Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА |
См. также: Апокалипсис (Откровение) св. ап. Иоанна Богослова
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22
1 Апокалипсис [откровение] иисуса христа, егоже [еже] даде ему бог, показати рабом своим, имже подобает быти вскоре. И сказа, пославъ чрез ангела своего рабу своему иоанну,
2 иже свидетелствова слово божие и свидетелство иисус христово, и елика виде.
3 блажен чтый, и слышащии словеса пророчествия, и соблюдающии писаная в нем: время бо близ.
4 иоанн седмим церквам, яже суть во асии: благодать вам и мир от сущаго, и иже бе, и грядущаго, и от седми духов, иже предъ престолом его суть,
5 и от иисуса христа, иже есть свидетель верный, первенец из мертвых и князь царей земных: любящу ны и омывшу нас от грехъ наших кровию своею,
6 и сотворил есть нас цари и иереи богу и отцу своему, тому слава и держава во веки веков. Аминь.
7 Се, грядет со облаки, и узрит его всяко око и иже его прободоша, и плачь сотворят о нем вся колена земная. ей, аминь.
8 Аз есмь алфа и омега, начаток и конец, глаголет господь, сый, и иже бе, и грядый, вседержитель.
9 Аз иоанн, иже и брат ваш и общникъ в печали и во царствии и в терпении иисус христове, бых во острове нарицаемем патмос за слово божие и за свидетелство иисус христово.
10 Бых в дусе в день неделный, и слышахъ за собою глас велий яко трубы глаголющия: аз есмь алфа и омега, первый и последний:
11 и: яже видиши, напиши в книгу, и посли церквам, яже суть во асии: во ефес и въ смирну, в пергам и в фиатир, и в сардисъ и в филаделфию и в лаодикию.
12 И обратихся видети глас, иже глаголаше со мною: и обратився видех седмь светилникъ златых,
13 и посреде седми светилников подобна сыну человечу, облечена в подир и препоясана при сосцу поясом златым:
14
Глава же его и власи белы аки ярина белая, якоже снег: и очи его яко пламень огнен:
15 и нозе его подобне халколивану, якоже в пещи разжженне: и глас его яко гласъ вод мног:
16 и держя в руце своей десней седмь звезд: и из уст его мечь обоюду остръ изострен исходяй: и лице его якоже солнце сияет в силе своей.
17 И егда видех его, падох к ногама его яко мертв. И положи десницу свою на мне, глаголя ми: не бойся: аз есмь первый и последний
18 и живый: и бых мертв, и се, жив есмь во веки веков, аминь: и имам ключи ада и смерти.
19 Напиши убо, яже видел еси, и яже суть, и имже подобает быти по сем.
20 Таинство седми звезд, яже видел еси на деснице моей, и седмь светилник златых: седмь звезд ангели седми церквей суть: и седмь светилников, яже видел еси, седмь церквей суть.
1 Ангелу ефесския церкве напиши: тако глаголетъ держяй седмь звезд в деснице своей, ходяй посреде седми светилников златых:
2 вем твоя дела, и труд твой, и терпение твое, и яко не можеши носити злых, и искусилъ еси глаголющияся быти апостолы, и не суть, и обрел еси их ложных:
3 и понесл еси, и терпение имаши, и за имя мое трудился еси и не изнемогл еси.
4 Но имам на тя, яко любовь твою первую оставил еси.
5 Помяни убо, откуду спал еси, и покайся, и первая дела сотвори: аще же ни, гряду тебе скоро и двигну светилник твой от места своего, аще не покаешися.
6 Но се имаши, яко ненавидиши дел николаитских, ихже и аз ненавижду.
7 Имеяй ухо да слышит, что дух глаголетъ церквам: побеждающему дам ясти от древа животнаго, еже есть посреде рая божия.
8 И ангелу церкве смирнския напиши: тако глаголетъ первый и последний, иже бысть мертв, и (се,) жив есть:
9 вем твоя дела и скорбь и нищету, но богатъ еси, и хулы глаголющихся быти иудей, и не суть, но сонмище сатанино.
10 Не бойся ничесоже, яже имаши пострадати. Се, имать диавол всаждати от вас в темницы, да искуситеся: и имети будете скорбь до десяти дний. Буди верен даже до смерти, и дам ти венец живота.
11 Имеяй ухо слышати да слышит, что духъ глаголет церквам: побеждаяй не имать вредитися от смерти вторыя.
12 И ангелу пергамския церкве напиши: тако глаголетъ имеяй мечь обоюду изощрен:
13 вем дела твоя, и где живеши, идеже престол сатанин: и держиши имя мое, и не отверглся еси веры моея и в (моя) дни, в няже антипас свидетель мой верный, иже убиен бысть в вас, идеже живет сатана.
14 Но имам на тя мало, яко имаши ту держащихъ учение валаамово, иже учаше валака положити соблазн пред сынми израилевыми, ясти жертвы идолския и любы творити.
15 Тако имаши и ты держащия учение николаитско, егоже ненавижду.
16 Покайся: аще ли ни, прииду тебе скоро и брань сотворю с ними мечем уст моих.
17 Имеяй ухо слышати да слышит, что духъ глаголет церквам: побеждающему дам ясти от манны сокровенныя, и дам ему камень бел и на камени имя ново написано, егоже никтоже весть, токмо приемляй.
18 И ангелу фиатирския церкве напиши: тако глаголет сын божий, имеяй очи свои яко пламень огнен, и нозе его подобне халколивану:
19 вем твоя дела и любовь, и службу и веру, и терпение твое и дела твоя, и последняя болша первых.
20 Но имам на тя мало, яко оставляеши жене иезавели, глаголющей себе быти пророчицу, учити и льстити моя рабы, любодействовати и снести жертву идолскую.
21 И дах ей время, да покается от любодейства своего, и не покаяся.
22 Се, аз полагаю ю на одре и любодеющия с нею в скорбь велию, аще не покаются от делъ своих:
23 и чада их умрут смертию [и чада ея убию смертию]: и уразумеют вся церкви, яко аз есмь испытаяй сердца и утробы: и дам вам комуждо по делом вашим.
24 Вам же глаголю и прочим сущим в фиатире, иже не имут учения сего и иже не разумеютъ глубин сатаниных, якоже глаголют: не возложу на вы тяготы иныя:
25 токмо, еже имате, держите, дондеже прииду.
26 И побеждающему и соблюдающему дела моя до конца, дам ему власть на языцех,
27 и упасет я жезлом железным, яко сосуды скудельничи сокрушатся, якоже и азъ приях от отца моего:
28 и дам ему звезду утреннюю.
29 Имеяй ухо слышати да слышит, что духъ глаголет церквам.
1 И ангелу сардийския церкве напиши: тако глаголетъ имеяй седмь духов божиих и седмь звезд: вем твоя дела, яко имя имаши яко жив, а мертв еси.
2 Буди бдя и утверждая прочая, имже умрети: не обретох бо дел твоих скончаных предъ богом (твоимъ) [моимъ].
