Заметили ошибку в тексте? Выделите её мышкой и нажмите Ctrl+Enter<<< | ОГЛАВЛЕНИЕ | БИБЛИОТЕКА | >>>
См. также: Книга Премудрости Соломона
(шрифт на основе старой кириллицы)
На церковно-славянском языке гражданским шрифтом
Главы: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19
1 Возлюбите правду, судящии землю: мудрствуйте о господе в благостыни и в простоте сердца взыщите его:
2 яко обретается не искушающим его, является же не неверующим ему.
3 Строптивая бо помышления отлучают от бога: искушаемая сила обличает безумных.
4 яко в злохудожну душу не внидет премудрость, ниже обитает в телеси повиннем греху:
5 святый бо дух наказания отбежит льстива и отимется от помышлений неразумных и обличится от находящия неправды.
6 Человеколюбив бо дух премудрости и не обезвинит хульника от устен его: яко внутренних его свидетель есть бог и сердца его испытатель истинен и языка слышатель:
7 яко дух господень исполни вселенную, и содержай вся разум имать гласа.
8 Сего ради вещаяй неправедная никтоже утаится, и не мимо идет его обличающь суд.
9 В советех бо нечестиваго истязание будет, словесъ же его слышание ко господу приидет во обличение беззаконий его:
10 яко ухо рвения слышит вся, и молва роптаний не крыется.
11 Хранитеся убо от роптания неполезна и от оболгания щадите язык: яко вещание тайное тще не прейдет, уста же лжущая убивают душу.
12 Не вожделейте смерти в заблуждении живота вашего, ниже привлекайте погибели делами рук ваших:
13 яко бог смерти не сотвори, ни веселится о погибели живых.
14 Созда бо во еже быти всем, и спасителны бытия мира, ни бо есть в них врачевания губителнаго, ниже аду царствия на земли.
15 Правда бо безсмертна есть: (неправда же смерти снабдение:)
16 нечестивии же рукама и словесы призваша ю, другиню вмениша ю и истаяша, и завет положиша с нею, яко достойни суть оноя части быти.
1 Рекоша бо в себе помышляющии неправо: мал есть и печален живот наш, и несть изцеления в кончине человечесте, и несть познан возвративыйся от ада.
2 яко самослучайно рождени есмы, и по сем будемъ якоже не бывше: понеже дым дыхание в ноздрех наших, и слово искра в движении сердца нашего:
3 ейже угасшей пепел будет тело, и дух нашъ разлиется яко мягкий воздух,
4 и имя наше забвено будет во время, и никтоже воспомянетъ дел наших: и прейдет живот наш яко следы облака, и яко мгла разрушится, разгнаная от лучь солнечныхъ и теплотою его отягчившися.
5 Стени бо преход житие наше, и несть возвращения кончины нашея: яко запечатана есть, и никто возвращается.
6 Приидите убо и насладимся настоящих благих, и употребим создания, яко в юности скоро:
7 вина дражайшаго и мира (благовонна) исполнимся, и да не прейдет нас цвет жития:
8 увенчаим нас шипковыми цветы, прежде неже увянут:
9 ни един от нас лишен да будет нашего наслаждения, везде оставим знамение веселия, яко сия часть наша и жребий сей.
10 Насилие сотворим убогу праведному, не пощадим вдовицы, ниже старца устыдимся седин многолетных.
11 Да будет же нам крепость закон правды: некрепкое бо неполезно обретается.
12 уловим же (лестию) праведнаго, яко непотребен намъ есть и противится делом нашим, и поносит намъ грехи закона и злославит нам грехи учения нашего:
13 возвещает нам разум имети божий, и отрока господня себе именует:
14 бысть нам на обличение помышлений наших:
15 тяжек есть нам и к видению, яко неподобно (есть) иным житие его, и отменны (суть) стези его:
16 в поругание вменихомся ему, и удаляетеся от путий наших яко от нечистот: блажит последняя праведныхъ и славится отца имети (себе) бога.
17 увидим, аще словеса его истинна, и искусимъ яже сбудутся ему.
18 Аще бо есть истинный сын божий, защитит его и избавит его от руки противящихся.
19 Досаждением и мукою истяжим его, да увемы кротость его и искусим беззлобство его:
20 смертию поносною осудим его, будет бо ему разсмотрение от словес его.
21 Сия помыслиша и прельстишася: ослепи бо их злоба их,
22 и не уведеша таин божиих, ниже мзды уповаша преподобия, ниже присудиша чести душам непорочным.
23 яко бог созда человека в неистление и во образъ подобия своего сотвори его:
24 завистию же диаволею смерть вниде в мир: вкушаютъ же ю, иже от ея части суть.
1 праведных не души в руце божией, и не прикоснется их мука.
2 Непщевани быша во очию безумных умрети, и вменися озлобление исход их,
3 и еже от нас шествие сокрушение: они же суть в мире.
4 Ибо пред лицем человеческим аще и муку приимут, упование их безсмертия исполнено:
5 и вмале наказани бывше, великими благодетелствовани будут, яко бог искуси их и обрете их достойны себе:
6 яко злато в горниле искуси их, и яко всеплодие жертвенное прият я.
7 И во время посещения их возсияют, и яко искры по стеблию потекут:
8 судят языком и обладают людьми, и воцарится въ них господь во веки.
9 Надеющиися нань уразумеют истину, и вернии въ любви пребудут ему, яко благодать и милость в преподобныхъ его и посещение во избранных его.
10 Нечестивии же, яко помыслиша, приимут запрещение, иже нерадившии о праведнем и от господа отступивше.
11 Премудрость бо и наказание уничижаяй окаянен, и праздно упование их, и труды безплодны, и неключима дела их:
12 жены их безумны и лукава чада их, проклято рождение их.
13 яко блажена есть неплоды неоскверненая, яже не позна ложа во гресе, имети будет плод в посещении душ:
14 и евнух, иже не содела в руку (своею) беззакония, ниже помысли на господа лукавая, дастся бо ему веры благодать избранна и жребий во храме господни угоднейший.
15 Благих бо трудов плод благославен, и не отпадающь корень разума.
