Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Послание к Евреям св. ап. Павла
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13
1 Многочастне и многообразне древле бог глаголавый отцем во пророцех,
2 в последок дний сих глагола нам в сыне, егоже положи наследника всем, имже и веки сотвори.
3 Иже сый сияние славы и образ впостаси его, нося же всяческая глаголом силы своея, собою очищение сотворив грехов наших, седе о десную престола величествия на высоких,
4 толико лучший быв ангелов, елико преславнее паче их наследствова имя.
5 Кому бо рече когда от ангел: сын мой еси ты, аз днесь родих тя? И паки: аз буду ему во отца, и той будет мне в сына?
6 егда же паки вводит первороднаго во вселенную, глаголет: и да поклонятся ему вси ангели божии.
7 И ко ангелом убо глаголет: творяй ангелы своя духи и слуги своя огнь палящь.
8 К сыну же: престол твой, боже, в век века: жезл правости жезл царствия твоего:
9 возлюбил еси правду и возненавидел еси беззаконие: сего ради помаза тя, боже, бог твой елеем радости паче причастник твоих.
10 (Зачало 304) И (паки): в начале ты, господи, землю основал еси, и дела руку твоею суть небеса:
11 та погибнут, ты же пребываеши: и вся, якоже риза, обетшают,
12 и яко одежду свиеши их, и изменятся: ты же тойжде еси, и лета твоя не оскудеют.
13 Кому же от ангел рече когда: седи о десную мене, дондеже положу враги твоя подножие ногъ твоихъ?
14 Не вси ли суть служебнии дуси, в служение посылаеми за хотящих наследовати спасние?
1 Сего ради подобает нам лишше внимати слышанным, да не когда отпадем.
2 (Зачало 305) Аще бо глаголанное ангелы слово бысть известно, и всяко преступление и ослушание праведное прият мздовоздаяние:
3 како мы убежим, о толицем нерадивше спасении, еже зачало приемь глаголатися от господа, слышавшими в нас известися,
4 сосвидетелствующу богу знаменьми же и чудесы, и различными силами, и духа святаго разделеньми, по своей ему воли?
5 Не ангелом бо покори бог вселенную грядущую, о нейже глаголем:
6 засвидетелствова же негде некто, глаголя: что есть человек, яко помниши его? или сын человеческий, яко посещаеши и?
7 умалил еси его малым нечим от ангел: славою и честию венчал еси его и поставил еси его над делы руку твоею,
8 вся покорил еси под нозе его. Внегда же покорити ему всяческая, ничтоже остави ему непокорено. ныне же не у видим ему всяческая покорена:
9 а умаленаго малым чим от ангел видимъ иисуса, за приятие смерти славою и честию венчанна, яко да благодатию божиею за всех вкусит смерти.
10 Подобаше бо ему, егоже ради всяческая и имже всяческая, приведшу многи сыны в славу, началника спасния их страданьми совершити.
11 (Зачало 306) И святяй бо и освящаемии, от единаго вси: еяже ради вины не стыдится братию нарицати их, глаголя:
12 возвещу имя твое братии моей, посреде церкве воспою тя.
13 И паки: аз буду надеяся нань. И паки: се, аз и дети, яже ми дал есть бог.
14 Понеже убо дети приобщишася плоти и крови, и той приискренне приобщися техже, да смертию упразднит имущаго державу смерти, сиречь диавола,
15 и избавит сих, елицы страхом смерти чрез все житие повинни беша работе.
16 Не от ангел бо когда [воистинну] приемлет, но от семене авраамова приемлет:
17 отнюдуже должен бе по всему подобитися братии, да милостив будет и верен первосвященникъ в тех, яже к богу, во еже очистити грехи людския.
18 В немже бо пострада, сам искушен быв, может и искушаемым помощи.
Зачало 307.
1 Темже, братие святая, звания небеснаго причастницы, разумейте посланника и святителя исповедания нашего иисуса христа,
2 верна суща сотворшему его, якоже и моисей во всем дому его.
3 Множайшей бо славе сей паче моисеа сподобися, елико множайшую честь имать паче дому сотворивый его:
4 всяк бо дом созидается от некоего: а сотворивый всяческая бог.