3 Поминай убо, како приял еси и слышалъ еси, и соблюдай и покайся. Аще убо не бдиши, прииду на тя яко тать, и не имаши почути, в кий час прииду на тя.
4 Но имаши мало имен и в сардии, иже не оскверниша риз своих, и ходити имут со мною в белых, яко достойни суть.
5 Побеждаяй, той облечется в ризы белыя, и не имам отмыти [изгладити] имене его от книг животных, и исповем имя его пред отцем моим и пред ангелы его.
6 Имеяй ухо да слышит, что дух глаголетъ церквам.
7 И ангелу филаделфийския церкве напиши: тако глаголет святый истинный, имеяй ключь давидов, отверзаяй, и никтоже затворит, затворяяй, и никтоже отверзет:
8 вем твоя дела: се, дах пред тобою двери отверсты, и никтоже может затворити их: яко малу имаши силу, и соблюл еси мое слово, и не отверглся еси имене моего.
9 Се, даю от сонмища сатанина глаголющияся быти иудеи, и не суть, но лгут: се, сотворю их, да приидут и поклонятся пред ногама твоима, и уразумеют, яко аз возлюбих тя.
10 яко соблюл еси слово терпения моего, и аз тя соблюду от годины искушения, хотящия приити на всю вселенную искусити живущия на земли.
11 Се, гряду скоро: держи, еже имаши, да никтоже приимет венца твоего.
12 Побеждающаго сотворю столпа в церкви бога моего, и боле [вонъ] не имать изыти ктому: и напишу на нем имя бога моего и имя града бога моего, новаго иерусалима, сходящаго с небесъ от бога моего, и имя мое новое.
13 Имеяй ухо да слышит, что дух глаголетъ церквам.
14 И ангелу лаодикийския церкве напиши: тако глаголет аминь [иже есть аминь], свидетель верный и истинный, начаток создания божия:
15 вем твоя дела, яко ни студен еси ни тепл: не да студен бы был ни тепл [о, дабы студен был еси или горящь].
16 Тако, яко обуморен еси, и ни теплъ ни студен, изблевати тя от уст моих имамъ [тако, понеже тепл еси, и ни студен еси ниже горящь, имам тя изблевати из устъ моихъ].
17 Зане глаголеши, яко богат есмь и обогатихся и ничтоже требую: и не веси, яко ты еси окаянен и беден, и нищь и слеп и наг.
18 Совещаю тебе купити от мене злато разжжено огнем, да обогатишися, и одеяние бело, да облечешися, и да не явится срамота наготы твоея: и коллурием помажи очи твои, да видиши.
19 Аз, ихже аще люблю, обличаю и наказую. Ревнуй убо и покайся.
20 Се, стою при дверех и толку: аще кто услышитъ глас мой и отверзет двери, вниду к нему и вечеряю с ним, и той со мною.
21 Побеждающему дам сести со мною на престоле моем, якоже и аз победих и седох со отцем моим на престоле его.
22 Имеяй ухо да слышит, что дух глаголетъ церквам.
1 По сих видех: и се, двери отверсты на небеси, и глас первый, егоже слышах яко трубу глаголющь со мною, глаголя: взыди семо, и покажу ти, емуже подобает быти по сих.
2 И абие бых в дусе: и се, престол стояше на небеси, и на престоле седящь:
3 и седяй бе подобен видением камени иаспису и сардинови: и (бе) дуга окрест престола подобна видением смарагдови.
4 И окрест престола престоли двадесять и четыри: и на престолех видех двадесять и четыри старцы седящия, облечены в белыя ризы, и имяху венцы златы на
Главах своих.
5 И от престола исхождаху молния и громи и гласи: и седмь свещников огненных горящихъ пред престолом, иже суть седмь духов божиих:
6 и пред престолом море сткляно, подобно кристаллу: и посреде престола и окрест престола четыри животна исполнена очес спреди и созади.
7 И животно первое подобно льву, и второе животно подобно телцу, и третие животно имущее лице яко человек, и четвертое животно подобно орлу летящу.
8 И животна четыри, едино коеждо их имеяху по шесть крил окрест, и внутрьуду исполнена очес: и покоя не имут день и нощь, глаголюще: свят, свят, свят господь бог вседержитель, иже бе и сый и грядый.
9 И егда даша животная славу и честь и благодарение седящему на престоле, живущему во веки веков,
10 падоша двадесять и четыри старцы пред седящимъ на престоле, и поклонишася живущему во веки веков, и положиша венцы своя пред престолом, глаголюще:
11 достоин еси, господи, прияти славу и честь и силу, яко ты еси создал всяческая, и волею твоею суть, и сотворена.
1 И видех в деснице седящаго на престоле книгу написану внутрьуду и внеуду, запечатану седмию печатию.
2 И видех ангела крепка проповедающа гласомъ великим: кто есть достоин разгнути книгу и разрешити печати ея?
3 И никтоже можаше ни на небеси, ни на земли, ниже под землею, разгнути книгу, ниже зрети ю.
4 И аз плакахся много, яко ни един обретеся достоин разгнути и прочести книгу, ниже зрети ю.
5 И един от старец глагола ми: не плачися: се, победил есть лев, иже сый от колена иудова, корень давидов, разгнути книгу и разрешити седмь печатей ея.
6 И видех, и се, посреде престола и четырехъ животных и посреде старец агнец стоящь яко заколен, имущь рогов седмь и очесъ седмь, еже есть седмь духов божиих, посланныхъ во всю землю.
7 И прииде и прият книгу от десницы седящаго на престоле.
8 И егда прият книгу, четыри животна и двадесять и четыри старцы падоша пред агнцем, имуще кийждо гусли и фиалы златы полны фимиама, иже суть молитвы святых:
9 и поют песнь нову, глаголюще: достоин еси прияти книгу и отверзти печати ея, яко заклался и искупил еси богови нас кровию своею от всякаго колена и языка и людий и племен,
10 и сотворил еси нас богови нашему цари и иереи: и воцаримся на земли.
11 И видех, и слышах глас ангелов многихъ окрест престола и животных и старец, и бе число их тысяща тысящами [тмы тем и тысящи тысящей],
12 глаголюще гласом великим: достоин есть агнец заколенный прияти силу и богатство, и премудрость и крепость, и честь и славу и благословение.
13 И всяко создание, еже есть на небеси и на земли, и под землею и на мори яже суть, и сущая в них, вся слышах глаголющия: седящему на престоле и агнцу благословение и честь, и слава и держава во веки веков.
14 И четыри животна глаголаху: аминь. И двадесять и четыри старцы падоша и поклонишася живущему во веки веков.
1 И видех, егда отверзе агнец едину от седми печатей, и слышах единаго от четырехъ животных глаголюща якоже глас громный: гряди и виждь.
2 И видех, и се, конь бел, и седяй на нем имеяше лук, и дан бысть ему венец: и изыде побеждаяй, и да победит.
