Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга пророка Амоса
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9
1 Словеса амосова, яже быша в кариафиариме от фекуи, яже виде о иерусалиме во дни озии царя иудина и во дни иеровоама сына иоасова царя израилева, прежде двою лет труса.
2 И рече: господь от сиона возглагола и от иерусалима даде глас свой: и сетоваша пажити пастырей, и изсше верхъ кармиль.
3 И рече господь: за три нечестия дамаска и за четыри не отвращуся его, понеже растроша пилами железными имущия во утробе сущих в галааде:
4 и послю огнь в дом азаиль, и пояст основание сына адерова:
5 и сокрушу вереи дамасковы, и потреблю живущия с поля онова, и посеку племя от мужей харраних, и пленятся людие сирстии нарочитии, глаголет господь.
6 Сия глаголет господь: за три нечестия газы и за четыри не отвращуся их, за еже пленити им пленение соломоне, еже заключити во идумею:
7 и послю огнь на забрала газы, и пояст основание ея:
8 и потреблю живущия из азота, и извержется племя из аскалона, и наведу руку мою на аккарона, и погибнутъ остаточнии иноплеменников, глаголет господь.
9 Сия глаголет господь: за три нечестия тирова и за четыри не отвращуся его, понеже заключиша пленники соломони во идумею и не помянуша завета братня:
10 и послю огнь на забрала тирова, и пояст основания его.
11 Сия глаголет господь: за три нечестия идумейска и за четыри не отвращуся их, понеже прогнаша брата своего мечем и растлиша матерь на земли, и восхити во свидение грозу свою, и устремление свое снабде на победу:
12 и послю огнь в феман, и пояст основания оградъ его.
13 Сия глаголет господь: за три нечестия сынов аммонихъ и за четыри не отвращуся их, понеже распоряху имущия во утробе галаадитов, яко да разширят пределы своя:
14 и разжегу огнь на забрала раввафы, и пояст основания ея с воплем в день рати, и потрясется в день скончания своего:
15 и пойдут царие ея в плен, жерцы их и князи их вкупе, глаголет господь.
1 Сия глаголет господь: за три нечестия моавля и за четыри не отвращуся его, понеже сожгоша кости царя идумейска в пепел:
2 и послю огнь на моава, и пояст основания градовъ его, и умрет со безсилием моав, с воплем и гласом трубным:
3 и потреблю судию из него и вся князи его избию с ним, глаголет господь.
4 Сия глаголет господь: за три нечестия сынов иудиных и за четыри не отвращуся их, понеже отринуша закон господень и повелений его не сохраниша, и прельстиша их суетная их, яже сотвориша, имже последоваша отцы ихъ вслед их:
5 и послю огнь на иуду, и пояст основания иерусалимля.
6 Сия глаголет господь: за три нечестия израиля и за четыри не отвращуся его, понеже продаша праведнаго на сребре и убогаго на сапозех,
7 ходящих на прасе земнем, и бияху пястию во главы убогих, и путь смиренных совращаху: и сын и отецъ его влазяста ко единей рабыни, яко да осквернавятъ имя бога своего:
8 и ризы своя связующе ужами, и завесы творяху держащияся требища, и вино от оболганий пияху в дому бога своего.
9 Аз же отвергох аморреа от лица их, егоже бе высота якоже высота кедрова, и крепок бяше якоже дуб, и изсуших плод его с верха и корение его из низу.
10 Аз же изведох вы из земли египетския и обводихъ вы в пустыни четыредесять лет, еже прияти в наследие землю аморрейску.
11 И поях от сынов ваших во пророки и от юнотъ ваших во освящение: еда несть сих, сынове израилевы? глаголет господь.
12 И напаясте освященныя вином и пророком заповедасте глаголюще: не прорицайте.
