Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга Премудрости Иисуса сына Сирахова
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31 | 32 | 33 | 34 | 35 | 36 | 37 | 38 | 39 | 40 | 41 | 42 | 43 | 44 | 45 | 46 | 47 | 48 | 49 | 50 | 51
Понеже многая и великая нам чрез закон и пророки и иных последовавших им дана быша, о нихже подобает хвалити израиля наказания и премудрости ради, и яко не токмо сами чтуще должни разумными быти, но да и иностранных возмогут прилежно учащеся пользовати, и глаголюще и пишуще: дед мой иисус множайше себе вдав в чтение закона же и пророков и иных отеческихъ книг, и в сих доволное искусство стяжав, понудися и сам написати нечто от надлежащих к наказанию и премудрости, да прилежно учащиися, и сих причастницы бывше, много паче успеют в законнем житии.
Будите убо умоленни, да со благоволением и вниманиемъ чтете, и прощение подасте, аще в некиих возмнимся недоволни быти во истолковании люботрудно изобретенныхъ речений: не равную бо силу имут та в себе, яже еврейски глаголема суть, егда преведутся на иный язык: не токмо же сия, но и самый закон и пророчества и прочия книги не малое имеют разнство в себе чтомыя.
В тридесять бо осмем лете при евергете цари пришед во египет и премедлив, обретох немалаго наказания свиток, за нуждейшее вмених сам привнести некое тщание и трудолюбие к преведению тоя книги, многое бдение и искусство привнес в разстоянии времене, къ концу приводя книгу издати, и в преселении хотящимъ учитися, предуготовляющим нравы законно жителствовати.
1 Всяка премудрость от господа и с ним есть во век.
2 Песка морскаго, и капли дождевныя, и дни века кто изочтетъ?
3 Высоту небесе и широту земли, и бездну и премудрость кто изследитъ?
4 Прежде всех создася премудрость, и разум мудрости от века.
5 Источник премудрости слово божие в вышних, и шествия ея заповеди вечныя.
6 Корень премудрости кому открыся? и коварства ея кто разуме?
7 Един есть премудр, страшен зело, седяй на престоле своем, господь.
8 Сам созда ю, и виде, и сочте ю,
9 и излия ю на вся дела своя,
10 со всякою плотию по даянию своему, и дарова ю любящимъ его.
11 Страх господень слава и похвала, и веселие и венецъ радости.
12 Страх господень возвеселит сердце и даст веселие и радость и долгоденствие.
13 Боящемуся господа благо будет на последок, и в день скончания своего обрящет благодать. Страх господень даръ от господа и на стезях любления поставляет.
14 Любление господа преславная премудрость, и имже является, разделяет себе в ведение его.
15 Начало премудрости боятися господа, и с верными в ложеснехъ создася им: с человеки основание века угнезди и с семенем их уверится.
16 Исполнение премудрости еже боятися господа, и упоитъ их от плодов ея:
17 весь дом их исполнит желаний своих и сосуды от жит ея.
18 Венец мудрости страх господень, возцветаяй мир и здравие изцеления: обоя же суть дары божии, и разширяетъ веселие любящим его.
19 И виде и сочте ю: художество и ведение разума одожди, и славу держащих ю вознесе.
20 Корень премудрости еже боятися господа, и ветви ея долгоденствие.
21 Страх господень отреяет грехи: пребываяй же в немъ отвращает гнев.
22 Не может ярость неправедная оправдитися: устремление бо ярости его падение ему.
23 До времене стерпит долготерпеливый, и последи воздастъ ему веселие:
24 до времене скрыет словеса своя, и устне верныхъ исповедят разум его.
25 В сокровищих премудрости притча ведения: мерзость же грешнику богочестие.
26 Возжелев премудрости, соблюди заповеди, и господь подастъ ю тебе:
27 премудрость бо и наказание страх господень, и благоволение его вера и кротость.
28 Не сумневайся о страсе господни и не приступи к нему сердцем раздвоеным.
29 Не лицемерствуй пред усты человеческими и устнамъ твоим вонми.
30 Не возносися, да не падеши и наведеши души твоей безчестие, и открыет господь тайная твоя и посреде сонма низложитъ тя: яко не приступил еси во истине ко страху господню, и сердце твое исполнено лукавства.
1 Чадо, аще приступаеши работати господеви богу, уготови душу твою во искушение:
2 управи сердце твое и потерпи, и не скор буди во время наведения:
3 прилепися ему и не отступи, да возрастеши на последокъ твой.
4 Все елико аще нанесено ти будет, приими и во изменении смирения твоего долготерпи:
5 яко во огни искушается злато, и человецы приятни в пещи смирения.
6 Веруй ему, и заступит тя, и управи пути твоя и уповай нань.
7 Боящиися господа, пождите милости его и не уклонитеся, да не падете.
8 Боящиися господа, веруйте ему, и не имать отпасти мзда ваша.
9 Боящиися господа, надейтеся на благая и на веселие века и милости.
10 Воззрите на древния роды и видите, кто верова господеви и постыдеся? или кто пребысть во страсе его и оставися? или кто призва его, и презре и?
11 Зане щедр и милостив господь, и оставляет грехи, и спасает во время скорби.
12 Горе сердцам страшливым и рукам ослабленым, и грешнику ходящу на две стези.
13 Горе сердцу ослаблену, яко не верует: сего ради покровено не будет.
14 Горе вам погубльшим терпение: и что сотворите, егда посетит господь?
15 Боящиися господа не сумневаются о глаголех его, и любящии его сохранят пути его.
16 Боящиися господа поищут благоволения его, и любящии его исполнятся закона.
17 Боящиися господа уготовят сердца своя и пред нимъ смирят души своя, (глаголюще:)
18 да впадем в руце господни, а не в руце человечески, яко бо величество его, тако и милость его.
1 Мене отца послушайте, чада, и сице творите, да спасетеся:
2 господь бо прослави отца на чадех и суд матере утверди на сынех.
3 Чтый отца очистит грехи,
4 и яко сокровищствуяй прославляяй матерь свою.
5 Чтый отца возвеселится о чадех и в день мольбы своея услышан будет.
6 Прославляяй отца долгоденствовати будет, и послушаяй господа упокоит матерь свою.
7 Бояйся господа почтит отца и яко владыкам послужитъ родившим его.
8 Делом и словом чти отца твоего и матерь, да найдетъ ти благословение от них.
9 Благословение бо отчее утверждает домы чад, клятва же матерня искореняет до основания.
10 Не славися в безчестии отца твоего, несть бо ти слава отчее безчестие:
11 слава бо человеку от чести отца его, и поношение чадом мати в безславии.
12 Чадо, заступи в старости отца твоего и не оскорби его в животе его:
13 аще и разумом оскудевает, прощение имей и не обезчести его всею крепостию твоею.
14 Милость бо отча не забвена будет, и противу греховъ присозиждется тебе:
15 в день скорби твоея воспомянет тя: якоже лед от зноя, тако растают греси твои.
16 Коль хулен оставляяй отца, и проклят господем раздражаяй матерь свою.
17 Чадо, в кротости дела твоя препровождай, и человекомъ приятным возлюблен будеши.
18 Елико велик еси, толико смиряйся, и пред господемъ обрящеши благодать.
19 Мнози суть высоцы и славни: но кротким открываются тайны,
20 яко велия сила господня, и смиренными славится.
21 Вышших себе не ищи и крепльших себе не испытуй.
22 яже ти повеленна, сия разумевай: несть бо ти потреба тайных.
23 Во избытцех дел твоих не любопытствуй: вящшая бо разума человеческаго показана ти суть:
24 многи бо прельсти мнение их, и мнение лукавно погуби мысль их.
25 И любяй бедство впадет в не:
26 сердце жестоко озлобится на последок:
27 сердце жестоко отяготится болезньми, и грешник приложитъ грехи на грехи.
28 В наведении величаваго несть изцеления: сад бо лукавствия вкоренися в нем.
29 Сердце разумиваго уразумеет притчу, и ухо слышателя вожделение премудраго.
30 огнь горящь угасит вода, и милостыня очиститъ грехи.
31 Воздаяй благодати помнимь бывает по сих и во время падения своего обрящет утверждение.
1 Чадо, живота нищаго не лиши и не отвращай очесъ от просящаго,
2 души алчущия не оскорби и не разгневай мужа в нищете его,
3 сердца раздраженаго не превозмути и не продолжай даяния требующему,
4 раба скорбяща не отрей и не отврати лица твоего от нищаго,
5 от требующаго не отврати очес и не даждь места человеку кляти тя:
6 кленущаго бо тя в горести души своея мольбу услышитъ сотворивый его.
7 Приятна соборищу твори себе и князю смиряй главу твою,
8 приклони ухо твое к нищему и отвещай ему мирная в кротости,
9 изми обидимаго из руки обидящаго и не малодушествуй, егда судиши,
10 буди сирым яко отец и вместо мужа матери их:
11 и будеши яко сын вышняго, и возлюбит тя паче неже мати твоя.
12 Премудрость сыны своя вознесе и заступает ищущихъ ея:
13 любяй ю любит жизнь, и утренюющии к ней исполнятся веселия:
14 держайся ея наследит славу, и идеже входит, благословит его господь:
15 служащии ей послужат святому, и любящих ю любитъ господь:
16 слушаяй ея судити имать языки, и внимаяй ей вселится надеявся.
17 Аще уверуеши, наследиши ю, и во одержании будутъ роды его:
18 яко стропотно ходит с ним в первых, боязнь же и страх наведет нань
19 и помучит его в наказании своем, дондеже веру имет души его и искусит его во оправданиихъ своих,
20 и паки возвратится прямо к нему и возвеселит его
21 и открыет ему тайны своя:
22 аще заблудит, оставит его и предаст его в руце падения его.
23 Блюди время и хранися от лукаваго,
24 и о души твоей не постыдися:
25 есть бо стыд наводяй грех, и есть стыд слава и благодать.
26 Не приими лица на душу твою и не срамляйся о падении твоем.
27 Не возбрани словесе во время спасения:
28 в словеси бо познана будет премудрость, и наказание в глаголех языка.
29 Не пререкай противу истины и о ненаказании твоемъ срамляйся:
30 не стыдися исповедати грехи твоя и не воспящай быстрины речныя.
31 И не подстелися мужу бую и не обинися лица сильнаго.
32 Даже до смерти подвизайся о истине, и господь бог поборетъ по тебе.
33 Не буди скор языком твоим, ленив же и слаб въ делех твоих.
34 Не буди яко лев в дому твоем и жестоконеистовъ в рабех твоих.
35 Не буди рука твоя простерта на взятие, а на отдаяние согбена.
1 Не уповай на имения твоя и не и рцы: доволна ми суть.
2 Не последуй души твоей и крепости твоей, еже ходити в похотех сердца твоего,
3 и не рцы: кто мя преможетъ? господь бо мстяй отмститъ ти.
4 Не рцы: согреших, и что ми бысть? господь бо есть долготерпелив.
5 о очищении безстрашен не буди, прилагати грехи на грехи,
6 не рцы: щедрота его многа есть, множество греховъ моих очистит:
7 милость бо и гнев у него, и на грешницех почиетъ ярость его.
8 Не медли обратитися ко господу и не отлагай день от дне:
9 внезапу бо изыдет гнев господень, и во время мести погибнеши.
10 Не уповай на имения неправедна: ни чимже бо упользуютъ в день наведения.
11 Не вей себе всяким ветром и не ходи всяким путем: сице грешник двоязычен.
12 Буди утвержден в разуме твоем, и едино буди слово твое.
13 Буди скор в слушании твоем, и с долготерпениемъ отвещавай ответ.
14 Аще есть в тебе разум, отвещай искреннему: аще же ни, то буди рука твоя на устех твоих.
15 Слава и безчестие в беседе и язык человечь падение ему.
16 Не слови шепотник и языком твоим не уловляй:
17 на тати бо студ есть и зазор лукав над двоязычным.
18 о велице и о мале не неразумевай.
1 И вместо друга не буди враг, имя бо лукаво студ и поношение наследит: сице грешник двоязычен.
2 Не возноси себе советом души твоея, да не расхищена будет аки юнец душа твоя:
3 листвие твое пояси и плоды твоя погубиши и оставиши себе яко древо сухо.
4 Душа лукава погубит стяжавшаго ю и порадование врагомъ сотворит его.
5 Гортань сладок умножит други своя, и язык доброглаголивъ умножит добры беседы.
6 Мирствующии с тобою да будут мнози, советницы же твои един от тысящ.
7 Аще стяжеши друга, во искушении стяжи его и не скоро уверися ему:
8 есть бо друг во время свое и не пребудет во время скорби твоея,
9 и есть друг пременяяйся во врага и свар поношения твоего открыет,
10 и есть друг общник трапезам и не пребудетъ во время скорби твоея:
11 и во благих твоих будет якоже ты и на рабы твоя дерзнет:
12 аще смирен будеши, будет на тя и от лица твоего скрыется.
13 от врагов твоих отлучися и от другов твоих внимай.
14 Друг верен кров крепок: обретый же его обрете сокровище.
15 Другу верну несть измены, и несть мерила доброте его.
16 Друг верен врачевание житию, и боящиися господа обрящутъ его.
17 Бояйся господа управляет дружбу свою, якоже бо сам, тако и искренний его.
18 Чадо, от юности твоея избери наказание, и даже до седин обрящеши премудрость.
19 якоже оряй и сеяй приступи к ней и жди благихъ плодов ея:
20 в делании бо ея мало потрудишися и скоро ясти будеши плоды ея.
21 Коль стропотна есть зело ненаказанным, и не пребудетъ в ней безумный:
22 якоже камень искушения крепок будет на нем, и не замедлит отврещи ея.
23 Премудрость бо по имени ея есть и не многимъ есть явна.
24 Слыши, чадо, и приими волю мою, и не отвержи совета моего:
25 и введи нозе твои во оковы ея и в гривну ея выю твою:
26 подложи рамо твое и носи ю, и не гнушайся узами ея:
27 всею душею твоею приступи к ней и всею силою твоею соблюди пути ея.
28 Изследи и взыщи, и познана ти будет, и емься за ню не остави ея:
29 на последок бо обрящеши покой ея, и обратится тебе на веселие.
30 И будут ти пута ея на покой крепости и гривны ея на одеяние славы.
31 Красота бо злата есть на ней, и узы ея извитие вакинфово:
32 во одежду славы облечешися ею, и венец радости возложиши на ся.
33 Аще восхощеши, чадо, наказан будеши, и аще вдаси душу твою, хитр будеши:
34 аще возлюбиши слушати, приимеши, и аще приклониши ухо твое, премудр будеши.
35 Во множестве старейшин ставай, и аще кто премудр, тому прилепися. всяку повесть божественную восхощи слышати, и притчи разума да не убежат тебе.
36 Аще узриши разумна, утренюй к нему, и степени дверий его да трет нога твоя.
37 Размышляй в повелениих господних и в заповедех его поучайся присно: той утвердит сердце твое, и желание премудрости дано ти будет.
1 Не твори зла, и не постигнет тя зло:
2 отступи от неправды, и уклонится от тебе.
3 Сыне, не сей на браздах неправды и не имаши пожати их седмерицею.
4 Не проси у господа владычества, ниже от царя седалища славы.
5 Не оправдай себе пред богом и пред царем не мудрися.
6 Не ищи, да будеши судия, егда не возможеши отяти неправды: да не когда убоишися лица сильнаго и положиши соблазн в правости твоей.
7 Не согрешай во множестве града и не низлагай себе в народе.
8 Не свяжи дважды греха, и во единем бо не неповиненъ будеши.
9 Не рцы: на множество даров моих воззрит, и приносящу ми богу вышнему, приимет.
10 Не малодушествуй в молитве твоей и милостыню творити не презри.