3 И егда отверзе печать вторую, слышахъ второе животно глаголющее: гряди и виждь.
4 И изыде другий конь рыжь: и седящему на нем дано бысть взяти мир от земли, и да убиютъ друг друга: и дан бысть ему мечь великий.
5 И егда отверзе третию печать, слышахъ третие животно глаголющее: гряди и виждь. И видех, и се, конь ворон, и седяй на немъ имеяше мерило в руце своей.
6 И слышах глас посреде четырех животныхъ глаголющий: мера пшеницы за динарь и три меры ячменя за динарь: и елеа и вина не вреди.
7 И егда отверзе четвертую печать, слышахъ глас четвертаго животна глаголющий: гряди и виждь.
8 И видех, и се, конь блед, и седяй на нем, имя ему смерть: и ад идяше вследъ его: и дана бысть ему область на четвертей части земли убити оружием и гладом, и смертию и зверьми земными.
9 И егда отверзе пятую печать, видех подъ олтарем души избиенных за слово божие и за свидетелство, еже имеяху.
10 И возопиша гласом великим, глаголюще: доколе, владыко святый и истинный, не судиши и не мстиши крове нашея от живущих на земли?
11 И даны быша коемуждо их ризы белы, и речено бысть им, да почиют еще время мало, дондеже скончаются и клеврети их и братия их, имущии избиени быти, якоже и тии.
12 И видех, егда отверзе шестую печать, и се, бысть трус велий, и солнце мрачно бысть яко вретище власяно, и луна бысть яко кровь:
13 и звезды небесныя падоша на землю, якоже смоковница отметает пупы своя, от ветра велика движима:
14 и небо отлучися яко свиток свиваемо, и всяка гора и остров от мест своихъ двигнушася:
15 и царие земстии и вельможи, и богатии и тысящницы и сильнии, и всяк раб и всяк свободь скрышася в пещерах и камении горстем,
16 и глаголаша горам и камению: падите на ны и покрыйте ны от лица седящаго на престоле и от гнева агнча:
17 яко прииде день великий гнева его, и кто может стати?
1 И по сем видех четыри ангелы стоящия на четырехъ углех земли, держащия четыри ветры земския, да не дышет ветр на землю, ни на море, ни на всяко древо.
2 И видех инаго ангела восходяща от восхода солнца, имуща печать бога живаго. И возопи гласомъ велиим к четырем ангелом, имже дано бысть вредити землю и море, глаголя:
3 не вредите ни земли, ни моря, ни древес, дондеже запечатлеем рабы бога нашего на челех их.
4 И слышах число запечатленных: сто четыредесять четыри тысящи запечатленных от всякаго колена сынов израилевых.
5 от колена иудова дванадесять тысящ запечатленных: от колена рувимова дванадесять тысящ запечатленных: от колена гадова дванадесять тысящ запечатленных:
6 от колена асирова дванадесять тысящ запечатленных: от колена неффалимля дванадесять тысящ запечатленных: от колена манассиина дванадесять тысящ запечатленных:
7 от колена симеонова дванадесять тысящ запечатленных: от колена левиина дванадесять тысящ запечатленных: от колена иссахарова дванадесять тысящ запечатленных:
8 от колена завулоня дванадесять тысящ запечатленных: от колена иосифова дванадесять тысящ запечатленных: от колена вениаминова дванадесять тысящ запечатленных.
9 По сих видех, и се, народ мног, егоже исчести никтоже может, от всякаго языка и колена, и людий и племен, стояще пред престоломъ и пред агнцем, облечены в ризы белы, и финицы в руках их.
10 И возопиша гласом велиим, глаголюще: спасние седящему на престоле богу нашему и агнцу.
11 И вси ангели стояху окрест престола и старец и четырех животных: и падоша на лицы пред престолом и поклонишася богу,
12 глаголюще: аминь: благословение и слава, и премудрость и хвала, и честь и сила и крепость богу нашему во веки веков. Аминь.
13 И отвеща един от старец, глаголя ми: сии облеченнии в ризы белыя кто суть и откуду приидоша?
14 И рех ему: господи, ты веси. И рече ми: сии суть, иже приидоша от скорби великия, и испраша ризы своя, и убелиша ризы своя в крови агнчи:
15 сего ради суть пред престолом божиим и служат ему день и нощь в церкви его, и седяй на престоле вселится в них:
16 не взалчут ктому, ниже вжаждут, не имать же пасти на них солнце, ниже всяк зной:
17 яко агнец, иже посреде престола, упасетъ я и наставит их на животныя источники вод, и отимет бог всяку слезу от очию их.
1 И егда отверзе седмую печать, бысть безмолвие на небеси яко пол часа.
2 И видех седмь ангелов, иже пред богомъ стояху: и дано бысть им седмь труб.
3 И другий ангел прииде и ста пред олтарем, имеяй кадилницу злату: и даны быша ему фимиами мнози, да даст молитвам святых всехъ на олтарь златый сущий пред престолом.
4 И изыде дым кадилный молитвами святых от руки ангела пред бога.
5 И взят ангел кадилницу, и наполни ю от огня сущаго на олтари, и положи на земли [поверже на землю]: и быша гласи и громи и блистания и трус.
6 И седмь ангел, иже имеяху седмь труб, уготовашася, да вострубят.
7 И первому ангелу вострубившу, бысть градъ и огнь, смешены с кровию, и падоша на землю: и третия часть древа погоре, и всяка трава злачная погоре.
8 И вторый ангел воструби, и яко гора велика огнем жегома ввержена бысть в море: и бысть третия часть моря кровь,
9 и умре третия часть созданий сущих въ мори, имущих души, и третия часть кораблей погибе.
10 И третий ангел воструби, и паде с небесе звезда велика, горящи яко свеща, и паде на третию часть рек и на источники водныя:
11 и имя звезде глаголется апсинфос: и бысть третия часть вод яко пелынь, и мнози от человек умроша от вод, яко горьки беша.
12 И четвертый ангел воструби, и уязвена бысть третия часть солнца и третия часть луны и третия часть звезд, да затмится третия часть их, и дне третия часть да не светит, и нощь такожде.
13 И видех и слышах единаго ангела паряща посреде небесе, глаголюща гласом великим: горе, горе, горе живущим на земли от прочих гласовъ трубных триех ангел хотящих трубити.
1 И пятый ангел воструби, и видех звезду с небесе спадшу на землю: и дан бысть ей ключь студенца бездны:
2 и отверзе студенца бездны, и взыде дымъ от студенца яко дым пещи велики, и омерче солнце и воздух от дыма студеничнаго.
3 И от дыма изыдоша прузи на землю, и дана бысть им область, якоже имут область скорпии земныя.
4 И речено бысть им, да не вредят травы земныя, ни всякаго злака, ни всякаго древа, но человеки точию, иже не имут печати божия на челех своих.
5 И дано бысть им, да не убиют их, но да муку приимут пять месяцей: и мучение ихъ яко мучение скорпиево, егда усекнетъ человека.
