Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга пророка Исаии
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51 | 52 | 53 | 54 | 55 | 56 | 57 | 58 | 59 | 60 | 61 | 62 | 63 | 64 | 65 | 66
1 Видение, еже виде исаиа сын амосов, еже виде на иудею и на иерусалим, в царство озии и иоафама, и ахаза и езекии, иже царствоваша во иудеи.
2 Слыши, небо, и внуши, земле, яко господь возглагола: сыны родих и возвысих, тии же отвергошася мене.
3 Позна вол стяжавшаго и, и осел ясли господина своего: израиль же мене не позна, и людие мои не разумеша.
4 увы, язык грешный, людие исполнени грехов, семя лукавое, сынове беззаконнии, остависте господа и разгневасте святаго израилева, отвратитеся вспять.
5 Что еще уязвляетеся, прилагающе беззаконие? Всякая глава в болезнь, и всякое сердце въ печаль.
6 от ног даже до главы несть в нем целости: ни струп, ни язва, ни рана палящаяся: несть пластыря приложити, ниже елеа, ниже обязания.
7 Земля ваша пуста, гради ваши огнем пожжени, страну вашу пред вами чуждии поядают, и опусте низвращена от людий чуждих.
8 оставится дщерь сионя, яко куща в винограде и яко овощное хранилище в вертограде, яко град воюемый.
9 И аще не бы господь саваоф оставил намъ семене, яко содома убо были быхом, и яко гоморру уподобилися быхом.
10 услышите слово господне, князи содомстии: внемлите закону божию, людие гоморрстии.
11 Что ми множество жертв ваших, глаголет господь? Исполнен есмь всесожжений овних и тука агнцев, и крове юнцев и козлов не хощу.
12 Ниже приходите явитися ми: кто бо изыска сия из рук вашихъ? Ходити по двору моему не приложите.
13 И аще принесете ми семидал, всуе: кадило мерзость ми есть.
14 Новомусячий ваших и суббот и дне великаго не потерплю: поста и праздности, и новомeсячий ваших и праздников ваших ненавидит душа моя: бысте ми в сытость, ктому не стерплю греховъ ваших.
15 егда прострете руки (ваша) ко мне, отвращу очи мои от вас: и аще умножите моление, не услышу вас: руки бо ваша исполнены крове.
16 Измыйтеся, (и) чисти будите, отимите лукавства от душ ваших пред очима моима, престаните от лукавств ваших.
17 Научитеся добро творити, взыщите суда, избавите обидимаго, судите сиру и оправдите вдовицу,
18 и приидите, и истяжимся, глаголет господь. И аще будут греси ваши яко багряное, яко снег убелю: аще же будут яко червленое, яко волну убелю.
19 И аще хощете и послушаете мене, благая земли снесте:
20 аще же не хощете, ниже послушаете мене, мечь вы пояст: уста бо господня глаголаша сия.
21 Како бысть блудница град верный сион полнъ суда? в немже правда почиваше, ныне же (в немъ) убийцы.
22 Сребро ваше неискушено, корчемницы твои мешают вино с водою.
23 Князи твои не покаряются, общницы татем, любяще дары, гоняще воздаяние, сирым не судящии и суду вдовиц не внимающии.
24 Сего ради тако глаголет владыка господь саваоф: горе крепким во израили: не престанет бо ярость моя на противныя, и суд врагом моим сотворю:
25 и наведу руку мою на тя, и разжегу в чистоту, непокаряющихся же погублю, и отиму всех беззаконныхъ от тебе, и всех гордых смирю.
26 И приставлю судии твоя якоже прежде, и советники твоя яко от начала: и по сих наречешися град правды, мати градовом, верный сион.
27 С судом бо спасется пленение его и съ милостынею.
28 И сокрушатся беззаконнии и грешницы вкупе, и оставившии господа скончаются:
29 занеже постыдятся о идолех своих, ихже сами восхотеша, и посрамятся о садех своих, ихже возжелеша.
30 Будут бо яко теревинф отметнувый листвия (своя), и яко вертоград не имый воды.
31 И будет крепость их яко стебль изгребия, и делания их яко искры огненныя, и сожгутся беззаконницы и грешницы вкупе, и не будет угашаяй.
1 Слово бывшее от господа ко исаии сыну амосову о иудеи и о иерусалиме.
2 яко будет в последния дни явлена гора господня, и дом божий на версе гор, и возвысится превыше холмов: и приидут к ней вси языцы.
3 И пойдут языцы мнози и рекут: приидите, и взыдем на гору господню и в дом бога иаковля, и возвестит нам путь свой, и пойдем по нему. от сиона бо изыдет закон, и слово господне изъ иерусалима:
4 и судити будет посреде язык и изобличитъ люди многи: и раскуют мечи своя на орала и копия своя на серпы, и не возмет язык на язык меча, и не навыкнут ктому ратоватися.
5 И ныне, доме иаковль, приидите, пойдем светомъ господним.
6 остави бо люди своя, дом иаковль: зане якоже из начала наполнися страна их волхвований, якоже иноплеменников, и чада многа иноплеменнича родишася им.
7 Наполнися бо страна их сребра и злата, и не бяше числа сокровищ их: и наполнися земля их коней, и не бяше числа колесниц их:
8 и наполнися земля мерзостей дел рук их, и поклонишася тем, яже сотвориша персты их:
9 и преклонися человек, и смирися муж, и не претерплю им.
10 И ныне внидите в камение и скрыйтеся въ землю от лица страха господня и от славы крепости его, егда востанет сокрушити землю.
11 очи бо господни высоцы, человек же смирен: и смирится высота человеческая, и вознесется господь един в день оный.
12 День бо господа саваофа на всякаго досадителя и горделиваго, и на всякаго высокаго и величаваго, и смирятся:
13 и на всяк кедр ливанский высоких и превознесенныхъ и на всяко древо желудя васанска,
14 и на всякую гору высокую и на всякий холмъ высокий,
15 и на всякий столп высок и на всякую стену высокую,
16 и на всякий корабль морский и на всяко видение доброты кораблей.
17 И смирится всякий человек, и падется высота человеча, и вознесется господь един в день оный.
18 И рукотвореная вся скрыют,
19 внесше в пещеры и в разселины камений и в вертепы земныя, от лица страха господня и от славы крепости его, егда востанетъ сокрушити землю.
20 В день бо оный изринет человек мерзости своя златыя и сребряныя, яже сотвориша, да покланяются суетным и нетопырем,
21 еже внити в вертепы твердаго камене и в разселины камений, от лица страха господня и от славы крепости его, егда востанетъ сокрушити землю.
22 оставите (убо) вам человека, емуже есть дыхание в ноздрех его: яко в чемъ вменися сей?
1 Се, владыка господь саваоф отимет от иерусалима и от иудеи крепкаго и крепкую, крепость хлеба и крепость воды,
2 исполина и крепкаго, и человека ратника и судию, и пророка и смотреливаго, и старца
3 и пятьдесятоначалника, и дивнаго советника и премудраго архитектона и разумнаго послушателя.
4 И поставлю юноши князи их, и ругателие господствовати будут ими.
5 И нападати имут людие, человек на человека, и человек на ближняго своего: приразится отроча к старцу, и безчестный к честному.
6 яко имется человек брата своего, или домашняго отца своего, глаголя: ризу имаши, началовождь нам буди, и брашно мое под тобою да будет.
7 И отвещав в день оный речет: не буду твой началовождь, несть бо в дому моем ни хлеба, ни ризы: не буду началовождь людем сим.
8 яко оставлен бысть иерусалим, и иудеа паде, и язык их со беззаконием, не покаряющься господеви.
9 Сего ради ныне смирися слава их, и студъ лица их противу ста им: грех же свой яко содомский возвестиша и явиша. Горе души их, зане умыслиша совет лукавый на себе самих,
10 рекше: свяжем праведнаго, яко непотребенъ нам есть. убо плоды дел своих снедят.
11 Горе беззаконному: лукавая бо приключатся ему по делом руку его.
12 Людие мои, приставницы ваши пожинают вас, и истязающии обладают вами: людие мои, блажащии вас льстят вы и стези ног ваших возмущают.
13 Но ныне устроится господь на суд и поставитъ на суд люди своя:
14 сам господь на суд приидет со старейшины людий и со князи их. Вы же почто запалисте виноград мой, и разграбление убогаго в домехъ вашихъ?
15 почто вы обидите людий моих и лице убогихъ посрамляете? глаголет господь саваоф.
16 Сия глаголет господь: понеже вознесошася дщери сиони и ходиша высокою выею и помизанием очесъ и ступанием ног, купно ризы влекушия (по долу) и ногама купно играющия:
17 и смирит господь началныя дщери сиони, и господь открыет срамоту их.
18 В день он, и отимет господь славу ризъ их и красоты их, и вплетения златая (на главе) и тресны ризныя, и луницы гривенныя
19 и срачицы тонкия, и красоту лица их и состроение красы славныя, и обручи и перстни, и мониста и запястия и художныя усерязи,
20 и багряницы и пребагряная, и утварь храмную
21 и светлая лаконская, и виссоны и синеты, и червленицы
22 и виссон со златом и синетою претыканы, и тончицы преиманы златом:
23 и будет вместо вони добрыя смрад, и вместо пояса ужем препояшешися, и вместо украшения златаго, еже на главе, плешь имети будеши дел твоих ради, и вместо ризы багряныя препояшешися вретищем:
24 и сын твой добрейший, егоже любиши, мечем падет, и крепцыи ваши мечем падутъ и смирятся:
25 и восплачутся хранилища утварей ваших, и останешися едина и о землю ударена будеши.
1 И имутся седмь жен за мужа единаго, глаголющя: хлеб наш ясти будем и в ризы наша одеватися, точию имя твое да наречется на нас, отими укоризну нашу.
2 В день оный возсияет бог в совете со славою на земли, еже вознести и прославити останок израиля.
3 И будет останок в сионе и останок во иерусалиме, святи нарекутся вси написаннии в жизнь во иерусалиме:
4 яко отмыет господь скверну сынов и дщерей сионских и кровь иерусалимску очистит от среды их духом суда и духом зноя.
5 И приидет господь, и будет все место горы сиони, и вся яже окрест ея осенитъ облак во дни, и яко дыма и света огненна горяща в нощи, всею славою покрыется:
6 и будет в сень от зноя и в покров и в сокровение от жестости и дождя.
1 Воспою ныне возлюбленному песнь возлюбленнаго моего винограду моему: виноград бысть возлюбленному в розе, на месте тучне:
2 и ограждением оградих и окопах, и насадихъ лозу избранну, и создах столп посреде его, и предточилие ископах в нем, и ждах, да сотворит гроздие, и сотвори терние.
3 И ныне, живущии во иерусалиме и человече иудин, судите между мною и виноградом моим.
4 Что сотворю еще винограду моему, и не сотворихъ ему? занеже ждах, да сотворит гроздие, сотвори же терние.
5 ныне убо возвещу вам, что аз сотворю винограду моему: отиму ограждение его, и будет в разграбление: и разорю стену его, и будет в попрание.
6 И оставлю виноград мой, и ктому не обрежется, ниже покопается, и взыдет на нем, якоже на лядине, терние: и облаком заповем, еже не одождити на него дождя.
7 Виноград бо господа саваофа, дом израилев есть, и человек иудин новый сад возлюбленный: ждах, да сотворит суд, сотвори же беззаконие, и не правду, но вопль.
8 Горе совокупляющим дом к дому и село къ селу приближающим, да ближнему отимут что: еда вселитеся едини на земли?
9 услышашася бо во ушесех господа саваофа сия: аще бо будут домове мнози, в запустение будут велицыи и добрии, и не будут живущии в них:
10 идеже бо возорют десять супруг волов, сотворит корчаг един, и сеяй артавасъ шесть сотворит меры три.
11 Горе востающим заутра и сикер гонящим, ждущим вечера: вино бо сожжет я:
12 со гусльми бо и певницами, и тимпаны и свирельми вино пиют, на дела же господня не взираютъ и дел руку его не помышляют.
13 убо пленени быша людие мои, за еже не ведети им господа, и множество бысть мертвыхъ глада ради и жажди водныя.
14 И разшири ад душу свою и разверзе уста своя, еже не престати: и снидут славнии и велицыи и богатии и губителие их и веселяйся в нем:
15 и смирится человек, и обезчестится муж, и очи высокоглядающии смирятся.
16 И вознесется господь саваоф в суде, и богъ святый прославится в правде:
17 и упасутся расхищеннии яко юнцы, и пустыни плененных агнцы поядят.
18 Горе привлачающим грехи яко ужемъ долгим, и яко ига юнична ременем беззакония своя,
19 глаголющим: скоро да приближатся, яже сотворит, да видим, и да приидет совет святаго израилева, да разумеем.
20 Горе глаголющим лукавое доброе, и доброе лукавое, полагающим тму свет, и свет тму, полагающим горькое сладкое, и сладкое горькое.
21 Горе, иже мудри в себе самих и предъ собою разумни.
22 Горе крепким вашим, вино пиющим, и вельможамъ растворяющим сикер,
23 оправдающим нечестива даров ради, и еже есть праведное праведнаго вземлющим от него.
24 Сего ради якоже сгорит трость от углия огненнаго и сожжется от пламене разгоревшагося, корень их яко персть будет, и цвет ихъ яко прах взыдет: не восхотеша бо закона господа саваофа, но слово святаго израилева раздражиша.
25 И возъярися гневом господь саваоф на люди своя, и наложи руку свою на них, и порази их: и раздражишася горы, и быша трупи ихъ яко гной посреде пути. И во всех сих не отвратися ярость его, но еще рука его высока.
26 Воздвигнет убо знамение во языцехъ сущих далече и позвиждет им от конецъ земли, и се, скоро легце грядут:
27 не взалчут, ни утрудятся, ни воздремлют, ни поспят, ни распояшут поясов своих от чреслъ своих, ниже расторгнутся ремени сапогов их:
28 ихже стрелы остры суть, и луцы ихъ напряжени: копыта коней их яко тверд камень вменишася, колеса колесниц их яко буря.
29 ярятся яко львове, и предсташа яко львичища: и имет, и возопиет яко зверь, и извержет, и не будет отемлющаго их.
30 И возопиет их ради в той день, яко шум моря волнующася: и воззрят на землю, и се, тма жестока в недоумении их.
1 И бысть в лето, в неже умре озиа царь, видех господа седяща на престоле высоце и превознесенне, и исполнь дом славы его.
2 И серафими стояху окрест его, шесть крилъ единому и шесть крил другому: и двема убо покрываху лица своя, двема же покрываху ноги своя и двема летаху.
3 И взываху друг ко другу и глаголаху: свят, свят, свят господь саваоф: исполнь вся земля славы его.
4 И взяся наддверие от гласа, имже вопияху, и дом наполнися дыма.
5 И рекох: о, окаянный аз, яко умилихся, яко человек сый и нечисты устне имый, посреде людий нечистыя устне имущих азъ живу: и царя господа саваофа видех очима моима.
6 И послан бысть ко мне един от серафимов, и в руце своей имяше угль горящь, егоже клещами взят от олтаря,
7 и прикоснуся устнам моим и рече: се, прикоснуся сие устнам твоим, и отиметъ беззакония твоя и грехи твоя очистит.
8 И слышах глас господа глаголюща: кого послю, и кто пойдет к людем симъ? И рекох: се, азъ есмь, посли мя.
9 И рече: иди и рцы людем сим: слухомъ услышите, и не уразумеете: и видяще узрите, и не увидите:
10 одебеле бо сердце людий сих, и ушима своима тяжко слышаша, и очи свои смежиша, да не когда узрят очима и ушима услышат, и сердцем уразумеют и обратятся, и исцелю я.
11 И рекох: доколе, господи? И рече: дондеже опустеют гради, от еже ненаселеным быти, и домы, от еже не быти человеком, и земля останется пуста.
12 И посем продолжит бог человеки, и умножатся оставльшиися на земли.
13 И еще на ней есть десятина, и паки будет в расхищение якоже теревинф и яко желудь, егда испадет из плюски своея: семя свято стояние его.
1 И бысть во дни ахаза сына иоафамля, сына озии, царя иудина, взыде расин царь арамль, и факей сын ромелиев, царь израилев, на иерусалим, воевати на него, и не возмогоша разорити его.
2 И возвестися в дому давидове, глаголя: совещася арам со ефремом, и ужасеся душа его и душа людий его, якоже в дубраве древо ветром восколеблется.
3 И рече господь ко исаии: изыди во сретение ахазу ты и оставыйся иасув сын твой, къ купели горняго пути села белилнича,
4 и речеши ему: блюди, еже молчати, и не бойся, ниже душа твоя да изнеможет от двою древу главень дымящихся сих: егда бо гневъ ярости моея будет, паки исцелю.
5 Сын же арамль и сын ромелиев яко совещаста совет лукавый на тя, глаголюще:
6 взыдем во иудею, и собеседовавше с ними отвратим я к нам и воцарим в ней сына тавеилева:
7 сия же глаголет господь саваоф: не пребудет советъ сей, ниже сбудется,
8 но глава араму дамаск, и глава дамаску расин: но еще шестьдесят и пять лет, оскудеетъ царство ефремово от людий,
9 глава же ефремови соморон, и глава соморону сын ромелиев: и аще не уверите, ниже имате разумети.
10 И приложи господь глаголати ко ахазу, рекий:
11 проси себе знамения от господа бога твоего во глубину, или в высоту.
12 И рече ахаз: не имам просити, ниже искушу господа.
13 И рече (исаиа): слышите убо, доме давидов: еда мало вам есть труд даяти человеком, и како даете господеви трудъ?
14 Сего ради даст господь сам вам знамение: се, дева во чреве зачнет и родит сына, и наречеши имя ему еммануил:
15 масло и мед снесть, прежде неже разумети ему изволити злая, или избрати благое:
16 зане прежде неже разумети отрочати благое или злое, отринет лукавое, еже избрати благое, и оставится земля, еяже ты боишися, от лица двух царей.
17 Но наведет господь на тя и на люди твоя и на дом отца твоего дни, иже еще не пришли, от дне в оньже отя ефрема от иуды, царя ассирийска.
18 И будет в той день, позвиждет господь мухам, яже владеют частию реки египетския, и пчеле, яже есть во стране ассирийстей:
19 и приидут вси и почиют в дебрех страны и в пещерах каменных, и во вертепех и во всяцей разселине и во всяцем древе.
20 В день оный обриет господь бритвою наятою об ону страну реки царя ассирийска, главу и власы ног, и браду отимет.
21 И будет в той день, кормити будет человекъ юницу от волов и две овце:
22 и будет от множества творения млечнаго, масло и мед снесть всяк оставыйся на земли.
23 И будет в той день, всяко место, идеже аще будет тысяща лоз винограда, по тысящи сикль, в лядину будет и в терние:
24 со стрелою и луком внидут тамо, яко лядиною и тернием будет вся земля:
25 и всяка гора оремая возорется, не найдетъ тамо страх: будет от лядины и от терния паству овцам и в попрание волу.
1 И рече господь ко мне: приими себе свиток новъ велик и напиши в нем писалом человечим, еже скоро пленение сотворити корыстей, приспе бо:
2 и свидетели мне сотвори верны человеки, урию иереа и захарию сына варахиина.
3 И приступих ко пророчице, и во чреве зачатъ и роди сына. И рече господь мне: нарцы имя ему: [скоро плени, нагло расхити,]
4 зане прежде неже разумети отрочати назвати отца или матерь, приимет силу дамаскову, и корысти самарийския пред царем ассирийским.
5 И приложи господь глаголати ко мне еще, глаголя:
6 понеже не восхотеша людие сии воды силоамли текущия тисе, но восхотеша имети рассона и сына ромелиева царя над вами,
7 сего ради се, возводит господь на вы воду реки сильну и многу, царя ассирийска и славу его: и взыдет на всяку дебрь вашу, и обыдет всяку стену вашу,
8 и отимет от иудеи человека, иже возможетъ главу воздвигнути, или могущаго что совершити: и будет полк его, во еже наполнити ширину страны твоея, [с нами богъ!]
9 Разумейте, языцы, и покаряйтеся, услышите даже до последних земли: могущии, покаряйтеся: аще бо паки возможете, паки побеждени будете,
10 и иже аще совет совещаете, разоритъ господь, и слово, еже аще возглаголете, не пребудетъ в вас, яко с нами бог.
11 Тако глаголет господь: крепкою рукою не покаряются хождению пути людий сих, глаголюще:
12 да не когда рекут: жестоко: все бо, еже аще рекут людие сии, жестоко есть: страха же их не убойтеся, ниже возмятитеся.
13 господа сил, того освятите, и той будетъ тебе в страх.
14 И аще будеши уповая на него, будетъ тебе во освящение, а не якоже о камень претыкания преткнешися, ниже яко о камень падения: домове же иаковли в пругле, и в раздолии седящии во иерусалиме.