16 Чада же прелюбодеев несовершена будут, и от законопреступнаго ложа семя изчезнет:
17 аще бо долгоживотни будут, ни во чтоже вменятся, и безчестна на последок старость их:
18 аще же скоро скончаются, не будут имети упования, ниже в день суда утешения:
19 рода бо неправеднаго лютая окончания.
1 Лучше безчадство со добродетелию: безсмертие бо есть в памяти ея, яко и пред богом познается и пред человеки:
2 присущую бо подражают ю и желают отшедшия, и въ веце венценосно чтится нескверных подвигов брань одолевши.
3 Многоплодно же нечестивых множество неключимо будет, и прелюбодейная насаждения не дадут корения в глубину, ниже крепко стояние сотворят:
4 аще бо и ветви на время процветут, не крепко возшедше от ветра поколеблются и от зелных ветров искоренятся:
5 сокрушатся ветви несовершенны, и плод их неключимь, оскомен в снедь, и ни во что потребен.
6 от беззаконных бо снов чада раждаемая свидетелие суть лукавствия на родители во испытании их.
7 праведник же аще постигнет скончатися, в покои будет:
8 старость бо честна не многолетна, ниже в числе летъ изчитается:
9 седина же есть мудрость человеком, и возраст старости житие нескверно.
10 благоугоден богови быв, возлюблен бысть, и живый посреде грешных преставлен бысть:
11 восхищен бысть, да не злоба изменит разум его, или лесть прельстит душу его.
12 Рачение бо злобы помрачает добрая, и парение похоти пременяет ум незлобив.
13 Скончався вмале исполни лета долга:
14 угодна бо бе господеви душа его, сего ради потщася от среды лукавствия:
15 людие же видевше и не разумевше, ниже положше въ помышлении таковое, яко благодать и милость в преподобныхъ его и посещение во избранных его.
16 осудит же праведник умираяй живых нечестивых, и юность скончавшаяся скоро долголетную старость неправеднаго.
17 узрят бо кончину премудраго и не уразумеют, что усоветова о нем и во что утверди его господь:
18 узрят и уничижат его, господь же посмеется им:
19 и будут посем в падение безчестно и во укоризну в мертвых в век: яко расторгнет их безгласны ниц и поколеблет их от оснований, и даже до последнихъ опустеют и будут в болезни, и память их погибнет:
20 приидут в помышление грехов своих боязливии, и обличат их противу беззакония их.
1 Тогда станет во дерзновении мнозе праведник предъ лицем оскорбивших его и отметающих труды его:
2 видящии смятутся страхом тяжким и ужаснутся о преславнем спасении его,
3 и рекут в себе кающеся и в тесноте духа воздыхающе: сей бе, егоже имехом некогда в посмех и въ притчу поношения.
4 Безумнии, житие его вменихом неистово и кончину его безчестну:
5 како вменися в сынех божиих, и во святых жребий его есть?
6 Убо заблудихом от пути истиннаго, и правды светъ не облиста нам, и солнце не возсия нам:
7 беззаконных исполнихомся стезь и погибели и ходихомъ в пустыни непроходимыя, пути же господня не уведехом.
8 Что пользова нам гордыня, и богатство с величаниемъ что воздаде намъ?
9 Преидоша вся она яко сень и яко весть претекающая.
10 яко корабль преходяй волнующуюся воду, егоже проходу несть стопы обрести, ниже стези шествия его въ волнах:
11 или яко птицы, прелетающия по аеру, ни едино обретается знамение пути, язвою же смущаяй биемый духъ легкий, и разсецаемый силою шумящею движением крилъ прелете, и посем ни едино знамение обретеся проходу в нем:
12 или яко стрелою испущеною на намереное место разсеченный аер внезапу в себе самем заключен бысть, яко не познатися проходу ея:
13 тако и мы рождени оскудехом и добродетели убо ни единаго знамения можем показати, во злобе же нашей скончахомся.
14 Ибо упование нечестиваго, яко прах от ветра подъемлемый и яко пена мягка от бури расторгнена, и яко дым от ветра разливается и яко память пришелца единаго дне прейде:
15 праведницы же во веки живут, и во где мзда их, и попечение их у вышняго:
16 сего ради приимут царствие благолепия и венец доброты от руки господни, яко десницею покрыет их и мышцею защитит их.
17 Приимет всеоружие рвение свое и вооружит тварь в месть врагом,
18 облечется в броня правды и возложит шлем суд нелицемерен,
19 приимет щит непобедимый преподобие,
20 поострит же напрасный гнев во оружие: споборетъ же с ним мир на безумныя.
21 Пойдут праволучныя стрелы молниины, и яко от благокругла лука облаков на намерение полетят:
22 и от каменометныя ярости исполнь падут грады: вознегодуетъ на них вода морская, реки же потопят нагло:
23 сопротив станет им дух силы, и яко вихор развеетъ их:
24 и опустошит всю землю беззаконие, и злодейство превратитъ престолы сильных.
1 Слышите убо, царие, и разумейте: научитеся, судии концев земли:
2 внушите, содержащии множества и гордящиися о народехъ языков:
3 яко дана есть от господа держава вам и сила от вышняго, иже истяжет дела ваша и помышления испытает:
4 яко слузи суще царства его не судисте право, ни сохранисте закона, ниже по воли божией ходисте.
5 Страшно и скоро явится вам: яко суд жесточайший преимущим бывает,
6 ибо малый достоин есть милости, сильнии же сильне истязани будут.
7 Не щадит бо лица всех владыка, ниже усрамится вельможи, яко мала и велика сей сотвори, подобне же проразумевает о всех:
8 державным же крепко настоит испытание.
9 К вам убо, о, царие, словеса моя, да научитеся премудрости и не падете:
10 ибо сохраняющии преподобне преподобная преподобни будут, и иже научившиися сим, обрящут ответ.
11 Возжелейте убо словес моих, возлюбите и накажитеся.
12 Светла и не увядаема есть премудрость, и удобно видится от любящих ю, и обрящется от ищущих ю:
13 предваряет желающим предуведетися.
14 утреневавый к ней не утрудится: приседящую бо обрящет при вратех своих.
15 Еже бо мыслити о ней, разума (есть) совершенство, и бдяй ея ради вскоре без печали будет:
16 яко достойных ея сама обходит ищущи, и на стезях показуется им благоприятно, и во всем провидении сретает их.
