не мыслиши, яже (суть) божия, но яже человеческа.
34 И призвав народы со ученики своими, рече им: (Зачало 37) иже хощет по мне ити, да отвержется себе, и возмет крест свой, и по мне грядет:
35 иже бо аще хощет душу свою спасти, погубитъ ю: а иже погубит душу свою мене ради и евангелиа, той спасет ю:
36 кая бо польза человеку, аще приобрящетъ мир весь, и отщетит душу свою?
37 или что даст человек измену на души своей?
38 иже бо аще постыдится мене и моих словесъ в роде сем прелюбодейнем и грешнем, и сын человеческий постыдится его, егда приидетъ во славе отца своего со ангелы святыми.
1 И глаголаше им: аминь глаголю вам, яко суть нецыи от зде стоящих, иже не имут вкусити смерти, дондеже видят царствие божие пришедшее в силе.
2 (Зачало 38) И по шести днех поят иисус петра и иакова и иоанна, и возведе их на гору высоку особь едины: и преобразися пред ними.
3 И ризы его быша блещащяся, белы зело яко снег, яцехже не может белилник убелити на земли.
4 И явися им илиа с моисеем: и беста со иисусом глаголюща.
5 И отвещав петр глагола иисусови: равви, добро есть нам зде быти: и сотворим кровы три, тебе един, и моисееви един, и илии един.
6 Не ведяше бо, что рещи: бяху бо пристрашни.
7 И бысть облак осеняя их: и прииде гласъ из облака, глаголя: сей есть сын мой возлюбленный, того послушайте.
8 И внезапу воззревше, ктому ни когоже видеша, токмо иисуса единаго с собою.
9 Сходящим же им с горы, запрети им, да ни комуже поведят, яже видеша, токмо егда сын человеческий из мертвых воскреснет.
10 (Зачало 39) И слово удержаша в себе, стязающеся, что есть, еже из мертвых воскреснути.
11 И вопрошаху его глаголюще: како глаголютъ книжницы, яко илии подобает приити прежде?
12 он же отвещав рече им: илиа убо пришед прежде, устроит вся: и како есть писано о сыне человечестем, да много постраждетъ и уничижен будет:
13 но глаголю вам, яко и илиа прииде, и сотвориша ему, елика хотеша, якоже есть писано о нем.
14 И пришед ко учеником, виде народ многъ о них [окрест ихъ] и книжники стязающяся с ними.
15 И абие весь народ видев его ужасеся, и пририщуще целоваху его.
16 И вопроси книжники: что стязаетеся к себе [с ними]?
17 (Зачало 40) И отвещав един от народа рече: учителю, приведох сына моего к тебе, имуща духа нема:
18 и идеже колиждо имет его, разбиваетъ его, и пены тещит, и скрежещет зубы своими, и оцепеневает: и рех учеником твоим, да изженут его, и не возмогоша.
19 он же отвещав ему глагола: о, роде неверен, доколе в вас буду? доколе терплю вы? приведите его ко мне.
20 И приведоша его к нему. И видев его, абие дух стрясе его: и пад на земли, валяшеся, пены тещя.
21 И вопроси отца его: колико лет есть, отнележе сие бысть ему? он же рече: издетска:
22 и многажды во огнь вверже его и въ воды, да погубит его: но аще что можеши, помози нам, милосердовав о нас.
23 иисус же рече ему: еже аще что можеши веровати, вся возможна верующему.
24 И абие возопив отец отрочате, со слезами глаголаше: верую, господи: помози моему неверию.
25 Видев же иисус, яко срищется народ, запрети духу нечистому, глаголя ему: душе немый и глухий, аз ти повелеваю: изыди из него и ктому не вниди в него.
26 И возопив и много пружався, изыде: и бысть яко мертв, якоже мнозем глаголати, яко умре.
27 иисус же емь его за руку, воздвиже его: и воста.
28 И вшедшу ему в дом, ученицы его вопрошаху его единаго: яко мы не возмогохомъ изгнати его?
29 И рече им: сей род ничимже может изыти, токмо молитвою и постом.
30 И оттуду изшедше, идяху сквозе галилею: и не хотяше, да кто увесть.
31 учаше бо ученики своя и глаголаше им, яко сын человеческий предан будет в руце человечесте, и убиют его: и убиенъ быв, в третий день воскреснет.
32 они же не разумеваху глагола и бояхуся его вопросити.
33 (Зачало 41) И прииде в капернаум: и в дому быв, вопрошаше их: что на пути в себе помышлясте?
34 они же молчаху: друг ко другу бо стязашася на пути, кто (есть) болий.
35 И сед пригласи обанадесяте и глагола им: аще кто хощет старей быти, да будет всехъ менший и всем слуга.
36 И приимь отроча, постави е посреде их: и объемь е, рече им:
37 иже аще едино таковых отрочат прииметъ во имя мое, мене приемлет: и иже мене приемлет, не мене приемлет, но пославшаго мя.
38 отвеща ему иоанн, глаголя: учителю, видехом некоего именем твоим изгоняща бесы, иже не ходит по нас: и возбранихом ему, яко не последует нам.