6 И в тыя дни взыщут человецы смерти, и не обрящут ея: и вожделеют умрети, и убежит от них смерть.
7 И уподобления пругов подобна конемъ уготовленым на брань: и на
Главах ихъ яко венцы уподоблени злату, и лица ихъ яко лица человеческа:
8 и имеяху власы, яко власы женския, и зубы их, яко львов беша:
9 и имеяху броня, яко броня железны, и глас крил их, яко глас колесниц, егда кони мнози текут на брань:
10 и имеяху ошибы подобны скорпииным, и жала бяху во ошибех их: и дана бе область им вредити человеки пять месяц.
11 И имели над собою царя аггела бездны, емуже имя еврейски аваддон, а еллински аполлион.
12 Горе едино отиде: се, грядут еще два горя по сих.
13 И шестый ангел воструби, и слышах гласъ един от четырех рогов олтаря златаго сущаго пред богом,
14 глаголющий шестому ангелу имеющу трубу: разреши четыри ангелы связаны при реце велицей евфрат.
15 И разрешени быша четыри ангели уготовани на час и день, и месяц и лето, да избиютъ третию часть человек.
16 И число воинов конных две тме тем: и слышах число их.
17 И тако видех в видении кони, и седящия на них имущия броня огненны и вакинфовы и жупелны: и главы конем (ихъ) яко главы львом, и из уст их исхождаше огнь и дым и жупел.
18 И от триех язв сих погибе третия часть человеков, от огня и от дыма и от жупела, исходящих из уст их:
19 область бо коней во устех их бе [и во ошибех ихъ], и [ибо] ошиби ихъ подобни змием, имуще главы и теми пакости деюще.
20 И прочии от человек, иже не вреждени быша [не избиени быша] язывами сими, ниже покаяшася от дел рук своих, да не поклонятся демоном, ни идолом златым и сребряным, и медянымъ и каменным и древяным, иже ни видети могут, ни слышати, ни ходити:
21 и не покаяшася от убийств своих, ни от волхвований своих, ниже от блуда своего, ниже от татьб своих.
1 И видех инаго ангела крепка сходяща с небесе, оболчена во облак, и дуга над главою (его), и лице его яко солнце, и нозе его яко столпи огнени,
2 и имеяше в руце своей книгу разгибену: и постави ногу свою десную на мори, а шуюю на земли,
3 и возопи гласом великим, яко лев рыкая: и егда возгласи, глаголаша седмь громов гласы своя.
4 И егда возгласиша [глаголаша] седмь громовъ гласы своя, хотех писати: и слышах гласъ с небесе глаголющь ми: запечатлей, яже глаголаша седмь громов, и сего не пиши.
5 И ангел, егоже видех стояща на мори и на земли, воздвиже руку свою на небо
6 и клятся живущим во веки веков, иже созда небо и яже на нем, и землю и яже на ней, и море и яже в нем, яко лета уже не будет:
7 но во дни гласа седмаго ангела, егда имать вострубити, тогда скончается тайна божия, якоже благовести своими рабы пророки.
8 И глас его слышах с небесе паки глаголющь со мною, и глагола: иди и приими книжицу разгнутую в руце ангела стоящаго на мори и на земли.
9 И идох ко ангелу, глаголя ему: даждь ми книжицу. И рече ми: приими и снеждь ю: и горька будет во чреве твоем, но во устехъ ти сладка будет яко мед.
10 И приях книгу от руки ангела и снедохъ ю: и бе во устех моих яко мед сладка: и егда снедох ю, горька бяше во чреве моем.
11 И рече ми: подобает ти паки пророчествовати в людех и во племенех, и во языцех и в царех мнозех.
1 И дана ми бысть трость подобна жезлу, глаголя: востани и измери церковь божию и олтарь, и кланяющияся в ней:
2 а двор сущий внутрь [вне] церкве изнеси [исключи] внеуду, ниже измери его, зане дан бысть языком: и град святый поперутъ четыредесять и два месяцы.
3 И дам обема свидетелема моима, и прорицати будут дний тысящу двесте и шестьдесят, оболчена во вретище.
4 Сии суть две маслицы и два свещника предъ богом земли стояща.
5 И иже им неправду сотворит, огнь исходитъ из уст их и пояст враги их: и иже восхощет обидети их, сему подобает убиену быти.
6 И сии имут область затворити небо, да не снидет дождь (на землю) во дни прорицания их, и область имут на водах, обращати я въ кровь и поразити землю всякою язвою, елижды аще восхощут.
7 И егда скончают свидетелство свое, зверь, иже исходит от бездны, сотворит с ними брань и победит их и убиет я,
8 и трупы их оставит на стогнах града великаго, иже нарицается духовне содом и египет, идеже и господь наш распят бысть.
9 И зрети имут от людий и племен, и от язык и колен, телеса их дни три и пол, и трупы их не оставят положити во гробех.
10 И живущии на земли возрадуются и возвеселятся о них, и дары послют друг ко другу, яко оба сия пророка мучиста живущия на земли.
11 И по триех днех и пол, дух животенъ внидет в ня от бога, и станут (оба) на ногах своих: и страх велий нападет на зрящихъ их.
12 И услышат глас велий с небесе, глаголющь им: взыдита семо. И взыдоста на небо на облацех, и видеша я врази их.
13 И в час той трус бысть велий, и десятая часть града паде, и погибе трусом имен человеческихъ седмь тысящ: и прочии пристрашни быша и даша славу богу небесному.
14 Горе второе отиде: се, горе третие грядетъ скоро.
15 И седмый ангел воструби, и быша гласи велицы на небесех, глаголюще: бысть царство мира господа нашего и христа его, и воцарится во веки веков.
16 И двадесять и четыри старцы, пред богомъ седящии на престолех своих, падоша на лица своя и поклонишася богу,
17 глаголюще: хвалим тя, господи боже вседержителю, иже сый и бе и грядый, яко приял еси силу твою великую и воцарился еси:
18 и языцы прогневашася: и прииде гневъ твой, и время мертвым суд прияти, и дати мзду рабом твоим пророком и святым и боящимся имене твоего, малым и великим, и растлити посмраждшия [растлившия] землю.
19 И отверзеся храм божий на небеси, и явися кивот завета его в храме его: и быша блистания и гласи, и громи и трус, и градъ велик.
1 И знамение велие явися на небеси: жена облечена в солнце, и луна под ногама ея, и на главе ея венец от звезд двоюнадесяте:
2 и во чреве имущи, вопиет болящи и страждущи родити.
3 И явися ино знамение на небеси: и се, змий велик чермен, имея глав седмь и роговъ десять, и на
Главах его седмь венец:
4 и хобот его отторже третию часть звездъ небесных и положи я в землю [поверже я на землю]. И змий стояше пред женою хотящею родити, да, егда родит, снесть чадо ея.
5 И роди сына мужеска, иже имать упасти вся языки жезлом железным: и восхищено бысть чадо ея к богу и престолу его.