5 (Зачало 308) И моисей убо верен бе во всем дому его, якоже слуга, во свидетелство глаголатися имевшим:
6 христос же якоже сын в дому своем: егоже дом мы есмы, аще дерзновение и похвалу упования даже до конца известно удержим.
7 Темже, якоже глаголет дух святый, днесь, аще глас его услышите,
8 не ожесточите сердец ваших, якоже в прогневании, во дни искушения в пустыни,
9 идеже искусиша мя отцы ваши, искусиша мя и видеша дела моя четыредесять лет.
10 Сего ради негодовах рода того и рех: присно заблуждают сердцем, тии же не познаша путий моих:
11 яко кляхся во гневе моем, аще внидутъ в покой мой.
12 (Зачало 309) Блюдите, братие, да не когда будетъ в некоем от вас сердце лукаво, (исполнено) неверия, во еже отступити от бога жива.
13 Но утешайте себе на всяк день дондеже днесь нарицается, да не ожесточится некто от вас лестию греховною:
14 причастницы бо быхом христу, аще точию начатокъ состава даже до конца известен удержим:
15 внегда глаголет: днесь, аще глас его услышите, не ожесточите сердец ваших, якоже в прогневании.
16 Нецыи бо слышавше прогневаша, но не вси изшедшии из египта с моисеом.
17 Коих же негодова четыредесять летъ? Не согрешившихъ ли, ихже кости падоша в пустыни?
18 Которым же клялся не внити в покоище его? яве, яко противльшимся.
19 И видим, яко не возмогоша внити за неверствие.
Зачало 310.
1 Да убоимся убо, да не когда оставлену обетованию внити в покой его, явится кто от вас лишився.
2 Ибо нам благовествовано есть, якоже и онем: но не пользова онех слово слуха, не растворенное верою слышавших.
3 Входим бо в покой веровавшии, якоже рече: яко кляхся во гневе моем, аще внидут въ покой мой: аще и делом от сложения мира бывшим.
4 Рече бо негде о седмем сице: и почи богъ в день седмый от всех дел своих.
5 И в сем паки: аще внидут в покой мой.
6 Понеже убо лишени нецыи [остается некиимъ] внити в него, и имже прежде благовествовано бе, не внидоша за непослушание:
7 паки некий уставляет день, днесь, въ давиде глаголя, по толицех летех, якоже прежде глаголася: днесь, аще глас его услышите, не ожесточите сердец ваших.
8 Аще бо бы онех иисус упокоил, не бы о инем дни глаголал по сих.
9 убо оставлено есть (и еще) субботство людем божиим:
10 вшедый бо в покой его, и той почи от дел своих, якоже от своих бог.
11 Потщимся убо внити во оный покой, да не кто в ту же притчу противления впадет.
12 Живо бо слово божие и действенно, и острейше паче всякаго меча обоюду остра, и проходящее даже до разделения души же и духа, членов же и мозгов, и судително помышлением и мыслемъ сердечным.
13 И несть тварь неявлена пред ним, вся же нага и объявлена пред очима его, к немуже нам слово.
14 (Зачало 311) Имуще убо архиереа велика, прошедшаго небеса, иисуса сына божия, да держимся исповедания.
15 Не имамы бо архиереа не могуща спострадати немощем нашим, но искушена по всяческим по подобию, разве греха.
16 Да приступаем убо с дерзновением к престолу благодати, да приимем милость и благодать обрящемъ во благовременну помощь.
1 Всяк бо первосвященник, от человек приемлемь, за человеки поставляется на службы яже к богу, да приносит дары же и жертвы о гресех,
2 спострадати могий невежствующим и заблуждающим, понеже и той немощию обложен есть:
3 и сего ради должен есть якоже о людех, такожде и о себе приносити за грехи.
4 И никтоже сам себе приемлет честь, но званный от бога, якоже и аарон.
5 Тако и христос не себе прослави быти первосвященника, но глаголавый к нему: сын мой еси ты, аз днесь родих тя:
6 якоже и инде глаголет: ты еси священникъ во век по чину мелхиседекову.
7 Иже во днех плоти своея моления же и молитвы к могущему спасти его от смерти с воплемъ крепким и со слезами принес, и услышанъ быв от благоговеинства,
8 аще и сын бяше, обаче навыче от сих, яже пострада, послушанию,
9 и совершився бысть всем послушающим его виновен спасния вечнаго,
10 наречен от бога первосвященник по чину мелхиседекову.
11 (Зачало 312) о немже многое нам слово и неудобь сказаемое глаголати, понеже немощни бысте слухи.
12 Ибо, должни суще быти учителие летъ ради, паки требуете учитися, кая писмена начала словес божиих: и бысте требующе млека, а не крепкия пищи.
13 Всяк бо причащаяйся млека неискусен слова правды, младенец бо есть:
14 совершенных же есть твердая пища, имущихъ чувствия обучена долгим учением в разсуждение добра же и зла.
1 Темже оставльше начала христова слово, на совершение да ведемся, не паки основание покаяния полагающе от мертвых дел, и веры в бога,
2 крещений учения, возложения же рук, воскресния же мертвых и суда вечнаго.
3 И сие сотворим, аще бог повелит.
4 Невозможно бо просвещенных единою и вкусившихъ дара небеснаго, и причастников бывших духа святаго,
5 и добраго вкусивших божия глагола и силы грядущаго века,
6 и отпадших, паки обновляти в покаяние, второе распинающих сына божия себе и обличающих.
7 Земля бо пившая сходящий на ню множицею дождь и раждающая былия добрая оным, имиже и делаема бывает, приемлет благословение от бога:
8 а износящая терния и волчец непотребна есть и клятвы близ, еяже кончина в пожжение.
9 (Зачало 313) Надеемся же о вас, возлюбленнии, лучших и придержащихся спасния, аще и тако глаголем.
10 Не обидлив бо бог, забыти дела вашего и труда любве, юже показасте во имя его, послуживше святым и служаще.
11 Желаем же, да кийждо вас являет тожде тщание ко извещению упования даже до конца,
12 да не лениви будете, но подражателе наследствующихъ обетования верою и долготерпением.
13 (Зачало 314) Аврааму бо обетовая бог, понеже ни единем имяше болшим клятися, клятся собою,
14 глаголя: воистинну благословя благословлю тя и умножая умножу тя.
15 И тако долготерпев, получи обетование.
16 Человецы бо болшим кленутся, и всякому ихъ прекословию кончина во извещение клятва (есть).
17 В немже лишше хотя бог показати наследникомъ обетования непреложное совета своего, ходатайствова клятвою:
18 да двема вещьми непреложными, в нихже невозможно солгати богу, крепкое утешение имамы прибегшии ятися за предлежащее упование,
19 еже аки котву имамы души, тверду же и известну, и входящую во внутреннейшее завесы,
20 идеже предтеча о нас вниде иисус, по чину мелхиседекову первосвященник быв во веки.
Зачало 315.
1 Сей бо мелхиседек, царь салимский, священник бога вышняго, иже срете авраама возвращшася от сеча царей и благослови его,
2 емуже и десятину от всех отдели авраам, первее убо сказуется царь правды, потомъ же царь салимский, еже есть, царь мира,
3 без отца, без матере, без причта рода, ни начала днем, ни животу конца имея, уподобленъ же сыну божию, пребывает священник выну.
4 Видите же, елик сей, емуже и десятину дал есть авраам патриарх от избранных.
5 И приемлющии убо священство от сыновъ левиин заповедь имут одесятствовати люди по закону, сиречь, братию свою, аще и от чреслъ авраамовых изшедшую:
6 не причитаемый же родом к ним, одесятствова авраама и имущаго обетования благослови:
7 (Зачало 316) без всякаго же прекословия меншее от болшаго благословляется.
8 И зде убо десятины человецы умирающии приемлют: тамо же свидетелствуемый, яко живъ есть.
9 И да сице реку, авраамом и левий, приемляй десятины, десятины дал есть:
10 еще бо в чреслех отчиих бяше, егда срете его мелхиседек.
11 Аще убо совершенство левитским священствомъ было, людие бо на нем взаконени быша: кая еще потреба по чину мелхиседекову иному востати священнику, а не по чину ааронову глаголатися?
12 прелагаему бо священству, по нужди и закону пременение бывает.
13 о немже бо глаголются сия, колену иному причастися, от негоже никтоже приступи ко олтарю:
14 яве бо, яко от колена иудова возсия господь наш, о немже колене моисей о священстве ничесоже глагола.