39 иисус же рече: не браните ему: никтоже бо есть, иже сотворит силу о имени моем, и возможет вскоре злословити мя.
40 Иже бо несть на вы, по вас есть.
41 Иже бо аще напоит вы чашею воды во имя мое, яко христовы есте, аминь глаголю вам, не погубит мзды своея.
42 (Зачало 42) И иже аще соблазнит единаго от малых сих верующих в мя, добрее есть ему паче, аще облежит камень жерновный о выи его, и ввержен будет в море.
43 И аще соблажняет тя рука твоя, отсецы ю: добрее ти есть беднику [без руки] в живот внити, неже обе руце имущу внити в геенну, во огнь неугасающий,
44 идеже червь их не умирает, и огнь не угасает.
45 И аще нога твоя соблажняет тя, отсецы ю: добрее ти есть внити в живот хрому, неже две нозе имущу ввержену быти в геенну, во огнь неугасающий,
46 идеже червь их не умирает, и огнь не угасает.
47 И аще око твое соблажняет тя, исткни е: добрее ти есть со единем окомъ внити в царствие божие, неже две оце имущу ввержену быти в геенну огненную,
48 идеже червь их не умирает, и огнь не угасает.
49 Всяк бо огнем осолится, и всяка жертва солию осолится.
50 Добро соль: аще же соль не слана будет, чим осолится? Имейте соль в себе, и миръ имейте между собою.
1 И оттуду востав прейде в пределы иудейския, [чрез страну, яже] об он пол иордана. И снидошася паки народи к нему: и яко обычай име, паки учаше их.
2 (Зачало 43) И приступльше фарисее вопросиша его: аще достоит мужу жену пустити? искушающе его.
3 он же отвещав рече им: что вам заповеда моисей?
4 они же реша: моисей повеле книгу распустную написати, и пустити.
5 И отвещав иисус рече им: по жестосердию вашему написа вам заповедь сию:
6 от начала же создания, мужа и жену сотворилъ я есть бог:
7 сего ради оставит человек отца своего и матерь
8 и прилепится к жене своей, и будета оба в плоть едину: темже уже неста два, но плоть едина:
9 еже убо бог сочета, человек да не разлучает.
10 И в дому паки ученицы его о семъ вопросиша его.
11 И глагола им: (Зачало 44) иже аще пуститъ жену свою и оженится иною, прелюбы творитъ на ню:
12 и аще жена пустит мужа [мужа своего] и посягнет за иного, прелюбы творит.
13 И приношаху к нему дети, да коснется их: ученицы же прещаху приносящим.
14 Видев же иисус негодова и рече им: оставите детей приходити ко мне и не браните им, тацехъ бо есть царствие божие:
15 аминь глаголю вам: иже аще не приимет царствия божия яко отроча, не имать внити в не.
16 И объемь их, возложь руце на них, благословляше их.
17 (Зачало 45) И исходящу ему на путь, притекъ некий и поклонься на колену ему, вопрошаше его: учителю благий, что сотворю, да животъ вечный наследствую?
18 иисус же рече ему: что мя глаголеши блага? никтоже благ, токмо един бог.
19 Заповеди веси: не прелюбы сотвориши: не убий: не укради: не лжесвидетелствуй: не обиди: чти отца твоего и матерь.
20 он же отвещав рече ему: учителю, сия вся сохраних от юности моея.
21 иисус же воззрев нань, возлюби его и рече ему: единаго еси не докончал: иди, елика имаши, продаждь и даждь нищим, и имети имаши сокровище на небеси: и прииди (и) ходи вслед мене, взем крест.
22 он же дряхл быв о словеси [о словеси семъ], отиде скорбя: бе бо имея стяжания многа.
23 И воззрев иисус глагола учеником своим: (Зачало 46) како неудобь имущии богатство в царствие божие внидут.
24 ученицы же ужасахуся о словесех его. иисус же паки отвещав глагола им: чада, како неудобь уповающим на богатство в царствие божие внити:
25 удобее бо есть велбуду сквозе иглине уши проити, неже богату в царствие божие внити.
26 они же излиха дивляхуся, глаголюще к себе: то кто может спасен быти?
27 Воззрев же на них иисус глагола: у человекъ невозможно, но не у бога: вся бо возможна суть у бога.
28 Начат же петр глаголати ему: се, мы оставихом вся и вслед тебе идохом.
29 отвещав же иисус рече: аминь глаголю вам: никтоже есть, иже оставил есть дом, или братию, или сестры, или отца, или матерь, или жену, или чада, или села, мене ради и евангелиа ради:
30 аще не приимет сторицею ныне во время сие, домов, и братий, и сестр, и отца, и матере, и чад, и сел, во изгнании, и в век грядущий живот вечный:
31 мнози же будут первии последни, и последнии перви.