6 А жена бежа в пустыню, идеже име место уготовано от бога, да тамо питается дний тысящу двесте шестьдесят.
7 И бысть брань на небеси: михаил и ангели его брань сотвориша со змием, и змий брася и аггели его,
8 и не возмогоша, и места не обретеся имъ ктому на небеси.
9 И вложен [поверженъ] бысть змий великий, змий древний, нарицаемый диавол и сатана, льстяй вселенную всю, и вложен [поверженъ] бысть на землю, и аггели его с ним низвержени быша.
10 И слышах глас велий на небеси, глаголющь: ныне бысть спасние и сила и царство бога нашего и область христа его, яко низложен бысть клеветник братии нашея, оклевещая их предъ богом нашим день и нощь.
11 И тии победиша его кровию агнчею и словом свидетелства своего, и не возлюбиша душъ своих даже до смерти.
12 Сего ради веселитеся, небеса и живущии на них. Горе живущим на земли и мори, яко сниде диавол к вам, имея ярость великую, ведый, яко время мало имать.
13 И егда виде змий, яко низложен бысть на землю, гоняше жену, яже роди мужеска.
14 И дана быша жене два крила орла великаго, да парит в пустыню в место свое, идеже препитана бяше ту время и времен и пол времене, от лица змиина.
15 И испусти змий за женою из уст своихъ воду яко реку, да ю в реце потопит.
16 И поможе земля жене, и отверзе земля уста своя, и пожре реку, юже изведе змий от устъ своих.
17 И разгневася змий на жену и иде сотворити брань со оставшим семенем ея, иже соблюдаютъ заповеди божия и имеют свидетелство иисусъ христово.
1 И стах на песце морстем: и видех изъ моря зверя исходяща, имуща глав седмь и рогов десять, и на розех его венецъ десять, а на
Главах его имена хулна.
2 зверь, егоже видех, бе подобен рыси, и нозе ему яко медведи, и уста его яко уста львова: и даде ему змий силу свою и престол свой и область великую.
3 И видех едину от глав его яко заколену в смерть, и язва смерти его исцеле. И чудися вся земля вслед зверя, и поклонишася змию, иже даде область зверю,
4 и поклонишася зверю, глаголюще: кто подобенъ зверю и кто может ратоватися с нимъ?
5 И дана быша ему уста глаголюща велика и хулна, и дана бысть ему область творити месяц четыредесять два.
6 И отверзе уста своя в хуление к богу, хулити имя его и селение его и живущия на небеси.
7 И дано бысть ему брань творити со святыми и победити я: и дана бысть ему область на всяцем колене (людий) и на языцех и племенех.
8 И поклонятся ему вси живущии на земли, имже не написана суть имена в книгах животныхъ агнца заколенаго от сложения мира.
9 Аще кто имать ухо, да слышит.
10 Иже аще в пленение ведет, в пленение пойдет: аще кто оружием убиет, подобаетъ ему оружием убиену быти. Зде есть терпение и вера святых.
11 И видех инаго зверя восходящаго от земли, и имеяше рога два, подобна агнчим, и глаголаше яко змий.
12 И власть перваго зверя всю творяше предъ ним: и творяше землю и вся живущия на ней поклонитися первому зверю, емуже исцелена бысть язва смертная:
13 и сотвори чудеса велика, да и огнь сотворитъ сходити с небесе на землю пред человеки.
14 И льстит живущия на земли, ради знамений, яже дана быша ему пред зверем творити, глаголя живущим на земли, сотворити образ зверю, иже имать язву оружную и жив бысть.
15 И дано бысть ему дати дух образу зверину, да проглаголет икона зверина и сотворит, да иже аще не поклонятся образу звериному, убиени будут.
16 И сотворит вся малыя и великия, богатыя и убогия, свободныя и работныя, да дастъ им начертание на десней руце их или на челех их,
17 да никтоже возможет ни купити, ни продати, токмо кто имать начертание, или имя зверя, или число имене его.
18 Зде мудрость есть. Иже имать ум, да почтет число зверино: число бо человеческо есть, и число его шесть сот шестьдесятъ шесть.
1 И видех, и се, агнец стояше на горе сионстей, и с ним сто и четыредесять и четыри тысящи, имуще имя отца его написано на челехъ своих.
2 И слышах глас с небесе, яко глас водъ многих и яко глас грома велика: и гласъ слышах гудец гудущих в гусли своя
3 и поющих яко песнь нову пред престоломъ и пред четыри животными и старцы: и никтоже можаше навыкнути песни, токмо сии сто и четыредесять и четыри тысящи искуплени от земли.
4 Сии суть, иже с женами не осквернишася, зане девственницы суть: сии последуют агнцу, аможе аще пойдет. Сии суть куплени от людий первенцы богу и агнцу,
5 и во устех их не обретеся лесть: без порока бо суть пред престолом божиим.
6 И видех инаго ангела паряща посреде небесе, имущаго евангелие вечно благовестити живущимъ на земли и всякому племени и языку, и колену и людем,
7 глаголюща гласом великим: убойтеся бога и дадите ему славу, яко прииде час суда его, и поклонитеся сотворшему небо и землю, и море и источники водныя.
8 И ин ангел вслед иде, глаголя: паде, паде вавилон град великий, зане от вина ярости любодеяния своего напои вся языки.
9 И третий ангел вслед его иде, глаголя гласом великим: иже аще кто покланяется зверю и иконе его и приемлет начертание на челе своем или на руце своей,
10 и той имать пити от вина ярости божия, вина нерастворена [влиянна нерастворена] в чаши гнева его, и будет мучен огнем и жупеломъ пред ангелы святыми и пред агнцем:
11 и дым мучения их во веки веков восходит, и не имут покоя день и нощь покланяющиися зверю и образу его и приемлющии начертание имене его.
12 Зде есть терпение святых, иже соблюдаютъ заповеди божия и веру иисусову.
13 И слышах глас с небесе, глаголющь ми: напиши: блажени мертвии, умирающии о господе отныне. ей, глаголет дух, да почиют от трудов своих: дела бо их ходят вслед с ними.
14 И видех, и се, облак светел, и на облаце седяй подобен сыну человеческому, имея на главе своей венец злат, и в руце его серп остр.
15 И ин ангел изыде из храма, вопия велиим гласом седящему на облаце: посли серпъ твой и жни, яко прииде час пожати, зане изсше трава [жатва] земная.
16 И положи [поверже] седяй на облаце серпъ свой на землю, и пожата бысть земля.
17 И ин ангел изыде из церкве сущия на небеси, имый и той серп остр.
18 И ин ангел изыде от олтаря, имый область на огни, и возопи кличем великимъ ко имущему серп острый, глаголя: посли серпъ твой острый и объемли грозды винограда земнаго, яко созреша уже гроздие ея.
19 И положи [верже] ангел серп свой на земли [на землю], и обере виноград земский и вложи в точило великия ярости божия.
20 И испрано бысть точило вне града, и изыде кровь от точила даже до узд конских, от стадий тысяща и шесть сот.