15 Сего ради изнемогут в них мнози, и падут, и сокрушатся, и приближатся, и яти будутъ человецы в твердыни суще.
16 Тогда явлени будут печатлеющии закон, еже не учитися.
17 И речет: пожду бога отвращшаго лице свое от дому иаковля и уповая буду нань.
18 Се, аз и дети, яже ми даде бог: и будут знамения и чудеса в дому израилеве от господа саваофа, иже обитает на горе сион.
19 И аще рекут к вам: изыщите чревоволшебниковъ и от земли возглашающих, тщесловующих, иже от чрева глашают, не язык ли к богу своему взыщетъ? что испытуют мертвыя о живыхъ?
20 Закон бо в помощь даде, да рекут не якоже слово сие, заньже не леть дары даяти.
21 И приидет на вы жесток глад, и будет, егда взалчете, скорбни будете и зло речете князю и отечеству:
22 и воззрят на небо горе, и на землю низу призрят, и се, скудость тесна и тма, скорбь и теснота и тма, якоже не видети: и не оскудеетъ в тесноте сый даже до времене.
1 Сие прежде испий, скоро твори, страно завулоня и земле неффалимля, и прочии при мори живущии, и об ону страну иордана, галилеа языков.
2 Людие ходящии во тме видеша свет велий: живущии во стране и сени смертней, светъ возсияет на вы.
3 Множайшии людие, яже извел еси, в веселии твоем: и возвеселятся пред тобою, якоже веселящиися в жатву, и якоже веселятся делящии корысти.
4 Зане отятся ярем лежай на них, и жезл, иже на выи их: жезл бо истязующих разсыпа господь, якоже в день, иже на мадиама.
5 яко всякую одежду собранну лестию и ризу с примирением отдадут, и восхотят, да быша огнем сожжены были.
6 яко отроча родися нам, сын, и дадеся нам, егоже началство бысть на раме его: и нарицается имя его: велика совета ангел, чуден, советник, бог крепкий, властелин, князь мира, отец будущаго века: приведу бо мир на князи, мир и здравие ему.
7 И велие началство его, и мира его несть предела на престоле давидове и на царстве его, исправити е и заступити его в суде и правде, отныне и до века: ревность господа саваофа сотворит сия.
8 Смерть евр.: слово. посла господь на иакова, и прииде на израиля:
9 и уразумеют вси людие ефремовы и живущии в самарии, в досаждении и высоцемъ сердцы глаголюще:
10 плинфы падоша, но приидите, изсечем камение и посечем черничие и кедры, и созиждем себе столп.
11 И разрушит бог востающия на гору сионю, и враги его разсыплет:
12 сирию от восток солнца и еллины от запада солнца, поядающия израиля всеми усты. Во всех сих не отвратися ярость его, но еще рука его высока.
13 И людие не обратишася, дондеже язвени быша, и господа не взыскаша.
14 И отят господь от израиля главу и ошиб, велика и мала, во един день:
15 старца и чудящихся лицам, сие начало: и пророка учаща беззаконная, сей ошиб.
16 И будут блажащии людий сих льстяше, и льстят, яко да поглотят я.
17 Сего ради о юношах их не возвеселится господь, и сирот их и вдовиц их не помилует: яко вси беззаконнии и лукавии, и всякая уста глаголют неправду. Во всех сих не отвратися ярость его, но еще рука его высока.
18 И разгорится яко огнь беззаконие, и яко троскот сухий пояден будет огнем, и разгорится в чащах дубравных и пояст, яже окрест холмов вся.
19 За ярость гнева господня сгоре вся земля, и будут людие яко огнем пожжени: человекъ брата своего не помилует,
20 но уклонится на десно, яко взалчет, и снесть от шуиих, и не насытится человекъ ядый плоти мышцы своея: снесть бо манассий ефремово, и ефрем манассиино, яко вкупе повоюют иуду.
21 Во всех сих не отвратися ярость (его), но еще рука его высока.
1 Горе пишущим лукавство: пишущии бо лукавство пишут,
2 укланяюще суд убогих, восхищающе судъ нищих людий моих, яко быти им вдовице в расхищение и сироте в разграбление.
3 И что сотворят в день посещения? скорбь бо вам отдалече приидет. И к кому прибегнете, да поможет вамъ? И где оставите славу вашу,
4 еже не впасти в пленение? И под убиеными падут. И во всех сих не отвратися гневъ его, но еще рука его высока.
5 Горе ассирием, жезл ярости моея и гнев есть в руку их.
6 Гнев мой послю на язык беззаконен, и своих людий повелю сотворити корысти и пленение, и попрати грады и положити я в прах.
7 Сей же не тако помысли и душею не тако возмне: но отступит ум его, и еже потребити языки не малы.
8 И аще рекут ему: ты ли еси единъ князь?
9 И речет: не взях ли страны, яже выше вавилона и халани, идеже столп создан, и взях аравию и дамаск и самарию?
10 якоже сия взях, и вся княжения возму. Возрыдайте, изваянная во иерусалиме и в самарии:
11 якоже бо сотворих самарии и рукотвореннымъ ея, тако сотворю и иерусалиму и кумиромъ его.
12 И будет, егда скончает господь вся творя в горе сиони и во иерусалиме, наведет на умъ великий, на князя ассирийска и на высоту славы очию его.
13 Рече бо: крепостию руки моея сотворю, и премудростию разума (моего) отиму пределы языков, и силу их пленю,
14 и сотрясу грады населеныя, и вселенную всю обыму рукою моею яко гнездо, и яко оставленая яица возму: и несть, иже убежитъ мене, или противу мне речет, и отверзетъ уста и глумит.
15 еда прославится секира без секущаго ею? или вознесется пила без влекущаго ю? Такожде аще кто возмет жезл, или древо: и не тако.
16 Но послет господь саваоф на твою честь безчестие, и на твою славу огнь горя возгорится.
17 И будет свет израилев во огнь, и освятитъ его огнем горящим, и пояст яко сено вещество.
18 В той день угаснут горы и холми и дубравы, и пояст от души даже до плотей: и будет бежай, яко бежай от пламене горяща:
19 и оставльшиися от них будут в число, и отроча малое напишет я.
20 И будет в той день, не приложится ктому останок израилев, и спасеннии иаковли не будутъ ктому уповающе на обидевшия их, но будутъ уповающе на бога святаго израилева истиною.
21 И обратится останок иаковль к богу крепкому.
22 И аще будут людие израилевы яко песокъ морский, останок их спасется:
23 слово бо совершая и сокращая правдою, яко слово сокращено сотворит господь во всей вселенней.
24 Сего ради сия глаголет господь саваоф: не бойтеся, людие мои, от ассириан, живущии в сионе, яко жезлом поразит тя: язву бо наводитъ на тя, еже видети путь египта.
25 еще бо мало, и престанет гнев, ярость же моя на совет их:
26 и воздвигнет бог сил на ня язву, яко язву мадиамлю на месте скорби, и ярость его на путь иже к морю, на путь иже во египет:
27 и будет в той день, отимется иго его от рамене твоего и страх его от тебе, и согниет иго от рамен ваших.
28 Приидет бо во град аггай, и прейдет въ магеддо, и в махмасе положит сосуды своя.
29 И минет дебрь, и приидет во аггай: страхъ приимет раму град саулов,
30 побегнет дщерь галимля, услышится въ лаисе, услышится во анафофе.
31 И ужасеся мадемина и живущии во гивиме.
32 утешайте днесь еже на пути пребыти: утешайте рукою гору дщерь сионю, и холми, иже во иерусалиме:
33 се, владыка господь саваоф смятет славныя со крепостию, и высоции укоризною сокрушатся, и высоцыи смирятся,
34 и падут высоцыи мечем, ливан же с высокими падется.
1 И изыдет жезл из корене иессеова, и цветъ от корене его взыдет:
2 и почиет на нем дух божий, дух премудрости и разума, дух совета и крепости, дух ведения и благочестия:
3 исполнит его дух страха божия: не бо славе судити имать, ниже по глаголанию обличит,
4 но судит правдою смиренному суд и обличитъ правостию смиренныя земли, и поразит землю словом уст своих и духом устен убиетъ нечестиваго:
5 и будет препоясан правдою о чреслех своихъ и истиною обвит по ребрам своим:
6 и пастися будут вкупе волк со агнцем, и рысь почиет со козлищем, и телец и юнецъ и лев вкупе пастися будут, и отроча мало поведет я:
7 и вол и медведь вкупе пастися будут, и вкупе дети их будут, и лев аки волъ ясти будет плевы:
8 и отроча младо на пещеры аспидов и на ложе исчадий аспидских руку возложит:
9 и не сотворят зла, ни возмогут погубити ни когоже на горе святей моей: яко наполнися вся земля ведения господня, аки вода многа покры море.
10 И будет в день оный корень иессеов, и востаяй владети языки, на того языцы уповати будут: и будет покой его честь.
11 И будет в день оный, приложит господь показати руку свою, еже возревновати по останку прочему людий, иже аще останет от ассириовъ и от египта, и вавилона и от ефиопии, и от еламитов и от востоков солнца, и от аравии и от островов морских.
12 И воздвигнет знамение в языки, и соберетъ погибшия израилевы, и расточенныя иудины соберетъ от четырех крил земли.
13 И отимется ревность ефремова, и врази иудины погибнут: ефрем не возревнует иуде, и иуда не оскорбит ефрема.
14 И полетят в кораблех иноплеменничих, море купно пленят, и сущих от восток солнца, и идумею: и на моава первее руки возложат, сынове же аммони первии покорятся.
15 И опустошит господь море египетское и возложитъ руку свою на реку духом пресильным: и поразитъ на седмь дебрий, якоже преходити ю во обувении:
16 и будет прошествие людем моим оставшимъ во египте, и будет израилю, якоже в день, егда изыде от земли египетския.
1 И речеши в день оный: благословлю тя, господи, яко разгневался еси на мя, и отвратилъ еси ярость твою (от мене), и помиловалъ мя еси.
2 Се, бог мой спас мой, уповая буду на него и не убоюся: зане слава моя и похвала моя господь, и бысть ми во спасние.
3 И почерпите воду со веселием от источникъ спасения.
4 И речеши в день оный: хвалите господа, воспойте имя его, возвестите во языцех славная его, поминайте, яко вознесеся имя его.
5 Хвалите имя господне, яко высокая сотвори: возвестите сия по всей земли.
6 Веселитеся и радуйтеся, живущии в сионе, яко вознесеся святый израилев посреде тебе.
1 Видение на вавилона, еже виде исаиа сынъ амосов.
2 На горе польней воздвигните знамение, вознесите глас им, не бойтеся, поущайте рукою, отверзите, князи.
3 Аз повелеваю, освященни суть: и аз веду их, исполини идут исполнити ярость мою радующеся, вкупе и укаряюще.
4 Глас языков многих на горах, подобенъ языков многих, глас царей и языков собравшихся: господь саваоф заповеда языку оружеборцу
5 приити от земли издалеча, от края основания небесе, господь и оружеборцы его, растлити всю вселенную.
6 Рыдайте: близ бо день господень, и сокрушение от бога приидет:
7 сего ради всяка рука разслабеет, и всяка душа человеча убоится,
8 и смятутся послы, и болезни приимут я яко жены раждающия: и поскорбят друг ко другу, и ужаснутся, и лице свое яко пламень изменят.
9 Се бо, день господень грядет неисцельный, ярости и гнева, положити вселенную (всю) пусту и грешники погубити от нея.
10 звезды бо небесныя и орион и все украшение небесное света своего не дадят, и помрачится солнце возсиявающее, и луна не даст света своего.
11 И заповем всей вселенней злая и нечестивымъ грехи их, и погублю укоризну беззаконныхъ и укоризну гордых смирю:
12 и будут оставшии честнии паче, нежели злато нежженое, и человек честен будет паче, нежели камень, иже от суфира.
13 Разъярится бо небо, и земля потрясется от оснований своих, за ярость гнева господа саваофа в день, в оньже приидет ярость его.
14 И будут оставшии яко серна бежащая и яко овца заблудившая, и не будет собираяй, яко человеку в люди своя возвратитися, и человек во страну свою побегнет.
15 Иже бо аще пленится, поразится, и иже собрани суть, мечем падут.
16 И чада их пред ними разбиют, и домы их пленят, и жены их поймут.
17 Се, аз возбуждаю на вы мидов, иже сребра не вменяют, ниже злата требуют:
18 стреляния юношеская сокрушат, и чадъ ваших не помилуют, ниже пощадят чад твоихъ очи их.
19 И будет вавилон, иже нарицается славный от царя халдейска, якоже разсыпа бог содому и гоморру,
20 не населится в вечное время, и не внидутъ в онь чрез многия роды, ниже пройдут его аравляне, ниже пастуси почиют в нем.
21 И почиют тамо зверие, и наполнятся домове шума, и почиют ту сирини, и беси тамо воспляшут,
22 и онокентавры тамо вселятся, и вогнездятся ежеве в домех их.
1 Скоро идет и не умедлит: и помилует господь иакова и изберет паки израиля, и почиют на земли своей, и пришлец приложится к ним и приложится к дому иаковлю,
2 и поймут их языцы и введут на место их, и наследят и умножатся на земли божии в рабы и рабыни: и будут пленени пленившии я, и обладани будут обладавшии ими.
3 И будет в той день, упокоит тя господь от болезни и ярости твоея и от работы жестокия, еюже работал еси им.
4 И приимеши плачь сей евр.: притчу сию. на царя вавилонска и речеши в той день: како преста истязуяй и преста понуждаяй?
5 Сокруши бог ярем грешников, ярем князей,
6 поразив язык яростию, язвою неисцельною, поражаяй язык язвою ярости, еюже не пощаде, почи уповающи.
7 Вся земля вопиет со веселием,
8 и древа ливанова возвеселишася о тебе и кедр ливанский: онележе ты уснул еси, не взыде посекаяй нас.
9 Ад доле огорчися, срет тя: восташа съ тобою вси исполини обладавшии землею, подвизавшии от престолов своих всех царей языческих.
10 Вси отвещают и рекут тебе: и ты плененъ еси, якоже и мы: и в нас вменен еси.
11 Сниде слава твоя во ад, многое веселие твое: под тобою постелют гнилость, и покровъ твой червь.
12 Како спаде с небесе денница восходящая заутра? сокрушися на земли посылаяй ко всем языком.
13 Ты же рекл еси во уме твоем: на небо взыду, выше звезд небесных поставлю престолъ мой, сяду на горе высоце, на горах высоких, яже к северу:
14 взыду выше облак, буду подобен вышнему.
15 ныне же во ад снидеши и во основания земли.
16 Видевшии тя удивятся о тебе и рекут: сей человек раздражаяй землю, потрясаяй цари,
17 положивый вселенную всю пусту и грады ея разсыпа, плененых не разреши.
18 Вси царие языков успоша в чести, кийждо в дому своем.
19 Ты же повержен будеши в горах, яко мертвецъ мерзкий со многими мертвецы изсечеными мечем, сходящими во ад.
20 якоже риза в крови намочена не будет чиста, такожде и ты не будеши чист, зане землю мою погубил еси и люди моя избил еси: не пребудеши в вечное время, семя злое.
21 уготови чада твоя на убиение грехами отца твоего, да востанут и наследят землю и наполнят землю ратьми.
22 И востану на ня, глаголет господь саваоф, и погублю имя их, и останок, и семя: сия глаголетъ господь.
23 И положу вавилона пуста, яко вогнездитися ежем, и будет ни во чтоже: и положу и брения пропасть в пагубу.
24 Сия глаголет господь саваоф: якоже глаголах, тако будет, и якоже совещах, тако пребудет,
25 еже погубити ассириан на земли моей и на горах моих: и будут в попрание, и отимется от них ярем их, и слава евр.: бремя. их от рамен их отимется.
26 Сей совет, егоже совеща господь на всю вселенную, и сия рука на вся языки вселенныя:
27 яже бо бог святый совеща, кто разоритъ? и руку его высокую кто отвратитъ?
28 В лето, в неже умре ахаз царь, бысть глагол сей:
29 не радуйтеся, вси иноплеменницы, сокрушися бо ярем биющаго вы: от семене бо змиина изыдутъ исчадия аспидов, и исчадия их изыдутъ змии парящии:
30 и упасутся убозии им, нищии же человецы в мире почиют: и потребит гладом семя твое, и останок твой избиет.
31 Восплачитеся, врата градов, да возопиют грады смятеннии, иноплеменницы вси, зане дым от севера идет, и несть, иже пребудет.
32 И что отвещают царие языковъ? яко господь основа сиона, и тем спасутся смиреннии людий его.
(Слово на моавитскую землю).
1 Нощию погибнет моавитска земля, нощию бо погибнетъ стена моавитская.
2 Плачитеся о себе, погибнет бо и дивон, идеже требище ваше: тамо взыдете плакатися над нававом моавитским. Плачитеся, на всяцей главе плешь, вся мышцы обсечены,
3 на стогнах его препояшитеся во вретища, и восплачитеся на храминах его и на улицахъ его и на стогнах его, вси возрыдайте съ плачем.
4 яко возопи есевон и елеала, даже до иассы услышася глас их: сего ради чресла моавитиды вопиют, душа ея увесть.
5 Сердце моавитиды вопиет в ней даже до сигора: юница бо есть трилетна. В возшествии же луифа к тебе плачущеся взыдут путем арониимлим: вопиет сотрение и трус.
6 Вода немримля пуста будет, и трава ея оскудеет: травы бо зелены не будет.
7 еда и сице спасется? наведу бо на дебрь аравлян, и возмут ю:
8 прейде бо вопль предел земли моавитския до агаллима, и плачь ея даже до кладязя елимля.
9 Вода бо димоня наполнится крове: наведу бо на димона аравляны, и возму семя моавле и ариилево и останок адаминь.
1 Послю аки гады на землю: еда камень пустъ есть гора дщере сиони послите агнцы владущему землею от камене пустыни к горе дщере сиони?
2 Будеши бо аки птицы парящия птенец отятый, дщи моавля, потом же арнон евр.: в прохождении арнона. множайше совещавай.
3 Сотворите покров плача ея присно: в полуденней тме бегут, ужаснушася: да не отведешися,
4 обитати будут в тебе беглецы моавли: будутъ в покровение вам от лица гонящаго, яко отяся помощь твоя, и князь погибе попираяй от земли.
5 И исправится с милостию престол, и сядетъ на нем со истиною во скинии давидове, судя и взыская суд и ускоряя правду.
6 Слышахом укоризну моавлю, укоритель (бысть) зело, гордыню отях: не тако волхвование твое, не тако.
7 Восплачется моав, в моавитиде бо вси восплачутся: живущим же в сефе помышления, и не усрамишися.
8 Поля есевоня возрыдают, виноград севамань: пожирающии языков, поперите винограды его, даже до иазира: не совокупитеся, обходите пустыню, посланнии осташася, проидоша бо море.
9 Сего ради восплачуся яко плачем иазировымъ о винограде севамани: древа твоя посече есевонъ и елиала, яко на жатву твою и на обымание вина поперу, и вся падутся.
10 И отимется радость и веселие от виноградов, и в виноградех твоих не возрадуются, и не изгнетут вина в точилех, престало бо есть:
11 сего ради чрево мое на моава аки гусли возгласит, и внутренняя моя аки стену обновилъ еси.
12 И будет в посрамление тебе, яко утрудися моав о требищих, и внидет в рукотворенная своя, да помолится, и не возмогут избавити его.
13 Сие слово еже глагола господь на моава, егда возглагола.
14 И ныне глаголю: в триех летех летъ наемника обезчестится слава моавля во всем богатстве мнозе, и оставится умален и нечестен.
(Слово, еже на дамаск).
1 Се, дамаск возмется от градов будет в падение.
2 оставлен в век, в ложе стадам и в покой, и не будет отгоняяй.
3 И ксему не будет укреплен, еже вбегнути тамо ефрему: и ксему не будет царство въ дамасце, и останок сирян погибнет: неси бо ты лучший от сынов израилевых и славы их: сия глаголет господь саваоф.
4 Будет в той день помрачение славы иаковли, и тучная славы его потрясутся.
5 И будет, якоже аще кто собирает жатву стоящую, и семя класов пожинает: и будет, якоже аще кто собирает класы в дебри тверде.
6 И останется в ней стеблие, или аки зерна маслична две или три на версе высоце, или четыре или пять на ветвии ея останут: сия глаголет господь бог израилев.
7 В той день уповая будет человек на сотворшаго и, и очи его ко святому израилеву воззрят,
8 и не будут уповающе на требища, ниже на дела рук своих, яже сотвориша персты их, и не будут смотрити на дубравы, ниже на мерзости их.
9 В той день будут гради твои оставлени, якоже оставиша аморрее и евее от лица сынов израилевых: и будут пусти,
10 зане оставил еси бога спаса твоего и господа помощника твоего не помянул еси: сего ради насадиши сад неверен и семя неверно.
