Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга пророка Ионы
(шрифт на основе старой кириллицы)
На церковно-славянском языке гражданским шрифтом
1 И бысть слово господне ко ионе сыну амафиину, глаголя:
2 востани и иди в ниневию град великий и проповеждь в нем, яко взыде вопль злобы его ко мне.
3 И воста иона, еже бежати в фарсис от лица господня и сниде во иоппию и обрете корабль идущь в фарсис, и даде наем свой и вниде в онь плыти с ними в фарсис от лица господня.
4 И господь воздвиже ветр велий на мори, и бысть буря великая в мори, и корабль бедствоваше еже сокрушитися.
5 И убояшася корабелницы, и возопиша кийждо к богу своему, и изметание сотвориша сосудовъ иже в корабли в море, еже облегчитися от них: иона же сниде во дно корабля и спаше ту и храпляше.
6 И прииде к нему кормчий и рече ему что ты храплеши? востани и моли бога твоего, яко да спасет ны бог, да не погибнем.
7 И рече кийждо ко искреннему своему: приидите, вержим жребия и уразумеем, кого ради есть зло сие на насъ? И метнуша жребия, и паде жребий на иону.
8 И реша к нему: возвести нам, кого ради сие зло на нас, и что твое делание есть, и откуду грядеши и камо идеши, и от коея страны и от киих людий еси ты?
9 И рече к ним: раб господень есмь азъ и господа бога небеснаго аз чту, иже сотвори море и сушу.
10 И убояшася мужие страхом великим и реша к нему: что сие сотворил еси? Зане разумеша мужие, яко от лица господня бежаше, яко возвести им.
11 И реша к нему: что тебе сотворим, и утолится море от насъ? Зане море восхождаше и воздвизаше паче волнение.
12 И рече к ним иона возмите мя и вверзите в море, и утолится море от вас понеже познах аз, яко мене ради волнение сие великое на вы есть.
13 И нуждахуся мужие, возвратитися к земли, и не можаху, яко море восхождаше и воздвизашеся паче на них.
14 И возопиша ко господеви и реша: никакоже, господи, да не погибнем души ради человека сего, и не даждь на нас крове праведныя: зане ты, господи, якоже восхотел, сотворил еси.
15 И взяша иону и ввергоша его в море, и преста море от волнения своего.
16 И убояшася мужие страхом великим господа и пожроша жертву господеви и помолишася молитвами.
1 И повеле господь киту великому пожрети иону. И бе иона во чреве китове три дни и три нощи.
2 И помолися иона ко господу богу своему от чрева китова
3 и рече: возопих в скорби моей ко господу богу моему, и услыша мя: из чрева адова вопль мой, услышал еси глас мой:
4 отвергл мя еси во глубины сердца морскаго, и реки обыдоша мя: вся высоты твоя и волны твоя на мне преидоша.
5 И аз рех: отринуся от очию твоею еда приложу призрети ми ко храму святому твоему?
6 Возлияся на мя вода до души моея, бездна обыде мя последняя, понре глава моя в разселины гор,
7 снидох в землю, еяже вереи ея заклепи вечнии: и да взыдет из истления животъ мой к тебе, господи боже мой.
8 Внегда скончаватися от мене души моей, господа помянух, и да приидет к тебе молитва моя ко храму святому твоему.
9 Хранящии суетная и ложная милость свою оставиша
10 аз же со гласом хваления и исповедания пожру тебе, елика обещах, воздам тебе во спасние мое господеви.
11 И повеле господь китови, и изверже иону на сушу.
1 И бысть слово господне ко ионе вторицею глаголя:
2 востани и иди в ниневию град великий, и проповеждь в нем по проповеди преждней, юже аз глаголах тебе.
3 И воста иона и иде в ниневию, якоже глагола господь. Ниневиа же бяше град велик богу, яко шествия пути триех дний.
4 И начат иона входити во град, яко шествие пути дне единаго, и проповеда и рече: еще три дни, и ниневиа превратится.
5 И вероваша мужие ниневийстии богови, и заповедаша пост, и облекошася во вретища от велика ихъ даже до мала их.
6 И дойде слово ко царю ниневийскому, и воста с престола своего и сверже ризы своя с себе, и облечеся во вретище и седе на пепеле.
7 И проповедася и речено бысть в ниневии от царя и вельмож его глаголющих: человецы и скоти, и волове и овцы да не вкусят ничесоже, ни да пасутся, ниже воды да пиют.
8 И облекошася во вретища человецы и скоти и возопиша прилежно к богу, и возвратися кийждо от пути своего лукаваго и от неправды сущия в руках их, глаголюще:
9 кто весть, аще раскается и умолен будетъ бог, и обратится от гнева ярости своея, и не погибнемъ?
10 И виде бог дела их, яко обратишася от путий своих лукавых, и раскаяся бог о зле, еже глаголаше сотворити им, и не сотвори.
1 И опечалися иона печалию великою и смутися,
2 и помолися ко господу и рече: о господи, не сия ли убо словеса моя, яже глаголах, еще сущу ми на земли моей? сего ради предварихъ бежати в фарсис, зане разумех, яко милостивъ ты еси и щедр, долготерпелив и многомилостив, и каяйся о злобах (человеческихъ):
3 и ныне, владыко господи, приими душу мою от мене, яко уне ми умрети, нежели жити.
4 И рече господь ко ионе аще зело опечалился еси ты?
5 И изыде иона из града и седе прямо града, и сотвори себе кущу и седяше подъ нею в сени, дондеже увидит, что будетъ граду.
6 И повеле господь бог тыкве, и возрасте надъ главою иониною, да будет сень над главою его, еже осенити его от злых его. И возрадовася иона о тыкве радостию великою.
7 И повеле господь бог червию раннему во утрие, и подъяде тыкву, и изсше.
8 И бысть вкупе внегда возсияти солнцу, и повеле бог ветру знойну жегущу, и порази солнце на главу ионину, и малодушствоваше и отрицашеся души своея и рече:
9 уне ми умрети, нежели жити. И рече господь бог ко ионе: зело ли опечалился еси ты о тыкве? И рече (иона): зело опечалихся аз даже до смерти.
10 И рече господь: ты оскорбился еси о тыкве, о нейже не трудился еси, ни воскормил еси ея, яже родися об нощь и об нощь погибе:
11 аз же не пощажду ли ниневии града великаго, в немже живут множайшии неже дванадесять темъ человек, иже не познаша десницы своея, ниже шуйцы своея, и скоти их мнози?
Конец книзе пророка ионы: имать в себе главы 4.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>