1 И видех ино знамение на небеси велие и чудно, седмь ангел имущих седмь язв последних, зане в тех скончается ярость божия.
2 И видех яко море сткляно смешено со огнем, и победившия зверя и образ его, и начертание его и число имене его, стоящия на мори стклянем, имущия гусли божия:
3 и пояху песнь моисеа раба божия и песнь агнчу, глаголюще: велия и дивна дела твоя, господи боже вседержителю: праведни и истинни путие твои, царю святых:
4 кто не убоится тебе, господи, и прославитъ имя твое? яко един преподобен еси, яко вси языцы приидут и поклонятся пред тобою: яко оправдания твоя явишася.
5 И по сих видех, и се, отверзеся храмъ скинии свидения на небеси:
6 и изыдоша седмь ангел из храма, иже имеяху седмь язв, облечени в ризы льняны чисты и светлы, и препоясани на персех поясы златыми.
7 И едино от четырех животных даде седмимъ ангелом седмь фиал златых, исполненых ярости бога живущаго во веки веков.
8 И наполнися храм дыма от славы божия и от силы его, и никтоже можаше внити во храм, дондеже скончаются седмь язв седмих ангел.
1 И слышах глас велий от храма глаголющь седмимъ ангелом: идите и излийте седмь фиал ярости божия на землю.
2 И иде первый ангел и излия фиал свой на землю: и бысть гной зол и лют на человецехъ имущих начертание зверино и кланяющихся иконе его.
3 И вторый ангел излия фиал свой в море: и бысть кровь яко мертвеца, и всяка душа жива умре в мори.
4 И третий ангел излия фиал свой на реки и на источники водныя: и бысть кровь.
5 И слышах ангела воднаго глаголюща: праведнъ еси, господи, сый и иже бе, и преподобн, яко сия судил еси:
6 зане кровь святых и пророк излияша, и кровь им дал еси пити: достойни бо суть.
7 И слышах другаго от олтаря глаголюща: ей, господи боже вседержителю, истинни и прави суди твои.
8 И четвертый ангел излия фиал свой на солнце: и дано бысть ему опаляти человеки огнем.
9 И опалишася человецы зноем великим, и хулиша имя божие, иже имать область на язвахъ сих, и не покаяшася дати ему славы.
10 И пятый ангел излия фиал свой на престолъ зверин: и бысть царство его омрачено, и жваху языки своя от болезни,
11 и хулиша бога небеснаго от болезни и от язвъ своих, и не покаяшася от дел своих.
12 И шестый ангел излия фиал свой на реку велику евфрат: и изсяче вода ея, да уготовится путь царем сущим от восток солнечных.
13 И видех из уст змия и из устъ зверя и из уст лжаго пророка духи три нечистыя, яко жабы исходящия:
14 суть бо дуси демонстии творяще знамения, иже исходят к царем всея вселенныя, собрати я на брань в день той великий бога вседержителя.
15 Се, гряду яко тать: блажен бдяй и блюдый ризы своя, да не наг ходит и узрят срамоту его.
16 И собра их на место нарицаемое еврейски армагеддон.
17 И седмый ангел излия фиал свой на воздух: и изыде глас велий от храма небесе от престола, глаголя: бысть.
18 И быша блистания и громи и гласи, и бысть трус велик, яков николиже бысть, отнележе быша человецы на земли, толик трус, тако велий.
19 И бысть град велик в три части, и гради язычестии падоша, и вавилон великий помяновенъ бысть пред богом, дати ему чашу вина ярости гнева своего.
20 И всяк остров бежа, и горы не обретошася:
21 и град велик, яко талантес, сниде съ небесе на человеки: и хулиша человецы бога от язвы градныя, яко велия есть язва его зело.
1 И прииде един от седми ангел имущихъ седмь фиал, и глагола со мною, глаголя ми: прииди, да покажу ти суд любодейцы великия, седящия на водах многих:
2 с неюже любодеяша царие земстии, и упишася живущии на земли от вина любодеяния ея.
3 И веде мя в пусто место духом: и видехъ жену седящу на звери червлене, исполненемъ имен хулных, иже имеяше глав седмь и рогов десять.
4 И жена бе облечена в порфиру и червленицу, и позлащена златом и камением драгим и бисером, имущи чашу злату в руце своей полну мерзости и скверн любодеяния ея:
5 и на челе ея написано имя: тайна, вавилонъ великий, мати любодейцам и мерзостем земским.
6 И видех жену пияну кровьми святых и кровьми свидетелей иисусовых, и дивихся, видев ю, дивом великим.
7 И рече ми ангел: что дивишися? аз ти реку тайну жены (сея) и зверя носящаго ю, седмь глав имуща и рогов десять.
8 зверь, егоже видел еси, бе, и несть, и имать взыти от бездны, и в пагубу пойдет: и удивятся живущии на земли, имже имена не написана суть в книгу животную от сложения мира, видяще, яко зверь бе, и несть, и преста [видяще зверя, иже бе, и несть, и предстанетъ].
9 Зде ум, иже имать мудрость. Седмь глав горы суть седмь, идеже жена седитъ на них,
10 и царие седмь суть: пять их пало, и единъ есть, (а) другий еще не прииде: и егда приидет, мало ему есть пребыти [подобаетъ быти].
11 И зверь, иже бе и несть, и той осмый есть, и от седмих есть, и в пагубу идет.
12 И десять рогов, яже видел еси, десять царей суть, иже царства еще не прияша, но область яко царие на един час приимутъ со зверем.
13 Сии едину волю имут, и силу и область свою зверю дадут:
14 сии со агнцем брань сотворят, и агнецъ победит я, яко господь господем есть и царь царем: и сущии с ним званнии и избраннии и верни.
15 И глагола ми: воды, яже еси видел, идеже любодейца седит, людие и народи суть, и племена и языцы.
16 И десять рогов, яже видел еси на звери, сии любодейцу возненавидят, и запустевшу сотворят ю и нагу, и плоть ея снедят, и сожгут ю огнем:
17 бог бо дал есть в сердца их, сотворити волю его, и сотворити едину волю, и дати царство свое зверю, дондеже скончаются глаголы божии.
18 И жена, юже видел еси, град есть великий, иже имать царство над цари земными.
1 И по сих видех ина ангела сходяща с небесе, имуща область велию: и земля просветися от славы его.
2 И возопи в крепости, гласом велиим глаголя: паде, паде вавилон великий, и бысть жилище бесом и хранитель всякому духу нечисту, и хранилище всех птиц нечистых и ненавидимых: яко от вина ярости любодеяния своего напои вся языки,
3 и царие земстии с нею любы деяша, и купцы земстии от силы пищи ея [от богатства сластей его] разбогатеша.
4 И слышах глас ин с небесе, глаголющь: изыдите из нея, людие мои, да не причаститеся грехомъ ея и от язв ея да не вредитеся:
5 яко прилепишася [взыдоша] греси ея даже до небесе, и помяну бог неправды ея.
