Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга пророка Авдия
(шрифт на основе старой кириллицы)
На церковно-славянском языке гражданским шрифтом
Глава 1.
1 Видение авдиино: сия глаголет господь бог идумеи: слух слышах от господа, известие во языки посла: востаните, и востанем на ню ратию.
2 Се, мала дах тя во языцех, безчестен ты еси зело.
3 Презорство сердца твоего воздвиже тя живущаго в пещерахъ каменных: возвышаяй храмину свою, глаголяй в сердцы своем: кто мя свержет на землю?
4 Аще вознесешися якоже орел и аще положиши гнездо твое среде звезд, и оттуду свергу тя, глаголет господь.
5 Аще бы татие влезли к тебе, или разбойницы нощию, камо бы повержен был еси? еда не украли бы доволных себе? или аще бы объемлющии виноград влезли к тебе, еда бы не оставили гроздия?
6 Како обыскася исав, и взята быша сокровенная его?
7 Даже до предел испустиша тя: вси мужие завета твоего сопротивишася ти, премогоша тя мужие мирницы твои: (ядущии с тобою) положиша лесть под тобою, несть смысла въ них.
8 В той день, глаголет господь, погублю премудрыя от идумеи и смысл от горы исавовы:
9 и убоятся воини твои, иже от феман, да отимется человек от горы исавовы.
10 Посечения ради и нечестия, еже на брата твоего иакова, покрыет тя студ, и отвержен будеши во век.
11 от негоже дне сопротивился еси во дни пленяющихъ иноплеменников силу его, и чуждии внидоша во врата его и о иерусалиме вергоша жребия, и ты был еси яко един от них.
12 И да не презриши дне брата твоего в день чуждих, и да не порадуешися о сынех иудиных в день погибели их, и да не велеречиши в день скорби:
13 и не входи во врата людий моих в день болезни их, и не презри и ты сонма их в день потребления их, и не совещайся на силу их в день погибели их:
14 ниже настой на исходы их потребити избегающия их, ниже заключай бежащия их в день скорби.
15 Понеже близ день господень на вся языки: якоже сотворилъ еси, сице будет ти, воздаяние твое воздастся на главу твою.
16 Понеже якоже еси пил на горе моей святей, испиютъ вси языцы вино, испиют и снидут, и будут яко не бывшии.
17 В горе же сиони будет спасение, и будет свята: и наследят дом иаковль наследивших я.
18 И будет дом иаковль огнь, дом же иосифов пламень, а дом исавов в тростие, и возгорятся на них и поядятъ я, и не будет избегаяй дому исавову, яко господь глагола.
19 И наследят иже во нагеве гору исавову, и иже в раздолии иноплеменники: и возмут гору ефремову и поле самарийско, и вениамина и галаадитиду.
20 И преселения начало сие сыном израилевым, земля хананейска до сарепты: преселение же иерусалимле до ефрафа: и наследят грады нагевовы.
21 И взыдут спасаемии от горы сиони, еже отмстити гору исавлю, и будет царство господеви.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>