11 Не ругайся человеку сущу в горести души его: есть бо смиряяй и возносяй.
12 Не ори лжи на брата твоего, ниже другу тожде твори.
13 Не восхощи лгати всякия лжи: учащение бо ея не на благо.
14 Не буди велеречив во множестве старец и не повтори слова в молитве твоей.
15 Не возненавиди труднаго дела и земледелия от вышняго создана.
16 Не привменяй себе ко множеству грешников.
17 Смири душу твою зело.
18 Помяни, яко гнев не замедлит,
19 понеже месть нечестиваго огнь и червь.
20 Не измени друга ни на что, ни брата присна на злате софирстем.
21 Не отступай от жены премудры и благи, ибо благодать ея паче злата.
22 Не озлоби раба делающа во истине, ниже наемника вдающа душу свою.
23 Раба разумива да любит душа твоя, и не лиши его свободы.
24 Есть ли ти скот, призирай его, и аще ти будетъ потребен, да пребудет ти.
25 Суть ли ти чада, накажи я и преклони от юности выю их.
26 Суть ли ти дщери, внимай телу их и не являй веселаго к ним лица твоего.
27 Выдай дщерь, и будеши совершивый дело велико: и мужеви разумиву даждь ю.
28 Есть ли ти жена по души, не изжени ея.
29 Всем сердцем твоим прославляй отца твоего и матерних болезней не забуди:
30 помяни, яко тема рожден еси, и что има воздаси, якоже она тебе?
31 Всею душею твоею благоговей господеви и иереи его чти.
32 Всею силою (твоею) возлюби сотворшаго тя и служителей его не остави.
33 Бойся господа и прослави иереа, и даждь часть ему, якоже заповедано ти:
34 начатки, и о согрешении, и даяние мышцей, и жертву святыни, и начаток святых.
35 И нищему простри руку твою, да совершится благословение твое.
36 Благодать даяния пред всяким живым (да будетъ), и над мертвецем не возбрани благодати.
37 Не устраняйся от плачущих и с сетующими сетуй.
38 Не ленися посещати боляща: сими бо возлюблен будеши.
39 Во всех словесех твоих поминай последняя твоя, и во веки не согрешиши.
1 Не сварися с человеком сильным, и да не когда впадеши в руце его.
2 Не тяжися с человеком богатым, да не когда отяготитъ ти меру:
3 многих бо погуби злато, и сердца царская преклони.
4 Не сварися с человеком язычным и не накладай на огнь его дров.
5 Не играй с ненаказанным, да не приимут безчестия прародителие твои.
6 Не поноси человеку обращающуся от греха: помяни, яко вси есмы во епитимиах.
7 Не безчести человека в старости его: ибо и ты сам состареешися.
8 Не радуйся о мертвеце бывшем враждебнейшем тебе: помяни, яко вси умираем.
9 Не презри повести премудрых и в притчах их живи:
10 яко от них навыкнеши наказанию и служити вельможамъ удобно.
11 Не отступай от повести старцев: ибо тии навыкоша от отец своих:
12 яко от них навыкнеши разуму и во время потребно дати ответ.
13 Не возгнещай углия грешнику, да не сгориши огнемъ пламене его.
14 Не востани на лице досадителево, да не приседит яко наветник устом твоим.
15 Взаим не дай человеку крепльшу тебе, и аще даси, буди якоже погубивый.
16 Не поручайся выше силы твоея: и аще поручишися, яко воздаяй пецыся.
17 Не сварися со судиею: по разсуждению бо его будутъ судити ему.
18 С дерзым не ходи на путь, яко да не отяготится на тя: той бо сотворит по воли своей, и с буйством его погибнеши.
19 С яростивым не сварися и не иди с ним сквозе пустыню: пред очима бо его кровь яко ничтоже есть, и идеже несть помощи, тамо низложит тя.
20 С буим совета не твори: не возможет бо слова удержати.
21 Пред чужим не твори тайнаго: не веси бо, что родитъ ти.
22 Всякому человеку не являй сердца твоего, да не воздастъ ти благодати ложныя.
1 Не ревнуй жене недра твоего, ниже научи на тебе самаго учению лукаву.
2 Не даждь жене души твоея, еже превзыти ей надъ крепость твою.
3 Не сретай жены блудницы, да не како впадеши в сети ея.
4 К спевающей не примешайся, да не како увязнеши въ начинаниих ея.
5 Девы не назирай, да не когда соблазнишися в красоте ея.
6 Не даждь блудницам души твоея, да не погубиши наследия твоего.
7 Не обзирай стогн града и в пустых его не заблуждай.
8 отврати око твое от жены красныя и не назирай чуждыя доброты:
9 добротою женскою мнози прельстишася, и от сея похоть яко огнь разгарается.
10 С мужатицею отнюд не седи и не медли с нею в вине:
11 да не когда приклонится душа твоя на ню, и духом твоимъ поползнешися в пагубу.
12 Не оставляй друга стараго, новый бо несть точен ему:
13 вино новое друг нов: аще обетшает, с веселиемъ испиеши его.
14 Не ревнуй славе грешника: не веси бо, кое будетъ превращение его.
15 Не соизволи изволением нечестивых: помяни, яко даже до ада не оправдятся.
16 Далече отступи от человека, иже имать власть убивати, и не убоишися страха смертна:
17 и аще приступиши, не согрешай, да не отимет живота твоего:
18 познавай, яко посреде сетей минуеши и по забраломъ града ходиши.
19 По крепости твоей разсмотряй искренняго и со премудрыми советуй.
20 С разумивыми буди размышление твое, и вся повесть твоя в законе вышняго.
21 Мужие праведнии да вечеряют с тобою, и во страсе господни буди хвала твоя.
22 от руки художников дело похвалено бывает, и вождь людий премудр в словеси своем.
23 Страшен во граде своем муж язычен, и дерзый въ словеси своем возненавиден будет.
1 Премудр судия наказует люди своя, и владычество разумиваго благочинно будет.
2 якоже судия людий своих, тако и слузи его, и якоже владыка града, тако и вси живущии в нем.
3 Царь ненаказаный погубит люди своя: и град населится премудростию сильных.
4 В руце господни власть земли, и потребнаго воздвигнетъ во время на ней.
5 В руце господни благое шествие мужа, и на лицы книжника возложит славу свою.
6 Во всяцей неправде не держи гнева на искренняго и не твори ни коего в делех досаждения.
7 Возненавидена пред богом и человеки гордыня и от обоих сотворит неправедная.
8 Царство от языка в язык преводится, ради неправды и досаждения и имений льстивых.
9 Почто гордится земля и пепелъ?
10 яко в животе извергох утробу его.
11 Долгую болезнь отсецает врачь:
12 и царь днесь, а утро умрет.
13 Ибо егда умрет человек, наследит гады и звери и червие.
14 Начало гордыни человеку отступление от господа, и егда от сотворшаго и отвращается сердце его:
15 яко начало греха гордыня, и держай ю изрыгнетъ скверну.
16 Сего ради обезслави господь в наведениих зол и низврати их до конца:
17 престолы князей низложи господь и посади кроткия вместо их,
18 корения языков гордых исторже господь и насади смиренныя вместо их,
19 страны языков низврати господь и погуби их до основания земли,
20 изсуши от них и погуби их и потреби от земли память их.
21 Не создана бысть человеком гордыня, ни гнев ярости рождением жен.
22 Семя честное кое? семя человеческое. семя честное кое? боящиися господа.
23 Семя безчестное кое? семя человеческое. семя безчестное кое? преступающии заповеди.
24 Посреде братии старейшина их честен, и боящиися господа пред очима его.
25 Богат и славен и нищь, похвала их страх господень.
26 Неправедно есть укоряти нища разумива, и не подобаетъ славити мужа грешника.
27 Вельможа и судия и сильный славни будут, и несть от них ни един вящший боящагося господа.
28 Рабу разумиву свободнии послужат, и муж хитр не поропщет наказуемь.
29 Не мудрися творити дела своего, и не слави себе во время туги твоея.
30 Лучше делаяй и изобилуяй во всем, неже славяйся и лишаяйся хлеба.
31 Чадо, кротостию прослави душу твою и даждь ей честь по достоинству ея.
32 Согрешающаго на душу свою кто оправдитъ? и кто прославитъ безчествующа живот свой?
33 Нищий славимь есть вежества ради своего, и богатый славимь есть богатства ради своего.
34 Прославляемый же в нищете, а в богатстве кольми паче? безславный же в богатстве, а в нищете кольми паче?
1 Премудрость смиреннаго вознесет главу его и посреде вельмож посадит его.
2 Не похвали человека во красоте его, и не буди ти мерзок человек видением своим.
3 Мала есть в пернатых пчела, и начаток сладостей плод ея.
4 Во одеянии риз не похвалися и в день славы не превозносися: яко дивна дела господня и тайна дела его пред человеки.
5 Мнози мучителие седоша на земли, нечаемый же увязеся венцем.
6 Мнози сильнии укорени быша зело, и славнии предани быша в руки инех.
7 Первее неже испытаеши, не порицай, уразумей прежде и тогда запрещай.
8 Прежде неже услышиши, не отвещавай, и не влагайся в среду беседы.
9 о вещи, яже ти несть на потребу, не тяжися, и на суде грешников не седай.
10 Чадо, деяния твоя да не будут о мнозе: аще умножиши, не будеши неповинен, и аще се гониши, не постигнеши, и не утечеши бежащь.
11 Есть труждаяйся и потяся и тщася, и толико паче лишается.
12 Есть слаб и требуяй заступления, лишаяйся силы, и нищетою изобилует:
13 и очи господни призреста ему во благая, и воздвиже и от смирения его, и вознесе главу его, и дивишася о нем мнози.
14 Благая и злая, живот и смерть, нищета и богатство от господа суть.
15 Даяние господне пребывает благочестивым, и благоволение его благопоспешится во век.
16 Есть богатяйся удержанием и скупостию своею, и сия часть мзды его,
17 внегда рещи ему: обретох покой и ныне ямъ от благ моих.
18 И не весть, кое время приидет, и оставит я инем, и умрет.
19 Стой в завете твоем и пребывай в нем, и в деле твоем обетшай.
20 Не дивися делом грешника, веруй же господеви и пребывай в труде твоем:
21 яко удобно есть пред очима господнима внезапу обогатити нищаго.
22 благословение господне на мзде благочестиваго, и в часъ скор процветет благословение его.
23 Не рцы: кая ми потреба есть, и кая отныне будутъ ми благая?
24 Не рцы: доволна ми суть, и чим отселе озлобленъ буду?
25 В день благих забвение злых, в день же злых не воспомянутся благая:
26 яко удобно есть пред богом, в день смерти воздати человеку по делом его.
27 озлобление времене забытие творит сладости, и в скончании человека открытие дел его.
28 Прежде смерти не блажи ни когоже, и в чадех своихъ познан будет муж.
29 Не всякаго человека вводи в дом твой: многи бо суть козни льстиваго.
30 якоже рябка уловленая в клетце (обглядаетъ), тако сердце гордаго, и якоже соглядник назирает падения:
31 доброе бо на зло обращая, подсаду творит и на добрыя детели возложит порок.
32 от искры огненныя умножается углие, и человекъ грешник на кровь приседит.
33 Блюдися от злодея, зло бо содевает, да не когда порокъ даст ти во век.
34 Всели чуждаго в дом твой, и развратит тя мятежемъ и чужда тя сотворит от твоих ти.
1 Аще добро твориши, разумей, кому твориши, и будет благодать благим твоим.
2 Добро сотвори благочестивому, и обрящеши воздаяние, и аще не от него, то от вышняго.
3 Не будет добро прилежащему во злых и не подающему милостыни.
4 Даждь благочестивому и не заступай грешника.
5 Добро сотвори смиренному и не даждь нечестивому: возбрани хлебы твоя и не даждь ему, да не теми тя преможет:
6 сугуба бо зла обрящеши во всех благих, яже аще сотвориши ему: яко и вышний возненавиде грешники и нечестивым воздаст месть.
7 Даждь благому и не заступай грешника.
8 Не познан будет во благих друг и не скрыется во злыхъ враг.
9 Егда во благих будет муж, врази его во печали суть, во злых же его и друг разлучится.
10 Не ими веры врагу твоему во веки: якоже бо медь ржавеет, тако и злоба его:
11 и аще смирится и пойдет поникнув, настави душу твою и хранися от него, и будеши ему яко очищено зерцало, и уразумееши, яко не до конца оторжаве:
12 не постави его при себе, да не когда изринув тя станет на месте твоем: не посади его одесную себе, да не поищет когда седалища твоего, и на последок уразумееши словеса моя и о глаголех моих умилишися.
13 Кто помилует обаянника змием усекнена и всехъ приступающих ко зверемъ? такожде ходящаго с мужемъ грешником и примешающагося грехом его:
14 час с тобою пребудет, и аще уклонишися, не стерпит.
15 устнама своима усладит враг, и много пошепчетъ и речет добро глаголя: очима своима прослезится, а сердцем своим усоветует вринути тя в ров, и егда обрящет время, не насытится крове.
16 Аще срящут тя злая, ту обрящеши его первее себе,
17 и яко помагаяй подсечет пяту твою:
18 покивает главою своею и восплещет рукама своима, и много пошепчет и изменит лице свое.
1 Касаяйся смоле очернится, и приобщаяйся гордому точен ему будет.
2 Бремене паче себе не воздвижи, и крепльшу и богатейшу себе не приобщайся.
3 Кое причастие горнцу с котломъ? сей приразится, и той сокрушится.
4 Богатый обиду сотвори, и сам приразгневася: нищий же обидимь бысть, и сам приумолится.
5 Аще потребен будеши, употребляет тя: аще же лишенъ будеши, оставит тя.
6 Аще имаши, поживет с тобою и истощит тя, самъ же не поболит.
7 Аще востребует тя, прельстит тя и возсмееттися и даст ти надежду, возглаголет ти добре
8 и речет ти: есть ли ти что потребно? и посрамитъ тя брашном своим, дондеже истощит тя дващи или трищи, и на последок поругаеттися.
9 Потом узрит тя и оставит тя и главою своею покивает на тя.
10 Внимай, да не заблудиши
11 и да не смиришися во веселии твоем.
12 Егда тя сильный призовет, отступай, и толико паче призовет тя.
13 Не приближайся, да не отриновен будеши, и не стой отдалече, да не забвен будеши.
14 Не належи беседовати с ним и не веруй множайшимъ словесем его: многою бо беседою искусит тя и яко смеяся испытает тайная твоя.
15 Немилостив есть не соблюдаяй словес и не пощадитъ (ослабити) озлобления твоего и уз.
16 Блюдися и внимай зело, яко с падением твоим ходиши:
17 слышай сия во сне твоем, бодрствуй.
18 Во всем житии люби господа и призывай его во спасение твое.
19 Всяко животно любит подобное себе, и всяк человекъ искренняго своего:
20 всяка плоть по роду собирается, и подобному себе прилепится муж.
21 Кое общение волку со агнцемъ? тако грешнику со благочестивым.
22 Кий мир гиене со псомъ? и кий мир богатому со убогимъ?
23 Лов львов онагри в пустыни, такожде пажити богатымъ убозии.
24 Мерзость гордому смирение, сице мерзость богатому нищий.
25 Богат колебляйся подтверждается от другов: убогий же падый отреян будет от другов.
26 Богату поползнувшуся мнози заступницы, возглагола нелепая, и оправдаша его:
27 убогий поползнуся, и воспретиша ему, провеща разум, и не даша ему места.
28 Богатый возглагола, и вси умолчаша и слово его вознесоша даже до облак:
29 убогий возглагола, и реша: кто сей есть? и аще преткнется, низвратят его.
30 Добро есть богатство, в немже несть греха, и зла есть нищета во устех нечестиваго.