6 Воздадите ей, яко и та воздаде вам, и усугубите ей сугубо по делом ея: чашею, еюже черпа (вамъ), черплите ей сугубо.
7 елико прославися и разсвирепе [насладися], толико дадите ей мук и рыданий: яко въ сердцы своем глаголет, (яко) сежу царицею, и вдова несмь, и рыдания не имам видети.
8 Сего ради во един день приидут язвы ей, смерть и плачь и глад, и огнемъ сожжена будет, яко крепок господь бог судяй ей.
9 И возрыдают и восплачутся ея царие земстии, любы деявшии с нею и разсвирепевшии, егда узрят дым запаления ея,
10 издалеча стояще за страх мук ея, глаголюще: горе, горе, град великий вавилон, град крепкий, яко во един час прииде суд твой.
11 И купцы земстии возрыдают и восплачутся о нем, яко бремен их никтоже купует ктому,
12 бремен злата и сребра, и камения драгаго и бисера, и висса и порфиры, и шелка и червени, и всякаго древа фиинна, и всякаго сосуда изъ кости слоновыя, и всякаго сосуда от древа честнаго, и медяна и железна и мраморна,
13 и корицы и фимиама, и мира и ливана, и вина и елеа, и семидала и пшеницы, и скота и овец, и коней и колесниц, и телесъ и душ человеческих.
14 И овощи похотей души твоея отидоша от тебе, и вся тучная и светлая отидоша от тебе, и ктому не имаши обрести их.
15 Купцы сими обогащшеся от нея, издалеча станут за страх мучения ея, рыдающе и плачущеся,
16 и глаголюще: горе, горе, град великий, облеченный виссом и порфирою и червленицею, и позлащеный златом и камением драгим и бисеромъ
17 яко во един час погибе толико богатство. И всяк кормчий, и всяк плаваяй в кораблех, и всяк елик в мори делаяй [и весь въ кораблех народ, и корабелницы, и елицы въ мори делаютъ], издалеча сташа,
18 и вопияху, видяще дым раждежения его, глаголюще: кий подобен граду великому?
19 И положиша персть на
Главах своих, и возопиша плачущеся и рыдающе, глаголюще: горе, горе, градъ великий, в немже обогатишася вси имущии корабли в мори, от чести [богатства] его: яко единемъ часом запусте.
20 Веселися о сем, небо, и святии апостоли и пророцы, яко суди бог суд ваш от него.
21 И взят един ангел крепок камень велик яко жернов и верже в море, глаголя: тако стремлением ввержен будет вавилон градъ великий, и не имать обрестися ктому:
22 и глас гудец и мусикий, и пискателей и труб не имать слышатися ктому в тебе: и всяк хитрец всякия хитрости не обрящется ктому в тебе, и шум жерновный не будет слышанъ в тебе:
23 и свет светилника не имать светити въ тебе ктому, и глас жениха и невесты не имать слышан быти в тебе ктому: яко купцы твои беша вельможи земстии, яко волхвовании твоими прельщени быша вси языцы.
24 И в нем кровь пророческа и святых обретеся и всех избиенных на земли.
1 И по сих слышах глас велий народа многа на небеси, глаголющаго: аллилуиа: спасние и слава, и честь и сила господу нашему,
2 яко истинни и прави суди его: яко судил есть любодейцу велику, яже посмради [растли] землю любодеянием своим, и отмстилъ кровь рабов своих от руки ея.
3 И второе реша: аллилуиа. И дым ея восхождаше во веки веков.
4 И падоша двадесять и четыри старцы и четыри животна и поклонишася богови седящему на престоле, глаголюще: аминь, аллилуиа.
5 И глас изыде от престола глаголющь: пойте богу нашему, вси раби его и боящиися его, и малии и велицыи.
6 И слышах яко глас народа многа, и яко глас вод многих, и яко глас громов крепких, глаголющих: аллилуиа, яко воцарися господь богъ вседержитель:
7 радуимся и веселимся, и дадим славу ему: яко прииде брак агнчий, и жена его уготовила есть себе.
8 И дано бысть ей облещися в виссон чистъ и светел: виссон бо оправдания святых есть.
9 И глагола ми: напиши: блажени званнии на вечерю брака агнча. И глагола ми: сия словеса истинна божия суть.
10 И пад пред ногама его, поклонихся ему: и глагола ми: виждь, ни: клеврет ти есмь и братий твоих имущих свидетелство иисусово: богу поклонися: свидетелство бо иисусово есть дух пророчествия.
11 И видех небо отверсто, и се, конь бел, и седяй на нем верен и истинен, и правосудный и воинственный:
12 очи же ему (еста) яко пламень огнен, и на главе его венцы мнози: имый имя написано, еже никтоже весть, токмо онъ сам:
13 и облечен в ризу червлену кровию. И нарицается имя его слово божие.
14 И воинства небесная идяху вслед его на конех белых, облечени в виссон белъ и чист.
15 И из уст его изыде оружие остро, да тем избиет языки: и той упасетъ я жезлом железным, и той перет точило вина ярости и гнева божия вседержителева.
16 И имать на ризе и на стегне своем имя написано: царь царем и господь господем.
17 И видех единаго ангела стояща на солнце: и возопи гласом велиим, глаголя всем птицамъ парящим посреде небесе: приидите и соберитеся на вечерю великую божию,
18 да снесте плоти царей и плоти крепкихъ и плоти тысящников, и плоти коней и седящихъ на них, и плоти всех свободных и рабов, и малых и великих.
19 И видех зверя и цари земныя и вои их собраны сотворити брань с седящим на кони и с воинствы его.
20 И ят бысть зверь и с ним лживый пророк, сотворивый знамения пред ним, имиже прельсти приемшия начертание зверино и покланяющияся иконе его: жива ввержена быста оба в езеро огненное горящее жупелом:
21 а прочии убиени быша оружием седящаго на кони, изшедшим из уст его: и вся птицы насытишася от плотей их.
1 И видех ангела сходяща с небесе, имеюща ключь бездны и уже велико в руце своей:
2 и ят змия, змия древняго, иже есть диавол и сатана, и связа и на тысящу лет,
3 и в бездну затвори [вверже] его, и заключи его, и запечатле над ним, да не прельститъ ктому языки, дондеже скончается тысяща лет: и по сих подобает ему отрешену быти на мало время.
4 И видех престолы и седящия на них, и суд дан бысть им: и души растесаных за свидетелство иисусово и за слово божие, иже не поклонишася зверю, ни иконе его, и не прияша начертания на челех своих и на руце своей. И ожиша и воцаришася со христом тысящу лет:
5 прочии же мертвецы не ожиша, дондеже скончается тысяща лет. Се воскресение первое.
6 блажен и свят, иже имать часть в воскреснии первем: на нихже смерть вторая не имать области, но будут иерее богу и христу и воцарятся с ним тысящу лет.