11 В оньже бо день аще насадиши, прельстишися: а еже аще заутра посееши, то процвететъ на жатву, во оньже день наследиши, и аки отец человечь наследие даси сыном твоим.
12 о, люте множеству языков многихъ! аки море волнующееся, тако смятетеся, и хребет языковъ многих яко вода возшумит:
13 аки вода многа языцы мнози, аки (шумъ) воды многия нуждею носимыя: и отвержет его и далече поженет его, аки прах плевный веющих противу ветра, и яко прах колесный буря возносящая.
14 К вечеру, и будет плачь: прежде заутрия, и не будет: сия часть пленивших ны, и жребий наследивших нас.
1 Горе корабелным крилам земли, яже объ ону страну рек ефиопских.
2 Посылаяй по морю послы в залог и послания книжная верху воды: пойдут бо вестницы легцы ко языку высоку и к людем странным и строптивым. Кто далее ихъ? язык безнадежен и попран.
3 ныне реки земныя вся аки страна населена населится, страна их аки знамение от горы воздвигнется, аки глас трубы услышан будет.
4 яко тако ми рече господь: утверждение будетъ в моем граде, аки свет зноя полуденнаго и аки облак росный в день жатвы будет.
5 Прежде жатвы, егда совершится цвет, и грезн произыдет по цвете недозрел: и отиметъ гроздие малое серпами и лозие отимет и посечет,
6 и оставит вкупе птицам небесным и зверемъ земным: и соберутся на ня птицы небесныя, и вси зверие земли нань приидут.
7 В то время принесутся дары господу саваофу от людий оскорбленых и отторженых и от людий великих, отныне и в вечное время: языкъ надеющься и попран, иже есть в части речней страны своея, на место, идеже имя господа саваофа, на гору сионю.
(Видение на египта).
1 Се, господь седит на облаце легце и приидетъ во египет, и потрясутся рукотворенная египетская от лица его, и сердца их разслабнут въ них.
2 И востанут египтяне на египтяны, и вооружится человек на брата своего, и всяк на ближняго своего, востанет град на град и закон на закон.
3 И возмятется дух египтян в них, и советъ их разсыплю, и вопросят богов своих и кумировъ своих, и гласящих от земли и чревоволшебников.
4 И предам египет в руце человеков властелей жестоких, и царие жестоцы обладати будут ими: сия глаголет господь саваоф.
5 И испиют египтяне воду, яже при мори, а река оскудеет и изсхнет.
6 И оскудеют реки и ровенницы речнии: и изсхнет весь сонм водный, и во всяцемъ лузе тростнем и ситнем,
7 и злак зеленый весь иже окрест реки, и все сеемое при реце посхнет ветром растленно.
8 И возстенят рыбарие, и возстенят вси мещущии удицу в реку, и мещущии неводы и мещущии сети возрыдают.
9 И студ приимет делающих лен расчесаный и делающих виссон, и будут делающии я в болезни,
10 и вси творящии сикеру опечалятся и поболятъ душами.
11 И юродиви будут князи танесовы: мудрии царевы советницы, совет их объюродеет. Како речете царю: сынове смысленых мы, сынове царей древнихъ?
12 Где суть ныне мудрии твои, и да возвестятъ тебе и рекут: что совеща господь саваоф на египетъ?
13 оскудеша князи танесовы, и вознесошася князи мемфитстии, и прельстят египта по племеном.
14 господь бо раствори им дух прельщения, и прельстиша египта всеми делесы своими, якоже прельщается пияный и купно блюющь.
15 И не будет египтяном дела, еже бы сотворило главу и ошиб, и начало и конец.
16 В той день будут египтяне аки жены во страсе и трепете от лица руки господа саваофа, юже той возложит на ня.
17 И будет страна иудейска во страх египтяном: всяк, иже аще воспомянет ю им, убоятся совета ради, егоже совеща господь саваоф нань.
18 В той день будет пять градов во египте, глаголющих языком ханаанитским и кленущихся именем господа саваофа: град [аседекъ] прозовется един град.
19 В той день будет жертвенник господеви в земли египетстей и столп в пределех его господеви.
20 И будет в знамение во век господеви в земли египетстей: яко возопиют ко господу на оскорбляющия их, и послет им господь человека, иже спасетъ я, судяй спасет я.
21 И познан будет господь египтяном: и уведятъ египтяне господа в той день и сотворят жертвы и дары, и обещают обеты господеви и воздадят.
22 И поразит господь египтян язвою великою и исцелит их цельбою, и обратятся ко господеви, и услышит их и исцелит их цельбою.
23 В той день будет путь от египта ко ассирианом, и внидут ассириане во египет, и египтяне пойдут ко ассирианом, и поработают египтяне ассирианом.
24 В той день будет израиль третий во египтянехъ и во ассирианех, благословен на земли,
25 юже благослови господь саваоф, глаголя: благословени людие мои, иже во египте и иже во ассириах, и наследие мое израиль.
1 В лето, в неже вниде танафан во азот, егда послан бысть от арны, царя ассирийскаго, и воева на азот и взя его,
2 тогда рече господь ко исаии сыну амосову, глаголя: иди и сверзи вретище со чресл своих, и сандалия твоя иззуй с ног твоих, и сотвори сице, ходя наг и бос.
3 И рече господь: якоже ходил раб мой исаиа наг и бос три лета, три лета будут знамения и чудеса египтяном и ефиопляном:
4 яко такожде отведет царь ассирийск пленъ египетск и ефиопск, юноши и старцы, наги и босы, откровены во стыдение египту.
5 И постыдятся побеждени египтяне о ефиоплянех, на нихже уповаху египтяне, бяху бо имъ слава.
6 И рекут живущии на острове сем в день оный: се, мы бехом уповающе бежати к ним на помощь, иже не могоша спастися от царя ассирийска, и како мы спасемся?
(Видение пустыни).
1 якоже буря сквозе пустыню проходит, от пустыни исходящая из земли,
2 страшно видение и жестоко поведася мне: преступаяй преступает, и беззаконнуяй беззаконствует: на мя еламите, и послы персстии на мя идут: ныне воздохну и утешу себе.
3 Сего ради наполнишася чресла моя разслабления, и болезни прияша мя аки раждающую: неправдовахъ еже не слышати, потщахся еже не видети.
4 Сердце мое заблуждает, и беззаконие погружаетъ мя, душа моя стоит во страсе.
5 уготовите трапезу, ядите, пийте: воставше, князи, уготовите щиты,
6 яко тако рече господь ко мне: шед постави себе стража, и еже аще узриши, возвести.
7 И узрех всадники конныя два, всадника на осляти и всадника на велблюде. Послушай слушанием многимъ
8 и призови урию на стражбу господню. И рече: стоях выну день, и у полчища аз стояхъ всю нощь,
9 и се, сам грядет (мужъ) всадник двоконный, и отвещав рече: паде, паде вавилон, и вси кумиры его и вся рукотворенная его сокрушишася на земли.
10 Послушайте, оставшиися, и болезнующии, услышите: еже слышах от господа саваофа, бог израилевъ возвести нам.
(Видение на идумею).
11 Ко мне зови от сиира: стрегите забрала.
12 Стрегу заутра и нощию. Аще ищеши, ищи и у мене обитай.
13 В дубраве в вечер преспиши, или на пути деданове.
14 Во сретение жаждущему воду принесите, живущии во стране феманове, со хлебы сретайте бежащия множества ради убиенныхъ
15 и множества ради заблуждающих, и множества ради мечей и множества ради луков напряженных, и множества ради падших на сечи.
16 яко сице рече господь ко мне: еще лето (едино), якоже лето наемника, оскудеетъ слава сынов кидарских,
17 и останок луков сильных сынов кидарскихъ будет мал, яко господь бог израилев глагола.
(Видение дебри сиони).
1 Что бысть тебе, яко ныне возлезосте вси на храмины тщетныя?
2 Наполнися град вопиющих, уязвленнии твои не мечьми уязвлени, ниже мертвецы твои умерщвлени ратию:
3 вси князи твои побегоша, и плененнии жестоце суть связани, и крепцыи в тебе далече отбежаша.
4 Сего ради рекох: оставите мене, да горце восплачуся: не належите утешати мя о сокрушении дщере рода моего:
5 яко день мятежа и пагубы и попрания, и смятение от господа саваофа: в дебри сиони скитаются, от мала даже до велика скитаются по горам.
6 еламите же взяша тулы, и всадницы человецы на конех, и собор ополчения.
7 И будут избранны дебри твоя, наполнятся колесниц, конницы же заступят врата твоя
8 и открыют врата иудина, и воззрят в той день во избранныя домы града,
9 и открыют сокровенная домов краеградия давидова, и узрят, яко множайшии суть, и яко отвратиша воду древния купели во град,
10 и яко разориша домы иерусалимли на утверждение стене градней.
11 И сотвористе себе воду между двема стенама, внутрьуду купели древния, и не воззресте на сотворившаго ю исперва, и сограждшаго ю не видесте.
12 И призва господь, господь саваоф в той день плачь и рыдание, и острижение и препоясание во вретища:
13 тии же сотвориша радость и веселие, закалающе телцы и жруще овцы, яко ясти мяса и пити вино, глаголюще: да ямы и пием, утре бо умрем.
14 И откровенна сия суть во ушию господа саваофа, яко не оставится вам той грех, дондеже умрете.
15 Сице глаголет господь саваоф: иди в кущу ко сомнану строителю дому и рцы ему:
16 что ты зде, и что тебе зде, яко истесалъ еси себе зде гроб и сотворил еси себе на высоце гроб, и написал еси себе на камени кущу?
17 Се, ныне господь саваоф извержет и сотретъ мужа, и отимет утварь твою и венец твой славный,
18 и повержет тя во страну велику и безмерну, и тамо умреши: и положит колесницу твою добрую в безчестие и дом князя твоего в попрание:
19 и извержешися от строителства твоего и от степене твоего.
20 И будет в той день, и призову раба моего елиакима сына хелкиева
21 и облеку его во утварь твою, и венецъ твой дам ему и державу твою, и строителство твое дам в руце его, и будет яко отецъ живущим во иерусалиме и живущим во иудеи.
22 И дам ему славу давидову, и обвладеет, и не будет противоглаголющаго: и дам ему ключь дому давидова на рамо его, и отверзет, и не будет затворяющаго, и затворит, и не будетъ отверзающаго.
23 И поставлю его князя на месте верне, и будет на престоле славы дому отца своего.
24 И будет уповаяй на него всяк славный в дому отца его, от мала даже до велика: и будут зависяще на нем.
25 В той день, сия глаголет господь саваоф, подвигнется человек утвержден на месте верне, и отимется, и падет, и потребится слава, яже на нем, яко господь глагола.
(Видение на тира).
1 Плачитеся, корабли кархидонстии, яко погибе, и ктому не идут от земли китиейския, отведеся пленен.
2 Кому подобни быша живущии во острове, купцы финичестии, преходящии море?
3 В воде мнозе семя купеческо, аки жатве вносимей купцы язычестии.
4 усрамися, сидоне, рече море. Крепость же морская рече: не болех, ни породих, ни вскормихъ юнош, ниже вознесох девиц.
5 егда же слышано будет во египте, прииметъ я болезнь о тире.
6 Идите в кархидон, плачитеся, живущии во острове сем.
7 Не сие ли бе величание вам исперва, прежде неже предану быти ему?
8 Кто сия совеща на тира? еда хуждший есть, или не крепкий есть? купцы его славнии князи земли.
9 господь саваоф совеща разсыпати всякую гордыню славных и обезчестити всякое славное на земли.
10 Делай землю твою, ибо корабли ктому не приидут от кархидона.
11 И рука твоя ктому не укрепеет по морю, разгневляющая царей. господь саваоф заповеда о ханаане, еже погубити крепость его.
12 И рекут: ктому не приложите укаряти и обидети дщерь сидоню: и аще отидеши ко китииом, ниже тамо будет тебе покой:
13 и в землю халдейску, но и та опустела от ассириан, яко стена ея падеся.
14 Плачитеся, корабли кархидонстии, яко погибе твердыня ваша.
15 И будет в той день, оставлен будет тиръ седмьдесят лет, якоже время (единаго) царя, яко время человеческо: и по седмидесятихъ летех будет тир яко песнь блудницы.
16 Возми гусли, обыди град, блудница забвеная, добре погуди, много воспой, да память твоя будет.
17 И будет по седмидесятих летех, присещение сотворит бог тиру, и паки возставится на прежднее и будет торжище всем царствам вселенныя на лицы земли.
18 И будет его купля и мзда свято господеви, не им собрано будет, но живущим пред господем, вся купля его, ясти и пити и наполнитися, и в сытость, на память пред господем.
1 Се, господь разсыплет вселенную и опустошит ю, и открыет лице ея и расточит живущия на ней.
2 И будут людие аки жрец, и раб аки господин, и раба аки госпожа: будет купуяй яко продаяй, и взаим емляй аки заимодавец, и должный аки емуже есть должен.
3 Тлением истлеет земля, и расхищениемъ расхищена будет земля: уста бо господня глаголаша сия.
4 Восплакася земля, и растленна бысть вселенная, восплакашася высоцыи земли.
5 Земля бо беззаконие сотвори живущих ради на ней, понеже преступиша закон и измениша заповеди, разрушиша завет вечный.
6 Сего ради проклятие пояст землю, яко согрешиша живущии на ней: сего ради убози будут живущии на земли, и останется человеков мало.
7 Восплачется вино, возрыдает виноград, возстенутъ вси радующиися душею.
8 Престало есть веселие тимпанов, преста высокодерзость и богатство нечестивых, престалъ есть глас гуслей:
9 усрамишася, не пиша вина, горька бысть сикера пиющим.
10 опусте всяк град, заключит храм, еже не внити.
11 Плачитеся о вине всюду, престала есть радость вся земная, отиде вся радость земли.
12 И останут гради пусти, и домове оставлени погибнут.
13 Сия вся будут на земли среди языков: якоже аще кто отрясает масличину, тако отрясутъ их: и (якоже) аще останет от обымания винограда,
14 сии гласом возопиют: оставшиися же на земли возрадуются со славою господнею, возмятется вода морская.
15 Сего ради слава господня во островех будетъ морских, имя господне прославлено будет.
16 господи боже израилев, от крил земных чудеса слышахом, надежда благочестивому: и рекут: (горе хулящим, иже хулят закон,) горе преступником, иже преступают закон.
17 Страх и пропасть и сеть на вас живущихъ на земли.
18 И будет, бежай страха впадет в пропасть, и излазяй из пропасти имется в сеть: яко окна с небесе отверзошася, и потрясутся основания земная.
19 Мятежем возмятется земля, и скудостию оскудеетъ земля.
20 Преклонися и потрясеся земля аки овощное хранилище, и аки пиян и шумен падет и не возможет востати, преодоле бо на ней беззаконие.
21 И будет в той день, наведет господь на утварь небесную руку и на цари земныя.
22 И соберут собрание ея и затворят въ тверди и в темницы: мноземи роды будетъ посещение их.
23 И истает плинфа и падет стена, и устыдится луна и посрамится солнце: яко воцарится господь в сионе и во иерусалиме и пред старейшины славен будет.
1 Господи боже мой, прославлю тя, воспою имя твое, яко сотворил еси чудная дела, советъ древний истинный: да будет, господи.
2 яко положил еси грады в персть, грады твердыя, еже пасти основанием их, нечестивыхъ град да же созиждется во век.
3 Сего ради благословят тя людие нищии, и гради человеков обидимых возблагословят тя.
4 Был бо еси всякому граду смиренному помощник, и изнемогающим за оскудение покров, от человекъ злых избавиши их: покров жаждущих, и духъ человеков обидимых.
5 Аки человецы малодушнии жаждущии в сионе, яко избавиши их от человек нечестивых, имже нас предал еси.
6 И сотворит господь саваоф всем языком: на горе сей испиют радость, испиют вино,
7 помажутся миром на горе сей: предаждь сия вся языком: той бо совет на вся языки.
8 Пожре смерть евр.: пожерта будет смерть возмогши, и паки отят господь бог всякую слезу от всякаго лица: поношение людий отят от всея земли, уста бо господня глаголаша (сия).
9 И рекут в день оный: се, бог наш, наньже уповахом, и спасет нас: сей господь, потерпехомъ его, и возрадовахомся и возвеселихомся о спасении нашем.
10 Покой даст бог на горе сей, и поперется моавитида, якоже топчут ток колесницами.
11 И воздвигнет руце свои, якоже и той смири, еже погубити: и смирит гордыню его, на няже руце возложи.
12 И высоту убежища ограды твоея смирит, и обнизится даже до земли.
1 В той день воспоют песнь сию в земли иудейстей, глаголюще: се, град крепок, и спасение намъ положит стену и ограждение.
2 отверзите врата, да внидут людие хранящии правду и хранящии истину,
3 приемлющии истину и хранящии мир.
4 яко на тя надеянием надеяшася, господи, во век, боже великий, вечный,
5 иже смирив низвел еси живущия в высоких: грады крепкия разориши и обнизиши я даже до земли.
6 И поперут я ноги кротких и смиренных.
7 Путь благочестивых прав бысть, и приуготованъ путь благочестивых.
8 Путь бо господень суд: уповахом на имя твое и память, еяже желает душа наша.
9 от нощи утренюет дух мой к тебе, боже, зане свет повеления твоя на земли: правде научитеся, живущии на земли.
10 Преста бо нечестивый: всяк, иже не научится правде на земли, истины не сотворит: да возмется нечестивый, да не видит славы господни.
11 господи, высока твоя мышца, и не ведеша, разумевше же постыдятся: ревность приимет люди ненаказанныя, и ныне огнь супостаты пояст.
12 господи боже наш, мир даждь нам, вся бо воздалъ еси нам.
13 господи боже наш, стяжи ны: господи, разве тебе иного не вемы: имя твое именуем.
14 Мертвии же живота не имут видети, ниже врачеве воскресят: сего ради навел еси и погубил еси, и взял еси всяк мужескъ пол их.
15 Приложи им зла, господи, приложи зла славнымъ земли.
16 господи, в скорби помянухом тя, в скорби мале наказание твое нам.
17 И яко болящая приближается родити и въ болезни своей воскрича, тако быхом возлюбленному твоему.
18 Страха ради твоего, господи, во чреве прияхомъ и поболехом, и родихом дух спасния твоего, егоже сотворихом на земли: не падемся, но падутся вси живущии на земли.
19 Воскреснут мертвии и востанут иже во гробех, и возрадуются иже на земли: роса бо, яже от тебе, исцеление им есть, земля же нечестивыхъ падет.
20 Идите, людие мои, внидите во храмину вашу, затворите двери своя, укрыйтеся мало елико елико, дондеже мимоидет гнев господень.
21 Се бо, господь от святаго (места) наводит гневъ на живущия на земли: и открыет земля кровь свою и не покрыет избиеных.
1 В той день наведет господь мечь святый и великий и крепкий на драконта змиа бежаща, на драконта змиа лукаваго, и убиет драконта сущаго въ мори.
2 В той день виноград добрый, желание пети над ним:
3 аз град крепкий, град воюемый, всуе напою его: пленен бо будет нощию, в день же падется стена его: несть того, иже не возмет его.
4 Кто мя приставит стрещи стеблие на ниве? ради вражды сея отринух и. убо сего ради сотвори господь бог вся, елика совеща.
5 И сгорех, возопиют живущии в нем: сотворимъ мир ему, сотворим мир,
6 приходящая чада иаковля: прозябнет и процвететъ израиль, и наполнится вселенная плода его.
7 еда якоже той порази, и сам сице уязвится? и якоже сам уби, такожде убиен будетъ?
8 Сваряся и укоряя отпустит я: не ты ли был еси помышляя духом жестоким, убити я духом ярости?
9 Сего ради отимется беззаконие иаковле, и сие есть благословение его, егда отиму грех его, егда положат все камение требищъ сокрушено аки прах дробный: и не пребудутъ древеса их, и кумиры их будут посечени, аки дубрава далече.
10 обитающее стадо отпущенно будет, аки стадо оставленое: и будет много время в пажить, и тамо почиют стада.
11 И по времени не будет в нем всякаго злака, занеже изсхнет: жены грядущия с позорища, приидите: не суть бо людие имуще смысла, сего ради не ущедрит сотворивый я, ниже создавый их помилует.
12 И будет в той день, заградит господь о ровенника речнаго, даже до ринокоруры евр.: водотечи египетския. (града): вы же соберите сыны израилевы по единому.
13 И будет в той день, вострубят трубою великою, и приидут погубляемии во стране ассирийстей и погубляемии во египте, и поклонятся господеви на горе святей во иерусалиме.
1 Горе венцу гордыни, наимницы ефремовы, цветъ отпадый от славы, на версе горы тучныя пиянии без вина.