31 Сердце человеческо изменяет лице его, или на добро или на зло.
32 След сердца во благих лице веселое, и изобретение притчей размышление со трудом.
1 Блажен муж, иже не поползнуся устнама своима и не уязвися печалию греха.
2 Блажен, емуже не зазре душа его, и иже не спаде от надежды своея.
3 Мужеви скупому не лепо есть богатство, и человеку завидливу на что имение?
4 Собираяй от души своея инем собирает, и во благихъ его инии насладятся.
5 Иже себе зол, кому добр будетъ? и не возвеселится во имении своем.
6 Завидящаго себе самому несть злейша: и сие воздаяние злобы его.
7 Аще и добро творит, в забытии творит и на последокъ изъявит злобу свою.
8 Лукав (есть) завидяй оком, отвращаяй лице и презираяй души.
9 око лихоимца не насыщается части, и обида лукаваго изсушает душу.
10 око лукаво завидливо и о хлебе, и на трапезе своей скудно.
11 Чадо, якоже имаши, добро твори себе, и приношения господеви достойно приноси:
12 помяни, яко смерть не замедлит, и завет адовъ не показан ти бысть.
13 Прежде неже умреши ты, добро твори другу и по силе твоей простри и даждь ему.
14 Не лишися от дне добра, и часть желания блага да не прейдет тебе.
15 Не инем ли оставиши притяжания твоя и труды твоя, в разделение жребия?
16 Даждь и возми, и освяти душу твою:
17 яко несть во аде взыскати сладости.
18 Всяка плоть яко риза обетшает, завет бо от века: смертию умреши.
19 яко лист расплощаяся на древе часте, ов убо спадает, другий же прозябает: такожде и род плоти и крови, ов убо умирает, ов же родится.
20 Всякое дело гниющее изчезает, и делаяй е съ ним отидет.
21 Блажен муж, иже во премудрости умрет и иже в разуме своем поучается святыни:
22 размышляяй пути ея в сердцы своем, и в сокровенныхъ ея уразумится.
23 Изыди вслед ея яко изследник и на путехъ ея приседи.
24 Приницаяй сквозе оконца ея и при дверех ея послушает.
25 обитаяй близ дому ея и вбиет кол в стены ея, поставит скинию свою вскрай ея и обитати будет во обители благих,
26 положит чада своя в покрове ея и под ветвьми ея водворится,
27 покрыется ею от зноя и во славе ея обитати будет.
1 Бояйся господа сотворит сие, и держайся закона постигнет ю.
2 И срящет его яко мати, и яко жена девства приимет и:
3 ухлебит его хлебом разума и водою премудрости напоит и:
4 утвердится на ней и не преклонится, и до нея пристанетъ и не постыдится:
5 и вознесет его паче искренних его и посреде церкве отверзет уста его:
6 веселие и венец радости и имя вечно наследит.
7 Не постигнут ея человецы неразумивии, и мужие грешнии не узрят ея:
8 далече есть от гордыни, и мужие лживии не имутъ помянути ея.
9 Не красна похвала во устех грешника, яко не от господа послана бысть:
10 премудростию бо речена будет хвала, и господь благопоспешитъ ей.
11 Не рцы, яко господа ради отступих: ихже бо возненавиде, да не сотвориши.
12 Не рцы, яко сам мя прельсти: не требует бо мужа грешника.
13 Всяку мерзость возненавиде господь, и несть любезна боящимся его.
14 Сам из начала сотвори человека и остави его в руце произволения его:
15 аще хощеши, соблюдеши заповеди и веру сотвориши благоволения.
16 Предложил ти огнь и воду, и на неже хощеши, простреши руку твою.
17 Пред человеком живот и смерть, и еже аще изволит, дастся ему.
18 яко многа премудрость господня: крепок силою и видяй вся:
19 и очи его на боящихся его, и той познаетъ всяко дело человеческо.
20 Не заповеда ни единому же нечествовати и не даде ослабы ни единому не согрешати.
1 Не желай чад множества неключимых, ниже веселися о сынех нечестивых: егда умножатся, не веселися о них, аще несть страха господня с ними.
2 Не веруй животу их и не належи на множество их:
3 лучше бо един праведник, нежели тысяща (грешникъ),
4 и умрети безчадному, нежели имети чада нечестива:
5 от единаго бо разумна населится град, колено же беззаконных запустеет.
6 Многа сицевая виде око мое, и крепльшая сихъ слыша ухо мое.
7 В соборищи грешных возгорится огнь, и во языце непокориве возгорится гнев.
8 Не умолен бысть (богъ) о древних исполинех, иже отступиша крепостию своею:
9 не пощаде о жилищи лотове, имиже возгнушася за гордыню их:
10 не помилова языка погибельнаго, вознесшагося во гресехъ своих,
11 и тако шесть сот тысящ пешцев, сошедшихся въ жестосердии своем. И аще будет един жестоковыйный в людех, дивно есть сие, аще неповинен будет.
12 милость бо и гнев у него, силен умолен быти и излияти гнев.
13 По мнозей милости его, тако много и обличение его: мужеви но делом его судит.
14 Не убежит хищением грешный, и терпение благовернаго не лишено будет.
15 Всяцей милостыни сотворит место: кийждо бо по деломъ своим обрящет.
16 Не рцы, яко от господа скрыюся, еда свыше кто мя помянетъ?
17 в людех множайших не воспомянен буду, что бо есть душа моя в безчисленней твари?
18 се, небо и небо небесе божия, бездна и земля посещениемъ его подвигнутся:
19 вкупе горы и основания земли, егда воззрит на ня, трепетом стрясутся,
20 и о сих не размыслит сердце:
21 и пути его кто постигнетъ? и бурю юже не узритъ человек, множайшая же дел его в сокровенных:
22 дела правды его кто возвеститъ? или кто стерпитъ? далече бо завет.
23 умаляяйся сердцем размышляет сия, а муж безуменъ и заблуждаяй размышляет буяя.
24 Послушай мене, чадо, и научися ведения, и на словеса моя внимай сердцем твоим:
25 изъявляю в мериле наказание и со испытанием возвещу ведение.
26 Судом господним дела его из начала, и от сотворения его раздели части их:
27 украси во век дела своя, и начала их в роды их: ниже взалкаша, ниже утрудишася, и не престаша от дел своих.
28 Кийждо искренняго своего не оскорби,
29 и даже до века не воспротивятся глаголу его.
30 И по сих господь на землю призре и исполни ю от благ своих:
31 душа всякаго животна покры лице ея, и в ню возвращение их.
1 господь созда от земли человека, и паки возврати его в ню.
2 Дни числа и время даде им, и даде им власть над сущими на ней.
3 якоже они сами, облече их крепостию, и по образу своему сотвори я:
4 и положи страх его на всяцей плоти, еже властелствовати зверьми (и скоты) и птицами.
5 Помышление и язык и очи, уши и сердце даде им размышляти:
6 художеством разума исполни я и добрая и злая показа им.
7 Положил есть око свое на сердцах их, показати им величество дел своих,
8 да имя святыни его восхвалят и да поведают величества дел его.
9 Приложил им художество и закон живота даде въ наследие им.
10 Завет вечный постави с ними и судбы своя показа им.
11 Величество славы видеша очеса их, и славу гласа их слыша ухо их.
12 И рече им: внемлите от всякия неправды. и заповеда им комуждо о искреннем.
13 Путие их пред ним выну, не укрыются от очию его.
14 Комуждо языку устроил вожда,
15 и часть господня израиль есть.
16 Вся дела их яко солнце пред ним, и очи его выну на путех их:
17 не укрышася неправды их от него, и вси греси их пред господем.
18 Милостыня мужа яко печать с ним, и благодать человечу яко зеницу соблюдет.
19 По сих востанет и воздаст им, и воздаяние ихъ на главу их воздаст:
20 обаче кающимся дал есть возвращение и утеши изнемогающих терпением.
21 обратися убо ко господу и остави грехи:
22 помолися пред лицем и умали претыкания:
23 восходи к вышнему и отвратися от неправды, и зело возненавиди мерзость.
24 Вышняго кто восхвалит во аде, вместо живых и дающихъ исповедание?
25 от мертвеца яко ничто сущаго погибает исповедание:
26 живый же и здравый восхвалит господа.
27 Коль велика милость господня и очищение обращающимся къ нему?
28 Не могут бо вся быти в человецех:
29 яко не безсмертен сын человеческий.
30 Что светлее солнца? и то изчезает: и зло помыслитъ плоть и кровь.
31 Силу высоты небесныя той сам назирает, человецы же вси земля и пепел.
1 Живый во веки созда вся обще. господь единъ оправдится:
2 никтоже доволен исповести дел его,
3 и кто изследит величия его?
4 Державу величества его кто изочтетъ? и кто приложитъ исповедати милости его?
5 Не леть умалити, ниже приложити, и не леть изследити чудес господних.
6 Егда скончает человек, тогда начинает, и егда престанет, тогда усумнится.
7 Что есть человекъ? и что потреба его? что благо его? и что зло его?
8 Число дний человеку много лет сто: яко капля морския воды и зерно песка, тако мало лет в день века.
9 Сего ради долготерпе господь на них и излия на ня милость свою.
10 Виде и позна низвращение их, яко зло,
11 сего ради умножи милосердие свое.
12 Милость человеча на искренняго своего, милость же господня на всяку плоть.
13 обличаяй и наказуяй, и научаяй и обращаяй яко пастырь стадо свое:
14 приемлющих наказание милует и тщащихся о судбахъ его.
15 Чадо, во благих не даждь порока, и во всяцем даянии печали словес.
16 Не устудит ли зноя роса? тако лучше слово, нежели даяние.
17 Не се ли, слово паче даяния блага? обоя же у мужа благодатна.
18 Буй неблагодарно поносит, и даяние завидливаго истаеваетъ очи.
19 Прежде неже возглаголеши, увеждь, и прежде недуга врачуйся:
20 прежде суда испытай себе и в час посещения обрящеши очищение:
21 прежде даже в недуг не впадеши, смирися, и во время грехов покажи обращение.
22 Не воспятися воздати обет благовременно и не ожидай даже до смерти оправдатися:
23 прежде даже не помолишися, уготови себе, и не буди яко человек искушая господа.
24 Помяни гнев в день скончания и время мести во отвращении лица:
25 помяни время глада во время сытости, нищету и убожество в день богатства.
26 от утра до вечера изменяется время, и вся скора суть пред господем.
27 Человек премудр во всем опасен будет и во днехъ грехов вонмет о согрешении.
28 Всяк разумив позна премудрость, и обретшему ю даст исповедание.
29 Разумнии в словесех, и тии умудришася и умножиша притчи испытны. воздержание души.
30 Вслед похотей твоих не ходи и от похотений своихъ возбраняйся:
31 аще даси души твоей благоволение желания, сотворитъ тя обрадование врагом твоим.
32 Не веселися о мнозей сладости и не связуйся сообщениемъ ея.
33 Не буди нищь пиршествуяй от взаимства, и ничто ти будетъ в мешце.
1 Делатель пиянивый не будет богат, и уничижаяй малая по мале упадет.
2 Вино и жены превратят разумивых, и прилагаяйся любодейцамъ дерзший будет:
3 молие и червие наследят его, и душа дерзостная измется.
4 Емляй скоро веру легок сердцем, и согрешаяй на душу свою согрешает.
5 Веселяйся сердцем о злонравии обличен будет, противляяйся же похотем венчает живот свой.
6 обуздаваяй язык тихомирно поживет, и ненавидяй велеречия умалит порок.
7 Словесе никогдаже повтори, и ничтоже тебе умалится.
8 На друга и на врага не поведай, и аще не будет тебе греха, не открывай:
9 слыша бо у тебе, и соблюдет тя, и во время возненавидитъ тя.
10 Слышал ли еси слово, да умрет с тобою: не убойся, не расторгнет тебе.
11 от лица словесе поболит буй, якоже раждающая от лица младенца.
12 Стрела вонзена в стегно плоти, тако слово во чреве буяго.
13 обличи друга, егда еще не сотворил, и аще сотворил, да не приложит ктому:
14 обличи друга, негли не рече, и аще рече единожды, да не повторит:
15 обличи друга, многажды бо бывает навет.
16 Не всякому словеси емли веры.
17 Есть поползаяйся словом, а не душею: и кто не согреши языком своимъ?
18 обличи искренняго своего прежде прещения, и даждь место закону вышняго. Всяка премудрость страх господень, и во всяцей премудрости творение закона.
19 И несть премудрость ведение лукавства, и несть разума, идеже совет грешных.
20 Есть лукавство, и то мерзость, и есть безуменъ умаляяйся премудростию.
21 Лучше есть умаляяйся в разуме боязливый, нежели избыточествуяй мудростию и преступая закон.
22 Есть коварство испытно, и то неправедно, и есть развращаяй благодать извещати хотя суд.
23 Есть лукавствуяй поник чернотою, и внутренняя его исполнь льсти:
24 понича лицем и притворяяйся глух, идеже не познанъ бысть, предварит тя.
25 И аще немощию крепости возбранен будет согрешити, аще обрящет время, зло сотворит.
26 от зрака познан будет муж, и сретением лица познанъ будет умный.
27 одеяние мужа и смех зубов и стопы человека возвестят, яже о нем.
28 Есть обличение, еже несть красно, и есть молчай, и той мудр.
1 Коль добро есть обличити, нежели яритися тайно: и исповедаяйся от умаления возбранен будет.
2 Коль добро обличенному явити покаяние:
3 сей бо вольнаго избежит греха.
4 Желание скопчо растлит ли девицу? такожде творяй нуждею суды.
5 Есть молчай обретаяйся премудр, и есть ненавидимь от многия беседы.
6 Есть молчай, не имать бо ответа: и есть молчай ведый время.
7 Человек премудр умолчит до времене: продерзый же и безумный превосходит время.
8 умножаяй словеса мерзок будет, и восхищаяй власть возненавиден будет.
9 Есть благопоспешство во злых мужеви, и есть изобретение на умаление.
10 Есть даяние, еже ти не будет на пользу, и есть даяние, егоже отдание сугубо.
11 Есть умаление славы ради, и есть, иже от смирения вознесе главу.
12 Есть купуяй многая малым и возвращаяй я седмерицею.
13 Премудрый во словеси любезна сотворит себе: благодати же безумных излиются.
14 Даяние безумнаго не упользует ти, очи бо его вместо единаго мнози ко восприятию:
15 мало даст, а много поносити будет и отверзет уста своя яко проповедник: днесь взаим даст, а утро истяжет: ненавидимь человек таковый господу и человеком.
16 Буй речет: несть ми друга и несть хвалы благимъ моим: ядущии хлеб мой льстиви языком.
17 Коликощи и колицы посмеются ему?
18 Поползновение на земли лучше неже от языка: тако падение злых со тщанием приидет.
19 Человек безблагодатен баснь безвременна: во устехъ ненаказанных присно будет.
20 от уст буяго отвержена будет притча: не имать бо ея рещи во время свое.
21 Есть возбраняемый согрешати от скудости, и в покои своем не умилится.
22 Есть погубляяй душу свою за стыд, и от лица безумна погубит ю.
23 Есть ради стыда обещаяйся другови, и приобрете его врага туне.
24 Порок зол человеку лжа, и во устех ненаказанныхъ присно будет.
25 уне есть тать, нежели присно лжай: оба же пагубу наследят.
26 обычай человека лжива безчестие, и студ его присно с ним.
27 Премудрый словесы произведет себе, и человек мудрый угоден будет вельможам.
28 Делаяй землю вознесет стог свой, и угождаяй вельможам умилостивит о неправде (своей).
29 Мзда и дарове ослепляют очи премудрых, и якоже бразды на устех отвращают обличения.