17 Начало бо ея истиннейшее наказания возжеление,
18 попечение же наказания любы, любы же хранение законовъ ея,
19 хранение же законов утверждение нерастления (есть), нерастление же творит близ быти бога:
20 возжеление убо премудрости возводит к царству (вечному).
21 Аще убо наслаждаетеся престолами и скиптры, о, царие людий, почтите премудрость, да во веки царствуете.
22 Что же есть премудрость, и како бысть, возвещу,
23 и не утаю от вас таин, но от начала рождения изслежду,
24 и положу на свет разум ея и не преминую истины,
25 ниже завистию тающему спутьствую, яко сей не будетъ причастник премудрости.
26 Множество же премудрых спасение миру, и царь премудръ утверждение людем.
27 Сего ради приимите наказание по словесем моим, и полезно будет вам.
1 Есмь бо и аз человек смертен, подобен всемъ и земнороднаго внук первозданнаго:
2 и во чреве матерни изобразихся плоть, в десятомесячнемъ времени согустився в крови от семене мужеска и услаждения сном сошедшагося.
3 И аз рожден восприях общаго аера и на подобострастную землю спадох, первый глас подобный всем испустихъ плача:
4 в пеленах воскормлен есмь, и с (великимъ) прилежанием:
5 ни един бо царь ино име рождения начало,
6 един бо вход всем есть в житие, подобенъ же и исход.
7 Сего ради помолихся, и дан бысть мне разум: призвах, и прииде на мя дух премудрости.
8 Предсудих ю паче скиптров и престолов, и богатство ничтоже вмених ко сравнению тоя,
9 ниже уподобих ея каменю драгоценному, яко все злато пред нею песок малый, и яко брение вменится пред нею сребро:
10 паче здравия и красоты возлюбих ю и предызбрахъ ю вместо света имети, яко неугасаемо есть блистание ея.
11 Приидоша же мне благая вся вкупе с нею и безчислено богатство рукама ея:
12 и возвеселихся о всех, яко ими обладает премудрость: не ведех же ю родителницу быти сих.
13 Нелестне научихся, без зависти преподаю и богатства ея не сокрываю:
14 неоскудно бо есть сокровище человеком, еже употребившии к богу послашася в содружение, дарами от наказания представлени.
15 Мне же даде бог глаголати по разумению и мнети достойне о подаваемых, яко той и премудрости предводитель есть и премудрых исправитель:
16 в руку бо его и мы и словеса наша, и всякий разумъ и дел художество.
17 Сей бо даде мне о сущих познание неложное, познати составление мира и действие стихий,
18 начало и конец и средину времен, возвратов премены и изменения времен,
19 лет круги и звезд расположения,
20 естество животных и гнев зверей, ветров усилие и помышления человеков, разнство летораслем и силы корений.
21 И елика суть скрыта и явна, познах: всех бо художница научи мя премудрость.
22 Есть бо в той дух разума свят, единородный, многочастный, тонкий, благодвижный, светлый, нескверный, ясный, невредителный, благолюбивый, остр, невозбранен, благоделателен,
23 человеколюбив, известный, крепкий, безпечальный, всесильный, всевидяй, и сквозе вся проходяй духи разумичныя, чистыя, тончайшия.
24 Всякаго бо движения подвижнейша есть премудрость: достизает же и проницает сквозе всяческая ради (своея) чистоты.
25 Пара бо есть силы божия и излияние вседержителя славы чистое: сего ради ничтоже осквернено на ню нападает.
26 Сияние бо есть света присносущнаго и зерцало непорочно божия действия и образ благостыни его.
27 Едина же сущи всяческая может, и пребывающи в себе вся обновляет, и по родом в души преподобных преходящи, други божия и пророки устрояет:
28 ни когоже бо любит бог, токмо сего, иже со премудростию пребывает.
29 Есть бо сия благолепнее солнца и паче всякаго расположения звезд: свету соравняема обретается первая:
30 сего бо преемлет нощь, премудрости же не одолеетъ злоба.
1 Досязает же от конца даже до конца крепко и управляет вся благо.
2 Сию возлюбих и поисках от юности моея, и взыскахъ невесту привести себе, и любитель бых красоты ея.
3 Благородство славит сожитие божие имущи, и всех владыка возлюби ю:
4 таибница бо есть божия хитрости и обретателница делъ его.
5 И аще богатство есть вожделенное притяжание в животе, что премудрости богатейше, еюже делаются вся?
6 Аще же разум делает, кто ея от сущих лучший художник есть?
7 И аще правду любит кто, труды ея суть добродетели: целомудрию бо и разуму учит, правде и мужеству, ихже потребнее ничтоже есть в житии человеком.
8 Аще же и многаго искусства желает кто, весть древняя и быти хотящая разсмотряет: свесть извития словесъ и разрешения гаданий, знамения и чудеса проразумеваетъ и сбытия времен и лет.
9 Судих убо сию привести мне к сожитию, ведый, яко будет ми советница благих и утешение попечений и печали.
10 Имети буду ради ея славу в народех и честь пред старцы, юн сый:
11 остр обрящуся в суде, и лица сильных удивятся мне:
12 молчащу ми потерпят и вещающу ми имут внимати, и глаголющу ми о мнозе, руку положат на уста своя.
13 Сея ради прииму безсмертие и память вечную сущимъ по мне оставлю:
14 управлю люди, и языцы покорятся ми:
15 убоятся мене слышавшии мучителие страшнии: во множестве явлюся благ и в брани крепок.
16 Вшед в дом мой упокоюся с нею: не бо имать горести сообщение ея, ни болезни сожитие тоя, но веселие и радость.
17 Сия помыслив во мне, печахся в сердцы моем, яко безсмертие есть в сродстве премудрости,
18 и в содружении ея услаждение благо, и в трудехъ руку ея богатство без оскудения, и в сообучении беседы ея разум, и благославие в приобщении словесъ ея, обхождах ишущь, да восприиму ю в себе.
19 отрок же бех остроумен, душу же получих благу:
20 паче же благ сый приидох в тело нескверно.