2 Се, крепка и жестока ярость господня, аки град низпущаемый не имый крова, насильно низпущаемый: якоже воды многое множество влекущее страну, земли сотворит покой рукама,
3 и ногама поперется венец гордыни, наимницы ефремовы.
4 И будет цвет отпадый от надежды славы на версе горы высокия, аки ранний плод смоквин: видевый его, прежде взятия в руце свои, восхощет поглотити его.
5 В той день будет господь саваоф венец надежди, сплетеный славою оставшимся людем.
6 И оставятся духом судным на суд, и крепость возбраняющих погубляти.
7 Сии бо вином суть прельщени: прельстишася сикеры ради, жрец и пророк изступиша ума от сикеры, пожерты быша вином, потрясошася от пиянства сикеры, прельстишася: сие есть привидение.
8 Проклятие пояст сей совет, сей бо советъ ради лихоимства.
9 Кому возвестихом злая и кому поведахомъ весть? иже отдоении (суть) от млека, отторженнии от сосца.
10 Печали на печаль ожидай, надежды к надежди, еще мало, еще мало,
11 яко худостию устен, языком инымъ возглаголют людем сим, рекуще им:
12 сей покой алчному и сие сокрушение, и не восхотеша слышати.
13 И будет им слово господа бога, печаль къ печали, надежда к надежди, еще мало, еще мало, да идут и падутся вспять и в беду впадут, и сокрушатся и пленени будут.
14 Сего ради услышите слово господне, мужие озлобленнии и князи людий сущих во иерусалиме.
15 яко рекосте: сотворихом завет со адомъ и со смертию сложение: буря носима аще мимоидет, не приидет на нас: положихом лжу надежду нашу и лжею покрыемся.
16 Сего ради тако глаголет господь: се, аз полагаю во основание сиону камень многоценен, избран, краеуголен, честен, во основание ему, и веруяй в онь не постыдится:
17 и положу суд в надежду, милость же моя на мерилех, и уповавшии вотще на лжу, яко не минет вас буря:
18 и не отимет от вас завета смертнаго, и надежда ваша, яже ко аду, не пребудет. Буря идущая аще найдет, будете ей в попрание:
19 егда мимоидет, возмет вас: яко по всяко утро преходити будет в день, и въ нощи будет надежда зла. Научитеся слышати, утесняемии:
20 не можем ратовати, сами же изнемогаем, еже собратися нам.
21 якоже гора на нечестивых востанет господь, и будет (якоже) в дебри гаваонстей, с яростию сотворит дела своя, горести дело: ярость же его чуждо употребится, и погубление его странно.
22 И вы не радуйтеся, ниже да возмогут ваши узы: зане скончаны и сокращены вещи слышахъ от господа саваофа, яже сотворит над всею землею.
23 Внушите и слышите глас мой, внемлите и слышите словеса моя.
24 еда весь день будет оряй орати? или семя уготовит прежде возделания земли?
25 Не егда ли умягчит уравнитъ лице ея, тогда всеет мало чернухи и кимина, потом же сеет пшеницу и ячмень и просо в пределех твоихъ?
26 И научишися суду бога твоего и возрадуешися.
27 Ибо не с жестокостию очищается чернуха, ниже коло колесничное обыдет кимина, но жезломъ истрясается чернуха, кимин же со хлебом снестся.
28 Не во век бо аз разгневаюся на вы, ниже глас гнева моего поперет вас.
29 И сия от господа саваофа изыдоша чудеса: советуйте, вознесите тщетное утешение.
1 Горе граду ариилу, наньже давид воева. Соберите жита от года до года, снесте бо вкупе с моавом:
2 озлоблю бо ариила, и будет крепость его и богатство мне:
3 и обсяду тя аки давид, и поставлю окрестъ тебе острог, и согражду столпы.
4 И смирятся словеса твоя до земли, и в землю внидут словеса твоя: и будет глас твой аки гласящих от земли, и ко земли изнеможет гласъ твой.
5 И будет яко персть от колесе богатство нечестивых, и аки прах летяй множество утесняющихъ тя, и будет аки черта внезапу от господа саваофа.
6 Присещение бо будет со громом и с трусомъ и гласом великим, буря несома и пламень огненный поядаяй.
7 И будет аки соние видяй во сне нощию, богатство всех языков, елицы воеваша на ариила, и вси, иже воеваша на иерусалима, и вси собраннии нань и озлобляющии его.
8 И будут аки во сне ядущии и пиющии, и воставшим, тощь их сон: и якоже во сне жаждай аки пияй, воспрянув же еще жаждет, душа же его вотще надеяся: тако будет богатство всех языков, елицы воеваша на гору сионю.
9 Разслабейте и ужаснитеся, и упийтеся не сикером, ни вином,
10 яко напои вас господь духом умиления, и смежит очи их и пророков их и князей их, видящих сокровенная.
11 И будут вам вся сия словеса, аки словеса книги запечатленныя сея, юже аще дадут человеку ведущему писания, глаголюще: прочти сие. И речет: не могу прочести, запечатленна бо.
12 И дастся книга сия в руце человеку не ведущему писания, и речется ему: прочти сие. И речет: не вем писания.
13 И рече господь: приближаются мне людие сии усты своими и устнами своими почитаютъ мя, сердце же их далече отстоит от мене: всуе же почитают мя, учаще заповедем человеческимъ и учением.
14 Сего ради се, аз приложу, еже преселити люди сия, и преставлю я, и погублю премудрость премудрых и разум разумных сокрыю.
15 Горе творящим глубоко совет, а не господем: горе в тайне совет творящим, и будут во тме дела их, и рекут: кто ны виде, и кто ны уразумеет, яже мы творимъ?
16 Не якоже ли брение скудельника вменитеся? еда речет здание создавшему е: не ты мя создал еси? или творение сотворшему: не разумно мя сотворил еси?
17 Не еще ли мало, и приложится ливан, аки гора хермель, и хермель в дубраву вменится?
18 И услышат в день оный глусии словеса книги (сея), и иже во тме и иже во мгле очи слепых узрят.
19 И возрадуются нищии ради господа в веселии, и отчаявшиися человецы исполнятся веселия.
20 Исчезе беззаконник, и погибе гордый, и потребишася вси беззаконнующии во злобе
21 и творящии согрешати человеки во слове: всем же обличающим во вратех претыкание положат, понеже совратиша в неправдах праведнаго.
22 Сего ради тако глаголет господь на дом иаковль, егоже определи от авраама: не ныне постыдится иаков, ниже ныне лице свое изменит израиль:
23 но егда увидят чада их дела моя, мене ради освятят имя мое и освятят святаго иаковля, и бога израилева убоятся.
24 И уразумеют заблуждающии духом смысл, и ропщущии научатся послушати, и языцы немотствующии научатся глаголати мир.
1 Горе, чада отступившая, сия глаголет господь: сотвористе совет не мною и заветы не духом моим, приложити грехи ко грехом:
2 идущии снити во египет, мене же не вопросиша, еже помощь имети от фараона и заступление от египтян.
3 Будет бо вам покров фараонов в постыдение и уповающим на египет укоризна:
4 яко суть в тане старейшины его, и вестницы его зли.
5 Вотще потрудятся людий ради, иже не упользуютъ их, ниже на помощь, ниже на пользу, но на студъ и на укоризну.
(Видение четвероногих, иже в пустыни).
6 В печали и в тесноте лев и львичищь: оттуду аспиды и племя аспидов парящих, иже везяху на ослех и на велблюдех богатство свое ко языку, иже не поможет им в помощь, но на студ и укоризну.
7 египтяне вотще и всуе успеют вам: возвести им, яко тщетно утешение ваше сие.
8 ныне убо сед напиши сия на дске и в книгу: яко будут сия во дни времен и даже до века.
9 яко людие непокориви суть, сынове лживии, иже не похотеша слышати закона божия,
10 глаголюще пророком: не поведайте нам: и видения видящим: не глаголите нам, но намъ глаголите и возвещайте нам иное прельщение
11 и совратите нас с пути сего: отимите от нас путь сей и отимите от нас суд израилевъ евр.: святое израилево..
12 Того ради сице глаголет господь святый израилев: понеже не покористеся словесем сим и надеястеся на лжу, и яко пороптасте и уповающе бысте на слово сие,
13 сего ради будет вам грех сей, аки стена падающая внезапу града тверда пленена, егоже абие настоит падение:
14 и падение его будет яко сокрушение сосуда глиняна, от глины дробны, яко не можно обрести в них чрепа, имже огнь возмеши и в оньже влиеши воды мало.
15 Тако глаголет господь, господь святый израилев: егда возвратився воздохнеши, тогда спасешися и уразумееши, где еси был: егда уповал еси на суетная, тщетна крепость ваша бысть, и не хотесте послушати,
16 но рекосте: на конех побегнем. Того ради побегнете. И рекосте: на легких всадницы будем. Того ради легцы будут гонящии вас.
17 от гласа единаго побегнут тысяща, и от гласа пяти побегнут мнози, дондеже оставлени будете аки щогла на горе и яко знамя носяй на холме.
18 И паки пождет бог, еже ущедрити вас, и сего ради вознесется еже помиловати вас: зане судия господь бог ваш есть, и где оставите славу вашу? блажени вси пребывающии в нем.
19 Зане людие святии в сионе вселятся, иерусалимъ же плачем восплакася: помилуй мя. Помилует тя, егда узре глас вопля твоего, послуша тебе.
20 И даст господь вам хлеб печали и воду тесную, и ктому не приближатся к тебе льстящии тя: яко очи твои узрят прельщающихъ тя,
21 и ушеса твоя услышат словеса созади тебе прельщающих, иже глаголют: сей путь, поидим по нему или на десно, или на лево.
22 И отвержеши кумиры посребренныя, и позлащенныя раздробиши, и развееши яко воду жены месячныя, и аки мотыла отвержеши я.
23 Тогда будет дождь семени земли твоея, и хлеб жита земли твоея будет изобиленъ и тучен, и напасутся скоти твои в той день на месте тучне и пространне.
24 Юнцы ваши и волове делающии землю наядятся плев смешенных со ячменем извеяным.
25 И будет на всяцей горе высоце и на всяцемъ холме вознесенне вода текущая в день оный, егда погибнут мнози, и егда падутся столпи:
26 и будет свет луны аки свет солнца, и свет солнечный будет седмерицею в той день, егда исцелит господь сокрушение людий своихъ и болезнь язвы твоея исцелит.
27 Се, имя господне идет временем многим, горящая ярость его: со славою слово устенъ его, слово гнева полно, и гнев ярости яко огнь пояст:
28 и дух его аки вода в дебри влекущи приидет даже до выи и разделится, еже смутити языки о прельщении суетнем, и поженет я прелесть тща, и возмет я пред лицем их.
29 еда присно подобает вам радоватися и входити во святая моя всегда, аки празднующимъ и яко веселящимся внити со сопелию в гору господню к богу израилеву?
30 И слышану сотворит господь славу гласа своего, и ярость мышцы своея показати, с яростию и гневом, и со пламенем поядающим возгремитъ зелно, и яко вода и град низходящь нуждею.
31 Гласом бо господним побеждени будут ассириане язвою, еюже аще поразит я.
32 И будет ему окрест, отонудуже бе их надежда помощи, на нюже той уповаше: тии со тимпаны и гусльми ратовати будут нань от пременения.
33 Ты бо прежде дний истязан будеши: еда и тебе уготовася царствовати? дебрь глубокую, древеса лежаща, огнь и древа многа, ярость господня аки дебрь жупелом горящая.
1 Горе сходящим во египет помощи ради, уповающимъ на кони и на колесницы: суть бо многа, и конническое множество много зело: и не беша уповающе на святаго израилева, и бога не взыскаша.
2 Тойже премудре наведе на них злая, и слово его не отринется, и востанет на домы человековъ злых и на надежду их тщетную,
3 египтянина человека, а не бога, конски плоти, и не будет помощи: господь же наведет руку свою на ня, и утрудятся помагающии, и вси вкупе погибнут.
4 Занеже тако рече мне господь: якоже возреветъ лев, или львичищь о ловитве, юже имет, и возопиет над нею, дондеже наполнятся горы гласа его, и победишася и множества ярости убояшася: тако господь саваоф снидет на гору сионю и на горы его воевати.
5 якоже птицы парящия, сице защитит господь саваоф о иерусалиме, защитит и избавит, и снабдит и спасет.
6 обратитеся, совещавающии глубок совет и беззаконен, сынове израилевы:
7 яко в той день отвергут человецы рукотворенная своя сребряная и рукотворенная златая, яже сотвориша руки их.
8 И падет ассур не мечем человеческим, ни мечь мужеский пояст его, и побегнетъ не от лица меча: юноты же будут в побеждение.
9 Камением бо обымутся яко острогомъ и побеждени будут, а бежай пленен будет. Сия глаголет господь: (блажен,) иже имеет племя в сионе и южики во иерусалиме.
1 Се бо, царь праведный воцарится, и князи со судомъ владети начнут.
2 И будет человек сокрываяй словеса своя, и скрыется, аки от воды носимыя: и явится в сионе яко река текущая славная в земли жаждущей.
3 И ксему не будут уповающе на человеки, но уши вдадят на слышание,
4 и сердце изнемогших вонмет послушати, и языцы немотствующии скоро научатся глаголати мир:
5 и ксему не рекут юродивому владети, и ксему не рекут слуги твои: молчи.
6 Юрод бо юродивая изречет, и сердце его тщетная уразумеет, еже совершати беззаконная и глаголати на господа прелесть, еже растлити души алчныя и души жаждущия тщи сотворити.
7 Совет бо злых беззаконная совещавает, растлити смиренныя словесы неправедными и разсыпати словеса смиренных на суде.
8 Благочестивии же смысленне совещаша, и той совет пребудет.
9 Жены богатыя, востаните и услышите гласъ мой: дщери, с надеждею слышите словеса моя:
10 дня летняго память сотворите в болезни с надеждею: потребися обымание винное, преста сеяние, и (собирание) ктому не приидет.
11 ужаснитеся, сжалитеся, уповавшия, совлецытеся, наги будите, препояшите чресла своя во вретища
12 и в перси бийтеся о селе желаемем и о винограднем рождении.
13 На земли людий моих терние и былие возникнет, и от всего дому радость восхитится: град богат,
14 домове оставленнии, богатство града и домы вожделения оставят: и будут веси пещеры до века, радость ослом дивиим, паствы пастухов:
15 дондеже найдет на ны дух от вышняго, и будет пустыня в хермель, а хермель в дубраву вменится.
16 И почиет в пустыни суд, и правда в кармиле вселится:
17 и будут дела правды мир, и одержитъ правда покой, и уповающе будут до века:
18 и вселятся людие его во граде мира и обитати будут уповающе, и почиют с богатством.
19 Град же, аще снидет, то не на вы приидет: и будут живущии в дубравах уповающе, якоже сущии на полях.
20 Блажени сеющии при всяцей воде, идеже вол и осел попирает.
1 Горе обидящим васъ! вас никтоже изобидит, и отвергаяй вас не отвержет: пленени будутъ отметающии (васъ) и предадятся, и яко молие в ризе, тако побеждени будут.
2 господи, помилуй ны, на тя бо уповахом: бысть племя непокаряющихся в пагубу, спасние же наше во время печали.
3 Гласом страха твоего ужасошася людие от страха твоего, и разсеяшася языцы.
4 ныне же соберутся корысти ваша малаго и великаго: якоже аще кто соберет пруги, тако наругаются вам.
5 свят бог живый в вышних, наполнися сионъ суда и правды.
6 В законе предадятся, в сокровищих спасние наше, тамо премудрость и хитрость и благочестие ко господеви: сия суть сокровища правды.
7 Се, ныне во страсе вашем тии убоятся: ихже боястеся, возопиют от вас: вестницы бо послани будут горце плачущеся, просяще мира.
8 опустеют бо сих путие: преста страх языков, и завет иже к ним вземлется, и не вмените их в человеки.
9 Восплакася земля, посрамлен ливан, блато бысть саронь: явлена будет галилеа и хермель.
10 ныне воскресну, глаголет господь, ныне прославлюся, ныне вознесуся.
11 ныне узрите, ныне ощутите, тщетна будетъ крепость духа вашего: огнь вы пояст.
12 И будут языцы пожжени, аки терние на ниве разметано и пожжено.
13 услышат дальнии, яже сотворих, (глаголетъ господь,) уведят приближающиися крепость мою.
14 отступиша, иже в сионе, беззаконницы, прииметъ трепет нечестивыя: кто возвестит вам, яко огнь горитъ? кто возвестит вам место вечное?
15 Ходяй в правде, глаголяй правый путь, ненавидяй беззакония и неправды и руце оттрясаяй от даров: отягчаваяй уши, да не услышитъ суда крове: смежаяй очи, да не узрит неправды,
16 сей вселится во высоце пещере камене крепкаго: хлеб ему дастся, и вода его верна.
17 царя со славою узрите, и очи ваши узрят землю издалеча,
18 душа ваша поучится страху господню: где суть книгочии? где суть совещавающии? где есть исчитаяй питаемыя малы и велики люди?
19 Имже не совещаше, ниже ведяше глубокий глас имущаго, яко не слышати людем уничтоженым, и несть слышащему смысла.
20 Се, сион град, спасение наше, очи твои узрят, иерусалиме, граде богатый, кущи не поколеблются, ниже подвигнутся колие храмины его в вечное время, и ужя его не преторгнутся.
21 яко имя господне велико вам есть, место вам будет, реки и ровенницы широцы и пространни: не пойдеши по сему пути, ниже пойдет корабль пловущь:
22 бог бо мой велик есть: не минет мене господь судия наш, господь князь наш, господь царь наш, господь той нас спасет.
23 Прервашася ужя твоя, яко не укрепишася: щогла твоя преклонися, не распустит ветрил, не воздвигнет знамения, дондеже предастся на пленение: темже мнози хромии плен сотворят,
24 и не рекут: труждаемся, людие живущии въ них, оставися бо им грех.
1 Приступите, языцы, и услышите, князи: да слышит земля и живущии на ней, вселенная и людие, иже на ней.
2 Зане ярость господня на вся языки и гневъ на число их, еже погубити их и предати я на заклание.
3 И язвении их повергнутся и мертвецы, и взыдет их смрад, и намокнут горы кровию их:
4 и истают вся силы небесныя, и свиется небо аки свиток, и вся звезды спадут яко листвие с лозы, и якоже спадает листвие смоковницы.
5 упися мечь мой на небеси: се, на идумею снидет и на люди пагубныя с судом.
6 Мечь господень наполнися крове, растолсте туком, от крове козлов и агнцев и от тука козловъ и овнов: яко жертва господеви в восоре, и заклание велие во идумеи.
7 И падут с ними сильнии, и овны и юнцы, и упиется земля от крове и от тука ихъ насытится:
8 день бо суда господня, и лето воздаяния суда сионя.
9 И обратятся дебри его в смолу, и земля его в жупел,
10 и будет земля его горящи яко смола днем и нощию, и не угаснет в вечное время, и взыдет дым ея высоце, в роды своя опустеет.
11 И во время много птицы и ежеве, совы и вранове возгнездятся в нем: и возложатъ нань уже землемерно пустыни, и онокентаври вселятся в нем.
12 Князи его не будут: царие бо и вельможи его будут в пагубу.
13 И возникнут во градех их терновая древеса и во твердынех его, и будут селения сириномъ селища струфионом:
14 и срящутся беси со онокентавры и возопиютъ друг ко другу, ту почиют онокентаври, обретше себе покоища:
15 тамо возгнездится ежь, и сохранит земля дети его со утверждением: тамо елени сретошася и увидеша лица друг друга.
16 Числом преидоша, и един от них не погибе, друг друга не взыска, яко господь заповеда им, и дух его собра я.
17 И той вержет им жребия, и рука его раздели пастися: в вечное время наследите, в роды родов почиют в нем.
1 Радуйся, пустыня жаждущая, да веселится пустыня и да цветет яко крин.
2 И процветет и возвеселится пустыня иорданова: и слава ливанова дадеся ей, и честь кармилова, и узрят людие мои славу господню и высоту божию.
3 укрепитеся, руце ослабленыя и колена разслабленая:
4 утешитеся, малодушнии умом, укрепитеся, не бойтеся: се, бог наш суд воздает и воздаст, той приидет и спасет нас.
5 Тогда отверзутся очи слепых, и уши глухих услышат.
6 Тогда скочит хромый яко елень, и ясенъ будет язык гугнивых: яко проторжеся вода в пустыни и дебрь в земли жаждущей.
7 И безводная будет во езера, и на жаждущей земли источник водный будет: тамо будет веселие птицам, и селитва трости, и лузи.
8 И тамо будет путь чист, и путь свят наречется: и не прейдет тамо нечистый, ниже будет тамо путь нечист: разсеяннии же пойдут по нему и не заблудят.
9 И не будет тамо льва, ни от зверей злыхъ не взыдет нань, ниже обрящется тамо, но пойдутъ по нему избавленнии:
10 и собраннии господем обратятся и приидутъ в сион с радостию, и радость вечная надъ главою их: над главою бо их хвала и веселие, и радость приимет я, отбеже болезнь и печаль и воздыхание.
1 И бысть во четвертоенадесять лето царствующу езекии, взыде сеннахирим царь ассирийскъ на грады тверды иудейски и взя оныя.
2 И посла царь ассирийск рапсака от лахиса во иерусалим ко царю езекии с силою великою, и ста у водоважды купели вышния на пути села кнафеова белилнича.
3 И изыде к нему елиаким сын хелкиевъ домостроитель, и сомнас книгочий, и иоах сынъ асафов памятописец.
4 И рече им рапсак: рцыте езекии: сия глаголет царь великий, царь ассирийск: на что уповаеши?
5 еда советом и словесы устными битва бываетъ? и ныне на кого уповаеши, яко не покаряешися мне?
6 се, уповаеши на жезл тростян сокрушенный сей, на египет, на негоже аще опрется муж, внидет в руку его и прободет ю: тако есть фараон царь египетский, и вси уповающии на него:
7 аще же глаголете, на господа бога нашего уповаем: не сей ли есть, егоже разори езекиа высокая и требища его, и заповеда иуде и иерусалиму: пред олтарем сим поклонитеся?
8 ныне соединитеся господину моему царю ассирийску, и дам вам две тысящи коней, аще можете дати вседающия на них:
9 и како можете отвратити лице воеводы единаго? раби суть, иже уповают на египтян, на коней и всадников:
10 и ныне еда без господа приидохом на страну сию, воевати на ню? господь рече ко мне: взыди на землю сию и погуби ю.
11 И рече к нему елиаким и сомнас книгочий и иоах: глаголи к рабом твоим сирски, разумеемъ бо мы, а не глаголи к нам иудейски: и вскую глаголеши во уши человеком седящим на стене?
12 И рече к ним рапсак: еда ко господину вашему, или к вам посла мя господин мой глаголати словеса сия? не к человеком ли седящим на ограде, да ядят мотыла и пиют мочь с вами вкупе?
13 И ста рапсак, и возопи гласом велиимъ иудейски и рече: слышите словеса царя великаго, царя ассирийска:
14 сия глаголет царь: да не прельщает васъ езекиа словесы, не может избавити вас:
15 и да не глаголет вам езекиа, яко избавитъ вы бог, и не предастся град сей в руце царя ассирийска:
16 не слушайте езекии: сия глаголет царь ассирийский: аще хощете благословени быти, изыдите ко мне и ядите кийждо виноград свой и смокви, и пийте от потока вашего,
17 дондеже прииду и поиму вы в землю, яже аки ваша земля, земля пшеницы и вина и хлебовъ и виноградов:
18 да не прельщает вас езекиа, глаголя: богъ ваш избавит вы: еда избавиша бози язычестии, кийждо страну свою от руки царя ассирийска?
19 где есть бог емафов и арфафовъ? и где бог града сепфарима? еда возмогоша избавити самарию от руки моея?
20 кто от богов всех языков сих, иже избави землю свою от руки моея, яко избавитъ бог иерусалима от руки моея?
21 И умолкоша, и никтоже отвеща ему словесе, повеления ради царева, да никтоже отвещает.
22 И вниде елиаким сын хелкиев домостроитель, и сомнас книгочий силы, и иоах сын асафовъ памятописец ко езекии в растерзаных ризахъ и поведаша ему словеса рапсакова.
1 И бысть егда услыша царь езекиа, растерза ризы и облечеся во вретище и вниде во храмъ господень:
2 и посла елиакима домостроителя, и сомну книгочия, и старейшины жречески оболчены во вретища ко исаии пророку сыну амосову.
3 И рекоша ему: сия глаголет езекиа: день печали и укоризны и обличения и гнева днешний день, понеже прииде болезнь раждающей, крепости же не имеет родити:
4 да услышит господь бог твой словеса рапсакова, яже посла царь ассирийский, господин его, укаряти бога живаго и поносити словесы, яже слыша господь бог твой, и да помолишися ко господеви богу твоему о оставшихся сих.
5 И приидоша отроцы царя езекии ко исаии.
6 И рече им исаиа: сице рцыте ко господину вашему: сия глаголет господь: не убойся от словес, яже еси слышал, имиже укориша мя послы царя ассирийска:
7 се, аз вложу в него дух, и услышавъ весть возвратится во страну свою и падет мечемъ на своей земли.
8 И возвратися рапсак и обрете царя ассирийскаго облежаща ловну: и услыша царь ассирийск, яко отиде от лахиса,
9 и изыде фарака царь ефиопский воевати нань: и услышав возвратися и посла послы ко езекии, глаголя:
10 сице рцыте езекии царю иудейску: да не прельщает бог твой тебе, на негоже уповая еси, глаголя, яко не предастся иерусалимъ в руце царя ассирийска:
11 или не слышал еси ты, что сотвориша царие ассирийстии, како всю землю погубиша, и ты ли избавишися?
12 еда избавиша сих бози язычестии, ихже погубиша отцы мои, гозан и харран и расем, иже суть во стране феемафи?
13 где суть царие емафовы, и где арфафовы, и где града епфаруема, анагугана?
14 И взя езекиа книгу от послов и прочте ю, и вниде во храм господень и отверзе ю предъ господем.
15 И помолися езекиа ко господеви, глаголя:
16 господи саваоф, боже израилев, седяй на херувимех, ты еси бог един царь всякаго царства вселенныя, ты сотворил еси небо и землю:
17 приклони, господи, ухо твое, услыши, господи, отверзи, господи, очи твои, призри, господи, и виждь и слыши вся словеса сеннахиримля, яже посла укаряти бога живаго:
18 поистинне бо, господи, пусту сотвориша царие ассирийстии всю землю и страны их,
19 и ввергоша кумиры их во огнь, не беша бо бози, но дела рук человеческих, древа и камение, и погубиша я:
20 ныне же, господи боже наш, спаси ны от руки их, да уведят вся царствия земная, яко ты еси (господь) бог един.
21 И послан бысть исаиа сын амосов ко езекии и рече ему: сия глаголет господь бог израилев: слышах, о нихже молился еси ко мне о сеннахириме цари ассирийстем.
22 Сие слово, еже глагола о нем бог: похули тя и поругася тебе девица дщи сионя, на тя главою покива дщи иерусалимля:
23 кого укорил и разгневал еси? или к кому возвысил еси глас твой, и не воздвиглъ еси на высоту очес твоихъ? ко святому израилеву!
24 яко послами укорил еси господа, ты бо рекл еси: множеством колесниц аз взыдохъ на высоту гор и на последняя ливана, и посекохъ высоту кедра его и доброту кипарисову, и внидох в высоту части дубравныя
25 и положих мост, и опустоших воды и все собрание водное:
26 не слышал ли еси издревле сих, яже аз сотворихъ? от древних дний совещах, ныне же показах опустошити языки в твердынех и живущия во твердых градех:
27 опустих руце, и изсхоша и быша аки сухо сено на кровех и аки троскот:
28 ныне же покой твой и исход твой и входъ твой аз вем,
29 ярость же твоя, еюже разгневался еси, и огорчение твое взыде ко мне, и вложу брозду в ноздри твоя и узду во уста твоя, и возвращу тя путем, имже еси пришел.
30 Сие же тебе знамение: яждь сего лета, еже еси всеял, а во второе лето, еже от себе растет: а в третие насеявше пожнете и насадите винограды и снесте плоды их:
31 и будут оставшии во иудеи, прорастят корение долу и сотворят в верх плод,
32 яко от иерусалима будут оставшиися и спасшиися от горы сиони: ревность господа саваофа сотворит сия.
33 Сего ради тако глаголет господь на царя ассирийска: не внидет в сей град, ниже пустит нань стрелу, ниже возложит нань щита, ниже оградит окрестъ его ограждения:
34 но путем, имже прииде, темже возвратится, и во град сей не внидет. Сия глаголет господь:
35 защищу град сей, еже спасти его мене ради и ради давида раба моего.
36 И изыде ангел господень и изби от полка ассирийска сто осмьдесят пять тысящ. И воставше заутра, обретоша вся телеса мертва.
37 И отиде возвращься сеннахирим царь ассирийский и вселися во ниневии.
38 И внегда покланятися ему в дому насараху отечествоначалнику своему, адрамелех и сарасаръ сынове его убиста его мечьми, сами же убежаста во армению. И воцарися асорданъ сын его вместо его.
1 Бысть же в то время, разболеся езекиа до смерти. И прииде к нему исаиа пророк сынъ амосов и рече к нему: сия глаголет господь: устрой о доме твоем, умираеши бо ты и не будеши жив.
2 И обрати езекиа лице свое ко стене и помолися ко господеви глаголя:
3 помяни, господь, како ходих пред тобою со истиною и сердцем истинным, и угодная пред тобою сотворих. И плакася езекиа плачем великим.
4 И бысть слово господне ко исаии глаголя:
5 иди и рцы езекии: тако глаголет господь богъ давида отца твоего: услышах молитву твою и видех слезы твоя, се, прилагаю к летомъ твоим лет пятьнадесять,
6 и от руки царя ассирийска избавлю тя и град сей, и защищу о граде сем:
7 сие же тебе знамение от господа, яко богъ сотворит глагол сей, якоже глагола:
8 се, аз возвращу сень степеней, имиже сниде солнце десять степеней дому отца твоего, возвращу солнце десять степеней, имиже сниде сень. И взыде солнце десять степеней, имиже сниде сень.
9. (Молитва езекии царя иудейска, егда боле и воста от недуга своего).
10 Аз рекох в высоте дний моих: пойду во врата адова, оставлю лета прочая.
11 Рекох: ктому не узрю спасния божия на земли живых, ктому не узрю спасния израилева на земли, ктому не узрю человека со живущими:
12 остах от сродства моего, оставих прочее живота моего, изыде и отиде от мене аки разрушаяй кущу поткнувый: аки платно дух мой во мне бысть, ткателнице приближающейся отрезати.
13 В той день предан бых до заутра аки льву, тако сокруши вся кости моя: от дне бо до нощи предан бых.
14 яко ластовица, тако возопию, и яко голубь, тако поучуся: исчезосте бо очи мои, еже взирати на высоту небесную ко господу, иже избави мя и отя болезнь души моея:
15 и той сотвори путеводство во вся лета моя.
16 господи, о той бо возвестися тебе, и воздвиглъ еси дыхание мое, и утешився ожих.
17 Избавил бо еси душу мою, да не погибнет, и завергл еси за мя вся грехи моя.
18 Не похвалят бо тебе, иже во аде, ни умершии возблагословят тя, и не надеются, иже во аде, милости твоея.
19 Живии же возблагословят тя, якоже и аз: отднесь бо дети сотворю, яже возвестят правду твою,
20 господи спасния моего: и не престану благословя тя с песнию вся дни живота моего прямо дому божию.
21 И рече исаиа ко езекии: возми от смоквий и сотри, и приложи пластырь на язву и здравъ будеши.
22 И рече езекиа: сие знамение, яко взыду в дом божий.
1 В то время посла меродах валадан сын валаданов, царь вавилонский, писания и послы и дары езекии: слыша бо, яко болел есть до смерти и воста.
2 И обрадовася о них езекиа радостию великою, и показа им дом ароматов и мира, и стакти и фимиама, и сребра и злата, и вся домы сосудовъ сокровищных, и вся елика бяху во сокровищихъ его: и не оста ничтоже, егоже не показа им езекиа в дому своем и во всей области своей.
3 И прииде исаиа пророк ко езекии царю и рече к нему: что глаголют сии мужие, и откуду приидоша к тебе? И рече езекиа: от земли далекия приидоша ко мне, от вавилона.
4 И рече исаиа: что видеша в дому твоемъ? И рече езекиа: вся, елика в дому моем, видеша, и несть в дому моем, егоже бы не видели, но и яже в сокровищих моих.
5 И рече ему исаиа: послушай словесе господа саваофа:
6 се, дние грядут, глаголет господь, и возмут вся, яже в дому твоем, и елика собраша отцы твои даже до дне сего, в вавилон прейдут, и ничесоже оставят:
7 рече господь, яко и от чад твоих, ихже родил еси, поймут и сотворят каженики въ дому царя вавилонска.
8 И рече езекиа ко исаии: благо слово господне, еже глагола: да будет ныне мир и правда во дни моя.
1 Утешайте, утешайте люди моя, глаголет бог:
2 священницы, глаголите в сердце иерусалиму, утешайте и, яко наполнися смирение его, разрешися грех его, яко прият от руки господни сугубы грехи своя.
3 Глас вопиющаго в пустыни: уготовайте путь господень, правы сотворите стези бога нашего:
4 всяка дебрь наполнится, и всяка гора и холмъ смирится, и будут вся стропотная в право, и острая в пути гладки.
5 И явится слава господня, и узрит всяка плоть спасние божие, яко господь глагола.
6 Глас вопиющаго: возопий. И рекох: что возопию? всяка плоть сено, и всяка слава человеча яко цвет травный:
7 изсше трава, и цвет отпаде,
8 глагол же бога нашего пребывает во веки.
9 На гору высоку взыди, благовествуяй сиону, возвыси крепостию глас твой, благовествуяй иерусалиму: возвысите, не бойтеся. Рцы градомъ иудиным:
10 се, бог ваш, се, господь, господь со крепостию идет, и мышца его со властию: се, мзда его с ним, и дело его пред ним:
11 аки пастырь упасет паству свою, и мышцею своею соберет агнцы, и имущия во утробе утешит.
12 Кто измери горстию воду и небо пядию и всю землю горстию? кто постави горы в мериле и холмы в весе?
13 кто уразуме ум господень, и кто советникъ ему бысть, иже научает его?
14 или с ким советова, и настави и? или кто показа ему судъ? или путь разумения кто показа ему? или кто прежде даде ему, и воздастся ему?
15 Аще вси языцы, аки капля от кади, и яко претяжение веса вменишася, и аки плюновение вменятся?
16 Дубрава же ливанова не доволна на сожжение, и вся четвероногая не доволна на всесожжение.
17 И вси языцы яко ничтоже суть, и в ничтоже вменишася.
18 Кому уподобисте господа, и коему подобию уподобисте его?
19 еда образ сотвори древоделатель, или златарь слияв злато позлати его, или подобиемъ сотвори его?
20 Древо бо негниющее избирает древоделатель и мудре ищет, како поставит образ его, и да не поколеблется.
21 Не разуместе ли, не слышасте ли, не возвестися ли вам исперва? не разуместе ли основания земли?
22 Содержай круг земли, и живущии на ней аки прузи: поставивый небо яко камару и простеръ е, яко скинию обитати:
23 даяй князи аки ничтоже владети, и землю аки ничтоже сотвори.
24 Не насадят бо, ниже насеют, и не вкоренится в земли корение их: дхну на них ветр, и изсхоша, и буря аки стеблие возмет их.
25 ныне убо кому мя уподобисте, и вознесуся? рече святый.
26 Воззрите на высоту очима вашима и видите, кто сотвори сия вся: носяй по числу утварь свою, и вся по имени прозовет от многия славы и в державе крепости своея: ничтоже утаися от тебе.
27 еда бо речеши, иакове, и что глаголалъ еси, израилю: утаися путь мой от бога, и бог мой суд отя, и отступи?
28 И ныне не уразумел ли еси? ни ли слышал еси? бог вечный, бог устроивый концы земли, не взалчет, ниже утрудится, ниже есть изобретение премудрости его,
29 даяй алчущим крепость и неболезненнымъ печаль.
30 Взалчут бо юнейшии, и утрудятся юноты, и избраннии не крепцы будут:
31 терпящии же господа изменят крепость, окрылатеютъ аки орли, потекут и не утрудятся, пойдутъ и не взалчут.
1 Обновляйтеся ко мне, острови, князи бо изменятъ крепость: да приближатся и да глаголют вкупе, тогда суд да возвещают.
2 Кто возстави от восток правду, призва ю к ногам своим, и пойдетъ? даст пред языки, и цари ужасит: и повержет на землю мечи их, и аки стеблие отвержени луцы их,
3 и проженет я, и пройдет с миром путь ног его.
4 Кто содела и сотвори сия? призва ю призываяй ю от начала родов. Аз бог первый, и въ грядущая аз есмь.
5 Видеша языцы и убояшася, концы земнии приближишася и приидоша вкупе.
6 Судяй кийждо ближнему, и брату помощи, и речет:
7 превозможе муж древоделатель, и ковачь бияй млатом, вкупе проковаяй: овогда убо речет: спаяние добро есть, утвердиша я гвоздьми, положат я, и не подвигнутся.
8 Ты же, израилю, рабе мой, иакове, егоже избрах, семя авраамле, егоже возлюбих,
9 егоже поях от конец земли, и от стражбъ ея призвах тя, и рекох ти: раб мой еси, избрах тя, и не оставих тебе:
10 не бойся, с тобою бо есмь, не прельщаю: аз бо есмь бог твой, укрепивый тя, и помогох ти, и утвердих тя десницею моею праведною:
11 се, постыдятся и посрамятся вси сопротивляющиися тебе, будут бо яко не сущии, и погибнутъ вси соперницы твои:
12 взыщеши их, и не обрящеши человеков, иже поругаются тебе: будут бо аки не бывшии и не будут ратующии тебе.
13 яко аз бог твой держай десницу твою, глаголяй тебе:
14 не бойся, иакове, малый израилю, аз помогохъ ти, глаголет бог твой, избавляяй тя святый израилев:
15 се, сотворих тя аки колеса колесничная новая, стирающая аки пила, и сотреши горы, и истончиши холмы, и аки прах положиши,
16 и извееши, и ветр возмет я, и буря развеет я: ты же возвеселишися во святых израилевых.
17 И возрадуются убозии и неимущии: поищутъ бо воды, и не будет, язык их от жажди изсше. Аз господь бог, аз услышу их, бог израилев, и не оставлю их,
18 но отверзу на горах реки и среди поля источники, сотворю пустыню в луги водныя и жаждущую землю в водотечи,
19 положу в безводную землю кедр и смерчие, и мирсину и кипарис и тополю:
20 да узрят и уразумеют, и помыслятъ и уведят вкупе, яко рука господня сотвори сия вся, и святый израилев показа.
21 Приближается суд ваш, глаголет господь бог: приближишася совети ваши, глаголет царь иаковль.
22 Да приближатся и возвестят вам, яже сбудутся, или яже прежде быша, рцыте: и приставимъ ум и уразумеем, что последняя и будущая: рцыте нам,
23 возвестите нам грядущая на последок, и увемы, яко бози есте: благо сотворите и зло сотворите, и почудимся и узрим вкупе.
24 яко откуду есте вы, и откуду дело ваше? от земли мерзость избраша вас.
25 Аз же возставих, иже от севера и иже от восток солнечных, прозовутся именем моим: да приидут князи, и яко брение скудельника и яко скудельник топчущь брение, тако попрани будете.
26 Кто бо возвестит, яже исперва, да увемы, яже напреди, и речем, яко истинна суть? несть предглаголющаго, ни слышащаго словес ваших.
27 Начало сиону дам и иерусалима утешу на пути.
28 от язык бо, се, ни един: и от кумиръ их несть возвещаяй. И аще вопрошу их, откуду есте, не отвещают ми.
29 Суть бо творящии вас и всуе прельщающии вас.
1 Иаков отрок мой, восприиму и: израиль избранный мой, прият его душа моя, дах дух мой нань, суд языком возвестит:
2 не возопиет, ниже ослабит, ниже услышится вне глас его:
3 трости сокрушены не сотрет и льна курящася не угасит, но во истину изнесет суд:
4 возсияет и не потухнет, дондеже положитъ на земли суд, и на имя его языцы уповати имут.
5 Тако глаголет господь бог, сотворивый небо и водрузивый е, утверждей землю и яже на ней, и даяй дыхание людем, иже на ней, и дух ходящимъ на ней:
6 аз господь бог призвах тя в правде, и удержу за руку твою и укреплю тя: и дах тя въ завет рода израилева, во свет языков,
7 отверсти очи слепых, извести от узъ связанныя и из дому темницы и седящия во тме.
8 Аз господь бог, сие мое есть имя, славы моея иному не дам, ниже добродетелей моихъ истуканным.
9 яже из начала, се, приидоша, и новая, яже аз возвещу, и прежде неже возвестити, явишася вам.
10 Воспойте господеви песнь нову: началство его, прославите имя его от конец земли, сходящии в море и плавающии по нему, острови и живущии на них.
11 Возвеселися, пустыне, и веси ея, придвория, и живущии в кидаре: возвеселятся живущии на камени, от края гор возопиют,
12 дадят богу славу, добродетели его во островех возвестят.