13 Сего ради, се, аз повращу под вами, якоже вратится колесница полна тростия:
14 и погибнет бегство от скоротекущаго, и крепкий не удержит крепости своея, и храбрый не спасет души своея,
15 и стреляяй из лука не постоит, и быстрый ногама своима не уцелеет, и конник не спасет души своея,
16 и крепкий не обрящет сердца своего в силах, нагъ побегнет в той день, глаголет господь.
1 Слышите слово сие, еже глагола господь на вы, доме израилев, и на все племя, еже изведох из земли египетския, рекий:
2 вас точию познах от всех племен на земли, сего ради отмщу на вас вся грехи ваша.
3 Еда пойдут два вкупе всяко, аще не познают себе?
4 или возревет лев из дубравы своея, ловитвы не имый? или испустит глас свой львичищь из ложа своего всяко, аще не похитит чесого?
5 или падет птица на землю без ловца? или спадетъ пругло на землю, аще не имет ничесоже?
6 или возгласит труба во граде, и не убоятся людие? или будет зло во граде, еже господь не сотвори?
7 Понеже не сотворит господь бог дела, аще не открыетъ наказания своего к рабом своим пророком.
8 Лев возревет, и кто не убоится? господь бог глагола, и кто не проречетъ?
9 Поведите странам во ассирианех и во странах египетскихъ и рцыте: соберитеся на гору самарийскую и видите чудесная многа среде ея и насильство еже в ней.
10 И не уразуме, яже будут противу ей, глаголетъ господь, сокровищствующии неправду и страсть в селех своих.
11 Сего ради сия глаголет господь бог: тире, окрест земля твоя опустеет, и отимет от тебе крепость твою, и разграбятся страны твоя.
12 Сия глаголет господь: якоже пастух, егда исторгнетъ от уст львовых две голени, или обушие уха, тако исторгнутся сынове израилевы живущии в самарии прямо племене и в дамасце.
13 Жерцы, послушайте и засвидетелствуйте дому иаковлю, глаголет господь бог вседержитель:
14 понеже в день, егда отмщу нечестия израилева на нем, и отмщу на требищих вефилих, и раскопаю роги требища, и падутся на землю:
15 сокрушу и поражу дом с преклеты с домом летним, и погибнут домове кости слоновыя, и потребятся и друзии домове мнози, глаголет господь.
1 Слышите слово сие, юницы васанитидския, яже в горе самарийстей, преобидящия убогих и попирающия нищих, глаголющия господем своим: подадите нам, да пием.
2 Клятся господь святыми своими, яко се, дние грядутъ на вы, и возмут вы во оружии, и сущих с вами ввергутъ в конобы подгнещаемыя огненнии губителие:
3 и извержены будете наги прямо друг друга и отвержетеся в гору ремман, глаголет господь.
4 Внидосте в вефиль и беззаконновасте, и в галгалехъ умножисте еже нечествовати, и принесосте заутра требы ваша, в треденство десятины ваша:
5 и прочтоша извне закон и призваша исповедание: возвестите, яко сия возлюбиша сынове израилевы, глаголетъ господь бог.
6 Аз же дам вам оскомину зубом во всех градехъ ваших и недостаток хлеба во всех местех ваших: и не обратистеся ко мне, глаголет господь.
7 И аз удержах дождь от вас прежде триех месяцевъ жатвы, и надождю на един град, а на другий (единъ) не надождю: часть едина надождится, и часть, на нюже не надождю, изсохнет:
8 и соберутся два и три града во град един пити воду и не насытятся: и не обратистеся ко мне, глаголетъ господь.
9 Побих вы раждежением и златеницею: умножисте вертограды ваша, винограды ваша и смоквы ваша и масличия ваша: сия поядоша гусеницы: и ниже тако обратистеся ко мне, глаголет господь.
10 Послах на вы смерть на пути египетстем, и избихъ оружием юноши ваша, с пленом коней твоих, и изведохъ во огни полки ваша во гневе моем: и ниже тако обратистеся ко мне, глаголет господь.