7 И егда скончается тысяща лет, разрешенъ будет сатана от темницы своея и изыдет прельстити языки сущия на четырех углех земли, гога и магога, собрати их на брань, ихже число яко песок морский.
8 И взыдоша на широту земли и обыдоша святыхъ стан и град возлюбленный.
9 И сниде огнь от бога с небесе и пояде я:
10 и диавол льстяй их ввержен будет въ езеро огненно и жупелно, идеже зверь и лживый пророк: и мучени будут день и нощь во веки веков.
11 И видех престол велик бел и седящаго на нем, егоже от лица бежа небо и земля, и место не обретеся им.
12 И видех мертвецы малыя и великия стоящя пред богом, и книги разгнушася: и ина книга отверзеся, яже есть животная: и суд прияша мертвецы от написаных в книгах, по деломъ их.
13 И даде море мертвецы своя, и смерть и адъ даста своя мертвецы: и суд прияша по деломъ своим,
14 и смерть и ад ввержена быста в езеро огненное. И се есть вторая смерть.
15 И иже не обретеся в книзе животней написан, ввержен будет в езеро огненное.
1 И видех небо ново и землю нову: первое бо небо и земля первая преидоста, и моря несть ктому.
2 И аз иоанн видех град святый, иерусалимъ нов сходящь от бога с небесе, приготован яко невесту украшену мужу своему.
3 И слышах глас велий с небесе, глаголющь: се, скиния божия с человеки, и вселится с ними: и тии людие его будут, и сам бог будетъ с ними бог их:
4 и отимет бог всяку слезу от очию их, и смерти не будет ктому: ни плача, ни вопля, ни болезни не будет ктому, яко первая мимоидоша.
5 И рече седяй на престоле: се, нова вся творю. И глагола ми: напиши, яко сия словеса истинна и верна суть.
6 И рече ми: совершишася. Аз есмь алфа и омега, начаток и конец: аз жаждущему дам от источника воды животныя туне.
7 Побеждаяй наследит вся, и буду ему бог, и той будет мне в сына.
8 Страшливым же и неверным, и сквернымъ и убийцам, и блуд творящим и чары творящим, идоложерцем и всем лживым, часть имъ в езере горящем огнем и жупелом, еже есть смерть вторая.
9 И прииде ко мне един от седми ангел, имущих седмь фиал исполненых седмих язвъ последних, и рече ко мне, глаголя: гряди, покажу ти невесту агнчу жену.
10 И веде мя духом на гору велику и высоку и показа ми град великий, святый иерусалим низходящь с небесе от бога,
11 имущь славу божию: и светило его подобно камени драгому, яко камени иаспису кристалловидну:
12 имущь стену велику и высоку, имущь вратъ дванадесять, и на вратех ангелов дванадесять и имена написана, яже суть имена дванадесятимъ коленом сынов израилевых:
13 от востока врата троя и от севера врата троя, от юга врата троя и от запада врата троя.
14 И стена града имеяше оснований дванадесять, и на них имен дванадесять апостолов агнчих.
15 И глаголяй со мною имеяше трость злату, да измерит град и врата его и стены его.
16 И град на четыри углы стоит, и долгота его толика есть, елика же и широта. И измери град тростию на стадий дванадесять тысящ: долгота и широта и высота его равна суть.
17 И размери стену его во сто и четыридесять и четыри лакти, в меру человеческу, яже есть ангела.
18 И бе создание стены его иаспис: и град злато чисто, подобен стклу чисту.
19 И основания стены града всяким драгимъ камением украшена бяху: основание первое иаспис, второе сапфир, третие халкидон, четвертое смарагд,
20 пятое сардоникс, шестое сардий, седмое хрисолиф, осмое вирилл, девятое топазий, десятое хрисопрас, первоенадесять вакинф, второенадесять амефист.
21 И дванадесять врат дванадесять бисеров: едина каяждо врата беша от единаго бисера. И стогны града злато чисто, яко сткло пресветло.
22 И храма не видех в нем: господь бо бог вседержитель храм ему есть, и агнец.
23 И град не требуя солнца и луны, да светятъ в нем, слава бо божия просвети его, и светилникъ его агнец.
24 И языцы спасени во свете его пойдут, и царие земстии принесут славу и честь свою в него.
25 И врата его не имут затворитися во дни: нощи бо не будет ту.
26 И принесут славу и честь языков в него:
27 и не имать в него внити всяко скверно, и творяй мерзость и лжу, но токмо написаныя в книгах животных агнца.
1 И показа ми чисту реку воды животныя, светлу яко кристалл, исходящу от престола божия и агнча.
2 Посреде стогны его и по обаполы реки древо животное, еже творит плодов дванадесяте, на кийждо месяц воздая плод свой: и листвие древа во исцеление языком.
3 И всяка анафема не будет ктому: и престолъ божий и агнечь будет в нем, и раби его послужат ему,
4 и узрят лице его, и имя его на челех их.
5 И нощи не будет тамо, и не потребуют света от светилника, ни света солнечнаго, яко господь бог просвещает я: и воцарятся во веки веков.
6 И рече ми: сия словеса верна и истинна: и господь бог святых пророк посла ангела своего показати рабом своим, имже подобает быти вскоре.
7 Се, гряду скоро: блажен соблюдаяй словеса пророчества книги сея.
8 И аз иоанн видех сия и слышах. И егда слышах и видех, падох поклонитися на ногу ангела показующаго ми сие:
9 и глагола ми: виждь, ни: клеврет бо твой есмь и братии твоея пророков и соблюдающихъ словеса книги сея: богу поклонися.
10 И глагола ми: не запечатлей словес пророчествия книги сея: яко время близ есть.
11 обидяй да обидит еще, и скверный да осквернится еще: и праведный правду да творитъ еще: и святый да святится еще.
12 И се, гряду скоро, и мзда моя со мною, воздати коемуждо по делом его.
13 Аз есмь алфа и омега, начаток и конец, первый и последний.
14 блажени творящии заповеди его, да будетъ область им на древо животное, и враты внидутъ во град.
15 Вне же пси и чародее, и любодее и убийцы, и идолослужителе и всяк любяй и творяй лжу.
16 Аз иисус послах ангела моего засвидетелствовати вам сия в церквах. Аз есмь корень и родъ давидов, и звезда утренняя [светлая] и денница.
17 И дух и невеста глаголют: прииди, и слышай да глаголет: прииди. И жаждяй да приидет, и хотяй да приимет воду животную туне.
18 Сосвидетелствую бо всякому слышащему словеса пророчества книги сея: аще кто приложит къ сим, наложит бог на него язв написанныхъ в книзе сей:
19 и аще кто отимет от словес книги пророчествия сего, отимет бог часть его от книги животныя, и от града святаго, и написанных в книзе сей.
20 глаголет свидетелствуяй сия: ей, гряду скоро: аминь. ей, гряди господи иисусе.
21 благодать господа нашего иисуса христа со всеми вами. Аминь.
Конец апокалипсису святаго иоанна богослова: имать в себе главы 22.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА |