Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга пророка Михея
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7
1 Слово господне, еже бысть ко михею морасфитину, во дни иоафама и ахаза и езекии царей иудиных, о нихже виде о самарии и о иерусалиме.
2 Слышите, людие вси, словеса, и внемли, земле и вси иже на ней, и будет господь бог в вас в послушествование, господь от дому святаго своего.
3 Понеже, се, господь исходит от места своего, и снидетъ и наступит на высоты земныя,
4 и поколеблются горы под ним, и юдоли растают яко воск от лица огня и яко вода сходящи со устремлением.
5 Нечестия ради иаковля вся сия и греха ради дому израилева. Кое нечестие дому иаковлю? не самариа ли? и кий грех дому иудина? не иерусалим ли?
6 И положу самарию во овощное хранилище селное и въ сад винограда, и развергу в пропасть камение ея, и основания ея открыю:
7 и вся изваянная ея сокрушат, и вся мзды ея запалят огнем, и вся кумиры ея положу в пагубу: понеже от найма блуда собра и от найма блужения соврати.
8 Сего ради возрыдает и восплачется, пойдет боса и нага, сотворит плачь аки змиев и рыдание аки дщерей сиринских:
9 яко одержа язва ея, понеже прииде даже до иуды и коснуся до врат людий моих даже до иерусалима.
10 Иже в гефе, не величайтеся, и иенакимляне, не сограждайте из дому на посмеяние, перстию посыплите посмеяние ваше.
11 обитающая добре во градех своих, не изыде живущая в сеннааре, плачитеся дому (сущаго) близ ея, прииметъ от вас язву болезней.
12 Кто нача во благая вселившейся в болезнех, яко снидоша злая от господа на врата иерусалимля,
13 шум колесниц и конников: живущая в лахисе началница греха та есть дщери сиони, яко в тебе обретошася нечестия израилева.
14 Сего ради даст посылаемыя даже до наследия гефова, домы суетны, вотще быша царем израилевым,
15 дондеже наследники приведу тебе, живущая в лахисе, наследие даже до одоллама приидет, слава дщере сиони.
16 оброснися и остризися по чадех своих младых: разшири оброснение твое яко орел, понеже пленени быша от тебе.
1 Быша помышляюще труды и делающе злая на ложахъ своих, и купно со днем совершаху тая, понеже не воздвигоша к богу рук своих:
2 и желаху сел, и грабляху сирот, и домы отимаху, и расхищаху мужа и дом его, и мужа и наследие его.
3 Сего ради сия глаголет господь: се, аз помышляю на племя сие злая, от нихже не подвигнете вый ваших и не пойдете прости внезапу, яко время зло есть.
4 В той день приимется на вы притча, и восплачется плачь с песнию, глаголющь: бедство пострадахом: часть людий моих измерися ужем, и не бе возбраняяй его, еже отвратитися: села ваша разделена быша.
5 Сего ради не будет тебе вмещущь ужа в жребии в сонме господни.
6 Не плачитеся слезами, ниже да слезят о сих: не отвержетъ бо укоризны
7 глаголяй: дом иаковль разгнева дух господень: не сия ли суть начинания его? не словеса ли его суть добра с ним, и правии ходиша?
8 И прежде людие мои во вражду сопротивишася, противу миру своему: кожу его одраша, еже отяти упование, сокрушение ратное:
9 сего ради старейшины людий моих извергутся из домовъ сладости своея, злых ради начинаний своих отриновени быша. Приближитеся горам вечным:
10 востани и пойди, яко несть тебе сей покой: нечистоты ради, истлесте тлением,
11 прогнастеся ни кимже гоними: дух постави лжу, искапа тебе в вино и пиянство: и будет, от капли людий сих,
12 собираемь соберется иаков со всеми: приемяй прииму оставших израилевых, вкупе положу возвращение его, аки овцы в скорби, яко паству посреде ложа их: изскочат от человек.
13 Взыди просечением пред лицем их: просекоша, и проидоша врата, и изыдоша ими. И изыде царь ихъ пред лицем их, господь же вождь их будет.
1 И речет: слышите убо сия, власти дому иаковля и оставшии дому израилева: не вам ли есть еже разумети судъ?
2 Ненавидящии добра, а ищущии зла, похищающии кожы ихъ с них и плоти их от костей их:
3 якоже объядоша плоти людий моих, и кожы их от костей их одраша, и кости их столкоша и содробиша яко плоти в коноб и яко мяса в горнец:
4 тако возопиют ко господу, и не послушает их и отвратитъ лице свое от них в то время, понеже слукавноваша в начинаниих своих на ня.
5 Сия глаголет господь на пророки льстящия людий моих, угрызающия зубы своими и проповедающия мир на них, и не вдася во уста их, возставиша на них рать:
6 сего ради нощь будет вам от видения, и тма будетъ вам от волхвования, и зайдет солнце на пророки, и померкнетъ на ня день:
7 и усрамятся видящии сония, и посмеяни будут волсви, и возглаголют на них вси сии, зане не будет послушаяй их.