11 Разорих вы, якоже разори бог содому и гоморру, и бысте яко главня исторжена из огня: и ниже тако обратистеся ко мне, глаголет господь.
12 Сего ради сице сотворю ти, израилю: обаче, яко сице сотворю ти, уготовися призывати бога твоего, израилю.
13 Се, аз утвержаяй гром и созидаяй ветр и возвещаяй в человецех христа своего, творяй утро и мглу и восходяй на высокая земли: господь бог вседержитель имя ему.
1 Слышите слово господне, имже аз приемлю на вы плачь: дом израилев падеся и ктому не приложит востати:
2 девица израилева повержена на земли своей, несть возставляющаго ю.
3 Понеже сия глаголет господь бог: из града, из негоже исхождаше тысяща, останется в нем сто: и из негоже исхождаше сто, останет в нем десять дому израилеву.
4 Понеже сия глаголет господь к дому израилеву: взыщите мене и поживете:
5 а не взыскуйте вефиля и в галгалу не входите и ко кладязю клятвы не ходите, яко галгала пленяема пленится, и вефиль будет аки не быв.
6 Взыщите господа и поживете, яко да не возжжется яко огнь дом иосифов, и пояст его, и не будетъ угашающаго дому израилева.
7 господь творяй в высоту суд и правду на земли положи:
8 творяй вся и претворяяй, и обращаяй во утро сень смертную и день в нощь помрачаяй, призываяй воду морскую и разливаяй ю на лице земли:
9 господь бог вседержитель имя ему: разделяяй сокрушение на крепость и бедство на твердыню наводяй.
10 Возненавидеша у врат наказующаго, и словом праведнымъ возгнушашася.
11 Сего ради понеже пястьми биете убогих и дары избранны приясте от них: домы украшены соградисте, и не вселитеся в них, винограды вожделенны насадисте, и не имате пити вина от них.
12 яко уведех многа нечестия ваша, и крепцы греси ваши, попирающе праведнаго, приемлюще премены и убогия от врат отреяюще.
13 Сего ради смысляй в то время премолчит, яко время лукаво есть.
14 Взыщите добра, а не зла, яко да поживете, и будетъ тако с вами господь бог вседержитель, якоже ресте:
15 возненавидехом злая и возлюбихом добрая: и возставите у врат суд, яко да помилует господь бог вседержитель оставшая иосифова.
16 Сего ради сия глаголет господь бог вседержитель: на всехъ стогнах (будетъ) плачь, и на всех путех речется: увы люте, увы люте! призовется земледелец на плачь и на рыдание, и на ведящих плачь,
17 и на всех путех плачь, понеже пройду среде тебе, рече господь.
18 увы люте желающим дне господня! вскую вам сей день господень? сей бо есть тма, а не свет:
19 якоже аще убежит человек от лица льва, и нападет нань медведица: и вскочит в дом и опрется рукама своима о стену, и усекнет его змия.
20 Несть ли день господень тма, а не свет, и мгла не имущи света своего?
21 Возненавидех и отвергох праздники ваша и не обоняю жертв в сонмех ваших:
22 зане аще принесете ми всесожжения и жертвы ваша, не прииму, и на спасителная явления вашего не призрю.
23 отстави от мене глас песней твоих, и песни органов твоих не послушаю.
24 И повалится якоже вода суд, и правда якоже водотеча непроходна.
25 Еда заколения и требы принесосте ми в пустыни лет четыредесять, доме израилевъ?
26 И восприясте скинию молохову и звезду бога вашего ремфана, образы, яже сотвористе себе.
27 И преселю вы далее дамаска, глаголет господь: бог вседержитель имя ему.
1 Люте уничижающим сиона и уповающим на гору самарийскую: обымаша начатки языков, и внидоша к ним дом израилев.
2 Мимоидите халану вси и видите, и прейдите оттуду во емаф великий и снидите оттуду в геф иноплеменников, крепчайшия от всех царств сих, аще болши суть пределы их предел вашихъ?