32 Бяху же на пути, восходяще во иерусалим: и бе варяя их иисус, и ужасахуся, и вследъ идуще, бояхуся. (Зачало 47) И поемь паки обанадесять, начат им глаголати, яже хотяху ему быти:
33 яко, се, восходим во иерусалим, и сынъ человеческий предан будет архиереом и книжником, и осудят его на смерть, и предадят его языком:
34 и поругаются ему, и уязвят его, и оплюют его, и убиют его: и въ третий день воскреснет.
35 И пред него приидоста иаков и иоанн, сына зеведеева, глаголюща: учителю, хощева, да, еже аще просива, сотвориши нама.
36 он же рече има: что хощета, да сотворю вама?
37 она же реста ему: даждь нам, да единъ о десную тебе и един о шуюю тебе сядева во славе твоей.
38 иисус же рече има: не веста, чесо просита: можета ли пити чашу, юже аз пию, и крещением, имже аз крещаюся, креститися?
39 она же реста ему: можева. иисус же рече има: чашу убо, юже аз пию, испиета, и крещением, имже аз крещаюся, креститася:
40 а еже сести о десную мене и о шуюю, несть мне дати, но имже уготовано есть.
41 И слышавше десять, начаша негодовати о иакове и иоанне.
42 иисус же призвав их, глагола им: весте, яко мнящиися владети языки, соодолеваютъ им, и велицыи их обладают ими:
43 не тако же будет в вас: но иже аще хощетъ в вас вящший быти, да будет вам слуга:
44 и иже аще хощет в вас быти старей, да будет всем раб:
45 ибо сын человечь не прииде, да послужатъ ему, но да послужит и даст душу свою избавление за многи.
46 (Зачало 48) И приидоша во иерихон. И исходящу ему от иерихона, и учеником его, и народу многу, сын тимеов вартимей слепый седяше при пути, прося.
47 И слышав, яко иисус назорянин есть, начат звати и глаголати: сыне давидов иисусе, помилуй мя.
48 И прещаху ему мнози, да умолчит: онъ же множае паче зваше: сыне давидов, помилуй мя.
49 И став иисус, рече его возгласити. И возгласиша слепца, глаголюще ему: дерзай, востани, зовет тя.
50 он же отверг ризы своя, востав прииде ко иисусови.
51 И отвещав глагола ему иисус: что хощеши, да сотворю тебе? Слепый же глагола ему: учителю, да прозрю.
52 иисус же рече ему: иди: вера твоя спасе тя. И абие прозре и по иисусе иде в путь.
Зачало 49.
1 И егда приближи[ша]ся во иерусалим, в вифсфагию и вифанию, к горе елеонстей, посла два от ученик своихъ
2 и глагола има: идита в весь, яже есть прямо вама: и абие входяща в ню, обрящета жребя привязано, на неже никтоже от человекъ вседе: отрешша е, приведита:
3 и аще кто вама речет: что творита сие? рцыта, яко господь требует е: и абие послетъ е семо.
4 Идоста же, и обретоста жребя привязано при дверех вне на распутии, и отрешиста е.
5 И нецыи от стоящих ту глаголаху има: что деета отрешающа жребя?
6 она же реста им, якоже заповеда има иисус: и оставиша я.
7 И приведоста жребя ко иисусови: и возложиша на не ризы своя, и вседе на не.
8 Мнози же ризы своя постлаша по пути: друзии же ваиа резаху от древия и постилаху по пути.
9 И предходящии и вслед грядущии вопияху, глаголюще: осанна, благословен грядый во имя господне,
10 благословено грядущее царство во имя господа отца нашего давида: осанна в вышних.
11 (Зачало 50) И вниде во иерусалим иисус и въ церковь: и соглядав вся, позде уже сущу часу, изыде в вифанию со обеманадесяте.
12 И наутрие изшедшим им от вифании, взалка:
13 и видев смоковницу издалеча, имущу листвие, прииде, аще убо что обрящет на ней: и пришед к ней, ничесоже обрете, токмо листвие: не у бо бе время смоквам.
14 И отвещав иисус рече ей: да не ктому от тебе во веки никтоже плода снесть. И слышаху ученицы его.
15 И приидоша (паки) во иерусалим. И вшедъ иисус в церковь, начат изгонити продающия и купующия в церкви: и трапезы торжником и седалища продающих голуби испроверже:
16 и не даяше, да кто мимонесет сосуд сквозе церковь.
17 И учаше, глаголя им: несть ли писано, яко храм мой храм молитвы наречется всемъ языкомъ? вы же сотвористе его вертеп разбойником.
18 И слышаша книжницы и архиерее, и искаху, како его погубят: бояхубося его, яко весь народ дивляшеся о учении его.
19 И яко позде бысть, исхождаше вон изъ града.
20 И утро мимоходяще, видеша смоковницу изсохшу из корения.
21 И воспомянув петр глагола ему: равви, виждь, смоковница, юже проклял еси, усше.