15 И лишше еще яве есть, яко по подобию мелхиседекову востает священник ин,
16 иже не по закону заповеди плотския бысть, но по силе живота неразрушаемаго.
17 Свидетелствует бо, яко ты еси священникъ во век по чину мелхиседекову.
18 (Зачало 317) отлагание убо бывает прежде бывшия заповеди за немощное ея и неполезное:
19 ничтоже бо совершил закон: привведение же есть лучшему упованию, имже приближаемся к богу.
20 И по елику не без клятвы:
21 они бо без клятвы священницы быша, сей же с клятвою чрез глаголющаго к нему: клятся господь и не раскается: ты еси священник во векъ по чину мелхиседекову:
22 по толику лучшаго завета бысть испоручникъ иисус.
23 И они множайши священницы быша, зане смертию возбранени суть пребывати:
24 сей же, занеже пребывает во веки, непреступное имать священство,
25 темже и спасти до конца может приходящихъ чрез него к богу, всегда жив сый, во еже ходатайствовати о них.
26 (Зачало 318) Таков бо нам подобаше архиерей: преподобен, незлобив, безсквернен, отлучен от грешник и вышше небес бывый,
27 иже не имать по вся дни нужды, якоже первосвященницы, прежде о своих гресех жертвы приносити, потом же о людских: сие бо сотвори единою, себе принес.
28 Закон бо человеки поставляет первосвященники, имущия немощь: слово же клятвенное, еже по законе, сына во веки совершенна.
1 Глава же о глаголемых: такова имамы первосвященника, иже седе о десную престола величествия на небесех,
2 святым служитель и скинии истинней, юже водрузи господь, а не человек.
3 Всяк бо первосвященник, во еже приносити дары же и жертвы, поставляемь бывает: темже потреба имети что и сему, еже принесет.
4 Аще бы бо был на земли, не бы был священник, сущим священником приносящим по закону дары,
5 иже образу и стени служат небесных, якоже глаголано бысть моисею, хотящу сотворити скинию: виждь бо, рече, сотвориши вся по образу показанному ти на горе.
6 ныне же лучшее улучи служение, по елику и лучшаго завета есть ходатай, иже на лучшихъ обетованиих узаконися.
7 (Зачало 319) Аще бо бы первый он непороченъ был, не бы второму искалося место.
8 укоряя бо их глаголет: се, дние грядут, глаголет господь, и совершу на дом израилев и на домъ иудов завет нов,
9 не по завету, егоже сотворих отцемъ их в день, в оньже емшу ми их за руку, извести их от земли египетския: зане тии не пребыша в завете моем, и аз нерадихъ о них, глаголет господь.
10 яко сей завет, егоже завещаю дому израилеву по онех днех, глаголет господь, дая законы моя в мысли их, и на сердцах их напишу их, и буду им бог, и тии будут мне людие.
11 И не имать научити кийждо искренняго своего и кийждо брата своего, глаголя: познай господа: яко вси уведят мя от мала даже и до велика их,
12 зане милостив буду неправдам их и греховъ их и беззаконий их не имам помянути ктому.
13 Внегда же глаголет [новъ], обветши перваго: а обветшавающее и состаревающееся близ есть истления.
Зачало 320.
1 Имеяше убо первая скиния [первый (заветъ)] оправдания службы, святое же людское:
2 скиния бо сооружена бысть первая, в нейже светилник и трапеза и предложение хлебов, яже глаголется святая.
3 По вторей же завесе скиния глаголемая святая святых,
4 злату имущи кадилницу и ковчег завета окованъ всюду златом, в немже стамна злата имущая манну, и жезл ааронов прозябший, и скрижали завета:
5 превышше же его херувими славы, осеняющии олтарь [очистилище]: о нихже не леть ныне глаголати подробну.
6 Сим же тако устроеным, в первую убо скинию выну вхождаху священницы, службы совершающе:
7 во вторую же единою в лето един архиерей, не без крове, юже приносит за себе и о людскихъ невежествиих.
8 (Зачало 321) Сие являющу духу святому, яко не у явися святых путь, еще первей скинии имущей стояние.
9 яже притча во время настоящее утвердися, в неже дарове и жертвы приносятся, не могущия по совести совершити служащаго,
10 точию в брашнах и питиях, и различныхъ омовениих, и оправданиих плоти, даже до времене исправления належащая.
11 христос же пришед архиерей грядущихъ благ, болшею и совершеннейшею скиниею, нерукотворенною, сиречь, не сея твари,
12 ни кровию козлею ниже телчею, но своею кровию, вниде единою во святая, вечное искупление обретый.
13 Аще бо кровь козляя и телчая и пепел юнчий кропящий оскверненыя освящает к плотстей чистоте:
14 кольми паче кровь христова, иже духом святымъ себе принесе непорочна богу, очистит совесть нашу от мертвых дел, во еже служити намъ богу живу и истинну?
15 И сего ради новому завету ходатай есть, да смерти бывшей, во искупление преступлений бывшихъ в первем завете, обетование вечнаго наследия приимут званнии.
16 Идеже бо завет, смерти нужно есть вноситися завещающаго,
17 завет бо в мертвых известен есть: понеже ничесоже может, егда жив есть завещаваяй.
18 Темже ни первый без крове обновлен [утвержденъ] бысть.
19 Реченней бо бывшей всяцей заповеди по закону от моисеа всем людем, приемь кровь козлюю и телчую, с водою и волною червленою и вссопом, самыя же тыя книги и вся люди покропи,
20 глаголя: сия кровь завета, егоже завеща к вам бог.
21 И скинию же и вся сосуды служебныя кровию такожде покропи.
22 И отнюд кровию вся [и едва не вся кровию] очищаются по закону, и без кровопролития не бывает оставление.
23 Нужда убо бяше образом небесных сими очищатися: самем же небесным лучшими жертвами, паче сих.
24 (Зачало 322) Не в рукотворенная бо святая вниде христос, противообразная истинных, но в самое небо, ныне да явится лицу божию о нас,
25 ниже да многажды приносит себе, якоже первосвященникъ входит во святая (святыхъ) по вся лета с кровию чуждею:
26 понеже подобаше бы ему множицею страдати от сложения мира: ныне же единою в кончину веков, во отметание греха, жертвою своею явися.
27 И якоже лежит [определено есть] человекомъ единою умрети, потом же суд,
28 тако и христос единою принесеся, во еже вознести многих грехи, второе без греха явится, ждущим его во спасние.
Зачало 323.
1 Сень бо имый закон грядущих благ, (а) не самый образ вещей, на всякое лето темиже жертвами, ихже приносят выну, никогдаже можетъ приступающих совершити.
2 Понеже престали бы быти приносимы, ни едину ктому имущим совесть о гресех служащим, единою очищенным.
3 Но в них воспоминание грехов на коеждо лето бывает,
4 невозможно бо крови юнчей и козлей отпущати грехи.
5 Темже входя в мир, глаголет: жертвы и приношения не восхотел еси, тело же совершил ми еси:
6 всесожжений и [такожде] о гресе не благоволилъ еси.
7 Тогда рех: се, иду: в главизне книжней написася о мне, еже сотворити волю твою, боже.
8 Выше глаголя: яко жертвы и приношения и всесожжений и [такожде] о гресех не восхотел еси, ниже благоволил еси: яже по закону приносятся:
9 тогда рече: се, иду сотворити волю твою, боже. отемлет первое, да второе поставит.
10 о нейже воли освящени есмы принесениемъ тела иисус христова единою.
11 И всяк убо священник стоит на всякъ день служя и тыяжде множицею принося жертвы, яже никогдаже могут отяти грехов.
12 он же едину о гресех принес жертву, всегда седит о десную бога,
13 прочее ожидая, дондеже положатся врази его подножие ног его:
14 единем бо приношением совершил есть во веки освящаемых.
15 Свидетелствует же нам и дух святый, по реченному бо прежде:
16 сей завет, егоже завещаю к ним по днех онех, глаголет господь, дая законы моя на сердца их, и в помышлениих их напишу их:
17 (таже глаголет господь:) и грехов их и беззаконий их не имам помянути ктому.
18 А идеже отпущение сих, ктому несть приношения о гресех.