13 господь бог сил изыдет и сокрушит рать, воздвигнет рвение и возопиет на враги своя со крепостию.
14 Молчах, еда и всегда умолчу и потерплю? Терпех яко раждающая, истреблю и изсушу вкупе,
15 опустошу горы и холмы, и всяку траву ихъ изсушу, и положу реки во островы, и луги изсушу:
16 и наведу слепыя на путь, егоже не видеша, и по стезям, ихже не знаша, ходити сотворю им: сотворю им тму во свет и стропотная в правая: сия глаголы сотворю, и не оставлю их.
17 Тии же возвратишася вспять: посрамитеся стыдением, уповающии на изваянная, глаголющии слиянным: вы есте бози наши.
18 Глусии, услышите, и слепии, прозрите видети.
19 И кто слеп, разве раби мои? и глуси, разве владеющии ими? и ослепоша раби божии.
20 Видесте многажды, и не сохранисте: отверсты уши (имуще), и не слышасте.
21 господь бог восхоте, да оправдится и возвеличитъ хвалу.
22 И видех, и быша людие расхищени и разграблени: пругло бо в ложах везде, и в домех вкупе, идеже скрыша я, быша в плен: и не бысть изымаяй разграбления и не бе глаголющаго: отдаждь.
23 Кто в вас, иже внушит сия? и услышитъ во грядущая.
24 Кто даде на разграбление иакова, и израиля пленяющим его? не бог ли, емуже согрешиша и не восхотеша в путех его ходити, ни слушати закона его?
25 И наведе на ня гнев ярости своея, и укрепися на ня рать, и палящии их окрест, и не уведеша кийждо их, ниже положиша на уме.
1 И ныне сице глаголет господь бог сотворивый тя, иакове, и создавый тя, израилю: не бойся, яко избавихъ тя, прозвах тя именем твоим: мой еси ты.
2 И аще преходиши сквозе воду, с тобою есмь, и реки не покрыют тебе: и аще сквозе огнь пройдеши, не сожжешися, и пламень не опалитъ тебе,
3 яко аз господь бог твой, святый израилев, спасаяй тя: сотворих премену твою египетъ и ефиопию, и соину за тя.
4 отнелиже честен был еси предо мною, прославился еси, и аз тя возлюбих, и дам человеки за тебе и князи за главу твою.
5 Не бойся, яко с тобою есмь: от востокъ приведу семя твое и от запад соберу тя:
6 реку северу: приведи: и ливу: не возбраняй, приведи сыны моя от земли дальния и дщери моя от краев земных,
7 всех, елицы нарицаются именем моим: во славе бо моей устроих его и создахъ его и сотворих и.
8 И изведох люди слепы, и очи суть такожде слепы, и глуси уши имущии.
9 Вси языцы собрашася вкупе, и соберутся князи от них. Кто возвестит сия? или яже исперва кто возвестит вамъ? да приведут свидетели своя и оправдятся, и да услышат и да рекутъ истину.
10 Будите ми свидетелие, и аз свидетель, глаголет господь бог, и отрок мой, егоже избрах, да увесте и веруете ми и уразумеете, яко аз есмь: прежде мене не бысть инъ бог, и по мне не будет.
11 Аз бог, и несть разве мене спасаяй.
12 Аз возвестих и спасох, укорих, и не бе в вас чуждий: вы мне свидетелие, и аз свидетель, глаголет господь бог,
13 еще от начала, и несть изымаяй от руку моею: сотворю, и кто отвратит е?
14 Тако глаголет господь бог, избавляяй вас, святый израилев: вас ради послю в вавилон и воздвигну вся бежащия, и халдее в кораблех свяжутся.
15 Аз господь бог святый ваш, показавый израиля царя вашего.
16 Сице глаголет господь, даяй путь по морю и по воде сильне стезю:
17 изводяй колесницы и кони и народ силен: но успоша и не востанут, угасоша аки лен угашен.
18 Не поминайте первых, и ветхих не помышляйте,
19 се, аз творю новая, яже ныне возсияют, и увесте я: и сотворю в пустыни путь и в безводней реки.
20 Возблагословят мя зверие селнии, сирини и дщери струфовы: яко дах в пустыни воду и реки в безводней, напоити род мой избранный,
21 люди моя, яже снабдех, добродетели моя поведати.
22 Не ныне призвах тебе, иакове, ниже трудитися сотворих тя, израилю.
23 Не принесл еси мне овец твоих всесожжения твоего, ни в жертвах твоих прославил мя еси, не поработих тя в жертвах, ниже утруждена сотворих тя в ливане:
24 не купил еси мне на сребро фимиама, ниже тука треб твоих возжелах, но во гресехъ твоих стал еси предо мною и в неправдахъ твоих.
25 Аз есмь, аз есмь заглаждаяй беззакония твоя мене ради и грехи твоя, и не помяну.
26 Ты же помяни, и да судимся: глаголи ты беззакония твоя прежде, да оправдишися.
27 отцы ваши первии согрешиша, и князи ваши беззаконноваша на мя.
28 И оскверниша князи святая моя, и дах погубити иакова и израиля во укоризну.
1 Ныне же слыши, рабе мой иакове, и израилю, егоже избрах.
2 Сице глаголет господь бог сотворивый тя и создавый тя из утробы: еще поможет ти: не бойся, рабе мой иакове, и возлюбленный израилю, егоже избрах.
3 яко аз дам воду в жажду ходящим въ безводней, наложу дух мой на семя твое и благословения моя на чада твоя,
4 и прозябнут аки трава посреде воды и яко верба при воде текущей.
5 Сей речет: божий есмь: и сей возопиетъ о имени иаковли, и другий напишет рукою своею: божий есмь: и о имени израилеве возопиет.
6 Сице глаголет бог царь израилев, и избавлей его бог саваоф: аз первый и аз по сих, кроме мене несть бога:
7 кто якоже азъ? да станет и да призовет, и да возвестит и да уготовит ми, отнележе сотворих человека во век, и грядущая прежде неже приити им, да возвестят вам.
8 Не укрывайтеся, ниже заблуждайте: не исперва ли внушисте, и возвестих вамъ? свидетелие вы есте, аще есть бог разве мене.
9 И не послушаша тогда созидающии, и ваяющии вси тщетни, творящии желания своя, яже не упользуютъ их:
10 но посрамятся вси созидающии бога и ваяющии вси неполезная.
11 И вси, отнюдуже быша, изсхоша: и глусии от человек да соберутся вси и да станут вкупе, и да посрамятся и устыдятся вкупе.
12 яко наостри древоделатель сечиво, теслою содела оное, и свердлом состави е, и длатом издолбе е, и содела е крепостию мышцы своея: и взалчет, и изнеможет, и не напиется воды.
13 И избрав древоделя древо, постави е в меру, и клеем сострои е, и сотвори е аки образ мужеск и аки красоту человечу, поставити е в дому.
14 Посече древо в дубраве, еже насади господь, сосну, и дождь возрасти,
15 да будет человеком на жжение: и взяв от него, согреся, и изжегше я, испекоша ими хлебы, из оставшаго же сотвориша боги и покланяются им: сотвори е изваянное, и прекланяется им.
16 Пол его сожже огнем, и пол его сожже на углие, и испече в них хлебы, и на них испече мясо, и яде, и насытися, и согревся рече: сладко мне, яко согрехся и видех огнь.
17 Из оставшаго же сотвори бога изваянна, прекланяется ему и покланяется, и молится ему глаголя: избави мя, яко бог мой еси ты.
18 Не уведаша смыслити, яко отемнеша очи их, еже видети и разумети сердцемъ своим.
19 И не помысли в души своей, ни уведе смышлением, яко пол его сожже огнем, и испече на углиех его хлебы, и испекъ мяса снеде, и оставшее его в мерзость сотвори, и покланяются ему.
20 увеждь, яко пепел есть сердце их, и прельщаются, и ни един может души своея избавити: видите, не рцыте, яко лжа в деснице моей.
21 Помяни сия, иакове и израилю, яко рабъ мой еси ты, сотворих тя раба моего, и ты, израилю, не забывай мене.
22 Се бо, отях яко облак беззакония твоя и яко примрак грехи твоя: обратися ко мне, и избавлю тя.
23 Возвеселитеся, небеса, яко помилова богъ израиля: вострубите, основания земная, возопийте, горы, веселие, холми и вся древеса, яже на них: яко избави бог иакова, и израиль прославится.
24 Сице глаголет господь избавляяй тя и создавый тя от чрева: аз господь совершаяй вся, распрострохъ небо един и утвердих землю.
25 Кто ин разсыплет знамения чревоволшебниковъ и волшбы от сердца, отвращаяй мудрыя вспять и советы их обуяяй,
26 и уставляя глагол раба своего, и советъ вестников своих истинен творяй? глаголяй иерусалиму: населишися: и градом иудейским: возградитеся, и пустыни его просияют,
27 глаголяй бездне: опустееши, и реки твоя изсушу,
28 глаголяй киру смыслити, и вся воли моя сотворит: глаголяй иерусалиму: возградишися, и храм святый мой осную.
1 Сице глаголет господь бог помазанному моему киру, егоже удержах за десницу, повинути предъ ним языки, и крепость царей разрушу, отверзу пред ним врата, и гради не затворятся:
2 аз пред тобою пойду и горы уравню, врата медяная сокрушу и вереи железныя сломлю,
3 и дам ти сокровища темная сокровенная: невидимая отверзу тебе, да увеси, яко аз господь бог твой прозывая имя твое, богъ израилев.
4 Ради раба моего иакова и израиля избраннаго моего, аз прозову тя именем твоим и прииму тя:
5 ты же не познал еси мене, яко аз господь бог, и несть разве мене еще бога: укрепихъ тя, и не познал еси мене,
6 да быша уведели, иже от восток солнечныхъ и иже от запад, яко несть бог разве мене: аз господь бог, и несть еще.
7 Аз устроивый свет и сотворивый тму, творяй мир и зиждяй злая, аз господь бог, творяй сия вся.
8 Да возрадуется небо свыше, и облацы да кропятъ правду: да прозябнет земля, и да прорастит милость, и правду да прозябнет вкупе: аз есмь господь создавый тя.
9 Что лучшее устроих яко глину скудельничу? еда оряй орати будет землю весь день? еда речет брение скудельнику: что твориши, яко не делаеши, ниже имаши рук, еда отвещаетъ здание создавшему е?
10 еда глаголет отцу: что родиши? и матери: что чревоболиши?
11 яко тако глаголет господь бог, святый израилев, сотворивый грядущая: вопросите мене о сынехъ моих и о дщерех моих, и о делех руку моею заповедите мне.
12 Аз сотворих землю и человека на ней, аз рукою моею утвердих небо, аз всемъ звездам заповедах.
13 Аз возставих его со правдою царя, и вси путие его правы: сей созиждет градъ мой и пленение людий моих возвратит, не по мзде, ни по даром, рече господь саваоф.
14 Тако глаголет господь саваоф: утрудися египетъ и купли ефиопския, и саваимстии мужие высоцыи к тебе прейдут и тебе будут раби, и вследъ тебе пойдут связани узами ручными, и прейдутъ к тебе и поклонятся тебе, и в тебе помолятся, яко в тебе бог есть, и рекут: несть бога разве тебе:
15 ты бо еси бог, и не ведехом, бог израилевъ спас.
16 Постыдятся и посрамятся вси противящиися ему и пойдут в студе: обновляйтеся ко мне, острови.
17 израиль спасается от господа спаснием вечным: не постыдятся, ни посрамятся даже до века ктому.
18 Зане тако глаголет господь сотворивый небо, сей бог показавый землю и сотворивый ю, той раздели ю, не вотще сотвори ю, но на вселение созда ю: аз есмь господь, и несть ктому.
19 Не отай глаголах, ни в темне месте земли: не рекох племени иаковлю: суетнаго взыщите. Аз есмь, аз есмь господь глаголяй правду и возвещаяй истину.
20 Соберитеся и приидите, совещайтеся вкупе, спасаемии от язык. Не разумеша воздвижущии древо изваяние свое и молящеся богом, иже не спасают.
21 Аще возвестят, да приближатся, да уведятъ вкупе, кто слышана сотвори сия исперва? Тогда возвестися вам: аз бог, и несть иного разве мене, праведн и спаситель, несть кроме мене.
22 обратитеся ко мне и спасетеся, иже от края земнаго: аз есмь бог, и несть иного.
23 Кленуся мною самим, аще не изыдет изо уст моих правда, словеса моя не возвратятся: яко мне поклонится всяко колено, и исповестся всяк язык богови, глаголя:
24 правда и слава к нему приидет: и посрамятся вси отлучающиися.
25 от господа оправдятся, и о бозе прославится все семя сынов израилевых.
1 Паде вил, сокрушися дагон, быша ваяния ихъ во звери и скоты: носите я связана яко бремя труждающемуся и разслабевшу,
2 и алчущу и не могущу вкупе, иже не возмогутъ спастися от рати, сами же пленени приведошася.
3 Послушайте мене, доме иаковль и весь останокъ израилев, носимии от чрева и наказуемии от детска даже до старости:
4 аз есмь, и дондеже состареетеся, азъ есмь, аз терплю вам, аз сотворих и аз понесу, аз подыму и спасу вы.
5 Кому мя уподобисте? видите, ухитрите, заблуждающии,
6 слагающии злато из меха, и сребро весомъ поставляют в мериле, и наемше златаря сотвориша рукотворенная, и преклоншеся покланяются им:
7 воздвижут я на рамех и ходят: аще же положат я на месте своем, ту лежат, ниже подвижутся: и иже аще возопиет к ним, не услышат, от бед не спасут его.
8 Помяните сия и возстените, покайтеся, прельстившиися, обратитеся сердцемъ
9 и помяните первая от века, яко азъ есмь бог, и несть еще разве мене:
10 возвещаяй первее последняя, прежде неже быти им, и абие сбышася: и рекох: весь совет мой станет, и вся, елика совещах, сотворю.
11 Призываяй от восток птицу, и от земли издалеча, о нихже совещах: рекох и приведох, создахъ и сотворих, приведох и и благопоспеших путь его.
12 Послушайте мене, погубльшии сердце, сущии далече от правды:
13 приближих правду мою, и не удалится, и спасние, еже от мене, не умедлю: дахъ в сионе спасние израилю во прославление.
1 Сниди, сяди на земли, дево, дщи вавилоня, вниди во тму По иным: сяди на землю., дщи халдейска, яко не приложиши ксему прозыватися мягка и юна.
2 Возми жерновы, мели муку, открый покрывало твое, открый седины, возсучи голени, прейди реки:
3 открыется студ твой, явятся укоризны твоя, праведное от тебе возму, ктому не предамъ человеком.
4 Рече избавивый тя господь саваоф, имя ему святый израилев:
5 сяди умилена, вниди во тму, дщи халдейска, ксему не прозовешися крепость царства.
6 Разгневахся на люди моя, осквернила еси наследие мое: аз вдах я в руку твою, ты же не дала им милости, старчий ярем отягчила еси зело
7 и рекла еси: в век буду владычица: не помыслила еси сих в сердцы твоем, ниже помянула еси последних:
8 ныне же слыши сие, юная, седящая, уповающая, глаголющая в сердцы своем: аз есмь, и несть иныя, не сяду вдовою и не познаю сиротства.
9 ныне же приидут на тя два сия внезапу во един день, безчадие и вдовство внезапу приидетъ на тя, в волшебстве твоем и в крепости волхвовъ твоих зело,
10 в надеянии злобы твоея: ты бо рекла еси: аз есмь, и несть иныя: увеждь, яко смышление сих и блужение твое будет тебе срам: и рекла еси сердцем своим: азъ есмь, и несть иныя.
11 И приидет на тя пагуба, и не увеси, пропасть, и впадеши в ню: и приидет на тя печаль, и не возможеши чиста быти: и приидетъ на тя внезапу пагуба, и не увеси.
12 Стани ныне с волхвы твоими и со многими чары твоими, имже научилася еси из юности твоея, аще возмогут ти помощи.
13 утрудилася еси в советех твоих: да станут ныне и спасут тя звездочетцы небесе, смотряющии звезд, да возвестят ти, что имать на тя приити.
14 Се, вси яко хврастие огнем погорятъ и не изымут души своея из пламене, понеже имаши углие огненное, сяди на них.
15 Сии будут тебе помощь: трудилася еси в преложении от юности, человек сам в себе прельстися, тебе же не будет спасения.
1 Услышите сия, доме иаковль, прозваннии именемъ израилевым и изшедшии из иуды, кленущиися именем господа бога израилева, поминающии не со истиною, ниже со правдою,
2 и придержащиися имени града святаго, и о бозе израилеве подтверждающиися: господь саваоф имя ему.
3 Преждняя еще возвестих, и из устъ моих изыдоша, и слышано бысть: внезапу сотворих, и найде.
4 Вем, яко жесток еси, и жила железна выя твоя, и чело твое медяно.
5 И возвестих ти, яже древле, прежде неже приити на тя: слышана тебе сотворих, да не когда речеши, яко идоли мне сия сотвориша, и не рцы, яко изваянная и слиянная заповедаша мне.
6 Слышасте вся, и вы не разуместе: но и слышана тебе сотворих новая отныне, яже имут быти:
7 и не рекл еси: ныне бывают, а не прежде, и не в преждния дни слышал еси сия: не рцы: ей, вем сия.
8 Не ведел еси, ниже разумел еси, ниже исперва отверзох ушеса твоя: ведехъ бо, яко отвергая отринеши и беззаконник еще от чрева прозовешися.
9 Имене моего ради покажу ти ярость мою, и славная моя наведу на тя, да не потреблю тебе.
10 Се, продах тя не сребра ради: изъях же тя из пещи убожества.
11 Мене ради сотворю ти, яко мое имя оскверняется, и славы моея иному не дам.
12 Послушай мене, иакове и израилю, егоже аз призываю: аз есмь первый и аз есмь во век.
13 И рука моя основа землю, и десница моя утверди небо: призову я, и станет вкупе,
14 и соберутся вси и услышат: кто имъ возвести сия? любя тя сотворих волю твою надъ вавилоном, еже отяти племя халдейско.
15 Аз глаголах, аз призвах, приведох и, и благопоспешит путь его.
16 Приступите ко мне и слышите сия, исперва не отай глаголах: егда бываху, тамо бех, и ныне господь господь посла мя и дух его.
17 Тако глаголет господь, избавивый тя, святый израилев: аз есмь господь бог твой, научих тя, еже обрести тебе путь, по немуже пойдеши.
18 И аще бы еси послушал заповедий моих, то был бы убо аки река мир твой, и правда твоя яко волна морская,
19 и было бы яко песок семя твое, и исчадия чрева твоего яко персть земли: ниже ныне потребишися, ниже погибнет имя твое предо мною.
20 Изыди от вавилона, бежай от халдеев: глас радости возвестите, и да слышано будетъ сие, возвестите даже до последних земли, глаголите: избави господь раба своего иакова.
21 И аще вжаждут, пустынею проведет ихъ и воду из камене изведет им: разсядется камень, и потечет вода, и испиют людие мои.
22 Несть радоватися нечестивым, глаголет господь.
1 Послушайте мене, острови, и внемлите, языцы. Временем многим стояти будет, глаголет господь: от чрева матере моея нарече имя мое,
2 и положи уста моя яко мечь остр, и под кровом руки своея скры мя: положи мя яко стрелу избранну, и в туле своем скры мя,
3 и рече ми: раб мой еси ты, израилю, и в тебе прославлюся.
4 Аз же рекох: вотще трудихся, всуе и ни во что дах крепость мою: сего ради суд мой пред господем и труд мой пред богом моим.
5 И ныне тако глаголет господь, создавый мя от чрева раба себе, еже собрати иакова к нему и израиля: соберуся и прославлюся пред господем, и бог мой будет мне крепость.
6 И рече ми: велие ти есть, еже назватися тебе рабом моим, еже возставити племена иаковля и разсеяние израилево обратити: се, дах тя в завет рода, во свет языком, еже быти тебе во спасние даже до последнихъ земли.
7 Тако глаголет господь, избавивый тя бог израилев: освятите уничижающаго душу свою, гнушаемаго от язык рабов княжеских: царие узрятъ его, и востанут князи и поклонятся ему господа ради, яко верен есть святый израилев, и избрах тя.
8 Тако глаголет господь: во время приятно послушахъ тебе и в день спасния помогох ти, и сотворихъ тя и дах тя в завет вечный языков, еже устроити землю и наследити наследия пустыни,
9 глаголюща сущим во узах: изыдите, и сущимъ во тме: открыйтеся. На всех путех пастися будут, и на всех стезях пажить их:
10 не взалчут, ниже вжаждут, ниже поразитъ их зной, ниже солнце, но милуяй их утешитъ их и сквозе источники водныя проведет их.
11 И положу всяку гору в путь и всяку стезю в паству им.