30 Премудрость сокровена и сокровище не явлено, кая польза есть во обоихъ?
31 Лучше человек скрываяй буйство свое, нежели человекъ скрываяй премудрость свою.
1 Чадо, согрешил ли еси, не приложи ктому, и о преждних твоих помолися.
2 якоже от лица змиина, бежи от греха: аще бо приступиши к нему, угрызнет тя:
3 зубы львовы зубы его, убивающии души человечи.
4 яко мечь обоюду остр всяко беззаконие, ране его несть изцеления.
5 Прещение и досаждение опустошат богатство: тако и дом гордых запустеет.
6 Моление нищаго из уст до ушию его, и судъ его со тщанием грядет.
7 Ненавидяй обличения последует грешнику, и бояйся господа обратится сердцем.
8 Познан есть издалеча сильный языком, и разумивый весть, егда поползается.
9 Созидаяй дом свой имением чуждим, якоже собираяй камение на гроб себе.
10 Изгребия собрана соборище беззаконников, и кончина их пламень огнен.
11 Путь грешников углажден от камения, а на последокъ его ров адов.
12 Сохраняяй закон содержит помышление свое,
13 и совершение страха господня премудрость.
14 Не накажется, иже не есть коварен:
15 есть бо коварство умножающее горесть.
16 Разум премудраго яко потоп умножится, и советъ его яко источник живота.
17 утроба буяго яко сосуд сокрушен и всякаго разума не удержит.
18 Слово премудро аще услышит разумный, восхвалитъ е и к нему приложит: услыша е буй, и не угодно ему бысть, и обрати е за плещи своя.
19 Повесть буяго яко бремя на пути: во устнах же разумнаго обрящется благодать.
20 уста премудраго взыщутся в собрании, и словеса его размышлена будут в сердцы.
21 якоже дом разорен, тако буяго премудрость, и разумъ неразумнаго неиспытны глаголы.
22 Пута на ногах неразумевающим наказания, и яко ручнии оковы на руце десней.
23 Буй во смехе возносит глас свой, муж же разумный едва тихо осклабится.
24 якоже утварь златая мудрому наказание, и якоже обручь на десней мышце его.
25 Нога буяго скора в дом, человек же многоискусный усрамится от лица.
26 Безумный дверьми приничет во храмину, муж же наказанъ вне станет.
27 Ненаказание человеку слушати при дверех, мудрый же отяготится безчестием.
28 устне многоречивых не своя си поведят, словеса же мудрых в мерилех станут.
29 Во устех буих сердце их, в сердцы же премудрыхъ уста их.
30 Кленущу нечестивому сатану, сам кленет свою душу.
31 Сквернит свою душу шепотливый, и где либо жити имать, возненавиден будет.
1 Камени нечистому уподобися ленивый, и всякъ позвиждет о безчестии его:
2 калу воловию приложися ленивый, всяк вземляй его отрясет руку.
3 Студ отцу ненаказан сын, дщи же на умаление будет.
4 Дщерь мудрая наследит мужа своего, а несрамляющаяся печаль отцу.
5 отца и мужа посрамляет продерзая, и от обою безчестие приимет.
6 яко мусикиа во плачи безвременная повесть: раны же и наказание во всяко время премудрости.
7 яко слепляяй чрепие, тако учай буяго и возбуждаяй спящаго от глубокаго сна:
8 поведает дремлющему поведаяй буему, и на концы речет: что есть?
9 Над мертвым плачися, изчезе бо свет: и над буимъ плачися, изчезе бо разум.
10 Сладчае плачися над мертвым, яко почил есть: буяго же лучше смерть, неже живот зол.
11 Сетование о мертвеце седмь дний, о буем же и нечестивемъ вся дни живота его.
12 Со безумным не множи словес и ко неразумиву не ходи:
13 хранися от него, да не приимеши труда и не осквернишися во отрясении его:
14 уклонися от него, и обрящеши покой, и не уныеши безумием его.
15 Паче олова что тяжчае бываетъ? и что ему имя, токмо буй?
16 Песок и соль и руду железа легчае понести, неже человека неразумива.
17 Сключение древяно связано на созидание храмины во трясении не расторгнется: такожде и сердце утверждено на размышлении совета во время страха не устрашится.
18 Сердце основано на размышлении разума, яко украшение песочное на тесаней стене.
19 яко острози на высоте лежащии противу ветру не стерпят:
20 тако сердце страшливо во размышлении буяго противу всякому страху не стерпит.
21 убодаяй око источит слезы, и убодаяй въ сердце изъявляет чувство.
22 Вергаяй камень на птицы отженет я: и иже поноситъ друга, разорит дружбу.
23 На друга аще извлечеши мечь, не отчаявайся, есть бо возврат (любве):
24 на друга аще отверзеши уста, не убойся, есть бо примирение:
25 кроме поношения и гордыни, и откровения тайны и язвы лестныя, сих бо ради отбежит всяк друг.
26 Веру стяжи в нищете со искренним, да во благихъ его вкупе возвеселишися:
27 во время скорби пребывай с ним, да в наследии его сонаследиши.
28 Прежде огня пещная пара и дым: тако прежде кровей укоризна.
29 Друга заступати не усрамлюся и от лица его не скрыюся:
30 аще ми приключатся и злая его ради, всяк слышай сохранится от него.
31 Кто даст ми во уста моя хранилище и на устне мои печать разумну, да не падуся от них, и язык мой да не погубит мя?
1 господи отче и владыко живота моего, не остави мене в совете их и не даждь ми впасти в ня.
2 Кто возложит на помышление мое раны и на сердце мое наказание премудрости, да о неразумиих моих не пощадят, и да не прейдут греси ихъ?
3 яко да не умножатся неведения моя и греси мои премнози да не будут, и падуся пред супостаты, и порадуетмися враг мой.
4 господи отче и боже живота моего, не даждь возношения очима моима и вожделение отврати от мене.
5 Чрева похоть и блудодеяния да не обымут мя, и безстудней души не предаждь мене.
6 Послушайте, чада, наказания уст: храняй бо не ятъ будет устнама своима.
7 устнама своима ят будет грешник, и клеветникъ и гордый поползнется в них.
8 Заклинанию не обучай уст своихъ
9 и клятися именем святым не навыкай.
10 якоже бо раб истязуемь часто от ран не умалится, такожде и кленыйся именем святым всегда от греха не очистится.
11 Муж кленыйся много исполнится беззакония, и не отступитъ от дому его язва:
12 аще согрешит, грех его на нем, и аще презрит, сугубо согрешит:
13 и аще вотще кляся, не оправдится, исполнится бо дом его нападения.
14 Есть беседа облечена смертию: да не обрящется во наследии иаковли:
15 от благочестивых бо вся сия отступят, и во грехи не впадутся.
16 В ненаказании неключимем не обучай уст своих: есть бо в нем слово греха.
17 Помяни отца твоего и матерь твою, посреде бо вельможъ седиши:
18 да не како забвен будеши пред ними, и обычаем своимъ обуяеши и похощеши, дабы ты не родился, и день рождения твоего прокленеши.
19 Человек обучаяся словесем поношения во всех днехъ своих не научится.
20 Два вида умножают грехи и третий наводит гнев:
21 душа тепла, яко огнь горящь, не угаснет, дондеже поглощена будет:
22 человек блудник в теле плоти своея не престанет, дондеже возжжет огнь.
23 Человеку блудну всяк хлеб сладок, не престанет, дондеже умрет.
24 Человек преступаяй ложе свое, глаголя в души своей: кто мя видитъ?
25 тма окрест мене, и стены закрывают мя, и никтоже мя видит, кого убоюся? грехов моих не воспомянетъ вышний.
26 И очи человечестии страх его:
27 и не разуме, яко очи господни тмами тем кратъ светлейшии солнца суть,
28 прозирающии вся пути человеческия и разсматряющии в тайных местех:
29 прежде неже создана быша, вся уведена ему, такожде и по скончании.
30 Сей на путех града отмщен будет, и идеже не надеяшеся, ят будет.
31 Такожде и жена оставльшая мужа своего и приемлющая наследника от иного:
32 первое бо от закона вышняго отступи, и второе мужу своему согреши, и третие блудом прелюбодействова, от чуждаго мужа чада сотвори:
33 сия пред собор изведена будет, и на чадех ея посещение будет:
34 не укоренятся чада ея в корень, и ветви ея не сотворят плода:
35 и оставит на клятву память свою, и поношение ея не потребится.
36 И уразумеют оставльшиися, яко ничтоже лучше страха господня, и ничтоже сладчае, токмо внимати заповедемъ господним.
37 Слава велия еже последовати богу, долгота же дний еже прияту тебе быти от него.
1 Премудрость похвалит душу свою и посреде людий своих восхвалится.
2 В церкви вышняго отверзет уста своя и прямо силе его восхвалится:
3 аз из уст вышняго изыдох и яко мгла покрыхъ землю,
4 аз на высоких вселихся, и престол мой во столпе облачне,
5 круг небесный обыдох едина и во глубине бездны походих,
6 волну морскую и всю землю, и вся люди и язык стяжах,
7 со всеми сими покоя взысках, и во наследии чиемъ водворюся?
8 Тогда заповеда ми создатель всех, и создавый мя препокои скинию мою и рече:
9 во иакове вселися и во израили наследствуй.
10 Прежде века из начала созда мя, и даже до века не оскудею.
11 Во скинии святей пред ним послужих и тако в сионе утвердихся:
12 во граде возлюбленнем такожде мя препокои, и во иерусалиме власть моя:
13 и укоренихся в людех прославленных, в части господни наследия его.
14 яко кедр вознесохся в ливане и яко кипарисъ на горах аермонских,
15 яко финикс возвысихся на брезех и яко садъ шипковый во иерихоне,
16 яко маслина благолепна на поли, и вознесохся яко явор:
17 якоже корица и яко аспалаф ароматов дах воню, и яко смирна избранна издах благоухание,
18 яко халвани и оникс и стакти, и яко ливаново курение во скинии.
19 Аз яко теревинф распрострох ветвия моя, и ветви моя ветви славы и благодати:
20 аз яко виноград прорастих благодать, и цвети мои плод славы и богатства.
21 Приступите ко мне, желающии мене, и от плодов моихъ насытитеся:
22 память бо моя сладка паче меда, и наследие мое паче сота медвена.
23 ядущии мя еще взалчут, и пиющии мя еще вжаждутся:
24 слушаяй мене не посрамится и делающии у мене не согрешат.
25 Сия вся книга завета бога вышняго,
26 закон, егоже заповеда моисей, наследие сонмомъ иаковлим:
27 насыщая яко фисон премудростию и яко тигр во дни новоплодий,
28 исполняяй яко евфрат разума и якоже иорданъ во днех жатвы,
29 являяй яко свет наказание и якоже гион во дни обымания вина.
30 Не сконча первый уразумети ея, такожде и последний не изследи ея:
31 ибо паче моря умножися размышление ея, и советъ ея паче бездны велия.
32 И аз яко раскопание из реки и якоже водотечие изыдох в рай.
33 Рех: напою мой вертоград и упою себе луг:
34 и се, раскопание ми бысть рекою, и река моя бысть морем.
35 Понеже наказание яко утро просвещу и проявлю е даже до далече:
36 еще учение якоже пророчество излию и оставлю е в роды вечны.
37 Видите, яко не себе единому трудихся, но всемъ ищущим ея.
1 Треми украсихся и стах красна пред господемъ и человеки:
2 единомыслием братий и любовию искренних, и мужъ и жена между собою согласни.
3 Три же виды возненавиде душа моя, и зело ми омерзе живот их:
4 убога горда, и богата лжива, и стара прелюбодея умаляющагося умом.
5 яже в юности не собрал еси, то како можеши обрести в старости твоей?
6 Коль есть красен сединам суд, и старейшим разумети советъ?
7 Коль красна старым премудрость и славным разумение и советъ?
8 Венец старцем многоразличное искусство, и похваление их страх господень.
9 Девять помышлений ублажих в сердцы моем, а десятое изреку языком:
10 человек веселяйся о чадех, живяй и зряй падение врагов.
11 Блажен живяй со женою разумною, и иже языком (своимъ) не поползнуся, и иже не поработа недостойному себе.
12 Блажен, иже обрете мудрость и поведаяй во уши послушающих.
13 Коль велик, иже мудрость обрете, но несть паче боящагося господа.
14 Страх господень паче всего предуспе, держай его кому уподобится?
15 Всяка язва и не язва сердечная и всякое лукавство и не лукавство женское:
16 всякое нападение и не нападение ненавидящих, и всякое мщение и не отмщение врагов.
17 Несть главы паче главы змиины, и несть ярости паче ярости вражия.
18 Лучше жити со львом и змием, неже жити со женою лукавою.
19 Лукавство жены изменяет зрак ея и омрачаетъ лице свое яко вретище:
20 посреде искренних своих возляжет муж ея, и слышав воздохнет горько.
21 Мала есть всяка злоба противу злобе женстей: жребий грешника спадет на ню.
22 якоже восхождение по песку ногама стараго, тако жена язычна мужу молчаливу.
23 Не сматряй на красоту женскую и жены в похоть не пожелай.
24 Гнев и безстудие и срамота велика жена, аще обладаетъ мужем своим.
25 Сердце смирено, и лице дряхло, и язва сердечна жена лукава:
26 руце немощныя и колена разслаблена, (жена) яже не блажит мужа своего.
27 от жены начало греха, и тою умираем вси.
28 Не даждь воде прохода, ни жене лукаве дерзновения:
29 аще не ходит под рукою твоею, отсецы ю от плоти твоея.
1 Жены добрыя блажен есть муж, и число дний его сугубо.
2 Жена добляя веселит мужа своего и лета его исполнитъ миром.
3 Жена добра часть блага, в части боящихся господа дана будет.
4 Богатаго же и убогаго сердце благо, во всяко время лице тихо.
5 от трех убояся сердце мое, и от лица четвертаго устрашихся:
6 предания града и собрания народа, и оболгания надъ смерть, вся тяжестна.
7 Болезнь сердца и сетование жена ревнива о жене,
8 и язва языка всем приобщающаяся.
9 Воловое иго движимо жена лукавна, держайся ея яко емляйся скорпии.
10 Гнев велик жена пиянчива, и студа своего не покрыет.
11 Блуд женский в возвышении очес и бровьми ея познан будет.
12 Над дщерию безстудною утверди стражу, да не попущение обретши употребит себе.
13 Вслед безстудна ока сохранися и не дивися, аще в тя согрешит:
14 яко жажден путник отверзет уста и от всякия воды ближния испиет,
15 прямо всякаго кола сядет и прямо стрелы отверзетъ тул.
16 Благодать женска возвеселит мужа ея, и кости его утучнит художество ея.
17 Даяние господне жена молчалива, и несть искупа наказанныя души.
18 Благодать на благодати жена стыдлива,
19 и несть мерило всякое достойное воздержныя души.
20 Солнце восходящее на высоких господних,
21 и доброта жены добрыя в красоте дому ея:
22 светилник сияя на свещнице святе, и доброта лица на возрасте постояннем.
23 Столпи злати на подстолпиих сребряных, и нозе красни на плеснах добре стоящих.
24 о двоих печально бысть сердце мое, и о третиемъ ярость ми найде:
25 муж борец лишаяся за скудоту, и мужие разумиви аще отриновени будут:
26 возвращаяся от правды на грех, господь уготовитъ его на мечь.
27 Едва измется купец от погрешения, и не оправдится корчемник от греха.
1 За скудость мнози согрешиша, и ищай обогатети отвратит око.
2 Посреде собраных камений вонзется кол, и посреде продаяния и купли совершится грех.
3 Аще не держится страха господня со тщанием, вскоре превратится дом его.
4 Трясением решета останет сметие: такожде отреби человечестии в помышлении его.