19 (Зачало 324) Имуще убо дерзновение, братие, входити во святая кровию иисус христовою, путемъ новым и живым,
20 егоже обновил есть нам завесою, сиречь плотию своею,
21 и иереа велика над домом божиим,
22 да приступаем со истинным сердцем во извещении веры, окроплени сердцы от совести лукавыя и измовени телесы водою чистою:
23 да держим исповедание упования неуклонное, верен бо есть обещавый:
24 и да разумееваем друг друга в поощрении любве и добрых дел,
25 не оставляюще собрания своего, якоже есть неким обычай, но (друг друга) подвизающе, и толико паче, елико видите приближающийся день (судный).
26 Волею бо согрешающим нам по приятии разума истины, ктому о гресех не обретается жертва,
27 страшно же некое чаяние суда и огня ревность, поясти хотящаго сопротивныя.
28 отверглся кто закона моисеова, без милосердия при двоих или триех свидетелех умирает:
29 колико мните горшия сподобится муки, иже сына божия поправый, и кровь заветную скверну возмнив, еюже освятися, и духа благодати укоривый?
30 Вемы бо рекшаго: мне отмщение, аз воздам, глаголет господь. И паки: яко судит господь людемъ своим.
31 Страшно (есть) еже впасти в руце бога живаго.
32 (Зачало 325) Воспоминайте же первыя дни ваша, в нихже просветившеся, многия страсти претерпесте [мног подвиг подъясте] страданий,
33 ово убо, поношеньми и скорбьми позоръ бывше, ово же, общницы бывше живущим тако:
34 ибо узам моим спострадасте и разграбление имений ваших с радостию приясте, ведяще имети себе имение на небесех пребывающее и лучшее.
35 (Зачало 326) Не отлагайте убо дерзновения вашего, еже имать мздовоздаяние велико.
36 Терпения бо имате потребу, да волю божию сотворше, приимете обетование:
37 еще бо мало елико елико, грядый приидетъ и не укоснит.
38 А праведный от веры жив будет: и аще обинется, не благоволит душа моя о нем.
39 Мы же (братие) несмы обиновения в погибель, но веры в снабдение души.
1 Есть же вера уповаемых извещение, вещей обличение невидимых.
2 В сей бо свидетелствовани быша древнии.
3 Верою разумеваем совершитися веком глаголомъ божиим, во еже от неявляемых видимым быти.
4 Верою множайшую жертву авель паче каина принесе богу, еюже свидетелствован бысть быти праведник, свидетелствующу о дарех его богу: и тою умерый еще глаголет.
5 Верою енох преложен бысть не видети смерти: и не обреташеся, зане преложи его бог: прежде бо преложения его свидетелствованъ бысть, яко угоди богу.
6 Без веры же невозможно угодити (богу): веровати же подобает приходящему к богу, яко есть, и взыскающим его мздовоздатель бывает.
7 Верою ответ приим ное о сих, яже не у виде, убоявся сотвори ковчег во спасение дому своего: еюже осуди (весь) мир, и правды, яже по вере, бысть наследник.
8 (Зачало 327) Верою зовом авраам послуша изыти на место, еже хотяше прияти в наследие, и изыде не ведый, камо грядет.
9 (Зачало 328) Верою прииде авраам на землю обетования, якоже на чужду, в кровы вселися со исааком и иаковом снаследникома обетования тогожде:
10 ждаше бо основания имущаго града, емуже художник и содетель бог.
11 Верою и сама сарра неплоды силу во удержание семене прият и паче времене возраста роди, понеже верна непщева обетовавшаго.
12 Темже и от единаго родишася, да еще умерщвленнаго, якоже звезды небесныя множествомъ и яко песок вскрай моря безчисленный.
13 По вере умроша сии вси, не приемше обетований, но издалеча видевше я, и целовавше, и исповедавше, яко страннии и пришелцы суть на земли:
14 ибо таковая глаголющии являются, яко отечествия взыскуют.
15 И аще бы убо оно помнили, из негоже изыдоша, имели бы время возвратитися:
16 ныне же лучшаго желают, сиречь небеснаго: темже не стыдится сими бог, бог нарицатися их: уготова бо им град.
17 (Зачало 329) Верою приведе авраам исаака искушаемь, и единороднаго приношаше, обетования приемый,
18 к немуже глаголано бысть: яко о исааце наречется тебе семя:
19 помыслив, яко и из мертвых воскресити силен (есть) бог, темже того и в притче прият.