8 Аще аз не наполню силы духом господним и судом и силою, еже возвестити иакову нечестия его и израилеви грехи его.
9 Слышите сия, старейшины дому иаковля и оставшии дому израилева, гнушающиися судом и вся правая развращающии,
10 созидающии сиона кровьми и иерусалима неправдами:
11 старейшины его на дарех суждаху, и жерцы его на мзде отвещаваху, и пророцы его на сребре волхвоваху, и на господе почиваху, глаголюще: не господь ли в нас есть? не приидут на ны злая.
12 Сего ради вас дела сион якоже нива изорется, и иерусалим яко овощное хранилище будет, и гора дому якоже луг дубравный.
1 И будет в последния дни явлена гора господня, уготована над верхи гор, и вознесется выше холмов, и потщатся к ней людие,
2 и приидут языцы мнози и рекут: приидите, взыдемъ на гору господню и в дом бога иаковля: и покажут намъ путь его, и пойдем по стезям его: яко от сиона изыдет закон, и слово господне из иерусалима,
3 и разсудит среде людий многих и изобличит языки крепки даже до земли дальния: и раскуют мечи своя на рала и сулицы своя на серпы, и не ктому возмет языкъ на язык меча, и не научатся ксему воевати.
4 И почиет кийждо под лозою своею и кийждо под смоковницею своею, и не будет устрашающаго, зане уста господа вседержителя глаголаша сия.
5 яко вси людие пойдут кийждо в путь свой, а мы пойдем во имя господа бога нашего в век и далечае.
6 В той день, глаголет господь, соберу сокрушенную, и отриновенную прииму, и ихже отринух:
7 и положу сокрушенную во останок и отриновенную въ язык крепок, и воцарится господь над ними в горе сионе отныне и до века.
8 И ты, столпе паствы мгляный, дщи сионя, к тебе приидетъ и внидет власть первая, царство из вавилона дщери иерусалимли.
9 И ныне вскую познала еси зло? не бе ли тебе царя? или совет твой погибе, яко обыдоша тя болезни, аки раждающия?
10 Болезнуй и мужайся и приближайся, дщи сионя, яко раждающая: зане ныне изыдеши из града и вселишися на поли и дойдеши вавилона: оттуду изымет тя и оттуду избавит тя господь бог твой от руки враг твоих.
11 И ныне собрашася на тя языцы мнози глаголющии: порадуемся: и воззрят на сион очи наши.
12 Сии же не разумеша помышления господня и не домыслишася совета его, яко собра их аки снопы гуменныя.
13 Востани и измлати их, дщи сионя, яко роги твоя положу железны и пазнокти твоя положу медяны, и истончиши люди многи, и возложиши господеви множество их и крепость их господеви всея земли.
1 ныне оградится дщи ефремова ограждением, рать учини на вы, жезлом поразят о челюсть племенъ израилевых.
2 И ты, вифлееме, доме ефрафов, еда мал еси, еже быти в тысящах иудиныхъ? из тебе бо мне изыдет старейшина, еже быти в князя во израили, исходи же его из начала от дний века.
3 Сего ради даст я, до времене раждающия породит, и прочии от братии их обратятся к сыном израилевым.
4 И станет, и узрит, и упасет паству свою крепостию господь, и в славе имене господа бога своего пребудут: зане ныне возвеличится даже до конец земли.
5 И будет сей мир, егда ассур приидет на землю вашу, и егда взыдет на страну вашу, и востанут нань седмь пастырей и осмь язв человеческих,
6 и упасут ассура оружием и землю невродову копиями ея, и избавит от ассура, егда приидетъ на землю вашу и егда вступит на пределы ваша.
7 И будет останок иаковль в языцех среде людий многих, аки роса от господа падающи и яко агнцы на злаце, яко да не соберется ни един, ниже постоитъ в сынех человеческих.
8 И будет останок иаковль в языцех среде людий многих, аки лев в скотех в дубраве и яко львичищь в стадех овчих, якоже егда пройдет, и отлучивъ восхитит, и не будет изымающаго.
9 Вознесется рука твоя на оскорбляющия тя, и вси врази твои потребятся.
10 И будет в той день, глаголет господь, потреблю кони твоя из среды твоея и погублю колесницы твоя,
11 и потреблю грады земли твоея и развергу вся твердыни твоя,
12 и отвергу волхвования твоя от руку твоею, и волхвующии не будут в тебе:
13 и потреблю изваянная твоя и кумиры твоя из среды тебе, и посем да не поклонишися делом рук твоих:
14 и посеку дубравы от среды тебе и погублю грады твоя:
15 и сотворю со гневом и с яростию месть языком, понеже не послушаша мене.