21 Познав же, яко не инако одержу, аще не бог даст, и сие же бе разума, еже ведети, чия есть благодать, приидох ко господу и молихся ему, и рекох от всего сердца моего:
1 боже отцев и господи милости твоея, сотворивый вся словом твоимъ
2 и премудростию твоею устроивый человека, да владеетъ сотворенными от тебе тварьми,
3 и да управляет мир в преподобии и правде, и в правоте души суд да судит:
4 даждь мне твоим престолом приседящую премудрость и не отрини мене от отрок твоих:
5 яко аз раб твой и сын рабыни твоея, человекъ немощен и маловременен и умален в разуме суда и законов.
6 Аще бо кто будет и совершен в сынех человеческих, отсутствующей твоей премудрости, ни во чтоже вменится.
7 Ты избрал мя еси царя людем твоим и судию сыномъ твоим и дщерем,
8 и рекл ми еси создати храм в горе святей твоей и во граде обитания твоего олтарь, подобием скинии (твоея) святыя, юже предуготовал еси от начала.
9 И с тобою премудрость ведущая дела твоя и присутствующая тогда, егда мир творил еси, и ведущая, что есть угодно пред очима твоима и что право в заповедехъ твоих:
10 посли ю с небес святых и от престола славы твоея посли ю: да сущи со мною трудится, и увем, что благоугодно есть пред тобою:
11 весть бо она вся и разумеет, и наставит мя в делех моих целомудренне и сохранит мя во славе своей:
12 и будут приятна дела моя, и разсужду люди твоя праведне, и буду достоин престолов отца моего.
13 Кто бо от человек познает совет божий? или кто помыслит, что хощет богъ?
14 Помышления бо смертных боязлива, и погрешителна умышления наша:
15 тело бо тленное отягощает душу, и земное жилище обременяет ум многопопечителен.
16 И едва разумеваем, яже на земли, и яже въ руках обретаем со трудом: а яже на небесех, кто изследи?
17 Волю же твою кто позна, аще бы не ты дал еси премудрость и послал еси духа святаго твоего от высоты?
18 И тако исправишася стези сущих на земли, и яже тебе угодна, научишася человецы
19 и премудростию спасошася.
1 Сия первозданнаго отца миру единаго созданнаго сохрани и изведе его от греха его,
2 даде же ему крепость содержати всяческая.
3 отступив же от нея неправедный во гневе своем со братоубийственными погибе яростьми:
4 егоже ради потопляему землю паки спасе премудрость, малым древом праведника соблюдши.
5 Сия и во единомыслии лукавства смешеных языковъ обрете праведника и сохрани его непорочна богу, и въ поболении о чаде крепка соблюде.
6 Сия праведнаго, погибающим нечестивым, избави бежащаго от огня низходяща на пять градов:
7 ихже еще свидетелство лукавствия дымящаяся стоитъ земля пуста, и несовершенными времены плодоносящая древеса, и неверныя души память стоящь столп слан.
8 Премудрость бо мимоходящии не токмо повредишася, еже не ведети блага, но и безумия своего оставиша житию память, да в нихже согрешиша, ниже утаитися возмогут.
9 Премудрость же служащих ей от болезней избави.
10 Сия бежащаго от гнева братня праведника настави на стези правы и показа ему царствие божие и даде ему разум святых, почте его в трудех и умножи труды его.
11 Во обиде обдержащих его предста ему и обогати его,
12 сохрани его от враг, и от наветующих защити его, и подвиг крепок на победу даде ему, да увесть, яко всех сильнее есть благочестие.
13 Сия проданаго праведника не остави, но от греха избави его: сниде с ним в ров,
14 и во узах не остави его, дондеже принесе ему скиптр царствия и власть на мучащих его: лживыхъ же показа, порок сотворших нань, и даде ему славу вечную.
15 Сия людей преподобных и семя непорочное избави от язык оскорбляющих:
16 вниде в душу раба господня и воста противу царей страшныхъ в чудесех и знамениих.
17 Воздаде преподобным мзду трудов их, настави ихъ в путь дивен и бысть им в покров днем и в пламень звезд в нощи.
18 Преведе их но морю чермному и проведе их сквозе воду многу:
19 враги же их потопи и из глубины бездны изрину их.
20 Сего ради праведнии взяша корысти нечестивых и воспеша, господи, имя святое твое, и одолетелницу руку твою похвалиша единодушне:
21 яко премудрость отверзе уста немых и языки младенцем сотвори ясны.
1 управи дела их рукою пророка святаго:
2 проидоша пустыню необитанную и в непроходимых водрузиша кущи,
3 сопротивишася супостатом и отмстиша врагом:
4 возжадаша и призваша тебе, и дана бысть им вода от камене несекомаго и изцеление жажды от камене жестока.
5 Имиже бо наказани быша врази их,
6 сими сии во оскудении суще благодетелствовани быша:
7 за источник убо приснотекущия реки, кровию излиянною смятенныя,
8 во обличение младенцеубийственнаго повеления, дал еси им изобилну воду безнадежно,
9 показав тогда жаждею, како противных умучил еси.
10 Егда бо искушени быша и в милости наказани, познаша, како во гневе судимии нечестивии мучишася:
11 сих бо яко отец учащь искусил еси, онехъ же яко жесток царь осуждая истязал еси.
12 отстоящии же и присутствующии такожде мучишася:
13 сугуба бо их прият печаль и стенание с памятию минувших.
14 Егда бо слышаху своими мучении благодействуемыхъ оных, познаваху господа:
15 егоже бо древле во отложении отвержена отрекошася смеющеся, при концы события удивишася, неподобною праведнымъ томими жаждею.
16 За помышления же безумная неправды их, в нихже заблудивше почитаху безсловесная пресмыкающаяся и зверей худых, послал еси им множество безсловесных животных во отмщение,
17 да познают, яко имиже кто согрешает, сими и мучится.
18 Не неможаше бо всесильная рука твоя, яже сотвори миръ от безобразнаго вещества, послати на них множество медведей, или лютых львов,
19 или новосозданных ярости исполненых зверей незнаемых, или огненным дышущих духом, или злосмрадный произносящихъ дым, или страшныя из очей искры испускающих:
20 ихже не токмо вред можаше истребити я, но и зракъ устрашающь погубити.