22 И отвещав иисус глагола им:
23 (Зачало 51) имейте веру божию: аминь бо глаголю вам, яко, иже аще речет горе сей: двигнися и верзися в море: и не размыслит в сердцы своем, но веру имет, яко еже глаголет, бывает: будет ему, еже аще речет:
24 сего ради глаголю вам: вся елика аще молящеся просите, веруйте, яко приемлете: и будетъ вам:
25 и егда стоите молящеся, отпущайте, аще что имате на кого, да и отец ваш, иже есть на небесех, отпустит вам согрешения ваша:
26 аще ли же вы не отпущаете, ни отец ваш, иже есть на небесех, отпустит вам согрешений ваших.
27 (Зачало 52) И приидоша паки во иерусалим. И в церкви ходящу ему, приидоша к нему архиерее и книжницы и старцы
28 и глаголаша ему: коею областию сия твориши? и кто ти область сию даде, да сия твориши?
29 иисус же отвещав рече им: вопрошу вы и аз словесе единаго, и отвещайте ми: и реку вам, коею областию сия творю:
30 крещение иоанново с небесе ли бе, или от человекъ? отвещайте ми.
31 И мысляху в себе, глаголюще: аще речем, с небесе, речет: почто убо не веровасте ему?
32 но аще речем, от человек: бояхуся людий: вси бо имеяху иоанна, яко воистинну пророкъ бе.
33 И отвещавше глаголаша иисусови: не вемы. И отвещав иисус глагола им: ни аз глаголю вам, коею областию сия творю.
Зачало 53.
1 И начат им в притчах глаголати: виноград насади человек, и огради оплотом, и ископа точило, и созда столп, и предаде его тяжателемъ [делателемъ], и отиде.
2 И посла к тяжателем во время раба, да от тяжатель приимет от плода винограда:
3 они же емше его биша и отослаша тща.
4 И паки посла к ним другаго раба: и того камением бивше, пробиша главу ему и послаша безчестна.
5 И паки иного посла: и того убиша: и многи ины, овы убо биюще, овы же убивающе.
6 еще убо единаго сына име возлюбленнаго своего, посла и того к ним последи, глаголя, яко усрамятся сына моего.
7 они же тяжателе реша к себе, яко сей есть наследник: приидите, убиемъ его, и наше будет наследствие.
8 И емше его убиша и извергоша его вон из винограда.
9 Что убо сотворит господь винограда? Приидетъ и погубит тяжатели и даст виноград инем.
10 Ни писания ли сего чли есте: камень, егоже не в ряду сотвориша зиждущии, сей бысть во главу угла:
11 от господа бысть сие, и есть дивно во очию нашею?
12 И искаху его яти, и убояшася народа: разумеша бо, яко к ним притчу рече: и оставльше его отидоша.
13 (Зачало 54) И послаша к нему некия от фарисей и иродиан, да его обольстят словом.
14 они же пришедше глаголаша ему: учителю, вемы, яко истинен еси и не радиши ни о комже: не зриши бо на лице человеков, но воистинну пути божию учиши: достоит ли кинсон кесареви дати, или ни? дамы ли, или не дамы?
15 он же ведый их лицемерие, рече им: что мя искушаете? принесите ми пенязь, да вижу.
16 они же принесоша. И глагола им: чий образъ сий и написание? они же реша ему: кесарев.
17 И отвещав иисус рече им: воздадите кесарева кесареви и божия богови. И чудишася о нем.
18 (Зачало 55) И приидоша саддукее к нему, иже глаголют воскреснию не быти: и вопросиша его, глаголюще:
19 учителю, моисей написа нам, яко аще кому брат умрет и оставит жену, а чадъ не оставит: да поймет брат его жену его и воскресит семя брату своему.
20 Седмь братий бе: и первый поят жену и умирая не остави семене:
21 и вторый поят ю и умре, и ни той остави семене: и третий такожде:
22 и пояша ю седмь и не оставиша семене: последи же всех умре и жена.
23 В воскресение убо, егда воскреснут, которому их будет жена: седмь бо имеша ю жену.
24 И отвещав иисус рече им: не сего ли ради прельщаетеся, не ведуще писания, ни силы божия?
25 егда бо из мертвых воскреснут, ни женятся, ни посягают, но суть яко ангели на небесех:
26 о мертвых же, яко востают, несте ли чли в книгах моисеовых, при купине яко рече ему бог, глаголя: аз бог авраамов и богъ исааков и бог иаковль?
27 несть бог мертвых, но бог живых: вы убо много прельщаетеся.
28 (Зачало 56) И приступль един от книжник, слышав их стязающихся и видев, яко добре отвеща им, вопроси его: кая есть первая всех заповедий?
29 иисус же отвеща ему: яко первейши всех заповедий: слыши, израилю, господь бог вашъ господь един есть:
30 и возлюбиши господа бога твоего всем сердцемъ твоим, и всею душею твоею, и всем умомъ твоим, и всею крепостию твоею: сия есть первая заповедь.
31 И вторая подобна ей: возлюбиши ближняго своего яко сам себе. Болшая сею ина заповедь несть.
32 И рече ему книжник: добре, учителю, воистинну рекл еси, яко един есть бог, и несть ин разве его:
33 и еже любити его всем сердцем, и всем разумом, и всею душею, и всею крепостию: и еже любити ближняго яко себе, боле есть всех всесожжений и жертв.