3 Приходящии в день зол, приближающиися и прикасающиися субботам лживым,
4 спящии на одрех от костей слоновых и ласкосердствующии на постелех своих, ядущии козлища от паств и телцы млеком питаемы от среды стад:
5 плещущии ко гласу пищалей, аки стояща мнеша, а не яко бежаща:
6 пиющии процеженое вино и первыми вонями мажущиися, и не страдаху ничесоже в сокрушении иосифове.
7 Сего ради ныне пленницы будут от начала сильных, и отимется ржание конско от ефрема.
8 яко клятся господь собою, глаголет господь бог сил: понеже гнушаюся аз всею укоризною иакова и села его возненавидех, и отвергу град со всеми живущими въ нем.
9 И будет, аще останутся десять мужей во единемъ дому, умрут, и останутся остаточнии:
10 и возмут свои их, и понудятся изнести кости ихъ из дому. И речет настоятелем дому: еще ли есть у тебе? И речет: несть еще. И речет: молчи, не именования ради имене господня.
11 Понеже, се, господь заповедает и побиет дом великий толчением и дом малый разседением.
12 Аще поженут в камениях кони? и аще умолкнутъ в женстем полу? яко обратисте на гнев суд, и плод правды на горесть,
13 веселящиися ни о единем слове блазе, глаголющии: не крепостию ли нашею имамы роги?
14 Темже, се, аз воздвигну на вы, доме израилев, язык, глаголет господь бог сил, и сокрушат вас еже не внити во емаф и до водотечи западов.
1 Сице показа ми господь бог, и се, приплод пружий идый утренний, и се, гусеница, един гог царь.
2 И будет, аще скончает ядый траву земную, и рех: господи, господи, милостив буди, кто возставит иакова? яко мал есть.
3 Раскайся о сем, господи: и сие не будет, глаголет господь.
4 Сице показа ми господь, и се, призва прю во огни господь бог, и пояде бездну многу, и пояде часть.
5 И рех: господи, господи, престани ныне, кто возставитъ иакова? яко мал есть.
6 Раскайся о сем, господи: и сие не будет, глаголет господь.
7 Сице показа ми господь: и се, муж стояй на ограде адамантове, и в руце его адамант.
8 И рече господь ко мне: что ты видиши, амосе? И рех: адамант. И рече господь ко мне: се, аз учиню адаманта среде людий моих израиля, ктому не приложу, еже мимоити его:
9 и потребятся требища смеха, и требы израилевы опустеют, и востану на дом иеровоамль со оружием.
10 И посла амасиа жрец вефильский ко иеровоаму царю израилеву глаголя: развраты творит на тя амос среде дому израилева, не возможет земля подъяти всех словесъ его,
11 понеже сия глаголет амос: оружием скончается иеровоам, израиль же пленен отведется от земли своея.
12 И рече амасиа ко амосови: видяй гряди и отиди ты на землю иудину, и тамо живи, и тамо да прорицаеши:
13 а в вефили посем не приложи прорицати, яко освящение царя есть и дом есть царства.
14 И отвеща амос и рече ко амасии: не бех пророкъ аз, ниже сын пророчь, но пастырь бех и ягодичия обирая:
15 и поя мя господь от овец и рече ко мне: иди и прорцы на люди моя израиля.
16 И ныне слыши слово господне: ты глаголеши: не прорицай на израиля и не возмущай народа на дом иаковль:
17 сего ради сия глаголет господь: жена твоя во граде соблудит, сынове же твои и дщери оружием падут, и земля твоя ужем измерится, и ты на земли нечистей скончаешися, и израиль пленен отведется от земли своея.
1 Сице показа ми господь бог: и се, сосуд птицеловца.
2 И рече (господь): что ты видиши, амосе? И рех: сосудъ птицеловца. И рече господь ко мне: приспе конец на люди моя израиля, не приложу ксему еже мимоити его.
3 И восплачутся стропове храма в той день, глаголет господь бог: мнози падшии во всем месте, навергу молчание.