21 И без тех, единым духом пасти могоша, от суда гоними и развеяни от духа силы твоея: но вся мерою и числом и весом расположил еси.
22 Еже бо много мощи, присутствует тебе всегда, и державе мышцы твоея кто сопротивится?
23 Понеже, якоже стражик в превесех, (тако) весь мир пред тобою, и яко капля росы утренния, сходящия на землю.
24 Милуеши же всех, яко вся можеши, и презираеши грехи человеком в покаяние.
25 Любиши же сущая вся, и ни чесогоже гнушаешися, яже сотворил еси: ниже бо ненавидя что устроил еси.
26 Како же пребыло бы что, аще бы ты не изволил еси? или, еже не наречено от тебе, сохранилося бы?
27 Щадиши же вся, яко твоя суть, владыко душелюбче!
1 Нетленный бо дух твой есть во всех.
2 Темже заблуждающих помалу обличаеши, и в нихже согрешают, воспоминая учиши, да пременившеся от злобы веруютъ в тя, господи.
3 И древних бо обитателей земли святыя твоея возненавидев,
4 ради деяний злых волшвений, яже творяху, и жертвъ непреподобных,
5 и чадоубийц немилостивых, и утробоядцев человеческихъ плотей, и кровопийцев от среды святыни твоея,
6 и родителей убивших души безпомощныя, восхотелъ еси погубити руками отец наших:
7 да достойное приимет преселение отроков божиих, яже у тебе всех дражайшая земля.
8 Но и сих яко человеков пощадил еси, послалъ же еси предтекущия воинства твоего осы, яко да тех помалу истребят.
9 Не несилен еси во брани покорити нечестивых праведным, или зверем свирепым, или словом жестоким до единаго потребити:
10 судящь же помалу давал еси место покаянию, не неведяй, яко лукав род их и естественная злоба их, и яко не пременится помышление их во век.
11 Семя бо бе проклято от начала: ниже бояйся кого, отпущение даял еси грехом их.
12 Кто бо речет (тебе): что сотворил еси? Или кто станет противу суду твоему? кто же истяжет тя о языцехъ погибших, ихже ты сотворил еси? или кто в предстателство тебе приидет, отмститель на неправедныя человеки?
13 Несть бо ин бог разве тебе, иже радиши о всех, да покажеши, яко не неправо судил еси.
14 Ниже царь, или мучитель противу тебе воззрети может, о ихже погубил еси.
15 праведн же сый, праведно вся управляеши, недолжнаго же мучитися осудити чуждо мниши твоея силы.
16 Крепость бо твоя правды начало и еже над всеми твое владычество, всех щадети творит.
17 Крепость бо показуеши неверующим о совершенстве силы, а в ведущих дерзость обличаеши.
18 Ты же владычествуяй силою в кротости судиши и с великимъ щадением разсмотряеши нас: с тобою бо есть, егда хощеши, еже мощи.
19 Научил же еси люди твоя сицевыми делы, яко подобаетъ праведному быти человеколюбцу, и благонадежны сотворилъ еси сыны твоя, яко даеши о гресех покаяние.
20 Аще бо враги отроков твоих и должных смерти с толиким мучил еси внятием и щадением, даяй времена и место, имиже бы изменилися от злобы:
21 с коликим прилежанием судил еси сыны твоя, ихже отцем клятвы и заветы дал еси благих обещаний.
22 Нас убо наказуя, враги наша тмами биеши, да благостыню твою помышляем судяще, судими же чаем милости.
23 отонудуже и неправедных, во безумии поживших живот, свойственными их мерзостьми мучил еси,
24 ибо в путех заблуждения должае заблудиша, боги мняще, яже и во животных вражиих безчестна, аки младенцы безумнии прельстившеся.
25 Сего ради яко отроком несмысленным суд въ поругание послал еси:
26 иже поруганьми прещения не наказавшеся, достойна суда божия искусят.
27 В нихже бо тии страждуще негодоваху, в сих, ихже мняху быти боги, в тех мучими, видяще егоже прежде отметахуся знати,
28 бога истиннаго познаша: темже и конец осуждения прииде на ня.
1 Суетни убо вси человецы естественне, въ нихже обретается неведение о бозе, и от видимыхъ благ не возмогоша уразумети сущаго, ни делом внемлюще познаша хитреца:
2 но или огнь, или дух, или скор воздух, или круг звездный, или зелную воду, или светила небесная, строители миру боги (быти) возмнеша.
3 Ихже аще убо красотою услаждающеся, сия боги возмнеша, да уведят, колико сих владыка есть лучший: красоты бо родоначалник созда я.
4 Аще же силе и действию удивишася, да уразумеютъ от них, колико сотворивый сия сильнейший есть:
5 от величества бо красоты созданий сравнително рододелатель их познавается.
6 Но обаче на сих есть уничижение мало, ибо сами сии негли прельщаются, бога ищуще и хотяще обрести:
7 в делех бо его живуще изследуют и увещаваются зраком, яко блага видимая.
8 Паки ниже сии прощения достойни:
9 аще бо толико возмогоша ведети, да возмогут уразумети век, сих же владыку како скорее не обретоша?
10 окаянни же суть, и в мертвых упования их, иже назваша боги дела рук человеческих, злато и сребро, хитрости умышление, и подобия животных, или камение неключимо, дело руки древния.
11 Аще же кто дровосечец тектон, угодное древо отсек, отешет благохудожне всю кору его, и хитрствуя благолепне сотворит угоден сосуд во употребление жития,
12 останки же дела на уготование брашна изнуривъ насытися:
13 останок же иже от них ни во что благопотребен, древо криво и сучия полно, приим извая с прилежаниемъ праздности своея и искусством разума изобрази его, и уподоби его образу человечу,
14 или некоему животному ничтожному уподоби его, помазав шарами различными и очервленив вид его, и всяк порок, иже на нем есть, измазав,
15 и сотворив ему достойное его обитание, на стене постави е, укрепив железом.
16 Да не убо падет, предумысли о нем, ведый, яко не может помощи себе: ибо идол есть и требуетъ помощи.