12 Се, сии издалеча приидут, сии от севера и от моря, инии же от земли персския.
13 Радуйтеся, небеса, и веселися, земле, да отрыгнутъ горы веселие и холми правду, яко помилова бог люди своя и смиренныя людий своих утеши.
14 Рече же сион: остави мя господь, и бог забы мя.
15 еда забудет жена отроча свое, еже не помиловати исчадия чрева своего? аще же и забудет сих жена, но аз не забуду тебе, глаголетъ господь.
16 Се, на руках моих написах стены твоя, и предо мною еси присно,
17 и вскоре возградишися, от нихже разорился еси, и опустошившии тя изыдут из тебе.
18 Возведи окрест очи твои и виждь вся, се, собрашася и приидоша к тебе, живу аз, глаголет господь: яко всеми ими аки в красоту облечешися и обложиши себе ими яко утварию невеста.
19 Понеже пустая твоя и разсыпаная и падшая ныне утеснеют от обитающих, и удалятся от тебе поглощающии тя.
20 Рекут бо во уши твои сынове твои, ихже был погубил еси: тесно ми место, сотвори ми место, да вселюся.
21 И речеши в сердцы своем: кто мне породи сихъ? аз же безчадна и вдова, сих же кто воспита мне? аз же остахся едина, сии же мне где быша?
22 Тако глаголет господь господь: се, воздвизаю на языки руку мою и на островы воздвигну знамение мое, и приведут сыны твоя в лоне и дщери твоя на плещах возмут.
23 И будут царие кормителие твои, и княгини их кормилицы твоя: до лица земли поклонятся тебе и прах ног твоих оближут, и увеси, яко аз господь бог, и не посрамятся терпящии мя.
24 еда возмет кто от исполина корысти? и аще кто пленит неправедне, спасетлися?
25 Зане тако глаголет господь: аще кто пленитъ исполина, возмет корысти: вземляй же от крепкаго спасется: аз же прю твою разсужду и аз сыны твоя избавлю:
26 и оскорбившии тебе снедят плоть свою и испиют яко вино ново кровь свою, и упиются: и увесть всяка плоть, яко аз господь избавивый тя и заступаяй крепость иаковлю.
1 Тако глаголет господь: кая книга отпущения матере вашея, еюже отпустих ю? или коему заимодавцу продах вы? се, грехми вашими продастеся, и беззаконий ради ваших отпустих матерь вашу.
2 Что яко приидох, и не бяше человека? звах, и не бе послушающаго? еда не может рука моя избавити, или не могу изъяти? се, запрещениемъ моим опустошу море и положу реки пусты, и изсхнут рыбы их не сущей воде и умрутъ жаждею:
3 облеку небо во тму и положу аки вретище одежду его.
4 господь господь дает мне язык научения, еже разумети, егда подобает рещи слово: положи мя утро утро, приложи ми ухо, еже слышати,
5 и наказание господне отверзает уши мои: аз же не противлюся, ни противоглаголю.
6 Плещи мои вдах на раны и ланите мои на заушения, лица же моего не отвратих от студа заплеваний,
7 и господь господь помощник ми бысть: сего ради не усрамихся, но положих лице свое аки твердый камень и разумех, яко не постыждуся:
8 зане приближается оправдавый мя. Кто пряйся со мною? да сопротивостанет мне купно. И кто судяйся со мною? да приближится ко мне.
9 Се, господь господь поможет ми: кто озлобитъ мя? Се, вси вы яко риза обетшаете, и яко молие изъяст вы.
10 Кто в вас бояйся господа? да послушает гласа отрока его. Ходящии во тме, и несть имъ света, надейтеся на имя господне и утвердитеся о бозе.
11 Се, вси вы огнь раждизаете укрепляете пламень: ходите светом огня вашего и пламенем, егоже разжегосте. Мене ради быша сия вам, в печали успнете.
1 Послушайте мене, гонящии правду и взыскающии господа, воззрите на твердый камень, егоже изсекосте евр.: из негоже изсечени бысте., и въ юдоль потока, юже ископасте евр.: изъ неяже ископани бысте..
2 Воззрите на авраама отца вашего и на сарру породившую вы: яко един бе, и призвахъ его, и благослових его, и возлюбих его, и умножих его.
3 И тебе ныне утешу, сионе, и утешихъ вся пустыни его, и поставлю пустыню его яко рай, и яже ко западом его аки рай господень: радость и веселие обрящут в нем, исповедание и глас хваления.
4 Послушайте мене, людие мои, послушайте, и царие, ко мне внушите: яко закон от мене изыдет, и суд мой во свет языком.
5 Приближается скоро правда моя, и изыдетъ яко свет спасние мое, и на мышцу мою языцы надеятися будут: мене острови ожидати и на мышцу мою уповати будут.
6 Воздвигните на небо очи ваши и воззрите на землю долу, понеже небо яко дым утвердися, и земля яко риза обетшает, живущии же на земли якоже сия изомрут, спасние же мое во век будет, и правда моя не оскудеет.
7 Послушайте мене, ведящии суд, людие мои, имже закон мой в сердцы вашем, не бойтеся укорения человеча и похулению их не покаряйтеся.
8 якоже бо риза снедена будет временем, и яко сукно изъястся мольми, правда же моя во веки будет и спасние мое в роды родов.
9 Востани, востани, иерусалиме, и облецыся во крепость мышцы твоея, востани яко в начале дне, яко род века: не ты ли еси победилъ гордаго и расторгнул змиа?
10 Не ты и еси опустошаяй море, воду бездны многу? положивый глубины морския путь прохода изъятым и избавленымъ?
11 господем бо возвратятся и приидут в сионъ с радостию и со веселием вечным: на главе бо их веселие и хвала, и радость прииметъ я: отбеже болезнь и печаль и воздыхание.
12 Аз есмь, аз есмь утешаяй тя: разумей, кто сый убоялся еси человека смертна и сына человеча, иже яко трава изсхоша,
13 и забыл еси бога создавшаго тя, сотворшаго небо и основавшаго землю: и боялся еси присно во вся дни лица ярости стужающаго тебе: како бо восхоте взяти тя, и ныне где ярость стужающаго тебе?
14 Внегда бо спастися тебе, не станет, ниже умедлит:
15 яко аз бог твой, возмущаяй море и творяй шум волнам его: господь саваоф имя мне.
16 Положу словеса моя во уста твоя и подъ сению руки моея покрыю тя, еюже поставихъ небо и основах землю: и речет сиону: людие мои есте вы.
17 Востани, востани, воскресни, иерусалиме, испивый чашу ярости от руки господни: чашу бо падения, фиал ярости испил и истощил еси,
18 и не бысть утешаяй тебе от всех чадъ твоих, яже родил еси, и не бысть подъемлющаго руки твоея, ниже от всех сынов твоих, ихже вознесл еси.
19 Два сия противна тебе, кто сожалеет тебе? падение и сокрушение, глад и мечь, кто утешитъ тя?
20 Сынове твои обнищавшии, седяще на краи всякаго исхода, яко свекла недовареная, исполнени ярости господни, разслаблени господем богом.
21 Сего ради слыши, смиренный и упивыйся не вином:
22 тако глаголет господь бог судяй людем своим: се, взях от руки твоея чашу падения, фиалъ ярости моея, и не приложиши ксему пити ея:
23 и вложу ю в руце преобидевших тя и смиривших тя, иже рекоша души твоей: преклонися, да минем: и положил еси равно земли плещи твоя отвне мимоходящим.
1 Востани, востани, сионе, облецыся во крепость твою, сионе, и ты облецыся во славу твою, иерусалиме, граде святый, ктому не приложит проити сквозе тя необрезанный и нечистый.
2 Истряси прах и востани, сяди, иерусалиме, совлецы узу выи твоея, плененая дщи сионя.
3 яко сия глаголет господь: туне продани бысте, и не сребром избавитеся.
4 Тако глаголет господь: во египет снидоша людие мои прежде, еже пришелцем быти тамо, и во ассирию нуждею отведошася.
5 И ныне что зде есте? сия глаголет господь: яко взяшася людие мои туне, чудитеся и плачитеся. Тако глаголет господь: вас ради присно имя мое хулится во языцех.
6 Сего ради познают людие мои имя мое въ той день, яко аз есмь сам глаголяй, ту есмь.
7 Коль красны на горах ноги благовествующихъ мир, благовествующих благая, яко слышано сотворю спасение твое, глаголя: сионе, воцарится бог твой.
8 яко глас хранящих тя вознесеся, и гласомъ вкупе возрадуются: яко очи ко очесемъ воззрят, егда помилует господь сиона.
9 Да отрыгнут веселие вкупе пустыни иерусалимския, яко помилова господь людий своих и избави иерусалима:
10 и открыет господь мышцу свою святую предъ всеми языки, и узрят вси концы земли спасние, еже от бога нашего.
11 отступите, отступите, изыдите отсюду и нечистоте не прикасайтеся, изыдите от среды его, отлучитеся, носящии сосуды господни:
12 яко не с мятежем изыдете, ниже убежаниемъ пойдете: пойдет бо пред вами господь, и собираяй вы господь бог израилев.
13 Се, уразумеет отрок мой и вознесется и прославится зело.
14 якоже ужаснутся о тебе мнози, тако обезславится от человек вид твой, и слава твоя от сынов человеческих.
15 Тако удивятся языцы мнози о нем, и заградят царие уста своя: яко, имже не возвестися о нем, узрят, и иже не слышаша, уразумеют.
1 господи, кто верова слуху нашему, и мышца господня кому открыся?
2 Возвестихом, яко отроча пред ним яко корень в земли жаждущей, несть вида ему, ниже славы: и видехом его, и не имяше вида, ни доброты:
3 но вид его безчестен, умален паче всех сынов человеческих: человек в язве сый и ведый терпети болезнь, яко отвратися лице его, безчестно бысть, и не вменися.
4 Сей грехи наша носит и о нас болезнует, и мы вменихом его быти в труде и в язве от бога и во озлоблении.
5 Той же язвен бысть за грехи наша и мученъ бысть за беззакония наша, наказание мира нашего на нем, язвою его мы исцелехом.
6 Вси яко овцы заблудихом: человек от пути своего заблуди, и господь предаде его грехъ ради наших.
7 И той, зане озлоблен бысть, не отверзаетъ уст своих: яко овча на заколение ведеся, и яко агнец пред стригущим его безгласен, тако не отверзает уст своих.
8 Во смирении его суд его взятся: родъ же его кто исповесть? яко вземлется от земли живот его, ради беззаконий людий моихъ ведеся на смерть.
9 И дам лукавыя вместо погребения его и богатыя вместо смерти его: яко беззакония не сотвори, ниже обретеся лесть во устехъ его.
10 И господь хощет очистити его от язвы: аще дастся о гресе, душа ваша узритъ семя долгоживотное.
11 И хощет господь рукою своею отяти болезнь от души его, явити ему свет и создати разумом, оправдати праведнаго благо служаща многим, и грехи их той понесет.
12 Сего ради той наследит многих и крепкихъ разделит корысти, зане предана бысть на смерть душа его, и со беззаконными вменися, и той грехи многих вознесе и за беззакония их преданъ бысть.
1 Возвеселися, неплоды, нераждающая, возгласи и возопий, нечревоболевшая, яко многа чада пустыя паче, нежели имущия мужа.
2 Рече бо господь: разшири место кущи твоея и покровов твоих, водрузи, не пощади, продолжи ужя твоя и колие твое укрепи,
3 еще на десно и на лево простри: и семя твое языки наследит, и грады опустевшия населиши.
4 Не бойся, яко посрамлена еси, ниже устыдися, яко укорена еси: понеже срамоту вечную забудеши и укоризны вдовства твоего не помянеши ктому.
5 яко господь творяй тя, господь саваоф имя ему: и избавивый тя, святый бог израилев, всей земли прозовется.
6 Не яко жену оставлену и малодушну призва тя господь, ниже яко жену из юности возненавидену, рече бог твой.
7 На время мало оставих тя, а с милостию великою помилую тя:
8 во ярости мале отвратих лице мое от тебе, но милостию вечною помилую тя, рече избавивый тя господь.
9 от воды, яже при нои, сие ми есть, якоже кляхся ему во время оно на землю, не разгневатися о тебе ктому, ниже во прещении твоемъ
10 горы преставити, и холми твои не предвигнутся: тако ниже, яже от мене к тебе, милость оскудеет, ниже завет мира твоего преставится: рече бо милостив к тебе господь.
11 Смиренная и колеблемая не имела еси утешения: се, аз уготовляю тебе анфракс камень твой и на основание твое сапфир:
12 и положу забрала твоя иаспис, и врата твоя камение кристалла, и ограждение твое камение избранное,
13 и вся сыны твоя научены богом, и во мнозе мире чада твоя.
14 И правдою возградишися: удалися от неправеднаго, и не убоишися, и трепет не приближится тебе.
15 Се, пришелцы приидут к тебе мною и вселятся у тебе и к тебе прибегнут.
16 Се, аз создах тя, не якоже кузнец раздуваяй углие и износя сосуд на дело: аз же создах тя не на пагубу, еже истлити.
17 Всяк сосуд соделан на тя не благопоспешу, и всяк глас, иже на тя востанет на прю, одолееши им всем: повиннии же твои будутъ в нем. есть наследие служащим господеви, и вы будете мне праведни, глаголет господь.
1 Жаждущии, идите на воду, и елицы не имате сребра, шедше купите, и ядите (и пийте) безъ сребра и цены вино и тук.
2 Вскую цените сребро не в хлебы, и трудъ ваш не в сытость? Послушайте мене, и снесте благая, и насладится во благих душа ваша.
3 Внемлите ушима вашима и последуйте путемъ моим: послушайте мене, и жива будет во благихъ душа ваша, и завещаю вам завет вечен, преподобная давидова верная.
4 Се, свидетелство во языцех дах его, князя и повелителя языком.
5 Се, языцы, иже не ведяху тебе, призовутъ тя, и людие, иже не познаша тебе, ко тебе прибегнут ради господа бога твоего, святаго израилева, яко прослави тя.
6 Взыщите господа, и внегда обрести вам того, призовите: егда же приближится к вам,
7 да оставит нечестивый пути своя, и мужъ беззаконен советы своя, и да обратится ко господу, и помилован будет, яко попремногу оставитъ грехи ваша.
8 Не суть бо совети мои якоже совети ваши, ниже якоже путие ваши путие мои, глаголет господь.
9 Но якоже отстоит небо от земли, тако отстоитъ путь мой от путий ваших, и помышления ваша от мысли моея.
10 якоже бо аще снидет дождь или снегъ с небесе, и не возвратится, дондеже напоит землю, и родит, и прозябнет, и даст семя сеющему и хлеб в снедь:
11 тако будет глагол мой, иже аще изыдетъ из уст моих, не возвратится ко мне тощь, дондеже совершит (вся), елика восхотех, и поспешу пути твоя и заповеди моя.
12 Со веселием бо изыдете и с радостию научитеся: горы бо и холми возскачут ждуще вас с радостию, и вся древеса селная восплещут ветвьми:
13 и вместо драчия взыдет кипарис, и вместо кропивы взыдет мирсина: и будет господь во имя и во знамение вечное, и не оскудеет.
1 Сия глаголет господь: сохраните суд и сотворите правду, приближися бо спасние мое приити и милость моя открытися.
2 Блажен муж творяй сия, и человек держайся их, и храняй субботы не оскверняти, и блюдый руце свои не творити неправды.
3 Да не глаголет иноплеменник приложивыйся ко господеви: еда отлучит мя господь от людий своихъ? и да не глаголет каженик, яко аз есмь древо сухо.
4 Сия глаголет господь кажеником: елицы сохранятъ субботы моя и изберут, яже аз хощу, и содержат завет мой,
5 дам им в дому моем и во ограде моей место именито, лучшее от сынов и дщерей, имя вечно дам им, и не оскудеет:
6 и иноплеменником приложившимся господеви работати ему и любити имя господне, еже быти ему в рабы и рабыни, и вся снабдящия субботы моя не оскверняти и держащия завет мой,
7 введу я в гору святую мою и возвеселю я в дому молитвы моея: всесожжения их и жертвы их будут приятны на требнице моем: домъ бо мой дом молитвы наречется всем языком,
8 глаголет господь, собираяй разсеяныя израилевы, яко соберу к нему собор.
9 Вси зверие дивии, приидите, ядите, вси зверие дубравнии.
10 Видите, яко вси ослепоша, не разумеша смыслити, вси пси немии не возмогут лаяти, видяще сны на ложи, любяще дремати,
11 и пси безстуднии душею, не ведяще сытости: и суть лукави, не ведяще смысла, вси путемъ своим последоваша, кийждо уклонишася в лихоимство свое, от перваго и до последняго.
12 Приидите, да возмем вино и наполнимся пиянства, и будет яко днесь, тако и заутра, и много множае.
1 Видите, како праведный погибе, и никтоже не приемлетъ сердцем, и мужие праведнии вземлются, и никтоже разумеет: от лица бо неправды взяся праведный.
2 Будет с миром погребение его, взяся от среды.
3 Вы же приидите семо, сынове беззаконнии, семя прелюбодеев и блудницы:
4 в чем услаждастеся и на кого отверзосте уста ваша? и на кого изсунусте язык вашъ? не вы ли есте чада пагубы, семя беззаконно,
5 молящиися кумиром под древием частым, закалающе чада своя в дебрех посреде камения?
6 То твоя часть, сей твой жребий, и темъ пролиял еси возлияния, и тем принесл еси жертвы: от сих убо не разгневаюся ли?
7 На горе высоце и превознесенне, тамо твое ложе, и тамо вознесл еси требы твоя:
8 и за подвоями дверий твоих положил еси память твою: мыслил еси, яко аще от мене отступиши, более нечто возымееши: возлюбилъ еси спящия с тобою,
9 и умножил еси блужение твое с ними, и многи сотворил, иже далече от тебе, и послал еси послы за пределы твоя, и смирился еси даже до ада.
10 Многими путьми твоими трудился еси, и не рекл еси: престану крепящься, яко сотворилъ еси сия, сего ради не помолился ми еси ты.
11 Кого благопочет убоялся еси, и солгалъ ми, и не помянул еси мене, ниже приял мя еси во ум, ниже в сердце твое? и азъ тя видя, презираю, и не убоялся еси мене.
12 И аз возвещу правду твою и злобы твоя, яже не успеют тебе:
13 егда возопиеши, да избавят тя во печалехъ твоих: сия бо вся ветр возмет, и отнесетъ буря: а держащиися мене стяжут землю и наследятъ гору святую мою.
14 И рекут: очистите пред лицем его пути и отимите претыкания от пути людий моих.
15 Сия глаголет господь вышний, иже живет во высокихъ во век, святый во святых имя ему, вышний, во святых почиваяй, и малодушным даяй долготерпение и даяй живот сокрушеным сердцем:
16 не во век отмщу вам, ни всегда гневатися буду на вы: дух бо от мене изыдет, и всякое дыхание аз сотворих.
17 За грех мало что опечалих его и поразихъ его и отвратих лице мое от него: и опечалися и пойде дряхл во путех своих.
18 Пути его видех и исцелих его, и утеших его и дах ему утешение истинно,
19 мир на мир далече и близ сущим: и рече господь: исцелю я.
20 Неправеднии же возволнуются и почити не возмогут.
21 Несть радоватися нечестивым, рече господь бог.
1 Возопий крепостию и не пощади: яко трубу возвыси глас твой и возвести людем моим грехи ихъ и дому иаковлю беззакония их.
2 Мене день от дне ищут и разумети пути моя желают, яко людие правду сотворившии и суда бога своего не оставившии: просят ныне у мене суда праведна и приближитися ко господу желают, глаголюще:
3 что яко постихомся, и не увидел еси? смирихом души наша, и не уведел еси? Во дни бо пощений ваших обретаете воли ваша, и вся подручныя ваша томите:
4 аще в судех и сварех поститеся и биете пястьми смиреннаго, вскую мне поститеся якоже днесь, еже услышану быти с воплем гласу вашему?
5 Не сицеваго поста аз избрах, и дне, еже смирити человеку душу свою: ниже аще слячеши яко серп выю твою, и вретище и пепел постелеши, ниже тако наречете пост приятен.
6 Не таковаго (бо) поста аз избрах, глаголетъ господь: но разрешай всяк соуз неправды, разрушай обдолжения насильных писаний, отпусти сокрушенныя во свободу и всякое писание неправедное раздери:
7 раздробляй алчущим хлеб твой и нищия безкровныя введи в дом твой: аще видиши нага, одей, и от свойственных племене твоего не презри.
8 Тогда разверзется рано свет твой, и исцеления твоя скоро возсияют, и предыдет пред тобою правда твоя, и слава божия обымет тя.