1 Слышите, яже глагола господь: востани, судися с горами, и да слышат холми глас твой.
2 Слышите, горы, суд господень, и дебри основания земли, яко суд господень к людем его, и со израилем претися имать.
3 Людие мои, что сотворих вам, или чим оскорбихъ вас, или чим стужих вамъ? отвещайте ми.
4 Зане изведох вас из земли египетския и изъ дому работы избавих вас, и послах пред вами моисеа и аарона и мариам.
5 Людие мои, помяните убо, что совеща на вы валакъ царь моавитский, и что ему отвеща валаам сын веоров, от сития до галгалъ? яко да познается правда господня.
6 В чем постигну господа, срящу бога моего вышняго? срящу ли его со всесожжением, телцы единолетными?
7 еда приимет господь в тысящах овнов, или во тмахъ козлищ тучныхъ? дам ли первенцы моя о нечестии моем, плод утробы моея, за грехи души моея?
8 Возвестися бо тебе, человече, что добро, или чесого господь ищет от тебе, разве еже творити суд и любити милость и готову быти еже ходити с господемъ богом твоимъ?
9 Глас господень граду призовется, и спасет боящияся имене его: послушай, племя, и кто украсит градъ?
10 Еда огнь и дом беззаконнаго собирая имения беззаконная и со укоризною неправды?
11 Еда оправдится в мериле беззаконник и во вретищи меры неправыя,
12 от нихже богатство свое нечестия наполниша? и живущии в ней глаголаху лжу, и язык их вознесеся во устехъ их.
13 И аз начну поражати тя и погублю тя во гресехъ твоих.
14 Ты ясти будеши и не насытишися, и померкнет в тебе, и совратишися, и не спасешися: и елицы аще избудут, оружию предадятся.
15 Ты посееши, но не пожнеши: ты изгнетеши масличие, но не помажешися маслом: и насадите вино, и не испиете: и погибнут законы людий моих.
16 И хранил еси оправдания замвриина и вся дела дому ахаавля, и ходисте в советех их, яко да предам тя в пагубу, и живущия в ней во звиздание, и укоризны людий приимете.
1 У, люте мне! понеже бых аки собираяй сламу на жатве, и яко пародок во обымании винограда не сущу гроздию, еже ясти первоплодная, яже вожделе душа моя.
2 У, люте мне, душе! яко погибе благочестивый от земли, и исправляющаго в человецех несть: вси во кровех прятся, кийждо ближняго своего озлобляет озлоблением,
3 на зло руки своя уготовляют: князь просит, и судия мирная словеса глаголет, желание души его есть: и отиму благая их,
4 яко моль поядаяй, и ходяй по правилам в день стражбы. У, люте! у, люте! отмщения твоя приспеша, ныне будут плачи их.
5 Не верите другом, ни надейтеся на старейшины, и от сожителницы твоея хранися, еже сказати ей что:
6 понеже сын безчестит отца, дщерь востанет на матерь свою и невеста на свекровь свою, врази вси мужу домашнии его.
7 Аз же ко господеви воззрю, потерплю бога спаса моего, услышитъ мя бог мой.
8 Не радуйся о мне, враждебница моя, яко падох, и востану: зане аще сяду во тме, господь осветит мя.
9 Гнев господень стерплю, яко согреших ему, дондеже оправдит прю мою и сотворит суд мой: и изведетъ мя на свет, и узрю правду его.
10 И узрит враждебница моя, и облечется в студъ глаголющая ко мне: где есть господь бог твой? очи мои воззрят на ню, ныне будет в попрание аки калъ на путех.
11 День глаждения плинфа: изглаждение твое день оный, и сотрет законы твоя день оный.
12 И гради твои приидут на поравнение и в разделение ассирийско, и гради твои твердии в разделение от тира даже до реки сирския, и от моря даже до моря, и от горы даже до горы, дние воды и молвы.
13 И будет земля в пагубу со живущими на ней, от плодовъ начинаний их.
14 Паси люди твоя жезлом твоим, овцы наследия твоего, вселяющияся едины в дубраве среде кармила, попасутъ васанитиду и галаадитиду, якоже дние века.
15 И по днем исхода твоего из египта узрите чудесная.
16 узрят языцы и усрамятся от всея крепости своея, руце возложат на уста своя, и уши ихъ оглохнут,
17 полижут персть яко змиеве плежуще по земли, смятутся во облежении своем: о господе бозе нашем ужаснутся и убоятся от тебе.
18 Кто бог якоже ты, отемляй беззакония и оставляяй нечестия останком наследия своего? и не удержа гнева своего во свидение, яко волитель милости есть.
19 Той обратит и ущедрит ны, и погрузит неправды наша и ввержет в глубины морския вся грехи наша,
20 даст истину иакову, (и) милость аврааму, якоже клялся еси отцем нашим во дни первыя.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>