34 иисус же видев, яко смысленно отвеща, рече ему: не далече еси от царствия божия. И никтоже смеяше ктому его вопросити.
35 И отвещав иисус глаголаше, учя в церкви: како глаголют книжницы, яко христос сын есть давидовъ?
36 Той бо давид рече духом святым: глагола господь господеви моему: седи о десную мене, дондеже положу враги твоя подножие ногама твоима.
37 Сам убо давид глаголет его господа: и откуду сын ему есть? И мног народъ послушаше его в сладость.
38 (Зачало 57) И глаголаше им во учении своем: блюдитеся от книжник, хотящих во одеяниихъ ходити, и целования на торжищих,
39 и преждеседания на сонмищих, и первовозлежания на вечерях:
40 поядающе домы вдовиц и непщеванием надолзе молящеся, сии приимут лишшее осуждение.
41 И сед иисус прямо сокровищному хранилищу, зряше, како народ мещет медь в сокровищное хранилище. И мнози богатии вметаху многа.
42 И пришедши едина вдовица убога, вверже лепте две, еже есть кодрант.
43 И призвав ученики своя, рече им: аминь глаголю вам, яко вдовица сия убогая множае всех вверже вметающих в сокровищное хранилище:
44 вси бо от избытка своего ввергоша: сия же от лишения своего вся, елика имеяше, вверже, все житие свое.
Зачало 58.
1 И исходящу ему от церкве, глагола ему един от ученик его: учителю, виждь, каково камение и какова здания.
2 И отвещав иисус рече ему: видиши ли сия великая здания? не имать остати зде камень на камени, иже не разорится.
3 И седящу ему на горе елеонстей прямо церкве, вопрошаху его единаго петр и иаков, и иоанн и андрей:
4 рцы нам, когда сия будутъ? и кое (будетъ) знамение, егда имут вся сия скончатися?
5 иисус же отвещав им, начат глаголати: блюдитеся, да не кто вас прельстит.
6 Мнози бо приидут во имя мое, глаголюще, яко аз есмь: и многи прельстят.
7 егда же услышите брани и слышания бранем, не ужасайтеся: подобает бо быти: но не у кончина.
8 Востанет бо язык на язык, и царство на царство: и будут труси по местом, и будутъ глади и мятежи. Начало болезнем сия.
9 (Зачало 59) Блюдитеся же вы сами: предадят бо вы в сонмища, и на соборищих биени будете: и пред воеводы и цари ведени будете мене ради, во свидетелство им.
10 И во всех языцех подобает прежде проповедатися евангелию.
11 егда же поведут вы предающе, не прежде пецытеся, что возглаголете, ни поучайтеся: но еже аще дастся вам в той час, се глаголите: не вы бо будете глаголющии, но дух святый.
12 Предаст же брат брата на смерть, и отецъ чадо: и востанут чада на родители и убиютъ их.
13 И будете ненавидими всеми имене моего ради: претерпевый же до конца, той спасен будет.
14 (Зачало 60) егда же узрите мерзость запустения, реченную даниилом пророком, стоящу, идеже не подобает: чтый да разумеет: тогда сущии во иудеи да бежат на горы:
15 и иже на крове, да не слазит в дом, ни да внидет взяти чесо от дому своего:
16 и иже на селе сый, да не возвратится вспять взяти ризу свою.
17 Горе же непраздным и доящим в тыя дни.
18 Молитеся же, да не будет бегство ваше въ зиме.
19 Будут бо дние тии скорбь, якова не бысть такова от начала создания, еже созда бог, доныне, и не будет.
20 И аще не бы господь прекратил дний, не бы убо спаслася всяка плоть: но избранных ради, ихже избра, прекратит дни.
21 Тогда аще кто речет вам: се, зде христос, или: се, онде: не имите веры.
22 Востанут бо лжехристи и лжепророцы и дадятъ знамения и чудеса, еже прельстити, аще возможно, и избранныя.
23 Вы же блюдитеся: се, прежде рех вам вся.
24 (Зачало 61) Но в тыя дни, по скорби той, солнце померкнет, и луна не даст света своего,
25 и звезды будут с небесе спадающя, и силы, яже на небесех, подвижутся.
26 И тогда узрят сына человеческаго грядуща на облацех с силою и славою многою.
27 И тогда послет ангелы своя и соберетъ избранныя своя от четырех ветр, от конца земли до конца неба.
28 от смоковницы же научитеся притчи: егда уже ветвие ея будет младо и изращаетъ листвие, ведите, яко близ есть жатва:
29 тако и вы, егда сия видите бывающа, ведите, яко близ есть, при дверех.
30 Аминь глаголю вам, яко не имать прейти родъ сей, дондеже вся сия будут.
31 (Зачало 62) Небо и земля прейдут, словеса же моя не прейдут.
32 о дни же том или о часе никтоже весть, ни ангели, иже суть на небесех, ни сын, токмо отец.
33 Блюдите, бдите и молитеся: не весте бо, когда время будет.