17 о стяжаниих же и о брацех и чадех своих моляся, не стыдится к бездушному глаголя,
18 и о здравии убо немощное призывает, и о животе мертвое молит, и в помощь неключимое призывает,
19 и о путешествии (проситъ) ниже ходити могущаго, и о притяжании и деянии и о рук подтверждении некрепкаго руками, мужества просит от того, еже всех есть немощнейшее.
1 Плыти паки кто помыслив и сверепыя волны преходити, носящаго его корабля тленнейшее древо призывает:
2 оное бо желание пристяжаний умысли, хитрец же мудростию содела:
3 твой же, отче, устрояет промысл: яко далъ еси и в мори путь и в волнах стезю крепкую,
4 показуя, яко силен еси от всякаго спасти, аще и без художества кто взыдет.
5 Хощеши же, да не будут праздна дела премудрости твоея: сего ради и малейшему древу вверяют человецы души (своя), и преходяще волны кораблецем избавлени суть.
6 И от начала бо, егда погибаху гордии исполини, упование мира в кораблеце избежавшее, остави веку семя рождения, рукою твоею устроено.
7 Благословено бо древо, имже бывает правда.
8 Рукотворенное же проклято есть, и сотворивый е: яко ов убо содела, сие же тленное богом именовася.
9 В равне бо ненавидима суть богу и нечествуяй, и нечестие его:
10 ибо сотвореное с сотворшим мучимо будет.
11 Сего ради и во идолех языческих будет казнь, яко в создании божии в мерзость сотворени суть и въ соблазны душам человеческим и в сеть ногам буих.
12 Начало бо блужения умышление идолов: изобретение же их тление живота.
13 Ниже бо быша от начала, ниже будут во веки:
14 тщеславием бо человеческим внидоша в мир, и сего ради краток их конец вменися.
15 Горьким бо плачем сетуя отец скоро восхищенаго чада образ сотворив, егоже тогда человека мертва, ныне яко бога почте: и предаде подручным тайны и жертвы:
16 потом временем возмогший нечестивый обычай, аки закон хранимь бысть, и мучителей повелением почитаема бяху изваянная:
17 ихже в лице не могуще чествовати человецы дальнаго ради обитания, издалеча лице изобразивше, явный образ почитаемаго царя сотвориша, яко да отстоящаго аки близ сущаго ласкают со прилежанием.
18 В продолжение же злочестия и не разумеющих принуди художниково любочестие.
19 Сей бо хотя угодити державствующему, произведе хитростию (своею) подобие на лучшее:
20 множество же человек, привлечено благообразием дела, прежде вмале чествованаго человека ныне в бога вмениша.
21 И сие бысть житию в прельщение, яко или злоключению, или мучителству послуживше человецы, несообщно имя камению и древам обложиша.
22 Посем не доволно бе прельщатися о божии разуме, но и в велицей живуще безумия брани, толикая злая миръ именуют.
23 Ибо или детоубийственныя жертвы, или сокровенныя тайны, или неистовныя от иных законов пиршества творяше,
24 ниже жития, ниже браков чистых еще хранят: един же другаго или наветом убивает, или блудя оскорбляет.
25 Вся же смешена суть, кровь и убийство, татьба и лесть, растление, неверство, смятение, заклинание, молва благих,
26 благодати забвение, душам осквернение, рождению пременение, браков безчиние, прелюбодеяние и студодеяние.
27 Недостойных бо имене идолов служение начало всякаго зла, и вина и конец есть:
28 ибо или веселящеся неистовствуют, или пророчествуютъ ложная, или живут неправедне, или кленутся скоро.
29 На бездушныя бо идолы надеющеся, зле кленущеся казними быти не чают.
30 За обоя же на них приидет суд: понеже зле мудрствоваша о бозе, внемлюще идолом, и неправедно кляшася лестию, презревше преподобие.
31 Не бо сила кленущих, но согрешающим суд находитъ всегда на преступление неправедных.
1 Ты же бог наш благ и истинен, долготерпеливъ и в милости управляяй вся.
2 Ибо аще согрешим, твои есмы, ведуще державу твою: и аще не согрешим, вемы, яко тебе вменихомся.
3 Еже бо знати тебе, всесовершена (есть) правда, и ведети державу твою, корень есть безсмертия.
4 Ниже бо прельсти нас человеческое злохитрое умышление, ниже сеннописаных труд безплодный, вид изваян различными шары,
5 ихже зрак безумным приходит в похотение, и любятъ мертваго образа вид бездушный.
6 злых любителие достойнии таковых надежд и творящии, и любящии, и чествующии.
7 Ибо скудельник, мягкую землю мнущь со трудом, делаетъ ко служению нашему коеждо: но от тогожде брения созда и яже чистых дел служебныя сосуды, и сопротивныя, вся подобне: сих же обоих коегождо есть употребление, судия есть бреноделатель.
8 И злотрудник бога суетна от тогожде творит брения, иже мало прежде от земли сотворен быв, по мале идет, из неяже взят бысть, истязан о душевнем долзе.
9 Но есть ему прилежание, не яко имать трудитися, ниже яко краткоконечно житие имать: но ревнуетъ златоделателем и сребролиятелем, и меди делателемъ подражает, и славу мнит, яко скверная делает.
10 Пепел бо есть сердце его, и земли хуждше упование его, и брения безчестнее живот его:
11 яко не уведе создавшаго его, и вдохнувшаго ему душу действительную, и вдунувшаго дух животный.
12 Но вмениша игралище быти живот наш, и житие все упражнено на приобретение: ибо глаголют, яко подобаетъ откуду либо, аще и от зла, приобретати.
13 Сей бо паче всех весть, яко согрешает, от вещества земленаго удобныя к сокрушению сосуды и изваяния содеваяй.
14 Вси же пребезумнейшии и окаяннейшии, паче души младенческия, врази людий твоих обладавшии ими:
15 яко вся идолы язычески вмениша в боги, имже ниже очес употребление ко зрению, ниже ноздри в привлечение аера, ниже уши слышати, ниже персты рук во осязание, и ноги их праздны ко хождению.
16 Человек бо сотвори их, и духа взаим взяв созда их: ни един бо человек может себе подобна бога создати:
17 смертен же сый мертва делает рукама беззаконныма: лучший бо есть идолов своих: (яко) сей убо поживе, онии же никогда.
18 И животных мерзких чтут: безумная бо сравняемая иных суть хуждша.