5 Сосуды скудельничи искушает пещь, и искушение человеческо в помышлении его.
6 Возделание древа являет плод его: тако слово помышления в сердцы человечестем.
7 Прежде беседы не похвали мужа: сия бо искушение (есть) человеков.
8 Аще гониши правду, постигнеши ю и облечешися в ню яко в подир славы.
9 Птицы с подобными себе обитают, и истина к творящимъ ю обратится.
10 Лев ловит лов, такожде и греси делающих неправду.
11 Повесть благочестиваго всегда премудрость: безумный же яко луна изменяется.
12 Посреде безумных блюди время, посреде же размышляющихъ учащай.
13 Повесть буих мерзость, и смех их во услаждении греха.
14 Беседа многокленущагося подымет власы, и свар его затчение ушес.
15 Пролитие крове свар гордых, и укоризна их слухъ тяжкий.
16 открываяй тайная погубляет верность и не обрящетъ друга противу души своея.
17 Возлюби друга и уверися с ним:
18 аще же открыеши тайны его, не имаши гнати по нем.
19 якоже бо погубит человек врага своего, тако погубиши дружбу искренняго:
20 и якоже птицу из руки твоея испустиши, тако испустилъ еси искренняго и не уловиши его:
21 не гонися за ним, яко далече отступи и избеже яко серна от сети.
22 яко струп есть обязати, и клеветы есть измена:
23 открывый же тайная погуби верность.
24 Помизаяй оком кует зло, и никтоже его отставитъ от того:
25 пред очима твоима усладит уста своя и словесем твоим подивится,
26 последи же развратит уста своя и в словесехъ твоих даст соблазн.
27 Многая возненавидех и не обретох подобна ему, и господь возненавидит его.
28 Вергаяй камень на высоту на главу свою вергает, и язва льстива раздерет струпы.
29 Ископоваяй ров впадется в онь, и распростираяй сеть увязнет в ней.
30 Творяй зло ввалится в не и не познает, откуду приидет ему.
31 Поругание и поношение гордых, и отмщение яко левъ уловит их.
32 Сетию уловятся веселящиися о падении благоверных, и болезнь изнурит я прежде смерти их.
33 Гнев и ярость, и сия суть мерзость, и муж грешникъ одержан ими будет.
1 отмщаяй от господа обрящет отмщение, и грехи своя соблюдаяй соблюдет.
2 остави обиду искреннему твоему, и тогда помольшутися, греси твои разрешатся.
3 Человек на человека сохраняет гнев, а от господа ищет изцеления:
4 над человеком подобным себе не имать милости, а о гресех своих молится:
5 сам сый плоть, хранит гнев: кто очистит грехи его?
6 Помяни последняя и престани враждовати, (помяни) истление и смерть и пребывай в заповедех.
7 Помяни заповеди и не гневайся на ближняго,
8 и завет вышняго и презирай невежество.
9 удаляйся от свара и умалиши грехи:
10 человек бо яр разжизает свар, и муж грешникъ возмятет други и посреде мирных вложит клевету.
11 яково вещество огня, тако возгорится: якова крепость свара, такожде и огнь разгорится:
12 якова крепость человеча, такожде ярость его будет, и якоже богатство его, возвысит гнев свой.
13 Рвение скорое возжигает огнь, и свар наглый проливаетъ кровь.
14 Аще подуеши на искру, возгорится: и аще плюнеши на ню, угаснет: обоя же изо уст твоих исходят.
15 Шепотника и двоязычника подобает клясти: многих бо мирных погубиша.
16 Язык трегубый многи потрясе и разлучи я от языка во язык,
17 и грады тверды разори и домы вельможей преврати:
18 язык трегубый жены доблия изгна и лиши я от трудов их:
19 внемляй ему не имать обрести покоя, ниже вселится со безмолвием.
20 язва бичная струпы творит, язва же язычная сокрушаетъ кости.
21 Мнози падоша острием меча, но не якоже падшии языком:
22 блажен, иже укрыется от него, иже не пройде в ярости его, иже не повлече ига его и узами его не связан бысть:
23 иго бо его иго железно, и узы его узы медяны:
24 смерть люта смерть его, и паче его лучше есть ад.
25 Не обладает благоверными, и в пламени его не сгорят.
26 оставляющии господа впадутся в онь, и в них возгорится и не угаснет: послан будет на ня яко лев, и яко пард погубит я.
27 Виждь, огради стяжание твое тернием,
28 сребро твое и злато твое свяжи,
29 и словесем твоим сотвори вес и меру, и устамъ твоим сотвори дверь и завору.
30 Внимай, да не како поползнешися им, ниже падеши прямо ловящему.
1 Творяй милость взаим даст искреннему, и укрепляяй руку свою соблюдает заповеди.
2 Даждь взаим искреннему во время требования его и паки воздаждь искреннему во время:
3 утверди слово и уверися с ним, и во всяко время обрящеши потребу твою.
4 Мнози яко обретение возмнеша заимование и задаша труд помощником их:
5 дондеже возмет, облобызает руце его и на имение искренняго смирит глас:
6 и во время воздаяния провлечет время, и воздаст словеса уныния, и время обвинит.
7 Аще же возможет воздати, едва половину принесетъ и вменит е яко обретение:
8 аще же ни, лиши его имений своих и стяжа его врага туне:
9 клятвы и укоризны воздаст ему и вместо славы воздаст ему безчестие.
10 Мнози убо за лукавство отвергошася, и лишитися туне убояшася.
11 обаче смиренному долготерпи и милостынею не продолжи его:
12 заповеди ради заступи нищаго, и по нищете его не отврати его тща.
13 Погуби сребро брата ради и друга, и да не оржавеетъ под каменем во пагубу.
14 Положи сокровище свое по заповедем вышняго, и упользуетъ тя паче нежели злато.
15 Затвори милостыню во клетех твоих, и та изметъ тя от всякаго озлобления:
16 паче щита тверда и паче копия тяжка, противу врагу поборет по тебе.
17 Муж благ споручник будет искреннему, и погубивый стыд оставит его.
18 Благодати споручника не забуди: даде бо душу свою за тя.
19 Доброе поручение отвращает грешник, неблагодарный же мыслию оставит избавльшаго и.
20 Поручение многих погуби благоуправляющих и поколеба их яко волна морская:
21 мужы сильны пресели, и заблудиша во языцех чуждих.
22 Грешник в поручение впадает, и гоняй дела чуждая впадет в суды.
23 Заступи искренняго по силе твоей, и внимай себе, да не впадеши.
24 Начало жития человеча вода и хлеб, и риза и домъ покрываяй студ.
25 Лучше житие нищаго под кровом бервенным, нежели брашна добра в чуждих.
26 о мале и о велице доволен буди.
27 Живот зол из дому в дом, и аможе преселишися, не отверзеши уст своих:
28 угостиши и напоиши неблагодарных, и к сим зло услышиши:
29 приступи, пришелче, украси трапезу, и аще что в руце твоей, ухлеби мя:
30 изыди, пришелче, от лица славы, прииде бо мне въ гости брат, и потреба дому.
31 Тяжка сия человеку имущу разум, запрещение храмины и поношение заимодавца.
1 Любяй сына своего участит ему раны, да возвеселится в последняя своя.
2 Наказуяй сына своего насладится о нем и посреде знаемыхъ о нем похвалится.
3 учай сына своего раздражит врага и пред други о нем возрадуется.
4 умре отец его, и аки не умре: подобна бо себе остави по себе.
5 Во житии своем виде и возвеселися о нем и при кончине своей не оскорбися:
6 противу врагом остави местника и другом воздающа благодать.
7 угождаяй сыну обяжет струпы его, и о всяцемъ вопли возмятется утроба его.
8 Конь неукрощен свиреп бывает, и сын самовольный продерз будет.
9 Ласкай чадо, и устрашит тя, играй с ним, и опечалит тя.
10 Не смейся с ним, да не поболиши о нем и на последокъ стиснеши зубы твоя.
11 Не даждь ему власти в юности и не презри неведения его:
12 сляцы выю его в юности и сокруши ребра его, дондеже млад есть, да не когда ожестев не покориттися.
13 Накажи сына твоего и делай им, да не в безстудии его поткнешися.
14 Лучше нищь здрав и крепок в силе своей, нежели богат уранен телом своим.
15 Здравие и крепость лучше есть всякаго злата, и тело здравое, нежели богатство безчисленное.
16 Несть богатство лучше здравия телеснаго, и несть веселие паче радости сердечныя.
17 Лучше есть смерть паче живота горька или недуга долгаго.
18 Благая излиянная пред усты затворенными предложения брашен предлежащая у гроба.
19 Кая польза идолу от жертвы? не имать бо ясти, ни обоняти:
20 тако гонимый от господа,
21 зряй очима и стеняй, якоже евнух осязаяй девицу и воздыхаяй.
22 Не вдаждь в печаль душу твою и не оскорби себе советом твоим.
23 Веселие сердца живот человека, и радование мужа долгоденствие.
24 Люби душу твою и утешай сердце твое, и печаль от себе отрини далече:
25 многи бо печаль уби, и несть пользы в ней.
26 Рвение и ярость умаляют дни, и печаль прежде времене старость наводит.
27 Светло сердце и благо о брашне и о яди своей попечется.
1 Бдение богатства растлевает плоти, и попечение его отгонит сон:
2 печаль бдения отторгает дремание, и недуг лют отимаетъ сон.
3 Трудится богатый в собирании богатства и в покои насыщается сладостей своих:
4 трудится убогий во умалении жития, и в покои скудный бывает.
5 Любяй злато не оправдится, и гоняй растление симъ насытится.
6 Мнози падоша злата ради, и бысть пагуба их прямо лицу их.
7 Древо претыкания есть всем жрущим ему, и всякъ безумлив ят будет им.
8 Блажен богатый, иже обретеся без порока и иже вслед злата не иде.
9 Кто есть сей? и ублажим его, сотвори бо дивная в людех своих.
10 Кто искушен им и совершен бысть? и будет на похваление.
11 Кто могл преступити, и не преступи, и зло сотворити, и не сотвори?
12 утвердятся благая его, и милостыни его исповесть собрание.
13 Сел ли еси при трапезе велицей, не разверзи на ней гортани твоего
14 и не рцы: много на ней есть. Помяни, яко зло есть око лукаво.
15 Лукавнее ока что есть создано? сего ради о коей либо вещи слезит.
16 Идеже аще узриши, не простирай руки и не гнетися с ним в солило.
17 Разсуждай, яже суть искренняго, от тебе самаго, и о всяцей вещи размышляй.
18 яждь яко человек предлежащее ти и не пресыщайся, да не возненавиден будеши.
19 Престани первый ради наказания и не пресыщайся, да не преткнешися:
20 и аще сядеши посреде многих, первее их не простри руки твоея.
21 Коль доволно человеку наказанному малое, и на одре своем не постраждет зла.
22 Сон здравый от чрева умеренна: воста заутра, и душа его с ним:
23 труд бдения и холера и чревоболение с мужем ненасытным.
24 И аще отяготился еси брашны, востани от трапезы и почиеши.
25 Послушай мене, чадо, и не уничижи мене, и на последок обрящеши словеса моя.
26 Во всех делех твоих буди тщателен, и всяк недугъ не имать приступити к тебе.
27 Щедраго хлебами благословят устне, и послушество доброты его верно.
28 На скупаго в хлебех поропщет град, и послушество злобы его известно.
29 В вине не мужайся, многих бо погуби вино.
30 Пещь искушает железо в калении, тако вино сердца гордых во пиянстве.
31 Полезно вино животу человечу, аще пиеши е в меру его.
32 Кий живот побеждаемому виномъ? сие бо на веселие человекомъ создано есть.
33 Радование сердца и веселие души вино пиемо во время прилично:
34 горесть души вино пиемо много в распри и клевете:
35 умножает пиянство ярость безумнаго на претыкание, умаляя крепость и сотворяя струпия.
36 В пире вина не обличай искренняго и не уничижи его в веселии его:
37 словесе поносна не рцы ему и не оскорби его во истязании.
1 Старейшину ли тя поставиша, не возносися, но буди в них яко един от них:
2 попецыся ими, и тако сяди. И всю потребу твою сотворивъ возлязи,
3 да возвеселишися их ради и красоты ради приимеши венец.
4 Глаголи, старейшино, подобает бо ти,
5 испытною хитростию и не возбрани мусикии:
6 идеже слушание (будетъ), не изливай беседы и безъ времене не мудрися.
7 Печать анфракса на украшении злате, и сладкогласие мусикиев в пиршестве вина.
8 Во украшении златем печать смарагдова, сладкопение мусикиев по сладцем вине.
9 Глаголи, юноше, аще тебе есть потреба, едва дващи, аще вопрошен будеши:
10 сократи слово, малыми многая (изглаголи): буди яко ведый и вкупе молчя.
11 Посреде вельмож не равен творися и иному глаголющу не многослови.
12 Прежде грома предваряет молния, и прежде стыдливаго предваряет благодать.
13 Во время воставай, а не последи (иныхъ), в дом отиди и не ленися:
14 тамо играй и твори помышления твоя, и не согрешай словом гордым.
15 И о сих благослови сотворшаго тя и упоевающаго тя от благ своих.
16 Бояйся господа приимет наказание, и утренюющии обрящутъ благоволение.
17 Ищай закона насытится его, и лицемерствуяй соблазнится о нем.
18 Боящиися господа обрящут суд и оправдания яко светъ возжгут.
19 Человек грешник укланяется от обличения и по воли своей обретает извинение.
20 Муж советный не презрит размышления, чуждый же и гордый не убоится страха и по сотворении своем безъ совета.
21 Без совета ничесоже твори, и егда сотвориши, не раскаявайся.
22 На пути падения не ходи и не претыкайся о камение:
23 не веруй пути, в немже не претыкаешися, и от чадъ своих хранися.
24 Во всяцем деле блазе веруй душею твоею, ибо сие есть соблюдение заповедий.
25 Веруяй закону внимает заповедем, и уповаяй на господа не умалится.
1 Боящагося господа не срящет зло: аще и в напасть впадет, паки измет его.
2 Муж премудр не возненавидит закона, сумняйжеся в немъ якоже в бури корабль.
3 Человек разумив веру имет закону, и закон ему верен,
4 яко вопрошение праведных. Приготови слово, и тако услышан будеши: сочетай наказание и тогда отвещай.
5 Коло колесничное утроба буяго, и якоже ось вертящаяся помышление его.
6 Конь на яждении яко друг лицемерен, под всякимъ яздящим ржет.
7 Почто день дне преспевает, и всяк свет дне лета от солнца?
8 Разумом господним разлучистася, и измени время и праздники:
9 от них вознесе и освяти, и от них положи в число дний.
10 И человецы вси от персти, и от земли создан бысть адам.
11 Множеством ведения господь раздели я и измени пути их.
12 от них благослови и вознесе, и от них освяти и к себе приближи, от них прокля и смири и соврати их от стояния их.
13 яко брение скудельника в руце его, вси путие его по изволению его: тако человецы в руце сотворшаго их, имже воздаст по суду своему.
14 (яко) противу злому благое и противу смерти живот, тако противу благочестиваго грешник. И сице воззри во вся дела вышняго: двое двое, едино противу единому.
15 Аз же последний бдех и наследих якоже от начатка, якоже собираяй вслед обымателей виноградных.
16 Во благословение господне достигох и яко обыматель наполнихъ точило.
17 Разсмотрите, яко не себе единому трудихся, но всемъ ищущим наказания.
18 Послушайте мене, вельможи людий, и властелие собора, внушите.
19 Сыну и жене, брату и другу не даждь власти на себе в животе своем,
20 и не даждь иному имения своего, да не раскаешися требуяй их:
21 дондеже жив еси и дыхание в тебе, не измени себе всяцей плоти:
22 лучше бо есть, да тебе молятся чада твоя, нежели тебе зрети в руце чад твоих.