20 Верою о грядущих благослови исаак иакова и исава.
21 Верою иаков умирая коегождо сына иосифова благослови и поклонися на верх жезла его.
22 Верою иосиф умирая о исхождении сыновъ израилевых памятствова и о костех своих заповеда.
23 Верою моисей родився сокровен бысть три месяцы от отец своих, зане видеша красно отроча и не убояшася повеления царева.
24 Верою моисей, велик быв, отвержеся нарицатися сын дщере фараоновы:
25 паче (же) изволи страдати с людьми божиими, нежели имети временную греха сладость,
26 болшее богатство вменив египетских сокровищъ поношение христово: взираше бо на мздовоздаяние.
27 Верою остави египет, не убоявся ярости царевы: невидимаго бо яко видя, терпяше.
28 Верою сотвори пасху и пролитие крове, да не погубляяй перворожденная коснется их.
29 Верою преидоша чермное море аки по сусе земли: егоже искушение приемше египтяне истопишася.
30 Верою стены иерихонския падоша обхождениемъ седмих дний.
31 Верою раав блудница не погибе с сопротивльшимися, приимши сходники [соглядатели] с миром (и иным путем изведши).
32 И что еще глаголю? Не достанет бо ми повествующу времене о гедеоне, вараце же и сампсоне и иеффаи, о давиде же и самуиле, и о (другихъ) пророцех,
33 (Зачало 330) иже верою победиша царствия, содеяша правду, получиша обетования, заградиша уста львов,
34 угасиша силу огненную, избегоша острея меча, возмогоша от немощи, быша крепцы во бранех, обратиша в бегство полки чуждих:
35 прияша жены от воскресения мертвых своих: инии же избиени быша, не приемше избавления, да лучшее воскресение улучат:
36 друзии же руганием и ранами искушение прияша, еще же и узами и темницею,
37 камением побиени быша, претрени быша, искушени быша, убийством меча умроша, проидоша в милотех (и) в козиях кожах, лишени, скорбяще, озлоблени:
38 ихже не бе достоин (весь) мир, в пустынехъ скитающеся и в горах и в вертепах и в пропастехъ земных.
39 И сии вси послушествани бывше верою, не прияша обетования,
40 богу лучшее что о нас предзревшу, да не без нас совершенство приимут.
Зачало 331.
1 Темже убо и мы, толик имуще облежащь нас облак свидетелей, гордость всяку [бремя всяко] отложше и удобь обстоятелный грех, терпением да течем на предлежащий нам подвиг,
2 взирающе на началника веры и совершителя иисуса, иже вместо предлежащия ему радости претерпе крест, о срамоте нерадив, о десную же престола божия седе.
3 Помыслите убо таковое пострадавшаго от грешник на себе прекословие, да не стужаете, душами своими ослабляеми.
4 Не у до крове стасте, противу греха подвизающеся,
5 и забысте утешение, еже вам яко сыном глаголет: сыне мой, не пренемогай наказаниемъ господним, ниже ослабей, от него обличаемь.
6 егоже бо любит господь, наказует: биет же всякаго сына, егоже приемлет.
7 Аще наказание терпите, якоже сыновом обретается вам бог. Который бо есть сын, егоже не наказует отецъ?
8 Аще же без наказания есте, емуже причастницы быша вси, убо прелюбодейчищи есте, а не сынове.
9 К сим, плоти нашей отцы имехом наказатели, и срамляхомся: не много ли паче повинемся отцу духовом, и живи будемъ?
10 они бо в мало дний, якоже годе имъ бе, наказоваху нас: а сей на пользу, да причастимся святыни его.
11 Всякое бо наказание в настоящее время не мнится радость быти, но печаль: последи же плод миренъ наученым тем воздает правды.
12 Темже ослабленныя руки и ослабленная колена исправите
13 и стези правы сотворите ногами вашими, да не хромое совратится, но паче да исцелеет.
14 (Зачало 332) Мир имейте и святыню со всеми, ихже кроме никтоже узрит господа:
15 смотряюще, да не кто лишится благодати божия: да не кий корень горести, выспрь прозябаяй, пакость сотворит, и тем осквернятся мнози:
16 да не кто блудодей, или сквернитель, якоже исав, иже за ядь едину отдал есть первородство свое.