19 Ниже елико вожделети яко в лицы животных блага суть, отбегоша же и божия хвалы и благословения его.
1 Сего ради от подобных пострадаша достойне, и множеством зверей казнени быша.
2 Вместо мучения благо сотворил еси людем твоим, в похотение желания странное вкушение, пищу уготовалъ еси крастели,
3 да они убо вожделевшии пищи, показанием посланых, и от нужнаго хотения отвратятся, сии же вмале скудни бывше, и странна приобщатся вкушения.
4 Подобаше бо на оных убо неизбежней нищете наити мучителствующих, сим же токмо показати, како врази ихъ мучишася.
5 Ибо егда тем найде жесток зверей гнев, и угрызеньми сверепых истребляхуся змиев,
6 но не до конца пребысть гнев твой: в наказание же вмале смущени быша, знамение имеюще спасения, на воспоминание заповеди закона твоего:
7 обративыйся бо не (вещию) зримою целяшеся, но тобою всех спасителем.
8 И в сем же показал еси врагом нашим, яко ты еси избавляяй от всякаго зла:
9 тех бо акриды и мухи побиша угрызением, и не обретеся цельба душам их, яко достойни бяху от таковых мучитися.
10 Сынов же твоих ниже ядовитых змиев зубы одолеша: милость бо твоя прихождаше и изцеляше их.
11 В память бо словес твоих бяху усечени и скоро изцеляхуся, да не во глубину впадше забвения отлучатся твоего благодеяния:
12 ниже бо зелие, ниже обязание изцели их, но слово твое, господи, изцеляющее вся.
13 Ты бо живота и смерти власть имаши, и низводиши даже до врат ада, и возводиши.
14 Человек же убивает убо злобою своею: изшедшаго же духа не возвратит, ниже паки призывает душу взятую.
15 Твоея же руки избежати невозможно есть:
16 отметающиися бо тебе ведети нечестивии, в крепости мышцы твоея биени быша странными дождьми и градами, и бурями гоними неизбежно, и огнем растаеваеми.
17 Преславное бо, в воде вся угашающей множае действоваше огнь: споборник бо есть мир о праведных.
18 овогда бо убо укрощашеся пламень, да не сожжетъ посланных животных на нечестивыя: но сии зряще да ведят, яко от божия суда страждут гонение.
19 овогда же и между водою выше силы огненныя паляше, да беззаконныя земли порождения растлит.
20 Вместо же сих ангелскою пищею питал еси люди твоя, и уготован хлеб с небесе послал еси им без труда, всякое услаждение в себе имеющь и ко всякому сличный вкушению.
21 Существо бо твое сладость твою ко сыном показоваше, и угождая единаго коегождо воли, якоже кто хотяше, превращашеся.
22 Снег же и лед терпяху огнь и не растаяваху: да уведят, яко плоды врагов истребляше огнь горящь во граде и в дождех блистающь:
23 тойже паки, да питаются праведнии, (огнь) и свою забы силу.
24 Творение бо, тебе творцу всех служащее, распростирается на муку противу неправедных и легчае творится во благодеяние ради на тя надеющихя.
25 Сего ради и тогда во вся преобразуемое всех кормителнице благодати твоей служаше к воли требующих:
26 да научатся сынове твои, ихже возлюбил еси, господи, яко не рождения плодов питают человека, но слово твое тебе верующих соблюдает.
27 Еже бо огнем нерастлено скоро от малыя лучи солнечныя греемое растаявашеся:
28 да знаемо будет (всемъ), яко подобает предварити солнце на благодарение тебе и к востоку света тебе поклонитися.
29 Неблагодарнаго бо упование яко зимный иней растает, и излиется яко вода неключима.
1 Велицы бо суть суди твои, (господи,) и неизглаголанни: сего ради ненаказанныя души заблудиша.
2 Возмневше бо насильствовати язык святый беззаконнии, узницы тмы и долгою нощию связани, заключени подъ кровы, беглецы вечнаго проведения лежаша.
3 утаитися бо мняще в сокровенных гресех, мрачнымъ забвения покрывалом расточени быша, ужасающеся люте и страшилищами возмущени:
4 ниже бо содержай их вертеп без страха сохрани, шумы же сходяще возмущаху их, и привидения дряхлая печальными лицами являхуся.
5 И огненная убо ни едина сила можаше освещати, ниже звезд светлии пламение просветити можаху въ ту нощь страшную.
6 являшеся же им токмо внезапный огнь страха исполнь: устрашаеми же невидимым оным призраком, мняху горшая быти видимая.
7 Волшебнаго же художества предлежаху посмеяния, и о премудрости величания обличение укоризненно:
8 обещающиися бо изгнати страхи и смущения от души болящия, сии посмеятелным страхом боляху.
9 Ибо аще и ничтоже их мятежное устрашаше, зверей преходами и змиев звизданьми подвижени погибаху трепетни, и аера отнюд неизбежнаго отрицающеся видети.
10 Боязливая бо злоба, своим свидетелством осуждаема, выну приемлет во ум лютая, содержима совестию.
11 Ничтоже бо есть страх, токмо лишение помощей сущихъ от помышления.
12 Внутрь же менше сущее чаяние, болшее мнит неведение вины подающия муку.
13 А иже в немощную поистинне нощь, и от немощнаго ада вертепов нашедшую, сном темже спящии,
14 ово убо страшилищами мечтаний гоними бяху, ово же души изчезаху преданием: внезапный бо им и нечаянный страх найде.
15 Потом тако, кто либо когда бе онамо, низпадый храняшеся в темнице без железа заключен:
16 аще бо земледелатель кто бысть, или пастырь, или трудов пустынных делатель, предъят быв, неизбежную терпяше нужду:
17 единым бо ужем тмы вси бяху связани. Аще дух звиздаяй, или между частых древесных ветвей птичий глас сладкопеснивый, или сила водная текущи зелне,
18 или шум зелный низпадающих камений, или играющихъ животных течение невидимое, или рыкающих лютых зверей глас, или отзывающься от дебрей горских глас, разслабляху оных устрашающе.