34 якоже человек отходя оставль дом свой, и дав рабом своим власть, и комуждо дело свое, и вратарю повеле, да бдит.
35 Бдите убо: не весте бо, когда господь дому приидет, вечер, или полунощи, или въ петлоглашение, или утро:
36 да не пришед внезапу, обрящет вы спящя.
37 А яже вам глаголю, всем глаголю: бдите.
1 Бе же пасха и опресноцы по двою днию: и искаху архиерее и книжницы, како его лестию емше убиют:
2 глаголаху же: (но) не в праздник, еда [да не] како молва будет людска.
3 (Зачало 63) И сущу ему в вифании, в дому симона прокаженнаго, возлежащу ему, прииде жена, имущи алавастр мира нарднаго пистикиа многоценна: и сокрушши алавастр, возливаше ему на главу.
4 Бяху же нецыи негодующе в себе и глаголюще: почто гибель сия мирная бысть?
5 можаше бо сие продано быти вящше триех сотъ пенязь и датися нищим. И прещаху ей.
6 иисус же рече: оставите ю: что ей труды даете? добро дело содела о мне.
7 Всегда бо нищия имате с собою, и егда хощете, можете им добро творити: мене же не всегда имате.
8 еже име [возможе] сия, сотвори: предвари помазати мое тело на погребение.
9 Аминь глаголю вам: идеже аще проповестся евангелие сие во всем мире, и еже сотвори сия, глаголано будет в память ея.
10 (Зачало 64) И иуда искариотский, единъ от обоюнадесяте, иде ко архиереем, да предастъ его им.
11 они же слышавше возрадовашася и обещаша ему сребреники дати. И искаше, како его в удобно время предаст.
12 И в первый день опреснок, егда пасху жряху, глаголаша ему ученицы его: где хощеши, шедше уготоваем, да яси пасху?
13 И посла два от ученик своих и глагола има: идита во град: и срящет вас человек въ скудельнице воду нося: по нем идита,
14 и идеже аще внидет, рцыта господину дому, яко учитель глаголет: где есть виталница, идеже пасху со ученики моими снемъ?
15 и той вама покажет горницу велию, постлану, готову: ту уготовайта нам.
16 И изыдоста ученика его, и приидоста во град, и обретоста, якоже рече има: и уготоваста пасху.
17 И вечеру бывшу прииде со обеманадесяте.
18 И возлежащим им и ядущим, рече иисус: аминь глаголю вам, яко един от вас предастъ мя, ядый со мною.
19 они же начаша скорбети и глаголати ему един по единому: еда азъ? И другий: еда азъ?
20 он же отвещав рече им: един от обоюнадесяте, омочивый со мною в солило.
21 сын убо человеческий идет, якоже есть писано о нем: горе же человеку тому, имже сын человеческий предастся: добрее было бы ему, аще не бы родился человек той.
22 И ядущим им, приемь иисус хлеб, (и) благословив, преломи и даде им, и рече: приимите, ядите: сие есть тело мое.
23 И приим чашу, хвалу воздав, даде им: и пиша от нея вси.
24 И рече им: сия есть кровь моя новаго завета, за многи изливаема:
25 аминь глаголю вам, яко ктому не имам пити от плода лознаго до дне того, егда е пию ново во царствии божии.
26 И воспевше изыдоша в гору елеонскую.
27 И глагола им иисус, яко вси соблазнитеся о мне в нощь сию: писано бо есть: поражу пастыря, и разыдутся овцы.
28 Но потом, егда воскресну, варяю вы в галилеи.
29 Петр же рече ему: аще и вси соблазнятся, но не аз.
30 И глагола ему иисус: аминь глаголю тебе, яко ты днесь в нощь сию, прежде даже вторицею петель не возгласит, трикраты отвержешися мене.
31 он же множае глаголаше паче: аще (же) ми есть с тобою и умрети, не отвергуся тебе. Такожде и вси глаголаху.
32 И приидоша в весь, ейже имя гефсиманиа: и глагола учеником своим: седите зде, дондеже шед помолюся.
33 И поят петра и иакова и иоанна с собою: и начат ужасатися и тужити.
34 И глагола им: прискорбна есть душа моя до смерти: будите зде и бдите.
35 И прешед мало, паде на земли и моляшеся, да, аще возможно есть, мимо идет от него час:
36 и глаголаше: авва отче, вся возможна тебе: мимо неси от мене чашу сию: но не еже азъ хощу, но еже ты.
37 И прииде, и обрете их спящих, и глагола петрови: симоне, спиши ли? не возмогл еси единаго часа побдети?
38 бдите и молитеся, да не внидете в напасть: дух убо бодр, плоть же немощна.
39 И паки шед помолися, тожде слово рек.
40 И возвращься обрете я паки спяща: бяху бо очеса им тяготна: и не ведяху, что быша ему отвещали.
41 И прииде третицею и глагола им: спите прочее и почивайте: приспе конец, прииде час: се, предается сын человеческий в руки грешником:
42 востаните, идем: се, предаяй мя приближися.