23 Во всех делех твоих буди преспевая и не даждь порока на славу твою.
24 В день скончания дний живота твоего и во время смерти твоея раздели наследие твое.
25 Пища и жезлие и бремя ослу: хлеб и наказание и дело рабу.
26 Накажи раба, и обрящеши покой: ослаби руку ему, и искати начнет свободы.
27 Иго и ремень выю прекланяют, и рабу лукаву узы и раны.
28 Вложи его в дело, да не празден будет, мнозей бо злобе научила праздность:
29 устрой его в делех, якоже подобает ему, и аще не послушает, всади его во оковы.
30 И не буди излишен над всякою плотию, и без суда не сотвори ничесоже.
31 Аще ти есть раб, да будет якоже ты, понеже кровию стяжал еси его:
32 аще ти есть раб, имей его якоже брата, понеже яко души твоея востребуеши его:
33 аще озлобиши его неправедно, и востав отбежит, киим путем поищеши его? (не веси).
1 Тщетны надежды и лживы (суть) неразумиву мужу, и сония вперяют безумных.
2 якоже емляйся за стень и гоняй ветры, такожде емляй веру сном:
3 сие по сему видение снов, прямо лицу подобие лица.
4 от нечистаго что очистится, и от лживаго кая истина?
5 Волшебства и обаяния и сония суетна суть, и якоже раждающия сердцу мечтания бывают:
6 аще не от вышняго послана будут на посещение, не вдаждь в ня сердца твоего:
7 многих бо прельстиша сония, и отпадоша надеющеся на ня.
8 Без лжи совершится закон, и премудрость во устехъ верных совершение.
9 Муж ученый уведа много, и многоискусный повесть разум.
10 Иже не искусися, мало весть: обходяй же страны умножитъ хитрость.
11 Много видех во обхождении моем, и вящшая словесъ моих разум мой:
12 многащи даже до смерти бедствовах, и спасен быхъ сих ради.
13 Дух боящихся господа поживет, надежда бо их на спасающаго я.
14 Бояйся господа ни чего убоится и не устрашится, той бо надежда ему.
15 Боящемуся господа блаженна душа: чим одержится, и кто ему утверждение?
16 очи господни на любящия его: защищение силы и утверждение крепости, покров от вара и покров в полудне, хранение от претыкания и помощь от падения:
17 воздвизаяй душу и просвещаяй очи, изцеление даяй, живот и благословение.
18 Иже приносит жертву от неправды, приношение порочно, и не суть во благоволение дары беззаконных.
19 Не благоволит вышний о приношении нечестивых, ни множествомъ жертв очистит грехи.
20 яко жряй сына пред отцем его, тако приносяй жертвы от имения убогих.
21 Хлеб убогим живот убогих, лишаяй его человек кровей есть.
22 убивает искренняго отемляй ему поживление, и проливает кровь лишаяй мзды наемника.
23 Един созидаяй, а другий разоряяй, что успеетъ более, токмо трудъ?
24 Единому молящуся, а другому проклинающу, коего гласъ услышит владыка?
25 омываяйся от мертвеца и паки прикасаяйся ему, кая польза ему от бани?
26 Тако человек постяйся о гресех своих и паки ходяй и таяжде творяй, мольбу его кто услышит, и что успе смирением своимъ?
1 Соблюдаяй закон умножает приношения, приноситъ жертву спасения внимаяй заповедем.
2 Воздаяй благодать аки приносяй семидал, и творяй милостыню аки жряй жертву хваления.
3 благоволение господне еже отступити от лукавства, и очищение есть еже отступити от неправды.
4 Не явися пред господем тощь: вся бо сия заповеди ради.
5 Приношение праведнаго утучняет олтарь, и благоухание его пред вышним:
6 жертва мужа праведнаго приятна, и память ея не забвена будет.
7 оком благим прослави господа и не умали от начатка рук твоих:
8 во всяцем даянии весело имей лице твое и со веселием освяти десятину.
9 Даждь вышнему по даянию его, и оком благим приобретение руки:
10 яко господь воздаяй есть и седмерицею воздаст ти.
11 Дара не умаляй, ибо не приимет, и не внимай жертве неправедней:
12 яко господь судия есть, и несть у него славы лица.
13 Не приимет лица на убога и молитву обидимаго услышит:
14 не презрит молитвы сираго, ни вдовицы, егда излиетъ прошение.
15 Не слезы ли вдовичи по ланитома текут, и вопль ея на наведшаго я?
16 Служай (богу) во благоволении прият будет, и молитва его до облак дойдет:
17 молитва смиреннаго пройде облаки, и дондеже приближится, не утешится,
18 и не отступит, дондеже посетит вышний, судит въ правду и сотворит суд:
19 и господь не замедлит, ниже имать долготерпети о них, дондеже сокрушит чресла немилостивых.
20 И языком воздаст месть, дондеже потребит множество досадителей и скиптры неправедных сокрушит:
21 дондеже воздаст человеку по деянием его, по делом человеческим и помышлением их:
22 дондеже разсудит судом люди своя и возвеселит я милостию своею.
23 Коль красна милость во время скорби его, якоже облацы дождевнии во время бездождия.
1 Помилуй ны, владыко, боже всех, и воззри,
2 и наложи страх твой на вся языки:
3 воздвигни руку твою на языки чужды, и да узрятъ силу твою.
4 якоже пред ними освятился еси в нас, такожде пред нами возвеличися на них:
5 и да познают тя, якоже и мы познахом тя, яко несть бога разве тебе, господи.
6 обнови знамения и измени чудеса,
7 прослави руку и мышцу десную (твою), воздвигни ярость и излий гнев,
8 изми сопостата и сотри врага,
9 поспеши время и помяни клятву, и да поведят величия твоя.
10 Гневом огня пояден да будет спасаяйся, и озлобляющии людий твоих да обрящут пагубу.
11 Сокруши главы князей вражиих, глаголющих: несть разве нас.
12 Собери вся колена иаковля и наследствуй их якоже от начала.
13 Помилуй люди, господи, нареченныя именем твоим, и израиля, егоже первенцем нарекл еси.
14 ущедри град святыни твоея, иерусалим, место покоища твоего.
15 Исполни сиона взяти словеса твоя, и от славы твоея люди твоя.
16 Даждь свидетелство сущим от начала тварем твоимъ и воздвигни пророчествия сущая о имени твоем:
17 даждь мзду терпящим тебе, и пророцы твои да уверятся.
18 услыши, господи, мольбы молитвенник твоих, по благословению аароню о людех твоих,
19 и уразумеют вси сущии на земли, яко ты господь еси, бог веков.
20 Всяко брашно яст чрево: есть же брашно брашна добрее.
21 Гортань вкушает брашна от лова, тако сердце разумиво словеса ложна.
22 Сердце строптиво даст печаль, и человек многоискусный воздаст ему.
23 Всякаго мужеска полу приимет жена: есть же дщерь дщере лучше.
24 Доброта женска веселит лице и над все желание человеческо предуспевает:
25 аще есть на языце ея милость и кротость, несть муж ея точен сыном человеческим.
26 Стяжавый жену начинает имети стяжание, помощника по себе и столпа покою.
27 Идеже несть ограды, расхищено будет имение, и идеже несть жены, воздохнет скитаяся:
28 кто бо поверит вооружену разбойнику преходящу от града во градъ?
29 Такожде и человеку не имущу гнезда и обитающу, идеже обвечеряет.
1 Всяк друг речет: содружихся ему и аз. Но есть друг именем точию друг.
2 Печаль не пребывает ли до смерти, приятель и друг претворяяйся во врага?
3 о, лукаво помышление, откуду извалилося еси покрыти сушу лестию?
4 Приятель о веселии дружни срадуется, а во время скорби противен будет:
5 приятель со другом труждается чрева ради и противу брани возмет щит.
6 Не забуди друга в души твоей и не поминай его во имении твоем.
7 Всяк советник возносит совет, но есть совещаяй о себе самем.
8 от советника храни душу твою и разумей первее, что ему потреба: сам бо себе совещавает:
9 да не когда возложит на тя жребий и речет ти: добръ путь твой: и станет прямо, видети, что сбудется тебе.
10 Не совещавай с подзирающим тя и от завидящих ти скрый совет:
11 со женою о ревнующей ей и со страшливым о брани, с купцем о мене и со купующим о продажи, со завидливымъ о благодарении
12 и с немилостивым о помиловании, с ленивым о всяцемъ деле
13 и с наемником годовым о совершении, с рабом ленивымъ о мнозе делании.
14 Не внемли сим о всяцем совещании,
15 но токмо с мужем благоговейным присно буди, егоже аще познаеши соблюдающа заповеди господни,
16 иже душею своею по души твоей, и аще согрешиши, споболит с тобою.
17 И совет сердца устави, несть бо ти вернее его:
18 душа бо мужа возвещати некогда более обыче, нежели седмь блюстителие высоце седящии на стражи.
19 И о всех сих помолися вышнему, да управит во истине путь твой.
20 Начаток всякаго дела слово, и прежде всякаго делания совет.
21 След изменения сердечна лице. Четыри части происходят: добро и зло, живот и смерть: и обладаяй ими всегда язык есть.
22 Есть муж хитр и наказатель многим, а своей души неключимь есть.
23 Есть умудряяйся в словесех ненавидимь: сей всякия пищи лишен будет:
24 не дана бо бысть ему от господа благодать, яко всякия премудрости лишен бысть.
25 Есть премудр своей души, и плоды разума его во устех верны.
26 Муж премудр люди своя накажет, и плоды разума его верны.
27 Муж премудр исполнится благословения, и ублажатъ его вси зрящии.
28 Живот мужа в числе дний: а дние израилевы безчисленни.
29 Премудрый во своих людех наследит веру, и имя его живо будет во век.
30 Чадо, в животе твоем искуси душу твою и виждь, что ей зло есть, и не даждь ей.
31 Ибо не вся всем на пользу, и не всяка душа во всемъ благоволит.
32 Не пресыщайся во всяцей сладости и не разливайся на (различие) брашна,
33 ибо во мнозех брашнах недуг будет, и пресыщение приближит даже до холеры:
34 пресыщением бо мнози умроша, внимаяй же приложитъ житие.
1 Почитай врача противу потреб честию его, ибо господь созда его:
2 от вышняго бо есть изцеление, и от царя прииметъ дар.
3 Художество врача вознесет главу его, и пред вельможами удивимь будет.
4 господь созда от земли врачевания, и муж мудрый не возгнушается ими.
5 Не от древа ли осладися вода, да познана будет сила его?
6 И той дал есть художество человеком, да славится в чудесех своих:
7 теми уврачева и отят болезни их.
8 Мироварец сими состроит смешение, и не скончаются дела его, и мир от него есть на лицы земли.
9 Чадо, в болезни твоей не презирай, но молися господеви, и той тя изцелит:
10 отступи от прегрешения и направи руце, и от всякаго греха очисти сердце (твое):
11 даждь благоухание и память семидала и умасти приношение, акибы не первее приносяй:
12 и даждь место врачу, господь бо его созда: и да не удалится от тебе, потребен бо ти есть.
13 Есть время, егда в руку его благоухание:
14 ибо и тии господеви молятся, да управит им покой и изцеление ради оздравления.
15 Согрешаяй пред сотворшим его впадет в руце врачу.
16 Чадо, над мертвецем источи слезы и якоже зле страждущь начни плачь: и якоже достоит ему, соскутай тело его и не презри погребения его.
17 Горек сотвори плачь и рыдание тепло, и сотвори сетование, якоже ему достоит, день един и два хуления ради, и утешися печали ради:
18 от печали бо смерть бывает, и печаль сердечная слячетъ крепость.
19 В нанесении пребывает и печаль, и житие нищаго в сердцы.
20 Не даждь в печаль сердца твоего, остави ю помянувъ последняя.
21 Не забуди, несть бо возвращения: и ему пользы не сотвориши, и себе озлобиши.
22 Помяни суд его, яко сице и твой: мне вчера, а тебе днесь.
23 В покои мертвеца упокой память его, и утешися о нем во исходе духа его.
24 Премудрость книжника во благовремении празднества, и умаляяйся деянием своим упремудрится.
25 Чим умудрится держай орало и хваляйся остном, гоняй волы и обращаяйся в делех их, и повесть его в сынех юнчихъ?
26 Сердце свое даст возрыти бразды, и бдение его на насыщениих юниц.
27 Тако всяк древоделя и архитектон, иже нощи яко дни провождает, делая изваяния печатей, и прилежание его изменити различие:
28 сердце свое даст уподобити живописание, и бдение его еже совершити дело.
29 Такожде и ковачь седя близ наковални и соглядаяй дело железа: курение огня удручит тело его, и теплотою пещи утрудится:
30 глас млата обновит ухо его, и прямо подобию сосуда очи его:
31 сердце свое вдаст на скончание дел, и бдение его украсити до конца.
32 Такожде и скудельник седя на деле своем и вертя ногама своима коло,
33 иже в печали лежит выну на деле своем, изчисляемо все делание его:
34 мышцею своею вообразит брение и пред ногама преклонитъ крепость его:
35 сердце свое вдаст скончати сосуд, и бдение его очистити пещь.
36 Вси сии на руки своя надеются, и кийждо в деле своем умудряется.
37 Без тех не населится град, и не вселятся, ни походятъ и в соборище не возмутся:
38 на престоле же судий не сядут и завета суду не размыслят, ниже имут извещати наказания и суда, и в притчахъ не обрящутся:
39 но токмо зданием житейским прилежат, и моление их в делании художества.
1 Точию вдаяй душу свою и размышляяй в законе вышняго премудрости всех древних взыщет и во пророчествиихъ поучатися будет:
2 повести мужей именитых соблюдет и во извития притчей совнидет,
3 сокровенная притчей изыщет и в гадании притчей поживет,
4 посреде вельмож послужит и пред старейшину явится,
5 в земли чуждих язык пройдет, добро бо и зло въ человецех искуси.
6 Сердце свое вдаст утреневати ко господу сотворшему его и пред вышним помолится, и отверзет уста своя на молитву и о гресех своих помолится.
7 Аще господь велий восхощет, духом разума исполнится:
8 той одождит глаголы премудрости своея и в молитве исповестся господеви,
9 той управит совет его и художество и в сокровенныхъ его размышляти будет,
10 той известит наказание учения его и в законе завета господня похвалится.
11 Восхвалят разум его мнози, и до века не погибнет:
12 не отидет память его, и имя его поживет въ роды родов:
13 премудрость его поведят языцы, и хвалу его исповесть церковь.
14 Аще пребудет, приусвоит себе, и аще почиет, имя оставит паче тысящ.
15 Еще размыслив повем, и якоже луны полнота наполнихся.
16 Послушайте мене, преподобнии сынове, и прозябните яко шипки произрастающия при потоце селнем,
17 и якоже ливан дадите благовоние,
18 и процветите цвет яко крин, преподадите воню и воспойте песнь.
19 Благословите господа во всех делех его, дадите имени его величие и исповедайтеся во хвалении его,
20 в песнех устен и в гуслех, и сице рцыте во исповедании:
21 дела господня вся яко добра зело, и всяко повеление во время свое будет.
22 И несть рещи: что сие? на что сие? вся бо сия во время свое взыскана будут.
23 Словом его ста вода яко стог, и глаголом устъ его приятелища водная.
24 Повелением его всякое благоволение, и несть, иже умалит спасние его.
25 Дела всякия плоти пред ним, и несть укрытися от очес его:
26 от века на век призре, и ничтоже есть дивно пред ним.
27 Несть рещи: что сие? на что сие? вся бо на потребу их создана быша.