4 Слышите убо сия, сокрушающии из утра убогаго и насильствующии нищих от земли,
5 глаголющии: когда прейдет месяц, и продамы, и (когда прейдутъ) субботы, и отверзем сокровища наша, еже сотворити меру малу, и увеличити мерило, и сотворити вес неправеден,
6 яко да притяжем убогия сребром и нищаго за сапоги, и от всякаго жита куплю сотворимъ?
7 Кленется господь на презорство иаковле, аще забудет въ конец вся дела ваша:
8 и о сих не возмятется ли земля, и восплачется всякъ живяй на ней? и взыдет яко река скончание (ея), и снидет якоже река египетская.
9 И будет в той день, глаголет господь бог, зайдет солнце в полудне, и померкнет на земли в день свет:
10 и превращу праздники ваша в жалость и вся песни ваша в плачь, и возложу на всяк хребет вретище и на всяку главу плешь, и положу его яко жалость любимаго и сущия с ним яко день болезни.
11 Се, дние грядут, глаголет господь, и послю глад на землю, не глад хлеба, ни жажду воды, но глад слышания слова господня:
12 и поколеблются воды от моря до моря и от севера до восток, и обтекут ищуще словесе господня, и не обрящут.
13 В той день оскудеют девы добрыя и юноши в жажди,
14 кленущиися очищением самарийским и глаголющии: живъ бог твой, дане, и жив бог твой, вирсавее. И падутъ и не востанут ктому.
1 Видех господа стояща на жертвеннице, и рече: порази очистилище, и поколеблются преддверия, и пресецы в главы всех: и оставшия их оружием избию, не убежит от них бежай, и не уцелеет от них уцелеваяй:
2 аще сокрыются во аде, то и оттуду рука моя исторгнетъ я, и аще взыдут на небо, то и оттуду свергу я:
3 и аще скрыются на версе кармила, то и оттуду взыщу и возму я, и аще погрузятся от очию моею во глубинахъ морских, то и тамо повелю змиеви, и угрызет я:
4 и аще пойдут в плен пред лицем враг своих, и тамо повелю оружию, и избиет их: и утвержу очи мои на них во злая, а не во благая.
5 И господь бог вседержитель прикасаяйся земли и колебля ею, и возрыдают вси живущии на ней, и взыдет яко река скончание ея, и снидет яко река египетская:
6 сотворяяй на небо восход свой и обещание свое на земли основаяй, призываяй воду морскую и проливаяй ю на лице земли: господь бог вседержитель имя ему.
7 Не якоже ли сынове ефиопстии вы есте мне, сынове израилевы? глаголет господь. Не израиля ли изведох изъ земли египетския и иноплеменники из каппадокии и сиряны из рова?
8 Се, очи господа бога на царство грешных, и отвергу е от лица земли: обаче не в конец отвергу домъ израилев, глаголет господь.
9 Понеже, се, аз заповедаю и развею дом израилевъ во вся языки, якоже веется на веяле, и не падетъ сотрение на землю.
10 оружием скончаются вси грешнии людий моих, глаголющии: не приближатся, ни приидут на нас злая.
11 В той день возставлю скинию давидову падшую, и возгражду падшая ея, и раскопаная ея возставлю, и возгражду ю якоже дние века:
12 яко да взыщут мене оставшиися человецы и вси языцы, в нихже призвася имя мое в них, глаголет господь творяй сия вся.
13 Се, дние грядут, глаголет господь, и постигнет жатва обымание винограда, и созреет гроздие в сеятву, и искапают горы сладость, и вси холми насаждени будут:
14 и возвращу плен людий моих израиля, и возградятъ грады разореныя, и населятся, и насадят винограды и испиют вино их, и сотворят вертограды и снедятъ плод их:
15 и насажду я на земли их, и не исторгнутся ктому от земли своея, юже дах им, глаголет господь бог вседержитель.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>