17 Весте бо, яко и потом похотев наследовати благословение, отвержен бысть: покаяния бо места не обрете, аще и со слезами поискал его.
18 Не приступисте бо к горе осязаемей и разгоревшемуся огню, и облаку и сумраку, и буре
19 и трубному звуку, и гласу глагол, егоже слышавшии отрекошася, да не приложится им слово,
20 не терпяху бо повелевающаго: аще и зверь прикоснется горе, камением побиен будет:
21 и тако страшно бе видимое, моисей рече: пристрашен есмь и трепетен.
22 Но приступисте к сионстей горе и ко граду бога живаго, иерусалиму небесному и тмам ангелов,
23 торжеству и церкви первородных на небесехъ написанных, и судии всех богу и духом праведникъ совершенных,
24 и к ходатаю завета новаго иисусу и крови кропления, лучше глаголющей, нежели авелева.
25 (Зачало 333) Блюдите (же), да не отречетеся глаголющаго. Аще бо не избежаша они отрекшиися пророчествующаго на земли, множае паче мы отрицающиися небеснаго,
26 егоже глас землю тогда поколеба, ныне же обетова, глаголя: еще единою аз потрясу не токмо землею, но и небом.
27 А еже еще единою, сказует колеблемыхъ преложение, аки сотворенных, да пребудут, яже суть неподвижимая.
28 Темже царство непоколебимо приемлюще, да имамы благодать, еюже служим благоугодно богу с благоговением и страхом,
29 ибо бог наш огнь поядаяй (есть).
1 Братолюбие да пребывает:
2 страннолюбия не забывайте, тем бо не ведяще нецыи странноприяша ангелы.
3 Поминайте юзники, аки с ними связани: озлобляемыя, аки и сами суще в теле.
4 Честна женитва во всех и ложе нескверно: блудником же и прелюбодеем судит бог.
5 Не сребролюбцы нравом, доволни сущими. Той бо рече: не имам тебе оставити, ниже имамъ от тебе отступити:
6 яко дерзающим нам глаголати: господь мне помощник, и не убоюся: что сотворит мне человекъ?
7 (Зачало 334) Поминайте наставники ваша, иже глаголаша вам слово божие: ихже взирающе на скончание жителства, подражайте вере (ихъ).
8 иисус христос вчера и днесь тойже, и во веки.
9 В научения странна и различна не прилагайтеся: добро бо благодатию утверждати сердца, (а) не брашны, от нихже не прияша пользы ходившии въ них.
10 Имамы (же) олтарь, от негоже не имутъ власти ясти служащии сени.
11 Ихже бо кровь животных вносится во святая за грехи первосвященником, сих телеса сжигаются вне стана:
12 темже иисус, да освятит люди своею кровию, вне врат пострадати изволил.
13 Темже убо да исходим к нему вне стана, поношение его носяще:
14 не имамы бо зде пребывающаго града, но грядущаго взыскуем.
15 Тем убо приносим жертву хваления выну богу, сиречь плод устен исповедающихся имени его.
16 благотворения же и общения не забывайте: таковыми бо жертвами благоугождается бог.
17 (Зачало 335) Повинуйтеся наставником вашимъ и покаряйтеся: тии бо бдят о душах ваших, яко слово воздати хотяще: да с радостию сие творят, а не воздыхающе, несть бо полезно вамъ сие.
18 Молитеся о нас: уповаем бо, яко добру совесть имамы, во всех добре хотяще жити.
19 Лишше же молю, сие творите, да вскоре устроюся вам [возвращуся к вамъ].
20 бог же мира, возведый из мертвых пастыря овцам великаго кровию завета вечнаго, господа нашего иисуса христа,
21 да совершит вы во всяцем деле блазе, сотворити волю его, творя в вас благоугодное пред ним иисус христом: емуже слава во веки веков. Аминь.
22 Молю же вы, братие, приимите слово утешения: ибо вмале написав послах вам.
23 Знайте брата нашего отпущена тимофеа, съ нимже, аще скорее приидет, узрю вас.
24 Целуйте вся наставники ваша и вся святыя. Целуют вы иже от италии сущии.
25 благодать со всеми вами. Аминь.
Конец посланию еже ко евреем: имать в себе глав 13, зачал же церковных 33.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>