28 благословение его яко река покры и яко потокъ сушу напои:
29 сице гнев его языцы наследят, яко преврати воду в сланость.
30 Путие его преподобным прави, тако беззаконникомъ претыкания.
31 Благая благим создана быша из начала, такожде грешнымъ злая.
32 Начало всякия потребы в житие человеку, вода и огнь, и железо и соль, и семидал пшеницы и млеко и мед, кровь гроздова и масло и риза:
33 вся сия благочестивым во благая, сице и грешникомъ превратятся во злая.
34 Суть дуси, иже создани быша на месть и яростию своею утвердиша раны им:
35 во время скончания излиют крепость и ярость сотворшаго их совершат.
36 огнь и град, и глад и смерть, вся сия создана быша на месть:
37 зубы зверей и скорпии, и ехидны и мечь отмщаяй в погибель нечестивых,
38 в заповедех его возвеселятся, и на земли на потребу уготовятся, и во бременах своих не имут прейти слова.
39 Сего ради исперва утвердихся и размыслих и въ писании оставих:
40 вся дела господня блага, и всю потребу во время свое подаст:
41 и несть рещи: сие сего злее: вся бо во время на угождение будут.
42 И ныне всем сердцем и усты воспойте и благословите имя господне.
1 Непразднство велие создано бысть всякому человеку, и иго тяжко на сынех адамлих, от дне исхода изъ чрева матере их до дне погребения в матерь всех.
2 Размышления их и страх сердечный, помышление чаяния, день скончания:
3 от седящаго на престоле славы и даже до смиреннаго на земли и пепеле,
4 от носящаго багряницу и венец и даже до одевающагося льняною,
5 ярость и зависть, и мятеж и молва, и страх смерти и вражда и рвение, и во время покоя на ложи сон нощный изменяет разум его:
6 мало яко ничтоже на покой, и от того во снех яко во днех блюдения:
7 возмущен видением сердца своего, яко избежавъ от лица брани, во время спасения своего воста, и дивяся ни при единем же страсе.
8 Со всякою плотию от человека даже до скота, и на грешныхъ седмерицею к сим:
9 смерть и кровь, и рвение и оружие, наведения, глад и сокрушение и раны,
10 на беззаконных создана быша сия вся, и сих ради бысть потоп.
11 Вся, елика от земли, в землю возвращаются, и от воды, в море возвращаются.
12 Всяк дар и неправда истребится, а вера во векъ стояти будет.
13 Имение неправедных яко река изсхнет, и якоже гром велик в дождь возгремит.
14 Егда разгнет руце, возвеселится, тако преступающии до конца изчезнут.
15 Изчадия нечестивых не умножат ветвий, и корения нечистая на тверде камени:
16 злак над всякою водою и на брезе реки прежде всякия травы исторжен будет.
17 Благодать яко рай во благословениих, и милостыня во век пребывает.
18 Живот самодоволнаго делателя усладится, и паче обоих обретаяй сокровище.
19 Чада и созидание града утверждают имя, и паче обоих жена непорочна вменяется.
20 Вино и мусикиа веселят сердце, а паче обоих возлюбление премудрости.
21 Свирель и псалтирь услаждают песнь, а паче обоих язык сладкий.
22 Благодати и доброты возжелает око твое, а паче обоих злака семене.
23 Приятель и друг сретающася во время, а паче обоихъ жена с мужем.
24 Братия и помощь во время скорби, а паче обоихъ милостыня избавит.
25 Злато и сребро утвердят ногу, а паче обоихъ совет благоугоден будет.
26 Имение и крепость вознесут сердце, а паче обоихъ страх господень:
27 несть во страсе господни умаления и несть в немъ лишения помощи:
28 страх господень яко рай благословения, и паче всякия славы покры его.
29 Чадо, животом просливым не живи: лучше умрети, нежели просити.
30 Муж зря на чуждую трапезу, несть живот его въ числе живота: опечалит душу свою чуждыми брашны:
31 муж же худог и наказан сохранится.
32 Во устех нестыдливаго прошение усладится, и во чреве его огнь возгорится.
1 о смерте, коль горька твоя есть память человеку мирно во имениих своих живущу,
2 мужеви не пекущуся и благополучну во всех, и еще возмогающу прияти пищу.
3 о, смерте, добр суд твой есть человеку требующему и умаляющуся крепостию,
4 в последней старости сущему и пекущуся о всех, и неверствующу и погубившу терпение.
5 Не бойся суда смерти: помяни первая твоя и последняя, сей бо суд от господа всяцей плоти.
6 И почто отмещешися благоволения вышняго? аще десять, аще сто, аще тысяща лет,
7 несть во аде обличения живота.
8 Чада бывают мерзка чада грешников, и живущая въ селениих нечестивых:
9 чад грешных погибнет наследие, и с семенем ихъ выну поношение.
10 отца нечестива укорят чада, яко его ради поношение приимут.
11 Горе вам, мужие нечестивии, иже остависте законъ бога вышняго:
12 и аще родитеся, на клятву родитеся: и аще умрете, в клятву разделени будете.
13 Вся, елика от земли, в землю пойдут: такожде нечестивии от клятвы в пагубу.
14 Сетование человеков в телесех их: имя же грешниковъ неблагое потребится.
15 Пецыся о имени, то бо ти пребывает паче тысящ великихъ сокровищ злата.
16 Благаго жития число дний, и доброе имя во веки пребывает.
17 Наказание в мире соблюдите, чада: премудрость же сокровенна и сокровище неявленно, кая польза во обоихъ?
18 Лучше человек скрываяй буйство свое, нежели человекъ скрываяй премудрость свою.
19 Темже убо усрамитеся словес моих:
20 несть бо благо всяк срам сохраняти, и не вся всемъ в вере благоволятся.
21 Стыдитеся пред отцем и материю о блуде и предъ сильным и властелином о лжи,
22 пред судиею и князем о согрешении, пред соборомъ и людьми о беззаконии,
23 пред общником и другом о неправде, и на месте, идеже живеши, о татьбе,
24 и пред истиною божиею и заветом, и от опертия лактей на трапезе, от прельщения взятия и даяния,
25 и от целующих о молчании, от видения жены блудницы и от отвращения сроднича лица,
26 от отятия части и даяния и от присмотрения жены мужаты и от обольщения рабыни своея,
27 и не приступи ко одру ея:
28 пред други о словесех поносных, и по даянии не поноси:
29 от повторения и слова слышания и от откровения словесъ тайных: и будеши стыдлив истинно и обретаяй благодать пред всяким человеком.
1 Не стыдися о сих и не приими лица, еже согрешати:
2 о законе вышняго и завете, и о суде, еже оправдати нечестиваго,
3 о словеси сообщника и о путницех, и о даянии наследия другов,
4 о истине мерила и весов, о стяжании многих и малых,
5 о различии продаяния купцев и о наказании мнозе чад, и еже рабу лукаву ребра окровавити.
6 На жене лукаве добро (есть) печать, и идеже многи руки, затвори.
7 Еже аще предаси, в число и меру, даждь и возми все писанием.
8 о наказании неразумива и буяго, и престарелаго судящагося с юными, и будеши наказан истинно и искушен предъ всяким живущим.
9 Дщерь отцу сокровенно бдение, и попечение о ней отгоняет сон: во юности своей да не когда презреетъ и сожителствующи (с мужемъ), да не когда возненавидена будет:
10 в девстве да не когда осквернится и во отчихъ ея непраздна будет, и с мужем сущи да не когда преступитъ и сожителствующи да не когда неплоды будет.
11 Над дщерию безстудною утверди стражу, да не когда сотворит тя обрадование врагом, беседу во граде и отлученаго от людий, и посрамит тя в народе мнозе.
12 Не взирай на доброту всякаго человека и посреде женъ не седи:
13 от риз бо исходит молие, и от жены лукавство женское.
14 Лучше злоба мужеска, нежели добродетелная жена, и жена посрамляющая в поношение.
15 Помяну убо дела господня, и яже видех, повем: во словесех господних дела его:
16 солнце просвещая на вся призре, и славы его исполнено дело его.
17 Не сотвори ли святым господь поведати вся чудеса его, яже утверди господь вседержитель, утвердитися всему во славе его?
18 Бездну и сердце изследова и в коварствех ихъ размысли: разуме бо господь всяко ведение и призре на знамение века,
19 возвещая мимошедшая и будущая и открывая следы тайных:
20 не прейде его всяко помышление, не утаися от него ни едино слово.
21 Величия премудрости своея украси: иже есть прежде века и во век,
22 ни приложися, ни умалися и не востребова ни единаго советника.
23 Коль вся дела его вожделенна, и даже до искры есть видети.
24 Вся сия живут и пребывают во век во всех требованиих, и вся послушают.
25 Вся сугуба, едино противу единаго: и не сотвори ничтоже скудно.
26 Едино от единаго утверди благая: и кто насытится, зря славу его?
1 Слава высоты, твердь чистоты, зрак небесе въ видении славы.
2 Солнце во явлении возвещающее во исходе сосуд дивен, дело вышняго.
3 В полудни своем изсушает страну, и прямо вару его кто постоитъ?
4 (Аки) пещь дышущее в делех вара, трегубо солнце пожигающее горы: воскурения огненная издышущее и простирающее лучи омрачает очи.
5 Велий господь сотворивый е, и словесы своими ускори шествие.
6 И луна всем во свое время являет лета и знамение века.
7 от луны знамение праздника: светило умаляющееся до конца.
8 месяц по имени своему есть, возрастающь дивно во изменении.
9 Сосуд ополчений на высоте, на тверди небесней сияющь.
10 Доброта небесе, слава звезд, красота светящися на высоких господних:
11 словесы святаго станут по чину и не имут ослабети в стражбах своих.
12 Виждь дугу и благослови сотворшаго ю, зело прекрасна сиянием своим:
13 окружи небо окружением славы, руце вышняго простросте ю.
14 Повелением его потщася снег, и ускоряетъ молнию судбою своею.
15 Сего ради отверзошася сокровища, и парят облацы яко птицы.
16 Величием своим укрепи облаки, и сокрушишася камение градное:
17 и воззрением его подвижутся горы, и волею его возвеет юг.
18 Глас грома его порази землю, и буря северова и вихорь ветра.
19 яко птицы парящия сыплет снег, и якоже прузи садящиися спадения его.
20 Доброте белости его подивится око, и о дожди его ужаснется сердце.
21 И слану яко соль на землю сыплет, и смерзшися бываетъ на концы остра.
22 Студен ветр северный возвеет, и смерзнется ледъ от воды: на всяцем собрании воднем обитати имать, и аки во броню облечется вода.
23 Пояст горы и пустыни пожжет, и угасит траву яко огнь.
24 Изцеление всех со тщанием мгла: роса сретающая от вара утишит.
25 Мыслию его преста бездна, и насади в ней (господь) островы.
26 Плавающии по морю поведают бедство его, и слухомъ ушес наших чудимся,
27 и тамо (суть) преславна и чудна дела его, различие всякаго животнаго, создание китов.
28 Им благополучный конец свой получают и словомъ его составляются всяческая.
29 Много имамы рещи, и не имамы постигнути, и скончание словес: все есть той.
30 Славяще его где укрепимся? той бо велик паче всех дел своих:
31 страшен господь и велик зело, и чудно могутство его.
32 Славяще господа вознесите, елико аще можете, превзыдетъ бо и еще:
33 возносяще его умножитеся крепостию: не трудитеся, не имате бо постигнути.
34 Кто виде его и исповесть? и кто возвеличитъ его, якоже есть?
35 Многа сокровена суть вящшая сих: малая бо видехомъ дел его.
36 Вся бо сотвори господь и благочестивым даде премудрость.
1 Восхвалим убо мужы славны и отцы наша в бытии.
2 Многу славу созда господь в них величием своим от века.
3 Господствующе во царствиих своих и мужие именити силою, советующе разумом своим, провещавшии во пророчествах,
4 старейшины людий в советех и в разуме писания людий:
5 премудрая словеса в наказании их, ищуще гласа мусикийска и поведающе повести во писаниих:
6 мужие богатии, обдаровани крепостию, мирно живуще въ жилищих своих.
7 Вси сии в родех прославлени быша, и во днех ихъ похвала.
8 Суть от них, иже оставиша имя, еже поведати хвалы: и суть, ихже несть памяти, и погибоша яко не сущии, и быша яко не бывше, и чада их по них.
9 Но сии мужие милостивии, ихже правды не забвены быша:
10 с семенем их пребудет доброе наследие, изчадия их в заветех:
11 остася семя их, и чада их по них:
12 до века пребудет семя их, и слава их не потребится:
13 телеса их в мире погребена быша, а имена ихъ живут в роды.
14 Премудрость их поведят людие, и похвалу их исповесть церковь.
15 Енох угоди господеви и преложися, образ покаяния родом.
16 Ное обретеся совершен, праведен, во время гнева бысть примирение:
17 сего ради бысть останок земли, егда бяше потоп.
18 Заветы вечнии положени быша с ним, да не потребится потопом всяка плоть.
19 Авраам великий отец множеству языков, и не обретеся подобный во славе его:
20 иже соблюде закон вышняго и бысть в завете съ ним:
21 и на плоти его устави завет и во искушении обретеся верен:
22 сего ради клятвою постави с ним благословитися языкомъ о семени его,
23 умножити его яко персть земли, и яко звезды возвысити семя его, и наследити им от моря до моря и от реки до края земли.
24 И о исааце утверди сице авраама ради отца его благословение всех человеков и завет:
25 и почи на главе иаковли.
26 Позна его благословении своими и даде его въ наследие, и раздели части его на колен дванадесять,
27 и изведе от него мужа милости, обретшаго благодать пред очесы всякия плоти.
1 Возлюбленный богом и человеки моисей, егоже память во благословениих.
2 уподобил есть его славе святых и возвеличи его во страсе врагов.
3 Во словесех его знамения устави и прослави его пред лицем царей: заповеда ему к людемъ своим и показа ему славу свою:
4 в вере и кротости его освяти его, избра его от всякия плоти.
5 Слышан сотворил есть ему глас свой и введе его во мглу,
6 и даде ему пред лицем заповеди, закон жизни и ведения, еже научити иакова завету и судбамъ его израиля.
7 Аарона возвыси свята, подобна ему брата его от колена левиина,
8 постави ему завет вечен и даде ему иерейство людий, ублажи его благоукрашением и препояса его одеждою славы,
9 облече его в совершение хваления и утверди его сосудами крепости,
10 остегнми и подиром и епомидою,
11 и окружи его шипки златыми и звонцы многими окрест, глашати глас во ступаниих его, слышан творити гласъ в церкви в память сыном людий своих:
12 одеждою святою, со златом и вакинфом и порфирою, делом пестроделца, словом суда, явленьми истины,
13 истканною багряностию, делом художничим, камении многоценными, изваяньми печати, в связании злата, деломъ каменноделателя, на память в писании изваяннем по числу колен израилевых:
14 венец злат верху кидара, изображение печати святыни, похвала чести, дело крепости, вожделения очес красима прекрасна.
15 Прежде его не быша таковая до века.
16 Не облечеся иноплеменник, точию сынове его и внучата его присно.
17 Жертвы их приносимы бяху по вся дни непрестанно дважды.
18 Исполни моисей руце и помаза его елеем святым.
19 Бысть ему в завет вечен, и семени его во днех неба, служити ему вкупе и священствовати, и благословляти люди его именем его.
20 Избра его от всех живых принести жертву господеви, фимиам и благоухание на память, на очищение людем своим.
21 Даде ему заповеди своя, власть в заветех судеб, научити иакова свидением и в законе его просветити израиля.
22 Восташа нань чуждии, и возревноваша ему в пустыни мужие, иже при дафане и авироне, и сонм кореовъ в ярости и гневе.