43 (Зачало 65) И абие, еще ему глаголющу, прииде иуда, един сый от обоюнадесяте, и съ ним народ мног со оружием и дрекольми, от архиерей и книжник и старец.
44 Даде же предаяй его знамение им, глаголя: егоже аще лобжу, той есть: имите его и ведите (его) сохранно.
45 И пришед, абие приступль к нему, глагола (ему): равви, равви. И облобыза его.
46 они же возложиша руце свои на него и яша его.
47 един же некто от стоящих извлек нож, удари раба архиереова и уреза ему ухо.
48 И отвещав иисус рече им: яко на разбойника ли изыдосте со оружием и дрекольми яти мя?
49 По вся дни бех при вас в церкви учя, и не ясте мене: но да сбудется писание.
50 И оставльше его, вси бежаша.
51 И един некто юноша иде по нем, одеянъ в плащаницу по нагу: и яша того юношу.
52 он же оставль плащаницу, наг бежа от них.
53 И ведоша иисуса ко архиерею: и снидошася к нему вси архиерее и книжницы и старцы.
54 И петр издалеча вслед его иде до внутрь во двор архиереов: и бе седя со слугами и греяся при свещи [при огни].
55 Архиерее же и весь сонм искаху на иисуса свидетелства, да умертвят его: и не обретаху.
56 Мнози бо лжесвидетелствоваху на него, и равна свидетелства не бяху.
57 И нецыи воставше лжесвидетелствоваху на него, глаголюще:
58 яко мы слышахом его глаголюща, яко азъ разорю церковь сию рукотвореную и треми денми ину нерукотворену созижду.
59 И ни тако равно бе свидетелство их.
60 И востав архиерей посреде, вопроси иисуса, глаголя: не отвещаваеши ли ничесоже? что сии на тя свидетелствуютъ?
61 он же молчаше и ничтоже отвещаваше. Паки архиерей вопроси его и глагола ему: ты ли еси христос, сын благословеннаго?
62 иисус же рече: аз есмь: и узрите сына человеческаго о десную седяща силы и грядуща со облаки небесными.
63 Архиерей же растерзав ризы своя, глагола: что еще требуем свидетелей?
64 слышасте хулу: что вам мнится? они же вси осудиша его быти повинна смерти.
65 И начаша нецыи плювати нань, и прикрывати лице его, и мучити его, и глаголати ему: прорцы. И слуги по ланитома его бияху.
66 И сущу петрови во дворе низу, прииде едина от рабынь архиереовых,
67 и видевши петра греющася, воззревши на него, глагола: и ты с назарянином иисусом былъ еси.
68 он же отвержеся, глаголя: не вем, ниже знаю, что ты глаголеши. И изыде вон на преддворие: и алектор возгласи.
69 И рабыня видевши его паки, начат глаголати предстоящим, яко сей от них есть.
70 он же паки отметашеся. И помале паки предстоящии глаголаху петрови: воистинну от нихъ еси: ибо галилеанин еси, и беседа твоя подобится.
71 он же нача ротитися и клятися, яко не вем человека сего, егоже вы глаголете.
72 И второе алектор возгласи. И помяну петръ глагол, егоже рече ему иисус, яко прежде даже петель не возгласит двакраты, отвержешися мене трикраты. И начен плакашеся.
Зачало 66.
1 И абие наутрие совет сотвориша архиерее со старцы и книжники, и весь сонм, связавше иисуса ведоша и предаша (его) пилату.
2 И вопроси его пилат: ты ли еси царь иудейский? он же отвещав рече ему: ты глаголеши.
3 И глаголаху на него архиерее много.
4 Пилат же паки вопроси его, глаголя: не отвещаваеши ли ничтоже? виждь, колика на тя свидетелствуют.
5 иисус же ктому ничтоже отвеща, яко дивитися пилату.
6 На (всякъ) же праздник отпущаше им единаго связня, егоже прошаху.
7 Бе же нарицаемый варавва со сковники своими связан, иже в кове убийство сотвориша.
8 И возопив народ нача просити, якоже всегда творяше им.
9 Пилат же отвеща им, глаголя: хощете ли, пущу вам царя иудейска?
10 Ведяше бо, яко зависти ради предаша его архиерее.
11 Архиерее же помануша народу, да паче варавву пустит им.
12 Пилат же отвещав паки рече им: что убо хощете сотворю, егоже глаголете царя иудейска?
13 они же паки возопиша (глаголюще): пропни его.
14 Пилат же глаголаше им: что бо зло сотвори? они же излиха вопияху: пропни его.
15 Пилат же хотя народу хотение сотворити, пусти им варавву: и предаде иисуса, бив, да пропнут его.
16 (Зачало 67) Воини же ведоша его внутрь двора, еже есть претор: и созваша всю спиру,
17 и облекоша его в препряду, и возложиша на него сплетше тернов венец,
18 и начаша целовати его (и глаголати): радуйся, царю иудейский.
19 И бияху его по главе тростию, и плюваху на него, и прегибающе колена покланяхуся ему.