9 Тогда воззовеши, и бог услышит тя, и еще глаголющу ти, речет: се, приидох. Аще отимеши от себе соуз и рукобиение и глаголъ роптания
10 и даси алчущему хлеб от души твоея и душу смиренную насытиши, тогда возсияет во тме свет твой, и тма твоя будет яко полудне,
11 и будет бог твой с тобою присно: и насытишися, якоже желает душа твоя, и кости твоя утучнеют, и будут яко вертоград напоен, и яко источник, емуже не оскуде вода: и кости твоя прозябнутъ яко трава, и разботеют, и наследят роды родов.
12 И созиждутся пустыни твоя вечныя, и будутъ основания твоя вечная родом родов: и прозовешися здатель оград, и стези твоя посреде упокоиши.
13 Аще отвратиши ногу твою от суббот, еже не творити хотений твоих в день святый, и прозовеши субботы сладостны, святы богови твоему: не воздвигнеши ноги своея на дело, ниже возглаголеши словесе во гневе из уст твоих,
14 и будеши уповая на господа, и возведетъ тя на благоты земныя, и ухлебит тя наследиемъ иакова отца твоего: уста бо господня глаголаша сия.
1 Еда не может рука господня спасти? или отягчилъ есть слух свой, еже не услышати?
2 Но греси ваши разлучают между вами и между богом, и грех ради ваших отврати лице свое от вас, еже не помиловати.
3 Руце во ваши осквернене кровию, и персты ваши во гресех, устне же ваши возглаголаша беззаконие, и язык ваш неправде поучается.
4 Никтоже глаголет правды, ниже есть судъ истинен: уповают на суетная и глаголютъ тщетная, яко зачинают труд и раждают беззаконие.
5 яица аспидска разбиша и постав паучинный ткут, и хотяй от яиц их ясти, разбивъ запорток (его), обрете и в нем василиска.
6 Постав их не будет на ризу, и не одеждутся от дел своих: дела бо их дела беззакония.
7 Нозе же их на зло текут, скори пролияти кровь, и мысли их мысли о убийствах: сокрушение и бедность во путех их,
8 и пути мирнаго не познаша, и несть суда во путех их: стези бо их развращены, по нихже ходят, и не ведят мира.
9 Того ради отступи от них суд, и не постигнетъ их правда: ждущим им света, бысть имъ тма, ждуще зари во мраце ходиша.
10 осяжут яко слепии стену, яко суще без очес осязати будут, и падутся в полудни яко в полунощи, яко умирающе возстенутъ
11 яко медведь, и яко голубь вкупе пойдут. Ждахом суда, и несть, спасение далече отступи от нас.
12 Много бо беззаконие наше пред тобою, и греси наши противу сташа нам: беззакония бо наша въ нас, и неправды наша уразумехом:
13 нечествовахом и солгахом и отступихомъ от последования бога нашего: глаголахом неправду и не покорихомся, во утробе зачахом и поучихомся от сердца нашего словесем неправедным:
14 и оставихом созади суд, и правда далече отступи от нас: яко изнеможе во путех ихъ истина, и правым (путемъ) не возмогоша прейти:
15 и истина взяся, и преставиша ум свой еже смыслити. И виде господь и негодова, яко не бяше суда:
16 и виде, и не бяше мужа, и помысли, и не бяше избавляющаго: и мсти им мышцею своею, и помилованием утверди.
17 И одеяся правдою яко щитом, и возложи шлем спасения на главу, и облечеся в ризу отмщения, и одеждею своею:
18 яко воздаваяй воздаяние укоризну супостатом.
19 И убоятся, иже от запад, имене господня, и иже от восток солнца, имене его славнаго: приидет бо яко река насильная гнев от господа, приидет со яростию.
20 И приидет сиона ради избавляяй, и отвратитъ нечестие от иакова.
21 И сей им иже от мене завет, рече господь: дух мой, иже есть в тебе, и глаголы, яже аз дах во уста твоя, не оскудеютъ от уст твоих и от уст семене твоего: рече бо господь отныне и во век.
1 Светися, светися, иерусалиме, прииде бо твой свет, и слава господня на тебе возсия.
2 Се, тма покрыет землю, и мрак на языки, на тебе же явится господь, и слава его на тебе узрится.
3 И пойдут царие светом твоим, и языцы светлостию твоею.
4 Возведи окрест очи твои и виждь собраная чада твоя: се, приидоша вси сынове твои издалеча, и дщери твоя на рамех возмутся.
5 Тогда узриши и возрадуешися, и убоишися и ужаснешися сердцем, яко преложится къ тебе богатство морское и языков и людий:
6 и приидут к тебе стада велблюд, и покрыютъ тя велблюди мадиамстии и гефарстии: вси от савы приидут, носяще злато, и ливан принесут и камень честен, и спасние господне благовозвестят:
7 и вся овцы кидарския соберутся тебе, и овни навеофстии приидут к тебе, и вознесутся приятная на жертвенник мой, и дом молитвы моея прославится.
8 Кии суть, иже яко облацы летят, и яко голубие со птенцы ко мне?
9 Мене острови ждаша, и корабли фарсийстии во первых, привести чада твоя издалеча, и сребро и злато их с ними, имене ради господня святаго, и за еже святому израилеву славну быти.
10 И созиждут сынове инороднии стены твоя, и царие их предстояти будут тебе: за гневъ бо мой поразих тя и за милость мою возлюбихъ тя.
11 И отверзутся врата твоя присно, день и нощь не затворятся, ввести к тебе силу язык и цари их ведомыя.
12 языцы бо и царие, иже не поработают ти, погибнут, и языцы запустением запустеют.
13 И слава ливанова к тебе приидет, кипарисомъ и певгом и кедром вкупе, прославити место святое мое, и место ногу моею прославлю.
14 И пойдут к тебе боящеся сынове смирившихъ тя и раздраживших тя, и поклонятся следамъ ногу твоею вси прогневавшии тя, и наречешися град господень, сион святаго израилева.
15 За сие, яко был еси оставлен и возненавиденъ и не бе помагающаго ти, положу тя в радость вечную, веселие родом родов.
16 И изссеши млеко языков и богатство царей снеси, и уразумееши, яко аз господь спасаяй тя и избавляяй тя бог израилев.
17 И вместо меди принесу ти злато, и вместо железа принесу ти сребро, и вместо древесъ принесу ти медь, и вместо камения железо: и вдам князи твоя в мир и надзиратели твоя в правду.
18 И не услышится посем неправда в земли твоей, ни сокрушение, ни бедность во пределехъ твоих, но прозовется [спасение] забрала твоя и врата твоя [хвала].
19 И не будет тебе ктому солнце во светъ дне, ниже восход луны просветит твою нощь, но будет тебе господь свет вечный и бог слава твоя.
20 Не зайдет бо солнце тебе, и луна не оскудеетъ тебе: будет бо господь тебе свет вечный, и исполнятся дние рыдания твоего.
21 И людие твои вси праведнии во век наследятъ землю, храняще сад, дела руку его в славу.
22 Малый будет в тысящи, а малейший во языкъ велик: аз господь по времени соберу их.
1 Дух господень на мне, егоже ради помаза мя, благовестити нищим посла мя, исцелити сокрушенныя сердцем, проповедати пленником отпущение и слепым прозрение,
2 нарещи лето господне приятно и день воздаяния, утешити вся плачущия,
3 дати плачущим сиона славу вместо пепела, помазание веселия плачущим, украшение славы вместо духа уныния: и нарекутся родове правды, насаждение господне во славу.
4 И созиждут пустыни вечныя, запустевшия прежде воздвигнут: и обновят грады пустыя, опустошенныя в роды.
5 И приидут инороднии, пасущии овцы твоя, и иноплеменницы орателие и виноградарие ваши:
6 вы же священницы господни наречетеся, служителие бога вашего, речется вам: крепость язык снесте и в богатстве их чудни будете.
7 Сице землю свою вторицею наследят, и веселие вечное над главою их.
8 Аз бо есмь господь любяй правду и ненавидяй грабления от неправды: и дам труд их праведникомъ и завет вечен завещаю им.
9 И познается во языцех семя их, и внуцы их посреде людий: всяк видяй я познаетъ я, яко сии суть семя благословено от бога, и радостию возрадуются о господе.
10 Да возрадуется душа моя о господе: облече бо мя в ризу спасния и одеждею веселия (одея мя): яко на жениха возложи на мя венец, и яко невесту украси мя красотою.
11 И яко земля растящая цвет свой, и яко вертоград семена своя прозябает: тако возраститъ господь господь правду и веселие пред всеми языки.
1 Сиона ради не умолчу и иерусалима ради не попущу, дондеже изыдет яко свет правда моя, и спасние мое яко светило разжжется.
2 И узрят языцы правду твою, и царие славу твою, и прозовут тя именем новым, имже господь наименует е.
3 И будеши венец доброты в руце господни и диадима царствия в руце бога твоего:
4 и не прозовешися ктому оставлен, и земля твоя ктому не наречется пуста: тебе бо прозовется воля моя, и земля твоя вселенная, яко благоволи господь в тебе, и земля твоя вкупе населится.
5 И якоже живяй юноша с девою, тако поживутъ сынове твои с тобою: и будет якоже радуется жених о невесте, тако возрадуется господь о тебе.
6 И на стенах твоих, иерусалиме, приставихъ стражы весь день и всю нощь, иже до конца не премолкнут поминающе господа.
7 Несть бо вам подобен: аще исправиши и сотвориши, иерусалиме, радование на земли.
8 Клятся господь десницею своею и крепостию мышцы своея: аще ктому отдам пшеницу твою и пищу твою врагом твоим, и аще ктому испиют вино твое сынове чуждии, о немже трудился еси:
9 но собирающии снедят я и похвалят господа, и обымающии испиют я во дворех святыхъ моих.
10 Идите враты моими и путь сотворите людемъ моим, и камение, еже на пути, размещите: воздвигните знамение на языки.
11 Се бо, господь слышано сотвори до последнихъ земли: рцыте дщери сионове: се, спаситель твой грядет, имеяй с собою мзду и дело свое пред лицем своим.
12 И прозовет я люди святы, избавлены господем: ты же прозовешися взыскан град и не оставлен.
1 Кто сей пришедый от едома, червлены ризы его от восора, сей красен во утвари, зело с крепостию? Аз глаголю правду и судъ спасния.
2 Почто червлены ризы твоя и одежды твоя яко от истоптания точила?
3 Исполнен истоптания, и от язык несть мужа со мною: и попрах я яростию моею, и сотрох я яко персть, и сведох кровь ихъ в землю и вся ризы моя омочих:
4 день бо воздаяния прииде на них, и лето избавления приспе:
5 и воззрех, и не бе помощника: и помыслих, и никтоже заступи: и избави я мышца моя, и ярость моя наста:
6 и попрах я гневом моим и сведох кровь их в землю.
7 милость господню помянух, добродетели господни во всех, имиже нам воздает: господь, судия благ дому израилеву, наводит нам по милости своей и по множеству правды своея.
8 И рече: не людие ли мои? чада, и не отвергнутся. И бысть им во спасние от всякия скорби их.
9 Не ходатай, ниже ангел, но сам господь спасе их, зане любит их и щадит их: самъ избави их и восприят их и вознесе ихъ во вся дни века.
10 Тии же не покоришася и разгневаша духа святаго его, и обратися им на вражду, и той воева на ня.
11 И помяну дни вечныя: где возведый от земли В нек.: от моря. пастыря овец своихъ? где есть вложивый в них духа святаго?
12 Возведшая десницею моисеа, мышца славы его раздели воду пред лицем его сотворити ему имя вечно,
13 проведе их сквозе бездну, якоже коня сквозе пустыню, и не утрудишася,
14 и яко скоты по полю, и сниде дух от господа и настави их: тако провел еси люди твоя сотворити тебе самому имя славно.
15 обратися, господи, от небесе и виждь от дому святаго твоего и славы твоея: где есть ревность твоя и крепость твоя? где есть множество милости твоея и щедрот твоих, яко терпелъ еси намъ?
16 Ты бо еси отец наш, понеже авраамъ не уведе нас, и израиль не позна нас, но ты, господи, отец наш, избави ны, исперва имя твое на нас есть.
17 Что уклонил еси нас, господи, от пути твоего? и ожесточил еси сердца наша, еже не боятися тебе? обратися ради раб твоих, ради племен достояния твоего,
18 да (поне) мало наследим горы святыя твоея. Противницы наши попраша святыню твою:
19 быхом яко исперва, егда не владелъ еси нами, ниже бе наречено имя твое на нас.
1 Аще отверзеши небо, трепет приимут от тебе горы и растают,
2 яко тает воск от лица огня, и попалитъ огнь супостаты, и явлено будет имя твое в сопротивных твоих: от лица твоего языцы возмятутся:
3 егда сотвориши славная, трепет приимутъ от тебе горы.
4 от века не слышахом, ниже очи наши видеша бога, разве тебе, и дела твоя, яже сотвориши ждущим милости.
5 милость бо срящет творящих правду, и пути твоя помянутся: се, ты разгневался еси, и мы согрешихом.
6 Сего ради заблудихом и быхом яко нечисти вси мы, якоже порт нечистыя вся правда наша, и отпадохом яко листвие беззаконий ради наших: тако ветр восхитит нас.
7 И несть призываяй имя твое и помянувый удержати тя: яко отвратил еси лице твое от нас и предал ны еси беззаконий ради наших.
8 И ныне, господи, отец наш еси ты, мы же брение, дела руку твоею вси:
9 не прогневайся на ны зело и не помяни во время беззаконий наших, и ныне призри, яко людие твои вси мы.
10 Град святилища твоего бысть пуст, сионъ якоже пустыня бысть, иерусалим на проклятие:
11 дом святый наш и слава, юже благословиша отцы наши, бысть огнем пожжен, и вся славная наша купно падоша.
12 И от всех сих терпел еси, господи, и молчал, и смирил еси ны зело.
1 Явлен бых не ищущим мене, обретохся не вопрошающим о мне, рекох: се, есмь: языку, иже не призваша имене моего.
2 Прострох руце мои весь день к людем не покаряющимся и противу глаголющим, иже не ходиша путем истинным, но вслед грехов своих.
3 Людие сии разгневляющии мя пред лицем моимъ присно: тии жертвы приносят в вертоградехъ и кадят во чрепех бесом, иже не суть,
4 и во гробех и во пещерах лежат соний ради, иже ядят мяса свиная и юху треб, осквернени сосуди их вси:
5 иже глаголют: отиди от мене, не прикоснися мне, яко чист есмь. Сей дым ярости моея, огнь горит в нем вся дни.
6 Се, написася предо мною: не умолчу, дондеже отдам в недра им грехи их и грехи отец их, глаголет господь:
7 иже кадяху на горах и на холмех укориша мя, отдам дела их в недра им.
8 Тако глаголет господь: имже образом обретается ягода на грезне, и рекут: не погуби его, яко благословение есть в нем: тако сотворю служащаго ми ради, не имам всех погубити ради его:
9 и изведу из иакова семя и из иуды, и наследит гору святую мою, и наследят избраннии мои и раби мои и вселятся тамо.
10 И будут во дубраве ограды стадом, и юдоль ахорская в покоище говядов людем моим, иже взыскаша мене.
11 Вы же, оставившии мя и забывающии гору святую мою, и уготовляющии демону трапезу и исполняющии щастию растворение,
12 аз предам вас под мечь, вси закланиемъ падете: яко звах вас, и не послушасте, глаголах, и преслушасте и сотвористе лукавое предо мною, и яже не хотех, избрасте.
13 Сего ради тако глаголет господь: се, работающии ми ясти будут, вы же взалчете: се, работающии ми пити будут, вы же возжаждете:
14 се, работающии ми возрадуются, вы же посрамитеся: се, работающии ми возвеселятся в веселии сердца, вы же возопиете в болезни сердца вашего и от сокрушения духа восплачетеся.
15 оставите бо имя ваше в насыщение избраннымъ моим, вас же избиет господь: работающим же мне наречется имя новое,
16 еже благословится на земли, благословят бо бога истиннаго: и кленущиися на земли клятися будут богом истинным, забудут бо печаль свою первую, и не взыдет им на сердце.
17 Будет бо небо ново и земля нова, и не помянутъ прежних, ниже взыдут на сердце их,
18 но радость и веселие обрящут на ней, яко се, аз творю веселие иерусалиму и людем моимъ радость.
19 И возвеселюся о иерусалиме и возрадуюся о людех моих, и ксему не услышится в немъ глас плача, ни глас вопля,
20 ниже будет тамо младенец, ни старец, иже не исполнит лет своих: будет бо юный ста лет, умираяй же грешник ста лет и проклятъ будет.
21 И созиждут домы и сами вселятся, и насадятъ винограды и сами снедят плоды их.
22 Не созиждут, да инии вселятся, и не насадят, да инии снедят: якоже бо дние древа жизни, будут дние людий моих: дела бо трудов ихъ обетшают.
23 Избраннии же мои не имут трудитися вотще, ниже породят чад на проклятие, яко семя благословено есть богом, и внуцы их с ними будут.
24 И будет, прежде неже воззвати им, азъ услышу их, еще глаголющим им, реку: что есть?
25 Тогда волцы и агнцы имут пастися вкупе, и лев яко вол снесть плевы, и змия землю яко хлеб: не повредят, ниже погубят на горе святей моей, глаголет господь.
1 Тако глаголет господь: небо престол мой, земля же подножие ногу моею: кий дом созиждете ми, и кое место покоища моего?
2 Вся бо сия сотвори рука моя, и сия суть вся моя, глаголет господь. И на кого воззрю, токмо на кроткаго и молчаливаго и трепещущаго словесъ моихъ?
3 Беззаконник же жряй ми телца, яко убиваяй пса: и приносяй семидал, яко кровь свиную: даяй ливан в память, аки хулник. И тии избраша пути своя, и мерзости их, яже душа ихъ изволи.
4 И аз изберу поругания их и грехи ихъ воздам им: яко звах их, и не послушаша мене, глаголах, и преслушаша и сотвориша злое предо мною, и яже не хотех, избраша.
5 услышите глагол господень, трепещущии словесе его: рцыте, братия, ненавидящим вас и гнушающимся, да имя господне прославится и явится во веселии их, и они посрамятся.
6 Глас вопля от града, глас от храма, гласъ господа воздающаго воздаяние сопротивящимся.
7 Прежде неже чревоболети ей, роди, прежде неже приити труду чревоболения, избеже и породи мужеск пол.
8 Кто слыша сицевое, и кто виде сице? аще родила земля с болезнию во един день? или и родися язык весь купно, яко поболе и роди сион дети своя?
9 Аз же дах чаяние сие, и не помянул еси мене, рече господь. Не се ли, аз родящую и неплодную сотворихъ? рече бог твой.
10 Веселися, иерусалиме, и торжествуйте в нем, вси любящии его и живущии в нем: радуйтеся вкупе с ним радостию, вси елицы плакасте о нем,
11 да ссете и насытитеся от сосца утешения его, да ссавше насладитеся от входа славы его.
12 яко сия глаголет господь: се, аз укланяю на ня аки реку мира, и аки поток наводняемый славу языков: дети их на рамена взяты будутъ и на колену утешатся.
13 якоже аще кого мати утешает, тако и аз утешу вы, и во иерусалиме утешитеся
14 и узрите, и возрадуется сердце ваше, и кости ваша яко трава прозябнут: и познается рука господня боящимся его, и запретит непокаряющимся.
15 Се бо, господь яко огнь приидет, и яко буря колесницы его, воздати яростию отмщение свое и прещение во пламени огненне:
16 огнем бо господним судитися будет вся земля, и мечем его всяка плоть: мнози язвени будут от господа.
17 очищающиися и освящающиися во вертоградехъ и в преддвериих ядущии мясо свиное и мерзости и мыши вкупе погибнут, рече господь.
18 И аз дела их и помышление их вем, и гряду собрати вся народы и языки, и приидутъ и узрят славу мою:
19 и оставлю на них знамение, и послю от них спасеных во языки, во фарсис и в фуд, и в луд и в мосох, и в фовель и во елладу, и во островы дальния, иже не слышаша имене моего, ниже видеша славу мою: и возвестятъ славу мою во языцех,
20 и приведут братию вашу от всех языкъ дар господеви, с коньми и колесницами и с носилами мсков, под сеньми во святый град иерусалим, рече господь, аки бы принесли сынове израилевы жертвы своя мне со псалмы в дом господень:
21 и от тех поиму себе жерцы и левиты, рече господь.
22 якоже бо небо ново и земля нова, яже аз творю, пребывают предо мною, глаголет господь, тако станет семя ваше и имя ваше:
23 и будет месяц от месяца, и суббота от субботы, приидет всяка плоть поклонитися предо мною во иерусалим, рече господь:
24 и изыдут и узрят трупы человековъ преступивших мне: червь бо их не скончается, и огнь их не угаснет, и будут в позоръ всяцей плоти.
Конец книзе пророка исаии: имать в себе глав 66.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>