23 Виде господь и не благоволи, и скончашася яростию гнева:
24 сотвори в них знамения, погубити я огнем пламене.
25 И приложи ааронови славу и даде ему наследие: начатки первых жит раздели ему.
26 Хлеб в первых уготова на сытость: ибо жертвы господни ясти будут, яже даде ему и семени его.
27 обаче в земли людий не наследствит, и в людехъ не будет ему части: сам бо часть его и наследие.
28 И финеес сын елеазаров третий во славе, егда ревноваше страху господню, и ста в превращении людий благостию усердия души своея, и умоли о израили.
29 Сего ради поставлен ему бысть завет мирен, предстателемъ быти святых и людем его, да будет ему и семени его священства величество во век.
30 И завет давиду, сыну иессеову от колена иудова, наследство царя сына от сына единаго: достояние священства аарону и семени его.
31 Да даст нам премудрость в сердцах наших судити людем его в правду, да не потребятся благая их и слава их в роды их.
1 Крепок на бранех иисус навин и преемникъ моисеов бысть во пророчестве:
2 иже бысть по имени своему велик на спасение избранныхъ его, мстити востающим (нань) врагом, яко да наследствитъ израиля.
3 Коль прославлен бысть воздвижением рук своих, и внегда простираше мечь на грады.
4 Кто прежде его сице ста? брани бо господни той вождаше.
5 Не рукою ли его воспятися солнце, и един день бысть яко два?
6 Призва вышняго сильна, егда оскорбляху его врази окрест, и послуша его велий господь: камением граднымъ силы крепкия
7 устреми брань на языки, исхождением погуби противники,
8 да познают языцы всеоружие его, яко пред господемъ брань его: ибо последова могутному.
9 И во дни моисеовы сотвори милость сей и халев сынъ иефонниин, стати противу врага, удержати люди от грех и утолити ропот лукавства:
10 и та два суща спасена быста от шести сот тысящъ пешцев, ввести их в наследствие, в землю точащую млеко и мед.
11 И даде господь халеву крепость, и даже до старости пребысть у него, взыти ему на высоту земли, и семя его обдержа наследие:
12 яко да видят вси сынове израилевы, яко добро ходити вслед господа.
13 И судии кийждо именем своим, еликих не любодействова сердце, и елицы не отвратишася от господа, и память их во благословениих:
14 кости их да процветут от места их,
15 и имя их пременяемо на сынех, прославленнымъ бывшим им.
16 Возлюблен господем своим самуил пророк господень устрои царство и помаза князи над людьми его:
17 законом господним суди сонму, и посети господь иакова:
18 верою своею испытан бысть пророк, и познан бысть в вере своей верен видением.
19 И призва господа сильна, егда оскорбляху его врази его окрест, приношением агнца ссущаго млеко:
20 и возгреме с небесе господь и гласом велиим услышанъ сотвори глас свой:
21 и потреби владыки тврския, и вся князи филистимския.
22 И прежде времене успения века свидетелствова предъ господем и христом его: имения и до сапог от всякия плоти не взях: и не сотвори ему поношения (ни единъ) человек.
23 И по успении своем пророчествова и показа цареви кончину его: и вознесе от земли глас свой, пророчествомъ истребити беззаконие людий.
1 И по сем воста нафан пророчествовати во дни давидовы.
2 якоже тук отлучен от жертвы мирныя, тако давидъ от сынов израилевых.
3 Со львы играше яко с козлищи и с медведми яко со агнцы овчими.
4 Во юности своей не убил ли исполина, и отятъ поношение от людий,
5 егда простре руку с каменем из пращи низложити гордыню голиафову?
6 Призва бо господа вышняго, и вдаде в десницу его крепость низложити человека сильна на брани, вознести рог людий своих.
7 Сице во тмах прослави его и восхвали его во благословениихъ господних, внегда носити ему венец славы.
8 Потреби бо враги окрест и уничижи филистимляны противники: даже доднесь сокруши им рог.
9 Во всяцем деле своем даде исповедание святому вышнему глаголом славы:
10 всем сердцем своим восхвали и возлюби сотворшаго и.
11 И постави певцы прямо олтареви, и звуком ихъ услаждати пение.
12 Даде во праздницех благолепие и украси времена даже до скончания, внегда воспевати им имя святое его и от утра гласити во святилищи.
13 господь отя грехи его и вознесе во век рогъ его, и даде ему завет царский и престол славы во израили.
14 По сем воста сын разумичен и сего ради обита въ пространстве:
15 соломон воцарися во днех мира, яко бог препокои окрест, да созиждет дом во имя его и да уготовитъ святилище во век.
16 Коль преумудрился еси во юности своей и наполнился еси яко река разума.
17 Землю покры душа твоя, и исполнил еси притчами гаданий:
18 пройде имя твое во островы далече, и возлюбленъ был еси в мире твоем.
19 В песнех и паримиах и во притчах и во сказаниихъ удивишася тебе страны.
20 Именем господа бога, нареченнаго бога израилева,
21 собрал еси яко медь злато и яко олово умножил еси сребро.
22 Вдал еси бока твоя женам и поработился еси телом твоим:
23 дал еси порок славе твоей и осквернил еси семя твое, нанести гнев на чада твоя, и умилитися о безумии твоем: еже разделитися на двое царству, и от ефрема начатися царству непокориву.
24 господь же не оставит милости своея и не растлит от делъ своих, ниже истребит избраннаго своего изчадий и семя возлюбившаго его не измет.
25 И иакову даде останок, и давиду от него корень.
26 И почи соломон со отцы своими
27 и остави по себе от семене своего людем безумие,
28 и умаляющася разумом ровоама, иже отстави люди от совета своего,
29 и иеровоама сына наватова, иже сотвори согрешити израилю и даде ефрему путь ко греху.
30 И умножишася греси их зело, отступити имъ от земли своея:
31 и всяко лукавство изыскаша, дондеже месть прииде на ня.
1 И воста илиа пророк яко огнь, и слово его яко свеща горяше:
2 иже нанесе на ня глад и ревностию своею умали я,
3 словом господним удержа небо и сведе тако трижды огнь с небесе.
4 Коль прославился еси, илие, чудесы твоими, и кто подобен тебе похвалитися?
5 Воздвигнув мертвеца от смерти и из ада словомъ вышняго,
6 сведый цари в пагубу и прославленныя от одра их,
7 слышавый в синаи обличение и в хориве судбы отмщения,
8 помазуяй цари на воздаяние и пророки преемники по себе,
9 взявыйся вихром огненным на колеснице коней огненных,
10 вписан во обличения на времена, утолити гневъ прежде ярости и обратити сердце отчее к сыну и устроити колена иаковля.
11 Блажени видевшии тя и любовию украшеннии.
12 Ибо мы житием поживем.
13 Илиа, иже вихром покровен бысть, и елиссей исполнися духа его и во дни своя не поколебася от князей, и не преможе его никтоже:
14 всяко слово не превзыде его, и во успении пророчествова тело его:
15 и в житии своем сотвори чудеса, и во умертвии дивна дела его.
16 Во всех сих не покаяшася людие и не отступиша от грех своих, дондеже пленени быша от земли своея и расточени быша по всей земли.
17 И остася людий мало, и князь в дому давидове.
18 Нецыи убо от них сотвориша угодное, нецыи же умножиша грехи.
19 Езекиа утверди град свой и введе посреде его воду: ископа железом камень и созда источники водам.
20 Во днех его взыде сеннахирим и посла рапсака, и воздвиже руку свою на сиона и возвеличися гордынею своею.
21 Тогда подвигошася сердца и руце их, и поболеша яко раждающия.
22 И помолишася господу милостивому, воздевше руки своя къ нему:
23 и святый с небесе скоро услыша я и избави я рукою исаииною:
24 порази полки ассирийския, и сокруши я ангел его.
25 Сотвори бо езекиа угодное господеви и укрепися на путех давида отца своего, яже заповеда исаиа, пророк велий и верен в видении своем.
26 Во днех его воспятися солнце, и приложи жития цареви:
27 духом велиим виде последняя и утеши сетующия в сионе:
28 даже до века показа будущая и сокровеная, прежде неже приити им.
1 Память иосиева в сложение фимиама, и состроеное делом мироварника:
2 во всяцех устех яко мед усладится, и яко мусикиа в пире вина.
3 Той управлен бысть во обращение людий и отятъ мерзости беззакония,
4 исправи ко господу сердце свое, во дни беззаконных укрепи благочестие.
5 Кроме давида и езекии и иосии, вси прегрешиша прегрешением,
6 оставиша бо закон вышняго: царие иудины оскудеша,
7 даша бо рог свой инем и славу свою языку чуждему,
8 сожгоша избран град святыни и опустошиша пути его рукою иеремииною:
9 озлобиша бо его, и той во чреве освящен бысть пророк искоренити и озлобити и погубити, такожде создати и насадити.
10 иезекииль, иже виде видение славы, юже показа ему в колеснице херувимсте:
11 помяну бо враги в дожди, и благосотворити направляющимъ пути.
12 И обоюнадесяте пророков да процветут кости от мест своих: утеши бо иакова и избавил я верою надежды.
13 Како возвеличим зоровавеля? и сей яко печать на десней руце:
14 такожде иисус сын иоседеков: иже во дни своя создаста дом и воздвигоста церковь святу господеви, уготовану во славу века.
15 И неемии на мнозе (буди) память, воздвигшему намъ стены падшия и поставльшему двери и заворы и воздвигшему домы падшия наша.
16 Никтоже создан бысть таков, яко енох на земли: той бо взят бысть от земли.
17 Ниже яко иосиф бысть муж, вождь братии, утверждение людем, и кости его посещены быша.
18 Сим и сиф прославлена быста в человецех, и паче всякаго животнаго в твари адам.
1 Симон сын ониин иерей великий, иже въ животе своем сострои дом и во дни своя утверди церковь.
2 И тем основана бысть высота сугуба, воздвижение высоко ограждения церковнаго.
3 Во дни его умалишася сосуди воднии, ров яко моря окружение.
4 Блюдый люди своя от падения и укрепивый градъ во обседении.
5 Коль прославлен бысть в сожителстве людий, во исходе дому катапетасмы?
6 яко звезда утренняя посреде облаков, аки луна полна во днех своих,
7 яко солнце сияющее на церковь вышняго, и аки дуга светящаяся на облацех славы:
8 яко цвет шипков во днех весенных, яко кринъ при исходищих воды, яко стебло ливаново во днех жатвы:
9 яко огнь и ливан на огнищи,
10 якоже сосуд злат искован, украшен всякимъ камением многоценным,
11 яко маслина износящая плоды и яко кипарис возрастаяй до облак.
12 Внегда взимати ему одежду славы и облачатися ему в совершение хваления, в восхождении олтаря святаго прослави одежду святыни.
13 Внегда же приимати части от рук иерейских, и той стояше при огнищи олтаря:
14 окрест его венец братии, яко прозябение кедрско в ливане, и окружиша его яко стеблие финиково:
15 и вси сынове аарони во славе своей, и приношение господне в руках их пред всем собором израилевым.
16 И совершение служителей на олтарех, еже украсити приношение вышняго вседержителя,
17 простре на чашу возлияния руку свою, изгнете от крове гроздныя, возлия на основание олтаря в воню благоухания вышнему всех цареви.
18 Тогда возопиша сынове аарони, трубами коваными вострубиша, услышан сотвориша глас велик на память пред вышним.
19 Тогда вси людие обще приспеша и падоша ницы на земли поклонитися господеви своему вседержителю богу вышнему:
20 и восхвалиша певцы гласы своими, в велицем гласе усладися пение:
21 и помолишася людие господу вышнему молитвою пред милостивым, дондеже совершися красота господня, и службу свою скончаша.
22 Тогда сошед воздвиже руки своя на весь собор сыновъ израилевых, дати благословение господеви от устен своихъ и именем его похвалитися.
23 И повтори поклонение прияти благословение от вышняго.
24 И ныне благословение бога всех, велия творящаго единаго всюду, возносящаго дни наша от ложесн и творящаго с нами по милости своей:
25 да даст нам веселие сердца, и да будет мир во дни наша во израили якоже дни века:
26 да уверит с нами милость свою и во дни своя избавитъ ны.
27 Два языка омерзеста души моей, а третий несть язык:
28 седящии на горе самарийстей и филистимляне, и людие буи живущии в сикимех.
29 Наказание разума и ведения начерта в книзе сей иисус сын сирахов, иерусалимлянин, иже одожди премудрость от сердца своего.
30 Блажен, иже в сих поживет, и иже я положитъ в сердцы своем, упремудрится.
31 Аще бо сотворит сия, ко всем укрепится, яко свет господень след его.
1 Молитва иисуса сына сирахова. Исповемся тебе, господи царю, и восхвалю тебе, бога спаса моего, исповедаюся имени твоему,
2 яко покровитель и помощник был еси ми
3 и избавил еси тело мое от пагубы и от сети клеветы язычныя, от устен делающих лжу, и на противящихся ми был еси помощник,
4 и избавил мя еси по множеству милости имене твоего от скрежетания готовых снести мя,
5 из руки ищущих души моея, от многих скорбей, яже имех,
6 от стужания огненнаго окрест и от среды огня, идеже не сожегохся,
7 из глубины чрева адова и от языка нечиста и словесе ложна, ко царю от оболгания языка неправедна.
8 Приближися даже до смерти душа моя,
9 и живот мой бе близ ада преисподняго.
10 обдержаша мя отвсюду, и не бе помогающаго: воззрехъ на помощь человечу, и не бе.
11 И помянух милость твою, господи, и деяние твое, еже от века:
12 яко изымаеши терпящих тя, (господи,) и спасаеши их от рук вражиих.
13 И вознесох от земли моление мое и о избавлении от смерти помолихся:
14 и призвах господа, отца господа моего, не оставити мене во дни скорби, во время гордых без помощи.
15 Восхвалю имя твое непрестанно и воспою тя во исповедании. И услышана бысть молитва моя.
16 Спостол бо мя еси от пагубы и изъял еси мя от времене лукавна.
17 Сего ради исповемся тебе, и восхвалю тя, и благословлю имя твое, господи.
18 Еще юн сый, прежде неже странствовати ми, искахъ премудрости яве в молитве моей:
19 пред церковию молихся о ней, и даже до последнихъ взыщу ея: от цвета, яко зреющаго грозда,
20 возвеселися сердце мое о ней: пойде нога моя въ правости, от юности моея изследих ю.
21 Приклоних мало ухо мое и приях, и многое обретохъ себе наказание:
22 предуспеяние бысть ми в ней.
23 Дающему мне премудрость воздам славу.
24 умыслих бо творити ю, и поревновах благому, и не постыжуся.
25 Боряшеся душа моя о ней, и в творении моем испытах:
26 руце мои воздех на высоту и неведения ея уразумех.
27 Душу мою направих к ней,
28 сердце стяжах с нею исперва, и во очищении обретохъ ю: сего ради не оставлен буду.
29 И утроба моя смятеся ищущи ея: темже стяжахъ благое стяжание.
30 Даде господь язык ми мзду мою, и тем восхвалю его.
31 Приближитеся ко мне, ненаказаннии, и водворитеся въ дому наказания.
32 Почто лишаетеся, глаголете, в сих, и души ваша жаждутъ зело?
33 отверзох уста моя и глаголах: стяжите себе без сребра (мудрость):
34 выю вашу подложите под иго, и да приимет душа ваша наказание: близ есть обрести ю.
35 Видите очима вашима, яко мало трудихся и обретохъ себе мног покой.
36 Приобщитеся наказанию многим числом сребра, и много злато пристяжете ею.
37 Да возвеселится душа ваша в милости его, и да не постыдитеся в хвалении его.
38 Делайте дело ваше прежде времене, и даст мзду вашу во время свое.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>