19 Вся бо вселенная светлым просвещашеся светом, и невозбранными делы содержашеся:
20 на единых же оных простирашеся тяжкая нощь, образъ будущаго их восприятия тмы: сами же себе быша тмы тяжчайшии.
1 Преподобным же твоим превелик бе свет: ихже убо глас слышаше, образа же не видяще, занеже убо и они (тогожде) не страдаху, ублажаху.
2 А яко не пакоствуют предобидимии, благодаряху, и еже пронестися, благодати моляху.
3 Сих ради столп огнегорящь, вожда убо неведомаго путьшествия, солнце же невредителное любочестнаго странствования подал еси.
4 Достойни бо они лишитися света и блюстися во тме, иже заключеных стрежаху сынов твоих, имиже имяше нетленный закона свет веку датися.
5 Советовавших же их убивати младенцы преподобных, и единому отложену чаду и спасену, во обличение ихъ отял еси множество чад, и купно погубил еси в воде зелней.
6 оная бо нощь предуведена бысть отцем нашим, да твердо ведуще, имже клятвам вероваша, возблагодушествуют.
7 Восприято же бысть от людий твоих спасение убо праведных, врагов же истребление:
8 имже бо наказал еси супостаты наша, сим нас призвавъ прославил еси.
9 Сокровенно бо жряху преподобнии отроцы благих, и закон божественный единомыслием завещаша, таяжде подобно, благая же и бедственная восприимати святым, отцемъ уже предвоспевающим хвалу.
10 Противогласяше же несогласный врагов вопль, и плачевный слышашеся глас плачущих младенцев.
11 Подобною же местию раб купно с господином казненъ бысть, и простый человек с царем таяжде пострада:
12 единодушно же вси во единем имени смертнемъ мертвых имеяху безчисленных: ниже бо ко погребению живии бяху доволни, понеже во единем мгновении честнейший род их истреблен бысть.
13 о всех бо не верующе ради чародеяний, а ради первенцевъ истребления, исповедаша людий сынов божиих быти.
14 Тихому бо молчанию содержащу вся, и нощи во своемъ течении преполовляющейся,
15 всемогущее слово твое, (господи,) с небес от престоловъ царских жесток ратник в средину погибельныя земли сниде.
16 Мечь остр нелицемерное повеление твое носяй, и став исполни вся смерти: и небесе убо касашеся, стояше же на земли.
17 Тогда внезапу привидения убо снов люте смутиша их, страси же наидоша нечаянни,
18 и ин инамо вержен еле жив, еяже ради вины умираше, объявляше:
19 сония бо, смутивше их, сие предвозвестиша: да не ведяще, егоже ради зле страждут, погибнут.
20 Прикоснуся же некогда и праведных искушение смерти, поражение во пустыни бысть множества: но не долго пребысть гнев.
21 Потщався бо муж непорочен предпоборствова, своея службы оружие, молитву и фимиама умилостивление принес, сопротив ста гневу и конец положи бедствованию, показав, яко твой есть раб.
22 одоле же поражающаго не силою телесною, ниже оружия действием, но словом покори наказующаго, клятвы отцевъ и заветы воспомянув.
23 Громадами бо уже падшим друг на друга мертвым, посреде став, пресече гнев и раздели к живымъ путь.
24 На одежди бо подира бе весь мир, и отцевъ славы на изваянии четырерядоваго камения, и величество твое на диадиме главы его.
25 Сим уступил искореняяй и сих устрашися: бе бо токмо искушение гнева доволно.
1 Нечестивым же до конца без милости ярость найде: предведе бо их и будущая,
2 яко тии отпустившии, еже отити, и со тщаниемъ предпославше их, поженут вслед раскаявшеся:
3 еще бо в руках имеюще рыдания и сетующе надъ гробами мертвых, ин себе взяша помысл безумия, и ихже моляще изгнаша, сих аки беглецев гоняху.
4 Влечаше бо их к сему концу достойная нужда, и приключшихся забытие вложи, да и прочую к мучением принаполнятъ казнь:
5 и людие убо твои преславное путьшествие прейдут, они же странну обрящут смерть.
6 Все бо творение во своем ему роде паки свыше преобразовашеся, служащее свойственным твоим повелением, да отроцы твои сохранятся невреждени.
7 облак осеняяй полк их, и из преждебывшия воды открытие сухия земли явися, и из моря чермнаго путь невозбранен, и поле злачное от волнения зелнаго:
8 имже весь язык пройде, твоею рукою покровени, видяще дивная чудеса.
9 якоже бо кони насытишася, и яко агнцы взыграшася, хваляще тя, господи, избавльшаго их:
10 воспомянуша бо еще, яже во обитании их, како убо вместо рождения животных изведе земля скнипы, вместо же рыб изрыгну река множество жаб.
11 Последи же видеша и новое рождение птиц, егда похотением подвигшеся, просиша сладостныя пищи.
12 Во утешение бо взыдоша им от моря крастели: и мучения грешным наидоша, не без бывших знамений силою молний: праведне бо пострадаша за своя злобы,
13 ибо лютейшее ненавидение странных совершиша: инии убо незнаемых не приемляху пришелцев, сии же благодетелей странных порабощаху.
14 И не токмо, но аще кое разсмотрение будет их: зане враждебно приемляху чуждых.
15 Сии же с празднествами приемше приобщившихся уже их обычаем, жесточайшими озлобиша трудами.
16 Побиени же быша и ослеплением, якоже онии при дверех праведника, егда великою обложени тмою, кийждо своих дверий прохода искаше.
17 Сами бо собою стихии пременяемы, якоже в гуслехъ гласы сличия имя пременяют, всегда храняще звук: еже есть видети от зрака бывших известно.
18 Земная бо в водная прелагахуся, и плавающая прехождаху на землю.
19 огнь возмогаше в воде вышше своея силы, и вода угашающую силу забы.
20 Пламень вопреки удоботленных животных не вреди плотей в нем ходящих, ниже таяше ледовидный удоботаяй род сладостныя пищи.
21 По всему бо, господи, возвеличил еси люди твоя и прославилъ еси, и не презрел еси, во всяцем времени и месте предстояй.
Заметили ошибку в тексте? Выделите её мышкой и нажмите Ctrl+Enter
<<< | ОГЛАВЛЕНИЕ | БИБЛИОТЕКА | >>>