20 И егда поругашася ему, совлекоша съ него препряду и облекоша его в ризы своя: и изведоша его, да пропнут его.
21 И задеша мимоходящу некоему симону киринею, грядущу с села, отцу александрову и руфову, да возмет крест его.
22 (Зачало 68) И приведоша его на голгофу место, еже есть сказаемо лобное место.
23 И даяху ему пити есмирнисмено вино: он же не прият.
24 И распеншии его разделиша ризы его, метающе жребий о них, кто что возмет.
25 Бе же час третий, и распяша его.
26 И бе написание вины его написано: царь иудейск.
27 И с ним распяша два разбойника, единаго о десную и единаго о шуюю его.
28 И сбыстся писание, еже глаголет: и со беззаконными вменися.
29 И мимоходящии хуляху его, покивающе
Главами своими и глаголюще: уа, разоряяй церковь и треми денми созидаяй,
30 спасися сам и сниди со креста.
31 Такожде и архиерее ругающеся, друг ко другу с книжники глаголаху: ины спасе, себе ли не может спасти?
32 христос, царь израилев, да снидет ныне со креста, да видим и веру имем ему. И распятая с ним поношаста ему.
33 Бывшу же часу шестому, тма бысть по всей земли до часа девятаго.
34 И в час девятый возопи иисус гласом велиим, глаголя: елои, елои, лама савахфани? еже есть сказаемо: боже мой, боже мой, почто мя оставил еси?
35 И нецыи от предстоящих слышавше, глаголаху: се, илию гласит.
36 Тек же един, и наполнив губу оцта, и возложь на трость, напаяше его, глаголя: оставите, да видим, аще приидет илиа сняти его.
37 иисус же пущь глас велий, издше.
38 И завеса церковная раздрася на двое, свыше до низу.
39 Видев же сотник стояй прямо ему, яко тако возопив издше, рече: воистинну человекъ сей сын бе божий.
40 Бяху же и жены издалеча зрящя, в нихже бе мариа магдалина, и мариа иакова малаго и иосии мати, и саломиа,
41 яже, и егда бе в галилеи, хождаху по нем и служаху ему: и ины многия, яже взыдоша с ним во иерусалим.
42 И уже позде бывшу, понеже бе пяток, еже есть к субботе,
43 (Зачало 69) прииде иосиф, иже от аримафеа, благообразен советник, иже и той бе чая царствия божия, дерзнув вниде к пилату, и проси телесе иисусова.
44 Пилат же дивися, аще уже умре: и призвав сотника, вопроси его: аще уже умре?
45 И уведев от сотника, даде тело иосифови.
46 И купив плащаницу и снемь его, обвитъ плащаницею: и положи его во гроб, иже бе изсечен от камене: и привали камень надъ двери гроба.
47 Мариа же магдалина и мариа иосиева зрясте, где его полагаху.
Зачало 70.
1 И минувшей субботе, мариа магдалина и мариа иаковля и саломиа купиша ароматы, да пришедша помажут иисуса.
2 И зело заутра во едину от суббот приидоша на гроб, возсиявшу солнцу,
3 и глаголаху к себе: кто отвалит нам камень от дверий гроба?
4 И воззревша видеша, яко отвален бе камень: бе бо велий зело.
5 И вшедша во гроб, видеша юношу седяща в десных, одеяна во одежду белу: и ужасошася.
6 он же глагола им: не ужасайтеся: иисуса ищете назарянина распятаго: воста, несть зде: се, место, идеже положиша его:
7 но идите, рцыте учеником его и петрови, яко варяет вы в галилеи: тамо его видите, якоже рече вам.
8 И изшедша бежаша от гроба: имяше [одержаше] же их трепет и ужас: и ни комуже ничтоже реша: бояхубося.
9 (Зачало 71) воскрес же (иисусъ) заутра в первую субботу, явися прежде марии магдалини, изъ неяже изгна седмь бесов.
10 она (же) шедши возвести с ним бывшим, плачущимся и рыдающим:
11 и они слышавше, яко жив есть и виден бысть от нея, не яша веры.
12 По сих же двема от них грядущема явися инем образом, идущема на село.
13 И та шедша возвестиста прочим: и ни тема веры яша.
14 Последи (же) возлежащим им единомунадесяте явися, и поноси неверствию их и жестосердию, яко видевшим его воставша не яша веры.
15 И рече им: шедше в мир весь, проповедите евангелие всей твари.
16 Иже веру имет и крестится, спасен будет: а иже не имет веры, осужден будет.
17 Знамения же веровавшим сия последуют: именем моим бесы ижденут: языки возглаголютъ новы:
18 змия возмут: аще и что смертно испиют, не вредит их: на недужыя руки возложат, и здрави будут.
19 господь же убо, по глаголании (его) къ ним, вознесеся на небо и седе о десную бога.
20 они же изшедше проповедаша всюду, господу поспешствующу и слово утверждающу последствующими знаменьми. Аминь.
Конец еже от марка святаго евангелиа: имать в себе глав 16, зачал же церковных 71.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>